12/19/14


ပြည်ထောင်စုလွှတ်တော်မှာ တပ်မတော်သား ကိုယ်စားလှယ်အမတ် လေးပုံတပုံဟာ ရွေးကောက်ပွဲ ၀င်စရာမလိုဘဲ ကာကွယ်ရေး ဦးစီးချုပ် ခန့်အပ်မှုနဲ့ တာဝန်ထမ်းဆောင် နေတာကို  မြန်မာပြည်သူ ၁၅ ရာခိုင်နှုန်း လောက်သာ သိကြတယ်လို့ စစ်တမ်း ကောက်ယူခဲ့တဲ့  အာရှဖောင်ဒေးရှင်းက ထုတ်ပြန်ပါတယ်။

ဒီလို တပ်ကနေရာ ယူထားတာကို သိသူ နည်းပါးနေတာဟာ ဖွဲ့စည်းပုံ ပြင်ဆင်ရေး ကြိုးပမ်းမှုကို အဓိက အခက်အခဲ ဖြစ်စေနိုင်တယ်လို့ ဒီဇင်ဘာ ၁၂ ရက်နေ့ထုတ် အစီရင်ခံစာက ထောက်ပြပါတယ်။

အမေရိကန်အခြစိုက် အာရှဖောင်ဒေးရှင်းက “၂၀၁၄ ခုနှစ် မြန်မာနိုင်ငံ ပြောင်းလဲနေသော လူ့အဖွဲ့အစည်း အတွင်းရှိ နိုင်ငံသားများ၊ အသိပညာနှင့် တန်ဖိုးထားမှုများ အစီရင်ခံစာမှာ ဖော်ပြတာဖြစ်ပါတယ်။

ဒီအစီရင်ခံစာကို သြစတြေးလျနိုင်ငံခြားရေးနဲ့ ကုန်သွယ်ရေးဝန်ကြီးဌာနက ထောက်ပံ့တဲ့ ရန်ပုံငွေနဲ့ အမေရိကန်ပြည်ထောင်စု ဆန်ဖရန်စစ်စ်ကို အခြေစိုက် အာရှဖောင်ဒေးရှင်းက စစ်တမ်းကောက်ယူပြုစု ထုတ်ပြန်ခဲ့တာဖြစ်ပါတယ်။

ဒီဖောင်ဒေးရှင်းဟာ မေလနဲ့ဇွန်လအတွင်း နိုင်ငံတ၀န်း တိုင်းနဲ့ ပြည်နယ်အသီးသီးက အရွယ်ရောက်ပြီးသူ လူပေါင်း  ၃ ထောင်ကို မေးမြန်းစစ်တမ်းကောက်ခဲ့တာဖြစ်ပါတယ်။

ဖြေဆိုသူ အများစု ၆၈ ရာခိုင်နှုန်းကတော့ လွှတ်တော်အမတ်နေရာတွေရဲ့ အချိုးအစားကို မသိရှိကြောင်း ဖြေဆိုကြပြီး ကျန် ၁၇ ရာခိုင်နှုန်းကတော့ တပ်မတော်သားအမတ်ဦးရေ လေးပုံတပုံ ရယူထားတာကို မှန်အောင် မဖြေဆိုနိုင်ကြဘူးလို့ ဆိုပါတယ်။

ဥပဒေကြမ်းတွေကို ဥပဒေအဖြစ် ပြဋ္ဌာန်းဖို့ တာဝန်ရှိအဖွဲ့အစည်းဟာ ပြည်ထောင်စုလွှတ်တော် ဖြစ်တယ်ဆိုတာကိုလည်း ဖြေကြားသူရဲ့ ၁၅ ရာခိုင်နှုန်းကသာ ခွဲခြားဖြေဆိုနိုင်ကြတယ်လို့ ဆိုပါတယ်။

ပြည်နယ်တိုင်းဒေသကြီး လွှတ်တော်တွေမှာ ဖြေဆိုသူအားလုံးရဲ့ ၄၉ ရာခိုင်နှုန်းက တပ်မတော်သား ကိုယ်စားလှယ်တွေ လွှတ်တော်အမတ်နေရာ ယူထားတာကို မသိကြပဲ၊ ၁၃ ရာခိုင်းနှုန်းက စစ်သားအမတ် မရှိဘူးလို့ ယူဆသလို ကျန် ၃၉  ရာခိုင်နှုန်းသာ သိကြတယ်လို့ဆိုပါတယ်။

ပြည်ထောင်စုလွှတ်တော်မှာ ဖွဲ့စည်းပုံအခြေခံဥပဒေပြင်ဆင်ရေးကို ဖွင့်ထားပေမယ့် တပ်မတော်သား ကိုယ်စားလှယ် ထောက်ခံချက်မရှိရင် ပြင်ဆင်ဖို့ မဖြစ်နိုင်တဲ့အချက်ကို အစီရင်ခံစာက ထောက်ပြပါတယ်။

၂၀၀၈ ခုနှစ် ဖွဲ့စည်းပုံအခြေခံဥပဒေအရ ဥပဒေ  ပြင်ဆင်လိုတဲ့အခါ တပ်မတော်သားကိုယ်စားလှယ်တဦးက အနည်းဆုံးထောက်ခံမှ  ပြင်ဆင်နိုင်မှာဖြစ်တာကြောင့် ဒီအကျပ်အတည်းဆိုက်ရောက်နေသလို ဒါကို ကျော်လွှားနိုင်ဖို့အတွက် ပြည်ထောင်စုလွှတ်တော်က ခြောက်ပွင့်ဆိုင်တွေ့ဆုံဆွေးနွေးဖို့ မကြားသေးခင်ကာလကတော့ ဆုံးဖြတ်ခဲ့ပါတယ်။

ဒါပေမယ့် နှစ်ပွင့်အဖြစ်အဆိုပြုထားတဲ့ တပ်မတော်ကာကွယ်ရေးဦးစီးချုပ်နဲ့ သမ္မတဦးသိန်းစိန်တို့က ခြောက်ပွင့်ဆိုင်ကို လိုလားပုံမရှိတဲ့ပြောဆိုမှုတွေ တုန့်ပြန်ခဲ့ကြပါတယ်။

လူအများက တရားဥပဒေအရ တန်းတူအခွင့်အရေး ရှိသင့်တယ်ဆိုတဲ့ အခြေခံမူကို အခိုင်အမာ သဘောတူကြပြီး နိုင်ငံရေးနဲ့ ဘာသာရေးကို သီးခြားခွဲထားသင့်တယ်လို့ သဘောတူကြပါတယ်။

ဖြေကြားသူအားလုံးရဲ့ သုံးပုံတပုံနီးပါးက နိုင်ငံသားတွေမှာ ကျား၊ မ၊ လူမျိုး သို့မဟုတ် ဘာသာရေး ကွဲပြားမှုကို ပဓာန မထားဘဲ ဥပဒေအရ တန်းတူညီမှု ရှိစေရမယ်ဆိုတဲ့ အခြေခံမူကို သဘောတူညီ ကြတယ်လို့ ဆိုပါတယ်။

ခေါင်းဆောင်တွေမှာ တရားမျှတမှုနဲ့ ဆုံးဖြတ်ချက်ခိုင်မာမှုကို အဓိက တန်ဖိုးများအဖြစ် ဖော်ပြကြပြီး ခေါင်းဆောင်တဦးရဲ့ အရည်အသွေးကိုတော့ ၅၄ ရာခိုင်နှုန်းက တရားမျှတမှု ၄၇ ရာခိုင်နှုန်းက သဘောထားကြီး စိတ်စေတနာကောင်းမှုနဲ့ ၄၆ ရာခိုင်နှုန်းက ရိုးသားမှုတွေကို ဖော်ပြသလို ၁၉ ရာခိုင်နှုန်းက ဘာသာရေး သက်ဝင်ယုံကြည်မှုလို့ စစ်တမ်းက ဖော်ပြပါတယ်။

ကျန်စစ်တမ်းကောက်ယူချက်တွေအရ တရားစီရင်ရေးနဲ့ပတ်သက်တဲ့ ဗဟုသုတ အနည်းပါးဆုံးဖြစ်သလို အစိုးရဖွဲ့စည်းပုံနဲ့ လုပ်ငန်းတာဝန်နဲ့ပတ်သက်တဲ့ဗဟုသုတနည်းပါးကြတယ်လို့ဆိုပါတယ်။

ဖြေကြားသူရဲ့ ၉ ရာခိုင်နှုန်းလောက်သာ နိုင်ငံရေးကို စိတ်ဝင်စားကြပေမယ့် ရွေးကောက်ပွဲမှာ မဲပေးလိုသူ ရာခိုင်နှုန်း ၉၀ ကျော်တယ်လို့ ဆိုပါတယ်။

ပြည်သူအများစုဟာ နိုင်ငံရေးအမြင်တွေကို လွတ်လပ်စွာ ထုတ်ဖော်ပြောဆိုနိုင်တယ်လို့ ယူဆကြပေမယ့် ပြည်နယ်တွေမှာတော့ အချိုးအစားနည်းသွားတယ်လို့ ထောက်ပြပါတယ်။

ငြိမ်းချမ်းရေးလုပ်ငန်းစဉ်နဲ့ပတ်သက်လို့ လက်ရှိဖြစ်ပွားနေတဲ့ လက်နက်ကိုင်ပဋိပက္ခတွေနဲ့ ပတ်သက်တဲ့ ဗဟုသုတ နည်းပါးကြောင်းနဲ့ ဖြေဆိုသူရဲ့ ၅၅ ရာခိုင်နှုန်းက မြန်မာနိုင်ငံမှာ လက်နက်ကိုင်ပဋိပက္ခတွေ ဆက်ဖြစ်နေဆဲလို့ ဖြေသလို ၃၄ ရာခိုင်နှုန်းက လက်နက်ကိုင်ပဋိပက္ခ မရှိဘူးလို့ ဖြေဆိုကြပါတယ်။

လက်ရှိငြိမ်းချမ်းရေးဖြစ်စဉ်နဲ့ ပတ်သက်လို့ သတိနဲ့မျှော်လင့်နေတယ်လို့ အများက ဖြေဆိုပြီး ဖက်ဒရယ်စနစ်နဲ့ပတ်သက်လို့ နားလည်သဘောပေါက်မှု  အလွန်နည်းပါးသလို စစ်တမ်းဖြေဆိုသူ ၁၄ ရာခိုင်နှုန်းကသာ ဖက်ဒရယ်စနစ်ကို ကြားဖူးကြောင်းနဲ့ ကြားဖူးသူတွေရဲ့ တ၀က်နီးပါး ၄၅ ရာခိုင်နှုန်းက အဓိပ္ပယ်ကို မသိရှိပါလို့ ဖြေဆိုကြောင်း အစီရင်ခံစာက ဖော်ပြပါတယ်။

ပြည်သူလူထုရဲ့ ရှုမြင်သုံးသပ်ချက်အခန်းမှာတော့ ပြည်သူလူထုဟာ မြန်မာနိုင်ငံက ဦးတည်နေတဲ့ လမ်းကြောင်းကို သတိနဲ့ယှဉ် အကောင်းမြင်ကြကြောင်းနဲ့ လူအများစုရဲ့ စီးပွားရေး အခြေအနေဟာ အပြောင်းအလဲ မရှိဘူးလို့ ဆိုပါတယ်။

By အေးနိုင် (ဒီဗွီဘီ)
http://burmese.dvb.no/archives/74200

 
၃ နာရီကြာတဲ့ သတင်းစာရှင်းလင်းပွဲမှာ မေးခွန်းတွေကို ဖြေကြားခဲ့။

ရုရှား နိုင်ငံသုံး ရူဘယ်ငွေ တန်ဖိုး အခု တစ်ပတ်အတွင်း အကြီးအကျယ် ထိုးကျ သွားခဲ့ပြီးတဲ့နောက် ရုရှား စီးပွားရေး နဲ့ ပတ်သက်လို့ စိုးရိမ် ပူပန်မှုတွေ လျော့ပါးအောင် သမ္မတ ပူတင်က ကြိုးပမ်း ခဲ့ပါတယ်။

ရုရှား ဗဟိုဘဏ်အနေနဲ့ အစောပိုင်း ကတည်းက မြန်မြန်ဆန်ဆန် ကိုင်တွယ် ဆောင်ရွက်သင့်တာ မှန်ပေမယ့် ရူဘယ် ငွေကြေး တည်ငြိမ်ဖို့ အခု ဆောင်ရွက် နေတာတွေဟာလည်း အလုပ်ဖြစ် လိမ့်မယ်လို့ သမ္မတ ပူတင်က သူ့ရဲ့ နှစ်ပတ်လည် သတင်းစာ ရှင်းလင်းပွဲမှာ ပြောသွားပါတယ်။

ရုရှား ငွေကြေး ပြဿနာ ဖြစ်ရတာဟာ အဓိက အားဖြင့် ပြင်ပက သက်ရောက်တဲ့ အချက်တွေကြောင့် ဖြစ်ရတယ်လို့လည်း သမ္မတ ပူတင်က ပြောပါတယ်။

လက်ရှိ စီးပွားရေး ကျဆင်းမှု အခြေအနေကနေ ရုန်းထွက်နိုင်ဖို့ အချိန် ၂ နှစ်လောက် ယူရနိုင်တယ် လို့လည်း သူက ပြောပါတယ်။

ရုရှား နိုင်ငံဟာ ယူကရိန်း အရေးနဲ့ ပတ်သက်ပြီး အနောက် နိုင်ငံတွေရဲ့ ပိတ်ဆို့ ဒဏ်ခတ်မှုတွေနဲ့ ရေနံစိမ်း ဈေးနှုန်း ကျဆင်း မှုတွေကြောင့် စီးပွားရေး ကျဆင်းမှုနဲ့ စတင် ရင်ဆိုင် နေရတာ ဖြစ်ပါတယ်။

ဘီဘီစီ (မြန်မာပိုင်း)
http://www.bbc.co.uk/burmese/world/2014/12/141218_russian_economic_crisis_putin_ease



Photo - Thiha Tun/ RFA

ရန်ကုန်မြို့ ဗဟန်းမြို့နယ်မှာ ဖွင့်လှစ်ထားတဲ့ V Gastro Bar ဆိုင်ပိုင်ရှင် ကိုထွန်းသူရိန် ၊ မန်နေဂျာ ထွဋ်ကိုကိုလွင် အပါအ၀င် နယူးဇီလန်နိုင်ငံသား အထွေထွေမန်နေဂျာ Mr.Philip တို့ကို သာသနာ ညှိးနွမ်းစေမှု ပုဒ်မ (၂၉၅ ) ၊ ၂၉၅ (က) ၊ မြို့နယ်အုပ်ချုပ်ရေးမှုးက ထုတ်ပြန်ထားတဲ့ အမိန့်ကို မလိုက်နာမူ ပုဒ်မ ၁၈၈ တို့နဲ့ ဒီနေ့ဗဟန်းမြို့နယ် တရားရုံးမှာ စွဲချက်တင် စစ်ဆေးခဲ့ပါတယ်။

ဗုဒ္ဓရုပ်ပွားတော်ရဲ့ ဦးခေါင်းတော်မှာ နားကြပ်တပ်ဆင်ထားတဲ့ Buddha Bar လို့ အမည်ပေးထားတဲ့ ဘားဆိုင် ကြော်ငြာကို အင်တာနက် လူမှုကွန်ရက် facebook မှာ ပြန့်နှံ့ခဲ့ရာမှာ ဆိုင်ကို ချိပ်ပိတ်လိုက်ပါတယ်။

Gastro Buddha Bar ဆိုင်ပိုင်ရှင်၊ အထွေထွေမန်နေဂျာ နဲ့မန်နေဂျာ တို့ကို အရေးယူပေးဖို့ ဗဟန်းမြို့နယ် မြို့နယ်သာသနာရေးဦးစီးမှုး ဦးရဲစိုးမြင့် နဲ့ဗဟန်းရဲစခန်းက တရားလိုပြုပြီး တရားစွဲဆိုထားတာဖြစ်ပါတယ်။

နယူးဇီလန်နိုင်ငံသား အထွေထွေမန်နေဂျာ Mr.Philip ရဲ့ တရားလွှတ်တော် ရှေ့နေ ဦးမြသွေးက စွဲချက်တင်ထားတဲ့ ပုဒ်မတွေအရ ထောင်ဒဏ် ၄ နှစ်အထိ ကျခံရနိုင်တယ်လို့ ပြောပါတယ်။

RFA Burmese
https://www.facebook.com/pages/RFA-Burmese/39218993127


မြန်မာနိုင်ငံမှာ ၂၀၁၅ အထွေထွေ ရွေးကောက်ပွဲကို လွတ်လပ်မျှတပြီး ပွင့်လင်းမြင်သာစွာနဲ့ ကျင်းပပေး သွားမှာ ဖြစ်တယ်လို့ ပြည်ထောင်စု ရွေးကောက် ပွဲ ကော်မရှင် ဥက္ကဌ ဦးတင်အေးက နေပြည်တော်မှာ ရောက်ရှိနေတဲ့ The Elders လို့ခေါ်တဲ့ ကမ္ဘာ့အထင်ကရ ခေါင်းဆောင်ကြီးများ အဖွဲ့ကို ဗုဒ္ဓဟူးနေ့က ပြောဆိုလိုက် ပါတယ်။

ဒါပေမဲ့ ဒီရွေးကောက်ပွဲမှာ အကြောက်တရားတွေနဲ့ ပေးရတဲ့ မဲပေးရွေးချယ်မှု မဖြစ်သင့်ကြောင်း ဟောင်ကောင်အခြေစိုက် AHRC အာရှလူ့အခွင့်အရေး စောင့်ကြည့်ရေးအဖွဲ့က ပြောလိုက်ပါတယ်။ အပြည့်အစုံကို မအင်ကြင်းနိုင်က တင်ပြထားပါတယ်။

နေပြည်တော်မှာ The Elders အဖွဲ့နဲ့ တွေ့ဆုံစဉ်မှာ ၂၀၁၅ ရွေးကောက်ပွဲကို လွတ်လပ်ပြီး ပွင့်လင်းမြင်သာစွာ ကျင်းပပေးမယ်လို့ ပြည်ထောင်စု ရွေးကောက်ပွဲ ကော်မရှင် ဥက္ကဌက ပြောကြားခဲ့တဲ့အကြောင်း The Elders အဖွဲ့က သတင်းထုတ်ပြန်ခဲ့တာပါ။

မကြာခင်ကာလမှာ မဲပေးတဲ့စနစ် ပညာပေးရေးလုပ်ငန်းစတင်တော့မှာဖြစ်ပြီး လွတ်လပ်မျှတတဲ့ ရွေးကောက်ပွဲကို ပွင့်လင်းမြင်သာစွာနဲ့ အောင်မြင်အောင်ကျင်းပဖို့ လူမှုအဖွဲ့အစည်းတွေနဲ့ ပူးပေါင်းဆောင်ရွက်ရေး ရွေးကောက်ပွဲကော်မရှင် ဥက္ကဌ ဦးတင်အေးက ပြောဆိုသွားပါတယ်။ ဒါ့အပြင် ရွေးကောက်ပွဲ စောင့်ကြည့်တဲ့ နိုင်ငံတကာ အဖွဲ့အစည်းတွေကိုလည်း ဖိတ်ခေါ်ဖို့ရှိတယ်လို့ ဆိုပါတယ်။

အခုလို ရွေးကောက်ပွဲကော်မရှင်က ဖိတ်ခေါ်တာကို ကြိုဆိုပေမဲ့ ဘယ်လောက် အတိုင်းအတာထိ လုပ်ပိုင်ခွင့်ပေးမလဲ ဆိုတာကိုတော့ စောင့်ကြည့်ရမှာ ဖြစ်တယ်လို့ AHRC အဖွဲ့ရဲ့ မြန်မာနိုင်ငံဆိုင်ရာ တာဝန်ခံ ဦးမင်းလွင်ဦးက ပြောပါတယ်။ ဒါ့အပြင် ၂၀၁၀ ရွေးကောက်ပွဲ ကျင်းပတုန်းကတော့ လူ့အခွင့်အရေး ချိုးဖောက်မှုတွေ ရှိခဲ့တယ်လို့ သူက ဆိုပါတယ်။

“ဒီ ၂၀၁၀ ရွေးကောက်ပွဲတုန်းက လူတိုင်းက လွတ်လပ်စွာ မဲပေးရွေးချယ်နိုင်ခွင့်ရှိတယ် ဆိုသော်လည်းပဲ ဒီအထက်အရာရှိတွေကို ကြောက်ရတာရယ်၊ ၀န်ကြီးဌာနအလိုက် မဲတွေကောက်ယူတာရယ်၊ နောက်ပြီး ကြံ့ဖွံ့အဖွဲ့ကနေပြီးတော့ အဖွဲ့ဝင်အင်အား စာရင်းတွေအလိုက် သူတို့ မဲစာရင်းတွေ တင်ပြတာတွေရှိတယ်။ အဲတော့ အဲ့ဒီဥစ္စာတွေက လွတ်လပ်စွာ ရွေးချယ်ပိုင်ခွင့်ဆိုတဲ့ အခွင့်အရေးကို အတိအလင်း ချိုးဖောက်ရာရောက်တယ်ပေါ့ဗျာ။ နောက်ပြီးတော့ တခါ ၂၀၀၈ ဖွဲ့စည်းပုံ အခြေခံ ဥပဒေမှာပါတဲ့ လူတိုင်းဟာ လွတ်လပ်စွာ ရွေးချယ်ပြဌာန်းပိုင်ခွင့် ရှိတယ်ဆိုတဲ့ အချက်တွေကို အတိအလင်း ချိုးဖောက်တယ်လို့ ကျနော်တို့က မြင်ပါတယ်။”

ဒါ့အပြင် ၂၀၁၅ ခုနှစ်မှာ ကျင်းပမယ့် ရွေးကောက်ပွဲမှာ လူ့အခွင့်အရေးချိုးဖောက်မှုမရှိစေဘဲ တရားမျှတမှုရှိစေဖို့ ဦးမင်းလွင်ဦးက အခုလို တိုက်တွန်းသွားပါတယ်။

“ဒီလိုမျိုး မဲပေးတဲ့အခါမှာ အကြောက်တရားတွေ ရှိနေရတဲ့ကိစ္စက လုံးဝ မဖြစ်သင့်တဲ့ ကိစ္စဖြစ်တယ်။ အဲတော့ ဌာနဆိုင်ရာအတွင်းမှာ မဲတွေကောက်ယူတဲ့ကိစ္စ၊ နောက်တခါ အတင်းအဓမ္မ ပါတီဝင်ခိုင်းပြီးတော့ ပါတီဝင်အင်အားနဲ့ မဲဆန္ဒနယ်မြေတွေ ဖြန့်ပြီးတော့ ဒီအပေါ်မှာ မဲတွေကို ကြိုတင်မဲတွေအဖြစ် ဖန်တီးလိုက်တဲ့ကိစ္စတွေ၊ လုံးဝမဖြစ်သင့်တဲ့ကိစ္စလို့ ကျနော်တို့ မြင်ပါတယ်။ ဒီလိုလုပ်ဆောင်ခြင်းဟာ လူ့အခွင့်အရေး ကြေညာစာတမ်းမှာပါတဲ့ လွတ်လပ်စွာ ရွေးချယ်ပိုင်ခွင့် မိမိအစိုးရ မိမိ ရွေးချယ်ပိုင်ခွင့် စတဲ့ အချက်အလက်တွေကို အတိအလင်း ချိုးဖောက်တာဖြစ်တယ်။”

၂၀၁၅ရွေးကောက်ပွဲအတွက် ရွေးကောက်ပွဲကော်မရှင်အနေနဲ့ ပြန်ကြားရေးဝန်ကြီးဌာန အပါအ၀င် အနုပညာရှင်တွေနဲ့ ပူးပေါင်းဆောင်ရွက်ဖို့ တွေ့ဆုံဆွေးနွေးပွဲကို ရန်ကုန် မီကာဆာဟိုတယ်မှာ ဒီဇင်ဘာလ ၁၆ ရက်နေ့က ပြုလုပ်ခဲ့ပါတယ်။ အဲဒီမှာ ၂၀၁၀ရွေးကောက်ပွဲရဲ့ အဓိက အားနည်းချက်ဟာ ကြိုတင်မဲကိစ္စဖြစ်တယ်လို့ ဦးတင်အေးက အခုလို ပြောသွားတာပါ။

“၂၀၁၀ ရွေးကောက်ပွဲမှာ ပါတီ ၉၇ ပါတီက ရွေးကောက်ပွဲဝင်တယ်။ အားနည်းချက်တွေ အများကြီးရှိတယ်။ အများဆုံးဖြစ်တဲ့ပြဿနာက ဘာလဲဆိုတော့ ကြိုတင်မဲ”

အမျိုးသားဒီမိုကရေစီအဖွဲ့ချုပ် ပြည်သူ့လွှတ်တော်ကိုယ်စားလှယ် ဦးနိုင်ငံလင်းကတော့ ၂၀၁၀ရွေးကောက်ပွဲတုန်းက ကြိုတင်မဲပေးတဲ့အခါမှာ မဲမသာမာမှုတွေ ရှိခဲ့တယ်လို့ ပြောပါတယ်။

“တချို့နေရာတွေမှာ ကြိုတင်မဲဆိုတာကတော့ အမှန်မရနိုင်ဘူးလေ။ ကျန်းမာရေးမကောင်းတဲ့ သူတွေဆိုရင်လည်း ဟာ လုပ်လိုက်ပါ လုပ်လိုက်ပါ ဟိုဟာလုပ် ဒီဟာလုပ်နဲ့ ဒါ သွားကောက်တဲ့သူအပေါ် မူတည်တာပေါ့နော်။ ခရီးသွားချင်တဲ့သူဆိုရင်လည်း ဒီအတိုင်းပဲ။ ခရီးသွားချင်တဲ့အတွက်ကို သူတို့က ကြိုတင်မဲ ပေးရမယ်ဆိုပြီး သူတို့သဘောကျ လုပ်ပေးရတာတွေ ရှိတယ်။ ၂၀၁၀ ကတော့ အဆိုးဆုံးပဲ။ ကြိုတင်မဲကောက်တဲ့အခါမှာ ကိုယ်စားလှယ်တွေပါတယ်။ သူတို့ ကော်မရှင်တွေချည်းပဲ သွားကောက်လို့မရဘူး။ အတိုက်အခံပါတီတွေကနေပြီးတော့ ကိုယ်စားလှယ်တွေနဲ့ လိုက်ပြီးတော့ ကြီးကြပ်မှရမှာလေ။ အဲလိုမျိုး ခွင့်ပြုရမှာ။ ခွင့်မပြုလို့ရှိရင် ဘယ်လိုမှကို အမှန်မရနိုင်ဘူး။ အဲ့ဒီကြိုတင်မဲ ပိတ်တဲ့ဟာကို ဘယ်လောက်အထိ ယုံကြည်မှုရှိရမလဲ ဒါတွေ အရေးကြီးတယ်။ ကြိုတင်မဲ သူတို့ပိတ်တယ်ဗျာ။ ပြီးတော့ အဲ့ဒါကို သူတို့ယူထားလိုက်တယ်။ ယူထားလိုက်ပြီးတော့ သူတို့အဲ့ဒါကို ပြန်ပြီးတော့ ဘယ်လိုလုပ်မလဲ၊ သူတို့ဆွဲတာတို့ ဘာတို့လုပ်ရင် ဘယ်သူတာဝန်ယူမလဲ ဒါမျိုးပေါ့နော်။”

လက်ရှိ စစ်တပ်က လွှတ်တော်ထဲမှာပါဝင်နေတာဟာ အာဏာပြန်မသိမ်းနိုင်အောင်၊ မသိမ်းဖြစ်အောင် ၀င်ထိန်းပေးတဲ့သဘောသာဖြစ်ပြီး ဒီမိုကရေစီရေချိန်မြင့်လာတဲ့အခါမှာ လွှတ်တော်ထဲက တဖြည်းဖြည်းထွက်သွားမှာဖြစ်တယ်လို့ ဦးတင်အေးက အနုပညာရှင်တွေနဲ့ တွေ့ဆုံပွဲမှာ ပြောသွားပါတယ်။ ဒါပေမဲ့ မြန်မာနိုင်ငံမှာ စစ်တပ်အနေနဲ့ အုပ်ချုပ်ရေးကဏ္ဍကနေတဖြည်းဖြည်းနဲ့ လျော့သွားမယ်ဆိုတာကို ယုံကြည်မှုမရှိဘူးလို့ ဦးမင်းလွင်ဦးက ပြောသွားပါတယ်။

အင်ကြင်းနိုင် / ဗွီအိုအေ (မြန်မာပိုင်း)
http://burmese.voanews.com/content/react-on-burma-election/2563800.html

Author Name

Contact Form

Name

Email *

Message *

Powered by Blogger.