09/11/14


အမေရိကန်ပြည်ထောင်စုအနေနဲ့ မြန်မာအစိုးရရဲ့ စစ်တပ်နဲ့ အနီးကပ်ဆက်ဆံပြီး အကူအညီပေးတာမျိုးတွေ မလုပ်ဘူးဆိုတဲ့ အချက်တွေ အပါအ၀င် ၂၀၁၄ ခုနှစ် မြန်မာ့လူ့အခွင့်အရေးနဲ့ ဒီမိုကရေစီ အက်ဥပဒေ မူကြမ်းကို အမေရိကန် အောက်လွှတ်တော် အမတ်တွေက စက်တင်ဘာလ ၉ ရက်နေ့တုန်းက ဆွေးနွေးခဲ့ကြပါတယ်။ အခုလို မြန်မာအစိုးရ စစ်တပ်နဲ့ ဆက်ဆံရေးအပေါ် ကန့်သတ်တာဟာ မြန်မာ့ဒီမိုကရေစီ ပြုပြင်ပြောင်းလဲရေးကိုပါ ထိခိုက်နိုင်တယ်လို့ မြန်မာသမ္မတရုံးက အကြီးတန်းအရာရှိတဦးက တုံ့ပြန်လိုက်ပါတယ်။

ဒါပေမဲ့ ပြုပြင်ပြောင်းလဲရေးမှာ အာဏာရှင်အကြွင်းအကျန် လုပ်ရပ်တွေ ဆက်ရှိနေဆဲဆိုရင်တော့ ကူညီပေးနေတာတွေကို ပြန်စဉ်းစားရမှာ ဖြစ်တယ်လို့ ၈၈ မျိုးဆက်တွေက သုံးသပ်ပါတယ်။ အမေရိကန် လွှတ်တော်အမတ်တွေရဲ့ ဆွေးနွေးမှုတွေအပေါ် တုံ့ပြန်ချက်တွေကိုတော့ ရန်ကုန်အခြေစိုက် ဗွီအိုအေသတင်းထောက် ကိုအောင်ရဲမောင်မောင် က သတင်းပေးပို့ထားပါတယ်။

မြန်မာနိုင်ငံအနေနဲ့ အပြောင်းအလဲတွေ လုပ်လာပေမဲ့ အခုနောက်ပိုင်းမှာ အားရစရာ မရှိတာကြောင့် အမေရိကန် အစိုးရအနေနဲ့ မြန်မာစစ်တပ်ကို အကူအညီပေးမှုမျိုးတွေ ဆက်လက် မလုပ်ဆောင်ဖို့ မြန်မာ့အရေး စိတ်ဝင်စားတဲ့ အမေရိကန်အမတ်တွေက အမေရိကန် လွှတ်တော်မှာ ကြိုးပမ်းခဲ့တာ ဖြစ်ပါတယ်။

ဒီအချက်နဲ့ ပတ်သက်ပြီး မြန်မာအစိုးရ သမ္မတရုံး အကြီးတန်းအရာရှိတဦးကတော့ အမေရိကန် လွှတ်တော်အမတ်တွေရဲ့ ပြောဆိုချက်ကို ပယ်ချလိုက်ပါတယ်။ အခုလို ဆောင်ရွက်ချက်ဟာ အမေရိကန်အစိုးရနဲ့ လွှတ်တော်အတွင်းက နိုင်ငံရေးအားပြိုင်မှုဖြစ်ပြီးတော့ မြန်မာနိုင်ငံအနေနဲ့ အခုလို လုံခြုံရေးအရ အရေးတကြီး လိုအပ်နေတဲ့အချိန်မှာ လျစ်လျူရှုဖို့ တိုက်တွန်းတာတော့ မေးခွန်းထုတ်စရာ ကောင်းတယ်လို့ ပြောပါတယ်။

“နံပါတ်တစ်အချက်ကတော့ သူတို့ရဲ့ internal politics ပေ့ါနော် အမေရိကန်က နိုဝင်ဘာမှာ လွှတ်တော်ရွေးကောက်ပွဲတွေ ကျင်းပတော့မယ့်ကာလအတွက် ဒီမိုကရက်နဲ့ ရီပတ်ပလစ်ကန် Joseph Crowley တို့ ဘာတို့ဆိုတာက အစဉ်တစိုက်ပေါ့နော် မြန်မာနိုင်ငံနဲ့ ပတ်သက်ပြီးတော့ negative ရှုထောင့်ကနေ လုပ်လာတဲ့သူတွေပေါ့နော်။ ဒီအိုဘားမားရဲ့ foreign policy မအောင်မြင်ဘူးဆိုတာ ပြသချင်တဲ့ သဘောနဲ့ ကျနော်တို့ မြန်မာနိုင်ငံရဲ့ တိုးတက်မှုကို သူတို့က ပိုပြီးတော့ ယုတ်လျော့အောင် အဲ့လိုလုပ်တယ်လို့ မြင်ပါတယ်။ လုံခြုံရေးဆိုင်ရာ ပူးပေါင်းဆောင်ရွက်မှုတွေ မလုပ်သင့်ဘူးဆိုပြီးတော့ ပြောတဲ့စကားက ချမှတ်ထားတဲ့ နိုင်ငံခြားရေးမူဝါဒ အထူးသဖြင့် အကြမ်းဖက် တိုက်ဖျက်ရေးနဲ့ ပတ်သက်တဲ့ အမေရိကန်ရဲ့ strategy နောက်တခုက policy ဒါတွေက မကိုက်ညီဘူး။ ဖွံ့ဖြိုးဆဲနိုင်ငံကို လုံခြုံရေးဆိုင်ရာ ပူးပေါင်းဆောင်ရွက်မှုတွေ ကူညီပေးဖို့၊ လုပ်ပေးဖို့ ကန့်ကွက်တယ်ဆိုတော့ ဒီပြောသွားတဲ့ပေါ့နော် ကန့်ကွက်တယ်ဆိုတော့ ပြောသွားတဲ့၊ ကန့်ကွက်တဲ့ congress က အမတ်တွေပေါ့နော် နောက် သူတို့ကို ကိုယ်စားပြုတဲ့ ပါတီတွေ၊ နောက် သူတို့ကို ကိုယ်စားပြုတဲ့ institution တွေရဲ့ အကြမ်းဖက် တိုက်ဖျက်ရေးနဲ့ ပတ်သက်လို့ ရပ်တည်ချက် မေးခွန်းထုတ်စရာ ဖြစ်နေတယ်။”

၂၀၁၀ ရွေးကောက်ပွဲအပြီး သမ္မတ ဦးသိန်းစိန်အစိုးရ တက်လာပြီးနောက်ပိုင်း ၂၀၁၁ ခုနှစ်ကစလို့ အမေရိကန်အစိုးရက မြန်မာနိုင်ငံအပေါ် နိုင်ငံခြားရေးမူဝါဒ ပြောင်းလဲကျင့်သုံးပြီးနောက်မှာ အစိုးရရဲ့ ခြေလှမ်းတွေဟာ မြန်မာကို လိုက်လျောလွန်းတယ်ဆိုပြီး အမေရိကန် ဥပဒေပြု လွှတ်တော်အမတ်တွေက စောင့်ကြည့် ဝေဖန်နေတာပါ။ အမေရိကန် လွှတ်တော်ဘက်က မြန်မာစစ်တပ်ကို အကူအညီ မပေးသင့်ဘူးလို့ ကန့်သတ်တာဟာ မဖြစ်သင့်ဘူးလို့ မြန်မာ့နိုင်ငံရေး လေ့လာအကဲဖြတ် ဦးတင်မောင်သန်းက ရှုမြင်ပါတယ်။

“ကျနော့်သဘောဆိုရင်တော့ အကူအညီ ပေးဖို့ သင့်တယ်လို့ ထင်ပါတယ်။ လက်ရှိ ကမ္ဘာမှာ စဉ်းစားနေတဲ့ နိုင်ငံတကာက စဉ်းစားနေတဲ့ အနေအထားကိုလည်း နားလည်ကြည့်ဖို့ အများကြီး လိုလာတယ်။ အဲ့ဒီအတွက် ကျနော်တို့ ပညာပေးတဲ့ကိစ္စကအစပေါ့နော် အထောက်အကူတွေ လိုတယ်။ အဲ့ဒါက စစ်တပ်ကိုမှ မဟုတ်ဘူး။ မြန်မာနိုင်ငံရဲ့ လုံခြုံရေးဆိုင်ရာ အကူအညီပေးတယ်ဆိုတဲ့ နေရာမှာလည်းပဲ အရပ်ဖက်အဖွဲ့အစည်းတွေကို ပေးရတာလည်း ပါပါတယ်။ ဒါကတချက်။ ဒုတိယတချက်က ဘာလဲဆိုရင် ဒီ ဒီမိုကရေစီ အကူးအပြောင်းမှာ အရပ်ဖက်၊ စစ်ဘက် ဆက်ဆံရေးဟာ အရေးကြီးပါတယ်။ ဆိုတော့ မြန်မာပြည်က အရပ်ဖက်မှာရော လုံခြုံရေးဆိုင်ရာကိစ္စတွေကို ဘယ်လောက်အထိ သိနားလည်သလဲလို့ ကြည့်လိုက်လို့ရှိရင် အားနည်းချက်တွေ ကျနော်တို့ အများကြီး တွေ့ရတယ်။ လုံခြုံရေးကဏ္ဍကြီးတခုလုံးကို ပြုပြင်ပြောင်းလဲဖို့က လိုအပ်နေတယ်။ ဒါကြောင့်မို့လို့ နိုင်ငံတကာ အကူအညီတွေက အင်မတန်မှကို အရေးကြီးပါတယ်။”

တဘက်မှာတော့ အမှန်တကယ်သာ မြန်မာနိုင်ငံအနေနဲ့ ပြုပြင်ပြောင်းလဲနေတယ်ဆိုရင် အကူအညီ ပေးနိုင်ပေမဲ့ အာဏာရှင် အကြွင်းအကျန် လုပ်ရပ်တွေ ဆက်ရှိနေသေးရင်တော့ အကူအညီပေးမှုတွေကို ပြန်စဉ်းစားရမှာ ဖြစ်တယ်လို့ ၈၈ မျိုးဆက် ငြိမ်းချမ်းရေးနဲ့ ပွင့်လင်းလူမှု အဖွဲ့အစည်းက ခေါင်းဆောင်တဦးဖြစ်တဲ့ ကိုမင်းကိုနိုင်က သုံးသပ်ပါတယ်။

“ဒီလိုဗျ ကျနော်တို့က အင်မတန် ရှင်းပါတယ်။ ပြုပြင်ပြောင်းလဲရေးကို မှန်မှန်ကန်ကန် လုပ်ရင် အဲ့ဒါဆိုရင် ပူးပေါင်းဆောင်ရွက်ပေးရမယ်၊ အားပေးအားမြှောက်လည်း လုပ်ရမယ်။ ဒါက ရှင်းတယ်။ နောက်တခုကကျတော့ မမှန်မကန် နည်းလမ်းတွေ ကျန်ရှိနေမယ်၊ လုပ်သင့်လုပ်ထိုက်တာတွေကို မလုပ်နိုင်သေးဘူးဆိုရင်လည်း သူ့အတွက် ဖိအား တစုံတရာပေးဖို့အတွက် ယန္တရားတခုကတော့ လိုတာပဲလေ။ မှန်ကန်တဲ့ပြောင်းလဲရေးတွေ မလုပ်ကြဘဲနဲ့နော် အာဏာရှင်ရဲ့ အကြွင်းအကျန်တွေ၊ ပုံသဏ္ဍာန်တွေ၊ လုပ်နည်းလုပ်ဟန်တွေ ကျန်နေသေးမယ်ဆိုရင်တော့ နိုင်ငံတကာရဲ့ ကန့်သတ်မှု၊ တားမြစ်မှုတွေနဲ့ ကြုံရမယ်။ သူ့ဘက်က မှန်ကန်တဲ့ ပြုပြင်ပြောင်းလဲရေး တကယ်လုပ်တယ်ဆိုရင်လည်း ဖြေလျှော့မှုတွေ ပေးရမှာဖြစ်တယ်။”

အခု ၂၀၁၄ ခုနှစ် မြန်မာ့လူ့အခွင့်အရေးနဲ့ ဒီမိုကရေစီအက်ဥပဒေ မူကြမ်းကိုတော့ အောက်လွှတ်တော်ရဲ့ အာရှ-ပစိဖိတ်ဆိုင်ရာ နိုင်ငံခြားရေး ဆပ်ကော်မတီ ဥက္ကဌ ရီပတ်ဗလစ်ကန်ပါတီ အမတ် Steve Chabot နဲ့ နယူးယောက်ပြည်နယ် အောက်လွှတ်တော် ဒီမိုကရက်ပါတီအမတ် Joseph Crowley တို့က ဦးဆောင် တင်သွင်းခဲ့ကြတာ ဖြစ်ပါတယ်။ အမေရိကန် အစိုးရဘက်က အခုလို လိုက်လျောမှုတွေ ရှိခဲ့ပေမဲ့လို့လည်း မြန်မာဘက်ကတော့ ပြောင်းလဲလာတဲ့ အရိပ်လက္ခဏာတွေ မတွေ့ရဘူးလို့လည်း Mr. Chabot က ပြောပါတယ်။

ဥပဒေကြမ်းထဲမှာတော့ မြန်မာအစိုးရအနေနဲ့ မြန်မာစစ်တပ်ကို အရပ်သားအစိုးရရဲ့ အုပ်ချုပ်မှုအောက်မှာ ထားဖို့၊ စစ်တပ်က ကျူးလွန်ထားတဲ့ လူ့အခွင့်အရေး ချိုးဖောက်မှုတွေကို အသေအချာ လျစ်လျူရှုမထားဖို့နဲ့ မြောက်ကိုရီးယားနဲ့ စစ်ရေးဆက်ဆံမှု ဖြတ်တောက်ဖို့ ဆိုတဲ့ အချက်တွေ ပါဝင်ပါတယ်။

ဒီလို အခြေအနေတွေ မရှိသေးတဲ့အတွက် အမေရိကန်အနေနဲ့ မြန်မာစစ်တပ်နဲ့ ကူးလူး ဆက်ဆံရေး မလုပ်ဖို့၊ မြန်မာစစ်တပ်ကို မကူညီဖို့ ဒီဥပဒေကြမ်းမှာ ကန့်သတ်ထားတာလို့ ဒီဥပဒေကြမ်းကို ဦးဆောင်တင်သွင်းသူ Mr. Chabot က ပြောပါတယ်။ ပြီးခဲ့တဲ့နှစ်တုန်းက အမေရိကန်သမ္မတ အိုဘားမား မြန်မာနိုင်ငံကို ရောက်ရှိချိန်တုန်းကတော့ ဒီမိုကရေစီ ကူးပြောင်းနေတယ်လို့ ပြောဆိုထားတဲ့ မြန်မာအစိုးရရဲ့ စစ်တပ်ဟာ အရပ်သားအစိုးရရဲ့ ကွပ်ကဲမှုအောက်မှာ ရှိသင့်တယ်လို့ ထောက်ပြခဲ့သလို၊ မကြာသေးခင်က မြန်မာနိုင်ငံကို လာရောက်ခဲ့တဲ့ အမေရိကန် နိုင်ငံခြားရေးဝန်ကြီး ဂျွန်ကယ်ရီ ကလည်း အခုလိုပဲ ထောက်ပြ ပြောဆိုခဲ့ဖူးပါတယ်။

အောင်ရဲ မောင်မောင်
Voa

ကျွန်တော်တို့မြန်မာနိုင်ငံဟာ ကမ္ဘာ့ဘဏ်ကနောက်ဆုံးထုတ်ပြန်သည့် စာရင်းအရ ကမ္ဘာ့အဆင်းရဲဆုံးနိုင်ငံများထဲမှာ အဆင့် ၁၂ ပါတဲ့။ အီသီယိုးပီးယားနိုင်ငံကတောင် ကျွန်တော်တို့နိုင်ငံထက် ပိုချမ်းသာနေပါတယ်။ ခေတ်အဆက်ဆက် အဆင့်မကျသွားအောင်ထိန်းထားနိုင်တဲ့ အစိုးရလူကြီးမင်းများကိုတောင် ကျေးဇူးတင်ရမယ်ထင်ပါတယ်။ ထားပါတော့ဗျာ ကျွန်တော်ပြောချင်တာက ဒီလို ကမ္ဘာ့အဆင်းရဲဆုံးစာရင်ဝင်နိုင်ငံတစ်ခုက အိမ်ခြံမြေဈေးနှုန်းတွေ၊ တိုက်ခန်းဈေးတွေ၊ ဌားရမ်းခတွေ ကြတော့ ကမ္ဘာထိပ်တန်းမြို့ကြီးတွေက ဈေးနှုန်းတွေထက် မြင့်နေတော့ အံ့သြစရာကောင်းမနေဘူးလားဗျာ။ ဒီလို အိမ်ခြံမြေဈေးနှုန်းများ ကြီးမြှင့်နေမှုဟာ ဒီနေ့ ဒီမိုကရေစီ နိုင်ငံသစ်ဆီချီတက်နေပါတယ်ဆိုတဲ့ မြန်မာနိုင်ငံအတွက် အဓိကအခက်ခဲပြဿနာဖြစ်နေသလို ပြည်သူတွေအတွက်လည်း ၀န်ထုပ်ဝန်ပိုး တစ်ခုဖြစ်နေပါတယ်။

ယနေ့ပြောင်းလဲလာတဲ့ခေတ်စနစ်ကြီးမှာ ကျေးလက်နေပြည်သူတွေဟာ ရာသီဥတုဖောက်ပြန်မှုကြောင့် လယ်ယာလုပ်ငန်းခွင်တွေ မကောင်းလို့၊ လယ်မြေတွေအသိမ်းခံရလို့၊ အလုပ်အကိုင်အခွင့်အလမ်းနည်းပါးမှုတွေကြောင့် မြို့ပြသို့ပြောင်းရွေ့နေထိုင် လာမှုသိသာစွာ မြင့်မားလာပါတယ်။ ဒီအချိန်မှာ မြို့ကြီးတွေ့မှာရှိတဲ့ အိမ်ခြံမြေဈေးတွေ၊ အိမ်ငှားရမ်းခတွေကြီးမြှင့်မှုတွေဟာ ဆင်းရဲသားပြည်သူတွေအတွက် ရေနစ်ရာဝါးကူထိုးသလိုဖြစ်လို့နေပါတယ်။ ရန်ကုန်၊ မန္တလေးလိုမြို့ကြီးတွေမှာ ကျောတခင်းစာနေရာရဖို့ဆိုတာ အင်မတန်ခက်ခဲတဲ့အနေအထားဖြစ်နေပါတယ်။ ပုသိမ်ကြီးမြို့နယ် လက်ကောင်းကျေးရွာသုသာန်အား ပုဂ္ဂလိကပိုင်ဟုဆိုကာ ခြံခတ်သည့်အတွက် နာရေးများ လမ်းဘေး၌ မီးသင်္ဂြိုဟ်နေရ ဆိုတဲ့သတင်းဖတ်မိတော့ အော်ငါတို့ပြည်သူတွေခမျာမှာ နေဖို့မပြောနဲ့သေဖို့တောင်မလွယ်ပါလားလို့တောင် တွေးမိပါတယ်။

ဒီနေ့ မြို့ပြမှာနထိုင်နေတဲ့ပြည်သူတွေဟာ စားဝတ်နေရေးဆိုတဲ့ အထဲမှာ နေရေးက အဓိကရင်ဆိုင်နေရတဲ့ ပြဿနာတစ်ခုဖြစ်နေပါတယ်။ တစ်လ တစ်လ ရရှိတဲ့ လုပ်ခ လစာတစ်ဝက်လောက်ဟာ အိမ်ငှားခ အဆောင်ငှားရခ အတွက်အသုံးပြုနေကြရတော့ ကိုယ်ပိုင်အိမ် ၀ယ်နိုင်ဖို့ဆိုတာကတော့ အိမ်မက်တောင် မက်ဖို့မလွယ်တဲ့အခြေအနေပါ။ ဒီလို အိမ်ခြံမြေဈေးနှုန်းတွေ ၊ အိမ်ငှားခတွေကြီးမြှင့်မှုတွေကြောင့် ကျူးကျော်နေထိုင်မှုတွေ၊ အိမ်မဲ့၊ ယာမဲ့ နေထိုင်မှုတွေဟာ ရန်ကုန်၊ မန္တလေးလိုမြို့ကြီးတွေမှာ တရှိန်ထိုးများပြားလို့နေပါတယ်။

ကျွန်တော်တို့နိုင်ငံရဲ့ ဧရိယာ အကျယ်အ၀န်းဟာ စတုရန်းမိုင်ပေါင်း ၂၆၁,၂၂၇ ကျယ်ဝန်းပါတယ်။ နေထိုင်တဲ့လူဦးရေဟာ သန်း ၅၀ ကျော်ပဲရှိပါတယ်။ အခြားနိုင်ငံများနဲ့နှိုင်းယှဉ်ကြည့်မိတော့ တစ်စတုရန်း ၁ မိုင်ပတ်လည်နေထိုင်မှုမှာ ဘင်္ဂလားဒေ့ရ်ှနိုင်ငံက ၂၈၇၀ ဦး၊ ထိုင်းက ၃၂၇ ဦး ကမ္ဘာပေါ်မှာ လူဦးရေအများဆုံးဆိုတဲ့ တရုတ်က ၃၆၅ ဦး အိန္ဒိယက ၉၅၄ ဦး ရှိပါတယ်။ ကျွန်တော်တို့ မြန်မာနိုင်ငံကတော့ ၁၈၇ ဦးနဲ့ အနည်းပါ။ ဒီလို အာရှမှာရော ကမ္ဘာမှာပါ မြေအပေါဆုံး လူနေထူထပ်မှု အနည်းဆုံးတိုင်းပြည်က အိမ်ခြံမြေ ဈေးနှုန်းအမြှင့်ဆုံး အိုးမဲ့အိမ်မဲ့ မြေမဲ့ အများဆုံးဖြစ်နေရတာ အံ့သြလို့မဆုံးပါဘူး။

ဒီအကြောင်းစဉ်းစားနေရင်း ပြီးခဲ့တဲ့လက ၀န်ကြီးဟောင်းတစ်ဦးရဲ့သမက်ဖြစ်တဲ့ သူငယ်ချင်းတစ်ယောက်နဲ့တွေ့တော့ ပြင်ဦးလွင်မှာရှိတဲ့ သူတို့ခြံသွားလည်မလို့ဆိုတဲ့အကြောင်း ပြောတာကနေ စကားစပ်မိလို့ မေးကြည့်မိတာကနေ သိလိုက်ရတာက သူတို့ပိုင်တဲ့ အိမ်တွေ၊တိုက်ခန်းတွေ ၊ ခြံတွေဆိုတာ နိုင်ငံတစ်ဝှမ်း နည်းတာမှမဟုတ်ပဲဗျ။ ရန်ကုန်တစ်မြို့ထဲမှာတင် အိမ် ၅ လုံးလောက်ရှိတယ်။ နေပြည်တော်၊ မန္တလေး၊ ပြင်ဦးလွင်၊တောင်ကြီး၊ ကလောစတဲ့ တစ်နိုင်ငံလုံးက မြို့ကြီးတွေမှာ လက်ညှိုးထိုးမလွဲပါပဲ။ ဒါတောင် အိမ်တွေပဲရှိပါသေးတယ်။ မြေလွတ်ပိုင်ဆိုင်တာတွေများပေါင်းလိုက်ရင် မြို့အသေးတစ်မြို့စာလောက်တောင် ပိုင်လိမ့်မယ်ထင်တယ်။ ဒါတောင်ဝန်ကြီးသမက်ဆိုတဲ့သူပိုင်တာပဲရှိသေးတယ် ၀န်ကြီးဆိုရင်တော့ စဉ်းစားသာကြည့်တော့။ သူငယ်ချင်းရဲ့ အိမ်မြေပိုင်ဆိုင်မှုတွေစဉ်းစားမိတော့ “Homeless People and Peopleless Homes” ဆိုတဲ့ စကားလေး သွားသတိရမိတယ်။ ဒီနေ့ကျွန်တော်တို့နိုင်ငံရဲ့အခြေအနေက “အိမ်မရှိတဲ့လူနဲ့ လူမရှိတဲ့အိမ်များ” ဆိုတဲ့စကားအတိုင်းဖြစ်နေတာ တွေ့မြင်နေရပါတယ်။

အိမ်ခြံမြေဈေးတွေ ခေါင်ခိုက်အောင်ဈေးနှုန်းတွေမြှင့်မားနေတာတွေရဲ့ အဓိကတရားခံ သုံးဦးကတော့ အဂတိတရားလိုက်စားတဲ့ အစိုးရ၀န်ထမ်းများ၊၊ ခရိုနီလူတန်းစားများနဲ့ တိုင်တပါးသားတရုတ်တွေပဲဖြစ်ပါတယ်။ သူတို့တွေရဲ့ အဂတိတရားလိုက်စားမှု၊ မတရားသောနည်းလမ်းများ၊ အာဏာအလွဲသုံးစားလုပ်မှု မူးယစ်ဆေးဝါးတို့ရရှိလာသော ငွေမဲတွေကို ငွေဖြူအဖြစ်ပြောင်းလဲလိုမှု၊ ၀င်ရောက်ဈေးကစားအမြတ်ထုတ်မှုတွေရယ်ကြောင့် အခုလိုမျိုးအဆမတန်မြှင့်တက်ကုန်ရတာပါ။ ဒီနေ့နိုင်ငံတ၀ှမ်းနေဖို့အတွက်မဟုတ်ဘဲ ကိုယ်ကျုိုးအတ္တအတွက် အိမ်မြေအမြောက်အမြားဝယ်ထားသူတွေရဲ့ ငှားရမ်းခဈေးကစားမှု၊ အိမ်ခြံမြေဈေးဆွဲတင်ကစားမှုတွေကြောင့် အိမ်မပိုင်သူတွေ အိမ်ငှားတွေ အသက်ထွက်မတတ် နေရေးအတွက်လုံးပန်းနေရတဲ့အကြောင်းက အဓိကသက်သေပါပဲ။ လူမနေပဲအိမ်ပိုင်သူလူတစ်စုကလည်း ယခင်အစိုးရ ယခုအစိုးရဆွေစဉ်မျိုးဆက်နဲ့ ခရိုနီအဆက်ဆက်ပါပဲ။

ကျွန်တော်တို့ နိုင်ငံမှာ အိမ်ခြံမြေကို သိန်းပေါင်း သောင်းချီ သိန်းချီတဲ့ငွေကြေးတွေကိုပေးဝယ်နိုင်တဲ့ သူတွေဟာ သမရိုးကျ သမာအာဇိဝ နဲ့အလုပ်လုပ်တဲ့ လူတစ်ယောက်က ၀ယ်နိုင်ဖို့ဆိုတာ လုံးဝမဖြစ်နိုင်တဲ့အရာပါ။ မူးယစ်ဆေးဝါး၊ ဘိန်းဖြူ၊ ကျောက်မျက်၊သစ် စသည့်တရားမ၀င်ရောင်းချလို့ရတဲ့ငွေ၊ မတရားတဲ့နည်းနဲ့ရတဲ့ငွေ၊ အဂတိလိုက်စားပြီးရတဲ့ငွေတွေပဲဖြစ်မယ်ဆိုတာ လူတိုင်းနားလည်ပါတယ်။ မြန်မာနိုင်ငံအတွင်း မူးယစ်ဆေး ရောင်းဝယ်ဖောက်ကားနေမှုများမှာ လုပ်ငန်းရှင်များ ရာခိုင်နှုန်း ၅၀ ပါဝင်ပတ်သက်မှု ရှိနိုင်လို့ စုံစမ်းစစ်ဆေးမှုများ ပြုလုပ်နေရပါတယ်လို့တောင် ရဲတပ်ဖွဲ့က ထုတ်ဖော်ပြောဆိုတာ တွေ့ရပါတယ်။

ဒီလို တရားမ၀င်ငွေများ ၀င်ငွေလမ်းကြောင်းမပြနိုင်တဲ့ ငွေမဲများဟာ ဘယ်ရောက်သွားသလဲ တစ်ချက်ပဲစဉ်းစားကြည့်ပါ ပြီးခဲ့တဲ့နှစ် WHO ရဲ့ခန့်မှန်းချက်က မြန်မာနိုင်ငံကနေပြီး ဘိန်းဖြူတန် ၇၈၀ ရှိတယ်တဲ့။ ဒီမူးယစ်ဆေး ရောင်းရငွေတွေဟာ ဘယ်ေ၇ာက်သွားလဲ အရှင်းကြီးပါ။ ရွှေ၊မော်တော်ကား လုပ်ငန်းတွေက ရင်းနှီးမြှပ်နှံလို့မကောင်း စက်မှုနည်းပညာဘက် ရင်းနှီးမြှပ်နှံဖို့ကလည်းမစွမ်းကြတော့ “စီးပွားရေးမလုပ်တက် မြေ၀ယ်ထား” ဆိုသလို အားလုံးဟာ အိမ်ခြံမြေဘက်ကိုပဲ ရင်းနှီးမြှပ်နှံကြပြီး ကိုယ်နိုင်ငံသား ဆင်းရဲသားပြည်သူတွေဆီကပဲ ပြန်စီးပွားရေးရှာနေကြတာပါ။

နောက်အဆိုးဆုံးတစ်ချက်ကတော့ အိမ်နီးချင်းနိုင်ငံ တရုတ်နိုင်ငံသားတွေ အလုံးအရင်းနဲ့ဝင်ရောက်ဝယ်အခြေချမှု ဈေးကစားမှုတွေကြောင့်ပဲဖြစ်ပါတယ်။ တရုတ်နိုင်ငံမှာ လူဦးရေအဆမတန်များပြားလာမှု၊ ငွေကြေးခ၀ါချမှုတွေကို ထိထိေ၇ာက်ရောက် အရေးယူဆောင်ရွက်မှုတွေပြုလုပ်လာမှုတွေကြောင့် တရုတ်နိုင်ငံကငွေမည်းတွေဟာအိမ်နီးချင်းမြန်မာနိုင်ငံကို အလွယ်တကူဝင်ရောက်လာပါတယ်။ ဒါ့အပြင် နယ်စပ်တွေမှာ တရားမ၀င်မှောင်ခိုလုပ်ငန်း၊ မူးယစ်ဆေးဝါးလုပ်ငန်းတွေနဲ့ ကြီးပွားလာတဲ့တရုတ်တွေဟာလည်း မြန်မာနိုင်ငံအတွင်း တရားမ၀င် ၀င်ရောက်ပြီး အိမ်ခြံမြေတွေကို မတန်တဆဈေးနှုန်းတွေပေးပြီးဝယ်ယူမှုတွေကနေ ဈေးနှုန်းတွေ အဆမတန် ကြီးမြှင့်ကုန်ရတာပဲဖြစ်ပါတယ်။ တရုတ်တွေရဲ့ မတန်တဆဈေးနှုန်းတွေပေးဝယ်ပြီး သိမ်းပိုက်လိုက်လို့ မန္တလေး မြို့ကြီးတောင် တရုတ်မြို့ဖြစ်လို့သွားပါပြီ။

ယခုဆိုရင် တရုတ်တွေဟာ မန္တလေးမြို့သာမက မြန်မာနိုင်ငံအနှံ့ ငွေထုပ်ပိုက်ပြီး မြေယာတွေ အထိန်းအကွပ်မရှိ ၀ယ်ယူနေမှုတွေ တွေ့မြင်နေရပါတယ်။ စီမံကိန်းတခုခု လုပ်မယ်လို့အသံကြားလိုက်တာနဲ့ ပထမဆုံး ၀င်ရောက်ဝယ်ယူနေသူတွေဟာ တရုတ်နိုင်ငံသားတွေပဲဖြစ်ပါတယ်။ မြန်မာနိုင်ငံရဲ့ အိမ်ခြံမြေဈေးကွက်ဟာ တရုတ်တွေရဲ့ ဈေးကစားရာ အမြတ်ထုတ်ရာ ဈေးကွက်တစ်ခုဖြစ်နေပါတယ်။ တစ်နိုင်ငံလုံးအနေအထားအနေနဲ့ တရုတ်တွေ အိမ်ခြံမြေတွေဝယ်ယူမှုတွေဟာ နည်းတဲ့ရာခိုင်နှုန်းမဟုတ်တော့ပါ။ အခုနောက်ဆုံးရန်ကုန်မြို့သစ်စီမံကိန်းတောင် တရုတ်နိုင်ငံသားတစ်ဦးလက်ထဲကို မသိဥာဏ်မဲ့စွာ အပ်နှံဖို့စီစဉ်ခဲ့တာဆိုတော့ များမကြာမှီအချိန်မှာ မြန်မာနိုင်ငံတစ်ခုလုံးတရုတ်လက်အောက် ကျရောက်သွားတော့မှာပါ။

ဗိုလ်ချုပ်အောင်ဆန်း လွတ်လပ်ရေးရယူပေးခဲ့တာ နှစ်ပေါင်း ၆၀ ကျော်ကြာမြင့်ခဲ့ပေမယ် မြန်မာပြည်သူတွေခမျာမှာ သူတို့ပိုင်တဲ့ အိမ်ခြံမြေတွေ လယ်ယာတွေကို အာဏာရှင်တွေ၊ခရိုနီတွေရဲ့ မတရားအသိမ်းခံရမှု တိုင်းတပါးသားတရုတ်တွေရဲ့ လွမ်းမိုးချယ်လှယ်လာမှုတွေကြောင့် ကိုယ့်မြေကိုယ့်ရေမှာတောင် အိမ်မဲ့ယာမဲ့ ကျုးကျော်ဘ၀နဲ့ နေထိုင်အသက်ရှင်နေကြရတာ တွေးမိတိုင်းရင်နာလို့မဆုံးပါဘူး။

ကြားဖူးတာတစ်ခုပါ သြစတြေးလျနိုင်ငံမှာဆိုရင် ပိုက်ဆံအရမ်းချမ်းသာတဲ့ လူတွေဟာ လူအမြဲမနေနိုင်ပဲ အပမ်းဖြေနေထိုင်ဖို့အတွက် နိုင်ငံအနှံမှာ အိမ်တွေခြံတွေကို အပို ၀ယ်ယူထားကြပါတယ်တဲ့။ အဲဒီလို လူအမြဲမနေနိုင်ပဲ ၀ယ်ယူတည်ဆောက်ထားတဲ့ နေအိမ်ခြံတွေကို ၆ လတိတိ လူနေထိုင်တဲ့ အထောက်အထားမတွေ့ရပါက သြစတြေးလျနိုင်ငံသားမည်သူမဆို မိမိအသက်ရှင်နေထိုင်ဖို့အတွက် အမှန်တကယ်လိုအပ်ပါက တခါးဖွင့်ဝင်ရောက်နေထိုင်ခွင့် ဥပဒေကိုပြဌာန်းထားပါတယ်တဲ့။ မြန်မာနိုင်ငံမှာလည်း ဒီလိုမျိုး ဥပဒေပြဌာန်းပေးဖို့ ဒီနေရာကနေ လွှတ်တော်ကို တောင်းဆိုလိုပါတယ်။

မြန်မာနိုင်ငံဟာ မြန်မာနိုင်ငံသားအားလုံးပိုင်ဆိုင်တဲ့နိုင်ငံပါ။ လူနည်းတစ်စုဖြစ်တဲ့ အာဏာရှင်၊ ခရိုနီတွေနဲ့ တရုတ်တွေပိုင်တဲ့မြေမဟုတ်ပါဘူး။ ယခုလိုမျိုး အိမ်ခြံမြေတွေကို အာဏာရှင်၊ ခရိုနီနဲ့ တိုင်းတပါးသားတရုတ်တွေရဲ့ အနိုင်ကျင့် လွမ်းမိုးချယ်လှယ်မှုတွေကြောင့် ပြည်သူတွေဒုက္ခကြုံတွေ့နေရမှုတွေကို အစိုးရမှ ထိရောက်စွာ ကိုင်တွယ်ဖြေရှင်းပေးဖို့ လိုအပ်နေပါပြီ။ ကိုယ့်မြေကိုယ်ရေကို ကိုယ့်လူမျိုးနဲ့ အပေါင်းပါ တရုတ်တွေရဲ့လက်ကနေ ပြန်တိုက်ယူရတဲ့ဘ၀ ရောက်အောင်တော့ မလုပ်ကြပါနဲ့လို့ တောင်းပန်ပါရစေလားဗျာ. ..

- ကျော်ကြီး(MDY)
Tomorrow ဂျာနယ်


မြန်မာနိုင်ငံအနေနဲ့ အပြောင်းအလဲတွေ လုပ်လာပေမဲ့၊ အခုနောက်ပိုင်းမှာ နောက်ကြောင်း ပြန်လှည့်နေပြီလို့ အမေရိကန်လွှတ်တော်အမတ်တချို့က ပြောလာပါတယ်။

၂၀၁၄ ခုနှစ် မြန်မာ့လူ့အခွင့်အရေးနဲ့ ဒီမိုကရေစီအက်ဥပဒေ မူကြမ်းကို မနေ့တုန်းက အောက်လွှတ်တော် နိုင်ငံခြားရေး ဆပ်ကော်မတီမှာ ဆွေးနွေးခဲ့ရာမှာ လွှတ်တော်အမတ်တွေက အမေရိကန်အစိုးရရဲ့ မြန်မာနိုင်ငံနဲ့ ပတ်သက်လို့ အခုလို ဝေဖန်ခဲ့ကြတာပါ။ ကိုသားညွန့်ဦးက တင်ပြထားပါတယ်။

၂၀၁၁ ခုနှစ်ကစပြီး အမေရိကန်အစိုးရအနေနဲ့ မြန်မာနိုင်ငံအပေါ် နိုင်ငံခြားရေးမူဝါဒ ပြောင်းလဲကျင့်သုံးလာရာမှာ၊ တလျှောက်လုံး အမေရိကန်လွှတ်တော် ဖက်ကတော့ အစိုးရရဲ့ ခြေလှမ်းကို စောင့်ကြည့်ပြီး ဝေဖန်ခဲ့ကြတာပါ။ အထူးသဖြင့် အခုနှစ်ပိုင်းအတွင်း မြန်မာနိုင်ငံ အခြေအနေတွေမှာ တိုးတက်မှုမရှိတဲ့အပြင် နောက်ကြောင်း ပြန်လှည့်တာတွေပါ တွေ့လာရပြီဆိုပြီး လွှတ်တော်အမတ်တွေဖက်က ပြောလာကြပါတယ်။ ဒါကြောင့် အမေရိကန်အစိုးရ အနေနဲ့ မြန်မာအစိုးရကို သိပ်လိုက်လျောပေးလွန်းနေပြီလားလို့ မေးခွန်းထုတ် စောဒက တက်လာကြတာပါ။

အခု ၂၀၁၄ ခုနှစ် မြန်မာ့လူ့အခွင့်အရေးနဲ့ ဒီမိုကရေစီအက်ဥပဒေ မူကြမ်းကိုတော့ အောက်လွှတ်တော်ရဲ့ အာရှ-ပစိဖိတ်ဆိုင်ရာ နိုင်ငံခြားရေး ဆပ်ကော်မတီ ဥက္ကဌ Chabot နဲ့ နယူးယောက်ပြည်နယ် အောက်လွှတ်တော်အမတ် Joe Crowley တို့က ဦးဆောင်တင်သွင်းခဲ့ကြတာ ဖြစ်ပါတယ်။ Mr. Chabot ဟာ ရီပတ်ဗလစ်ကန်ပါတီကဖြစ်ပြီး Mr. Crowley ဟာ ဒီမိုကရက်ပါတီကဖြစ်တော့ ဒီမူကြမ်းရေးဆွဲ အဆိုပြုမှုမှာ ပါတီနှစ်ရပ်စလုံးက ပါဝင်တယ်လို့ ပြောရမှာပါ။ ဆပ်ကော်မတီ ဥက္ကဌ Mr. Chabot ကတော့ အမေရိကန်အစိုးရဖက်က မြန်မာနဲ့ ဆက်ဆံရေးမှာ လိုက်လျောပေးလွန်းတာကြောင့် ဒါကို ကန့်သတ်ဖို့ ဒီဥပဒေကြမ်းကို တင်သွင်းတာလို့ ပြောပါတယ်။

“မြန်မာနိုင်ငံနဲ့ ဆက်ဆံရေးမှာ ပိုပြီး လိုက်လျှောမှုတွေပေးဖို့ အမေရိကန်အစိုးရ အနေနဲ့ ပြီးခဲ့တဲ့နှစ်က ဆုံးဖြတ်ခဲ့ပါတယ်။ ဒါဟာလည်း မြန်မာအစိုးရရဲ့ ပြီးပြတ်အောင် မလုပ်နိုင်သေးတဲ့ ဂတိက၀တ် ပြောဆိုချက်တွေကြောင့်ပါ။ မြန်မာစစ်တပ်နဲ့ တိုက်ရိုက်ဆက်ဆံမှု စတင်ဖို့ဆိုတဲ့ ဆုံးဖြတ်ချက်လည်း ပါပါတယ်။ ၂၀၁၅ ခုနှစ် ဘဏ္ဍာရေး အသုံးစရိတ်ထဲမှာ နိုင်ငံရပ်ခြား စစ်ဖက်ပညာသင်တန်းဆိုပြီး ထည့်ထားပါတယ်။”

VOA


တက္ကသိုလ်ပေါင်းစုံကကျောင်းသားသမဂ္ဂတွေစုပြီး ဗဟန်းမြို့နယ်မှာရှိတဲ့ အဆင့်မြင့်ကွန်ပျူတာ တက္ကသိုလ်က ကျောင်းသားတွေကို အငြင်းပွားဖွယ်ဖြစ်နေတဲ့ အမျိုးသားပညာရေးဥပဒေကြမ်းကို ဘာ့ကြောင့်ကန့်ကွက်ရသလဲဆိုတာ စက်တင်ဘာ ၁ဝရက်နေ့က ရှင်းပြဖို့ ကြိုးစားခဲ့ပေမယ့် မအောင်မြင်ခဲ့ပါဘူး။

တက္ကသိုလ်ကျောင်းသားများသမဂ္ဂရဲ့ ဥပဒေကြမ်းကန့်ကွက်တဲ့ လှုပ်ရှားတဲ့မှုအစီအစဉ်တွေကို အစိုးရအာဏာပိုင်တွေက သတင်းကြိုရနေပြီး ဟန့်တားနှောင့်ယှက်မှုတွေရှိနေတာမို့ ကျောင်းသားတွေက ကြောက်စိတ်ဝင်နေကြတယ်လို့ သမဂ္ဂကျောင်းသားတွေက ပြောပါတယ်။

သိပ္ပံနဲ့နည်းပညာဝန်ကြီးဌာနလက်အောက်က ကွန်ပျူတာတက္ကသိုလ်တွေ စာမေးပွဲဖြေဆိုနေချိန် ဝိဇ္ဇာသိပ္ပံတက္ကသိုလ်တွေမှာ အာဏာပိုင်တွေက ပညာရေးဥပဒေကြမ်း ထောက်ခံဖို့ ကျောင်းသားတွေကို အဓမ္မ လက်မှတ်ထိုးခိုင်းနေတာတွေ ရှိတယ်လို့ ကိုဇေယျာလွင်က ဆိုပါတယ်။ ဒီဥပဒေကြမ်းကို ကျောင်းသားတစ်စုကပဲ ကန့်ကွက်နေတာမဟုတ်ဘဲ ကျောင်းသားအားလုံးကို ကိုယ်စားပြုတဲ့ သမဂ္ဂတွေက ကန့်ကွက်နေတာလို့ ပြောပါတယ်။

အမျိုးသားပညာရေးဥပဒေကြမ်းကို ကန့်ကွက်မှုနဲ့ပတ်သက်ပြီး ကျောင်းသူကျောင်းသားတွေ ပူးပေါင်းဆောင်ရွက်တာ အားနည်းတဲ့အပေါ် စိတ်ပျက်တယ်လို့ ရန်ကုန်တက္ကသိုလ်ကျောင်းသားသမဂ္ဂ ဥက္ကထ မအိဆွေမြတ်က ပြောပါတယ်။ ဥပဒေကြမ်းဟာ အပေါ်ယံကြည့်ရင် ကောင်းတယ်လို့ထင်ရပေမယ့် သေသေချာချာဖတ်ရင်တော့ အားနည်းချက်တွေအများကြီးကို တွေ့နိုင်ပြီး တက္ကသိုလ်တွေကို လွတ်လပ်ခွင့် မပေးထားဘူးလို့ ဆိုပါတယ်။

ပြည်ထောင်စုလွှတ်တော်က အတည်ပြုလိုက်တဲ့ ဒီဥပဒေကြမ်းဟာ ကျောင်းသားတွေရဲ့သဘောထား လုံးဝမပါဝင်တာကြောင့် အားလုံးပါဝင်တဲ့ ဥပဒေကြမ်းတစ်ခုပေါ်လာတဲ့အထိ လုပ်သွားမယ်လို့ ဒဂုံတက္ကသိုလ် ကျောင်းသားသမဂ္ဂက ကိုပိုင်ရဲသူက ပြောပါတယ်။ ဘွဲ့ဝတ်စုံတွေဝတ်ပြီး ဆန္ဒပြတယ်ဆိုတာ Performance တစ်ခုဖြစ်ပြီး ဘွဲ့ဝတ်စုံဝတ်ပြီး ဆန္ဒပြတဲ့သူတွေအပေါ် ဝေဖန်သူတွေက ကျောင်းသားတွေ ဘာတွေတောင်းဆိုနေလဲဆိုတာ

Kamayut media

မြန်မာအိမ်အကူလုပ်သား ပြည်ပသို့စေလွှတ်မှုကို အပြီးသတ်ရပ်ဆိုင်းလိုက်ပြီဖြစ်ကြောင်း မြန်မာနိုင်ငံပြည်ပအလုပ် အကိုင်ရှာဖွေရေးလုပ်ငန်းရှင်များအဖွဲ့ချုပ် ဒုတိယဥက္ကဋ္ဌ ဦးစိုးမြင့်အောင်က ပြော သည်။
ပုံ- မြန်မာအိမ်အကူများအား စင်္ကာပူအိမ်အကူလုပ်သားအေဂျင်စီတခုက ဈေးလျော့၍ အလုပ်ရှင်များအား ဆွဲဆောင်နေပုံ
မြန်မာနိုင်ငံမှ အိမ်အကူလုပ်သား စေလွှတ်မှုကို ပြီးခဲ့သည့်လပိုင်းက ယာယီ ရပ်နားထားခဲ့ခြင်းဖြစ်ပြီး ယခုအခါ လုံးဝ စေလွှတ်ခြင်းမပြုတော့ရန် အလုပ်သမား၊ အလုပ်အကိုင်နှင့် လူမှုဖူလှုံရေးဝန်ကြီးဌာနရုံးက ဆုံးဖြတ်လိုက်ခြင်းဖြစ်သည်ဟု ယင်းက ဆိုသည်။
“ပြီးခဲ့တဲ့ တနင်္လာနေ့က ၀န်ကြီးရုံးမှာ ပြုလုပ်တဲ့ အစည်းအဝေးမှာ ၀န်ကြီး က ပြည်ပအိမ်အကူလုပ်သားစေလွှတ်မှုကို လက်မခံတော့ဘူး”” ဟု ဦးစိုး မြင့်အောင်က ပြောသည်။

မြန်မာနိုင်ငံအနေဖြင့် အိမ်အကူလုပ် သားစေလွှတ်မှုကို စင်္ကာပူနိုင်ငံ တစ်နိုင်ငံတည်းကိုသာ တရားဝင်ခွင့်ပြုပေးထားခဲ့ပြီး မလေးရှား၊ ဟောင်ကောင်နိုင်ငံများမှလည်း မြန်မာအိမ်အကူလုပ်သားထောင်နှင့်ချီခေါ်ယူရန် ကမ်းလှမ်းထားမှုများရှိခဲ့သော်လည်း ညှိနှိုင်းဆွေးနွေးဆဲအဆင့်မှာပင် ရပ်ဆိုင်းမှုများရှိခဲ့သည်။

စင်္ကာပူသို့ တရားဝင်အိမ်အကူ လုပ်သားစေလွှတ်မှုမှာလည်း မကြာခင်က မြန်မာလုပ်သားတစ်ဦးညှင်းပန်းနှိပ်စက်ခံ ရသည့်ဖြစ်စဉ်ထွက်ပေါ်ခဲ့ပြီးနောက် ဆက်လက်စေလွှတ်ခြင်းမပြုရန် မြန်မာဖက်က ယာယီရပ်နားထားခဲ့ပြီး ယင်းအလုပ်သမားများအတွက် လုံခြုံစိတ်ချရမှုရှိစေမည့် အ ချက်များပါဝင်သည့် ညှိနှိုင်းမှုများဖြင့် MOU ရေးထိုးရန် စီစဉ်ခဲ့သေးကြောင်း ယခုအခါ ယင်းအစီအစဉ်ပျက်ပြယ်ခဲ့ဖွယ်ရှိကြောင်း သိရသည်။

မကြာသေးမီ လပိုင်းက စင်္ကာပူအိမ်အကူလုပ်သားအေဂျင်စီတခုက မြန်မာအပါအ၀င် ဖိလစ်ပိုင်၊ အင်ဒိုနီးရှားအစရှိသောနိုင်ငံများမှ အိမ်အကူများအား ဈေးဝယ်စင်တာတခု၌ လူသုံးကုန်သဖွယ် လျော့ဈေးပေး အရောင်းမြှင့်တင်မှုပြုလုပ်ခဲ့ခြင်းကြောင့် ယင်းလုပ်ရပ်အပေါ် နိုင်ငံတကာမှ ဝေဖန်ခဲ့ကြသည်။

မြန်မာအမျိုးသမီးများအနေဖြင့် ပြည်ပနိုင်ငံများတွင် အိမ်အကူလုပ်သား အဖြစ် သွားရောက်လုပ်ကိုင်နေခြင်းကြောင့် ဖိနှိပ်ညှင်းပန်းခံရမှုများလည်း မကြာခဏ ထွက်ပေါ်နေခဲ့ကာ ယင်းဖြစ်ရပ်များကြောင့် အစိုးရအပေါ် ဝေဖန်မှုများလည်း ထွက်ခဲ့သည်။

အတည်မပြုနိုင်သေးသော သတင်းများအရ လက်ရှိအချိန်ထိ မြန်မာအမျိုးသမီးများအနေနှင့် ပြည်ပနိုင်ငံများတွင် အိမ်အကူလုပ်သားများအဖြစ် တရားမ၀င်လမ်းကြောင်းများမှတဆင့် သွားရောက်လုပ်ကိုင်မှုများ ရှိနေသေးကြောင်း သိရသည်။

မိုးမင်း
News Watch(စောင့်ကြည့်သတင်းဂျာနယ်)

မကွေးတိုင်းဒေသကြီး စလင်းမြို့နယ် ငွေတောင်ကျေးရွာတွင်နေထိုင်သောကိုမြင့်လွင်ဦးသည် တရွာတည်းနေ လယ်ဧကများစွာပိုင်ဆိုင်သောဝန်ထမ်းဇနီးမောင်နှံထံတွင် ၃နှစ်ကျော်ကြာအလုပ်လုပ်ကိုင် ပြီးနောက်
သြဂုတ်လလယ်တွင် ချွေလှေ့စက်မောင်းရာမှ ခြေထောက်တစ်ချောင်းလုံးနီးပါးဖြတ်တောက်လိုက်ရသည်။ သို့သော်လည်း လျော်ကြေးတစ်စုံတရာမရဘဲ ဆေးကုသရန် အခက်အခဲဖြစ်နေသောကြောင့် မန္တလေးရွှေတောင်ဦးပညာဒါနကျောင်းဆရာတော် ရှင်ဝေပုလ္လက ကျပ်တသိန်းမတည်ပေးလိုက်ကြောင်းသိရသည်။

ထိုသို့နှစ်ရှည်စာရင်းငှားအဖြစ်လုပ်ကိုင်နေသော ကိုမြင့်လွင်ဦးမှာ စလင်းမြို့နယ် ငွေတောင်ကျေးရွာရှိ ငွေတောင်ကျောင်းတိုက်ဘုန်းကြီးကငယ်စဉ်ကတည်းက မွေးစားထားသော သူဖြစ်သည်။ ယခုလိုမသန်စွမ်းဖြစ်ပွားခဲ့သောကြောင့် မိမိအနေဖြင့် ဆေးဖိုးဝါခအကုန်အကျခံချင်သော်လည်း ကျေးရွာလမ်းဖောက်လုပ်ခဲ့သောကြောင့် ငွေပိုငွေလျှံမရှိ၍ မန္တလေးရွှေတောင်ကျောင်းထံမှအကူအညီတောင်းခံခဲ့ခြင်းဖြစ်ကြောင်း စလင်းငွေတောင်ရွာဆရာတော် အရှင် စိန်တိတ္တက ပြောသည်။

မြန်မာနိုင်ငံ၏အလုပ်သမားဥပဒေကို ရန်ကုန်မြို့ရှိ ပညာတတ်လူတန်းစားများပင် အကျွမ်းတ၀င်မရှိကြကြောင်းနှင့် ကျေးလက်နေတောင်သူလယ်သမားသူရင်းငှားများမှာအလုပ်သမားဦးစီးဌာနများအနီးဝန်းကျင်တွင်မရှိသောကြောင့် အလုပ်သမားအခွင့်အရေးများကို မသိရှိကြကြောင်းလည်းတောင်သူလယ်သမားအများစုကပြောဆိုသည်။

ယခုလောလောဆယ်တွင် ထိုခြေတစ်ဖက် ဆုံးရှုံးသွားသူ ကိုမြင့်လွင်ဦးမှာ မကွေးဆေးရုံကြီးတွင် တက်ရောက်ကုသမှုခံယူနေသည်။ ပြည်တွင်းအလုပ်သမား ဥပဒေအရအလုပ်ထုတ်ခံရသူနှင့်အလုပ်ရှင်ဘက်မှ လုပ်ငန်းရပ်နားမှုပြုလုပ်သောအခါ လုပ်ငန်းရှင်များအနေဖြင့် အလုပ်သမားများကို ၃လမပြည့်သေးပါကလစာတစ်လစာနှင့် နစ်နာကြေးတစ်လစာ ပေါင်းနှစ်လစာပေးရပြီးသုံးလပြည့်ပြီးသူများကို လုပ်အားခတစ်လစာနှင့် နစ်နာကြေးနှစ်လစာပေါင်းသုံးလစာ လျော်ကြေးပေးရပြီး မြန်မာနိုင်ငံအလုပ်သမားဥပဒေများအရ ကိုယ်လက်အင်္ဂါချို့ယွင်းမှုများအတွက်လည်း နစ်နာကြေးရရှိနိုင်ကြောင်း အလုပ်သမားဦးစီးဌာနမှ သိရသည်။
News Watch(စောင့်ကြည့်သတင်းဂျာနယ်)

နာမည်ကျော် iPhone ကို မျက်နှာပြင်အရွယ်အစား ပြောင်းလဲခဲ့ပြီး ပိုမိုကြီးမားသော ၄ ဒသမ ၇ လက်မအရွယ် iPhone 6 နှင့် ၅ ဒသမ ၅ လက်မအရွယ် iPhone 6 Plus တို့ကို စက်တင်ဘာ ၉ ရက်တွင် Apple က မိတ်ဆက်ခဲ့သည်။

ပိုမိုတာရှည်ခံသော ဘက်ထရီနှင့် ပိုမိုမြန်ဆန်သော ပရိုဆက်ဆာတို့ ပါဝင်သည့် iPhone အသစ်များသည် “Retina HD” မျက်နှာပြင်နည်းပညာကို သုံးစွဲထားပြီး ယခင်မျိုးဆက် iPhone 5S ထက် မီလီမီတာဝက်နီးပါး ပိုမိုပါးလွှာသွားမည် ဖြစ်သည်။

iPhone 6 များကို စက်တင်ဘာ ၁၉ ရက်တွင် အမေရိကန်၌ စတင်ရောင်းချမည်ဖြစ်ပြီး နှစ်နှစ်သဘောတူစာချုပ်ဖြင့် ဝယ်ယူပါက ယခင် iPhone များအတိုင်း ၁၉၉ ဒေါ်လာဖြင့် ရောင်းချမည်ဖြစ်သည်။ iPhone 6 Plus ကို နှစ်နှစ်စာချုပ်ဖြင့် ဝယ်ယူမည်ဆိုလျှင် ၂၉၉ ဒေါ်လာဖြင့် ရရှိမည်ဖြစ်သည်။ ယခုနှစ်ကုန်မတိုင်မီ ကမ္ဘာ့နိုင်ငံ ၁၁၅ နိုင်ငံထက်မနည်း၌ iPhone 6 များကို ရောင်းချသွားမည်ဖြစ်ကြောင်း Apple ၏ ဒုဥက္ကဌ ဖီးရှီလာက ပြောကြားခဲ့သည်။ ရှေ့ဖန်သားမျက်နှာပြင်ကို အနားစွန်းများ၌ ခုံးထားသော iPhone 6 သည် iPhone 5S ထက် ပုံရိပ်အရည်အသွေး 1 million pixels ပိုများမည်ဖြစ်သည်။

iPhone များနှင့် ခရက်ဒစ်ကဒ်များကို ချိတ်ဆက်အသုံးပြုနိုင်ရန်အတွက် မိုဘိုင်းပိုက်ဆံအိတ်နည်းပညာသစ် Apple Pay ကိုလည်း Apple က မိတ်ဆက်ခဲ့သည်။ iPhone သစ်များတွင် NFC ရေဒီယိုအင်တင်နာပါရှိပြီး ငွေပေး၊ ငွေယူ သတင်းအချက်အလက်များကို ထိန်းသိမ်းနိုင်သော နည်းပညာပါရှိသည်။
Apple ၏ iPhone 6 နှင့် iPhone 6 Plus အား Apple ဒုဥက္ကဋ္ဌက စက်တင်ဘာ ၉ ရက်တွင် ရှင်းလင်းပြသနေစဉ် (Photo:AFP)

Apple ၏ စမတ်နာရီ

Apple ၏ အမှုဆောင်အရာရှိချုပ် တင်ကွတ်သည် အားလုံးကမျှော်လင့်နေကြသော Apple ၏ နည်းပညာပစ္စည်းသစ် စမတ်နာရီကို ကြေညာခဲ့ပြီး ယင်းနာရီကို ရိုးရှင်းစွာပင် Apple Watch ဟု အမည်ပေးခဲ့သည်။

ဝတ်ဆင်၍ရသော နည်းပညာဈေးကွက်သို့ ဝင်ရောက်လာသော Apple ၏ စမတ်နာရီသည် ဝတ်ဆင်သူ၏ ကျန်းမာရေး၊ ကြံ့ခိုင်မှု နှင့်သက်ဆိုင်သည့် သတင်းအချက်အလက်များကို စောင့်ကြည့်နိုင်ပြီး ယင်းအချက်အလက်များကို iPhone နှင့် iPad သို့ လွှဲပြောင်းပေးနိုင်မည်ဖြစ်သည်။ နာရီ၏ ဘေးတွင် ဒစ်ဂျစ်တယ်ထိပ်ဖူးတစ်ခုကို တပ်ဆင်သုံးစွဲထားပြီး ယင်းထိပ်ဖူးက Home ခလုတ်ကဲ့သို့ အသုံးပြုနိုင်မည်ဖြစ်သည်။ Apple Watch ကို နီလာသွေးပါသော အနားလုံးမှန်မျက်နှာပြင်ဖြင့် ဖုံးအုပ်ထားပြီး ယင်းမျက်နှာပြင်က ဖိအား၏ပြင်းအားကို မှန်းဆသိရှိနိုင်သည်။

Apple Watch ကို ကြိုးမဲ့စနစ်ဖြင့် အားသွင်းနိုင်ပြီး နာရီလက်ပတ်ကြိုးကို ခြောက်မျိုးရရှိနိုင်မည်ဖြစ်ကြောင်း သိရသည်။ Apple Watch စမတ်နာရီသည် iPhone နှင့် iPad ရှိ သီချင်းများကိုလည်း ထိန်းချုပ်နိုင်မည်ဖြစ်ပြီး နာရီအတွင်း၌လည်း သီချင်းများ ထည့်သွင်းနားဆင်နိုင်မည်ဖြစ်သည်။ Apple Watch သည် iPhone နှင့် တွဲဖက်အသုံးပြုရန်လိုအပ်မည်ဖြစ်ပြီး iPhone 6 ၊ iPhone 6 Plus ၊ iPhone 5 ၊ iPhone 5C ၊ iPhone 5S တို့နှင့်တွဲ၍ အသုံးပြုနိုင်မည်ဖြစ်ကြောင်း သိရသည်။ Apple Watch များကို ၃၄၉ ဒေါ် လာဖြင့် လာမည့်နှစ်အစောပိုင်းတွင် စတင်ရောင်းချမည်ဖြစ်သည်။
-
http://www.news-eleven.com/
Eleven Media Group
၁) ပထမဆုံး ပေါ်ခဲ့ဖူးတဲ့ iPhone ထက် Processor က အဆ ငါးဆယ် မြန်ပါတယ်။

၂) 3D အမြင်ကဲ့သို့ ကောင်းမွန်သော မြင်ကွင်းကို ဂိမ်းအတွက် ထောက်ပံ့ထားသည်။

၃) Graphic က ပထမဆုံး iPhone ထက် ၈၄ ဆ ကြည်လင်သည်။

၎) A8 Chip က ယခင် Processor ထက် ၂၅ ရာခိုင်နှုန်းပိုမြန်၍ graphic ကို ၅၀ ရာခိုင်နှုန်း တက်စေ။

၅) iPhone 6 တွင် pixel တစ်သန်း ပါဝင်ပြီး iPhone 6Plus တွင် pixel ၂ သန်း ပါဝင်သည်။

၆) ကမ္ဘာ့ ဂိမ်း Developer ကုမ္ပဏီကြီး ၂၅ ခုမကနဲ့ သဘောတူညီချက်ရယူထားတာမို့ ဂိမ်မာ များအတွက် iPhone 6 နဲ့ 6 Plus ဟာ ဂိမ်းဆော့စရာ ပစ္စည်း တစ်ခုလည်း ဖြစ်လာနိုင်မှာ ဖြစ်ပါတယ်။

၇) iPhone 6 က ၄.၇ လက်မ၊ iPhone 6S က ၅.၅ လက်မ အရွယ် ရှိပါတယ်။

၈) M8 coprocessor မှ accelerometer, gyroscope, and compass တို့မှ Motion data များကို အဆက်မပြတ်ရယူနိုင်။ Sensor နည်းပညာ မြင့်တက်လာမှုကို Apple တို့ ရည်ညွန်းဖော်ပြခဲ့ပါတယ်။

၉) 802.11ac အရည်အသွေး ရှိတဲ့ Wi-Fi ပစ္စည်းဟာ လက်ရှိ iPhone 5S ထက် သုံးဆ မြန်တာကြောင့် အင်တာနက်လိုင်း စွဲအား အင်မတန် ကောင်းတဲ့ စမတ်ဖုန်း ဖြစ်လာပါလိမ့်မယ်။

၁၀) iPhone 6 မှာ 8MP iSight camera, 1.5µ pixels, ƒ/2.2 aperture ရှိပြီး Digital image stabling နည်းပညာ ပါဝင်ပါတယ်။

၁၁) ဗီဒီယို ရိုက်တဲ့အခါပဲ ဖြစ်ဖြစ်၊ ဓာတ်ပုံရိုက်တဲ့ အခါပဲ ဖြစ်ဖြစ် ပြုံးနေတဲ့ ပုံတွေ၊ အကောင်းဆုံး ရိုက်ချက်ပုံတွေကို အကြံပေးတာမျိုးအထိ ကင်မရာမှာ မှတ်ဥာဏ် ပါဝင်လာပါတယ်။ 120 fps သို့မဟုတ် 240 fps အရည်အသွေးနဲ့ slow motion ဗီဒိယို ရိုက်နိုင်ပါတယ်။

၁၂) ကျန်းမာရေး အတွက် အထောက်အကူ ဖြစ်စေမယ့် ကျန်းမာရေး App ဖြစ်တဲ့ Health App ဆိုတာလေး ပါဝင်လာပါပြီ။

၁၃) ကြိုတင် မှာယူမှုကို စက်တင်ဘာလ ၁၂ ရက်နေ့ဆိုရင် စလုပ်နိုင်ပါပြီ။

၁၄) စက်တင်ဘာလ ၁၇ ရက်နေ့က စလို့ iOS 8 ကို အခမဲ့ Download ဆွဲနိုင် ပါပြီ။

၁၅) Tim cook မှတ်ချက် - “These iPhones obviously have bigger displays, but more importantly, they’re amazing products in every single way.”

၁၆) ပိုက်ဆံအိတ်တွေကို အစားထိုးမယ့် အရာတစ်ခုလို့ Apple က စပြီး Payment အတွက် သုံးစရာ device တစ်ခု ဖြစ်အောင် ဖန်တီးထားကြောင်းလည်း ဆိုပါတယ်။

၁၇) iPhone 6 Plus ကို ၂ နှစ် စာချုပ်နဲ့ ရောင်းဈေးက 16GB ကို ၂၉၉ ဒေါ်လာ၊ 64GB ကို ၃၉၉ ဒေါ်လာ၊ 128GB ကို ၄၉၉ ဒေါ်လာ စီ ရှိပါတယ်။ စာချုပ်မပါ ၇၄၉ ဒေါ်လာ။

၁၈) iPhone 6 နဲ့ iPhone 6 Plus ဟာ memory တူရင် ဈေးနှုန်းအားဖြင့် ဒေါ်လာ ၁၀၀ သာ ကွာပါတယ်။ iPhone 6 ကို ၂ နှစ် စာချုပ်နဲ့ ရောင်းဈေးက 16GB ကို ၁၉၉ ဒေါ်လာ၊ 64GB ကို ၂၉၉ ဒေါ်လာ၊ 128GB ကို ၃၉၉ ဒေါ်လာ စီ ရှိပါတယ်။ စာချုပ်မပါ ၆၄၉ ဒေါ်လာ။

၁၉) ငွေပေးချေကဒ် အမျိုးမျိုးတို့ကို သယ်သွားစရာမလိုတော့ပဲလိုအပ်တာတွေကို Apple ထဲမှာပဲ save ပြီး သုံးနိုင်ပြီး Apple Pay ဆိုတဲ့ ငွေပေးချမှု ဝန်ဆောင်မှု ပါဝင်လာခြင်း ဖြစ်ပါတယ်။ Master Card, Visa, American Express အပြင် ကမ္ဘာ့ထိပ်သီးဘဏ် ၁၁ ခုကျော်နဲ့ ချိတ်ဆက်ထားပြီး ဒါကိုလည်း တိုးချဲ့သွားမှာကြောင့် နိုင်ငံတိုင်း အသုံးပြုနိုင်တဲ့ အနေအထား တစ်ခု အထိ ရောက်လာ နိုင်ပါတယ်။ လက်ဗွေနှိပ်ရုံနဲ့ ငွေပေးချေမှု၊ လွဲပြောင်းမှုကို ပြုလုပ်နိုင်ခြင်း ဖြစ်ပါတယ်။

၂၀) Apple Pay ကို iPhone 6 နဲ့ 6 Plus မှာ သုံးနိုင်ပြီး အောက်တိုဘာက စလို့ အမေရိကန်မှာ စသုံးနိုင်မှာ ဖြစ်ပါတယ်။ McDonald, Nike, Disney Land တို့လို အပြင် အခြား ကမ္ဘာ့ ထိပ်သီး ကုန်ပစ္စည်းနဲ့ ဝန်ဆောင်မှု ကုမ္ပဏီများမှာ ဈေးဝယ်တဲ့အထိ ဝယ်ယူတဲ့အခါ အသုံးပြု နိုင်ပါတယ်။ Apple store တွေမှာလည်း သုံးနိုင်ပါတယ်။ အဓိက concept က အစောက ပြောခဲ့သလိုပဲ ပိုက်ဆံအိတ်ကို အစားထိုးမယ့် ပစ္စည်း ဖြစ်ပါတယ်။

၂၂) ခန့်မှန်း ဈေးနှုန်း -

iPhone 6 (Any color)
16GB - $649
64GB - $749
128GB - $849

iPhone 6 plus (Any color)
16GB - $749
64G - $849
128GB - $949

အောင်ခမ်း (ရိုးရာလေး)
www.yoyarlay.com

ဒဏ်ရာများစွာနှင့် အသက် ၁၄ နှစ်အရွယ် သန်းသန်းစိုးကိုတွေ့ရစဉ် (ဓာတ်ပုံ − အောင်သစ်လွင်)
http://www.7daydaily.com/
မိသားစုနှင့်ခွဲ၍ ရန်ကုန်တွင် အိမ်အကူလုပ်နေသည့် သမီးငယ်ကို လ ၂၀ အကြာတွင် ပြန်မြင်လိုက်ရချိန်တွင်တော့ တုန်လှုပ်စွာ အော်ဟစ်ငိုကြွေးမိသူမှာ မိခင်ဖြစ်သူ ဒေါ်သိန်းသိန်းဝင်းပင်။

နဂိုက သေသပ်လှပခဲ့သော သမီးငယ်၏ ချစ်စဖွယ်နှုတ်ခမ်းတို့သည် မွေးရာပါနှုတ်ခမ်းကွဲသူကဲ့သို့ အသားစိုင်တွေ အပြည့်မရှိတော့။ ယခင်က တီတီတာတာပြောခဲ့သော စကားသံနေရာတွင် ဗလုံးဗထွေးစကားများသာ ထွက်လာတော့သည်။ ပါးနှစ်ဖက်တွင်လည်း တစ်လက်မခန့် ဒဏ်ရာတစ်ခုစီက အထင်းသား။ ဘယ်လက် လက်ကောက်ဝတ်က ကျိုးနေပြီး ညာဘက်လက်မှာ ရောင်ကိုင်းနေသည်။ လက်ချောင်းလေးတွေမှာမူ အရင်လို ဖြောင့်စင်းမနေတော့ဘဲ အရေခွံများလန်နေကာ ကွေးကောက်နေသည်။ ကျောကုန်း၊ တင်ပါး၊ ခြေသလုံးနှင့် ခေါင်းတို့တွင် ထုရိုက်ခံထားရသော ဒဏ်ရာများနှင့် သမီးဖြစ်သူကို ပြန်တွေ့ရချိန်တွင် မိခင်အရင်းသာမက မြင်နေရသူတိုင်း စုတ်တသပ်သပ် ဖြစ်ကြရသည်။

‘‘ကလေးဒဏ်ရာကိုကြည့်ပြီး ဆေးရုံတင်ဖို့သွားတဲ့လမ်းမှာ စိတ်တွေညစ်လွန်းလို့ မိသားစုလိုက် ကားရှေ့ဝင်တိုးပြီး ကိုယ့်ကိုယ်ကိုယ် သတ်သေလိုက်ဖို့အထိ တွေးမိခဲ့တယ်’’ဟု ဒေါ်သိန်းသိန်းဝင်းက ဝမ်းနည်းစွာပြောသည်။

မျက်နှာပျက်စီးသည်အထိ ဆိုးရွားကာ ကိုယ်ခန္ဓာအနှံ့ဒဏ်ရာရခဲ့သူ အသက်(၁၄)နှစ်အရွယ် သန်းသန်းစိုးသည် (၁၂)နှစ်အရွယ်ကပင် မိဘများ၏စေလွှတ်မှုကြောင့် ဇာတိဧရာဝတီတိုင်း မြန်အောင်မြို့နယ် ကျေးရွာတစ်ရွာမှတက်လာ၍ ရန်ကုန်မြို့ မင်္ဂလာဒုံမြို့နယ်ရှိ ဆရာဝန်ဇနီးမောင်နှံအိမ်တွင် အိမ်အကူလုပ်ခဲ့သူဖြစ်သည်။ စတင်အလုပ်လုပ်သည့်နေ့မှ ၂၀၁၄ ခုနှစ် ဩဂုတ်လအထိ တစ်နှစ်နှင့်ရှစ်လတာကာလအတွင်း မိဘများနှင့် တွေ့ခွင့်မရရုံသာမက အိမ်ရှင်က ဖုန်းပင်ပေး၍မပြောခဲ့ပေ။ လုပ်ခကို အိမ်အကူပွဲစားမှတစ်ဆင့် ပေးချေခဲ့သည်။ ထိုအချိန်မှစ၍ သန်းသန်းစိုး အိမ်အကူအလုပ်သမားဘဝ နေ့ရက်ပေါင်း ၆၀၀ နီးပါးမှာ အရွယ်နှင့်မမျှသည့်ဒုက္ခများ ခါးစည်းခံခဲ့ရသည်။

‘‘သမီးကို ခိုင်းတာမေ့ရင်လည်းရိုက်တယ်။ အလုပ်မပြီးလည်းရိုက်တယ်။ အဝတ်လျှော်တာမပြောင်လို့ရိုက်တယ်။ အိုးတိုက်လို့မပြောင်တာရိုက်တယ်။ ဟင်းခိုးစားလို့ရိုက်တယ်’’ဟု ရိုက်နှက်ခံရမှုကြောင့် ရထားသော တင်ပါးဒဏ်ရာ အနာသက်သာစေရန် နေရာပြင်ထိုင်ရင်းပြောသည်။ အဆိုပါဒဏ်ရာသည် ပြင်းထန်သောကြောင့် ဆေးရုံတွင် အသားအစားထိုး ကုသထားရကြောင်း မိခင်ဖြစ်သူ ဒေါ်သိန်းသိန်းဝင်းက ပြောသည်။ သန်းသန်းစိုး၏ ပြန်ပြောမှုအရ အိမ်ရှင်များက ၎င်း၏လက်နှစ်ဖက်ကို ရေနွေးပူထဲစိမ်ပြီးကာမှ ကလေးအဝတ်အစားများ လျှော်စေသည်အထိ ဆိုးရွားစွာပြုလုပ်ကြောင်း ဒေါ်သိန်းသိန်းဝင်းက ဆိုပါသည်။

(၁၂)နှစ်အရွယ်မှစ၍ အိမ်အကူလုပ်ခဲ့ပြီး (၁၄)နှစ်အရွယ်ရောက်မှသာ မိဘများနှင့် ပြန်ဆုံခွင့်ရခဲ့သည့် သန်းသန်းစိုးသည် အိမ်အကူမလုပ်လျှင်မရသည့် နောက်ခံမိသားစုပြဿနာမျိုးစုံ ရှိနေသည်။ ကျောက်ကပ်ရောဂါသည် ဖခင်နှင့် ကျပန်းအလုပ်သမားမိခင်တို့ရှိသည့် မိသားစုတွင် သန်းသန်းစိုးသည် မိသားစုစားဝတ်နေရေးပြဿနာအတွက် အဓိကဖြေရှင်းပေးနေသူဖြစ်သည်။ အိမ်အကူပွဲစား၏ မဲဆွယ်ကောင်းခြင်းနှင့် ဆင်ခြင်တုံတရားကင်းမဲ့ပြီး အယုံလွယ်သည့် တောသူတောင်သားမိဘနှစ်ပါးကြောင့် ပြန်ပြင်မရသည့် မျက်နှာအသွင်အပြင်ဖြင့် သန်းသန်းစိုး၏ အိမ်အကူဘဝ အဆုံးသတ်လိုက်ရပြီဖြစ်သည်။ ၎င်းအားရိုက်နှက်ခဲ့သည့် မိသားစုကို ရဲတပ်ဖွဲ့က စစ်ဆေးနေပြီး သန်းသန်းစိုးကိုယ်တိုင်လည်း ဆေးကုသမှုခံယူနေရဆဲ ဖြစ်သည်။

အဆိုပါအမှုကို အာမခံပေး၍မရသော ချွန်ထက်သော လက်နက်ဖြင့် အပြင်းအထန်နာကျင်စေမှု ပုဒ်မ ၃၂၆ ဖြင့် အမှုဖွင့်ထားသော်လည်း အမှုကို အသေးစိတ်စစ်ဆေးရန် ရှိနေသောကြောင့် ဆရာဝန်မိသားစုကို ဖမ်းဆီးထားခြင်းမရှိသေးကြောင်း ထောက်ကြန့်မြို့မရဲစခန်းမှ အမှုစစ်ရဲအရာရှိကပြောသည်။

‘‘ဖွင့်ရတဲ့အကြောင်းရင်းကတော့ ကလေးရဲ့ ရုပ်ဆင်းအင်္ဂါပျက်စေတဲ့အတွက် ပြင်းထန်နာကျင်ဒဏ်ရာဆိုပြီး ဖွင့်ထားတာ။ ကျွန်တော်တို့ဆီရောက်တဲ့အချိန်မှာ ဒဏ်ရာက အဟောင်းဖြစ်နေတယ်။ အလျော်အစားဆိုပြီး ပိုက်ဆံယူထားပြီးမှ မပြေလည်တဲ့ကိစ္စလည်း ဖြစ်နေတယ်။ အမေကိုယ်တိုင်ကလည်း ခွင့်ပြုပြီးတော့ တစ်နှစ်ရှစ်လ ဒီအိမ်မှာ ကြာမြင့်စွာလုပ်ပြီးဖြစ်တယ်။ လုပ်ခလစာတွေလည်း ပြည့်ဝစွာရတယ်။ နောက်ပြီး ဆရာဝန်ရဲ့ဆေးစာက ဘယ်လိုပြန်လာမယ် မသိသေးတော့ စောင့်နေတုန်းပါ။ ပြီးရင်တော့ အဖြေမှန်ကိုရအောင် စစ်ဆေးဖော်ထုတ်မှာပါ’’ဟု အဆိုပါရဲအရာရှိကပြောသည်။ သန်းသန်းစိုးနှင့်ပတ်သက်၍ စွပ်စွဲခံရသည့် အိမ်ရှင်မိသားစုကိုမူ အကျိုးအကြောင်းမေးရန်အတွက် ဆက်သွယ်သော်လည်း ဆက်သွယ်၍မရခဲ့ပေ။

နိုင်ငံတကာအလုပ်သမားအဖွဲ့အစည်း (ILO)၏ သုတေသနပြုလုပ်ချက်အရ ကမ္ဘာတစ်လွှားနိုင်ငံများတွင် ကလေးအလုပ်သမားများကို နိုင့်ထက်စီးနင်းပြုကျင့်မှု အဆိုးရွားဆုံးနိုင်ငံစာရင်း၌ ထိပ်ဆုံး၌ ရပ်တည်နေဆဲဖြစ်သော မြန်မာနိုင်ငံတွင် သန်းသန်းစိုးကဲ့သို့ နှိပ်စက်ခံရသော အိမ်အကူကလေးလုပ်သားများစွာ ရှိနေပါသည်။

စက်တင်ဘာ ၂ ရက်ကပင် ကမာရွတ်မြို့နယ် လှည်းတန်းရှိ အိမ်တစ်အိမ်တွင် အိမ်အကူလုပ်နေသည့် အသက်(၁၂)နှစ်အရွယ် မိန်းကလေးတစ်ယောက် အိမ်ရှင်၏ရိုက်နှက်မှုကို ကြောက်သောကြောင့် ထွက်ပြေးသွားခဲ့ရာ သူ့ကို ရိုက်နှက်သည့် အိမ်ရှင်လက်မှ လွတ်မြောက်သွားခဲ့သော်လည်း စာနာစိတ်မရှိသည့် ယောက်ျားသားတစ်ယောက်၏ အဓမ္မပြုကျင့်ခြင်းကို ခံလိုက်ရသည်။

ထိုနေ့က အိမ်မှထွက်ပြေးလာပြီးနောက် လှည်းတန်းကားမှတ်တိုင်တွင်ရပ်၍ ငိုနေသည့် အဆိုပါမိန်းကလေးအနားသို့ အမျိုးသားတစ်ဦးရောက်လာပြီး မွေးစားမည်ဟုပြောဆိုကာ ဆိပ်ကြီးခနောင်တိုမြို့နယ်ရှိ အိမ်တစ်အိမ်သို့ခေါ်၍ အဓမ္မပြုကျင့်ခဲ့ခြင်းဖြစ်သည်။ ရပ်ကွက်ကသိ၍ ရဲခေါ်ဖမ်းခဲ့ခြင်းဖြစ်ပြီး အိမ်အကူမိန်းကလေးမှာတော့ ပို၍ဆိုးသောဘဝသို့သာ ရောက်ခဲ့ရသည်။

အိမ်ရှင်က အိမ်အကူမိန်းကလေးများကို စာနာစိတ်ကင်းစွာ ရိုက်နှက်ညှဉ်းဆဲသော နာမည်ကျော်အမှုအခင်းပေါင်းများစွာ မြန်မာနိုင်ငံရဲတပ်ဖွဲ့ မှုခင်းမှတ်တမ်းတွင် ပေါပေါများများရှိပါသည်။ အိမ်ရှင်သရုပ်ဆောင်က သတ်၍သေသည့် အိမ်အကူလိုအမှုမျိုးအပြင် အဆိုတော်အမျိုးသမီးက နှိပ်စက်သောကြောင့် သေရာပါဒဏ်ရာရခဲ့သည့် အိမ်အကူကလေးငယ်များလည်း ရှိပါသည်။ ထို့အပြင် နာမည်ကြီး အမျိုးသားအဆိုတော်တစ်ယောက်က ဆေးကြောင်ကာ အိမ်အကူကလေးငယ်ကို နှိပ်စက်သော ဖြစ်စဉ်များလည်း မြန်မာ့လူ့အဖွဲ့အစည်းတွင် မကြာခဏဖြစ်ပွားနေသည်။

သို့သော် အမေရိကန်ပြည်ထောင်စု ဝါရှင်တန်အခြေစိုက် World Justice Project WJP ခေါ် ကမ္ဘာ့တရားမျှတရေးအစီအစဉ်အဖွဲ့၏ ထုတ်ပြန်ချက်အရ တရားဥပဒေစိုးမိုးမှုအားနည်းသည့် နိုင်ငံပေါင်း ၉၉ နိုင်ငံတွင် အဆင့် ၈၉ နေရာယူထားသည့် မြန်မာနိုင်ငံတွင် လူချမ်းသာမိသားစုများနှင့်ပတ်သက်သည့် အမှုအခင်းများ လူမသိသူမသိ ပျောက်ဆုံးသွားလေ့ရှိနေသည်။ အမှုအခင်းစတင်ဖြစ်ပွားချိန်တွင်သာ လှုပ်လှုပ်ခတ်ခတ်ဖြစ်ပွားလေ့ရှိပြီး အချိန်ကာလကြာသည်နှင့်အမျှ မေ့မေ့ပျောက်ပျောက်ဖြစ်သွားကာ တရားရေးပိုင်းမှ အရေးယူမှုအပိုင်းမှာလည်း အကြောင်းပြချက်မျိုးစုံဖြင့် လျော့ရဲသွားလေ့ရှိသည်။ ဆန့်ကျင်ဘက် လူ့အလွှာနှစ်ခု၏ ထိပ်တိုက်တွေ့ဆုံမှုတွင် အမှုမှလွတ်ချင်သူ လူချမ်းသာမိသားစုက ဆင်းရဲချို့တဲ့သူ ကာယကံရှင်မိသားစုကို ငွေကြေးပမာဏများစွာ အရိပ်အယောင်ပြလိုက်ရုံမျှဖြင့် ကျေအေးပေးလိုက်သည့် အမှုအခင်းများမှာ တစ်ပုံတစ်ပင်ရှိနေသည်။

သန်းသန်းစိုး၏အမှု ရဲစခန်းသို့မရောက်မီမှာပင် အိမ်အကူပွဲစားက ၎င်း၏မိဘများအား ကျပ် ၁၂ သိန်းပေး၍ ကျေအေးလက်မှတ်ထိုးစေခဲ့ပြီး အိမ်ပေါ်မှပြုတ်ကျ၍ရသော ဒဏ်ရာဟုလိမ်ညာ၍ ဆေးရုံတက်ကုသခိုင်းခဲ့သည်ဟု ဆိုသည်။ ဆရာဝန်များက သာမန်ဒဏ်ရာမဟုတ်ကြောင်း သုံးသပ်ခြင်းနှင့် ဆေးရုံခုတင်ချင်းကပ်နေသူများ၏ တိုက်တွန်းမှုကြောင့်သာ ရဲစခန်းတွင် အမှုဖွင့်နိုင်ခဲ့ခြင်းဖြစ်သည်။

‘‘ကလေးဒဏ်ရာတွေအကြောင်း ရဲတိုင်ရင် အသက်မပြည့်တဲ့ကလေးကို အလုပ်လုပ်ခိုင်းမှုနဲ့ ကျွန်မတို့ကိုပါ ရဲက ဖမ်းမှာစိုးလို့ မတိုင်ဘဲ ကျိတ်ကုခဲ့တာပါ’’ဟု ဒေါ်သိန်းသိန်းဝင်းက သမီးဖြစ်သူကို ကြင်နာစွာကြည့်ရင်း ပြောသည်။

ပဲ့သွားသော နှုတ်ခမ်းသား၊ အနာရွတ်တင်ကျန်ခဲ့သည့် ပါးနှစ်ဖက်မှဒဏ်ရာ၊ ကျောက်ပတ်တီးစည်းထားသည့် လက်နှစ်ဖက်၊ ကွေးကောက်နေသည့် လက်ချောင်းများဖြင့် သန်းသန်းစိုးတစ်ယောက် မင်္ဂလာဒုံမြို့နယ် NLD ပါတီမှ စီစဉ်ပေးထားသည့် အခန်းတစ်ခုထဲတွင် လဲလျောင်းနေသည်။

စိတ်ပညာရှင် ဒေါက်တာအောင်မြတ်ကျော်စိန်က အိမ်အကူကို ဆရာဝန်လင်မယားက ရိုက်နှက်ခဲ့သည့်အပေါ် ယခုကဲ့သို့ သုံးသပ်ပြသည်။

‘‘ပညာတတ်အသိုင်းအ၀ိုင်းဆိုပေမဲ့ သူတို့မှာလည်း စီးပွားရေး၊ အိမ်ထောင်ရေး အဆင်မပြေမှုတွေ ရှိနိုင်တယ်။ ယောက်ျားသော်လည်းကောင်း၊ မိန်းမသော်လည်းကောင်းပေါ့။ သူတို့ရဲ့အလုပ်တွေမှာ ဖိစီးမှုတွေက အိမ်အကူကလေးပေါ်မှာ ဖွင့်ချလိုက်သလို ဖြစ်တာပေါ့။ အဲဒီထက်ဆိုးတာကတော့ သူတို့ကိုယ်တိုင်ကိုယ်က အတွင်းစိတ်သန္တာန်မှာ လူတစ်ယောက်အပေါ် နှိပ်စက်ညှဉ်းပန်းလိုစိတ် ရှိနေနိုင်တာပေါ့။ တစ်ဦးချင်းမှာလေ။ အဲဒီလိုမျိုးဆိုရင်တော့ စိတ်ရောဂါဆန်သွားပြီ’’ဟု ဆိုသည်။

ထို့အပြင် နှိပ်စက်ခံရသည့် ကလေးငယ်သည် လူ့အဖွဲ့အစည်းအတွင်း အဆင်မပြေမှုများ ခံစားရနိုင်သောကြောင့် ရုပ်ပိုင်းဆိုင်ရာရော၊ စိတ်ပိုင်းဆိုင်ရာ ခံစားမှုမျိုး ပုံမှန်ပြန်ဖြစ်နိုင်ရန် ကျွမ်းကျင်သူများနှင့်ပြသ၍ ဖေးဖေးမမ နေသင့်ကြောင်း ဒေါက်တာအောင်မြတ်ကျော်စိန်က အကြံပြုသည်။

ရုပ်ပိုင်းရော စိတ်ပိုင်းပါ ဖွံ့ဖြိုးခါစကလေးငယ်များကို သက်ဆိုင်ရာပတ်ဝန်းကျင်အသိုင်းအဝိုင်းက နွေးနွေးထွေးထွေးမဆက်ဆံဘဲ ညှဉ်းပန်းနှိပ်စက်မှုများလုပ်မိပါက ကလေးများ၏ နောင်ရေးအတွက် စိတ်ပိုင်းဆိုင်ရာပြဿနာများ ရင်ဆိုင်ရနိုင်သလို လူ့အဖွဲ့အစည်းအတွက်လည်း အန္တရာယ်များကြောင်း စိတ်ပညာရှင် ဒေါက်တာခင်ဝင်းက ပြောသည်။

လက်ရှိ ပြဋ္ဌာန်းပေးထားသော အလုပ်သမားအဖွဲ့အစည်းများဥပဒေတွင် အိမ်အကူလုပ်သားများအတွက်ပါ အကျုံးဝင်သော်လည်း လက်တွေ့နယ်ပယ်တွင် အသက်ဝင်မှုနည်းပါးခြင်းကြောင့် အိမ်အကူအလုပ်သမားများ အကာအကွယ်မဲ့နေရခြင်းများ ရှိနေသေးကြောင်း ဥပဒေရေးရာကျွမ်းကျင်သူအချို့က သုံးသပ်သည်။

ရှေ့နေဦးခင်ဇော်(မရမ်းကုန်း)က ‘‘အိမ်အကူဆိုတာ စက်ရုံအလုပ်သမားမျိုး မဟုတ်ပါဘူး။ ကိုယ့်အိမ်မှာပဲနေပြီး အိမ်ရဲ့ဝေယျာဝစ္စအကုန်လုပ်ပေးရတဲ့အတွက် အိမ်သားလို၊ မိသားစုလိုပဲ သဘောထားသင့်ပါတယ်’’ဟု ဆိုသည်။

ထို့အပြင် မိဘများ၏ စီးပွားရေးအဆင်မပြေမှုကို နားလည်တတ်ပြီး ကိုယ်တိုင်အလုပ်လုပ်လိုသည့် ကလေးများ၏ ဘဝလုံခြုံရေးကို ကာယကံရှင်မိဘများကိုယ်တိုင် မမေ့လျော့ရန်လိုကြောင်း သတိပေးသည်။

‘‘ကလေးတွေအနေနဲ့က အိမ်ရဲ့စီးပွားရေးအခြေအနေကို သိတဲ့အတွက်ကြောင့် မိဘတွေကို သနားတယ်။ အိမ်အတွက် တစ်ဖက်တစ်လမ်းကနေ ပိုက်ဆံရှာချင်တယ်။ မိဘတွေအနေနဲ့ အိမ်ရဲ့စားဝတ်နေရေးအတွက် ကလေးကို ဖိအားတစ်ခု ဖြစ်သွားတာမျိုး မဖြစ်အောင် သတိထားသင့်တယ်’’ဟု ဦးခင်ဇော်(မရမ်းကုန်း)က ပြောသည်။

‘‘တချို့အိမ်အကူတွေ မဟုတ်တာလုပ်တာတွေ အများကြီးပါ။ ဒါမျိုးတွေဆို အိမ်ရှင်တွေက သတိရှိရှိနဲ့ ကိုင်တွယ်ရတယ်။ အိမ်ဖော်အများစုက အသက်ငယ်သူတွေ။ ဘာမှလဲနားမလည်။ မိဘရဲ့ ဆိုဆုံးမမှုလဲမရကြဘူး။ သူတို့ဘ၀တွေကလဲ အရမ်းဆင်းရဲတော့ စာရိတ္တပိုင်းတွေ ပျက်စီးလာတယ်။ ဒါကြောင့် မြို့ပေါ်မှာ အလုပ်တက်လုပ်တော့ အိမ်ရှင်တွေရဲ့ စရိုက်နဲ့ ဘယ်လိုမှအံမ၀င်ဘူး။ သူတို့ဘ၀နဲ့ ကိုယ်တွေ ကြီးပြင်းလာရတာ မတူပါဘူး။ ဒါကြောင့် အိမ်ရှင်များလည်း ပါးစပ်နဲ့သာ သွန်သင်ဆုံးမပါ။ မရရင် သူတို့မိဘတွေဆီ ပြန်အပ်လိုက်တာ အကောင်းဆုံးပါ’’ဟု အိမ်အကူမိန်းကလေးတစ်ဦးခေါ်ထားသည့် ကမာရွတ်မြို့နယ်မှ ဒေါ်သန္တာက ပြောသည်။

လက်ရှိမြန်မာနိုင်ငံတွင် ပြဋ္ဌာန်းပေးထားသော အလုပ်သမားဥပဒေမှာလည်း အိမ်အကူကဲ့သို့ ကလေးလုပ်သားများအရေးကို လက်တွေ့တွင် လုပ်ဆောင်နေသူတို့၏ အကြံပြုချက်များ မပါဝင်သည့်အတွက် အားနည်းချက်များရှိကြောင်း အလုပ်သမားများအရေး ဆောင်ရွက်နေသည့် ရှေ့နေဦးနိုင်မင်းက ပြောသည်။

အစိုးရသစ်လက်ထက် မြန်မာနိုင်ငံသည် ကလေးလုပ်သားများကို နိုင့်ထက်စီးနင်းပြုမှု အဆိုးရွားဆုံးနိုင်ငံများဖြစ်သော မြောက်ကိုရီးယား၊ ဆိုမာလီယာ၊ ဆူဒန်၊ ကွန်ဂို၊ ဇင်ဘာဘွေ၊ အာဖဂန်နစ္စတန်၊ ဘရွန်ဒီ၊ ပါကစ္စတန်နှင့် အီသီယိုးပီးယားနိုင်ငံတို့၏ အထက်တွင် ရပ်တည်နေဆဲဖြစ်ပါသည်။ ယူနီဆက်ကလည်း ယခုအချိန်သည် မြန်မာနိုင်ငံရှိ ကလေးလုပ်သားများအတွက် စွန့်စားရမှုနှင့် အန္တရာယ်ရှိမှုတို့မှ ကာကွယ်ပေးရန် အဓိကကျသော ကာလဖြစ်နေကြောင်း ယခုနှစ်အစောပိုင်းက သတိပေးထားပါသည်။

သန်းသန်းစိုး၏မိခင် ဒေါ်သိန်းသိန်းဝင်းကတော့ သမီးဖြစ်သူကို ရိုက်နှက်သူများအား ရဲစခန်းတွင်တိုင်ထားသည့်အမှု ပြီးပြတ်ပါက ရွာသို့အပြီးပြန်ခေါ်သွားမည်ဟု ပြောပါသည်။ သန်းသန်းစိုးကလည်း ၎င်းအားရိုက်နှက်သည့် အိမ်ရှင်များနှင့် မတွေ့လိုတော့ဘဲ ရွာမှထွက်လာပြီးမှ မိခင်ကမွေးလိုက်သည့် လသားအရွယ် မောင်လေးဖြစ်သူနှင့် အတူနေလိုကြောင်း ဖွင့်ဟသည်။

ရက်ပေါင်း ၆၀၀ ခန့် သန်းသန်းစိုး ဒုက္ခဆင်းရဲခံခဲ့ရသောအိမ်မှာ လူဦးရေထူထပ်သည့် မင်္ဂလာဒုံမြို့နယ် ပုလဲ(၃)ရပ်ကွက်တွင် ရှိနေပါသည်။ ထို့အပြင် အိမ်အကူမလုပ်လိုသောကြောင့် ထွက်ပြေးလာစဉ် အဓမ္မပြုကျင့်ခံလိုက်ရသည့် အသက်(၁၂)နှစ်အရွယ် မိန်းကလေးနေခဲ့သော အိမ်မှာလည်း နေ့စဉ်လူပေါင်းသောင်းချီ သွားလာနေသည့် လှည်းတန်းတွင်ရှိပါသည်။ လူပေါင်းများစွာနှင့် နီးနီးကပ်ကပ်ရှိနေသော အိမ်နံရံများ၏ အခြားတစ်ဖက်၌ ပိတ်လှောင်နှိပ်စက်ခံနေရပြီး မျှော်လင့်ချက်မဲ့နေသော ကလေးငယ် မည်မျှအထိ ရှိနေမည်မသိနိုင်ပါ။

7Day News Journal

အမေရိကန်နိုင်ငံခြားရေးဝန်ကြီး ဂျွန်ကယ်ရီ နေပြည်တော်သို့ရောက်ရှိစဉ် [ဓာတ်ပုံ − ဂျေမောင်မောင် (အမရပူရ)]

မြန်မာကို ဖိအားပေးခြင်းထက် စိန်ခေါ်မှုများကို လက်တွဲကူညီခြင်းဖြင့် ရှေ့ဆက်သွားမည်ဟု မြန်မာ-အမေရိကန်ဆက်ဆံရေးကို အမေရိကန်နိုင်ငံခြားရေးဝန်ကြီး ဂျွန်ကယ်ရီက ပုံဖော်ပြောကြားသွားပြီဖြစ်သည်။ ထို့အပြင် ကန်ပိတ်ဆို့မှုစာရင်းဝင် ဦးဇော်ဇော်ပိုင်ဟိုတယ်တွင် ဂျွန်ကယ်ရီတည်းခိုခဲ့သည်။ ဂျွန်ကယ်ရီမတိုင်မီ လာရောက်ခဲ့သော လက်ထောက်နိုင်ငံခြားရေးဝန်ကြီး တွမ်မာလင်းနောစကီးနှင့် ကန်ပိတ်ဆို့စာရင်းဝင် စီးပွားရေးလုပ်ငန်းရှင်များ တွေ့ဆုံလက်ဆွဲနှုတ်ဆက်နေပုံများက ကမ္ဘာ့သတင်းမီဒီယာများတွင် ထိပ်တန်းရောက်သတင်းများ ဖြစ်ခဲ့သည်။

လူ့အခွင့်အရေးချိုးဖောက်မှု၊ အကြမ်းဖက်မှုပဋိပက္ခများ၊ လယ်သိမ်းမြေသိမ်းပြဿနာ၊ သတင်းမီဒီယာလွတ်လပ်ခွင့်ခြိမ်းခြောက်ခံရမှု၊ ဖွဲ့စည်းပုံပြင်ဆင်ရေး၊ အချိုးကျကိုယ်စားပြုစနစ်(PR) စသည့် မျက်မှောက်မြန်မာ့နိုင်ငံရေးအခြေအနေကြောင့် ဂျွန်ကယ်ရီက မြန်မာအစိုးရအား ဖိအားပေးမည်ဟု နိုင်ငံရေးအင်အားစုများက တွေးထင်ခဲ့ကြသည်။

သို့သော် လတ်တလော ပြည်သူများစိတ်ပူပန်မှုကို လျစ်လျူရှုပြီး ခရိုနီများနှင့် ပတ်သက်ဆက်စပ်မှုများ ပြုလုပ်ခဲ့သော ကန်နိုင်ငံခြားရေးဝန်ကြီးဌာန၏ လုပ်ရပ်ကြောင့် ယခင်ကန်အစိုးရ၏ မြန်မာအပေါ်ထားရှိသည့် ‘‘တစ်ခုပေးမှ တစ်ခုလိုက်လျောမည်ဆိုသည့် မူဝါဒ’’(Action For Action)ကို ပြောင်းလဲလိုက်ပြီလားဟု နိုင်ငံရေးအင်အားစုများက ဇဝေဇ၀ါဖြစ်စပြုလာကြသည်။

ထို့ကြောင့် အမေရိကန်သည် အာရှ-ပစိဖိတ်ဒေသအတွင်း တရုတ်သြဇာလွှမ်းမိုးမှုကို ကာကွယ်ရန်၊ စီးပွားရေးနယ်ပယ်ချဲ့ထွင်ရန် မြန်မာ့ပကတိအခြေအနေကို လျစ်လျူရှုနေသည်၊ ပြုပြင်ပြောင်းလဲမှု ပီပီပြင်ပြင်မလုပ်နိုင်သေးသော မြန်မာအစိုးရကို ဖိအားမပေးဘဲ ဒေသတွင်း သြဇာထူထောင်ရန် အမေရိကန်အစိုးရ အလျင်လိုနေပြီလားဟု မေးခွန်းထုတ်ခံရစ ပြုလာပြီဖြစ်သည်။

အမေရိကန်၏ နိုင်ငံခြားရေးမူဝါဒ တကယ်ပြောင်းလဲနေပြီလား

ယခင်နိုင်ငံခြားရေးဝန်ကြီးဟောင်း ဟီလာရီကလင်တန်က မြန်မာအပေါ် ပိတ်ဆို့မှုနှင့်အတူ စေ့စပ်ဆွေးနွေးမှုများကိုပါ တစ်ပြိုင်တည်းပြုလုပ်သွားမည့်မူဝါဒ (Dual Track)ကို အကောင်အထည်ဖော်ခဲ့သည်။ ယခင်သမ္မတ ဘုရ်ှလက်ထက်က ကောင်းတာတစ်ခုလုပ်မှ လိုက်လျောမှုတစ်ခုပေးမည်ဆိုသည့် ပိတ်ဆို့မှုတစ်ခုတည်းနှင့်သွားသည့် မူဝါဒမှာ စစ်အစိုးရ၏ သဘောထားရပ်တည်ချက်ကို မပြောင်းလဲနိုင်ခဲ့ကြောင်း သဘောပေါက်ခဲ့သည့် အိုဘားမားက နှစ်လမ်းသွားမူဝါဒကို ကျင့်သုံးခဲ့ခြင်းဖြစ်သည်။ မြစ်ဆုံစီမံကိန်းရပ်ဆိုင်းခြင်း၊ နိုင်ငံရေးအကျဉ်းသားအချို့လွှတ်ပေးခြင်းများ ပြုလုပ်ပြီးနောက် ၂၀၁၁ နှစ်ကုန်ပိုင်း ဟီလာရီ မြန်မာခရီးစဉ်အပြီးတွင် အမေရိကန်တို့က အရှေ့အာရှကျွမ်းကျင်သူ မြန်မာနိုင်ငံဆိုင်ရာ အထူးကိုယ်စားလှယ် ဒဲရစ်မစ်ချဲလ်ကို သံအမတ်ခန့်အပ်၍ ၁၉၉၀ နောက်ပိုင်းကတည်းက လျှော့ချခဲ့သော နှစ်နိုင်ငံသံတမန်ဆက်ဆံရေးကို ပြန်လည်စတင်ခဲ့သည်။ ထို့နောက် မြန်မာအစိုးရက အပစ်အခတ်ရပ်စဲရေး ဆွေးနွေးပွဲများ စတင်နိုင်ခြင်း၊ နိုင်ငံရေးအကျဉ်းသားများစွာ လွှတ်ပေးခြင်း၊ အလုပ်သမားသမဂ္ဂဖွဲ့စည်းခွင့်ပြုခြင်း၊ မီဒီယာလွတ်လပ်ခွင့်အတွက် စာပေစိစစ်ရေးဖျက်သိမ်းခြင်းနှင့် နေ့စဉ်ထုတ်သတင်းစာများကို ပုဂ္ဂလိကသို့ ထုတ်ဝေခွင့်ပြုခြင်း စသည့် ပြုပြင်ပြောင်းလဲရေးများ လုပ်ဆောင်ခဲ့သည်။ ထို့ကြောင့် အမေရိကန်သမ္မတ အိုဘားမား မြန်မာနိုင်ငံသို့ လာရောက်ခဲ့ပြီး စီးပွားရေးပိတ်ဆို့မှုအချို့ ဖြေလျှော့ခြင်း၊ အမေရိကန်ကုမ္ပဏီအချို့ ရင်းနှီးမြှုပ်နှံခြင်း၊ဖွံ့ဖြိုးတိုးတက်ရေးအကူအညီများ ပေးခြင်းတို့ကို ဆက်တိုက်ဆိုသလို အမေရိကန်အစိုးရက လိုက်လျောလုပ်ဆောင်လာခဲ့သည်။

အစိုးရသက်တမ်းသုံးနှစ်ကျော်တွင် မြန်မာအစိုးရ၏ ပြုပြင်ပြောင်းလဲရေးအရှိန်တန့်သွားပြီဟု နိုင်ငံတကာအသိုင်းအ၀ိုင်းက ဝေဖန်လာချိန်အထိ အမေရိကန်အစိုးရကမူ မြန်မာ၏ ပြုပြင်ပြောင်းလဲရေးအတွက် ဆက်လက် လက်တွဲကူညီသွားမည်ဟု နိုင်ငံခြားရေးဝန်ကြီးဂျွန်ကယ်ရီက မြန်မာခရီးစဉ်အတွင်း ပြောကြားခဲ့သည်။

မြန်မာအပေါ် မျက်ကန်းယုံကြည်မှုမျိုးထားပြီး ဆက်ဆံနေခြင်းမဟုတ်ဟု ဂျွန်ကယ်ရီက ဖြည့်စွက်ပြောခဲ့သော်လည်း မြန်မာအစိုးရပေါ် သံတမန်ဆန်သော မှတ်ချက်စကားကြောင့် အမေရိကန်တို့၏ နိုင်ငံခြားရေးမူဝါဒကို အတိုက်အခံတို့က သံသယဖြင့် မေးခွန်းထုတ်မှုများရှိလာသည်။

သို့သော် သမ္မတအိုဘားမားသည် မြန်မာပြုပြင်ပြောင်းလဲရေးလုပ်ငန်းစဉ်များကို လေးစားသမှုထား၍ ဆက်လက်ဆက်ဆံနေဦးမည်ဖြစ်ပြီး နိုင်ငံရေးအရ အသံထွက်သည့် ပြဿနာများကိုတော့ မြန်မာအစိုးရက ပွင့်လင်းမြင်သာမှုရှိရှိဖြင့် ကိုင်တွယ်ရန် လိုအပ်ကြောင်း၊ သို့မှသာ အမေရိကန်အစိုးရပေါ် မြန်မာအတိုက်အခံအချို့ နားလည်မှုလွဲနေသည်များ ဖြေရှင်းပြီးသွားမည်လည်းဖြစ်ကြောင်း အာဆီယံရေးရာကျွမ်းကျင်သူ ထိုင်းသတင်းစာဆရာ မစ္စတာက၀ီချောင်ကစ်တပွန်က ပြောကြားသည်။

‘‘အိုဘားမားက မြန်မာနိုင်ငံကို နိုင်ငံခြားရေးမူဝါဒ အောင်မြင်တယ်လို့ ယူဆချင်တယ်။ ဒါကြောင့် သူက သိပ်သတိထားလိမ့်မယ်။ အမေရိကန်ကွန်ဂရက်အမတ်တွေကတော့ နည်းနည်းတင်းမာတယ်။ သူတို့က မြန်မာမှာ အကြမ်းဖက်မှုတွေနဲ့ လူ့အခွင့်အရေးကိစ္စတွေမှာ အပြစ်ပေးဖို့အတွက် တစ်ချိန်လုံးပြောနေတဲ့ လော်ဘီတွေဖြစ်တယ်။ ဒါကြောင့် မြန်မာအနေနဲ့ ဒီကိစ္စတွေမှာ အခုထက်ပိုပြီး ပွင့်လင်းမြင်သာမှုရှိရှိနဲ့ လုပ်ကိုင်ဖို့လိုတယ်။ ဒါဆိုရင် အားလုံး အဆင်ပြေသွားလိမ့်မယ်’’ဟု က၀ီကဆိုသည်။

အမေရိကန်အပါအ၀င် နိုင်ငံအများစုသည် ၎င်းတို့အကျိုးစီးပွားကို ရှေးရှု၍ နိုင်ငံခြားရေးမူဝါဒကို ချမှတ်လေ့ရှိပြီး မြန်မာကဲ့သို့ နိုင်ငံရေးပြုပြင်ပြောင်းလဲမှုမျိုးပင်မရှိသည့် ဗီယက်နမ်နှင့် တရုတ်နိုင်ငံများနှင့်ပင် အမေရိကန်က ကောင်းမွန်သည့် ဆက်ဆံရေးကို တည်ဆောက်ထားနိုင်ကြောင်း သမ္မတ၏ နိုင်ငံရေးအကြံပေး ဦးကိုကိုလှိုင်ကပြောသည်။ မြန်မာနိုင်ငံ၏ ပြုပြင်ပြောင်းလဲရေးက နှေးကောင်းနှေးမည်ဖြစ်သော်လည်း အာရပ်နွေဦးနှင့် နှိုင်းယှဉ်ပါက နိုင်ငံတကာပညာရှင်များနှင့် ပြည်သူအများစုကမူ မြန်မာနိုင်ငံသည် လမ်းကြောင်းမှန်ပေါ်ရောက်နေသည်ဟု လက်ခံထားကြောင်း ၎င်းကဆက်လက်ပြောသည်။

‘‘သမ္မတအိုဘားမားက မြန်မာကို ဆုပေးဒဏ်ပေးမူဝါဒကနေ နှစ်လမ်းသွားမူဝါဒပုံစံနဲ့ ပြောင်းလဲဆက်ဆံခဲ့တာဖြစ်တယ်။ အရင် ဆုပေးဒဏ်ပေးမူဝါဒတုန်းကဆိုရင် သမ္မတဟောင်းဘုရ်ှဟာ ပိတ်ဆို့မှုတစ်ခုတည်းနဲ့ သွားခဲ့တာပါ။ ဒါပေမဲ့ စစ်အစိုးရရဲ့ သဘောထားကို ဒါကပြောင်းလဲနိုင်လောက်အောင် အလုပ်မဖြစ်ခဲ့ပါဘူး။ အခု အိုဘားမားရဲ့မူဝါဒဟာ ကောင်းမွန်တဲ့ရလဒ်တွေ ထွက်ပေါ်စေခဲ့တယ်’’ဟု ၎င်းကပြောသည်။

အမေရိကန်၏ အဓိကပန်းတိုင်မှာ မြန်မာပြည်ဒီမိုကရေစီလမ်းကြောင်းပေါ် အပြည့်အ၀ရောက်ရေးပင်ဖြစ်သည်။ သမ္မတအိုဘားမားက သူစီစဉ်ထားသည့် လမ်းစဉ်အတိုင်း မပြောင်းမလဲလုပ်ဆောင်နေကြောင်း ရခိုင်တိုင်းရင်းသားတိုးတက်ရေးပါတီမှ ဒေါက်တာအေးမောင်ကဆိုသည်။

‘‘NLD ဘက်ကို ရပ်တည်မလား။ ၈၈ အဖွဲ့ကို ပိုအားကောင်းအောင် လုပ်မလား။ တပ်မတော်ကို ဖျောင်းဖျတဲ့နည်းနဲ့ သွားမလား စသဖြင့် သူတို့မှာ ဗျူဟာကောင်းကောင်းရှိပါတယ်။ လတ်တလော အခြေအနေလေးပဲကြည့်ပြီး မူဝါဒပြောင်းတယ် ပြောလို့မရပါဘူး’’ဟု ၎င်းကဆိုသည်။

အမေရိကန်နိုင်ငံရေးသမားအားလုံးနီးပါးတွင် ဗျူဟာများ၊ တိကျသည့်ပန်းတိုင်များရှိသည်။ အိုဘားမား၏ ဒီမိုကရက်တစ်အစိုးရလက်ထက်တွင် ပြီးဆုံးအောင်လုပ်ရန် ချမှတ်ထားသည့် ပုံစံအတိုင်း ဂျွန်ကယ်ရီက မျှောလိုက်သွားခြင်းသာဖြစ်ကြောင်း နိုင်ငံရေးအကျဉ်းသားဟောင်း ဇာဂနာကပြောသည်။

‘‘တရုတ်ကို ချိန်ခွင်ညှိဖို့ မြန်မာဟာ အရေးပါမှန်း သူတို့သိတယ်။ မြန်မာအစိုးရရဲ့ အကြောကိုလည်း သူတို့နားလည်တယ်။ Pressure (ဖိအား)ပေးရင် မကြိုက်တတ်မှန်းသိလို့ အခုလို တွန်းအား(Push) ပေးတာ’’ဟု ၎င်းကပြောသည်။

ယခင် အမေရိကန်အစိုးရ အဆက်ဆက်သည် ဒီမိုကရေစီလုပ်ငန်းစဉ်များကို အားပေးသည့်အနေဖြင့် အာဏာရှင်အစိုးရကို Regime Change (အစိုးရတစ်ရပ်ဖြုတ်ချပြီး ဒီမိုကရေစီဖော်ဆောင်သည့် အစိုးရတင်မြှောက်သည့်ပုံစံ)လုပ်လေ့ရှိသည်။ သို့သော် ယင်းစနစ် အကောင်အထည်ဖော်ခဲ့သည့် အီရတ်၊ အီဂျစ်၊ လစ်ဗျားနှင့် ဆီးရီးယားတို့တွင် ပဋိပက္ခများကို အဆုံးမသတ်နိုင်ခဲ့ပေ။ ရေရှည်တွင် Regime Change က မအောင်မြင်နိုင်ကြောင်းသိသည့် အိုဘားမားအစိုးရက မြန်မာကို ပြုပြင်ပြောင်းလဲရေးအားပေးခြင်း၊ စစ်တပ်ကို နိုင်ငံရေးမှ ထွက်ခွာသွားရန် သိမ်သိမ်မွေ့မွေ့ ချဉ်းကပ်နေခြင်းသာဖြစ်ကြောင်း နိုင်ငံရေးလေ့လာသူ ဦးကျော်လင်းဦးကပြောသည်။

ကန်မူဝါဒ မပြောင်းသော်လည်း မြန်မာနှင့် ဒေါ်အောင်ဆန်းစုကြည်ကို ကောင်းကောင်းသိသည့် ဟီလာရီကလင်တန်၊ သူ့လက်ထောက် ကတ်ကန်ဘဲလ်၊ ဂျိုယွန်းတို့ အနားယူပြီးဖြစ်သည်။ လက်ရှိ ကန်နိုင်ငံခြားရေးအရာရှိများမှာ မြန်မာအကြောင်း ကောင်းကောင်းမသိသည့်အပြင် မြန်မာ့နိုင်ငံရေး၊ စီးပွားရေးတို့တွင် လက်တွေ့မကျသည့် သီအိုရီများဖြင့်သာ ချဉ်းကပ်နေခြင်းဖြစ်ကြောင်း အမေရိကန်အစိုးရအဖွဲ့၊ အရပ်ဘက်အဖွဲ့အချို့နှင့် ဖွံ့ဖြိုးရေးစီမံကိန်းများ ပူးပေါင်းလုပ်ဆောင်နေသည့် မင်္ဂလာမြန်မာအဖွဲ့မှ ဒေါက်တာဖုန်းဝင်းကပြောသည်။

‘‘အခု ကန်နုိုင်ငံခြားရေးက ဘယ်လောက်ပဲ အဖွဲ့အစည်းခိုင်မာတယ်ဆိုဆို မြန်မာလို ခက်ခဲရှုပ်ထွေးတဲ့ တိုင်းပြည်မှာလုပ်ရတာ မူဝါဒအားမကောင်းရင် မလွယ်ဘူး။ အခုလူထုက စိုးရိမ်သလိုတော့ သူတို့မူဝါဒနဲ့ ဗျူဟာပြောင်းတယ်လို့တော့ မထင်ဘူး။ ဒါပေမဲ့ လုပ်ရပ်တွေက သိပ်ပြီးလက်တွေ့နဲ့ ကင်းကွာနေပြီး သီအိုရီဆန်နေတယ်’’ဟု ၎င်းကပြောသည်။

ဥပမာ စစ်တပ်ကို လူ့အခွင့်အရေး သင်ကြားလေ့ကျင့်ပေးရုံဖြင့် တပ်က နိုင်ငံရေးမှ အလွယ်တကူ ထွက်ခွာသွားမည့်အတွေးမျိုးမှာ သီအိုရီဆန်လွန်းကြောင်း ၎င်းကထောက်ပြသည်။

မြန်မာ-ကန်တပ်မတော်ချင်း ဆက်ဆံရေး အလျင်လိုလွန်းသလား။

နှစ်နိုင်ငံသံတမန်ဆက်ဆံရေးစတင်ပြီး မကြာမီ အမေရိကန်တပ်မတော်က မြန်မာ့တပ်မတော်နှင့် စစ်ရေးပတ်သက်မှုမပါဝင်သော ဆက်ဆံရေးကို စတင်ခဲ့သည်။ မြန်မာ့တပ်မတော်ကို ခေတ်မီတပ်မတော်တစ်ရပ်ဖြစ်အောင် လေ့ကျင့်ပေးခြင်းဖြင့် မြန်မာ့နိုင်ငံရေးတွင် စစ်တပ်ပါဝင်မှုလျှော့ချနိုင်ပြီး တိုင်းပြည်ဒီမိုကရေစီခရီးစဉ်ကို လျင်မြန်စွာရောက်ရှိမည်ဟု တွက်ဆချက်မှာ အလွယ်လိုက်လွန်းရာကျပြီး လက်တွေ့နှင့် ကင်းကွာနေကြောင်း ဒေါက်တာဖုန်းဝင်းက ထောက်ပြသည်။

‘‘တပ်ချင်းဆက်ဆံရေး မှားလားဆိုမမှားဘူး။ ဒါပေမဲ့ လူထုကလည်း အဲဒီလုပ်ရပ်ကို သိပ်မကြိုက်သလို မြန်မာ့တပ်မတော်ဘက်က ပြန်ကြားရတာက အမေရိကန်တွေအတွက် သိပ်တော့မကောင်းဘူး။ ဒီလူတွေက တစ်ခါလာလည်း ဒီလူ့အခွင့်အရေးပဲပြောတယ်၊ သိပ်ဆရာလုပ်လွန်းတယ်ဆိုတာမျိုးပေါ့။ လူတွေကတင် အမြင်လွဲတာမဟုတ်ဘူး။ တပ်ကလည်း သူတို့ကို အမြင်လွဲနေတယ်’’ဟု ၎င်းကဆိုသည်။

စစ်တပ်ချင်းဆက်ဆံရန် အချိန်ရောက်ပြီဟု ပြောခဲ့သော အမေရိကန်အစိုးရ၏ သဘောထားကို အမေရိကန်ကွန်ဂရက်ကလည်း သဘောမတူဘဲ အတိုက်အခံပြောကြားမှုများကို အိုဘားမားအစိုးရ ကြုံတွေ့နေရသည်။

မြန်မာနိုင်ငံ၏ ပြုပြင်ပြောင်းလဲရေးကဏ္ဍတွင် မြန်မာ့တပ်မတော်မှာ အရေးကြီးသည့် State Holder တစ်ခုဖြစ်ပြီး မြန်မာ့တပ်မတော်နှင့် စစ်တပ်ချင်း ဆက်ဆံရေးအစပြုရန် အမေရိကန်တို့ ဆုံးဖြတ်ခဲ့ခြင်းမှာ မှားယွင်းခြင်းမရှိကြောင်း သမ္မတ၏ နိုင်ငံရေးအကြံပေး ဦးကိုကိုလှိုင်ကပြောသည်။

‘‘မြန်မာတပ်မတော်နဲ့ စစ်တပ်ချင်း ဆက်ဆံရေးလုပ်တာဟာ အမေရိကန်တို့ မမှားပါဘူး။ အခု မြန်မာ့တပ်မတော်ဟာလည်း ခေတ်မီတပ်မတော်တစ်ရပ်ဖြစ်လာဖို့ ပြုပြင်ပြောင်းလဲမှုတွေ စတင်နေပြီဖြစ်တယ်။ တပ်မတော်ကို အထီးကျန်ဖြစ်အောင်ထားတာထက် လူတိုင်းဟာ အခုလို ပူးပေါင်းဆောင်ရွက်တာကို အားပေးသင့်တယ်’’ဟု ၎င်းကပြောသည်။

မြန်မာ့တပ်မတော်သည် ခေတ်မီတပ်မတော်တစ်ရပ် ထူထောင်ရန် ယခင်က ရုရှားနှင့် တရုတ်တို့ထံမှ အကူအညီယူခဲ့သော်လည်း မအောင်မြင်ခဲ့ပေ။ အိမ်နီးချင်း ထိုင်း၊ အင်ဒိုနီးရှားနှင့် ဖိလစ်ပိုင်တို့တွင် တပ်များအဆင့်မီစေရန် အမေရိကန်၏ လေ့ကျင့်ပေးမှုများကို မြန်မာစစ်ခေါင်းဆောင်များ လေ့လာဆင်ခြင်ရန်လိုကြောင်း နိုင်ငံရေးလေ့လာသုံးသပ်သူ ဦးကျော်လင်းဦးကပြောသည်။

‘‘အပြစ်တော့မမြင်ချင်ဘူး။ အိမ်နီးချင်းနိုင်ငံတွေမှာ ခေတ်မီတပ်မတော်ဖြစ်နေတာ။ US အကူအညီတွေနဲ့ချည်းပဲ။ မြန်မာတပ်မတော်ခေါင်းဆောင်ပိုင်းက ဒါကိုသိဖို့လိုသလို ပြည်သူတွေကလည်း ဆန္ဒမစောကြဖို့ လိုပါတယ်’’။

ကန်က စီးပွားရေးချဲ့ထွင်ဖို့ ပိတ်ဆို့မှုစာရင်းနဲ့ အပေးအယူလုပ်မှာလား။

ဦးဇော်ဇော်ပိုင်ဟိုတယ်တွင် ဂျွန်ကယ်ရီ တည်းခိုခဲ့သည့်အတွက် ကန်က ပိတ်ဆို့မှုစာရင်းကို လျှော့ချရန် စတင်သုံးသပ်နေသည့် သတင်းများ ထွက်ပေါ်လာသည်။

ထူးခြားသည်က ပိတ်ဆို့ခံခရိုနီများနှင့် လက်ထောက်နိုင်ငံခြားရေးဝန်ကြီးတို့ တွေ့ဆုံမှုတွင် ပဏာမသဘောတူညီချက်တစ်ခု ရခဲ့သည်။ ခရိုနီများ၏ ပိုင်ဆိုင်မှု၊ ဘဏ္ဍာရေးလည်ပတ်မှု၊ အမြတ်ငွေများတွင် ငွေမည်းများ ပါဝင်မှု ရှိ၊ မရှိ၊ လာဘ်ပေးလာဘ်ယူ ကင်းရှင်းမှု ရှိ၊ မရှိတို့ကို အမေရိကန်အစိုးရစာရင်းစစ်အဖွဲ့၏ စစ်ဆေးမှုကို မြန်မာစီးပွားရေးသမားအချို့က လက်ခံသဘောတူလိုက်ခြင်း ဖြစ်သည်။ ထို့ကြောင့် အမေရိကန်စာရင်းစစ်အဖွဲ့၏ တွေ့ရှိချက်ပေါ်မူတည်၍ ပိတ်ဆို့မှုစာရင်း ဖြေလျှော့ရေးမှာ တဖြည်းဖြည်း ဖြစ်လာနိုင်ဖွယ်ရှိကြောင်း ကန်လက်ထောက်နိုင်ငံခြားရေးဝန်ကြီး တွမ်မာလင်နောစကီးနှင့် တွေ့ဆုံမှုတွင် ပါဝင်ခဲ့သည့် မြန်မာစီးပွားရေးလုပ်ငန်းရှင်တစ်ဦးက ပြောသည်။

‘‘ယေဘုယျတော့ အဲဒီအစစ်ခံဖို့ ဆုံးဖြတ်ကြတဲ့အထဲမှာ Max Myanmar က ဦးဇော်ဇော် ပါပါတယ်။ ပိတ်ဆို့မှုကို အမေရိကန်က လျှော့ချင်နေပါပြီ။ ဒါမှလည်း ရင်းနှီးမြှုပ်နှံမှုတွေ ပိုလုပ်လို့ရမယ်။ သူတို့ဆီက ၀င်လာမယ့် ကုမ္ပဏီတွေက ဒီခရိုနီတွေလို့ သူတို့ပြောတဲ့ စီးပွားရေးသမားတွေနဲ့ ပေါင်းမလုပ်လို့ကို မဖြစ်ဘူးလေ’’ဟု ၎င်းကဆိုသည်။

အမေရိကန်၏ စီးပွားရေးမူဝါဒပိုင်းကို မြန်မာပြည်သူများ သဘောမတွေ့ခြင်းမှာ အောက်ခြေပြည်သူလူထုနှင့် နီးစပ်သည့် စီမံကိန်းများ နည်းပါးခြင်းကြောင့်လည်းဖြစ်ကြောင်း ဒေါက်တာဖုန်းဝင်းကပြောသည်။

‘‘စီးပွားရေးဦးမော့ဖို့ ကျွန်တော်တို့က အသေးစား၊ အလတ်စားလုပ်ငန်းတွေကို မြှင့်တင်ပေးဖို့ ပြောတယ်။ သူတို့က တစ်ခါလာလည်း ဘဏ္ဍာရေးနဲ့ စွမ်းအင်ကိုပဲ ဦးတည်ပြီးလုပ်တယ်။ ဒီကဏ္ဍတွေက အောက်ခြေကို ချက်ချင်းမရောက်ဘူး’’ ဟု ဒေါက်တာဖုန်းဝင်းက ဆိုသည်။

သို့သော် ပိတ်ဆို့မှုနှင့်ပတ်သက်၍ ကန်အစိုးရသတ်မှတ်ချက်များ ပြောင်းလဲသွားရန်မရှိကြောင်း ကန်နိုင်ငံခြားရေးဝန်ကြီးဌာနက သတင်းထုတ်ပြန်ခဲ့သည်။ ထို့ပြင် အမေရိကန်ကုမ္ပဏီများ မြန်မာနိုင်ငံတွင် ဒေါ်လာငါးသန်းအထိ ရင်းနှီးမြှုပ်နှံမည်ဆိုပါက အစီရင်ခံစာတင်ရန် အမေရိကန်အစိုးရက ထုတ်ပြန်ထားသည်။ လက်ရှိတွင်လည်း အမေရိကန် ACO ကုမ္ပဏီက ဒေါ်လာ သန်း ၄၈၀ တန် နေရောင်ခြည်သုံး လျှပ်စစ်ဓာတ်အားပေးစက်ရုံကို မြန်မာနိုင်ငံတွင် ရင်းနှီးမြှုပ်နှံလိုက်ပြီဖြစ်သည်။

မြန်မာ့မျက်မှောက်ရေးရာကို ကန်အစိုးရ ဘယ်လိုကိုင်တွယ်မလဲ။

ဂျွန်ကယ်ရီက ဦးသိန်းစိန်ကို ဖိအားပေးစကားမပြောရုံနှင့်၊ ခရိုနီပိုင်ဟိုတယ်တွင် တည်းခိုရုံနှင့် မြန်မာမျက်မှောက်ရေးရာများကို အမေရိကန်အစိုးရက လျစ်လျူရှုပြီဟု ထင်ကြေးပေးရန် စောလွန်းနေကြောင်း နိုင်ငံရေးသုံးသပ်သူများက ပြောသည်။

သံတမန်လမ်းကြောင်းအရ ထုတ်မပြောသာသည့် လျှို့ဝှက်သတင်းစကားကို ဂျွန်ကယ်ရီက အိုဘားမားကို ပေး၊ မပေး မည်သူမျှ အတိအကျမသိနိုင်ပေ။ တရုတ်နိုင်ငံ၏ ကြွယ်ဝချမ်းသာမှု၊ ဗိုလ်ကျစိုးမိုးမှုတို့ကြောင့် တရုတ်ဘက်ကို မြန်မာပြန်မယိုင်သွားစေရန် အမေရိကန်က ကြိုးစားနေသည်ဟု ယူဆရကြောင်း နိုင်ငံရေးအကျဉ်းသားဟောင်းများအဖွဲ့က ဦးမြင့်အောင်က ပြောသည်။

ထို့ပြင် သမ္မတဦးသိန်းစိန်က တစ်နိုင်ငံလုံးအပစ်အခတ်ရပ်စဲရေးစာချုပ် လက်မှတ်ရေးထိုးရန် အမေရိကန်အစိုးရကို မက်လုံးပေးထားသည်။ အပစ်အခတ်ရပ်စဲရေးမှာ အမေရိကန်အထူးလိုလားသော ကိစ္စလည်းဖြစ်ပြီး ပြုပြင်ပြောင်းလဲရေးကိုတော့ ကန်အစိုးရက ရပ်တန့်ခံမည်မဟုတ်ဟု သုံးသပ်ရကြောင်း ၎င်းကဆက်ပြောသည်။

‘‘အမေရိကန်ကတော့ အချိုသတ်ပြီးပေါင်းတယ်လို့ ယူဆတယ်။ ဒါပေမဲ့ အပြောင်းအလဲကိုတော့ ရပ်တန့်ခွင့်ပေးမှာ မဟုတ်ဘူး။ ခွန်အားစိုက်ပြီးတော့ တွန်းမှာပါ။ မြန်မာအစိုးရ Road Map ကလည်း နှေးတယ်။ အဲဒီနှေးတာကို ဘယ်လိုမြန်အောင်တွန်းမလဲဆိုတာ ကျွန်တော်တို့လည်း ၀ိုင်းပြောမှာပဲ။ ကျွန်တော်တို့ ကိုယ်တိုင်လည်း တရုတ်လုပ်ငန်းရှင်တွေဆီမှာ အနှိမ်ခံပြီး လုပ်နေတာထက် အမေရိကန်ကုမ္ပဏီတွေ ၀င်လာရင် မြန်မာပြည်သူတွေ အကျိုးရှိတာကို မြန်မြန်မြင်ချင်တယ်’’ဟု ၎င်းကပြောသည်။

မြန်မာသည် အမေရိကန်နှင့် သံတမန်ဆက်ဆံရေးကို ပြန်လည်ထူထောင်ခဲ့သည့်အတွက် ကမ္ဘာ့မျက်နှာစာတွင် ၀င်ဆံ့ခဲ့သည်။ တချိန်က အထီးကျန်လွန်းပြီး ဒေသတွင်းအင်အားကြီးဖြစ်သည့် တရုတ်နိုင်ငံအပေါ်ကို အလုံးစုံ မှီခိုနေခဲ့ရသည်။ ယခုတော့ တရုတ်အစိုးရကိုယ်တိုင်က မြန်မာကို ခပ်ပေါ့ပေါ့သဘောမထားရဲတော့ဘဲ မူဝါဒပြောင်းကာ မြန်မာအစိုးရနှင့်သာမက လူထု၊ အရပ်ဖက်အဖွဲ့အစည်းများနှင့် ထိတွေ့ဆက်ဆံလာရသည်အထိ မြန်မာအကျိုးကျေးဇူးများခဲ့သည်။ ပြုပြင်ပြောင်းလဲမှု မြန်ဆန်မှုကြောင့်ရော ကမ္ဘာ့အင်အားကြီးနိုင်ငံနှင့် ဆက်ဆံမှုကြောင့်ပါ မြန်မာက နိုင်ငံတကာရင်းနှီးမြှုပ်နှံမှုများနှင့် ဖွံ့ဖြိုးရေးအကူအညီများ ရခဲ့သည်။ အာဆီယံဥက္ကဋ္ဌရာထူးကိုလည်း အဆင်ပြေစွာ ထမ်းဆောင်နိုင်ခဲ့သည်။ အကြီးမားဆုံးရလဒ်မှာ ကမ္ဘာ့အင်အားကြီး တရုတ်နှင့် အိန္ဒိယတို့ကြားတွင် မြန်မာက အကောင်းဆုံးသော ဗဟိုချက်နိုင်ငံတစ်ခုအဖြစ် နေရာစတင်ယူနိုင်ခဲ့ခြင်းဖြစ်သည်။

‘‘မြန်မာဟာ ဘင်္ဂလားပင်လယ်အော်မှာ အချက်အချာကျတယ်။ မလက္ကာရေလက်ကြား၊ အိန္ဒိယသမုဒ္ဒရာနဲ့လည်းနီးတယ်။ အင်အားကြီးနှစ်နိုင်ငံကြားမှာလည်း ရှိတယ်။ ဒီနိုင်ငံကိုသာ ပြုပြင်ပြောင်းလဲရေးလုပ်ပေးနိုင်ရင် အမေရိကန်ဟာ ဒေသဆိုင်ရာ ပါဝါတစ်ခုရနိုင်မယ်’’ဟု ဦးမြင့်အောင်ကပြောသည်။

‘‘အမေရိကန်နဲ့ ဆက်ဆံရလို့ကတော့ မြန်မာက အမြဲတမ်းအသာပဲ။ နာလိုက်တာ တစ်ခုမှမရှိဘူး။ အရင်က Imigration အကုန်လုံးက မြန်မာဆို ဒီကောင် ဘာလာခိုးလာလဲအမြင်နဲ့ ကြည့်ခံရတယ်။ အခုတော့ ခေါင်းမော့နိုင်တယ်။ ပြည်သူတစ်ဦးချင်းလည်း အကျိုးရှိပါတယ်’’ဟု ဒေါက်တာဖုန်းဝင်းကပြောသည်။

ဖိအားပေးခြင်းထက် တိုက်တွန်းမှုများဖြင့် လက်တွဲခေါ်ယူနေသော အမေရိကန်အစိုးရ၏ လုပ်ရပ်မှာ ရုတ်တရက်ကြည့်လျှင် မြန်မာအစိုးရကို ချော့ပေါင်းလွန်းသည်ဟု သာမန်ပြည်သူများ ထင်မြင်လွယ်မိကြပေမည်။ သို့သော် အမေရိကန် အဓိကအာရုံစိုက်နေသည်က ၂၀၁၅ ရွေးကောက်ပွဲ လွတ်လပ်ပြီးတရားမျှတဖို့ပင်ဖြစ်သည်။ ကန်အစိုးရ၏ လုပ်ရပ်နှင့် မူဝါဒများမမှားကြောင်း လာမည့်တစ်နှစ်ခွဲအတွင်း ကျင်းပတော့မည့် အထွေထွေရွေးကောက်ပွဲဖြင့် သက်သေပြချင်နေသည်။ ယခုနိုဝင်ဘာတွင် လာရောက်တော့မည့် သမ္မတအိုဘားမား၏ ဒုတိယအကြိမ်မြောက် မြန်မာပြည်ခရီးစဉ်တွင်လည်း မြန်မာ့မျက်မှောက်ရေးရာကို တွန်းအားပေးမလား၊ ဖိအားပေးမလားဆိုသည်ကိုတော့ စောင့်ကြည့်ရမည်ဖြစ်သည်။

အစိုးရသစ်လက်ထက် မြန်မာ-အမေရိကန် ဆက်ဆံရေး မှတ်တိုင်အချို့။

- အစိုးရသစ်လက်ထက်တွင် အမေရိကန်မှ မြန်မာသို့ ပို့ကုန်တန်ဖိုး ၁၄၅ သန်းကျော်အထိ ရောက်ရှိပြီး သုံးနှစ်အတွင်း ပို့ကုန်တန်ဖိုး သုံးဆကျော်မြင့်တက်။

- ကိုကာကိုလာ၊ ပက်(ပ)စီ၊ GE Electronic၊ Visa Card၊ Chevron၊ APR Energy၊ Caterpillar၊ Ball သံဘူးကုမ္ပဏီစက်ရုံနှင့် Gap အ၀တ်အထည်စက်ရုံတို့ လာရောက်လုပ်ကိုင်လျက်ရှိ။

- ယခုနှစ်သြဂုတ်လကုန်တွင် အမေရိကန်က အကြီးဆုံးရင်းနှီးမြှုပ်နှံမှုအဖြစ် ACO က ဒေါ်လာ သန်း ၄၈၀ တန် လျှပ်စစ်ဓာတ်အားပေးစက်ရုံ တည်ဆောက်မည်ဟု ကြေညာခဲ့။

- စီးပွားရေးပိတ်ဆို့မှုအချို့ ဖြေလျှော့ပေးခဲ့သော်လည်း တစ်ဦးချင်းပိတ်ဆို့မှုနှင့် မြန်မာနိုင်ငံမှ ထွက်ရှိသော ကျောက်စိမ်းနှင့် ကျောက်စိမ်းဖြင့် ပြုလုပ်သော ပစ္စည်းများ၊ ပတ္တမြားတင်သွင်းမှုတို့ကို တားမြစ်ထား။
7Day News Journal


မန္တလေးမှာပေါ့ဗျာ …
၇.၉.၂ဝ၁၄ (တနင်္ဂနွေ) နေ့တုန်းက ပုဂံ၊ ညောင်ဦး နာရေးအသင်းဖွင့်ပွဲနှင့် လူမှုရေးဟောပြောပွဲ အောင်မြင်စွာ ပြီးဆုံးသွားလို့ ကျွန်တော်နှင့် ကျွန်တော့်ဇနီး ရွှေဇီးကွက်တို့ ရေးသားထားတဲ့ “ပရဟိတ ကာ ချုပ်ကြီးထံအိတ်ဖွင့်ပေးစာ” စာအုပ်ရောင်းချပွဲကို မန္တလေးမြို့ရှိ ထွန်းဦး စာပေတိုက်၌ ဝယ်ယူအားပေး ကြ သည့် စာဖတ်ပရိသတ်များအား အမှတ်တရ လက်မှတ်ထိုးပွဲသို့ ရောက်ရှိခဲ့ပါတယ်။

၈.၉.၂ဝ၁၄ ရက်နေ့ နံနက် (၈း၄၅) အချိန်တွင် ထွန်းဦးစာပေတိုက်သို့ ရောက်ရောက်ခြင်း ကျွန်တော့်၏ မိတ်ဆွေတစ်ဦးမှ မန္တလေးမြို့ထုတ် “ရတနာပုံ” သတင်းစာကြီးအား ကျွန်တော့်အားပေးကာ “ကိုကျော်သူ အိမ်ခြံမြေရောင်းဝယ်ရေး လုပ်နေပြီးလား” ဟုပြောဆိုကာ သတင်းစာ စာမျက်နှာ (၁၉) သို့ ပြသခဲ့တော့ သည်။

သူပြသော စာမျက်နှာအား ကြည့်မိသောအခါ …

အိမ်မက်ဆုံရာ (၇)

မယုံနိုင်ဖွယ် … တိုးတက်နေတဲ့
ချမ်းမြသာစည် မနော်ဟရီပေါ်ရောက်တိုင်း
ဇာတိမြေက ဆွေကြီး မျိုးကြီး
အိမ်ကြီး ၀ိုင်းကြီးကို စွန့်ခွာပြီး
တစ်ခါမှ မကြားခဲ့ဖူးတဲ့
ပဲဖြူကုန်း အ.မ.က အနီး
လယ်ကွင်းနံဘေး အိမ်သေးသေးမှာ
မြွေတွေ့ရင်ထခုန် သရဲခြောက်ရင်ရင်တုန်နဲ့
ဇာတ်ဆရာအလိုကျ မလွမ်းပိုဘ၀နဲ့
အခြေချနေထိုင်ရင်း
စပါးခင်တွေကနေ မန္တလေးမြို့သစ်အဖြစ်
ရင်ခုန်ဖွယ် ပြောင်းလဲသွားပုံကို
နှစ်ပေါင်းရှည်ကြာ အနီးကပ်တွေ့မြင်ခွင့်ရခဲ့တဲ့
ဝန်ထမ်းကွက်တွေပေးတိုင်း ရင်ခုန်ခဲ့ရတဲ့
အရှေ့တောင်မြို့နယ်က …
မြို့သစ်သူ ဆရာမလေးဘဝကိုလွမ်းတယ်။
တစ်ခါတလေ ရုပ်ရှင်ကြည့်ဖြစ်တဲ့အခါတိုင်း
ရုပ်ရှင်ရုံ လူမပြည့်တာကို ဝမ်းနည်းမိပြီး
၁၉၈၄ ခုနှစ်က ဒါရိုက်တာ မျိုးမြင့်အောင်ရဲ့
နှစ်ကိုယ်ခွဲ လက်စွမ်းပြရိုက်ချက်တွေနဲ့
ပထမဆုံးကား ပထမဆုံးပွဲစဉ်က စပြီး
ရုံပြည့်ပြီး ဆိုင်းဘုတ်ချိတ်ပြီး စူပါမင်းသားဖြစ်သွားတဲ့
ချစ်ကြီးလေးနှစ်မျှင် မင်းသား ကျော်သူကို လွမ်းတယ် …

စံကားတစ်ပွင့် အိမ်မက်ဆုံရာခြံ
ဖုန်း ………………….
မွန်းလွဲ (၁၂း၃ဝ) နာရီမှ ညနေ (၆း၃ဝ) နာရီအတွင်း မြေကွက်ကြည့်ရှုနိုင်ပါသည်။
ဥယျာဉ်တော်ရွာ သိန်း (၁ဝဝ / ၁၅ဝ / ၈ဝ)၊ ပလိပ် သိန်း (၄ဝ)
၂ဝ ပေ x ပေ ၈ဝ သိန်း (၂ဝဝဝ / ၃ဝဝဝ) ရတနာပုံဈေးအနီး၊ မဟာအောင်မြေ
ချမ်းမြသာစည် (- - -) ပေ၂ဝ x ၆ဝ RC သုံးထပ်၊ သိန်း (၁၈ဝဝ)၊ ပေ ၆ဝ x ပေ ၆ဝ (နှစ်ထပ်တိုက်) သိန်း (၆ဝဝဝ) ၂၅ ပေ x ပေ ၆ဝ သိန်း (၉ဝဝ)၊ ပေ ၃ဝ x ပေ ၄ဝ နှစ်ထပ်တိုက် သိန်း (၅ဝဝဝ)၊ ပေ ၄ဝ x ၆ဝ တစ်ထပ်တိုက်၊ နှစ်ထပ်တိုက် သိန်း (၄ဝဝဝ) … စသဖြင့် ဆက်သွယ်ရမည့် အမည်၊ လိပ်စာ၊ တယ်လီဖုန်း နံပါတ်တို့အား ၂ ကော်လံ (၈) လက်မဆိုဒ် ကြော်ငြာအားတွေ့ ရှိရတော့သည်။

“အော် … ဒါကြောင့် ကိုကျော်သူ အိမ်ခြံမြေရောင်းနေပြီးလား ? … ဟု နောက်ပြောင် မေးမြန်းခြင်း ဖြစ် တော့သည်။”

ကျွန်တော် စဉ်းစားမိတော့သည်။ “ချစ်ကြိုးလေးနှစ်မျှင်” ဇာတ်ကားကထဲက အားပေးခဲ့သော ပရိသတ်များ
ဖြစ်ကြသော ကျောင်းသား/သူ၊ ဆရာ/မ၊ အင်ဂျင်နီယာ၊ ဆရာဝန်/မ၊ စီးပွားရေးသမားများ၊ ပျံကျဈေး သည် များ၊ ရဟန်းရှင်လူများ၊ လူတန်းစားအလွှာပေါင်းစုံတို့အား ကျွန်တော့်အနေဖြင့် ယနေ့တိုင် ကျေးဇူးတရား ကို မမေ့နိုင်ပါ။ ထိုကျေးဇူးတရားများအား ပြန်လည်ပေးဆပ်သောအားဖြင့် ကျွန်တော်သည် ယခုဆိုလျှင် နာရေး ကူညီမှုအသင်း(ရန်ကုန်)တွင် လူမှုရေးလုပ်ငန်းအား ပရဟိတစိတ်ဓါတ်စစ်စစ်ဖြင့် ကိုယ် ကျိုးမဖက်ပဲ အများ အကျိုးအတွက် သစ္စာဆိုကာ ပေးဆပ်နေသူတစ်ယောက်ဖြစ်ပါသည်။

ရုပ်ရှင်အနုပညာလောကတွင် အောင်မြင်မှုရရှိနေစဉ် ကာလများတွင်လည်း ဇီးထုတ်များ၊ ယိုစုံများ၊ နေကြာစေ့ ထုတ်များထဲတွင် ကျွန်တော်တို့၏ ရုပ်ရှင်ဇာတ်ဝင်ခန်း ဓာတ်ပုံများ၊ ပြက္ခဒိန်ဓာတ်ပုံများအား တရားမဝင် ခွင့်ပြုချက်မရဘဲ ထည့်သွင်း ရောင်းချခြင်းများကို ကြုံတွေ့ခဲ့ရဖူးသည်။ စီးပွားရေးသမား ဟူ သည် မိမိတို့၏ ရောင်းချကုန်များအား လူစိတ်ဝင်စားမည့် ဓာတ်ပုံများ၊ စာသားများဖြင့် ကြော်ငြာကာ ရောင်း ချပါမှ အောင်မြင်မှု ပိုမိုရရှိစေသည် မဟုတ်ပါလား … ကျော်သူ ထမင်းဆိုင်၊ ကျော်သူ ကွမ်းယာ၊ ကျော်သူ ရေခဲမုန့်၊ ကျော်သူ လမ်း၊ ကျော်သူ လေထိုးကျွတ်ဖာသည် ဟူသော  ဆိုင်းဘုတ်တပ်ထားသော ဆိုင်များ မြန်မာပြည်အနှံ့တွင်ရှိသည်ကို ကျွန်တော်မြင်တွေ့ခဲ့ဖူးသည်။ ထို “ကျော်သူ” ဟူသော အမည်မှာ ကျွန်တော် တစ်ဦးထဲ အသုံးပြုရမည့် အမည်မဟုတ်။ “ကျော်သူ” ဟူသော အမည်မှာလည်း တရားဝင် မှတ်ပုံတင်ထားသော အမည်မဟုတ်။ မင်းသား ကျော်သူ၊ ဒေါက်တာ ကျော်သူ၊ အင်ဂျင်နီယာ ကျော်သူ၊ ဝန်ကြီး ကျော်သူ ဟူ၍ များစွာရှိသည်။ သို့သော် နာမည်တူကြသော်လည်း ထမ်းရွက်နေကြသော လုပ်ငန်း တာဝန်များမှ ကွဲပြားချက်ရှိသည်။

ယခု အိမ်ခြံမြေ ရောင်းဝယ်ရေးကြော်ငြာတွင် “ချစ်ကြိုးလေနှစ်မျှင် မင်း သား ကျော်သူကိုလွမ်းတယ်” သိန်း (၉ဝဝ)၊ သိန်း (၁၈ဝဝ)၊ သိန်း (၄ဝဝဝ)၊ သိန်း (၅ဝဝဝ)၊ သိန်း (၆ဝဝဝ) ဟူသော ကြော်ငြာဖြစ်နေတော့ သည်။

သို့သော်  ကျွန်တော့်အနေဖြင့် မင်းသား ကျော်သူ အမည် ပါရှိသော ယင်းကြော်ငြာမှုအား ကျွန်တော် မေတ္တာ၊ ဂရုဏာ၊ မုဒိတာ၊ ဥပေက္ခာ ထားပေးနိုင်ခဲ့ပါသည်။ အိမ်၊ ခြံ၊ မြေ ဈေးကွက်ကြော်ငြာ ဖြစ်နေ၍ တော်သေးသည်။ အကယ်၍များ နောင်တစ်ချိန်တွင် …

“ကျော်သူကို လွမ်းတယ်”

(အမျိုးသမီးဝတ် .. ဘော်လီအင်္ကျီ)
(အမျိုးသမီး .. လစဉ်သုံးအတွင်းခံ)
(အမျိုးသားများအတွက် .. ချစ်သူရာဘာရုပ်)
(အမျိုးသားသုံး .. လူကြီးကစားစရာ အရုပ်မျိုးစုံ) ဟူသော ကြော်ငြာများ နောင်တစ်ချိန်ပေါ်ပေါက်လာမည် ကိုပဲ စိုးရိမ်မိတော့သည်။ ဒါကြောင့် “သိန်း (၆ဝဝဝ)နဲ့ ကျော်သူ့ကို လွမ်းတယ်” ဆိုတာ အာ့ထှာလေးကို ပြောပြချင်တာပါ။
                                                                                  
မေတ္တာ၊ ဂရုဏာ၊ မုဒိတာ၊ ဥပေက္ခာဖြင့်
     ကျော်သူ



သတင်း-ဆောင်းပါး နှင့် မှတ်တမ်း ဓါတ်ပုံများ -  နာရေးကူညီမှုအသင်း(ရန်ကုန်)