04/30/15

အသတ်ဖြတ်ခံလိုက်ရတဲ့ ကချင်တိုင်းရင်းသူ စေတနာ့ ၀န်ထမ်းဆရာမနှစ်ဦး၊ လက်ပံတောင်းဒေသခံ ဒေါ်ခင်ဝင်း နဲ့ အလွတ်သတင်းထောက် ကိုပါကြီးတို့ အတွက် အောက်မေ့ဖွယ်အခမ်းအနားတစ်ရပ်ကို ရန်ကုန်မြို့ စမ်းချောင်းမြို့နယ် တီးတိန်ချင်း နှစ်ခြင်း အသင်းတော်ခန်းမမှာ ကျင်းပခဲ့ပါတယ်။

အသတ်ခံရတဲ့ ကချင်ဆရာမနှစ်ဦး သေဆုံးတဲ့ရက် ၁၀၀ ပြည့်မှာ ဆုတောင်းပွဲ ကျင်းပတာဖြစ်တယ်လို့ ဂရုဏာရှင်အမျိုးသမီးကွန်ရက်က ဒါရိုက်တာ အမ်ဂျာဆိုင်း က ပြောပါတယ်။

"ပတ်ဝန်းကျင်မှာ အသက်ပေး ပြီးတော့ နိုင်ငံတော်အေးချမ်းဖို့အတွက် ပါဝင်သွား ကြတဲ့သူတွေရှိတယ်ဆိုတာကို ကျမတို့ဖော်ပြ ချင်တယ်၊ ဆရာမလေး ၂ ယောက်ရဲ့ရက် ၁၀၀ ပြည့်မှာ ကိုပါကြီးတို့၊ ဒေါ်ခင်ဝင်းတို့ အားလုံးဟာ တန်းတူ ဖြစ်တယ်ဆိုတဲ့ အကြောင်း၊ ဒီလိုလုပ်တာ အမှုမှန်ပေါ်ခြင်း၊ မပေါ်ခြင်း ထက်ကို အဓိက ကတော့ ကျမတို့ပတ်ဝန်းကျင်မှာ ဒီလိုအဖြစ်မျိုးနောက်နောင် ထက်ပြီးတော့ မကြုံတွေ့ရပါစေနဲ့၊ လူတိုင်းဟာ တစ်ယောက်နဲ့ တစ်ယောက် ဂရုဏာထားပြီးချစ်ချင်းမေတ္တာ နဲ့ လျှောက်လှမ်းနိုင်ပါစေဆိုတဲ့ စိတ်ကလေးနဲ့ ဒီပွဲလေးကိုဖြစ်အောင်လုပ်တာပါ"

အခမ်းအနားမှာ သတ်ဖြတ်ခံရသူ ကချင်ဆရာမနှစ်ဦးဖြစ်တဲ့ မရန်လုရာနဲ့ တန်ဘောင်ခေါန်နန်စင်၊ လက်ပံတောင်းဒေ သခံ ဒေါ်ခင်ဝင်း၊ အလွတ်သတင်းထောက် ကိုပါကြီးတို့ရဲ့ မိသားစုဝင်တွေ တက်ရောက်ခဲ့ပြီး ဆုတောင်း စကားတွေ ပြောကြားခဲ့ကြပါတယ်။

ကချင်ကျောင်းဆရာမနှစ်ဦးဟာ ရှမ်းပြည်နယ်မြောက်ပိုင်း မူဆယ်ခရိုင်၊ ပန်ဆိုင်း ကြူကုတ်မြို့ ကောင်းခါးကျေးရွာမှာ ဇန်န၀ါရီလ ၁၉ ရက်နေ့က သတ်ဖြတ်ခံခဲ့ရ တာဖြစ်ပါတယ်။

တက်ရောက်လာကြသူတွေက အလှူငွေတွေ ထည့်ဝင်ကြပြီး သေဆုံးသူတွေရဲ့ မိသားစုဝင်တွေကို တစ်ပါ တည်းပေးအပ်လှူဒါန်းခဲ့ကြပါတယ်။

ဒီနေ့အခမ်းအနားကို ဂရုဏာရှင်အမျိုးသမီးကွန်ရက်က ဦးဆောင်ကျင်းပခဲ့တာဖြစ်ပြီး ဘာသာကြီးလေးခု က ခေါင်းဆောင်တွေ တက်ရောက်ဆုတောင်းပေးခဲ့ကြပါတယ်။

RFA

ဝ ကိုယ်ပိုင်အုပ်ချုပ်ခွင့်ရဒေသ ပန်ဆန်းမြို့မှာကျင်းပမယ့် တိုင်းရင်းသား လက်နက်ကိုင်တပ်ဖွဲ့တွေရဲ့ ညီလာခံမှာ ကိုးကန့်ကိုယ်ပိုင်အုပ်ချုပ်ခွင့်ရဒေသမှာ ဖြစ်ပွားနေတဲ့ တိုက်ပွဲတွေရပ်တန့်ရေးအတွက် အသေးစိတ်ဆွေးနွေး ကြမယ်လို့ ညီလာခံကျင်းပရေးကော်မတီက ပြောပါတယ်။

လတ်တလောဖြစ်နေတဲ့ တိုက်ပွဲတွေ အမြန်ဆုံးရပ် စဲနိုင်ရေးနဲ့ ငြိမ်းချမ်းရေးကို နိုင်ငံရေးနည်းလမ်း နဲ့ ဆွေးနွေးနိုင်တဲ့အထိ အဓိကဆွေးနွေးကြမယ်လို့ ညီလာခံ ကျင်းပရေးကော်မတီ UWSA ရဲ့ ပြောခွင့်ရသူ ဦးအောင်မြင့်က ပြောပါတယ်။

"ကျနော်တို့အစည်းအဝေးရဲ့ရည်မှန်းချက်ကလည်း တစ်တိုင်းတစ်ပြည်လုံးရဲ့ ရေရှည်ငြိမ်း ချမ်းရေးပေါ့နော်၊ ထာဝရငြိမ်းချမ်းရေးအတွက်ကို ဦးတည် ပြီးတော့ ခေါ်ယူဆွေးနွေးကျမှာဖြစ်ပါတယ်၊ ဒါကြောင့်မို့လို့ ဖြစ်ပေါ်နေတဲ့ တိုက်ပွဲတွေ မြန်မြန်လေး ရပ်စဲနိုင်အောင် ဒီတွေ့ဆုံဆွေးနွေးရေးကနေတစ်ခါတည်း ငြိမ်းချမ်းရေးရရှိနိုင်အောင် ခြေလှမ်း လှမ်းနိုင်အောင် ဆွေးနွေးဖို့ရည်မှန်းချက်ထားရှိပါတယ်၊ ငြိမ်းချမ်းရေးမလိုချင်ဘူးဆိုတဲ့အဖွဲ့အစည်းကတော့ မရှိပါဘူး"

မေလ ၁ ရက်နေ့ကနေ ၃ ရက်ကြာကျင်းပမယ့် ပန်ဆန်းညီလာခံမှာ တိုင်းရင်းသား လက်နက်ကိုင်အဖွဲ့ ၁၂ ဖွဲ့ကို ဖိတ်ကြားထားပြီး အစိုးရနဲ့ တိုက်ပွဲတွေဖြစ် ပွားနေတဲ့ ကိုးကန့်လက်နက်ကိုင် MNDAA ၊ ရခိုင်တပ်မတော် AA နဲ့ တအာင်းပလောင် လွတ်မြောက်ရေးတပ်မတော် TNLA အဖွဲ့တို့လည်း တက်ရောက်မှာဖြစ်ပါတယ်။

လောက်ကိုင်ဒေသမှာ အစိုးရနဲ့ MNDAA ကိုးကန့်လက်နက်ကိုင်တပ်ဖွဲ့တို့ တိုက်ပွဲတွေဖြစ်ပွားနေတာ ၂ လကျော် ကြာနေပြီဖြစ်ပါတယ်။ ဒ့ါအပြင် ရခိုင်ပြည် နယ် ကျောက်တော်မြို့နယ်မှာလည်း ရခိုင်တပ်မတော် AA နဲ့ အစိုးရ တပ်မတော်တို့ တိုက်ပွဲတွေဖြစ်နေပါတယ်။

ပန်ဆန်းညီလာခံကို ဝ ပြည်သွေးစည်းညီညွတ်ရေးတပ်မတော် UWSA ၊ မိုင်းလားနဲ့ KIO ကချင်လွတ်မြောက်ရေး တပ်မတော်တို့က ဦးဆောင်ကျင်းပတာဖြစ်ပြီး တိုင်းရင်းသား လက်နက်ကိုင်အဖွဲ့၁၂ ဖွဲ့ တက်ရောက်မှာ ဖြစ်ပါတယ်။

RFA

လာမယ့် ၂ဝ၁၅ရွေးကောက်ပွဲအပြီး သမ္မတရွေးချယ်ရာမှာ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် ပါဝင်သင့်တယ်လို့ အမျိုးသားလွှတ်တော်ဥက္ကဌ ဦးခင်အောင်မြင့်က ပြောဆိုလိုက်တယ်လို့ Yonhap သတင်းဌာနက ဆိုပါတယ်။

"ကျနော့်ပုဂ္ဂလိကအမြင်အရ ခေါင်းဆောင်ရွေးချယ်ရာမှာ လူတိုင်းပါဝင်သင့်ပါတယ်။ ဒေါ်အောင်ဆန်းစုကြည်ဟာ တော်တဲ့သူတစ်ယောက်ဖြစ်ပြီး နိုင်ငံအတွင်းမှာလည်း နိုင်ငံရေးပုံရိပ်ရှိသူဖြစ်ပါတယ်။ ကျနော့်အနေနဲ့ တိုင်းပြည်ခေါင်းဆောင်အဖြစ် ရွေးချယ်ရာမှာ သူ့ကို ပါစေချင်ပါတယ်"လို့ တောင်ကိုရီးယား သတင်းဌာန Yonhap က ရေးသားခဲ့ပါတယ်။

နောက်ထပ် သမ္မတက ဘယ်သူပဲဖြစ်ဖြစ် တိုင်းပြည်ကောင်းဖို့အတွက် လုပ်ရမှာဖြစ်ပြီး ဒေါ်အောင်ဆန်းစုကြည်ကို သမ္မတအဖြစ် ရွေးချယ်ခံစေလိုတာက နိုင်ငံတော်အကျိုးစီးပွားအတွက်ဖြစ်ပြီး ပုဂ္ဂိုလ်ရေးကြောင့် မဟုတ်ပါဘူးလို့ ဦးခင်အောင်မြင့်ရဲ့ ပြောဆိုချက်ကို ဖော်ပြထားပါတယ်။

"ကျနော်တို့တွေဟာ ပြဿနာတစ်ခုကို ကြည့်မယ်ဆိုရင် တစ်ဦးတစ်ယောက်အမြင်ကနေ ချဉ်းကပ်တာထက် တစ်နိုင်ငံလုံးရဲ့ အမျိုးသားအကျိုးစီးပွားကနေ ချဉ်းကပ်ရမှာဖြစ်ပါတယ်"လို့ Yonhap သတင်းဌာနနဲ့တွေ့ဆုံပြီး ပြောဆိုခဲ့တယ်လို့ ဆိုပါတယ်။

ဖွဲ့စည်းပုံပြင်ဆင်ရေး ၆ပွင့်ဆိုင် ဆွေးနွေးပွဲမှာ ပါဝင်သူတစ်ဦးဖြစ်တဲ့ အမျိုးသားလွှတ်တော် ဥက္ကဌ ဦးခင်အောင်မြင့်ဟာ တောင်ကိုရီးယားနိုင်ငံ လွှတ်တော်ဥက္ကဌ Chung Eui-hwa နဲ့တွေ့ဆုံဖို့ ဆိုးလ်မြို့ကို ရောက်ရှိနေတာဖြစ်ပါတယ်။

"ဒီမိုကရေစီအသွင်ပြောင်းလဲရေးဖြစ်စဉ်မှာ နိုင်ငံရဲ့ကံကြမ္မာကို ဆုံးဖြတ်ရာမှာ တစ်ဦးတစ်ယောက်၊ ဒါမှမဟုတ် အခြားတစ်ယောက်အပေါ် အာရုံထားရတယ်ဆိုတာ မဖြစ်သင့်ဘူး"လို့ ဦးခင်အောင်မြင့်က ပြောဆိုခဲ့ပါတယ်။ အဲဒီ တစ်ဦးတစ်ယောက်ဆိုတာ ဘယ်သူဘယ်ဝါဖြစ်တယ်ဆိုတာကိုတော့ ထုတ်မပြောခဲ့ပါဘူး။

"လာမယ့် ရွေးကောက်ပွဲဟာ ကျနော်တို့ ဒီမိုကရေစီပြုပြင်ပြောင်းလဲရေးဖြစ်စဉ်မှာ ဒုတိယအကြိမ် ရွေးကောက်ပွဲဖြစ်ပြီး တိုင်းပြည်အတွက် အင်မတန်ကို အရေးကြီးပါတယ်။ ရွေးကောက်ပွဲနဲ့ ရွေးကောက်ပွဲလွန်ကာလတွေဟာ တည်ငြိမ်ဖို့ လိုပါတယ်။"လို့ ဦးခင်အောင်မြင့်က ဆိုပါတယ်။
.
Credit : Kamayut Media

လာမယ့်မေလ ၁ ရက်နေ့ကျရောက်မယ့် အပြည်ပြည် ဆိုင်ရာ အလုပ်သမားနေ့နဲ့ မေလ ၂ ရက်နေ့မှာ ကျရောက်မယ့် ကဆုန်လပြည့်နေ့တွေမှာ မြန်မာ-ယန်စီ၊ မြန်မာ-ဝမ်ပေါင် နဲ့ စီနိုဝမ် စတဲ့ တရုတ်ကြေးနီ ထုတ်လုပ်ရေးကုမ္ပဏီတွေမှာ အလုပ်လုပ်ကိုင်နေတဲ့ အလုပ်သမားစုစုပေါင်း ၁ သောင်းလောက် အလုပ်မဆင်း ဘဲ ဆန္ဒပြကြမယ်လို့ သိရပါတယ်။

အလုပ်သမားတွေတောင်းဆိုနေတဲ့ အနိမ့်ဆုံးလုပ်ခလစာ သတ်မှတ်ရေး အဆင်မပြေသေးတာကြောင့် ခုလိုဆန္ဒပြရ တာဖြစ်တယ်လို့ မြန်မာ-၀မ်ပေါင်ကုမ္ပဏီလက်အောက်ခံ စီနိုဝမ်းကုမ္ပဏီက ယန္တယားကြီးမောင်းလုပ်သား ဦးဌေးအောင် က ပြောပါတယ်။

"ကျနော်တို့က ယန်စီက ၆၀၀၀ လောက်ရှိတယ်၊ စီနိုဝမ်က ၂၀၀၀နဲ့ ဝမ်ပေါင်က ၄၀၀၀ ကျော်လောက်ရှိတယ်၊ တစ်သောင်းလောက် ပါ၊ ကျနော်တို့တောင်းဆိုထားတဲ့ လစာတိုးဖို့ရာခိုင်နှုန်း သတ်မှတ်ထားတဲ့ ရာခိုင်နှုန်းမရလို့ ကျနော် တို့တောင်းဆို ဆန္ဒပြတာပါ၊ ကျနော်တို့ တောင်းဆိုထားတာ မရမချင်း အများပြည်သူရုံးပိတ်ရက်တွေ မှာ တောင်းဆို ဆန္ဒပြသွားမှာဘဲ"

အဲဒီအလုပ်သမား ၁ သောင်းလောက်ဟာ သူတို့တောင်းဆိုထားတဲ့ လုပ်ခလစာ သတ်မှတ်ချက် မရမချင်း အချိန် ပိုကြေးနှစ်ဆရတဲ့ ရုံးပိတ်ရက်တိုင်း အလုပ်မဆင်းဘဲ ဆက်လက်ဆန္ဒပြသွားမယ်လို့ ပြောပါတယ်။

ဒီအတောအတွင်း မြန်မာနိုင်ငံအလုပ်သမားသမဂ္ဂများအဖွဲ့ချုပ်ကလည်း မေလ ၁ ရက်၊ အပြည်ပြည်ဆိုင်ရာ အလုပ် သမားနေ့အခမ်းအနားကို မန္တလေးမြို့မှာ ကျင်းပသွား မှာဖြစ်ပြီး၊ အခမ်းအနားအပြီးမှာ အလုပ်သမားနှီးနှောဖလှယ်ပွဲ တစ်ခု ဆက်လက်ကျင်းပမယ်လို့ သိရပါတယ်။

အဲဒီပွဲမှာ ပြည်နယ်နဲ့ တိုင်းအသီးသီးက အလုပ်သမားတွေရဲ့ ပြသနာတွေကို အဓိကထားဆွေးနွေးသွားမယ်လို့ မြန် မာနိုင်ငံအလုပ်သမားသမဂ္ဂများအဖွဲ့ချုပ် ဥက္ကဌ ဦးအောင်လင်း ကပြောပါတယ်။

"မနက်ပိုင်းမှာ လုပ်နေကျအတိုင်းဘဲ အခမ်းအနားဖွင့်လှစ်ပွဲလုပ်ပါမယ်၊ အခမ်းအနားဖွင့်လှစ်ပွဲလုပ်ပြီး ရင်တော့ အလုပ်သမားထု နှီးနောဖလှယ်ပွဲ လုပ်ပါမယ်၊ အလုပ်သမားတွေအသံကို နားထောင်ပါမယ် "

မေလ ၁ရက် မန္တလေးမြို့မှာကျင်းပမယ့် ကမ္ဘာ့အလုပ်သမားနေ့နဲ့ အလုပ်သမား နှီးနှောဖလှယ်ပွဲကို ရန်ကုန်တိုင်း၊ မန္တလေးတိုင်း၊ ပဲခူးတိုင်းနဲ့ ဧရာဝတီတိုင်းတို့က အလုပ်သမားသမဂ္ဂဝင် ၂၀၀၀ ကျော်တက်ရောက်မယ်လို့ သိရပါတယ်။

RFA



နီပေါနိုင်ငံမှာ ဧပြီ ၂၅ ရက်က လှုပ်ခတ်ခဲ့တဲ့ငလျင်ကြောင့် ဘေးဒုက္ခရောက်နေသူတွေ ရှိရာ အစွန်အဖျား ဒေသက ရွာတွေကို အကူအညီတွေ စတင်ရောက်ရှိနေပြီ ဖြစ်ပေမယ့် ဒေသအများအပြားမှာ သောက်သုံး ရေနဲ့ အစားအသောက်တွေ လိုအပ်နေဆဲ ဖြစ်ပါတယ်။

ခတ္တမန္ဒူ မြို့ ချိုင့်ဝှမ်းဒေသရှိ Dhading နဲ့ Gorkha ဒေသတွေကို ကူညီ ကယ်ဆယ်ရေး အထောက်အပံ့တွေ ရောက်ရှိနေပြီ ဖြစ်ပါတယ်။

ပြင်းအား 7.8-magnitude ရှိတဲ့ ငလျှင်ကြီးလှုပ်ခတ်ခဲ့တဲ့အတွက် သေဆုံးသူပေါင်း ၅ ထောင်ကျော် ရှိသွားပြီ ဖြစ်ပြီး နီပေါနိုင်ငံမှာ ၀မ်းနည်းပူဆွေးတဲ့အထိမ်းအမှတ်အဖြစ် ၃ ရက် ကြေညာထားပါတယ်။

နီပေါနိုင်ငံရှိ ခရိုင် ၃၉ ခုမှာ ထိခိုက်ပျက်စီးမှုနဲ့ ကြုံတွေ့နေရသူ အရေအတွက်ဟာ ၈ သန်းကျော် လိမ့်မယ်လို့ ခန့်မှန်းပြီး ထိခိုက်ဒဏ်ရာသူပေါင်း ၁ သောင်းကျော် ရှိတယ်လို့ ကုလသမ္မဂ ကပြောပါတယ်။

ငလျင်ဒဏ် အပြင်ထန်ဆုံးခံခဲ့ရတဲ့ Gorkha ဒေသမှာတော့ ဆာလောင်မွတ်သိပ်နေကြတဲ့ သူတွေဟာ ရောက်လာတဲ့ ကယ်ဆယ်ရေး ရဟတ်ယာဉ်တွေထံ အပြေးအလွှားသွားရောက်ပြီး သူတို့ကို သယ်ဆောင်ပေးဖို့ ပြောဆိုနေကြတယ်လို့ သိရပါတယ်။

BBC Burmese
https://www.facebook.com/bbcburmese


 ရှမ်းပြည်နယ်မြောက်ပိုင်း မူဆယ်ခရိုင် နမ့်ဖတ်ကာ – နမ့်ခမ်းသွားလမ်း ၁၂ မိုင်ကနေ မူဆယ်မြို့နယ် ရဲစခန်းမှာ ခေါ်ယူစစ်ဆေးခဲ့တဲ့ နိုင်ငံခြားသား ၂ ဦးကို ဒီကနေ့ ညနေ ၃ နာရီလောက်မှာ ပြန်လွှတ်ပေးလိုက်ပြီလို့ ပြည်နယ်ရဲတပ်ဖွဲ့က ပြောပါတယ်။

သူတို့ဟာ လက်နက်ကိုင်အဖွဲ့တွေ လှုပ်ရှားတဲ့ နယ်မြေထဲကို ၀င်ရောက်သွားတဲ့အတွက် လုံခြုံရေးအရ ခေါ်ယူစစ်ဆေးခဲ့တာလို့ ရှမ်းပြည်နယ်ရဲတပ်ဖွဲ့ ဒုပြည်နယ်ရဲမှူး အောင်မြတ်မိုးက ဒီဗွီဘီကို ပြောပါတယ်။

“လက်နက်ကိုင်သောင်းကျန်းသူတွေ လှုပ်ရှားတဲ့ နယ်မြေကိုရောက်သွားလို့ ပြည်သူ့စစ်အဖွဲ့ကနေ တွေ့ရှိခေါ်ဆောင်ခဲ့ပြီး ကျနော်တို့ လိုအပ်တဲ့စစ်ဆေးမှုတွေ လုပ်ပါတယ်။ အဲဒီနယ်မြေမှာ တိုက်ပွဲတွေလည်း မကြာခဏဖြစ်နေတယ်။ နှစ်ဘက်ပစ်ခတ်တဲ့ကြားထဲ ရောက်သွားရင် အသက် အန္တရာယ်ရှိမှာစိုးလို့လေ။ တခြားနိုင်ငံသားတွေ တစုံတခု ဒုက္ခရောက်မှာစိုးလို့ သူတို့ဘယ်တွေ သွားခဲ့သလဲ၊ ဘာတွေလုပ်ခဲ့သလဲ စိစစ်တဲ့သဘောပါ။ အမေရိကန်နိုင်ငံသားတယောက်နဲ့ သြစတြီးယားနိုင်ငံသားတယောက်ပေါ့။ သူတို့မှာ တရားဝင်ဗီဇာပါတယ်၊ ပတ်စပို့ပါတယ်။ အခုတော့ ပြန်လွှတ်ပေး လိုက်ပါတယ်။ လ၀ကကို လွှဲပေးလိုက်ပါတယ်။ လ၀က က လားရှိုးကို လိုက်ပို့တယ်။ ကားငှားပြီး လမ်းစရိတ်တွေ ဘာတွေပါ ထောက်ပံ့ပေးလိုက်ပါတယ်။”

ပြန်လွှတ်ပေးလိုက်တဲ့ နိုင်ငံခြားသား ၂ ဦးကတော့ အမေရိကန် နိုင်ငံသား Mr.Nazaryan Khachaturn နဲ့ သြစတြီးယားနိုင်ငံသား Mr. Christian Johnnex Viets တို့ဖြစ်ပြီး သတင်းစုဆောင်းကာ တခြားသတင်းဌာနကို ပေးပို့ရောင်းချနေသူတွေ ဖြစ်ကြောင်း၊ မြန်မာနိုင်ငံထဲကို ၂၀၁၃ ခုနှစ်ကတည်းက ရောက်ရှိကာ ထိုင်းနိုင်ငံမှာ ဗီဇာတိုးပြီး ၀င်ထွက်သွားလာနေတာလို့ ပြည်နယ်ရဲ အရာရှိက ပြောပါတယ်။

အဆိုပါ နိုင်ငံခြားသား ၂ ဦးဟာ သွားလာဖို့ မိုင်းညီလေး လို့ခေါ်တဲ့ ပလောင်လူငယ်တဦးရဲ့ ပါဂျရိုကားကို ငှားရမ်းခဲ့ကြောင်း၊ ကားပေါ်မှာ ကျည်ဆန် ၂၂ တောင့်နဲ့ စိတ်ကြွဆေးပြား ၄၀ ပြား တွေ့ရှိတဲ့အတွက် မိုင်းညီလေးကို မူးယစ်မှု၊ လက်နက်မှုနဲ့ အမှုဖွင့်ထားကြောင်း၊ သူဟာ တီအန်အယ်လ်အေ ပလောင်လက်နက်ကိုင်အဖွဲ့ဝင်လို့ သံသယရှိပြီး ဆက်လက်စစ်ဆေးနေကြောင်း၊ ဒါပေမယ့် မိုင်ညီလေးကတော့ ခုထိဝန်မခံသေးဘူးလို့ ဆိုပါတယ်။

နိုင်ငံခြားသားတွေအနေနဲ့ မူဆယ်ခရိုင်ထဲကို သွားလာခွင့်ရှိပေမယ့်လည်း အခုလို လက်နက်ကိုင်အဖွဲ့တွေရှိတဲ့နေရာ၊ တိုက်ပွဲဖြစ်တတ်တဲ့နေရာတွေကို ရှောင်ရှားသင့်ကြောင်း၊ မသွားမဖြစ် သွားလာမယ်ဆိုရင် ရဲစခန်းတွေ၊ ဒေသခံအာဏာပိုင်အဖွဲ့အစည်းတွေနဲ့ အရင် တွေ့ဆုံမေးမြန်းသင့်တယ်လို့ ပြည်နယ်ဒုရဲမှူးက ပြောပါတယ်။

ရန်ကုန်မှာရှိတဲ့ မြန်မာနိုင်ငံဆိုင်ရာ အမေရိကန်သံရုံးကတော့ ဖမ်းဆီးခံခဲ့ရသူတွေနဲ့ အဆက်အသွယ်ရပြီး လိုအပ်တဲ့ အကူအညီတွေပေးနေပြီလို့ ဒီဗွီဘီကို ပြောပါတယ်။

 By နန်းမြနဒီ (ဒီဗွီဘီ)
http://burmese.dvb.no

Author Name

Contact Form

Name

Email *

Message *

Powered by Blogger.