07/17/13

ဇူလိုင်လ ၁၉ ရက်နေ့တွင် ကျရောက်မည့် (၆၆) နှစ်မြောက် အာဇာနည်နေ့အခမ်းအနားတွင် အင်းစိန်မြို့နယ်၊ စဥ့်ငူရပ်ကွက် အောင်ဆန်းစက်မှုလက်မှုကျောင်း အတွင်းရှိဗိုလ်ချုပ်အောင်ဆန်းကြေး ရုပ်ရှေ့တွင် ငြိမ်းချမ်းစွာစုဝေးခွင့် နှင့် စီတန်းလှည့်လည်ဂါရ၀ပြုခွင့် ကို လျှောက်ထားခဲ့သော်လည်း ခွင့်ပြုချက်မရခဲ့ကြောင်း သိရသည်။
အဆိုပါကိစ်္စနှင့် ပတ်သက် ၍ စာနယ်ဇင်းရှင်းလင်းပွဲကို အင်းစိန်မြို့နယ်ရှိရွှေစည်းစိမ်ခန်း မ၌ ဇူလိုင်လ ၁၅ ရက်နေ့တွင် ကျင်းပခဲ့ပြီး ထိုသို့ငြိမ်းချမ်းစွာ စုဝေးခြင်းနှင့် ငြိမ်းချမ်းစွာစီတန်း လှည့်လည်ခွင့်ကို ငြင်းပယ်ခြင်းခံ ရသော်လည်း ဆက်လက်ဆောင် ရွက်သွားမည်ဖြစ်ကြောင်း သိရ သည်။

“နိုင်ငံသာားတိုင်းရဲ့ လုပ်ပိုင် ခွင့်နဲ့ ကျွန်တော်တို့မဖြစ်မနေ ဇူလိုင်လ ၁၉ ရက်နေ့မှာ အောင်ဆန်းစက်မှုလက်မှုအထက် တန်းကျောင်းဝန်မှာရှိတဲ့ ဗိုလ်ချုပ် ကြေးရုပ်ရှေ့မှာသွားရောက်ပြီး ဂါရ၀ပြုမှာပါ”ဟု ဗိုလ်ချုပ်ကြေးရုပ် နှင့် ဗိုလ်ချုပ်ပန်းခြံဘက်စုံပြုပြင် မွမ်းမံတည်ဆောက်ရေးကွန်ရက်မှ ယာယီဥက္ကဋ္ဌဦးတင်လှိုင်ကပြော သည်။
“ကျွန်တော်တို့နည်းဥပဒေ၊ လုပ်ထုံးလုပ်နည်းတွေနဲ့ ခွင့်ပြုချက် လျှောက်ထားပါတယ်။ ဆက်လက် ပြီးတော့လဲအယူခံဝင်သွားမှာပါ။ ခွင့်ပြုချက်မရလို့အရေးယူမယ်ဆို ရင်လဲ ကျွန်တော်တို့အားလုံးအရေး ယူခံမှာပါ”ဟု အဆိုပါကွန်ရက်မှ ကိုကျော်ဝဏ္ဏကပြောကြားခဲ့သည်။

ငြင်းပယ်စာတွင် အာဇာနည် ဗိမာန်သည်အပတ်စဉ်တနလာင်္နေ့ တွင် သာပိတ်ပြီးတစ်နှစ်ပတ်လုံး ဖွင့်လှစ်ထားသဖြင့် အာဇာနည် ဗိမာန်၌သာဆောင်ရွက်ရန်နှင့် စက်မှု၊ လက်မှုအထက်တန်းကျောင်း အတွင်းခွင့်မပြုကြောင်းပါရှိသည်။

ကျော်မာဃ
The hot new weekly


Photo..www.naharnet.com
(AFP မှ 16 July 2013 ရက်စွဲပါ “Myanmar to free all political prisoners by end of year”သတင်းကို ဘာသာပြန်ဆို သည်)

မြန်မာနိုင်ငံတွင် နိုင်ငံရေးအကျဉ်းသားများအားလုံးကို ယခုနှစ်ကုန်မတိုင်မီ လွှတ်ပေးမည်ဖြစ်ပြီး အစိုးရနှင့် တိုင်းရင်းသားအုပ်စုများ အကြားမှ ပဋိပက္ခများသည်လည်း သီတင်းပတ်များအတွင်း အဆုံးသတ်သွားဖွယ်ရှိကြောင်း မြန်မာ သမ္မတဦးသိန်းစိန်က ပြောကြားလိုက်ပါသည်။

တနင်္လာနေ့က လန်ဒန်ခရီးစဉ်တွင် ဗြိတိသျှဝန်ကြီးချုပ် ဒေးပစ်ကင်မရွန်းနှင့် တွေ့ဆုံစဉ် ဦးသိန်းစိန်က ထိုသို့ ပြောကြားခဲ့ခြင်းဖြစ်သည်။

“ဒီနှစ်ကုန်ဆိုရင် မြန်မာနိုင်ငံမှာ ယုံကြည်ချက်အကျဉ်းသား(နိုင်ငံရေး အကျဉ်းသား) လုံးဝရှိတော့မှာ မဟုတ်ဘူး ဆိုတာကို ကျွန်တော် အာမခံပါတယ်။ ကျွန်တော်တို့ဟာ နှစ်ပေါင်း ၅၀ အာဏာရှင်စစ်အုပ်ချုပ်ရေးစနစ်ကနေ ဒီမိုကရေစီ စနစ်တစ်ခုဆီကို ကူးပြောင်းမှု တစ်ခုတည်းကိုပဲ အာရုံစိုက် ဦးတည်နေပါတယ်”ဟု မြန်မာသမ္မတ ဦးသိန်းစိန်က ပြောကြား သည်။

တချိန်က တပ်မတော်အစိုးရအဖွဲ့ဝင် ဗိုလ်ချုပ်ကြီးတစ်ဦးဖြစ်သူ ဦးသိန်းစိန်သည် ၂၀၁၁ တွင် သမ္မတရာထူး ရရှိပြီးနောက်ပိုင်း နိုင်ငံရေးအကျဉ်းသား မြောက်များစွာကို လွှတ်ပေးခဲ့သလို အတိုက်အခံခေါင်းဆောင် ဒေါ်အောင်ဆန်းစု ကြည်ကိုလည်း ဖိတ်ခေါ် ကြိုဆိုကာ သူမနှင့် သူမ၏ပါတီကို လွှတ်တော်နိုင်ငံရေးနယ်ပယ်တွင် လှုပ်ရှားရပ်တည်ခွင့် ပေးခဲ့ သည်။

၁၉၄၈ ဗြိတိန်ထံမှ လွတ်လပ်ရေး ရပြီးနောက်ပိုင်း အစိုးရနှင့် တိုင်းရင်းသားအုပ်စုများအကြားမှ ဆယ်စုနှစ်ချီ ပဋိပက္ခများသည်လည်း မကြာမီ အဆုံးသတ်သွားတော့မည်ဟု အကောင်းမြင်ယုံကြည်ကြောင်း မြန်မာသမ္မတက ပြောကြား သည်။

“လာမယ့်သီတင်းပတ်တွေအတွင်းမှာ တစ်နိုင်ငံလုံး အပစ်ရပ်စဲပြီး မြန်မာနိုင်ငံမှာ နှစ်ပေါင်း ၆၀ အတွင်း ပထမဆုံး နေရာအနှံ့ သေနတ်သံတွေ တိတ်ဆိတ်ငြိမ်သက်သွားဖို့ အလားအလာအရမ်းကောင်း နေပါတယ်”ဟုလည်း ဦးသိန်းစိန်က ပြောကြားပါသည်။

ထို့ပြင် တိုင်းပြည်တွင်း လူမျိုးရေးမုန်းတီးမှု သွေးထိုးလှုံ့ဆော်သူများကို ကိုင်တွယ်ရာတွင်လည်း လုံးဝ သည်းခံ အလျှော့ပေးမည်မဟုတ်ဟု သမ္မတက ဆိုပါသည်။

မနှစ်က ရခိုင်ကမ်းရိုးတန်းဒေသတွင် ဗုဒဘာသာဝင် ရခိုင်များနှင့် မွတ်ဆလင်ရိုဟင်ဂျာများအကြား အကြမ်းဖက် တိုက်ခိုက်မှုကြောင့် လူ ၂၀၀ ခန့် သေဆုံးခဲ့ရသည်။ ဘေးဒဏ်သင့်သူအများစုမှာ မြန်မာနိုင်ငံသားခံယူခွင့် ပိတ်ပင်ခံရသော မွတ်ဆလင် ရိုဟင်ဂျာ (ဘင်္ဂါလီ)များဖြစ်ကြသည်။

Yamgon chronicle


မိုးထဲလေထဲ လူမှုကွန်ယက်ပွဲ
နာရေးကူညီမှုအသင်း(ရန်ကုန်) ဥက္ကဌ ဦးကျော်သူ၏ အယူသီးမှုတိုက်ဖျက်ရေးနှင့် ပရဟိတ လူမှု ရေး ဟောပြောပွဲခရီးစဉ်အား ၂၄.၆.၂ဝ၁၃ ရက်တွင် သတ္တမခရီးစဉ်စတင်ခဲ့သည်။ ၎င်းခရီးစဉ်အတွင်း လူမှုရေးဟောပြောပွဲများအပြင် နာရေးကူညီမှုအသင်း(ရန်ကုန်)၏ သုခအလင်းပညာဒါန မှ နယ်မြို့များ၌ ကိုယ်ထူကိုယ်ထ အခမဲ့ ပညာရေးကဏ္ဍအား တက်စွမ်းသရွေ့ လုပ်ကိုင်နေကြသော ဘုန်းတော်ကြီးသင် ပညာရေးကျောင်းများနှင့် အခြားသော ပညာဒါနကျောင်းများရှိ ကျောင်းသား/သူများအတွက် ကျောင်းသုံး ဗလာစာအုပ်များနှင့် စာရေးကရိယာများ လှူဒါန်းခြင်း၊ နယ်ပရဟိတ အသင်းအဖွဲ့များနှင့် ကျေးလက်နေ ပြည်သူအပေါင်းတို့အား မသန့်သောရေမှ သန့်စင်သော သောက်/သုံးရေအား ငွေကြေးကုန်ကျမှုမရှိပဲ ပြုလုပ်သည့် နည်းပညာရပ်များကိုပါ သင်ကြားပို့ချ ပေးနိုင်ခဲ့ပါသည်။

၂၅.၆.၂ဝ၁၃ ရက်နေ့တွင် မန္တလေးမြို့ တောင်စလင်းတိုက်သစ်ရှိ “ဗြဟ္မစိုရ် လူမှုကူညီရေးအသင်း” တွင် ဖွင့်လှစ်ထားသော ပညာဒါနကျောင်းအတွက်၎င်း၊ “ဇွဲသစ် အခမဲ့ပညာရေးကျောင်း” သို့၎င်း သွား ရောက်၍ ကျောင်းသုံးစာအုပ်များနှင့် စာရေးကရိယာများအားလှူဒါန်းခဲ့ပြီး ည (၇းဝဝ) နာရီအချိန်တွင် စစ်ကိုင်းမြို့ လယ်ကြီးကျေးရွာရှိ “မေတ္တာစေတနာ လူမှုကူညီရေးအသင်း” မှကျင်းပပြုလုပ်သော စာပေ ဟောပြောပွဲတွင် ဦးကျော်သူနှင့် အလင်းဆက်(IR) တို့မှ သိဖွယ်မှတ်ဖွယ် အသွယ်သွယ်တို့အား ဟော ပြောခဲ့ပြီး ၂ဝ၁၃ ခုနှစ်၏ ပြည်သူဂုဏ်ရည် အထူးဆုရှင် အင်ဂျင်နီယာ ဦးသန်းနိုင်မှ သန့်ရှင်းသော သောက် သုံးရေ ရရှိစေရန် သရုပ်ပြသပေးခဲ့သည်။ ၂၆.၆.၂ဝ၁၃ ရက်နေ့ နေ့လည်ပိုင်းတွင် မန္တလေးတိုင်းဒေသကြီး မတ္တရာမြို့နယ်ရှိ “မြတ်ဒါန-ဆွမ်းလောင်းအသင်း”တွင် ကျင်းပပြုလုပ်သော ပညာဒါနကျောင်းများသို့ စာ အုပ်နှင့် စာရေးကရိယာများ လှူဒါန်းပွဲအခမ်းအနား၌ ဘုန်းတော်ကြီးသင်ပညာရေးကျောင်း (၇) ကျောင်း တို့အား စာအုပ်နှင့် စာရေးကရိယာများအား သက်ဆိုင်ရာကျောင်းအသီးသီးသို့ လှူဒါန်းပေးနိုင်ခဲ့သည်။ ယင်းနေ့ ညနေပိုင်းတွင် မတ္တရာမြို့နယ်ရှိ မြန်မာနိုင်ငံ၏ တခုတည်းသော စကျင်ကျောက်များထွက်ရှိရာ၊ ကမ္ဘာတွင် နာမည်ကျော်ကြားသော မြန်မာ့လက်မှု ပန်းတမော့ပညာရပ်အား ရှေးယခင်မှ ယခုတိုင် အစဉ် အဆက် ထိန်းသိမ်းလာခဲ့သော ယဉ်ကျေးမှုအမွေအနှစ်များ ထိန်းသိမ်းထားရာနေရာ တခုဖြစ်သည့် စကျင် ကျေးရွာတွင် ကျင်းပပြုလုပ်သော “သုခကာရီ” ပရဟိတ လူမှုကူညီရေးအသင်း၏ စာပေဟောပြောပွဲတွင် ဥက္ကဌ ဦးကျော်သူ၊ အလင်းဆက်(IR)နှင့် စာရေးဆရာ ဦးဘုန်း(ဓာတု)တို့မှ ဟောပြောခဲ့ကာ အင်ဂျင်နီ ယာ ဦးသန်းနိုင်မှ ရေသန့်စင်နည်းများကို သရုပ်ပြသပေးခဲ့သည်။ ၂၇.၆.၂ဝ၁၃ ရက်နေ့ နံနက်ပိုင်းတွင် မန္တလေးမြို့ “နှလုံးလှမေတ္တာ လူမှုကူညီရေးအသင်း” ရုံးဖွင့်ပွဲသို့၎င်း၊ နေ့လည်ပိုင်းတွင် အိုးဘိုရပ်ကွက် “အိုးဘို ပရဟိတ” ဘုန်းတော်ကြီးကျောင်းရှိ ကျောင်သား/သူများအတွက် စာအုပ်နှင့် စာရေးကရိယာများ လှူဒါန်းပွဲသို့၎င်း သွားရောက်ခဲ့ပြီး “နှလုံးလှမေတ္တာ” လူမှုကူညီရေးအသင်းနှင့် “ကလျာဏမိတ္တ” လူမှု ကူညီရေးအသင်းတို့အတွက် လူနာသယ်ဆောင်ရန် (Streachure) များလှူဒါန်းပေးခဲ့သည်။ ယင်းနေ့ ညပိုင်းတွင် မတ္တရာမြို့နယ်ရှိ “ရွှေရုံးပင်” လူမှုကူညီရေးအသင်းသို့ သွားရောက်ကာ ပရဟိတ ဟောပြောပွဲ များအား ဟောပြောပေးခဲ့သည်။ ၂၈.၆.၂ဝ၁၃ ရက်နေ့တွင် မန္တလေးမြို့မှ ထွက်ခွါခဲ့ပြီး နေ့လည်ပိုင်းတွင် မြင်းခြံမြို့ရှိ “အာယုပါလ” ကုသိုလ်ဖြစ်ဆေးခန်းသို့ ဝင်ရောက်လေ့လာခဲ့ကာ ညနေပိုင်းတွင် ညောင်ဦးမြို့ သို့ သံတဲဟိုတယ်သို့ ရောက်ရှိခဲ့သည်။

၃ဝ.၆၂ဝ၁၃ ရက်နေ့တွင် ညောင်ဦးမြို့ ငှတ်ပစ်တောင်ရပ်ရှိ “ဇေတဝန်” ဘုန်းတော်ကြီးကျောင်း တွင် ကျင်းပပြုလုပ်သော စာအုပ်ဈေးရောင်းပွဲတော်နှင့် စာပေဟောပြောပွဲ ပထမည၌ ပေါ်ပြူလာဂျာနယ် အယ်ဒီတာချုပ် ကိုမျိုး(မြန်မာစာ)နှင့် နာရေးကူညီမှုအသင်း(ရန်ကုန်) ဒု-ဥက္ကဌ စာရေးဆရာမ ဒေါ်သန်းမြင့် အောင်တို့ ဟောပြောမှုအပြီးတွင် ဒါရိုက်တာ ကျော်သူ ရိုက်ကူးခဲ့သည့် အကယ်ဒမီ (၇) ဆုရ “အမေ့နို့ဖိုး” ရုပ်ရှင်ဇာတ်ကားကြီးအား ပြသပေးခဲ့သည်။ ထို့နောက် ၁.၇.၂ဝ၁၃ ရက်နေ့တွင် ဦးကျော်သူနှင့် အလင်း ဆက်(IR)တို့မှ ဟောပြောမှုအပြီးတွင် “ပုဏ္ဏားဘကွန်း” ရုပ်ရှင်ဇာတ်ကားကြီးအား ပြသပေးခဲ့ရာ ပရိသတ် များ အထူးစည်ကား အားပေးခဲ့သည်။ ယင်းနေ့တွင်ပင် ညောင်ဦးမြို့ “ဂရုဏာရှင်” အခမဲ့ဆေးခန်းနှင့် နာရေးကူညီမှုအသင်းတွင် ပြုလုပ်သော ရေသန့်ပြုလုပ်နည်း သရုပ်ပြခြင်းနှင့် ညောင်ဦးမြို့ ကောင်းပင်စည် ကျေးရွာ “ဂရုဏာရှင်” နာရေးကူညီမှုအသင်း ရုံးခန်းဖွင့်ပွဲသို့ ဦးကျော်သူနှင့် ဆရာမ ဒေါ်သန်းမြင့် အောင်တို့မှ အမှတ်တရစကားများ ပြောကြားပေးခဲ့သည်။ ၂.၇.၂ဝ၁၃ ရက်နေ့တွင် နေ့လည်တွင် စလေမြို့ “ပြည်တော်သာစာကြည့်တိုက်” ဖွင့်ပွဲအထိမ်းအမှတ် စာပေဟောပြေပွဲတွင် ဦးကျော်သူ၊ စာရေးဆရာမ ဒေါ်သန်းမြင့်အောင်၊ အလင်းဆက်(IR) တို့မှ ဟောပြောခဲ့သည်။ ထိုနေ့ည (၈း၃ဝ) အချိန်တွင် ချောက်မြို့ “မနောဖြူ” လူမှုကူညီရေးအသင်း သုံးနှစ်ပြည့် အခမ်းအနား စာပေဟောပြောပွဲတွင် ဦးကျော်သူ၊ ဆရာမ ဒေါ်သန်းမြင့်အောင်နှင့် အလင်းဆက်(IR)တို့မှ ဟောပြေားခဲ့ကြသည်။

ဦးကျော်သူ ဟောပြောနေစဉ် အတွင်း မိုးများရွာသွန်းနေသော်လည်း ပရိသတ်များမှာ မိုးရေထဲတွင် ဇွဲကောင်းစွာနှင့် အားပေးခဲ့ကြသည်။ ထိုဟောပြောပွဲတွင် ဦးကျော်သူမှ “အခုဆိုရင် ကျွန်တော်တို့မြန်မာနိုင်ငံမှာ သင်္ချိုင်းတွေပျောက်သွားတာ၊ ကျဉ်းမြောင်းလာတာ၊ သင်္ချိုင်းတွေရွှေ့ပြောင်းခံရတာတွေကို သတိထားဖို့ကောင်းပြီ၊ ဘာကြောင့်လဲဆို တော့ သင်္ချိုင်းတွေမှာ သမိုင်းတွေရှိတယ်၊ သင်္ချိုင်းပျောက်တာဟာ သမိုင်းပျောက်တာနဲ့တူတယ်၊ သင်္ချိုင်း အဖျက်ခံရတာဟာ သမိုင်းအဖျက်ခံရတာနဲ့အတူတူပဲ ဒါကြောင့် ကမ္ဘာတည်သရွေ့ မြန်မာ့သမိုင်းရှိနေစေဖို့ သင်္ချိုင်းတွေရှိနေရမယ်၊ အဲ့ဒီသင်္ချိုင်းမှာ သူရဲကောင်းတွေမြှုပ်နှံခဲ့တယ်၊ အဲဒီသင်္ချိုင်းတွေမှာ တိုင်းပြည် အကျိုးပြု ပုဂ္ဂိုလ်တွေ လဲလျောင်းအိပ်စက်နေကြတယ်၊ သင်္ချိုင်းတွေရဲ့ သမိုင်းတန်ဖိုး ဘယ်လောက်ကြီးမား သလဲဆိုတာကိုသိချင်ရင် အီဂျစ်နိုင်ငံကိုပဲကြည့် ပိရမစ်သင်္ချိုင်းကြီးတွေကြောင့် အဲဒီနိုင်ငံရဲ့ ယဉ်ကျေးမှုနဲ့ သမိုင်းတန်ဖိုး ဘယ်လောက်ကြီးသလဲဆိုတာ ကမ္ဘာကသိတယ်။ ဒါကြောင့် သင်္ချိုင်းတွေ ထိန်းသိမ်းတာဟာ သမိုင်းကိုထိန်းသိမ်းတာနဲ့ အတူတူပါပဲ။ အမှန်တရားကို ရင်မဆိုင်ရဲခဲ့တဲ့သူတွေဟာ သမိုင်းပျောက်အောင် သင်္ချိုင်းကို ရက်ရက်စက်စက် ဖျောက်ခဲ့ကြတယ် ” ဟုထည့်သွင်းဟောပြောခဲ့သည်။ ယခု ခရီးစဉ်သည် ယခင်ခရီးစဉ်ထက် ပိုပိုထူးခြားခဲ့သည်မှာ ပရဟိတ လူမှုရေးဟောပြောပွဲများအပြင် အနာဂါတ်၏ သား ကောင်း/သမီးကောင်း ရတနာလေးများ၏ ပညာရေးအတွက် စာအုပ်များ၊ စာရေးကရိယာများအား လှူဒါန်း ပေးခဲ့သလို၊ အညာဒေသတွင် ရေကောင်းရေသန့် ရရှိရေးအတွက် ရေသန့်စင်သည့် နည်းပညာရပ်များကိုပါ ပို့ချပေးခဲ့သည့်အပြင်၊ နယ်ဒေသရှိ လူမှုရေးအသင်းအဖွဲ့များနှင့် လူမှုကွန်ရက်များ ချိတ်ဆက်နိုင်ခဲ့သည်။ ထို့ကြောင့် ပြည်တွင်းတွင် လူမှုကွန်ရက်များ တဆင့်ပြီးတဆင့် ချိတ်ဆက်ပြီး တဆင့်တက်၍ ပြည်ပနိုင်ငံ များအထိ တိုးမြှင့်ကာ မြန်မာ့လူမှုကွန်ယက်များ လက်တွဲချိတ်ဆက်နိုင်တော့မည် ဖြစ်တော့သည်။

Author Name

Contact Form

Name

Email *

Message *

Powered by Blogger.