04/07/15

ရေခဲမှတ်ကျနေတဲ့ မြစ်ထဲ ၁၅ မိနစ်အတွင် နစ်မြုပ်သွားခဲ့တဲ့ Dalny Vostok နဲ့ ပုံစံတူ ငါးဖမ်းသင်္ဘောကို ရုရှား အရေးပေါ်အခြေအနေဆိုင်ရာ ဝန်ကြီးဌာနက ဧပြီ ၂၊ ၂၀၁၅ မှာ ထုတ်ပြန်ဖော်ပြထားပုံ။
နစ်မြုပ်ခဲ့တဲ့ ရုရှား ငါးဖမ်း သဘောင်္ပေါ်ကို မြန်မာ သဘောင်္သားတွေ မရိုးမဖြောင့် စေလွှတ်လုပ်ကိုင်စေခဲ့ တာကြောင့် ပြည်တွင်း နိုင်ငံခြား သသောင်္သား စေလွှတ်ရေး ကုမ္ပဏီ ၅ ခုကို ပို့ဆောင်ရေး ဝန်ကြီးဌာနက အရေးယူထားပါတယ်။ ဒါ့အပြင် နစ်နာခဲ့တဲ့ သဘောင်္သားတွေအတွက် လျော်ကြေး ရရှိရေး၊ ဌာနေပြန်ရေး တို့ အတွက်လည်း အခက်အခဲ တွေ့နေပါတယ်။ သဘောင်္မှောက်တာကနေ ကယ်ဆယ်လာသူတွေနဲ့ သေဆုံးသူတွေအတွက်တော့ ဌာနေ ပြန်နိုင်ရေးနဲ့ လျော်ကြေး ရရှိရေးကိုလည်း ရုရှားဆိုင်ရာ မြန်မာသံရုံးက ရုရှားအစိုးရနဲ့ ဆက်သွယ် ဆောင်ရွက်နေပါတယ်။ အသေးစိတ်ကိုတော့ မသိင်္ဂီထိုက်က စုစည်းတင်ပြထားပါတယ်။

ကြာသပတေးနေ့ မနက်ပိုင်းက ရုရှားကမ်းလွန်ပင်လယ်ပြင်မှာ နစ်မြုပ်ခဲ့တဲ့ ငါးဖမ်းသဘောင်္မှာ လိုက်ပါခဲ့သူ မြန်မာနိုင်ငံသား ၄၂ ဦးတို့ကို မြန်မာပြည်တွင်း ကုမ္ပဏီ ၅ ခုတို့က တာဝန်ယူ စေလွှတ်ခဲ့တာ ဖြစ်ပါတယ်။ သဘောင်္သား အားလုံးတို့ဟာ အစိုးရအသိအမှတ်ပြု သဘောင်္သား လိုင်စင်တွေ ရှိကြပြီး တာဝန်ယူ စေလွှတ်တဲ့ ကုမ္ပဏီ ၅ ခုတို့ဟာလည်း မြန်မာ အစိုးရ ပို့ဆောင်ရေး ဝန်ကြီးဌာနက အသိအမှတ်ပြုထားတဲ့ ကုမ္ပဏီတွေ ဖြစ်ပါတယ်။ ဒါပေမယ့် ဒီ ကုမ္ပဏီ ၅ ခုတို့က သဘောင်္သားတွေကို ပို့ဆောင်ပါမယ်လို့ ပို့ဆောင်ရေး ဝန်ကြီးဌာနကို ပြောဆိုထားတဲ့ သဘောင်္ကုမ္ပဏီကိုမပို့ဘဲ ရုရှား ငါးဖမ်း သဘောင်္ဆီကို လိမ်လည်ပို့ဆောင်ခဲ့တာ ဖြစ်ပါတယ်။ အခုတော့ ဒီကုမ္ပဏီ ၅ ခုတို့ကို နိုင်ငံခြား သဘောင်္သား စေလွှတ်မှု ခေတ္တရပ်နားထားတယ်လို့ မြန်မာနိုင်ငံ ပို့ဆောင်ရေး ဝန်ကြီးဌာန သဘောင်္သား ဌာနခွဲက ညွှန်ကြားရေးမှူး ဦးတိုးမြင့်က ပြောပါတယ်။

“ကျနော်တို့ ဒီမှာရှိတဲ့အခက်အခဲက ဘာလဲဆိုတော့ အခုထွက်သွားတဲ့လူတွေက ကျနော်တို့ ကုမ္ပဏီ ၅ ခုက ထွက်တဲ့လူတွေက ကျနော်တို့ဌာနမှာ တကယ်တော့ ထွက်သွားတုန်းက ပြောတဲ့သင်္ဘောနဲ့ အခု တကယ်ရောက်တဲ့သင်္ဘောနဲ့က လွဲနေတယ်ဗျ။ လွဲနေတော့ ကျနော်တို့က လောလောဆယ် အဲဒီ ကုမ္ပဏီ ၅ ခုကို နိုင်ငံခြားသင်္ဘောသား ပြန်တင်ခွင့်ကို ယာယီရပ်ထားပါတယ်။ ကုမ္ပဏီက ကျနော်တို့ဌာနမှာ မှတ်ပုံတင်ထားတဲ့သင်္ဘောပေါ်တင်တာ မဟုတ်တဲ့အတွက်ကြောင့် လက်ရှိ သင်္ဘောနဲ့ပတ်သက်တဲ့ အာမခံတဲ့ကိစ္စတို့၊ ဒီက အာမခံအဖွဲ့အစည်းတွေပေါ့လေ- အဲဒါတွေ ကျနော်တို့ မေးမြန်းနေပါတယ်။”

မေး။ ။ ဆရာတို့ကို ပြောထားတဲ့ သင်္ဘောက တခု၊ သူတို့တင်ပေးလိုက်တာ တခုဆိုတော့ ဒီကုမ္ပဏီတွေကိုရော ဆရာတို့ဘက်က အရေးယူဖို့ ရှိပါလား။

ဖြေ။ ။ အခု လောလောဆယ် ပိတ်ထားပါတယ်။ ၃ ရက်နေ့ကပြီးတော့ သူတို့ သင်္ဘောသားတင်ပို့ခွင့်ကို ရပ်ဆိုင်းထားပါတယ်။

မေး။ ။ ဆရာ့၊ နာမည်တွေများ ဆရာ ပြောလို့ရပါလားရှင့်။

ဖြေ။ ။ နံပါတ် (၁) က Asia Wave ၊ နံပါတ် (၂) ကတော့ Top Chance ၊ နံပါတ် (၃) က Sea Rider ပါ။ နံပါတ် (၄) က Star Global ပါ။ နံပါတ် (၅) ကတော့ Life Oasis ပါ။

အခု နစ်မြုပ်ခဲ့တဲ့ ရုရှားငါးဖမ်းသင်္ဘော Dalniy Bostok ကလည်း ပို့ဆောင်ရေးဝန်ကြီးဌာနနဲ့ ဆောင်ရွက်ထားတာမဟုတ်တာကြောင့် လျော်ကြေး ကိစ္စကလည်း မသေမချာ ရှိနေဆဲပါ။ မိသားစုတွေအနေနဲ့လည်း အခုလို မရိုးဖြောင့်မှုတွေတွေ့ရင် ပို့ဆောင်ရေးဝန်ကြီးဌာနကို အကြောင်းကြားဖို့ လိုတယ်လို့လည်း သူက ဆက်ပြောပါတယ်။ အခု သဘောင်္နစ်မြုပ်တာမှာပါသွားပြီး အတည်မပြုနိုင်သေးသူ ကိုကျော်နေမင်းရဲ့ မိခင်ဖြစ်သူ ဒေါ်သိန်းကျော့ဦး ကတော့ သဘောင်္နာမည်နဲ့ အလုပ်အကိုင် ကွာခြားတာကို သူ့သားကတော့ ဖုန်းဆက်ပြောခဲ့တယ်လို့ ပြောပါတယ်။

“သားကြီး အလုပ်လုပ်တော့မှ၊ သင်္ဘောပေါ်ရောက်တော့မှ ဖုန်းဆက်တုန်းကတော့ ပြောပါတယ်။ ‘မေမေရယ်၊ ပြောတုန်းကတော့ သားတို့ကို ပြောတုန်းကတော့ ဂဏန်းသင်္ဘောလို့ ပြောပါတယ်။ ဒါပေမယ့် ဒီကိုရောက်တော့ ငါးသင်္ဘောကြီးဖြစ်နေတယ် မေမေ၊ နောက်ပြီး သင်္ဘော နာမည်လည်း မတူ’- လို့ ပြောပါတယ်။ ဘယ်လိုမတူတာလဲတော့ အဲဒါလည်း ကျမလည်း သေချာ မမေးပါဘူးရှင့်။ သားကြီးနဲ့ ပြောတဲ့ကိစ္စဆိုတော့ ကျမ အဲလိုမျိုးလည်း လျှောက်သွားရမယ်၊ ဘယ်သွားရမယ်ဆိုတာ မသိပါဘူးရှင့်။”

ဒီနေ့မှာပဲ မြန်မာသံကိုယ်စားလှယ်အဖွဲ့ဟာ ကယ်ဆယ်ရေးသဘောင်္ ၂ စင်းတို့ ဆိုက်ကပ်လာမယ့် ဆာခါလင်မြို့က ကော်ဆက်ဖ်ကော့ ကမ်းခြေဆီကို ထွက်ခွာသွားကြပါပြီ။ သင်္ဘောကတော့ ဒီလ (၈) ရက်နေ့လောက်မှာ ဆိုက်ကပ်မယ်လို့ ခန့်မှန်းထားပါတယ်။ လျော်ကြေးကိစ္စကတော့ မသေချာသေးတဲ့ အကြောင်း ရုရှားဆိုင်ရာမြန်မာသံရုံးက သံမှူးဦးအောင်ကျော်မိုးက ပြောပါတယ်။

“လျော်ကြေးကိစ္စက ကျနော်တို့ လိုက်ပြီး စုံစမ်းဆက်သွယ်နေပါတယ်။ ဒီဘက်က labor ministry တို့၊ emergency ministry တို့၊ နိုင်ငံခြားရေးတို့၊ အဲဒီတော့ လောလောဆယ်တော့ သူတို့က ဘာပြောလဲဆိုတော့ …. rescued operation နဲ့ သင်္ဘောပေါ်မှာ အသက်ရှင် ကင်ဆယ်ထားတဲ့လူတွေရဲ့ ကျန်းမာရေးလုပ်ငန်းတွေကိုပဲ ဦးစားပေးဆောင်ရွက်နေတယ်။ နောက်တခါ dead bodies တွေထဲမှာလည်း နိုင်ငံသားဖြစ်မှုပေါ့နော်၊ ဘယ်နိုင်ငံသားလဲ ဆိုတာကို Identification လုပ်လို့ မပြီးသေးစီးသေးတဲ့အတွက် သူတို့ ဒီကိစ္စတွေကို နောက်မှ ဆောင်ရွက်ပါမယ်လို့ ပြောပါတယ်။ အခုတော့ လောလောဆယ်တော့ ကျနော်တို့ကို ဘာအဖြေမှ မပေးနိုင်သေးပါဘူးခင်ဗျ။

“ဒီဘက်က သင်္ဘောကုမ္ပဏီက ကျနော်တို့ စုံစမ်းသိရှိရသလောက်တော့ တော်တော်လေးကို သေးသေးမွှားမွှားပါပဲ၊ အထင်ကရမဟုတ်ပါဘူး၊ ဝက်ဆိုက်တွေ ဘာတွေလည်း မရှိပါဘူး။ ကျနော်တို့ဆက်သွယ်ပါတယ်။ သို့သော်လည်း သူတို့ဆီက ကျနော်တို့လိုချင်တဲ့အဖြေမျိုးပေါ့နော်၊ မေးတဲ့အခါမှာ compensation တွေ၊ ဘာတွေနဲ့ မြန်မာပြည်ပြန်ပို့ဖို့ ကိစ္စတွေမှာ ဘာမှ တိတိကျကျ မသိရပါဘူး။ ဖုန်းတောင်မှ ကောင်းကောင်းမွန်မွန် ပြန်ဖြေတာမျိုး မရှိပါဘူး။ အဲဒီတော့ ကျနော်တို့က ဒီကိစ္စတွေကို တရားဝင် ရုရှား emergency situation ministry နဲ့ပဲ ဆက်သွယ်လုပ်ဆောင်နေပါတယ်။”

နစ်မြုပ်ခဲ့တဲ့ ရုရှား ငါးဖမ်းသဘောင်္ Dalniy Vostok ပေါ်မှာ လိုက်ပါခဲ့တဲ့ သဘောင်္သားပေါင်း ၁၃၂ ဦးထဲမှာ မြန်မာနိုင်ငံသား ၄၂ ဦးပါဝင်ခဲ့ပါတယ်။ မြန်မာ နိုင်ငံသား ၂၂ ဦးကို အသက်ရှင်လျက် ကယ်တင်ထားနိုင်ပြီး ၁ ဦး သေဆုံးကြောင်း အတည်ပြုထားပေမယ့် ကျန်တဲ့ ၁၉ ဦးတို့ရဲ့ကံကြမ္မာကတော့ မရေမရာဖြစ်နေဆဲပါ။ ကယ်ဆယ်လာသူတွေနဲ့ မြန်မာနိုင်ငံသားတွေရဲ့ ရုပ်အလောင်းတွေကို ဌာနေပြန်ပို့နိုင်ဖို့ကို ဦးစားပေးလုပ်သွားမှာဖြစ်ပြီး ဒီနောက်မှာ လျော်ကြေးရရှိရေးအတွက် ဆောင်ရွက်သွားမယ်လို့ ရုရှားဆိုင်ရာ မြန်မာသံရုံးက ပြောဆိုပါတယ်ရှင်။

သိင်္ဂီထိုက် / ဗွီအိုအေ (မြန်မာပိုင်း)
http://burmese.voanews.com


ဒီတပတ် မြန်မာ့ဒီမိုကရေစီရေးရာ ဆွေးနွေးခန်းအစီအစဉ်မှာ လက်ပံတောင်းတောင် အရေးအခင်းမှာ အာဏာပိုင်တွေဘက်က အင်အား အလွန်အကျွံသုံး နှိမ်နင်းခဲ့တဲ့အတွက် ရဟန်းသံဃာတော် အများအပြားနဲ့ အရပ်သားတချို့  ဒဏ်ရာရရှိခဲ့ကြပါတယ်။ တာဝန်ရှိသူတွေကို တရားဥပဒေအရ စစ်ဆေးအရေးယူမဲ့ ကိစ္စကို နိုင်ငံတော်သမ္မတ ကိုယ်တိုင်က ပယ်ချခဲ့ပါတယ်။ ဒီအရေးမှာ တရားဥပဒေ နှုတ်ဆိတ် သွားလေပြီလားဆိုတာ မြန်မာနိုင်ငံ ရှေ့ နေများကွန်ရက်က ဦးအောင်သိန်း နဲ့ ဒီနှိမ်နှင်းမှုကြောင့် အပြင်းအထန် ဒဏ်ရာ ရခဲ့တဲ့ ဆရာတော် ဦးတိက္ခဉာဏတို့ကို ဦးကျော်ဇံသာက တွေ့ဆုံမေးမြန်း ဆွေးနွေးသုံးသပ် တင်ပြထားပါတယ်။

ဦးကျော်ဇံသာ ။ ။ လက်ပံတောင်းက ဒေသခံတွေ၊ တက်ကြွလှုပ်ရှားသူတွေရဲ့  ဆန္ဒပြပွဲကို အစိုးရက အင်အားအလွန်အကျွံသုံးပြီး နှိပ်ကွပ်ခဲ့တဲ့ကိစ္စကို နိုင်ငံတကာသိအောင် လာရောက်ဖော်ထုတ်ထားတယ်လို့ ကျနော် အကြမ်းမျဉ်း သိထားပါတယ်။ ဒီအမှုကို ဦးအောင်သိန်းက မြန်မာနိုင်ငံမှာ တရားစွဲဖို့ ကြိုးပမ်းလျှောက်ထားတဲ့အခါမှာ သက်ဆိုင်ရာက လက်မခံဘူး။ ပယ်ချလိုက်တယ်လို့ ပြောတယ် ဟုတ်ပါတယ်နော်။

ဦးအောင်သိန်း ။ ။ မှန်ပါတယ်။

ဦးကျော်ဇံသာ ။ ။ ဘာဖြစ်လို့ ဒီဟာကို လက်မခံဘူးလို့ သုံးသပ်ပါလဲ။ တကယ်တော့ ဒီအမှုဟာ တရားစွဲနိုင်တဲ့ အမှု ဟုတ်ပါတယ်နော်။

ဦးအောင်သိန်း ။ ။ တရားစွဲဆိုနိုင်တဲ့ အမှုဖြစ်လို့ ကျနော်တို့ ရှေ့ နေများက တရားစွဲဖို့ အစီအစဉ် လုပ်တာပါ။ ဘာဖြစ်လို့လဲဆိုတော့ သူတို့ဖက်က ပယ်ချနိုင်တဲ့ကိစ္စက ပြည်သူဝန်ထမ်း ဝန်ကြီး level အဆင့်ကို ကျနော်က တရားစွဲမယ်ဆိုရင် သူထက်အဆင့်မြင့်တဲ့ အစိုးရ သမ္မတရှိက ခွင့်ပြုအမိန့် တောင်းခံဖို့ လိုပါတယ်။ ကျနော်တို့ ခွင့်ပြုမိန့်လည်း တောင်းလည်းတောင်းပါတယ်။ ဒါပေမဲ့ ခွင့်ပြုမိန့်က ပေးလေ့ပေးထ မရှိဘူးပေါ့ ကျနော်တို့ အစဉ်အလာမှာ။ အဲဒီ ခွင့်ပြုချက်မရဘဲနဲ့ ရဲစခန်းမှာ အမှုသွားဖွင့်တဲ့အတွက်ကြောင့် ရဲစခန်းက အမှု လက်မခံနိုင်ဘူးလို့ ငြင်းပယ်တာပါ။

ဦးကျော်ဇံသာ ။ ။ ဆိုတော့ သမ္မတကိုယ်၌က ဒီအမှုကို တရားစွဲဖို့ ခွင့်မပြုဘူးဆိုတဲ့ သဘောဖြစ်နေတာပေါ့။

ဦးအောင်သိန်း ။ ။ အဲဒီ သဘော သက်ရောက်ပါတယ်။

ဦးကျော်ဇံသာ ။ ။ ဆိုတော့ တကယ်တော့ မြန်မာနိုင်ငံမှာ အုပ်ချုပ်ရေးယန္တရားတခုလုံး အာဏာပိုင် အဖွဲ့အစည်းကိုကြည့်ရင် သမ္မတကို တော်တော်များများ အမှတ်ပေးနေကြတယ်။ ပွင့်ပွင့်လင်းလင်း ကျနော်တို့ နားလည်ကြရင်။ ဒီ သမ္မတက ဘယ်လို လုပ်ချင်ပေမယ့်လဲ ဥပမာပြောရရင် သမ္မတ က ကြီးကြပ်ထားရတယ် သမ္မတ တကယ် အာဏာမရှိတဲ့ ဌာနတွေရှိတယ်။ ပြည်ထဲရေးတို့ ဘာတို့ သူတို့တွေက လက်မခံဘူး။ စစ်တပ်က ဘယ်လို ဖြစ်နေတယ်ဆိုတာတွေ ပြောနေတယ်ဆိုတော့ အခု သမ္မတကိုယ်တိုင်က ဒါကို ခွင့်မပြုဘူးဆိုတဲ့ သဘောပေါ့။

ဦးအောင်သိန်း ။ ။ မှန်ပါတယ်။ ဘာဖြစ်လို့လဲဆိုတော့ ပြည်ထဲရေးဌာနဆိုတာလဲ သိတဲ့အတိုင်း ကာလုံ ကာကွယ်ရေးနဲ့ လုံခြုံရေးကောင်စီရဲ့  လက်အောက်မှာ ရှိနေတဲ့ အဖွဲ့အစည်း အဓိကကျတာကို။ ဆိုတော့က သမ္မတကလဲ အဲဒီအထဲမှာ ကာလုံထဲမှာ one of the members အဖွဲ့ဝင်တဦးအနေနဲ့ ရှိနေတဲ့သဘောပေါ့။ အဲဒီတော့ ကာကွယ်ရေး ဦးစီးချုပ်ရဲ့  အခြေအနေအပိုင်းက ပိုပြီးတော့ ထဲထဲဝင်ဝင် ဖြစ်လိမ့်မယ်လို့ ကျနော် ယူဆပါတယ်။

ဦးကျော်ဇံသာ ။ ။ သမ္မတ ခွင့်မပြုတဲ့ ကိစ္စမှာ ...

ဦးအောင်သိန်း ။ ။ ဟုတ်ကဲ့ အဲဒီသဘော သက်ရောက်ပါလိမ့်မယ်။

ဦးကျော်ဇံသာ ။ ။ ဘုန်းဘုန်းဘုရား အဲဒီနေ့က လက်ပံတောင်းကို အာဏာပိုင်တွေက အကြမ်းဖက်နှိမ်နင်းတာနဲ့ ပတ်သက်ပြီး တပည်တော် သိချင်တာကို မေးပါရစေဘုရား။ အဲဒီ အကြမ်းဖက်နှိမ်နင်းမယ်ဆိုတာ သပိတ်ကို မလှန်ရင် သပိတ်ကို ဖြိုခွဲမယ်ဆိုတာကို သူတို့ ပြောနေမှာပေါ့။ ဒါပေမဲ့ ဗုံးတွေနဲ့ ဖြိုခွင်းတဲ့နေ့မှာ အဲဒီအတွက် အထူးသတိပေးတာ ရှိပါသလား။

ဦးတိက္ခဉာဏ ။ ။ မရှိပါဘူး။

ဦးကျော်ဇံသာ ။ ။ ဘယ်အချိန်မှာ ဖြစ်တာလဲ ဘုရား။

ဦးတိက္ခဉာဏ ။ ။ ည တော်တော်လေး ညဉ့်နက်ပြီ။ မနက်ပိုင်း (၂) နာရီ (၃) နာရီလောက် တန်ဆောင်မုန်းလပြည့်နေ့

ဦးကျော်ဇံသာ ။ ။ တကယ့် သာသနာရေးအရ အထွဋ်အမြတ်နေ့။ အဲဒီအခါမှာ ဦးပဉ္ဖင်းဘုရားတို့ အပါအဝင် သပိတ်သမားတွေက အိပ်တဲ့လူအိပ်နေ၊ နားနားနေနေပေါ့။ အမှတ်မထင် ဝင်ရောက်တိုက်ခိုက်တဲ့ သဘောပေါ့။

ဦးတိက္ခဉာဏ ။ ။ အမှတ်မထင်တော့ မဟုတ်ဘူး။ သူတို့ မီးသတ်ကားနဲ့ စပြီးပက်တယ်။ မီးသတ်ကားနဲ့ ပက်တယ်ဆိုတော့ အဲဒီတုန်းက ဆောင်းတွင်းဆိုတော့ စောင်တွေခြုံထားတာ ရှိတယ်။ သံဃာတွေဆိုတော့ ခြုံထည်တွေ ခြုံထားတာရှိတယ်။ အဲဒီ ခြုံထည်တွေနဲ့ ခံကြတာ။ ခြုံထည်တွေ၊ သင်္ကန်းတွေ၊ စောင်တွေ အကုန်လုံး ရွှဲနစ်သွားတာပေါ့။ မီးသတ်ကားက မီးသတ်ပိုက်ကြီးနဲ့ ပက်တာ။ ခဏနေတော့ မီးလောင်ဗုံး ကျလာတယ်။ မီးလောင်ဗုံး ကျလာပြီးတော့ မီးလောင်ဗုံးလို့ ပြောရတာက အဲဒီ ဗုံးလည်း ကျလာကော ရွှဲနစ်နေတဲ့ စောင်တွေ၊ သင်္ကန်းတွေက တမဟုတ်ချင်း ဝုန်းကနဲ တောက်လောင်ကုန်တယ်။ မီးတွေ ဖြစ်ကုန်တယ်။ အောက်က ကော်ဇောတွေ၊ အထက်အောက် ဘယ်ညာရှေ့ နောက် မီးတွေ ဖြစ်ကုန်တယ်။



ဦးကျော်ဇံသာ ။ ။ ဘယ်သူမှ မျှော်လင့်မထားဘူး ဒီလို ဖြစ်လာမယ်လို့။

ဦးတိက္ခဉာဏ ။ ။ ဘယ်လိုမှ မသိနိုင်ဘူး။ မြင်လဲမမြင်ဘူး။ အသံလဲ မကြားလိုက်ဘူး။

ဦးကျော်ဇံသာ ။ ။ ဘုန်းဘုန်းက ရုတ်တရက်ကြတော့ ကိုယ်ကို မီးစွဲလောင်ပြီး သတိတွေဘာတွေ လစ်သွားလား။

ဦးတိက္ခဉာဏ ။ ။ အဲဒီလိုတော့ မရှိဘူး။ သတိလုံးဝ မလစ်ဘူး။ သတိရှိတယ်။ မီးကြီးပဲ မြင်နေရတော့ မီးထဲက လိမ့်ထွက်လိုက်တယ်။ မီးလောင်အား နည်းသွားအောင်ဆိုပြီး မြေကြီးမှာဝပ်ပြီးတော့ လိမ့်လိုက်တယ်။

ဦးကျော်ဇံသာ ။ ။ ဒါပေမဲ့ ဘုန်းဘုန်းဘုရားရဲ့  ကိုယ်ပေါ်က ဒဏ်ရာတွေကို တပည်တော်နဲ့ ပရိသတ်တွေလည်း မြင်ရအောင် နည်းနည်းပြချင်ပါတယ် ဘုရား။ ဘယ်လောက်အထိ လောင်ခဲ့သလဲဆိုတာ။

ဦးတိက္ခဉာဏ ။ ။ လောင်တာက မီးထဲကထွက်တော့ နောက်ထပ် မတ်တပ်ရပ်ပြီးတော့ လမ်းထလျှောက်တယ်။ လမ်းထလျှောက်တော့ ခြေထောက်နားမှာ နောက်ထပ်တစ်ဗုံး ကျတယ်။ အဲဒီတော့ ဦးပဉ္ဖင်းက နှစ်ဗုံး ထိတာပေါ့။ ခြေထောက်မှာ ထိလိုက်တော့ ခြေထောက်တွေက အခုအချိန်အထိ (၂) နှစ်ကျော်တဲ့အထိ ကောင်းကောင်းမသန်ဘူး။ အောက်ကိုကျအောင်အထိ မထိုင်နိုင်ဘူး။ ဆွမ်းဘုန်းတဲ့အခါမှာလဲ ကုလားထိုင်နဲ့ ဘာနဲ့ ဘုန်းရတယ်။ ကြမ်းပြင်မှာ တင်ပျဉ်ခွေ မထိုင်နိုင်ဘူး။ နောက် ကိုယ့်ထက် သက်ကြီးဝါကြီးတဲ့ ဆရာတော်တွေ၊ လေးစားလောက်တဲ့ ဆရာတော်ကြီးတွေကိုလည်း ဦးပဉ္ဖင်း ဝပ်ချမနိုင်ဘူး။ သူတို့ကို တောင်းပန်ရတယ်။ တပည်တော် မသန်လို့ပါဘုရားလို့ တောင်းပန်ရတယ်။ အခုအချိန်အထိ။

ဦးကျော်ဇံသာ ။ ။ အခု အာဏာပိုင်တွေက ကြေးနီသတ္တုတူးဖော်ရေးလုပ်ငန်း လုပ်နေတဲ့ နေရာတွေမှာ အဓိကအားဖြင့် သာသနာနိက အဆောက်အအုံဆိုလို့ လယ်တိဆရာတော်ဘုရားကြီးရဲ့  သိမ်ကျောင်းတို့ ရှိတယ်လို့ သိရပါတယ်။ အဲဒီဟာတွေကို သူတို့ စုံစမ်းစစ်ဆေးရေး အဖွဲ့အစီရင်ခံစာထဲမှာ ဘယ်လို ဆောင်ရွက်ပေးမယ်လို့ ပြောပါလဲ။ အဲဒီကိစ္စကို။

ဦးတိက္ခဉာဏ ။ ။ သူတို့က ပုံစံမပျက် ဆောင်ရွက်နိုင်တယ်တဲ့။ ပုံစံမပျက် ရွှေ့ နိုင်တယ်တဲ့။ သူတို့မှာ နည်းပညာလည်းရှိတယ်။ ပစ္စည်းပစ္စယလည်း ရှိတယ်။ အဲဒီလိုတော့ သတင်းစာ ရှင်းလင်းပွဲလုပ်ပြီး ကြေညာတယ်။ ဒါပေမဲ့ တကယ်လုပ်ကိုင်သွားတော့ အဲဒီ သာသနာသိမ်နဲ့ စေတီနေရာကို ဘူဒိုဇာနဲ့ တူးဖော်ပြီး ရှင်းပြစ်လိုက်တယ်လို့ ဦးပဉ္ဖင်းတို့ နားလည်တယ်။ ပြီးတော့ အသစ်ထပ်လုပ်တယ်။ ဒီအတိုင်း ပုံစံမပျက် ရွှေ့ နိုင်တယ်လို့ ကြေညာပေမယ့်။ အဲဒီလို မရွှေ့ ဘဲနဲ့ ။

ဦးကျော်ဇံသာ ။ ။ နောက်တခုက ဒီပြစ်မှုက ဘယ်လောက်အထိ ကြီးကျယ်တဲ့ ပြစ်မှုလို့ ပြောနိုင်ပါလဲ။

ဦးအောင်သိန်း ။ ။ ကြီးကျယ်တာကတော့ ကျနော်တို့က Geneva Convention က တားမြစ်ထားတဲ့ phosphorous မှာပါတဲ့ မီးစုန်းဓါတ်ပါတဲ့ weapon ကို အသုံးပြုတယ်။ အဲဒီလို အသုံးပြုတဲ့အတွက် ရဟန်းသံဃာတွေ မီးစွဲလောင်ပြီး ဖြစ်ခဲ့တာ ကျနော် သိသလောက်ဆို အပြင်းအထန်ဖြစ်တာ အပါး (၅၀) ကျော်လောက်ရှိတယ်။ အခု အရှင်တိက္ခဥာဏ နဲ့ ရဟန်းတပါးအပါအဝင် ကျနော်တို့ ဆက်သွယ်ပြီးတော့ သူတို့မှာ မတရားနစ်နာတယ်။ ပြည်သူကိုသိဖို့ ဆောင်ရွက်ပေးပါဆိုပြီး ကျနော်တို့က ရဲစခန်းအမှုဖွင့် တိုင်ကြားမှုကို စတင်ဆောင်ရွက်ခဲ့တာပါ။ ဒီဟာကတော့ ပြောရင်တော့ အပြင်းအထန် နာကျင်စေမှုရဲ့  ဘောင်အတွင်းမှာတော့ ပြစ်မှုဆိုင်ရာအမှုတွေအရတော့ အကြုံဝင်နေပါတယ်။

ဦးကျော်ဇံသာ ။ ။ တချို့ နိုင်ငံတွေမှာ ဒီမိုကရေစီ ထွန်းကားတယ်။ လူ့အခွင့်အရေးကို လေးစားတယ်။ ကိုယ်လုပ်တာကို ကိုယ်တာဝန်ယူရဲတဲ့ နိုင်ငံတွေမှာဆိုရင် တချို့ တာဝန်ရှိသူတွေ နှုတ်ထွက်သွားကြတယ် ဒါမျိုး ဖြစ်ခဲ့တယ်ဆိုရင်။ မနှုတ်ထွက်ရင်တောင်မှ စုံစမ်းရေးကော်မရှင် ဖွဲ့ပြီးတော့ အပြစ်ရှိတဲ့လူတွေကို ထိထိရောက်ရောက် အရေးယူပြလိုက်တယ်။ အခု မြန်မာနိုင်ငံမှာ စုံစမ်းရေးကော်မရှင် လုပ်တယ်လို့ကြားတယ်။ အဲဒီလို ပြုလုပ်ခဲ့တယ်လူ၊ ကျူးလွန်ခဲ့တဲ့လူကို အရေးယူဖို့ဆိုတာ သူတို့ ပြဌာန်းချက်ထဲမှာ ပါတယ်ထင်ပါတယ်။ အဲဒါကို သူတို့ ဘယ်လောက်အထိ လိုက်နာပြီး အရေးယူပါလဲ။

ဦးအောင်သိန်း ။ ။ ကျနော်တို့နိုင်ငံမှာတော့ အဲဒါ အစဉ်အလာ မရှိဘူး။ အရေးယူ စုံစမ်းတဲ့အဆင့်လောက်နဲ့ ပြီးပျက်သွားတာပဲ။ အဲဒီတော့ ထုတ်ပြစ်တာတို့။ နှုတ်ထွက်ခိုင်းတာတို့ ဆိုတာတော့ ဒီနေ့အထိ ကျနော်တို့ မကြားရသေးတဲ့ စကားလုံးတခုပေါ့။

ဦးကျော်ဇံသာ ။ ။ ဆိုတော့ စုံစမ်းရေးကော်မရှင်ရဲ့  အစီရင်ခံစာကို ပြန်ကောက်ရမယ်ဆိုရင် တာဝန်ရှိတဲ့လူတွေကို စုံစမ်းဖော်ထုတ်မယ်ဆိုတာပါပြီ။ အဲဒါကို မလုပ်ဘူး။ ဒေသနစ်နာတာ၊ ဒေသခံတွေရဲ့  ဘဝနောင်ရေး၊ ပြည်သူတွေရဲ့  ဆုံးရှုံးနစ်နာမှုနဲ့ ပတ်သက်ပြီးတော့လဲ ဘယ်လို ဆောင်ရွက်ရမယ်။ ဘယ်လောက် လျော်ကြေးပေးရမယ် သူတို့ ကျေနပ်အောင်ဆိုတာ ပါတယ်ထင်ပါတယ်။ အဲဒါကို ဘာကြောင့် သူတို့ စိုက်လိုက်မတ်တတ် မဆောင်ရွက်နိုင်တာလဲ။ နောက်ပိုင်း ဒေါ်ခင်ဝင်း သေထဲအထိ ဖြစ်နေခဲ့တာ။

ဦးအောင်သိန်း ။ ။ ခက်တာက လျော်ကြေးပေးတယ် ဆိုတာကလဲ။ လျော်ကြေး ပေးပုံပေးနည်းက ပွင့်လင်းမြင်သာမှု မရှိတဲ့ အချက်အလက်တွေ ရှိတယ်။ နောက်ပြီး ဆေးရုံဆေးခန်းတွေ ဆောက်ထားတယ်ဆိုတာ ဦးကျော်ဇံသာတို့ ရန်ကုန်ရောက်ရင် သွားကြည့်ရင် သိပါတယ်။ ဖြစ်သလို ဘယ်သူမှလဲ မရှိဘူး။ အဆောက်အဦးလေး ဆောက်ပေးထားတယ်ဆိုတဲ့ သဘောမျိုး။ နောက်ပြီးတော့ ပွင့်လင်းအောင် အလုပ်အကိုင် ရရှိရေးဆိုတာလဲ အဲဒီ အလုပ်သမားတွေက အဝတ်လျှော်တဲ့အဆင့် ဘာအဆင့်ညာအဆင့် ဒီလို အဆင့်မျိုးတွေနဲ့ ထားပြီးတော့ အမှန်တော့ တရုတ်ရဲ့  သြဇာခံသဘော နှစ်ကွပ်ခံနေရတယ်လို့ ပြည်သူတွေကလည်း အဲဒီလို မြင်တယ်။ အဲဒီတော့ သူတို့က သူတို့ မိရိုးဖလာ လယ်ယာမြေပေါ်မှာ သူတို့က အဓိက မြှုပ်နှံချင်တယ်။ သံယောဇဉ် ရှိတယ်။ သူတို့ လယ်မရှိရင် ဘဝမရှိဘူးဆိုတဲ့ အယူအဆက ဒီနေ့ ကျနော်တို့ရဲ့  ယဉ်ကျေးမှုတခုလို ဖြစ်နေတဲ့ အတိုင်းအတာပါ။

ဦးကျော်ဇံသာ ။ ။ နောက်တခု မေးချင်တာက မြန်မာနိုင်ငံရဲ့  လူထုခေါင်းဆောင်၊ အတိုက်အခံခေါင်းဆောင် ဒေါ်အောင်ဆန်းစုကြည် ကိုယ်တိုင် စုံစမ်းရေးကော်မရှင်ထဲမှာ တာဝန်ရှိတဲ့ ပုဂ္ဂိုလ်တစ်ယောက်အနေနဲ့ သူကိုယ်တိုင် သွားတယ်။ ဒါပေမဲ့ ဒေါ်အောင်ဆန်းစုကြည်ရဲ့  အခန်းကဏ္ဍကိုလည်း သိပ်ဘဝင် မကျကျဘူးလို့ ပြောကြပါတယ်။

ဦးအောင်သိန်း ။ ။ ဒါကတော့ သဘောထားနှစ်ခု ညှိနှိုင်းတဲ့အခါမှာ သဘောတူတာ ရှိမယ်။ သဘေmမတူနိုင်တာလဲ ရှိမှာပေါ့။ ဒီဟာ အားလုံးကို သဘောတူရမယ်လို့ ပြောလို့မရဘူး။ အားလုံးကိုလဲ ဆန့်ကျင်မယ်လို့ ပြောလို့မရဘူး။ နောက်ဆုံး ကျနော်တို့ ဒေါ်အောင်ဆန်းစုကြည်က ဒေါ်ခင်ဝင်း သေဆုံးပြီးနောက်ပိုင်း ပေါ်ပေါက်တဲ့အပေါ်မှာ သူ့ ကော်မရှင်နာအစီရင်ခံစာအတိုင်း လုပ်ဆောင်ခြင်း မရှိဘူးဆိုပြီးတော့ ပြတ်ပြတ်သားသား ပြောလာတဲ့အဆင့် ဖြစ်လာခဲ့တယ်။ ဒါဟာ ကျနော်တို့အတွက် Turning Point တခု ဖြစ်လာခဲ့တယ်။ အဲဒါကလဲ အင်မတန်မှ အရေးကြီးတဲ့အချက်ပါ။ ဘာဖြစ်လို့လဲဆိုတော့ အစိုးရက တာဝန်ခံမှု၊ တာဝန်ယူမှုဆိုတာ အင်မတန် နည်းတယ်။ အဓိကတော့ ဦးပိုင်ရဲ့  အကျိုးစီးပွားက အဓိကကျနေတဲ့ သဘောပဲ။ ဒါပေမဲ့ အကျိုးစီးပွားတွေ ဘယ်လို ခွဲဝေပေးပါစေ။ အစိုးရရဲ့  အကျိုးစီးပွားကို ပြန်ပြီးတော့ ပုံပေးလာတဲ့အဆင့်တွေ ဖြစ်သော်ငြားလဲ ဒါတွေက ပွင့်လင်းမြင်သာမှု မရှိနိုင်တဲ့အတွက် ဒါတွေဟာ မှန်တယ်လို့ အတိအကျ ယုံကြည်လို့လဲ မရနိုင်ဘူးလို့ ကျနော်တို့က မြင်ပါတယ်။

ဦးကျော်ဇံသာ ။ ။ နောက် ဥပဒေပိုင်းနဲ့ ပတ်သက်ရင် ဦးအောင်သိန်းက ဥပဒေပညာရှင်ဆိုတော့ Rules of Law တရားဥပဒေ စိုးမိုးရေးဟာ သိပ်အရေးကြီးတဲ့ ကိစ္စလို့ ပြောကြပါတယ်။ မြန်မာနိုင်ငံမှာ စီးပွားရေးလုပ်ငန်းတွေမက ကျန်တဲ့ကိစ္စတွေမှာလဲ တရားလက်လွှတ် ဥပဒေမဲ့ ဖြစ်နေတဲ့ကိစ္စတွေ အများကြီး ရှိတယ်လို့ ပြောပါတယ်။ တရားဥပဒေ စိုးမိုးရေးအဖွဲ့ ဘာညာလဲ သူတို့ လုပ်ထားတယ်ဆိုတာလဲ တွေ့ရပါတယ်။ ဘယ်လောက် တိုးတက်လာပြီလို့ ထင်ပါလဲ။ အခု သမ္မတဦးသိန်းစိန် အာဏာယူလာတဲ့ သက်တမ်း လေးငါးနှစ်အတွင်းမှာ ပြန်ပြီးခြုံကြည့်ပါ။ ဘယ်လောက် တိုးတက်လာလဲ။

ဦးအောင်သိန်း ။ ။ ကျနော်တို့ကတော့ ထင်သလောက်၊ ပြောသလောက် မဖြစ်ပါဘူး။ တရားဥပဒေ စိုးမိုးရေးဆိုတာက ပါးစပ်ကတော့ ပြောနေကြတာပေါ့။ တကယ်လက်တွေ့ကတော့ လိုက်မလာကြပါဘူး။ တရားရုံးတင်မကဘူး ဌာနဆိုင်ရာ တော်တော်များများမှာလည်း အဂတိတရား ကင်းရှင်းတယ်ဆိုတာ မရှိသလောက်ပါပဲ။ ဘာဖြစ်လို့လဲဆိုတော့ ဒီနေ့ ကျနော်တို့ရဲ့  အစိုးရတာဝန်ရှိတဲ့ ဝန်ကြီးဌာနတွေ ကိုယ်တိုင်က သူတို့ရဲ့  ပိုင်ဆိုင်မှု အထောက်အထားတွေ ဘယ်လောက်ရှိသလဲဆိုတာကို ပြည်သူကို ပွင့်လင်းမြင်သာစွာ ကြေညာဖို့ အင်မတန် ဝန်လေးနေတယ်ဆိုတာ ကျနော်တို့ သိရပါတယ်။ အဲဒီဟာကို ကျနော်တို့ မထိန်းချုပ်နိုင်ရင် သူတို့တွေ undertable လုပ်ယူမယ့်ကိစ္စတွေဟာ ဘယ်လောက် အတိုင်းအတာဆိုတာ ပြောလို့မရဘူး။ ကျနော်တို့ဆီမှာက တိုင်းပြည်က ဆင်းရဲတယ်။ သို့သော်လဲ အာဏာပိုင်နဲ့ ခရိုနီ ပေါင်းတဲ့ လူချမ်းသာတွေက တစုလောက်ကတော့ အင်မတန်ကို ငွေကြေးအားဖြင့် ပေါကြွယ်ဝပြီးတော့ အဲဒီဟာတွေကြောင့် ငွေဖောင်းပွမှုတွေက တစတစ ဖြစ်နေကြတယ်။ မတန်တဆ ပေးပြီးတော့ လုပ်နေကြတယ်ဆိုတာကို ကျနော်တို့ တွေ့ရတယ်။

ဦးကျော်ဇံသာ ။ ။ ချမ်းသာမှုကော၊ အာဏာကောပေါ့။ အထူးကျေးဇူးတင်ပါတယ်။

ဦးကျော်ဇံသာ / ဗွီအိုအေ (မြန်မာပိုင်း)
http://burmese.voanews.com

Author Name

Contact Form

Name

Email *

Message *

Powered by Blogger.