01/23/15

“ အဖပြည့်ရှင်… အောင်ဆန်းသခင် ”


ဟိုလူက အဖ တော်ခြင် ….
ဒီလူက အဖိုး ခေါ်ခြင် ….
တိုင်းရွှေလွင် တမိုးဖေါက်….
ထွန်းတောက်တဲ့ ကြယ်စင်….
များဗိုလ်လူရှင်…
သားမြေးအစဉ် ….
ခုံမင်စွာရို့ ကျိုး ….
မျိုးစုံကြွယ် ….
ရိုးဂုဏ်ထယ် …
တောင်လိုမောက်သယ် …
အံ့လောက်တဲ့ သတိုး … ။ ။
(မင်းကောင်းချစ်)

ဖေဖေါ်ဝါရီလ ( ၁၃) ရက်နေ့  ၂၀၁၅ ခုနှစ် တွင်ကျရောက်မည့် ဗိုလ်ချုပ်အောင်ဆန်းရာပြည့်နေ့ သို့ ဦးညွှတ်လျှက်
Photo: credit to ပိတောက်မြေ (burmese)

မြန်မာနိုင်ငံသားတွေ အထူးသဖြင့် လူငယ်တွေအနေနဲ့ ဗိုလ်ချုပ်အောင်ဆန်းလို ခေါင်းဆောင်မျိုးကို တန်ဖိုးထားတတ်အောင် ဗိုလ်ချုပ်အောင်ဆန်း နှစ် ၁၀၀ ပြည့်ကို ကျယ်ကျယ်ပြန့်ပြန့်ကျင်းပဖို့ စီစဉ်ရတာဖြစ်ကြောင်း ဒေါ်အောင်ဆန်းစုကြည်က ဒီနေ့ ပြောပါတယ်။

ပြည်သူ့လွှတ်တော်ကို လာရောက်လေ့လာတဲ့ အမျိုးသားဒီမိုကရေစီအဖွဲ့ချုပ် ပါတီဝင်တွေနဲ့ တွေ့ဆုံစဉ်မှာ ဒေါ်အောင်ဆန်းစုကြည်က ပြောခဲ့တာဖြစ်ပါတယ်။

"ကျမ အခုအသက် ၇ဝ ရှိတော့မယ်၊ ဒီအသက်အရွယ်အထိ တခါမှ ဖေဖေ့ရဲ့လုပ်ရပ်တွေကြောင့်မို့ ကျမ မျက်နှာပူခဲ့ရတယ်ဆိုတာ ဘာမှမရှိဘူး၊ ကိုယ့်အဖေကို ဂုဏ်ယူနိုင်တယ်၊ ခေါင်းဆောင်ကောင်းတစ်ဦး ပီသတယ်ဆိုပြီး လက်ခံနိုင်တယ်၊ ကျမကလည်း အဖေအနေနဲ့ ချစ်တာသတ်သတ်၊ ခေါင်းဆောင်တစ်ယောက်အနေနဲ့လည်း လေးစားတယ်၊ ကြည်ညိုတယ်၊ အတုယူတယ်၊ အဲ့ဒါဘာဖြစ်လို့လဲဆိုတော့ နိုင်ငံရေးကို ဖြောင့်ဖြောင့်မတ်မတ်နဲ့ မှန်မှန်ကန်ကန် အခက်အခဲတွေကြားထဲကနေလုပ်ခဲ့တာ"

တိုင်းရင်းသားတွေအကြား စည်းစည်းလုံးလုံးညီညီညွတ်ညွတ်နဲ့ ကြိုးစားမှသာ တိုင်းပြည်တိုးတက်မှာဖြစ်ကြောင်းနဲ့ ပြဿနာတွေရှိတာကိုလက်ခံပြီး နားလည်မှုနဲ့ဖြေရှင်းနိုင်ဖို့ လိုအပ်ကြောင်းကိုလည်း ဒေါ်အောင်ဆန်းစုကြည်က ပြောပါတယ်။

ပြည်သူ့လွှတ်တော်ကို စစ်ကိုင်း၊ ပဲခူး၊ မကွေး၊ ဧရာဝတီတိုင်းဒေသကြီးနဲ့ ကချင်ပြည်နယ်က အမျိုးသားဒီမိုကရေစီအဖွဲ့ချုပ် ပါတီဝင်တွေ ဒီနေ့ လာရောက်လေ့လာကြတာဖြစ်ပါတယ်။

RFA

ရှမ်းပြည်နယ်မြောက်ပိုင်း မူဆယ်ခရိုင်၊ ကောင်းခါးကျေးရွာမှာ ကျောင်းဆရာမနှစ်ဦး သတ်ဖြတ်ခံရမှုကို ကုလသမဂ္ဂ လူ့အခွင့်အရေးကောင်စီထံ တင်ပြသွားမယ်လို့ ကချင်နှစ်ခြင်းခရစ်ယာန်အဖွဲ့ချုပ် တာဝန်ရှိသူက ပြောပါတယ်။

မှုခင်းစစ်ဆရာဝန်ရဲ့ စစ်ဆေးတွေ့ရှိချက်နဲ့ ကောင်းခါးရွာသားတွေရဲ့ ပြောဆိုချက်တွေကို စုစည်းပြီး တင်ပြသွားမှာဖြစ်တယ်လို့ ကချင်နှစ်ခြင်းခရစ်ယာန်အဖွဲ့ချုပ်က ဒေါက်တာဆမ်ဆွန် က ပြောပါတယ်။

"ဆေးလက်မှတ်ရယ်၊ နောက်ရွာက ရွာသားတွေက ရဲလာစစ်ရင် သူတို့မပြောရဲဘူး၊ ကျနော်တို့မေးရင်တော့ သူတို့ပြောပြတယ်၊ အဲ့သက်သေခံတွေနဲ့ ကျနော်တို့လုပ်သွားမှာဖြစ်တယ်၊ ကျနော်တို့က International ပေါ့၊ War Crime ဘက်ကို ကျနော်တို့ကသွားချင်တာ၊ ကျနော်တို့ သက်ဆိုင်ရာ လူ့အခွင့်အရေးတို့ နောက် UN တို့အားလုံးကို တင်ပြဖို့လုပ်တော့မယ်၊ ပြည်တွင်းမှာတော့ မလုပ်တော့ဘူး၊ ပြည်တွင်းမှာ မူဆယ်ကလုပ်တာတောင်မှ ဘာမှအဖြေမထွက်ဘူးဖြစ်နေတယ်၊ ကာယကံရှင်နှစ်ယောက်က သေဆုံးသွားပြီဆိုတော့ ဘယ်သူမှမသိတော့ဘူးလေ၊ ဘယ်သူမှမသိတော့လို့ အဲ့မှာစစ်ကြောင်းပဲရှိနေတော့ စစ်ကြောင်းကတော့ သူတို့မဟုတ်ရပါဘူးဆိုပြီးတော့ ပြောပြီးငြင်းတာပေါ့နော်"

သေဆုံးသွားတဲ့ ကျောင်းဆရာမနှစ်ဦးရဲ့လက်မှာ ဆံပင်အရှည်ကို စစ်ဆေးတွေ့ရှိထားတာကြောင့် တရားခံဟာ စစ်သားတွေမဟုတ်နိုင်ကြောင်း မူဆယ်ခရိုင် မှုခင်းရဲတပ်ဖွဲ့က ယူဆနေကြပါတယ်။

မျိုးရိုးဗီဇခေါ် DNA စစ်ဆေးဖို့အတွက် ရွာသားတွေနဲ့ ရွာအနီးမှာရှိတဲ့ ခမရ ၅၀၃ တပ်က စစ်သားတွေရဲ့ ဆံပင်တွေကို မှုခင်းရဲတပ်ဖွဲ့က မနေ့က ယူဆောင်သွားပါတယ်။

ဒီအတောအတွင်း အဓမ္မပြုကျင့်သတ်ဖြတ်ခံရတဲ့ ကျောင်းဆရာမနှစ်ဦးအတွက် ဆုတောင်းပွဲကို မြစ်ကြီးနားမြို့မှာ မြို့ခံတစ်ထောင်နီးပါးနဲ့ ဒီနေ့ကျင်းပကြပါတယ်။

ဆရာမနှစ်ဦးအတွက် မြို့ထဲမှာလှည့်လည်ပြီး ဆုတောင်းခဲ့သလို ဘာသာရေးစော်ကားမှုတွေ လူမျိုးရေး စော်ကားမှုတွေ ရပ်တန့်ဖို့လည်း ဆုတောင်းခဲ့တယ်လို့ ကချင်နှစ်ခြင်းခရစ်ယာန်အသင်းချုပ် လူငယ်ဌာနရဲ့ သဘာပတိဆရာ ဒေးဗစ်ရမ်ကာက ပြောပါတယ်။

"ဆုတောင်းတဲ့အစီအစဉ်လုပ်တယ်၊ ပြီးတော့ ဖြစ်သွားတဲ့ဖြစ်စဉ်တွေကို ကျနော်တို့ ပြောကြားတဲ့အစီအစဉ်လုပ်တယ်၊ ပြီးတော့ ဒုတိယပိုင်းအနေနဲ့ ဆိုင်းပုဒ်စာတန်းတွေကိုင်တယ်၊ ဆိုင်ကယ်၊ ကားနဲ့ တန်းစီလှည့်လည်တယ်၊ အလောင်းကတော့ မူဆယ်ကနေ ဒီအထိကိုသယ်လာပြီ"

မြစ်ကြီးနားမြို့အခြေစိုက် ကချင်နှစ်ခြင်းခရစ်ယာန်အဖွဲ့ချုပ်က ကောင်းခါးကျေးရွာမှာ စာသင်ကြားဖို့ စေလွှတ်ထားတဲ့ ကျောင်းဆရာမ နှစ်ဦးဟာ ဒီလ ၁၉ ရက်နေ့ညက သူတို့နေထိုင်တဲ့ တဲအိမ်အတွင်းမှာ အသတ်ခံရတာဖြစ်ပါတယ်။ သေဆုံးသွားတဲ့ ကချင်လူမျိုးဆရာမနှစ်ဦးကို မြစ်ကြီးနားမြို့မှာ မနက်ဖြန်မြေမြုပ်သဂြိုင်္ဟ်မှာဖြစ်ပြီး ဆုတောင်းပွဲလည်း ကျင်းပသွားမယ်လို့ သိရပါတယ်။

RFA


သမ္မတ နဲ့ လွှတ်တော်အကြား သဘောထားကွဲလွဲမှုတွေ ရှိနေတဲ့ လွှတ်တော် ကိုယ်စားလှယ်တွေ လစာတိုးရေးနဲ့ ပတ်သက်ပြီး ဧပြီလ ၁ ရက်နေ့က စပြီး လစာ တိုးမြင့်ခံစားဖို့ ပြည်ထောင်စု လွှတ်တော်က အတည်ပြုလိုက်ပါတယ်။ တချိန်တည်းမှာပဲ သမ္မတ အကြောင်းပြန်ထားတဲ့ ၆ ပွင့်ဆိုင်တွေ့ဆုံရေးနဲ့ ပတ်သက်ပြီး လွှတ်တော်ဘက်က သမ္မတ နဲ့ ၆ ပွင့်ဆိုင်အရင် တွေ့ဆုံပြီးမှ မူဘောင်တွေ ရေးဆွဲဖို့ ဖြစ်နိုင်မယ်လို့ ဒီကနေ့ သမ္မတ ကို သဝဏ်လွှာ ပြန်ပို့ခဲ့တဲ့ အကြောင်း ပြည်သူ့လွှတ်တော် ကိုယ်စားလှယ် တစ်ဦး ကပြောပါတယ်။ အပြည့်အစုံကိုတော့ ဆက်သွယ်မေးမြန်းထားတဲ့ ဗွီအိုအေ မြန်မာပိုင်းရဲ့ သတင်းထောက် ကိုအောင်ရဲမောင်မောင်က ပြောပြမှာပါ။

လွှတ်တော် ကိုယ်စားလှယ်တွေ ရဲ့ လစာနဲ့ စရိတ်တိုးမြင့်ရေး နဲ့ ပတ်သက်တဲ့ ဥပဒေကြမ်းကို သမ္မတ က လက်မှတ်မထိုးပဲနဲ့ မှတ်ချက်တွေ နဲ့ ပြန်ပို့လာတဲ့ ကိစ္စ ကို ဒီကနေ့ ပြည်ထောင်စု လွှတ်တော်မှာ မဲခွဲ ဆုံးဖြတ်ခဲ့တာပါ။ လွှတ်တော် ကိုယ်စားလှယ်တွေရဲ့ လစာတိုးမြင့်မှု ကို ရှေ့လာမယ့် ဘဏ္ဍာရေးနှစ်က စတင်ပြီး မူလ ရတာထက် တိုးမြင့် ခံစားဖို့သင့်တယ်လို့ ပြည်ထောင်စုလွှတ်တော် မှာ မဲခွဲတဲ့ အခါ မူလတုန်းက တိုးဖို့ တင်ပြထားတဲ့ ဥပဒေကြမ်းကို ထောက်ခံသူ ၃၂၃ ဦး၊ ကန့်ကွက်သူ ၁၇၅ဦးနဲ့ ကြားနေ ၁၅ ဦး ရှိခဲ့ပါတယ်။

ဒီအကြောင်းနဲ့ပတ်သက်ပြီး ပြည်ထောင်စုလွှတ်တော် အစည်းအဝေးကို တက်ရောက်တဲ့ ရခိုင်အမျိုးသားပါတီရဲ့ မြေပုံမြို့နယ် ပြည်သူ့လွှတ်တော် ကိုယ်စားလှယ် ဦးဖေသန်းက ဗွီအိုအေကို ပြောပါတယ်။

" လွှတ်တော်ကိုယ်စားလှယ် တော်တော်များများကတော့ သမ္မတကြီးရဲ့ သဘောထားကို မထောက်ခံပဲ ပြည်ထောင်စုလွှတ်တော်ရဲ့ သဘောထားအတိုင်းပဲ အတည်ပြုဖို့ ပြောပါတယ်။ ဥပဒေကြမ်းကော်မတီ ကလည်း ပြည်ထောင်စုလွှတ်တော်ရဲ့ အတည်ပြုချက်အတိုင်း မဲခွဲတဲ့အခါမှာတော့ ထောက်ခံမဲ ၃၂၃၊ ကန့်ကွက်မဲ ၁၇၅မဲ၊ ကြားနေမဲ ၁၅မဲနဲ့ ကျနော်တို့ပြန်ပြီးတော့ ပြည်ထောင်စုလွှတ်တော်ရဲ့ ဆုံးဖြတ်ချက်အတိုင်း ပြန်ပြီးတော့ အတည်ပြုလိုက်ပါတယ်။"

မေး - ဆိုတော့ ဆရာတို့က ဘယ်တော့လောက်ကစပြီး အခုတိုးမြင့် လိုက်တဲ့ လစာကို ခံစားရမှာလဲ။

"ဟုတ်ကဲ့။ အဲ့တာကျတော့ ကျနော်တို့ အဆိုတင်ကတည်းက ၂၀၁၅/၂၀၁၆ ဘဏ္ဍာနှစ်မှာ အကောင်အထည်ဖော်ဖို့ အစိုးရကို တိုက်တွန်းတဲ့ အဆိုပါ။ အဲ့တာကြောင့် ဒီနေ့လွှတ်တော်မှာလည်း ထပ်မံပြီးတော့ နာယကကြီးက ပြန်ပြီးတော့ အတည်ပြုပါတယ်။ ၂၀၁၆ခု ဧပြီလ ၁ရက်နေ့ကနေစပြီးတော့ ဒါဟာ အကျိုးခံစားခွင့်ဖြစ်ပါတယ်။ နောက် ဆယ်လတာ ကြာတဲ့ လွှတ်တော်သက်တမ်းမှာ အကျိုးခံစားခွင့်ရှိမှာဖြစ်ပြီးတော့ နောင်လာမယ့် လွှတ်တော်ကိုယ်စားလှယ်တွေအတွက်လည်း ဒါ တစပ်တဆက်တည်း အကျိုးခံစားခွင့်ရှိမှာပါလို့ နာယကကြီးက ပြန်လည် ရှင်းပြပါတယ်။

သမ္မတဦးသိန်းစိန်က လွှတ်တော်ကိုယ်စားလှယ်တွေ ချီးမြှင့်ငွေ တိုးမြှင့်ခြင်းဆောင်ရွက်တဲ့ နေရာမှာ ဥပဒေပြု အဖွဲ့အစည်း ဖြစ်တဲ့ လွှတ်တော်က ဆောင်ရွက်ခြင်းထက် အုပ်ချုပ်ရေးအဖွဲ့အစည်းတွေက အခြေခံဥပဒေနှင့် အညီ ဘဏ္ဍာရေး ဆိုင်ရာ လုပ်ငန်းစဉ်တွေ အတိုင်း ကြိုတင် တွက်ချက်ပြီးမှသာ ထိုက်သင့်တဲ့ ပမာဏ တိုးမြင့်ရေး ဆောင် ရွက်သင့်တယ်လို့ သဘောထား မှတ်ချက်ပေးပြီးတော့ တင်ပြလာတဲ့ ပဒေကြမ်းကို လက်မှတ်မထိုးပဲ ပြည်ထောင်စုလွှတ်တော်ကို ပြန်ပို့ခဲ့တာပါ။

အခုအခါမှာတော့ ပြည်ထောင်စုလွှတ်တော်က တိုးသင့်တယ်လို့ မှတ်ချက်ပေး လိုက်တဲ့ အတွက် ဒီဥပဒေကို သမ္မတ လက်မှတ်မထိုးလည်း ရက်ပေါင်း ၁၄ ရက်အတွင်း အတည်ဖြစ်လာတော့မှာပါ။

လွှတ်တော် ကိုယ်စားလှယ်တွေ လစာ တိုးမြင့်ရေးနဲ့ ပတ်သက်ပြီး ပြည်ခိုင်ဖြိုးပါတီ ရဲ့ ပြည်သူ့လွှတ်တော် ကိုယ်စားလှယ် ဦးလှဆွေက တော့

" အယ့် ကျနော်က အဲ့ဒီ့မှာ ကြားနေမဲ ၁၅မဲ ဆိုတဲ့နေရာမှာ ကျနော်ပါပါတယ်ခင်ဗျာ။ ကျနော်က ကြားနေပေါ့။ ဒီကိစ္စဟာ ကျနော်ကတော့ ပြောရမှာ ရှက်ပါတယ်။ ဒါကြောင့်မို့လို့ ကျနော် ဆွေးလည်း မဆွေးနွေးပါဘူး။ ကျနော်တို့က သဒ္ဓါသလောက်ပေါ့ဗျာ။ မသဒ္ဓါရင် မသဒ္ဓါသလိုပေါ့။ မသဒ္ဓါဘူးလို့ ယူဆရင်လည်း မယူရုံ ရှိတာပေါ့။ သဒ္ဓါလို့ ပေးလာရင်တော့ ယူလိုက်မှာပေါ့။ အခုတော့ အစိုးရအဖွဲ့က မသဒ္ဓါဘူးလား ဘာလားတော့ မသိဘူး။ သို့သော် ကျနော်ကတော့ ဝင်မဆွေးနွေးဘူး။ ထောက်လည်း မထောက်ခံဘူး။ ကန့်လည်း မကန့်ကွက်ဘူး။ ကျနော်ကတော့ ကြားနေပဲ။"

တစ်ချိန်ထဲမှာပဲ ဒီကနေ့ ပြည်ထောင်စု လွှတ်တော် အစည်းအဝေးတွေ အတွင်းမှာ ၆ ပွင့်ဆိုင်တွေ့ဆုံဆွေးနွေးရေးနဲ့ ပတ်သက်တဲ့ သမ္မတ ရဲ့ သဝဏ်လွှာ ကို လည်း ပြန်လည် ပြန်ကြားခဲ့ပါတယ်။ သမ္မတဘက်က ၆ ပွင့်ဆိုင်တွေ့ဆုံဖို့ မူဘောင်တွေ လွှတ်တော်ဘက်က ပေးပို့ဖို့ လိုတယ်လို့ ဇန်နဝါရီလ ၁၉ ရက်နေ့ လွှတ်တော် စစခြင်းနေ့မှာ အကြောင်းကြားခဲ့တာပါ။

ပြည်ထောင်စုလွှတ်တော်ကတော့ သမ္မတ နဲ့ အရင်တွေ့ဆုံပြီးမှာသာ ဘာတွေ ဆွေးနွေးမယ် ဆိုတာကို မူဘောင်ရေးဆွဲဖို့ ဖြစ်နိုင်မယ်လို့ ပြန်လည်ပြီး အကြောင်းကြားခဲ့တယ်လို့ ရှမ်းတိုင်းရင်းသားများ ဒီမိုကရက်တစ်ပါတီ (SNDP) ရဲ့ သီပေါမြို့နယ် ပြည်သူ့လွှတ်တော် ကိုယ်စားလှယ် ဦးရဲထွန်းက ပြောပါတယ်။

" သမ္မတက ဒီခြောက်ပွင့်ဆိုင်ကို ကောင်းပါတယ်။ ကြိုဆိုပါတယ်လို့ ပြောထားတယ်။ ပြီးတဲ့အခါကျတော့ လွှတ်တော်အနေနဲ့ ပြည်ထောင်စုလွှတ်တော်အနေနဲ့ ဘယ်လိုဖြစ်စေချင်သလဲ ဘယ်လိုပုံစံနဲ့ဆွေးနွေးချင်သလဲ ဆိုတဲ့ မူဘောင်တွေကို ပေးပါလို့တောင်းလိုက်တဲ့အခါ ဒီဘက်က နေပြီးတော့ အဲ့ဒီ့မူဘောင်တွေ ချဖို့အတွက်ကို သမ္မတနဲ့ အရင်တွေ့ဖို့လိုတယ်လို့ ပထမဆုံးတကြိမ် တွေ့ဖို့ လိုတယ်ပေါ့။ အဲ့ဒီ့မှာ တွေ့ပြီးတော့မှ ဘာတွေ ဆွေးနွေးမယ်ဆိုတာ ညှိနှိုင်းပြီးတော့မှ မူဘောင်ဆွဲမယ်ပေါ့။ ဆွဲပြီးတော့ လွှတ်တော်က ဖြစ်ပေးမယ်ပေါ့။"

၁၂ ကြိမ်မြောက် လွှတ်တော် အစည်းအဝေးတွေကို တနင်္လာနေ့ကစပြီးတော့ ကျင်းပနေတာပါ။ အခု လွှတ်တော် အစည်းအဝေးတွေအတွင်းမှာ အရေးပါတဲ့ ၂ဝဝ၈ ဖွဲ့စည်းပုံ ပြင်ဆင်ရေး ဥပဒေကြမ်း ကိစ္စ၊ နိုင်ငံတကာ က အာရုံစိုက်နေတဲ့ မျိုးစောင့် ဥပဒေကြမ်းတွေ အပါအဝင် ၂ဝ၁၅-၂ဝ၁၆ ဘဏ္ဍာနှစ်အတွက် ဘတ်ဂျက် ဥပဒေတွေကို အတည်ပြု မှာလည်း ဖြစ်ပါတယ်။
VOA
http://burmese.voanews.com/content/lower-house-approved-to-increase-mps-monthy-salary/2609056.html


မြန်မာ့ တပ်မတော်အနေနဲ့ တစ်ဘက်သက် အာဏာသိမ်းမှာ မဟုတ်ပေမဲ့၊ တိုင်းပြည်မှာ အရေးပေါ် အခြေအနေ ကြေညာရပြီ ဆိုရင်တော့ ငြိမ်ဝပ်ပိပြားရေး အတွက် ဆောင်ရွက်ဖို့ တုံ့ဆိုင်းနေမှာ မဟုတ်ကြောင်း ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောဆိုကြောင်း စင်္ကာပူအခြေစိုက် Channel News Asia သတင်းက ဖော်ပြပါတယ်။

ဒါ့ပြင် ဒီနှစ်ကုန်ပိုင်းမှာ ကျင်းပဖို့ စီစဉ်ထားတဲ့ အထွေထွေ ရွေးကောက်ပွဲ မတိုင်ခင် အကြမ်းဖက်မှုတွေပေါ်ပေါက် လာအောင် ပြင်ပအဖွဲ့အစည်းတွေက သွေးထိုး လှုံ့ဆော် လာနိုင်ကြောင်းလည်း ပြောပါတယ်။

ဒေသတစ်ခု၊ ပြည်နယ်တစ်ခုမှာ အရပ်ဘက် အာဏာပိုင်တွေ မထိန်းနိုင်ပဲ အခြေအနေတွေ ဆိုးသည်ထက်ဆိုးလာလို့ သမ္မတက အရေးပေါ်အခြေအနေကြေညာပြီး စစ်တပ်ဝင်ဖို့လိုပြီလို့ပြောတဲ့အခါ တုံ့ဆိုင်းမနေပဲ ဝင်ရမှာပါ၊ ဒီလိုမျိုး ဥပဒေနဲ့အညီ မဆောင်ရွက်ရင်၊ နောက်ဆက်တွဲပြဿနာတွေ အများကြီးကြုံရမှာ ဖြစ်ပါတယ်လို့လည်း ပြောပါတယ်။

နိုင်ငံရေးအကဲခတ် ဒေါက်တာ ရန်မျိုးသိန်းကလည်း ဒီကိစ္စဟာ တိုင်းပြည်အခြေအနေအပေါ် စစ်တပ်ရဲ့ ကြည့်မြင်သုံးသပ်ပုံအပေါ် မူတည်နေတယ်လို့ ပြောပါတယ်။ ပြည်သူတွေအမြင်က ဒီမိုကရေစီဘက်ကို သွားနေတယ်လို့မြင်ပေမဲ့၊ စစ်တပ်နဲ့ စစ်ခေါင်းဆောင်တွေက ပြည်သူတွေဟာ ဒီမိုကရေစီနဲ့ ထိုက်တန်အေင် မရင့်ကျက်သေးဘူးလို့ မြင်နိုင်ပါတယ်၊ ဒါကြောင့် ရှေ့မှာ စစ်တပ်က ပကတိအခြေအနေမှန်ကို မမြင်နိုင်ဘူးဆိုရင် အာဏာသိမ်းနိုင်ပါတယ်လို့ Channel News Asia သတင်းကို ပြောဆိုပါတယ်။

RFA Burmese
https://www.facebook.com/pages/RFA-Burmese/39218993127?fref=nf

ဓာတ်ပုံ (Kbc-facebook)
ရှမ်းပြည်မြောက်ပိုင်း မူဆယ်ခရိုင် ကြူကုတ် (ပန်ဆိုင်း)မြို့နယ် ကောင်းခါးရွာမှာ သတ်ခံရသူ ဆရာမနှစ်ဦးရဲ့ ရုပ်အလောင်းကို ကချင်နှစ်ခြင်း ခရစ်ယာန် အဖွဲ့ချုပ်က ဦးဆောင်ပြီး မြစ်ကြီးနားမြို့ကို မော်တော်ယာဉ်တန်းနဲ့ သယ်ဆောင်ပါတယ်။

မူဆယ်ဆေးရုံကနေ မနေ့ညနေ ၄ နာရီက စတင်သယ်ယူလာပြီး ကွတ်ခိုင်မြို့အ၀င်မှာ ရဲတပ်ဖွဲ့ မသယ်ဖို့ တားမြစ်ပေမယ့် ၀တ်ပြုပြီး ဆက်လက်သယ်ဆောင်ခဲ့တဲ့ လမ်းတလျှောက်မှာ ကချင်ဒေသခံတွေက စောင့်ကြိုပြီး အကြမ်းဖက်မှု ရပ်တန့်ရေး ဆန္ဒပြခဲ့ကြပါတယ်။

ဒေသခံတဦးက “ည ၇ နာရီဝန်းကျင်လောက် ကွတ်ခိုင်ကို ၀င်တယ်။ ၀င်တဲ့အချိန်မှာ ကွတ်ခိုင်အုပ်ချုပ်ရေးအဖွဲ့အစည်းကနေ ဆက်မသွားဖို့ ဟန့်တားတယ်။ နယ်မကျော်ခိုင်းတာဗျ။ အတင်းအဓမ္မကြီးတော့ မဟုတ်ဘူး။ မသွားဖို့တောင်းဆိုတာဗျ” လို့ ပြောပါတယ်။

ယာဉ်တန်းဟာ လားရှိုးကချင်နှစ်ခြင်းကျောင်းကို ညသန်းခေါင်မှာ ရောက်ရှိဝတ်ပြုဆု တောင်းခဲ့ပါတယ်။ လားရှိုးမြို့ခံ သတင်းထောက်တဦးက ညက ၀တ်ပြုပွဲမှာ ကချင်လူထု ၁၅၀၀ ကျော် တက်ရောက် ၀တ်ပြုဆုတောင်းတာ မြင်တွေ့တယ်လို့ ပြောပါတယ်။

“ညသန်းခေါင်ချိန်မှာ လူများသွားတာက တော်တော်လေး ဘယ်လို ဖြစ်သွားလဲဆိုတော့ လားရှိုးမြို့ပေါ်ကျေးရွာတွေက ကချင်လူထုအပြင် သိန္နီက ကချင်တွေပါ သုံးဘီးတွေနဲ့လာကြတာ။ နောက်တခုက ဒီမှာ အတင်းအဓမ္မပြုကျင့်သတ်ဖြတ်တဲ့ လူ့အခွင့်အရေး ချိုးဖောက်မှုအဖြစ်ဆိုးကြီးကို လားရှိုးမြို့နယ်မှာလည်း ကချင်ပြည်သူလူထုက ပြင်းပြင်းထန်ထန် ရှုတ်ချကန့်ကွက်ပါတယ်ဆိုတဲ့ သဘောထားထုတ်ပြန်ချက်တွေ ကပ်တယ်လေ။ ၀မ်းနည်းကြောင်း ၀တ်ပြုဆုတောင်းမှုတွေ၊ ဘာသာရေးသီးချင်းတွေဆိုပြီး ၁ နာရီလောက်ကျတော့ မန္တလေးကို တန်းထွက်တယ်။ ကားအစီးရေ ၈၀ လောက်ရှိမယ်။”

မန္တလေးကို မနက် ၉ နာရီခန့်လောက် ရောက်ရှိပြီးနောက် မြစ်ကြီးနားမြို့ကို ဆက်လက်ထွက်ခွာသွားတယ်လို့ ဒေသခံသတင်းထောက်တွေက ပြောပါတယ်။

ယာဉ်တန်းဟာ မြစ်ကြီးနားမြို့ကို ည ရှစ်နာရီလောက်မှာ ရောက်ဖွယ်ရှိပါတယ်။ မနက်ဖြန်မနက် ၉ နာရီမှာတော့ မြစ်ကြီးနားနဲ့ ၁၀ မိုင်အကွာ ဂျော်ဘွမ်ရှိ ကချင်နှစ်ခြင်းခရစ်ယာန်သင်္ချိုင်းမှာ သင်္ဂြိုဟ်မှာဖြစ်ပါတယ်။

ဒီကနေ့မနက်  ပြန်ကြားရေးဝန်ကြီးဌာနသတင်းက ဆရာမနှစ်ဦးသေဆုံးမှုနှင့်ပတ်သက်လို့ သတင်းထုတ်ပြန်ရာမှာ အမှုဖွင့် စစ်ဆေးနေသလို ပြည်နယ်အစိုးရကလည်း စုံစမ်း စစ်ဆေးသွားမယ်လို့ ဖော်ပြပါတယ်။

အခင်းဖြစ်နေရာမှာ သွေးစွန်းနေတဲ့ စတီးဓားတချောင်းနှင့် ထင်းချောင်း တချောင်း တွေ့ရှိရပြီး သေဆုံးသူတွေဟာ ထိုးသွင်းဒဏ်ရာ၊ ပြတ်ရှဒဏ်ရာနှင့် ဦးခေါင်းပေါက်ပြဲ ဒဏ်ရာတွေနဲ့ သေဆုံးနေကြတယ်လို့ ဆိုပါတယ်။ မျက်မြင်တွေ ပြောဆိုချက်အရ အဓမ္မပြုကျင့်ခံရမှု လက္ခဏာတွေနဲ့ပတ်သက်လို့တော့ ဖော်ပြခြင်းမရှိပါဘူး။

ကချင်လူမှုကွန်ရက်စာမျက်နှာတွေနဲ့ မျက်မြင်တွေက အဓမ္မပြုကျင့်သတ်ဖြတ်ခံရတယ်လို့ ရေးနေကြပြီး အခင်းဖြစ်ရာနေရာနဲ့ မလှမ်းမကမ်းမှာ အခြေစိုက်နေတဲ့ ခမရ ၅၀၃ က တပ်မတော်သားတွေကို သံသယဖြစ်စရာအဖြစ် စွပ်စွဲနေကြပါတယ်။

မနေ့ကတော့ အမှတ် ၅၀၃ တပ်က သူ့ရဲဘော်တွေကို တန်းစီပြီး ဆံပင်ကို စစ်ဆေးခဲ့တယ်လို့ အဆိုပါရွာကို ရောက်ရှိတဲ့ မူဆယ် ကချင်နှစ်ခြင်းခရစ်ယာန်အဖွဲ့က ကိုဇော်ရာက ပြောပါတယ်။

“မနေ့က ကျနော် ရောက်တဲ့အချိန်မှာစစ်တပ်က  ၅၀၃ က ဗျူဟာမှူးထွန်းနိုင်ဦး၊ တပ်ရင်းမှူးက အောင်ဖြိုးမြင့်ပေါ့။ သူတို့တပ်စွဲထားတဲ့နေရာမှာ သူတို့ တပ်သားတွေအားလုံးကို ခေါ်တယ်။ ဒီဆံပင်နဲ့ ပတ်သက်လို့ စစ်ဆေးတာပေါ့။ ဒီမှာကြည့်ပေါ့။ ကျနော်တို့ တပ်သားတွေထဲမှာကြည့်။ ဒါမျိုးဆံပင် ဘယ်သူမှ မရှိဘူး။ ခင်ဗျားတို့ရွာသူ ရွာသားတွေအားလုံးကိုလည်း ခေါ်မယ်။ ဘယ်သူ့ဆီမှာ ဒီဆံပင် ရှိမလဲဆိုတာကို မနေ့ကပဲ လုပ်တာ။”

အခင်းဖြစ်တဲ့ ခရစ်ယာန်ဘုရားရှိခိုးကျောင်းဝင်းဟာ ကားလမ်းအောက်ပိုင်းဖြစ်ပြီး အမှတ် ၅၀၃ တပ် အခြေချတဲ့နေရာက ကားလမ်းအထက်ပိုင်းမှာဖြစ်ပါတယ်။ ကားလမ်းအောက်ပိုင်းဟာ သူတို့အတွက် ကန့်သတ်နယ်မြေဖြစ်လို့ မသွားဘူးလို့ ဗျူးဟာမှူးက ပြောပါတယ်။

အဲဒီကန့်သတ်နယ်မြေမှာ ကိုးကန့်လက်နက်ကိုင်၊ တအာင်းလက်နက်ကိုင်တွေ ရောက်ရှိကျင်လည်လေ့ရှိကြောင်း ဗျူဟာမှူးက ပြောဆိုခဲ့တယ်လို့ ဆိုပါတယ်။ ဒါပေမယ့် ရွာသားတွေကတော့ ဘယ်တိုင်းရင်းသားအဖွဲ့အစည်းမှ မလာရောက်ဘဲ တပ်မတော်တပ်ဖွဲ့တွေ သာ အခြေချနေတာလို့ ဆိုပါတယ်။

ကောင်းခါးရွာမှာ အိမ်ခြေ ၂၅ အိမ်သာရှိပြီး ကလေးအများစုအပါအ၀င် လူပေါင်း လေး ဆယ်ခန့်သာ နေကြကြောင်းနဲ့ ရှိတဲ့ လူငယ် လူရွယ် လေးငါးဦးဟာလည်း တရုတ်နယ်စပ်မှာ အလုပ်သွားရောက်လုပ်ကိုင်နေကြသူတွေဖြစ်တယ်လို့ ရွာသားတွေက ပြောပြပါတယ်။

အမည်မဖော်လိုသူ ရွာသားတဦးအဆိုအရ ဒီဆရာမ ၂ ဦးဟာ အခင်းမဖြစ်ခင် ညဦးပိုင်းက မုန်းပေါ်နဲ့ နမ့်တောင်း အကြား လမ်းမပေါ်က ကိုက်သုံးဆယ်ခန့်အကွာ နေအိမ်မှာ  မွေးနေ့ဆုတောင်းတခုကိုသွားခဲ့ကြကြောင်း၊ ည ၁၀ နာရီခွဲသာသာမှာ အိမ်ပြန်ခဲ့ကြကြောင်း၊ ၁၁ နာရီခွဲလောက်မှာ သူတို့နေအိမ်ဘက်က ဆူညံလို့ အိမ်နီးချင်း သုံးဦးက သွားကြည့်ကြတဲ့အခါ တံခါးပိတ်ထားတာနဲ့ကြုံလို့ အိပ်ပြီထင်ပြီးပြန်လှည့်ခဲ့ကြကြောင်း ပြောပြပါတယ်။

ရှမ်းပြည်နယ်မြောက်ပိုင်းမှာ အစိုးရတပ်နဲ့ တိုင်းရင်းသားလက်နက်ကိုင်အဖွဲ့တွေ တိုက်ပွဲ ဖြစ်နေတာကြောင့် ရွာသားတွေက ညန်းခေါင်ကျော်ရင် အပြင်ကို မထွက်ရဲကြဘူးလို့ သူက ပြော ပါတယ်။

ဒီသေဆုံးမှုကို ရဲက လူသေမှု ပုဒ်မ ၃၀၂ နဲ့ ဖွင့်လှစ်ဆောင်ရွက်နေပြီး ကာယကံရှင်တွေ ဘက်ကတော့ တစုံတရာ တိုင်ကြားခြင်းမရှိဘဲ အမှုမှန်ဖော်ထုတ်ပေးဖို့သာ တောင်းဆိုထား ပါတယ်။

ဒီအမှုကို မြို့နယ်ရဲတပ်ဖွဲ့မှူး၊ မြို့နယ်အုပ်ချုပ်ရေးမှူး၊ ပြည်သူ့စစ်ခေါင်းဆောင်တဦးနဲ့ ကချင်နှစ်ခြင်းခရစ်ယာန်အဖွဲ့ မူဆယ်က အတွင်းရေးမှူးတို့နဲ့ လေးဦး စုံစမ်းရေးအဖွဲ့ ဖွဲ့စည်း ဆောင်ရွက်နေကြပါတယ်။

By အေးနိုင် (ဒီဗွီဘီ)
http://burmese.dvb.no/archives/78164


လာမယ့် ဘဏ္ဍာနှစ်မှာ စတင်ခံစားရမဲ့ လွှတ်တော် ကိုယ်စားလှယ်တွေရဲ့ လစာချီးမြင့်ငွေ ဆယ်သိန်း ကျပ်ကို ပြည်ထောင်စု လွှတ်တော်က ဒီကနေ့ အတည်ပြု ခဲ့ပါတယ်။

ပြည်သူ့လွှတ်တော်၊ အမျိုးသား လွှတ်တော်၊ တိုင်းဒေသကြီး၊ ပြည်နယ်လွှတ်တော် သို့မဟုတ် ပြည်နယ်လွှတ်တော် ကိုယ်စားတွေနဲ့ ကိုယ်ပိုင်အုပ်ချုပ်ခွင့်ရတိုင်း (သို့မဟုတ်) ကိုယ်ပိုင်အုပ်ချုပ်ခွင့်ရ ဒေသ ဦးစီးအဖွဲ့ဝင်များရဲ့ ချီးမြှင့်ငွေနဲ့ စရိတ်များဆိုင်ရာ ဥပဒေကို ပြည်ထောင်စုလွှတ်တော်မှာ အတည်ပြုလိုက်တာ ဖြစ်ပါတယ်။

ဒီလိုအတည်ပြုလိုက်တာကြောင့် လွှတ်တော်ကိုယ်စားလှယ်တွေအနေနဲ့ လက်ရှိ လစာကျပ် ၃ သိန်းကနေ  ၁၀ သိန်း၊ တိုင်းဒေသကြီးနဲ့ ပြည်နယ်လွှတ်တော်ကိုယ်စားလှယ်တွေအနေနဲ့လည်း လက်ရှိ လစာ ၂ သိန်းကနေ ၅ သိန်းရရှိမှာဖြစ်ပါတယ်။

တိုးမြှင့်ပေးလိုက်တဲ့ လစာကို ကိုယ်စားလှယ်တွေအနေနဲ့ လွှတ်တော် သက်တမ်းမကုန်ခင်ထိ ခံစားခွင့်ရမှာဖြစ်ပြီး နောင် အစိုးရလက်ထက် လွှတ်တော်ကိုယ်စား လှယ်တွေလည်း ခံစားခွင့်ရရှိမှာဖြစ်ပါတယ်။

လွှတ်တော်ကိုယ်စားလှယ်ယ်တွေရဲ့ ချီးမြှင့်ငွေနဲ့ စရိတ်တွေကို တကြိမ်တည်း မြင့်မားစွာတိုးမြင့်ပေးခြင်းထက် နိုင်ငံရဲ့ စီးပွားရေးအခြေအနေ ကောင်းမွန်လာရင် သင့်တင့်မျှတစွာ တဆင့်ပြီးတဆင့် တိုးမြှင့်ပေးမယ်လို့  နိုင်ငံတော်သမ္မတက လွှတ်တော်ကို သ၀ဏ်လွှာ ပေးပို့ထားပါတယ်။

လွှတ်တော်ကိုယ်စားလှယ်တွေရဲ့ လစာတိုးပေးလိုက်ရင် ကုန်ဈေးနှုန်းတွေ တက်လာနိုင်တဲ့ အတွက် သမ္မတရဲ့ သဘောထားအတိုင်း ဆောင်ရွက်သင့်တယ်လို့ တပ်မတော်သား လွှတ်တော်ကိုယ်စားလှယ် ဒုတိယဗိုလ်မှူးကြီး ဇော်မိုးက ဆွေးနွေးပါတယ်။

ပြည်ထောင်စုလွှတ်တော်က လွှတ်တော်ကိုယ်စားလှယ်တွေရဲ့ လစာနဲ့ စရိတ်တွေတိုးမြှင့်ပေးတာ ခေတ်အခြေအနေအရ လိုအပ်သလို သင့်တော်တဲ့ အချိန် ဖြစ်တယ်လို့ အမျိုးသား လွှတ်တော် ကိုယ်စားလှယ် ဦးဇုန်လှယ်ထန်းက ပြောပါတယ်။

By နေဖြိုးဝင်း (ဒီဗွီဘီ)
http://burmese.dvb.no/archives/78169

ကချင်အရေး ဆန္ဒပြ။ 
ရှမ်းပြည်နယ်မြောက်ပိုင်း မူဆယ်ခရိုင် အတွင်း အဓမ္မပြုကျင့် သတ်ဖြတ်ခံရတဲ့ စေတနာ့ ဝန်ထမ်း ကျောင်းဆရာမ ၂ဦး အမှုကို မှန်မှန်ကန်ကန် ဖော်ထုတ်ပေးဖို့ အတွက် ၈၈မျိုးဆက်(ငြိမ်းချမ်းရေးနဲ့ ပွင့်လင်း လူအဖွဲ့အစည်း)က တောင်းဆိုလိုက်ပါတယ်။ တချိန်တည်းမှာပဲ ရန်ကုန်မြို့က အမျိုးသမီးရေး ဆောင်ရွက်သူတွေကတော သတ်ဖြတ်ခံရသူတွေကို ကိုယ်ချင်းစာကြောင်းပြသတဲ့ အနေနဲ့ မနက်ဖန်မှာ မဟာဗန္ဓုလပန်းခြံမှာ ပန်းစည်း၊ ပန်းခွေတွေ လာရောက်ချထားဖို့ ပန်ကြားပါတယ်။ သတင်းအပြည့်အစုံကို ဗွီအိုအေ မြန်မာပိုင်းရဲ့သတင်းထောက် ကိုမိုးဇော်က တင်ပြထားပါတယ်။

ဒီတောင်းဆိုချက် ပန်ကြားချက်တွေကို အမျိုးသမီး အဖွဲ့အစည်းတွေနဲ့ ၈၈မျိုးဆက် (ငြိမ်းချမ်းရေးနဲ့ ပွင့်လင်း လူအဖွဲ့အစည်း) တို့က ရန်ကုန်မြို့မှာ ဒီကနေ့ ပူးပေါင်း ကျင်းပတဲ့ သတင်းစာ ရှင်းလင်းပွဲမှာ ထုတ်ဖော်ပြောဆိုခဲ့တာဖြစ်ပါတယ်။

ဒီသတင်းစာ ရှင်းလင်းပွဲမှာ ၈၈မျိုးဆက် (ငြိမ်း/ပွင့်)က ကိုမြအေးက အခုလို တောင်းဆိုလိုက်ပါတယ်။

" တရားမျှတမှုပဲဗျ အဓိက တောင်းဆိုလိုတာကတော့။ ဒီပြစ်မှုကို အမှန်တရား ဖော်ထုတ်ပေးဖို့ တရားမျှတမှု လိုချင်တယ်။ စစ်တပ်ကပဲ လုပ်လုပ်နော် ၊ စစ်တပ်က လုပ်လို့ ကာရမယ် ဆိုတဲ့ဟာမျိုး ကျနော်တို့ မဖြစ်ချင်ဘူး။ စစ်တပ် လုပ်တယ် မလုပ်ဘူး ကျနော်တို့ မပြောဘူး။ လက်နက်ကိုင်အဖွဲ့အစည်းကပဲ လုပ်လုပ် ကျနော် အခု ဒီပွဲကို လာတာ အမျိုးသမီးတွေကို မတော်မတရား ပြုကျင့်တဲ့သူ ဘယ်သူပဲဖြစ်ဖြစ် အနိုင်ကျင့်တဲ့သူ ဘယ်သူပဲဖြစ်ဖြစ် တရားမျှတမှုကို ဖော်ထုတ်ပေးပါ။ တိုင်းပြည်မှာ ရှိတဲ့ တိုင်းရင်းသားပြည်သူတွေရဲ့ ထိခိုက်နစ်နာဆုံးရှုံးမှုနဲ့ ပတ်သက်ရင် အဓိက တာဝန်အရှိဆုံး သည် အစိုးရနဲ့ သူ့ရဲ့ ယန္တယားဖြစ်တယ်။ အဲ့ဒီ့အတွက်ကြောင့် ခင်ဗျားတို့မှာ တာဝန်ရှိတယ်။ ခင်ဗျားတို့ ဖော်ထုတ်ပေးပါ။ မှန်မှန်ကန်ကန်ဖြစ်ပါ။"

ဒီသတ်ဖြတ်မှုနဲ့ပတ်သက်ပြီး တိကျတဲ့ လက်သည်တရားခံကို စစ်ဆေး မဖော်ထုတ်နိုင်ခင်မှာ လူမှုကွန်ယက် စာမျက်နှာအတွင်း သက်သေမရှိဘဲ စွပ်စွဲပြောဆိုတာတွေ၊ နောက်လူမျိုးရေး ဆန်ဆန် တိုက်ခိုက် ပြောဆို တာတွေကြောင့် နိုင်ငံရေးအရ ဖြေရှင်းရမယ် ပြသနာတွေ လမ်းလွဲသွားမှာကို စိုးရိမ်ကြောင်းလည်း ကိုမြအေးက ထောက်ပြပြောဆိုပါတယ်။

ဒီလ ၁၉ရက်နေ့ ညသန်းခေါင်အချိန်လောက်မှာ ရှမ်းပြည်နယ်မြောက်ပိုင်း မူဆယ်ခရိုင် ပန်ဆိုင်း(ကြူကုတ်) မြို့နယ် ကောင်းခါးရွာက ဆရာမ ၂ဦးကို အမည်မသိသူတွေက အဓမ္မပြုကျင့်ပြီး သတ်ဖြတ်သွားခဲ့တာဖြစ်ပါတယ်။

အသတ်ခံလိုက်ရတဲ့ ကချင်ဆရာမနှစ်ဦး။
ဒီလ ၂၃ရက်နေ့ မြစ်ကြီးနားမြို့မှာ ဈာပနအခမ်းအနားကျင်းပချိန်မှာ ရန်ကုန်မြို့မှာလည်း ၀မ်းနည်းကြောင်းပြသဖို့ မြန်မာနိုင်ငံ အမျိုးသမီးအဖွဲ့များ ကွန်ယက် အဖွဲ့က ဒေါ်စူစနာ လှလှစိုးက အခုလို ပန်ကြားလိုက်ပါတယ်။

" မနက်ဖြန် မနက်ကိုးနာရီ အသုဘချမယ့်အချိန်မှာ တခါတည်း ဗန္ဓုလ ပန်းခြံရှေ့မှာ ကိုယ်ချင်းစာတဲ့သူတွေ အားလုံးကနေပြီးတော့ ကိုယ့်ရဲ့ဝမ်းနည်းခြင်း အထိမ်းအမှတ် တခုခု ပန်းတပွင့်ပဲဖြစ်ဖြစ် ပန်းခွေပဲဖြစ်ဖြစ် ပန်းစည်းပဲဖြစ်ဖြစ် လာချဖို့ ကျမတို့ လှုံ့ဆော်ထားပါတယ်လို့။  အဲ့တာကတော့ ဘယ်အဖွဲ့အစည်းကနေ လုပ်တာ။ ဘယ်အဖွဲ့ကနေ လုပ်တာ ပါဝင်ပါလို့ မဟုတ်ပဲနဲ့ အားလုံး အားလုံး အာလုံး ပြည်သူလူထုကို ပန်ကြားတာဖြစ်ပါတယ်လို့။ "

ဆရာမ နှစ်ဦးရဲ့ရုပ်အလောင်းကို ဒီလ ၂၁ရက်နေ့က မူဆယ်ကနေ မြစ်ကြီးနားမြို့ကို သယ်ယူရာမှာတော့ လားရှိုးနဲ့ မန္တလေးမြို့မှာ လူထု ပရိသတ်တွေက ထောင်နဲ့ချီ လာရောက်ပြီး စုဝေး ဆုတောင်းခဲ့ကြပါတယ်။ မြစ်ကြီးနားမြို့ခံတွေ ကတော့ မြစ်ကြီးနားမြို့နဲ့ ၈ မိုင်အကွာ၊ မော်ဖောင်းကျေးရွာကနေ သွားရောက်ကြိုဆိုပြီး ခြေလျင်နဲ့ မြစ်ကြီးနားမြို့ကို သယ်ယူဖို့ ပြင်ဆင်နေကြပါတယ်။

လောလောဆယ်မှာတော့ ဆရာမနှစ်ဦးကို သတ်ဖြတ်တဲ့ အမှုကို ဖော်ထုတ်နိုင်ဖို့ အတွက် ပန်ဆိုင်း(ကြူကုတ်)မြို့နယ်ခွဲက အုပ်ချုပ်ရေးမှုး၊ မြို့နယ် ရဲတပ်ဖွဲ့၊ ပြည်သူ့စစ်အဖွဲ့နဲ့ မူဆယ်က ကချင်နှစ်ခြင်းခရစ်ယာန်တော်တို့က တာဝန်ရှိသူတွေ ပူးပေါင်း စစ်ဆေးနေပါတယ်။ ဗုဒ္ဓဟူးနေ့ကတော့ ဒေသခံ ရွာသားတွေနဲ့ ကောင်းခါးရွာအနီးမှာ စခန်းချနေတဲ့ ခမရ ၅၀၃က တပ်မတော်သားတချို့ကို ခေါ်ယူစစ်ဆေးခဲ့ပါတယ်။

ကိုမိုးဇော် / ဗွီအိုအေ (မြန်မာပိုင်း)
http://burmese.voanews.com/content/presser-on-two-kachin-rape-victims-at-mjn/2608900.html


နိုင်ငံတော်သမ္မတ ဦးဆောင်တဲ့ ၆ ပွင့်ဆိုင်တွေ့ဆုံပွဲကို အမြန်ဆုံး ကျင်းပပေးဖို့ ပြည်ထောင်စု လွှတ်တော် နာယက သူရဦးရွှေမန်းက နိုင်ငံတော် သမ္မတထံ ဒီနေ့ သ၀ဏ်လွှာ ပေးပို့ လိုက်ပါတယ်။

၆ ပွင့်ဆိုင် တွေ့ဆုံဆွေးနွေးပွဲ ကျင်းပပေးဖို့ လိုအပ်ကြောင်း သ၀ဏ်လွှာကို ပြည်ထောင်စု လွှတ်တော် နာယက သူရဦးရွှေမန်းက ပြည်ထောင်စု လွှတ်တော်မှာ အခုလို တင်ပြ ခဲ့ပါတယ်။

"နိုင်ငံတော် တည်ငြိမ်း အေးချမ်းရေးနဲ့ ဖွံ့ဖြိုး တိုးတက်ရေး အတွက်၎င်း၊ တိုင်းရင်းသား စည်းလုံး ညီညွှတ်ရေး၊ အမျိုးသား ပြန်လည်သင့်မြတ်ရေးနဲ့ ပြည်တွင်း ငြိမ်းချမ်းရေး အတွက်၎င်း၊ ဒီမိုကရေစီ ပြုပြင်ပြောင်းလဲရေး လုပ်ငန်းစဉ်များအတွက်၎င်း ပိုမိုကောင်းမွန်သော အကျိုးရလာဒ်များ ဖြစ်ထွန်းလာနိုင်မည်ဖြစ်ပါသည်၊ ပထမအကြိမ်တွေ့ဆုံပြီး ဆွေးနွေးပွဲမူဘောင်အပါအဝင် ရှေ့လုပ်ငန်းစဉ်များ ဆွေးနွေးညှိနှိုင်းသတ်မှတ်နိုင်ရန်အတွက် နိုင်ငံတော်သမ္မတ ဦးဆောင်သော ၆ ဦးအဖွဲ့ တွေ့ဆုံရေးကို စောလျင်စွာပြုလုပ်ရန် လိုအပ်ပါကြောင်း ပြန်ကြားအပ်ပါသည်"

ပြည်ထောင်စု လွှတ်တော်က အတည်ပြုထားတဲ့ ၆ ပွင့်ဆိုင် တွေ့ဆုံပွဲ ကျင်းပပေးဖို့ အဆိုအပေါ် နိုင်ငံတော် သမ္မတက ၆ ပွင့်ဆိုင်ထက် ပိုမိုကျယ်ပြန့်တဲ့ ဆွေးနွေးပွဲမျိုး ဖြစ်ဖို့လိုအပ်ကြောင်း တိုက်တွန်းတဲ့ သ၀ဏ်လွှာကို ဒီလ ၁၉ ရက်နေ့မှာ ပြည်ထောင်စုလွှတ်တော်ထံ ပေးပို့ခဲ့ပါတယ်။

သမ္မတရဲ့သ၀ဏ်လွှာအပေါ် ပြည်ထောင်စုလွှတ်တော် နာယက သူရဦးရွှေမန်းက အကြောင်းပြန်တဲ့ သ၀ဏ်လွှာကို ဒီနေ့ ပြန်လည်ပေးပို့တာဖြစ်ပါတယ်။

RFA Burmese
https://www.facebook.com/pages/RFA-Burmese/39218993127?fref=photo

Author Name

Contact Form

Name

Email *

Message *

Powered by Blogger.