05/25/15


ကိုးကန့်တိုက်ပွဲတွေကြောင့် ဒီကနေ့မှာလည်း တရုတ်နိုင်ငံထဲကို မြန်မာအစိုးရတပ်ရဲ့ လက်နက်ကြီးကျည် ထပ်မံ ကျရောက်ခဲ့တာကြောင့် ယူနန်ပြည်နယ် နမ်ဆမ်မြို့နဲ့ မိန်းစိမ်မြို့တို့ဆက်သွယ်တဲ့လမ်းကို တရုတ်အာဏာပိုင်တွေက ယာယီပိတ်ထားကြောင်း ကိုးကန့်တပ်ဖွဲ့က ပြောပါတယ်။ မြန်မာအစိုးရ ဘက်က ကိုးကပ်တပ်ဖွဲ့နဲ့ဆွေးနွေးဖို့ သတင်းတွေထွက်ပေါ်နေပေမယ့် လက်တွေ့အခြေအနေတွေနဲ့ ကွာခြားမှုရှိနေကြောင်း ကိုးကန့်တပ်ဖွဲ့က ပြောပါတယ်။ ဆက်သွယ်စုံစမ်းထားတဲ့ ကိုဉာဏ်ဝင်းအောင်က တင်ပြထားပါတယ်။

မေလ ၂၀ ကနေ ၂၂ ရက်နေ့ထိ သုံးရက်ဆက်တိုက်ဖြစ်ပွားခဲ့တဲ့ ကိုးကန့်ဒေသတိုက်ပွဲတွေအတွင်း ၂၁ ရက်နေ့မှာ တိုက်ပွဲအပြင်းထန်ဆုံးလို့ ကိုးကန့် တပ်ဖွဲ့က ပြောပါတယ်။ မေ ၂၄ ရက် ဒီကနေ့မနက်ပိုင်းမှာ ဖြစ်ပွားခဲ့တဲ့တိုက်ပွဲမှာ အစိုးရတပ်က ပစ်လိုက်တဲ့ လက်နက်ကြီးကျည်ဟာ တရုတ်နိုင်ငံ ယူနန်ပြည်နယ်ဘက်က နယ်စပ်ရွာတခုကို ကျရောက်ခဲ့လို့ နမ်ဆမ်-မိန်းစိမ် ကားလမ်းကို ယာယီပိတ်ပိတ်ထားတယ်လို့ ကိုးကပ်တပ်ဖွဲ့ MNDAA ပြောခွင့်ရ ပုဂ္ဂိုလ် ဦးထွန်းမြတ်လင်းက VOA ကိုပြောပါတယ်။

“ကျနော်ကြားတာက လောက်ကိုင်ရဲ့အရှေ့တောင်ပေါ့နော၊ တုန်းချန်းဒေသမှာတိုက်ပွဲရှိလို့လည်း လက်နက်ကြီးကျတာနေမှာပေါ့ဗျာ။ မြန်မာ့တပ်မတော်က ပစ်လိုက်တဲ့ လက်နက်ကြီးက တရုတ်ပြည်ထဲ ပြန်ကျတယ်ပြောတယ်။ မူအားရွှေကျိုင်အဲမှာ ကျတယ်ပြောတယ်။ အဲဒါကြောင့်လူထိလားတော့ မပြောတတ်ဘူး။ ဒါပေမယ့် တရုတ်ပြည်ဘက်မှာ နန်ဆန်ကနေ မိန်းစိန်ကိုသွားတဲ့လမ်းကို ပိတ်ထားတယ်ပြောတယ်။ အဓိက-က ဒီဘက်ကလက်နက်ကြီး ဟိုဘက်ကိုကျတော့ သူတို့ကလည်း လမ်းသွားလမ်းလာကို ထိမိမှာစိုးလို့ထင်တယ်။ ပိတ်ထားတယ်ပြောတယ်။”

ပြီးခဲ့တဲ့ မတ်လကစလို့ ခုထိ တရုတ်နိုင်ငံထဲ မြန်မာဘက်က လက်နက်ကြီးကျည် အကြိမ်ကြိမ် ကျရောက်ခဲ့တာကို ကန့်ကွက်တဲ့အနေနဲ့ တရုတ် အစိုးရဘက်က သတိပေးတာတွေ ရှိခဲ့ပါတယ်။ ဒီလို တရုတ်နိုင်ငံထဲ လက်နက်ကြီးကျည်ကျတဲ့အပေါ် တရုတ်အစိုးရက မြန်မာအစိုးရအပေါ် နားလည်မှု ရှိတယ်လို့ သူယုံကြည်ကြောင်း ပြည်ခိုင်ဖြိုးပါတီ ကွမ်းလုံမြို့နယ် ပြည်သူ့လွှတ်တော် ကိုယ်စားလှယ် ကိုးကန့်လူမျိုး တဦးဖြစ်သူ ဦးဟော်ရှောက်ချမ်းက ခုလို ပြောပါတယ်။

“ဟောင်ကောင်က သတင်းထောက်က မေးလိုက်တယ်။ ဒီမြန်မာပြည်က လက်နက်ကြီးကျည်တွေပစ်ချတာ မင်းတို့က ဘယ်လိုသဘောထား ရှိသလဲလို့ မေးတာ၊ နိုင်ငံခြားဝန်ကြီးက ဖြေလိုက်တယ် .. ဘာဖြေလဲဆိုတော့ ဒါက သူတို့မြေထဲကို လုပ်တာမဟုတ်ဘူးဆိုတာ နားလည်မှုရှိတယ်လို့ နိုင်ငံခြားဝန်ကြီး ဌာနကိုယ်တိုင် ပြောတာ။”

မြန်မာအစိုးရရဲ့သတင်းထုတ်ပြန်ချက်တွေထဲမှာတော့ MNDAA အခြေကုတ်ယူထားတဲ့ ရှင်ခုတ်ထန်ဒေသ ၊ စီကော်လျံဒေသနဲ့ စန်တအိုက်ရှန် ကုန်းမြင့် ဒေသတွေကို မြန်မာအစိုးရက ထိုးစစ်ဆင်ခဲ့ပြီး မာလုရွှေဒေသအတွင်း မေလ ၁၁ ရက်နဲ့ ၁၂ ရက်တွေမှာ တောင်ကုန်းအမှတ် ၁၆၀၇၊ ၁၇၀၉ နဲ့ ၁၇၄၂ တောင်ကုန်းတွေကို မြန်မာ့တပ်မတော်က သိမ်းဆည်းနိုင်ခဲ့တယ်လို့ ဆိုပါတယ်။ ဒီလို တောင်ကုန်းတွေကို သိမ်းဆည်းနေတယ်လို့ မြန်မာအစိုးရက ပြောနေပေမယ့် တကယ်တော့ သူတို့အနေနဲ့ စစ်ရေးအရ နေရာပြောင်းနေခြင်းသာ ဖြစ်တယ်လို့ ဦးထွန်းမြတ်လင်းက တုံ့ပြန်ပါတယ်။

“ကျနော့အမြင်ကတော့ တောက်လျှောက် ကုန်းတွေ ဒီကုန်းတွေဆိုတာက စခန်းကုန်းတွေ များပါတယ်။ အပြောင်းအရွှေ့လည်း လုပ်တာရှိပါတယ်။ အဲဒီတော့ သူတို့ အမြဲတန်း ထုတ်ဖော်ပြောနေတဲ့သတင်းကတော့ သူတို့ သိမ်းပိုက်ရရှိတယ်။ သိမ်းပိုက်ရရှိတယ်။ … ဒါပေမယ့် ကျနော် နည်းနည်း လေ့လာကြည့်လိုက်တော့ အဲဒီမှာလည်း ဆက်တိုက်ပဲ တိုက်ပွဲတွေက ဖြစ်နေတုန်းပါပဲ။ တချို့နေရာတွေကျတော့ ကျနော်တို့က strategy အရ ပြောင်းရွှေ့မှုလုပ်တာတော့ ရှိခဲ့ပါတယ်။ အဲဒါကိုလည်း သူတို့က သိမ်းပိုက်ရရှိခဲ့တယ်လို့ ပြောပါတယ်ခင်ဗျ။”

စစ်ပွဲတွေ ဆက်တိုက်ဆိုသလို ဖြစ်ပွားနေချိန်မှာ မြန်မာအစိုးရကတော့ ကိုးကန့်တပ်ဖွဲ့နဲ့ ငြိမ်းချမ်းရေးဆွေးနွေးဖို့ သတင်းထွက်ပေါ်လာပေမယ်လည်း ကိုးကန့်တပ်ဖွဲ့က လက်တွေ့ရင်ဆိုင်နေရတဲ့ အခြေနေဟာ ကွာခြားမှုရှိနေတယ်လို့ ဦးထွန်းမြတ်လင်းက ပြောပါတယ်။

“တောက်လျှေက်ကတော့ ငြိမ်းချမ်းတဲ့နည်းလမ်းနဲ့ပဲ သွားချင်ပါတယ်။ ဒါပေမယ့် ကျနော် တလောက ပြန်ကြားတာကတော့ သမ္မတက ပြောတာကတော့ ဒီ ဆွေးနွေးဖို့နည်းလမ်း ရှိနေတယ်လို့တော့ ကျနော် ကြားပါတယ်။ ဒါပေမယ့် မြေပြင်မှာဖြစ်နေတဲ့ အခြေအနေနဲ့ သူတို့ဘက်က ပြောတဲ့ပုံစံနဲ့ကျတော့ တော်တော် ကွဲလွဲမှုရှိပါတယ်။”

ဦးထွန်းမြတ်လင်း ပြောသွားခဲ့တာပါ။ ဒီအတိုင်းသာ ကိုးကန့်ဒေသမှာ စစ်ပွဲတွေ ဆက်ဖြစ်နေမယ်ဆိုရင် ၂၀၁၅ ရွေးကောက်ပွဲနဲ့ပတ်သက်လို့ ကိုးကန့်ဒေသ ရွေးကောက်ပွဲကို ထိခိုက်မှုရှိလာနိုင်ကြောင်း သူက သုံးသပ်ပြောဆိုပါတယ်။

ကိုဉာဏ်ဝင်းအောင်
VOA
http://burmese.voanews.com/content/kokang-fighting-/2788675.html

 anp-305.jpg
 ရခိုင်ပြည်နယ်၊ စစ်တွေမြို့က ရခိုင်အမျိုးသားပါတီ ANP ဌာနချုပ်ကို တွေ့ရစဉ်
 Photo: Min Thein Aung/RFA
ရခိုင်အမျိုးသားပါတီကနေ ၂၀၁၅ ရွေးကောက်ပွဲမှာ ၀င်ရောက်ယှဉ်ပြိုင်မယ့် ကိုယ်စားလှယ်လောင်း အရေ အတွက်များနေတာကြောင့် ပါတီဗဟိုကော်မတီကနေ ဆုံးဖြတ်ချက် မပေးနိုင်ဘဲ မြို့နယ်အလိုက် မဲစနစ်နဲ့ စတင်ရွေးချယ်နေပါတယ်။

ရသေ့တောင်မြို့နယ်မှာ ကိုယ်စားလှယ်ရွေးချယ်ပွဲကို ဒီကနေ့ မဲပေးစနစ်နဲ့ ကျင်းပခဲ့တာ ဖြစ်ကြောင်း ရခိုင် အမျိုးသားပါတီက ရွေးကောက်ပွဲ ကြီးကြပ်ရေးကော်မ တီအဖွဲ့ဝင် ဦးအောင်ဝင်း က ပြောပါတယ်။

"ကိုယ်စားလှယ်လောင်းတွေကတော့ တော်တော်များ များရှိတယ်၊ တချို့မြို့နယ်တွေ မှာဆိုရင် တစ်နေရာထဲ မှာ ၄၊ ၅ ယောက်ရှိတယ်၊ လွှတ်တော်ကိုယ်စား လှယ်လောင်းတွေက အဲ့လိုယှဉ်ပြိုင်ကြတဲ့အခါမှာ စိတ် ဝင်စားမှုရှိတယ်၊ ၂၀၁၀ တုန်းကဆို ရင် ရွေးကောက်ပွဲဝင်ဖို့ လွှတ်တော်ကိုယ်စားလှယ်လောင်းရှာရတာ သိပ်အခက်အခဲရှိတယ်၊ တက်တက်ကြွကြွ နဲ့ပါဘဲ၊ အကုန်လုံးက ဝိုင်းဝန်းပြီးတော့ ယှဉ်ပြိုင်လာတဲ့အတွက်ကြောင့် ဦးတို့က ဝမ်းသာရတာပါ"

ရသေ့တောင်မဲဆန္ဒနယ်မြေကနေ ပြည်နယ်လွှတ်တော်ကိုယ်စားလှယ်၊ အမျိုးသား လွှတ်တော်ကိုယ်စားလှယ် နဲ့ ပြည်သူ့လွှတ်တော်ကိုယ်စားလှယ်အဖြစ် ဝင်ရောက် ယှဉ်ပြိုင်ဖို့ လျှောက်လွှာတင်သူ ၁၁ ဦး ရှိခဲ့ပြီး အဲဒီထဲက ၄ ဦးကို မဲစနစ်နဲ့ ရွေးချယ်ခဲ့တာဖြစ်ပါတယ်။

ပြည့်သူ့လွှတ်တော်ကိုယ်စားလှယ် ဒေါ်ခင်စောဝေ ၊ အမျိုးသားလွှတ်တော် ကိုယ်စားလှယ် ဦးခင်မောင်လတ်၊ ပြည် နယ်လွှတ်တော်ကိုယ်စားလှယ်တွေအဖြစ် ဦးသန်းနိုင်နဲ့ ဦးဖိုးဝင်း တို့ကမဲအများဆုံးရခဲ့ပါတယ်။

ကျန်တဲ့ မြို့နယ်တွေဖြစ်တဲ့ စစ်တွေ၊ ကျောက်တော်၊ မြောက်ဦး၊ မင်းပြား၊ မြေပုံ အစရှိတဲ့ မဲဆန္ဒနယ်မြေတွေအပြင် ရန်ကုန်နဲ့ ဧရာဝတီတိုင်းဒေသကြီးတွေမှာလည်း လွှတ်တော်ကိုယ်စားလှယ်လောင်း ရွေးချယ်ပွဲတွေကို ပြုလုပ်သွားဖို့ ရှိတယ်လို့ သိရပါတယ်။

RFA
http://www.rfa.org/burmese/news/anp-candidates-choose-vote-05242015100316.html



ဖွံ့ဖြိုးတိုးတက်မှု နောက်ကျပြီး လမ်းပမ်းဆက်သွယ်ရေးနဲ့ ဘာသာစကား အခက်အခဲရှိတဲ့ ချင်းပြည်နယ်ထဲမှာ တီးတိန်စာပေနဲ့ သတင်းစာ ထုတ်ဝေခွင့်မပြုတာဟာ ချင်းပြည်နယ် အစိုးရဘက်က တိုင်းရင်းသားစာပေ အခွင့်အရေးကို ချိုးဖောက်ပြီး သတင်းလွတ်လပ်ခွင့်ကို ပိတ်ပင် တာဖြစ်တယ်လို့ ချင်းမီဒီယာသမားတွေက ပြောဆိုလိုက်ပါတယ်။ ၂၀၁၅ ရွေးကောက်ပွဲ နီးကပ်လာချိန် မဲဆန္ဒရှင်ချင်းပြည်သူတွေအတွက် ရွေးကောက်ပွဲဆိုင်ရာ ပညာပေးဆောင်ရွက်မှု သတင်းအချက်အလက်တွေကို အချိန်နဲ့တပြေးညီ သိရှိနိုင်ရေး ချင်းပြည်နယ်အတွင်း သတင်းမီဒီယာတွေရဲ့ကြိုးပမ်းနေမှုကိုလည်း အဟန့်အတားဖြစ်စေတယ်လို့ ပြောပါတယ်။ အပြည့်အစုံကို မဆုမွန်က စုစည်းတင်ပြပေးထားပါတယ်။

ဘာသာစကားမျိုးခွဲ များစွာရှိနေတဲ့ ချင်းပြည်နယ်တွင်း တိုင်းရင်းသားမျိုးနွယ်စုကြား စိတ်ဝမ်းကွဲမှုဖြစ်စေတယ်ဆိုတဲ့အကြောင်းပြချက်နဲ့ တီးတိန် (ZOLAI) ဘာသာစကားနဲ့ သတင်းစာ ထုတ်ဝေခွင့်မပြုတာဟာ သတင်းမီဒီယာ လွတ်လပ်ခွင့်ကို ချိုးဖောက်တာပဲဖြစ်တယ်လို့ ချင်းသတင်းသမားတွေ စုဖွဲ့ထားတဲ့ ချင်းမီဒီယာကွန်ယက် ပညာပေးဒါရိုက်တာ ဆလိုင်းမန်ဟရဲလျန်က က ပြောဆိုလိုက်ပါတယ်။

“ချင်းပြည်နယ်မှာ လူမျိုးအရတော့ ကျနော်တို့က တော်တော်ကွဲပြားတာပေါ့နော်၊ ဆိုတော့ - မြို့နယ် တမြို့နယ်နဲ့တမြို့နယ် ဘာသာစကား နားလည်မှုဆိုတာ ကျနော်တို့ လမ်းပန်းဆက်သွယ်ရေးကြောင့်ပဲဖြစ်ဖြစ်၊ ကျနော်တို့ရဲ့ တိုင်းရင်းသားဘာသာစာပေနဲ့ သင်ကြားခွင့်မရှိတဲ့ အခါကျတော့ ကိုယ့်မျိုးနွယ်စကားကိုပဲ ပိုပြီး နားလည်မှုရှိကြတယ်။ သူတို့မျိုးနွယ်စာပေနဲ့ သတင်းတွေမရှိဘူး၊ စာပေတွေ မရှိဘူးဆိုရင် အဲဒီမျိုးနွယ်စုတွေက သတင်းတွေ မရနိုင်တော့ဘူး။ ချင်းပြည်နယ် network အနေနဲ့ကတော့ မျိုးနွယ်စုတိုင်းရဲ့ဘာသာစာပေတွေကို အစိုးရအနေနဲ့ ခွင့်ပြုသင့်တယ်၊ လုပ်ဆောင်ပေးသင့်တယ်။ ချင်းလူထုတွေထဲ စိတ်ဝမ်းကွဲပြားမယ်ဆိုတဲ့ သူတို့ရဲ့အကြောင်းပြချက်ကို ကျနော်တို့အနေနဲ့ နားမလည်နိုင်ဘူး။ ပြည့်စုံတဲ့အကြောင်းပြချက်လို့ ကျနော်တို့က မမြင်ဘူးပေါ့။”

မြန်မာနိုင်ငံမှာ လက်ရှိပြဋ္ဌာန်းကျင့်သုံးနေတဲ့ ၂၀၀၈ အခြေခံဥပဒေပါ နိုင်ငံသားတိုင်း မိမိရဲ့စာပေ၊ ယဉ်ကျေးမှု၊ ဓလေ့ထုံးတမ်း အခွင့်အရေးကို လွတ်လပ်စွာ ပျိုးထောင်ခွင့်ဆိုင်ရာ အခွင့်အရေးရှိတယ်တဲ့အတွက် အစိုးရအနေနဲ့ တိုင်းရင်းသားတွေရဲ့ စာပေ၊ ယဉ်ကျေးမှုကို ကန့်သတ် ချုပ်ချယ်မှုမပြုဘဲ တိုင်းရင်းသားဘာသာ၊ စာပေအဆင့်အတန်းကို တန်ဖိုးထား မြှင့်တင်အားပေးဆောင်ရွက်မှု လုပ်သင့်ပါတယ်လို့ ချင်းမီဒီယာ ကွန်ယက်က ပြောပါတယ်။

“ပုဒ်မ ၃၆၅ မှာ မြန်မာပြည်မှာရှိတဲ့ တိုင်းရင်းသားဘာသာစကားတွေကို ပြည်ထောင်စုအစိုးရ၊ ပြည်နယ်အစိုးရတွေအနေနဲ့ ဖွံ့ဖြိုး တိုးတက်အောင် လုပ်ပေးမယ်၊ ဆောင်ရွက်ပေးမယ်၊ ကူညီပေးမယ်ဆိုတာ ပါတာပေါ့နော်။ ဒါပေမယ့် အကူအညီမပေးရုံသာမဟုတ်ဘဲနဲ့ ပိတ်လည်းပိတ်တယ်၊ ...က လုပ်တာ အခု တရားဝင်မှတ်ပုံတင်တာလည်း ခွင့်မပြုဘူးဆိုတာတော့ ဖွဲ့စည်းပုံအခြေခံဥပဒေနဲ့လည်း ဆန့်ကျင်တယ်၊ ပြီးတော့ လွတ်လပ်စွာ ထုတ်ဖော်ပြောဆိုခွင့်တွေ၊ သတင်းမီဒီယာလွတ်လပ်ခွင့်တွေကိုလည်း သူတို့အနေနဲ့ ကန့်သတ်တာ ဖြစ်တယ်၊ ချိုးဖောက်တာဖြစ်တယ်လို့ ကျနော်တို့အနေနဲ့ မြင်တယ်။”

ချင်းပြည်နယ် အစိုးရအနေနဲ့ ၂၀၁၅ ရွေးကောက်ပွဲကာလမတိုင်မီ ၂၀၁၅ ကာလအတွင်းနဲ့ ရွေးကောက်ပွဲကာလအလွန်တွေမှာ ရွေးကောက်ပွဲ ဆိုင်ရာ သတင်းအချက်အလက်တွေ ချင်းပြည်သူတွေအချိန်နဲ့တပြေးညီ သိရှိနိုင်ဖို့ ချင်းမီဒီယာတွေနဲ့ ပူးပေါင်း လုပ်ဆောင်သင့်ပါကြောင်း လည်း ချင်းသတင်းသမားတွေဘက်က အကြံပြုပါတယ်။

“မျိုးနွယ်စာပေနဲ့ထုတ်ဝေတဲ့ မီဒီယာတိုင်းမှာ ဘယ်လိုမဲပေးရမလဲ၊ ဘယ်လို မဲ ထည့်ရမလဲဆိုတာတွေကို ပညာပေးတွေကို ထည့်ပေးပါလို့လည်း …. ကော်မရှင်က ပြောတာရှိတယ်။ အများအားဖြင့် ချင်းပြည်နယ်မှာ ဗမာစကား နားမလည်ကြဘူး။ ရွာတွေမှာလည်း နယ်ဘက်မှာဆိုရင်တော့- သူတို့အနေနဲ့ မဲပေးနိုင်တာလည်း သူတို့မသိဘူး၊ ဘယ်လို မဲပေးခွင့်ရှိလဲ သိနိုင်ဖို့အတွက်တော့ မီဒီယာ အဓိက အရေးကြီးတာပေါ့။ ..ဆိုတော့ အဲလို မီဒီယာတွေကို ထုတ်ဝေခွင့်မပေးဘူးဆိုရင်တော့ ချင်းပြည်သူလူထုတွေအနေနဲ့ တော်တော်လေးကို ဒုက္ခရောက်မယ်၊ တော်တော်လေးကို ….တဲ့နေရာမှာ အခက်အခဲကြုံမယ်လို့ ယူဆတယ်။”

တီးတိန်ဘာသာစကားကို သုံးစွဲနေတဲ့ ချင်းတိုင်းရင်းသားတွေ အများအပြားရှိနေတဲ့ ချင်းပြည်နယ်ထဲမှာ အခုလို တီးတိန်စာပေ ထုတ်ဝေတဲ့ အတွက် လူမျိုးနွယ်စုကြား စိတ်ဝမ်းကွဲမှုဖြစ်စေပါတယ်ဆိုတဲ့ ပြည်နယ်အစိုးရရဲ့ အကြောင်းပြချက်ဟာ လက်ခံနိုင်စရာမရှိဘူးလို့ ချင်း တိုင်းရင်းသူ သတင်းထောက်မအိမ့်ခိုင်ဦးက ဆိုပါတယ်။

“ကိုယ့်မျိုးနွယ်စုဘာသာနဲ့ကိုယ်ထုတ်ထားခြင်းအားဖြင့် ကိုယ့်မျိုးနွယ်စုကို ပြန်ပြီး Information ပေးတာပဲ၊ သတင်းသမားရဲ့သဘောအရရော၊ ကိုယ့်လူထုပေါ့၊ ကိုယ့်ပရိသတ်ပေါ့။ ကိုယ့်ပရိသတ်ကိုယ်ရှာပြီးပေးရမှာပဲလေ။ ကိုယ့်ပရိသတ်က တီးတိန်လူထုဆိုရင် တီးတိန်လူထုဆီတော့ ရောက်အောင်ပေးရမှာပဲ၊ ကိုယ့်အချင်းချင်းထဲမှာ သတင်းမီဒီယာ ပြန့်နှံ့ချင်တယ်ဆိုတာလေး တခုတည်းပဲ ကျနော်တို့ပြည်နယ်အတွက်က ဒါ အင်အားတခုဖြစ်တယ်။ စိတ်ဝမ်းကွဲစရာလည်း အကြောင်းမရှိဘူး။ ဒါက သိပ်ပြီးအဓိပ္ပာယ်မရှိတဲ့ reason လို့ပဲ မြင်တယ်ပေါ့နော်၊ ဘာမှ အခြေအမြစ် သိပ်မရှိဘူး။ ပိတ်ခိုင်းတယ်ဆိုတာက ဘာသာစကားကိုလည်း ပိုပြီး ပိတ်လိုက်သလိုဖြစ်တယ်။ မီဒီယာကိုလည်း ကန့်သတ်လိုက်သလို ရှိတယ်လို့ ကျနော်ကမြင်တယ်။”

ပြီးခဲ့တဲ့ မေလ (၁၉) ရက်နေ့ ကကျင်းပတဲ့ အမျိုးသားလွှတ်တော်မှာ ချင်းပြည်နယ် မဲဆန္ဒနယ်က လွှတ်တော်ကိုယ်စားလှယ် ဦးနိန်း ခမ်း ပေါင်က ချင်းတိုင်းရင်းသား တီးတိန်လူမျိုးနွယ်စု (ZOLAI) စာပေနဲ့ သတင်းစာ ထုတ်ဝေခွင့် ပြုမပြုဆိုတဲ့ မေးခွန်းအပေါ် ချင်းပြည်နယ် အစိုးရရဲ့ အကြံပြုချက်အရဆိုပြီး ပြန်ကြားရေးဝန်ကြီးဌာန၊ ဒုတိယဝန်ကြီးဦးပိုက်ထွေးက တိုင်းရင်းသားမျိုးနွယ်စုများကြား စိတ်ဝမ်းကွဲမှု ဖြစ်ပေါ်လာနိုင်တယ်ဆိုတဲ့ အကြောင်းပြချက်နဲ့ ထုတ်ဝေခွင့်မပေးတဲ့အပေါ် ချင်းသတင်းသမားတွေစုဖွဲ့ထားတဲ့ ချင်းမီဒီယာကွန်ယက်က အပြင်းအထန် ကန့်ကွက်ရှုတ်ချကြောင်း သဘောထားထုတ်ပြန်လိုက်တာဖြစ်ါပတယ်။

VOA
http://burmese.voanews.com/content/chin-media-group-demands-not-to-restrict-on-ethnic-media-and-literature-/2787691.html

တနိုင်ငံလုံးအပစ်ခတ်ရပ်စဲရေးလက်မှတ်ရေးထိုးပွဲမှာ ကိုးကန့်၊ ပလောင် နဲ့ ရခိုင့်တပ်မတော် အဖွဲ့တွေကို ချန်ထားခဲ့မယ်ဆိုရင် မိမိတို့အနေနဲ့ NCCT ခေါ် တစ်နိုင်ငံလုံးအပစ်အခတ်ရပ်စဲရေးဆိုင်ရာ ညှိုနှိုင်းရေးအဖွဲ့ကနေ နှုတ်ထွက်ဖို့အထိ ဆွေးနွေးသွားမယ်လို့ TNLA ပလောင်လွတ်မြောက်ရေးအဖွဲ့က ပြောပါတယ်။

တိုင်းရင်းသားလက်နက်ကိုင်အဖွဲ့အားလုံး မပါဝင်ဘဲ ချန်ထားခဲ့မယ်ဆိုပြီး ပြည်ထောင်စု ၀န်ကြီး ဦးအောင်မင်းက ပြောထားတဲ့အတွက် KNU ကရင်အမျိုးသား အစည်းအရုံး ထိမ်းချုပ်နယ်မြေ လောခီးလာညီလာခံမှာ ဆွေးနွေးသွားမယ်လို့ ပလောင်ပြည်နယ် လွတ်မြောက်ရေးတပ်ဦး အထွေထွေအတွင်းရေးမှုး ဗိုလ်မှူးကြီး တာဖုန်းကျော် က ပြောပါတယ်။

"မြန်မာအစိုးရဘက်က ဦးအောင်မင်းတို့၊ သမ္မတဦးသိန်းစိန်တို့ပြောနေတဲ့ အခုရှိတဲ့ တပ်ဖွဲ့တွေနဲ့ လက်မှတ်ထိုးသွားမယ်၊ ကျန်တဲ့ဟာက နောက်မှထားမယ်ဆိုတဲ့ ပုံစံမျိုး၊ ဒါကကျန်တဲ့အဖွဲ့တွေကို ခွဲခြားဆက်ဆံတဲ့ သဘောရှိတယ်၊ ဒါက ကျနော်တို့ကြားထဲမှာ တော်တော်လေးကို ဆွေးနွေးရမယ့် သဘောရှိတယ်၊ ဒီလိုတိုက်ပွဲ တအားပြင်းနေတဲ့ အချိန်မှာ ကျန်တဲ့အဖွဲ့တွေက အပစ်အခတ်ရပ်စဲရေး လက်မှတ်ထိုးနိုင်မလား၊ တစ်ပြည် လုံးအတိုင်းအတာ အပစ်အခတ်ရပ်စဲရေး ရှေ့ဆက် သွားနိုင်မလားဆိုတာ ကျနော်တို့ အဲ့ဒီမှာ အသေအချာဆွေးနွေးဖို့လိုတယ်"

အစိုးရက တစ်နိုင်ငံလုံးအပစ်အခတ်ရပ်စဲရေးစာချုပ် ချုပ်ဆိုတဲ့အခါ လက်ရှိ တိုက်ပွဲတွေဖြစ်ပွားနေတဲ့ NNCT အဖွဲ့ဝင် MNDAA ကိုးကန့်တပ်ဖွဲ့ ၊ AA ရက္ခိုင့် တပ်မတော်နဲ့ TNLA တအာင်းတပ်ဖွဲ့တွေကို ချန်ထားပြီး နောက်မှ ဆက်လက် ဆွေးနွေးမယ်လို့ ပြောထားတာ ဖြစ်ပါတယ်။

KNU ထိန်းချုပ်နယ်မြေ လော်ခီးလာမှာ လာမယ့် ဇွန်လ ၂ ရက်နေ့ကနေ ၆ ရက်နေ့အထိ ငါး ရက်ကြာကျင်းမယ့် တိုင်းရင်းသားလက်နက်ကိုင်အဖွဲ့ တွေ ရဲ့ညီလာခံကို MNDAA ကိုးကန့်တပ်ဖွဲ့ ၊ AA ရက္ခိုင့်တပ်မတော်နဲ့ TNLA တအာင်းတပ်ဖွဲ့တို့ပါ တက်ရောက်သွားမှာဖြစ်ပါတယ်။

အဲဒီညီလာခံဟာ အစိုးရနဲ့ သဘာတူထားတဲ့ တစ်နိုင်ငံလုံးအပစ်အခတ်ရပ်စဲရေး စာချုပ်မူကြမ်း NCA အပေါ် တိုင်းရင်းသားလက်နက်ကိုင် အဖွဲ့ခေါင်းဆောင်တွေ ရဲ့ အတည်ပြုချက်ကို ရယူသွားမှာ ဖြစ်ပါတယ်။

ပြီးခဲ့တဲ့ မေလဆန်းပိုင်းက '၀' ကိုယ်ပိုင်အုပ်ချုပ်ခွင့်ရတိုင်း ပန်ဆန်းမြို့မှာ ကျင်းပတဲ့ တိုင်းရင်းသားလက်နက်ကိုင်အဖွဲ့တွေရဲ့ညီလာခံမှာ တစ်နိုင်ငံလုံးအပစ်အခတ် ရပ်စဲရေး လက်မှတ်ရေးထိုးတဲ့အခါ တိုင်းရင်းသားလက်နက်ကိုင်အဖွဲ့တွေ အားလုံးပါဝင်ဖို့ ၊ ၂၀၀၈ ဖွဲ့စည်းပုံအခြေခံဥပဒေကို ပြင်ဆင်ဖို့စတဲ့ သဘောတူညီ ချက်တွေကို ထုတ်ပြန်ခဲ့ ပါတယ်။

RFA

Author Name

Contact Form

Name

Email *

Message *

Powered by Blogger.