08/17/15


လူ​စည်​ကား​ရာ ​ဧ​ရာ​ဝဏ် ​ဘု​ရား​အ​နီး​မှာ ​ဗုံး​ကွဲ​ခဲ့။ 
 ​ထိုင်း​နိုင်​ငံ ​ဘန်​ကောက် ​မြို့​လယ်​က ​ဧ​ရာ​ဝဏ် ​လေး​မျက်​နှာ ​ဘု​ရား ​အ​နီး​မှာ ​ဒီ​က​နေ့ ​တ​န​င်္လာ​နေ့ ​ဒေ​သ​အ​ချိန် ​ည ၇ ​နာ​ရီ​ခန့်​က ​အင်​အား​ပြင်း ​ဗုံး​တစ်​လုံး ​ပေါက်​ကွဲ ​ခဲ့​တယ်​လို့ ​ထိုင်း ​ရဲ​တပ်​ဖွဲ့​က ​ပြော​ပါ​တယ်။

ဗုံး​ပေါက်​ကွဲ​မှု​ကြောင့် ​အ​နည်း​ဆုံး ​လူ ၁၅ ​ယောက် ​သေ​ဆုံး​ခဲ့​ပြီး ၂၀ ​ကျော် ​ရ​ခဲ့​တယ်​လို့ ​ဒေ​သ​တွင်း ​သ​တင်း​တွေ​က ​ပြော​ပါ​တယ်။

ဗုံး​ပေါက်​ကွဲ​ရာ ​နေ​ရာ​တ​ဝိုက်​မှာ ​အ​ပျက်​အ​စီး​တွေ​နဲ့ ​ခ​န္ဓာ​ကိုယ် ​အ​စိတ်​အ​ပိုင်း​တွေ ​ပြန့်​ကျဲ​နေ​တယ်​လို့ ​အ​ခင်း​ဖြစ်​ရာ​ကို ​ရောက်​ရှိ​နေ​တဲ့ ​ဘီ​ဘီ​စီ ​သ​တင်း​ထောက် ​ဂျွန်​န​သန် ​ဟက်ဒ်​က ​ဆို​ပါ​တယ်။

လူ​စည်​ကား​တဲ့ ​ဧ​ရာ​ဝဏ် ​ဘု​ရား​အ​နီး ​တ​ဝိုက်​မှာ ​ရှိ​တဲ့ ​လူ​တွေ​ဟာ ​ဗုံး​ပေါက်​တဲ့ ​စက်​ကွင်း​ထဲ​မှာ ​ရှိ​နေ​ခဲ့​တယ်​လို့ ​သူ​က ​ပြော​ပါ​တယ်။

မော်​တော် ​ဆိုင်​ကယ်​မှာ ​ထောင်​ထား​တဲ့ ​ဗုံး ​ဖြစ်​နိုင်​တယ်​လို့ ​ဆို​ပြီး၊ ​ဘယ်​သူ ​ဘယ်​ဝါ​ရဲ့ ​လက်​ချက် ​ဖြစ်​တယ် ​ဆို​တာ​ကို ​မ​သိ​ရ​သေး​ပါ​ဘူး။

တ​ချို့ ​သ​တင်း​တွေ ​အ​ရ ​သေ​ဆုံး ​ဒဏ်​ရာ​ရ​သူ ​တွေ​ထဲ​မှာ ​နိုင်​ငံ​ခြား​သား ​ခ​ရီး​သည်​တွေ ​ပါ​ဝင်​နိုင်​တယ်​လို့ ​ဆို​ပါ​တယ်။

BBC Burmese
http://www.bbc.com/burmese


  ပြည်သူ့လွှတ်တော် ဥက္ကဌ သူရဦးရွှေမန်းကို ပြည်ခိုင်ဖြိုးပါတီ ပူးတွဲဥက္ကဌတာဝန်ကနေ ဖယ်ရှားလိုက်တဲ့အတွက် အရင်က တပ်မတော်နဲ့ ပြည်ခိုင်ဖြိုးပါတီအကြား ဝေးနေတာကနေ အခု ပိုနီးစပ်သွားစေတယ်လို့ ပြည်ခိုင်ဖြိုးပါတီ ဗဟိုကော်မတီဝင် ၊ အမျိုးသားလွှတ်တော် ကိုယ်စားလှယ် ဦးလှဆွေက ပြောပါတယ်။

ဒီကနေ့ နေပြည်တော် ပြည်ခိုင်ဖြိုးပါတီဌာနချုပ်မှာ အသစ်ဖွဲ့စည်းလိုက်တဲ့ ပါတီဗဟိုအလုပ်အမှုဆောင် ကော်မတီဝင်တွေနဲ့ ပါတီက လွှတ်တော်ကိုယ်စားလှယ်တွေ တွေ့ဆုံဆွေးနွေးခဲ့ကြပါတယ်။

ဒီကနေ့ အစည်းအဝေးနဲ့ ဆက်စပ်ပြီး သူရဦးရွှေမန်းကို ဖယ်ရှားလိုက်တာနဲ့ ပတ်သက်ပြီး မေးမြန်းရာမှာ ဦးလှဆွေက သူရဦးရွှေမန်းကို ပါတီတာဝန်ကနေ ဖယ်ရှားလိုက်တာဟာ ဖြစ်သင့်ကြောင်း အခုလို ပြောပါတယ်။

"အခုလို ဒုတိယဥက္ကဌ နောက်တစ်ယောက်ကို ထပ်ပြီးတော့ တာဝန်ပေးအပ်လိုက်တာဟာ တပ်မတော်နဲ့ ကြံ့ခိုင်ရေးပါတီနဲ့ဟာ ပိုနီးစပ်သွားစေတဲ့ အခြေအနေဖြစ်ပါတယ် ဘာဖြစ်လို့လဲ့ဆိုတော့ အရင်တုန်းကတော့ ကြံ့ခိုင်ရေးနဲ့ တပ်မတော်နဲ့လည်းကွဲပြီ အစိုးရနဲ့ လွှတ်တော်ကိုယ်စားလှယ်တွေနဲ့ ကွဲနေတယ်ဆိုတဲ့ အနေအထားကနေမှ အခုပြန်ပြီးတော့ တပ်မတော်နဲ့ ကြံ့ခိုင်ရေးနဲ့ ပြန်အစေးကပ်သွားအောင် ပြန်ပုံဖော်လိုက်တဲ့အခြေအနေဖြစ်တယ် အဲ့ဒါလည်းဖြစ်သင့်တယ်"

ဖွံ့ဖြိုးဆဲတိုင်းပြည်တွေမှာ တပ်မတော်ရဲ့ ထောက်ခံမှုဟာ အရေးကြီးကြောင်းနဲ့ အခုလို ပြည်ခိုင်ဖြိုး ပါတီနဲ့ တပ်မတော်အကြား ပိုနီးစပ်တာဟာ လိုအပ်ကြောင်းပြောပါတယ်။

ဒါ့အပြင် ပြည်သူ့လွှတ်တော် ကိုယ်စားလှယ် ဦးအောင်သိန်းလင်းနဲ့ အမျိုးသားလွှတ်တော် ကိုယ်စားလှယ် ဦးဇော်မြင့်ဖေတို့ကို ပါတီဗဟိုကော်မတီကနေ ပါတီဝင်အဖြစ် တာဝန်တွေ လျှော့ချလိုက်ကြောင်းလည်း အတည်ပြုပြောဆိုပါတယ်။

မနက်ဖြန် လွှတ်တော်အစည်းအဝေးတွေ ပြန်လည်စတင်မှာဖြစ်ပြီး လွှတ်တော်အစည်းအဝေးတွေကို ရက်ပိုင်းလောက်ပဲ ကျင်းပသွားမယ်လို့ ပြောပါတယ်။

RFA Burmese
https://www.facebook.com/pages/RFA-Burmese

ပြည်ထောင်စု လွှတ်တော် နာယက ၊ ပြည်သူ့ လွှတ်တော် ဥက္ကဌ သူရ ဦးရွှေမန်း ရေဘေးသင့် ပြည်သူများအတွက် အလှူငွေနှင့် ပစ္စည်းများ ပေးအပ် လှူဒါန်းသည့် အခမ်းအနားတွင် မိန့်ခွန်း ပြောကြားနေစဉ် (ဆင်ဟွာ)
    နေပြည်တော် ၊ သြဂုတ် ၁၇ ရက် (ဆင်ဟွာ)

    မြန်မာနိုင်ငံ တစ်ဝှမ်း ရေကြီး ရေလျှံမှုများကြောင့် ရေဘေးသင့် ပြည်သူများအတွက် ပြည်သူ့လွှတ်တော်မှ အမျိုးသား သဘာဝ ဘေးအန္တရာယ်ဆိုင်ရာ စီမံခန့် ခွဲမှု ကော်မတီသို့ အလှူငွေနှင့် ပစ္စည်းများ ပေးအပ်လှူဒါန်းသည့် အခမ်းအနားကို  သြဂုတ်လ ၁၇ ရက် နေပြည်တော်ရှိ လူမှုဝန်ထမ်း ကယ်ဆယ်ရေးနှင့် ပြန်လည် နေရာချထားရေး ဝန်ကြီးဌာန၌ ပြုလုပ်ရာ ပြည်ထောင်စု လွှတ်တော် နာယက၊ ပြည်သူ့ လွှတ်တော် ဥက္ကဌ သူရ ဦးရွှေမန်း တက်ရောက် မိန့် ခွန်း ပြောကြားခဲ့ကြောင်း သိရသည်။

ယင်းအခမ်းအနားတွင် ပြည်ထောင်စု လွှတ်တော် နာယက ၊ ပြည်သူ့ လွှတ်တော် ဥက္ကဌ သူရ ဦးရွှေမန်းက ယခုကဲ့သို့ လှူဒါန်းရခြင်းနှင့် ပတ်သက်၍ ရှင်းလင်း ပြောကြားခဲ့ပြီး ရေဘေးသင့် ပြည်သူများ ပြန်လည် ထူထောင်ရေး လုပ်ငန်းအတွက် တပ်မတော်သား လွှတ်တော် ကိုယ်စားလှယ်များ အပါအဝင် ပြည်သူ့လွှတ်တော် ကိုယ်စားလှယ်များမှ လှူဒါန်းသော အလှူငွေ ကျပ် ၄၁၃ သိန်း ပေးအပ် လှူဒါန်းခြင်း နှင့် ဂုဏ်ပြု မှတ်တမ်းလွှာ ပြန်လည် ပေးအပ်ခဲ့ခြင်းများ ပြုလုပ်ခဲ့သည်။

ထို့ ပြင် ပြည်ထောင်စု လွှတ်တော် ရုံးဝန်ထမ်းများနှင့် လွှတ်တော် အထောက်အကူပြု အဖွဲ့ ဝန်ထမ်းများမှ ရေဘေးသင့် ပြည်သူများ ပြန်လည် ထူထောင်ရေး လုပ်ငန်းအတွက် အလှူငွေ ကျပ် ၁,၁၇၃,၅၀၀ အား လည်းကောင်း ၊ ပြည်သူ့ လွှတ်တော်ရုံး ဝန်ထမ်းများက အလှူငွေ ကျပ် ၁,၁၀၂,၅၇၀ နှင့် ပစ္စည်းများအား လည်းကောင်း ပေးအပ်လှူဒါန်းခဲ့သည်။ အမျိုးသား သဘာဝဘေး အန္တရာယ်ဆိုင်ရာ စီမံခန့် ခွဲမှု ကော်မတီ အတွင်းရေးမှူး ၊ လူမှုဝန်ထမ်း ကယ်ဆယ်ရေးနှင့် ပြန်လည် နေရာချထားရေး ဝန်ကြီးဌာန ဒုတိယဝန်ကြီး ဦးဘုန်းဆွေက ကျေးဇူးတင် စကား ပြန်လည် ပြောကြားခဲ့သည်။

ယင်းအခမ်းအနားသို့  ပြည်ထောင်စု လွှတ်တော် နာယက ၊ ပြည်သူ့ လွှတ်တော် ဥက္ကဌ သူရ ဦးရွှေမန်း ၊ ဒုတိယ ဥက္ကဌ ဦးနန္ဒကျော်စွာနှင့် ပြည်သူ့ လွှတ်တော် ကိုယ်စားလှယ်များ ၊ ပြည်ထောင်စု လွှတ်တော် ရုံးဝန်ထမ်းများနှင့် လွှတ်တော် အထောက်အကူပြု အဖွဲ့ ဝန်ထမ်းများ ၊ ပြည်သူ့ လွှတ်တော်ရုံး ဝန်ထမ်းများနှင့် အတူ သက်ဆိုင်ရာ ဌာန တာဝန်ရှိသူများ တက်ရောက်ခဲ့ကြကြောင်း သိရသည်။

 (Xinhua)
http://www.xinhuamyanmar.com

ဓါတ်ပုံ - ဦးတေဇ (fb)
 ယနေ့ air Bagan ရပ်တာနဲ့ပါတ်သက်၍၎င်း, ရေဘေးတွင် မိမိနှင့် သစ်တော ကိစ္စနှင့် ပါတ်သက်၍၎င်း, ယခုနောက်ဆုံး မိမိနဲ့ ဘာမှ မပါတ်သက်သည့် နိုင်ငံရေး သတင်းများတွင် မိမိကိုပါထည့်ကာ, သတင်းအမျိုးမျိုးကို ဥပဒေမဲ့ စကားများ ဖြင့် မိမိ ၏ဂုဏ်သိက္ခာ, မိမိ Htoo Group အောက်တွင် လုပ်ကိုင်နေထိုင်ကြသော တိုင်းရင်းသား ပြည်သူအပေါင်း၏ သိက္ခာကို ဦးစွာချပြီး ,နောက် တွင် စီးပွားပျက်ဒုက္ခ ရောက်အောင် ဦးတည်ရေးသား သကဲ့သို့ ဖြစ်လာပါသည်။

ယခင်က မိမိ အနေဖြင့်တိုင်းပြည်ထူထောင်ကာစ ,တွင် မိမိတို့ တအိမ်တည်းတွင်နေထိုင်ကြသော ညီအကို မိသားစုများဖြစ်ပြိး မိမိနှင့် မိမိလုပ်ငန်းများကို နားမလည်သေး၍ ,တနေ့ Democracy ရင့်ကျက်ချိန်တွင် နားလည် လာမည်လို့ ယုံကြည်ရင်း သည်းခံ နှုတ်ဆိတ်နေထိုင်ခဲ့ပါသည်။

ယနေ့ လို မြန်မာပြည် အနှံ ဝန်ထမ်း ပြည်သူ အပေါင်းမြောက်များစွာ ဒုက္ခ ရောက်တော့မည့် အချိန်အခါတွင်တော့, မိမိ မှ ဂိုဏ်းကဲ့သို့ ရေးသား ၍ သိက္ခာ ချနေသောသူများ နောက်ကွယ် မှကြိုးကိုင်သောနေကြသော သူများ အကြောင်း ကို မပြောလို ပါ .ကို့ အကြောင်းကိုသိ၍ ဆင်ခြင်စောင့်စည်းရန် နောက်ဆုံးသတိပေးအပ်ပါသည်. ယခု မိမိယခု အချိန်မှစတင်၍ ရေးသားမည့် ကိစ္စမှာ မြန်မာနိုင်ငံပြည်သူပြည်သားများနှင့် ဝန်ထမ်းများ၏ media ၏ဘေးဒုက္ခကို ကာကွယ်ရန် ကယ်ဆယ်ရန်, ရည်ရွယ်၍ , လတ်တလော နိ င်ငံရေး, စီးပွားရေး , ယခင်ဖြစ်စဉ် ,ယခု ဖြစ်နေသော ဖြစ်စဉ် နှင့် ဖြစ်ပေါ်လာရသော အကျိုး အကြောင်း တရားများ, အရေးအကြီးဆုံးဖြစ်သည့် အနာဂတ် အတွက် လုပ်ဆောင်သင့်သည့် နိုင်ငံခေါင်းဆောင်တာဝန်များ ,စီးပွားရေးလုပ်ငန်းရှင်၏ တာဝန်များကို ရေးပါမည် မြန်မာပြည်သူပြည်သားများ , International media များ, အပြင် နိုင်ငံတကာ စီးပွားရေးလုပ်ငန်းရှင်များ လည်း မြနမာနိုင်ငံတွင်ဝင်ရောက် ရင်းနှီး လုပ်ကိုင်လျ င်မြန်မာ အကြောင်း သိရှိနား လည်ရန် ,မြန်မာ့ တော လက်ကျန် အခြေအနေ များ နှင့်, သဘာဝဘေး မဖြစ်ရန်ပို မို ဂရုပြုရမည့် တာဝန်ယူရမည့် နိုင်ငံတော် သမ္မတ အစိုးရ အဖွဲ့ဝင်လူကြီးများ လွတ်တော်ကိုယ်စားလှယ်များ အပြင် ,ပြည်သူများ ဝိုင်ဝန်း ထိန်းသိမ်း သင့်ရမည့် ကိစ္စများ , ကိုပါမိမိအမြင်ပွင့်လင်းစွာရေးသား ပါမည်။

အထူးသဖြင့် အများ အခေါ် ခိုရိုနီတေဇ, နိုင်ငံတကာ media magazine အခေါ် မြန်မာ့ Billionaire ဦးတေဇမှ မြန်မာ့ သစ်တောနှင့် ပါတ်သက်၍ တာဝန်ယူပေးမည့် ကိစ္စ အဝဝ ကို ပြည်သူ အားလုံးအပြင် အပြင် ,နိုင်ငံတကာ၏ နိုင်ငံ ခေါင်းဆောင်များ, UN အဖွဲ့ အစည်းများနှင့် ကျွမ်းကျင်ပညာရှင်များသို့ထံပါ သကိသေ အဖြစ်သော်၎င်း , မိမိတာဝန်ယူမည့် လုပ်ငန်း အမြန် အကောင်အထည်ဖော်ပေးနိုင်ရန် မြန်မာနိင်ငံတော် သမ္မတ ၏ ဂုဏ်ထူးဆောင် လက်မှတ်ရ Htoo foundation အဖွဲ့မှ နိုင်ငံတကာ အတွေ့အကြုံ ရှိ လူကြီးများနှင့်ပူးပေါင်းကာ အကောင်အထည်ဖော်ရန်, မိမိသိရှိ ခဲ့သော အတွေ့ အကြုံ ကို အခြေခံ၍ "မြန်မာပြည်ကျရောက်နေတဲ့ဘေး, ကျရောက်တော့မဲ့ ဘေးနှင့် ကာကွယ်ရမည့် နည်းလမ်းများ " ဆိုသည့် ခေါင်းစဉ်ဖြင့် စတင်ရေးပါမည်။

Admin နှင့် ရေးခိုင်းတာမဟုတ်ပဲ မိမိကိုယ်တိုင် ခံစားရေး၍ သည်းခံခွင့်လွတ်ကြပါရန်လည်းကြိုတင်တောင်းပန်အပ်ပါသည်. မြန်မာပြည် ပြည်တွင်းရှိ တိုင်းရင်းသား အပေါင်း ချစ်ခင် စွာ နေထိုင်ရင်း, အနာဂတ်အေးချမ်း သာယာ တည်ငြိမ်ဖွံ့ဖြိုး စေရန် ရည်ရွယ်၍ ရေးခြင်းဖြစ်၍ လူကြီးလူကောင်းများကဲ့သို့ အဆင့်အတန်းရှိရှိ အကြံပေးခြင်များကိုလက်ခံပါသည်။

U Tay Za
https://www.facebook.com/pages/U-Tay-Za



  ပိုင်နက်ကျူးလွန်မှုနဲ့ တရားစွဲ ခံထားရတဲ့ မြန်မာနိုင်ငံ တောင်သူ လယ်သမား သမဂ္ဂအဖွဲ့ ဥက္ကဌ မစုစုနွေးကို ပဲခူးမြို့နယ် တရားရုံးက ဒီနေ့ အလုပ်ကြမ်းနဲ့ ထောင်ဒဏ် ၁၅ ရက် အမိန့်ချ လိုက်ပါတယ်။

တရားသူကြီးက ချုပ်ရက်ကို ထည့်သွင်း ခံစားဖို့ အမိန့်ချမှတ် လိုက်တာကြောင့် ဒီနေ့ပဲ ပြန်လွတ်လာခဲ့တယ်လို့ မြန်မာနိုင်ငံ တောင်သူ လယ်သမား သမဂ္ဂ ဥက္ကဌ မစုစုနွေးက ပြောပါတယ်။

မစုစုနွေးဟာ အမှတ်(၁) ခဲယမ်းမီးကျောက်တပ်က သိမ်းဆည်းထားတဲ့ လယ်ယာမြေ တွေကို ကာရံထားတဲ့ အုတ်တံတိုင်းပေါ်ကနေ ဓါတ်ပုံရိုက်ပြီး အင်တာနက် တင်ခဲ့တာကြောင့် အဲ့ဒီတပ်က ဗိုလ်ကြီး ဟိန်းဇော်က တရားလိုလုပ်ပြီး ပိုင်နက်ကျူးလွန်မှုနဲ့ အင်းတကော်မြို့နယ် ရဲစခန်းမှာ အမှုဖွင့်ခဲ့တာဖြစ်ပါတယ်။

Photo: Aung Thain Kha/RFA
RFA Burmese
https://www.facebook.com/pages/RFA-Burmese

လူမှုဝန်ထမ်း ကယ်ဆယ်ရေးနှင့် ပြန်လည် နေရာချထားရေး ၀န်ကြီးဌာနကို ပြည်သူ့လွှတ်တော်ကိုယ်စားလှယ်များမှ လှူတန်းငွေ ပေးအပ်ပွဲတွင် ပြည်သူ့လွှတ်တော်ဥက္ကဌ သူရဦးရွှေမန်း တက်ရောက် အမှာစကားပြောနေစဉ်
ပြည်သူလွှတ်တော် ဥက္ကဌ ဦးသူရရွှေမန်းဟာ ရေဘေးသင့်ပြည်သူတွေတွေကို ထောက်ပံ့ဖို့ ပြည်သူ့လွှတ်တော် ကိုယ်စားလှယ်တွေရဲ့ အလှူငွေတွေကို လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနကို လှူတန်းခဲ့ပါတယ်။


 ပြည်သူ့လွှတ်တော် တရားဥပဒေ စိုးမိုးရေးနဲ့ တည်ငြိမ်ရေး ကော်မီတီ ဥက္ကဌ ဒေါ်အောင်ဆန်းစုကြည်ဟာ ဒီကနေ့ မနက်က ပြည်သူ့လွှတ်တော် ဥက္ကဌ သူရဦးရွှေမန်းကို သူရဲ့ ရုံးခန်းမှာ သွားရောက် တွေ့ဆုံ ခဲ့တယ်လို့ ပြည်သူ့ လွှတ်တော်ရုံး အရာရှိတဦးက ပြောပါတယ်။ ၄၅ မိနစ်ကြာ တွေ့ဆုံ ခဲ့တယ်လို့ ဆိုပါတယ်။

သူရဦးရွှေမန်းကို ပြည်ခိုင်ဖြိုးပါတီ ဥက္ကဌအဖြစ်က ဖယ်ရှားခဲ့ပြီးနောက်ပိုင်း ဒေါ်အောင်ဆန်းစုကြည်နဲ့ ပထမဆုံး တွေ့ဆုံခဲ့တာ ဖြစ်ပါတယ်။

ဘာတွေ ဆွေးနွေးခဲ့တယ်ဆိုတာကိုတော့ မသိရပါဘူး။

BBC Burmese
https://www.facebook.com/bbcburmese

အင်ဒိုနီးရှား ပို့ဆောင်ရေးဝန်ကြီးရဲ့ သတင်းစာရှင်းလင်းပွဲ
 လူပေါင်း ၅၄ ယောက် လိုက်ပါသွားတဲ့ အင်ဒိုနီးရှား ခရီးသည်တင် လေယာဉ်ရဲ့ အပျက်အစီး အစိတ်အပိုင်းတွေကို နိုင်ငံရဲ့ အရှေ့ပိုင်း ကျောက်ဆောင်တွေ ထူထပ်ရာ Papua ခရိုင်အတွင်းမှာ တွေ့ရှိရပါတယ်။ လေယာဉ်ဟာ ရာသီဥတု ဆိုးရွားနေချိန်အတွင်း တနင်္ဂနွေနေ့က ပျံသန်းစဉ် ပျက်ကျသွားခဲ့တာပါ။

Papua ခရိုင် Bintang မြို့နယ်အတွင်းက ကျေးရွာသားတွေက လေယာဉ်ပျက် အစိတ်အပိုင်းတွေကို တောင်ကုန်းတွေပေါ်မှာ တွေ့ရှိခဲ့တာဖြစ်ကြောင်း အင်ဒိုနီးရှား ပို့ဆောင်ရေးဝန်ကြီးဌာနက ပြောပါတယ်။ အစိုးရတာဝန်ရှိသူတွေဟာ ဒေသခံတွေနဲ့ ဆက်သွယ်ပြီး သတင်းကို အတည်ပြုနိုင်ဖို့ ကြိုးစားနေတယ်လို့ ဆိုပါတယ်။

ကယ်ဆယ်ရေးဝန်ထမ်းတွေကို စေလွှတ်ထားပြီး ရှာဖွေရေးလုပ်ငန်းတွေကို ဒီကနေ့ စတင်လိမ့်မယ်လို့ အင်ဒိုနီးရှား အာဏာပိုင်တွေက ပြောပါတယ်။ အသက်ရှင်ကျန်ရစ်သူ ရှိ မရှိ ဆိုတာကိုတော့ မသိရသေးပါဘူး။

Trigana လေကြောင်းခရီးစဉ် ၂၆၇ ခရိုင်မြို့တော် Jayapura မှာရှိတဲ့ Sentani လေဆိပ်ကနေ တနင်္ဂနွေနေ့က ပျံတက်သွားပြီး မိနစ် ၃၀ အကြာမှာ လေယာဉ်ပျံသန်းမှု ထိန်းချုပ်ရေးစခန်းနဲ့ အဆက်အသွယ် ပြတ်တောက် သွားခဲ့တာပါ။ လေယာဉ်ဟာ ပုံမှန် ပျံသန်းချိန် မိနစ် ၅၀ ကြာတဲ့ Oksibil မြို့ကို သွားရောက်တာ ဖြစ်ပါတယ်။

တာဗိုအင်ဂျက် ပန်ကာတတ် လေယာဉ်ပေါ်မှာ ခရီးသည် လူကြီး ၄၄ ယောက်၊ ကလေး ၅ ယောက်နဲ့ လေယာဉ် အမှုထမ်း ၅ ယောက် တင်ဆောင်သွားကြောင်း အင်ဒိုနီးရှား လေကြောင်းဌာနက ပြောပါတယ်။

ဗွီအိုအေ (မြန်မာပိုင်း)
http://burmese.voanews.com

ဒေါ်​အောင်​ဆန်း​စု​ကြည်​ရဲ့ ​ကိုယ်​ရေး​ရာ​ဇ​ဝင်​ကို​ပါ ​ရဲ ​က​တောင်း
  ​ဒေါ်​အောင်​ဆန်း​စု​ကြည် ​အ​ပါ​အ​ဝင် ​အ​မျိုး​သား ​ဒီ​မို​က​ရေ​စီ​အ​ဖွဲ့​ချုပ် NLD ​လွှတ်​တော် ​ကိုယ်​စား​လှယ် ​လောင်း​တွေ​ရဲ့ ​ကိုယ်​ရေး ​ရာ​ဇ​ဝင်​တွေ ​ကို Special Branch ​ရဲ ​အ​ထူး​သ​တင်း ​တပ်​ဖွဲ့ ​က ​စစ်​ဆေး​ဖို့ ​တောင်း​ယူ ​နေ​တယ်​လို့ NLD ​ပြော​ခွင့်​ရ ​ပု​ဂ္ဂိုလ် ​ဦး​ဥာဏ်​ဝင်း ​က ​ပြော​ပါ​တယ်။

ဒီ​လို ​တောင်း​ယူ​နိုင်​တဲ့ ​ဥ​ပ​ဒေ ​ပြ​ဌာန်း​ချက်​လည်း ​မ​ရှိ​တဲ့​အ​ပြင် ​တောင်း​ခံ​တဲ့ ​ပုံ​စံ​မှာ ​လက်​မှတ်​ထိုး ​ခိုင်း​တာ ​ကို​လည်း ​လက်​မ​ခံ​နိုင်​ဘူး​လို့ ​သူ​က ​ပြော​ပါ​တယ်။

အဲ​ဒီ​ပုံ​စံ​ထဲ​မှာ ​ကိုယ်​စား​လှယ်​လောင်း​ကို ​သူ ​ငယ်​စဉ်​က​စ​လို့ ​အ​ခု​အ​သက်​အ​ရွယ်​အ​ထိ ​ကိုယ်​ရေး ​ရာ​ဇ​ဝင် ​အ​သေး​စိတ်​ကို ​ဖြည့်​ခိုင်း ​နေ​တယ်​လို့ ​သိ​ရ​ပါ​တယ်။

ဒေါ်​အောင်​ဆန်း​စု​ကြည်​ကိုယ်​တိုင်​က​တော့ ​ဥ​ပ​ဒေ​အ​ရ ​သတ်​မှတ်​ထား​ခြင်း​မ​ရှိ​တဲ့ ​ဒီ​လို ​အ​ပြု​အ​မူ​မျိုး​ကို ​လက်​ခံ​နိုင်​ခြင်း​မ​ရှိ​လို့ ​ငြင်း​ဆို​လိုက်​တယ်​လို့ ​ဦး​ဥာဏ်​ဝင်း​က ​ပြော​ပါ​တယ်။

အ​ရင်​ရွေး​ကောက်​ပွဲ ​ဝင်​ခဲ့​စဉ်​က ​အ​ခု​လို​မျိုး ​ကိုယ်​ရေး​အ​ချက်​တွေ​ကို ​ရဲ​ထောက်​လှမ်း​ရေး​က ​လာ​တောင်း​တာ​မျိုး ​မ​ရှိ​ခဲ့​ဘူး​လို့ ​သူ​က ​ပြော​ပါ​တယ်။

အဲန်​အယ်လ်​ဒီ​ကို​သာ ​မ​က ​တ​ခြား​ပါ​တီ​က ​ကိုယ်​စား​လှယ်​လောင်း​တွေ​ကို​လည်း ​အ​ခု​လို ​တောင်း​ခံ​မှု​မျိုး ​ရှိ​နေ​ကြောင်း​ကြား​ရ​တယ်​လို့ ​ဆို​ပါ​တယ်။

ကိုယ်​စား​လှယ်​တ​ချို့​က ​လိုက်​လျော​ပြီး ​လက်​မှတ်​ထိုး​ပေး ​ခဲ့​ကြ​ပါ​တယ်။ ​မ​ထိုး​ပေး​တဲ့ ​သူ​တွေ​ကို​တော့ ​အ​တင်း​အ​ကြပ် ​ဖိ​အား​ပေး ​တာ​မျိုး ​မ​ရှိ​ဘူး​လို့ ​ဦး​ဥာဏ်​ဝင်း​က ​ပြော​ပါ​တယ်။

BBC Burmese
http://www.bbc.com/burmese

(ဖော်ပြပါ ဓာတ်ပုံမှာ ရေဘေးကြောင့် ပျက်စီးသွားသော မြောက်ဦးမြို့နယ်မှ ချောင်းရှည်တံတား၊ ဤတံတားတွင် ချဉ်းကပ်လမ်းတည်ဆောက်ရာ၌ သံအစား ၀ါးလုံးကို ထည့်သွင်းအသုံးပြုထား၍ ယခုလို ပြိုပျက်ခြင်း ဖြစ်သည်ဟု ဒေသခံများက စွပ်စွဲ ပြောကြားသည်။ Photos by Narinjara)
 စစ်တွေ၊ သြဂုတ် ၁၃

 ရခိုင်ပြည်နယ်တွင်ဖြစ်ပွားခဲ့သည့် ရေကြီးရေလျှံဖြစ်ပွားမှုကြောင့် ပျက်စီးဆုံးရှုံးမှုတန်ဖိုးမှာ ကျပ်ငွေ ဘီလီယံ ၄ဝ ကျော်ဖိုး ရှိကြောင်း ပြည်နယ်အစိုးရအဖွဲ့က အတည်ပြု ပြောကြားသည်။

ယင်းကို သြဂုတ်လ ၁၂ ရက်နေ့ညနေပိုင်းက ရခိုင်ပြည်နယ်အစိုးရအဖွဲ့၏ သတင်းထုတ်ပြန်ရေးနှင့် မှတ်တမ်း ပြုစုရေး ဆပ်ကော်မတီ ဥက္ကဋ္ဌဦးလှသိန်းနှင့် ရခိုင်ရှိ မီဒီယာအချို့စစ်တွေမြို့ရှိ ပြည်နယ် ဥပဒေချုပ် ရုံးခန်းတွင် တွေ့ဆုံစဉ် ဦးလှသိန်းက အတည်ပြု ပြောဆိုခဲ့ခြင်း ဖြစ်သည်။

“လတ်တလောကျနော်တို့ အတည်ပြုထားတာက အကုန်လုံးပျက်စီးဆုံးရှုံးမှုတန်ဖိုးကတော့ ၄၄ ဘီလီယံ ကျော်ဖိုး ရှိပါတယ်။ဒါက သြဂုတ် ၁၁ ရက်နေ့အထိ တွက်ချက်ထားတဲ့ စာရင်းဖြစ်ပါတယ်”ဟု ယင်းက ဆိုသည်။


အဆိုပါဆုံးရှုံးမှုတန်ဖိုးမှာ ဇူလိုင်လ ကုန်ပိုင်းမှ စတင်ဖြစ်ပွား ခဲ့သည့် ရေလွှမ်းမိုးမှုဖြစ်စဉ်ကြောင့် ရခိုင်ပြည်နယ် အတွင်း လူနေအိမ်များ၊စိုက်ပျိုးမြေလယ်ဧကများ၊ ကျွဲနွားတိရစ္ဆာန်များ၊ ဘုန်းတော်ကြီး ကျောင်းများ၊ စာသင်ကျောင်းများ၊ လမ်း၊ တံတားနှင့်လျှိုပိတ်ဆည်များ အားလုံး၏ ပျက်စီး ဆုံးရှုံးမှု တန်ဖိုးဖြစ်သည်ဟုဆိုသည်။

အဆိုပါရေကြီးရေလျှံဖြစ်စဉ်မှာ ရခိုင်ပြည်နယ်၏ အဆိုးဝါးဆုံး သဘာဝဘေးအန္တရာတစ်ခုဖြစ်ခဲ့ပြီး ယင်းဖြစ်စဉ်ကြောင့် ပြည်နယ်တွင်း လူပေါင်း ၅၆ ဦးသေဆုံးပြီး နေအိမ်ပေါင်း ၁ သောင်း ကျော်ပြိုပျက်ကာ စာသင်ကျောင်းပေါင်း ၃၆ဝ ၊ ဘုန်းကြီးကျောင်း ၁၂ဝ၊ လမ်းပေါင်း ၁၆ လမ်း၊ တံတားပေါင်း ၂၂ စင်း၊ စိုက်ပျိုးမြေ လယ်ဧကပေါင်း ၂ သိန်း ၁ သောင်းကျော်ရေနစ်မြုပ်ပျက်စီးကာ သောက်သုံးရေကန်များလည်း
ရေနစ်မြုပ် ပျက်စီးသွားခဲ့ကြောင်း ပြည်နယ် အစိုးရအဖွဲ့က ပြောသည်။

မာန်ယုကျော် (ရွှေဝမြေ)
Arakan State
https://www.facebook.com/NarinjaraNews


 မြန်မာနိုင်ငံတွင်း မြို့တော်တော်များများကို လေယာဉ်ခရီးစဉ်တွေ ပျံသန်းနေတဲ့ Air Bagan လေကြောင်းလိုင်းက တနင်္ဂနွေနေ့က ပျံသန်းမှု ခရီးစဉ်တွေကို ရုတ်တရက် ဖျက်ခဲ့တာကြောင့် ခရီးသည်တချို့ ဒုက္ခရောက်ခဲ့ကြပါတယ်။

Air Bagan လေယာဉ်တွေ မပျံသန်းတော့ပေမဲ့ သူနဲ့ ချိတ်ဆက်ထားတဲ့ Asia Wings လေကြောင်းလိုင်းအပြင် တခြားလေကြောင်းလိုင်း လေယာဉ်တွေနဲ့ လက်မှတ်ဝယ်ထားပြီးသား ခရီးသည်တွေကို တင်ပေးနေပါတယ်။ ဘာကြောင့် Air Bagan လေယာဉ်ခရီးစဉ်တွေ ဖျက်ခဲ့သလဲဆိုတာကို ဆက်သွယ်စုံစမ်းထားတဲ့ မအင်ကြင်းနိုင်က တင်ပြထားပါတယ်။

တနင်္ဂနွေနေ့ မနက်ပိုင်းကစလို့ Air Bagan လေကြောင်းလိုင်းက ပြေးဆွဲနေတဲ့ လေယာဉ်ခရီးစဉ်တွေကို ရုတ်တရက် ရပ်လိုက်တယ်လို့ ခရီးသည်တွေနဲ့ ခရီးသွားလုပ်ငန်း လုပ်သူတွေက ပြောပါတယ်။ ရန်ကုန်ကနေ မန္တလေးကို သွားမယ့် ခရီးသည်တယောက်က ရန်ကုန် မင်္ဂလာဒုံ လေဆိပ်ရောက်မှ Air Bagan လေယာဉ်ခရီးစဉ်တွေကို ရက်အကန့်အသတ်မရှိ ရွှေ့ဆိုင်းလိုက်တယ်ဆိုတာကို သိရတယ်လို့ ဗွီအိုအေကို အခုလို ပြောပြပါတယ်။

“မနက်က သူတို့ check-in လုပ်တော့လေ airline မန်နေဂျာက သူတို့ ဒီနေ့ခရီးစဉ် ဖျက်လိုက်ပြီပေါ့နော်။ ဆိုတော့ တခြား airline ကိုသွားပါ ဆိုပြီးတော့မှ Air Bagan နဲ့ Asia Wings နဲ့ပေါ့ အဲ့လိုပြောတော့ ဟိုဘက် airline တွေကို သွားတော့လည်း ဟိုဘက် airline က ဟာတွေကလည်း တခုမှ မရှိဘူးဖြစ်နေတယ်။ Booking က အကုန်ပြည့်နေတယ်။ ၃ ရက်စလုံး အကုန်ပြည့်နေတယ်။ ပြည့်နေတော့ နေ့လည်ရောက်တော့ sale agent တွေကိုမေးတော့ Air Bagan က တနှစ်လောက် နားမယ်လို့ ပြောတယ်လို့ ပြောနေတယ်ပေါ့နော်။ Air Bagan ရုံးကတော့ Confirm တော့ မပေးသေးဘူး။ ဒါပေမဲ့ Agent တွေကတော့ လောလောဆယ်မှာ သူတို့ဆီမှာ Booking ပြင်လို့မရတဲ့ အခြေအနေမှာ ဒီကနေ့ ရှိနေတယ်။”

ဒီကနေ့ တနင်္လာနေ့မှာလည်း ရန်ကုန်-ညောင်ဦး အသွားအပြန် Air Bagan ရဲ့ ခရီးစဉ်တွေအတွက် Air Mandalay လေကြောင်းလိုင်းနဲ့ ပြောင်းပြီး စီစဉ်ပေးထားတယ်လို့ မင်္ဂလာဒုံလေဆိပ်မှာရှိတဲ့ Air Bagan ၀န်ထမ်းတဦးက ဗွီအိုအေကို ပြောပါတယ်။

Air Bagan လေယာဉ်တွေအနေနဲ့ လွန်ခဲ့တဲ့နှစ်အတွင်း မတော်တဆ ဖြစ်ရပ်တွေရှိခဲ့ပြီး ပြီးခဲ့တဲ့ ဇူလိုင်လကလည်း ရန်ကုန်-မင်္ဂလာဒုံလေဆိပ်မှာ လေယာဉ်ဘီးချော်တဲ့ ပြဿနာဖြစ်ခဲ့တာပါ။ Air Bagan လေကြောင်းလိုင်းက လေယာဉ်ပျံတချို့ ပုံမှန် ကြံ့ခိုင် ဘေးကင်းမှု စစ်ဆေးတာတွေ လုပ်နေရတာရှိသလို ကျန်တဲ့လေယာဉ်တွေကလည်း ပျံသန်းလို့ မရတဲ့ အခြေအနေ ဖြစ်နေတာကြောင့် အခုလို လေယာဉ်ခရီးစဉ်တွေကို ယာယီရပ်ထားတာ ဖြစ်တယ်လို့ လေကြောင်းလိုင်းနဲ့ နီးစပ်တဲ့ အသိုင်းအ၀ိုင်းက ပြောပါတယ်။

Air Bagan ရဲ့ လေယာဉ်တွေ မပျံတော့ပေမဲ့ သူနဲ့ ခရီးစဉ်မျှဝေ Codeshare လုပ်ထားတဲ့ Asia Wings လေကြောင်းလိုင်းရဲ့ လေယာဉ်တွေနဲ့ ခရီးသည်တွေကို ပို့ဆောင်ပေးသွားမယ်လို့လဲ သိရပါတယ်။ အခုလို ခရီးစဉ်တွေ ယာယီရပ်ထားတာကို Air Bagan လေကြောင်းလိုင်းက တစုံတရာ ပြောခြင်း မရှိသေးပါဘူး။

Air Bagan လေကြောင်းလိုင်းကို လွန်ခဲ့တဲ့ ၈ နှစ်က အရင်စစ်အစိုးရနဲ့ နီးစပ်တဲ့ စီးပွားရေးလုပ်ငန်းရှင် ဦးတေဇ က စတင်တည်ထောင်ခဲ့တာဖြစ်ပြီး အမေရိကန်အစိုးရရဲ့ စီးပွားရေး ပိတ်ဆို့ ဒဏ်ခတ်မှုတွေကို ခံထားရဆဲလည်း ဖြစ်ပါတယ်။ Air Bagan လေကြောင်းလိုင်းဟာ မြန်မာနိုင်ငံတ၀ှမ်း ရန်ကုန်၊ မန္တလေး အပါအ၀င် မြို့ပေါင်း ၂၀ နီးပါး ပျံသန်းပြေးဆွဲနေတဲ့ လေကြောင်းလိုင်းတခု ဖြစ်ပါတယ်။

အင်ကြင်းနိုင် / ဗွီအိုအေ (မြန်မာပိုင်း)
http://burmese.voanews.com


  “လက်ညှိုးထောင် ခေါင်းညိတ် မည်ကာမတ္တ လွှတ်တော်မျိူး”မဖြစ်အောင် ခံယူ ဆောင်ရွက်ခဲ့တဲ့အတွက် အခက်အခဲများစွာ ကြုံခဲ့ရတယ်လို့  သူရဦးရွှေမန်းက လွှတ်တော် အစည်းအဝေးတွေ မကြာခင် စတင်တော့မယ့်အချိန်မှာပဲ ပြောဆိုလိုက်ပါတယ်။

သူရဦးရွှေမန်းကို အနိုင်ရပါတီရဲ့ ဥက္ကဋ္ဌအဖြစ်က တာဝန်က အနားပေးခံလိုက်ရပေမဲ့လို့ ပြည်သူ့လွှတ်တော်ဥက္ကဋ္ဌ၊ ပြည်ထောင်စု လွှတ်တော် နာယကအဖြစ် တာဝန်ယူဆောင်ရွက်မယ့် ဒီတခေါက် ပြန်စမယ့် လွှတ်တော်တွင်း ဘာတွေ ဆွေးနွေးတင်ပြမှုတွေ ရှိလာနိုင်မလဲ ဆိုတာကိုလည်း အများက စိတ်ဝင်စားနေကြပါတယ်။ အသေးစိတ်ကို ဆက်သွယ်မေးမြန်းထားတဲ့ မဆုမွန်က တင်ပြထားပါတယ်။

လက်ရှိ ပြည်သူ့လွှတ်တော် ဥက္ကဋ္ဌလည်းဖြစ် ပြည်ထောင်စုလွှတ်တော်ရဲ့ နာယကလည်းဖြစ်တဲ့ သူရဦးရွှေမန်းရဲ့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီရဲ့ ဥက္ကဋ္ဌ ရာထူးကို သမ္မတ ဦးသိန်းစိန်က ပြန်လည် လွှဲပြောင်းယူပြီးတဲ့နောက်မှာပဲ သူရဦးရွှေမန်းရဲ့ လုံခြုံရေး၊ ရှေ့နိုင်ငံရေး အနာဂတ် အပေါ်မှာ အများက သို့လော သို့လော မေးခွန်းထုတ်နေကြတာ ဖြစ်ပါတယ်။

ဒါပေမဲ့ သူရဦးရွှေမန်းဟာ လွှတ်တော်တွင်း လွှတ်တော်ဥက္ကဋ္ဌရုံးကို ပြန်တက်ပြီးတော့ ပုံမှန် ရုံးလုပ်ငန်းတွေကို ပြန်လည်စတင်လုပ်ကိုင်နေပြီလို့ လွှတ်တော်တာဝန်ရှိသူတွေက အတည်ပြု ပြောဆိုသလိုပဲ သူရဦးရွှေမန်းဘက်ကလည်း မကြာခင် လွှတ်တော်တွင်း အစည်းအဝေးတွေ ပြန်စတင်တော့မယ့် အချိန်မှာပဲ လွှတ်တော်တွင်း ဆောင်ရွက်မှုတွေနဲ့ ပတ်သက်လို့ သူ့ရဲ့ လူမှုကွန်ယက်စာမျက်နှာကနေ ပြည်သူ့ကို မိမိ၏ ဆန္ဒအမှန် ဆိုပြီး ဒုတိယအကြိမ် သတင်းစကား ပါးခဲ့တာပါ။

ဒီအထဲမှာ “လက်ညှိုးထောင် ခေါင်းညိတ် မည်ကာမတ္တ လွှတ်တော်မျိူး”ကိုသာ တချို့က ဖြစ်စေလိုချိန်မှာ လွှတ်တော်မရှိ ဒီမိုကရေစီမရှိ၊ လွှတ်တော်ရှိမှ ဒီမိုကရေစီ ရှိသည်လို့ ခံယူပြီး ဆောင်ရွက်ခဲ့တဲ့အတွက် အခက်အခဲတွေ ကြုံခဲ့ရပြီး နောင်မှာ အခက်အခဲထက် အန္တရာယ်များစွာ ကျရောက်လာအောင် ဖန်တီးလုပ်ဆောင်မှုများ ပေါ်ပေါက်လာနိုင်မည်ဟု ကြိုတင် သုံးသပ်မိခဲ့ပါတယ်လို့ သူရဦးရွှေမန်းက ဆိုခဲ့ပါတယ်။ ဒီပြောကြားချက်တွေနဲ့ ပတ်သက်ပြီး ပြည်သူ့လွှတ်တော်ကိုယ်စားလှယ်  ဦးဖေသန်းက သုံးသပ်ပါတယ်။

“လွှတ်တော်နာယကအနေနဲ့ကတော့ တခါတခါ အစိုးရပိုင်းနဲ့ပဲဖြစ်ဖြစ်၊ တခါတခါ တပ်မတော်နဲ့ပဲ ဖြစ်ဖြစ်၊ ထိတွေ့ ပွန်းရှမှုတွေတော့ ရှိပါတယ်။ အဲဒီကိစ္စမှာ တခါကလည်း ခုံရုံးနဲ့ ပတ်သက်ပြီးတော့ သူနဲ့ ထိတိုက်တွေ့ပြီးတော့ ခုံရုံးအဖွဲ့ဝင်တွေကို ကျနော်တို့က impeachment လုပ်ပြီးတော့ ဖြုတ်ချခဲ့တယ်။ အဲဒီဟာတွေက အစိုးရလမ်းကြောင်းပေါ်မှာလည်း တခါတခါ ဥပဒေပြုတဲ့အခါမှာ အစိုးရက လိုချင်တဲ့ဟာက တမျိုး၊ လွှတ်တော်က ကျနော်တို့ လွှတ်တော်နာယက ဦးစီးပြီးတော့ ပုံဖော်တဲ့ဥစ္စာက တမျိုး၊ အဲ့လိုကိစ္စမျိုးတွေလည်း အများကြီး ဖြစ်ပါတယ်။ တပ်မတော်ကဆိုရင်လည်း အဲ့လိုပဲ အစိုးရဘက်က ဥပဒေကြမ်းပဲဖြစ်ဖြစ်၊ အဆိုပဲဖြစ်ဖြစ် အစိုးရဘက်ကို သူတို့က အမြဲတမ်း ထောက်ခံတဲ့အခါမှာ လွှတ်တော်နာယကနဲ့ တပ်မတော်သား လွှတ်တော်ကိုယ်စားလှယ် အပိုင်းမှာလည်း အဲ့လို အဆင်မပြေမှုလေးတွေ ရှိပါတယ်။ အထူးသဖြင့် ဖွဲ့စည်းပုံအခြေခံဥပဒေကို လွှတ်တော်က ပြင်ဆင်လိုတဲ့အပိုင်းမှာ ပြည်ခိုင်ဖြိုးပါတီ ခေါင်းဆောင်ဖြစ်တဲ့ လွှတ်တော်နာယကကြီးက ဦးဆောင်ပြီးတော့ ပြုပြင်ပြောင်းလဲရေးတွေကို အများကြီး တင်ပေးပါတယ်။ ဒါပေမဲ့ တပ်မတော်သား ကိုယ်စားလှယ်တွေက ကန့်ကွက်ခဲ့ပါတယ်။ အဲ့လို ပုံစံမျိုးတွေလည်း အများကြီး သူ့အနေနဲ့ ကြုံခဲ့ရပါတယ်။ ဒီတော့ သူ့အနေနဲ့ အဲဒီအပေါ်မှာ ဘေးထွက်ဆိုးကျိုးတွေ ဒီလိုဖြစ်လာတယ်လို့လည်း ကျနော်တို့ ထင်ပါတယ်။ သူတို့ပါတီထဲမှာလည်းပဲ သူတို့အချင်းချင်း အားပြိုင်မှုတွေကလည်း ရှိနေတော့ ဒါဟာ တဘက်က သူတို့အားပြိုင်တဲ့ အုပ်စုတွေက အသာရသွားတယ်လို့ပဲ မြင်ပါတယ်။”

အခုလို ပါတီတွင်းက ဥက္ကဋ္ဌ ရာထူးက ဖယ်ရှားခံလိုက်ရပေမဲ့လို့ လွှတ်တော်တွင်း ဆောင်ရွက်မှုတွေကို ထိခိုက်မှာ မဟုတ်ဘူးလို့လည်း ဦးဖေသန်းက သုံးသပ်ပါတယ်။၂၀၁၅ ရွေးကောက်ပွဲ စည်းရုံးလှုံ့ဆော်ရေး ကာလမတိုင်ခင် ပြန်ကျင်းပမယ့် ဒီတကြိမ်လွှတ်တော်တွင်း ဆွေးနွေးနိုင်ခြေ ရှိတာတွေကိုလည်း ပြည်သူ့လွှတ်တော် ကိုယ်စားလှယ် ဦးဖေသန်းက အခုလို ရှင်းပြပါတယ်။


“ဒီလွှတ်တော်ကတော့ ကျနော်တို့ အချိန် အကန့်အသတ်ရှိပါတယ်။ ဘာလို့လဲဆိုတော့ ရွေးကောက်ပွဲ campaign ကာလက စက်တင်ဘာလ ၈ ရက်နေ့ဆိုတော့ အဲဒီကြား မတိုင်မီလေး ကျင်းပမယ်ဆိုတော့ အလွန်ဆုံး ၂ ပတ်ပေါ့၊ ၂ ပတ်ခွဲပေါ့ အဲ့လောက်ပဲ အချိန်ရတယ်။ အဲဒီအတောအတွင်းမှာ ကျနော်တို့ အဆုံးမသတ်နိုင်တဲ့ ဥပဒေကြမ်းတွေ ရှိတာပေါ့။ ဥပမာ - မျိုးစောင့်ဥပဒေ တချို့တ၀က်လည်း အဲ့လိုပါပဲ။ ပြီးတော့ အခု ကော်မရှင်က တင်ထားတဲ့ လွှတ်တော်ကိုယ်စားလှယ်များကို ပြန်လည် ရုပ်သိမ်းတဲ့ right to recall ပေါ့နော် အဲဒီဥပဒေတွေလည်း ရှိမှာပါ။ အဲလို မပြီးနိုင်တဲ့ ဥပဒေကြမ်းတွေကို ကျနော်တို့ အဆုံးသတ်ဖို့ပဲ ဒါ ဆွေးနွေးဖို့ ပိုများပါတယ်။ အသစ် အသစ် ဥပဒေတွေကိုတော့ ပြဌာန်းနိုင်ဖို့ ဆွေးနွေးဖို့ဆိုတာ အချိန် မလုံလောက်ပါဘူး။ အဲဒီထဲမှာ ဘယ်သူများ ထူးထူးကဲကဲ လွှတ်တော်ရဲ့ agenda ထဲမှာ တခြားကိစ္စတွေ ပါဝင်လာမလဲ။ အရေးတကြီးအဆိုတွေ ပါဝင်လာမလဲ ဆိုတာကတော့ ကျနော်တို့ မပြောတတ်ဘူးခင်ဗျ။”

ဒီတကြိမ်လွှတ်တော်တွင်း ဘာတွေ ဆွေးနွေးနိုင်မလဲဆိုတာကိုလည်း နိုင်ငံရေးအင်အားစုတွေဘက်က စိတ်ဝင်တစား စောင့်ကြည့်နေကြတာ ဖြစ်ပါတယ်။ လက်ရှိ အခြေအနေနဲ့ ပတ်သက်ပြီး အာဏာရ ပြည်ခိုင်ဖြိုးပါတီရဲ့ ရွေးကောက်ပွဲကာလ မတိုင်ခင် ပြည်သူရဲ့ စိတ်ဝင်စားမှုရအောင် နိုင်ငံရေးအရ ဗျူဟာချ ကစားကွက်ဖြစ်နေသလားလို့ စဉ်းစားစရာဖြစ်နေကြောင်း နိုင်ငံရေးအကဲခတ် ဒေါက်တာရန်မျိုးသိန်းက ရှုမြင်ပါတယ်။

“လာမယ့် လွှတ်တော် အစည်းအဝေးကာလက သက်တမ်းတိုပေမဲ့လို့ လွန်ခဲ့တဲ့ လွှတ်တော်သက်တမ်း တလျှောက်လုံးမှာ စိတ်ဝင်စားမှု အမြင့်မားဆုံးကာလ ဖြစ်ကောင်းဖြစ်လာနိုင်တယ်လို့ မြင်တယ်။ ဒါပေမဲ့ စဉ်းစားစရာ ရှိတာက လက်ရှိ ဖြစ်ပေါ်နေတယ်လို့ ယူဆရတဲ့ပေါ့လေ ပြည်ထောင်စု လွှတ်တော်နာယကနဲ့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီအကြား ကွဲလွဲမှုတွေဟာ တကယ့် သဘောထား ကွဲလွဲမှု အစစ်အမှန်တွေလား၊ တကယ့် အားပြိုင်မှု အစစ်အမှန်တွေလား၊ ဒါမှမဟုတ်ရင် နိုင်ငံရေးအရ ဗျူဟာမြောက် ကစားကွက်တခုကို ရွှေ့နေတာလား ဆိုတဲ့အပေါ်မှာတော့ စဉ်းစားသုံးသပ်စရာ စောင့်ကြည့်စရာတွေ လိုအပ်ဦးမယ်လို့ ကျနော်က မြင်ပါတယ်ခင်ဗျ။”

မြန်မာနိုင်ငံတဝှမ်း ရေကြီးရေလွှမ်းမိုးမှုဒဏ် ခံနေရတဲ့အတွက် လွှတ်တော်ကိုယ်စားလှယ်တွေအနေနဲ့ သက်ဆိုင်ရာ မိမိတို့ရဲ့ မဲဆန္ဒနယ်မြေတွေက ရေဘေးသင့်ပြည်သူတွေကို ပြန်အကူအညီပေးနိုင်ဖို့အရေး လွှတ်တော်အစည်းအဝေးကို ခေတ္တရပ်နားခဲ့ပြီးနောက်မှာတော့ သြဂုတ်လ ၁၈ ရက်နေ့မှာ လွှတ်တော်တွင်း ပုံမှန်အစည်းအဝေးတွေ ပြန်လည် စတင်တော့မှာ ဖြစ်ပါတယ်။ သြဂုတ် ၁၆၊ ၁၇ နှစ်ရက် အချိန်တွင်း နေပြည်တော်ကို လွှတ်တော်ကိုယ်စားလှယ်တွေ အရောက်ပြန်လာနေကြပြီ ဖြစ်တယ်လို့ သိရပါတယ်။

မဆုမွန် / ဗွီအိုအေ (မြန်မာပိုင်း)
http://burmese.voanews.com


 ပြည်ထောင်စု လွှတ်တော် အစည်းအဝေး ကျင်းပနေစဉ်။ Photo: RFA
  လွှတ်တော်ကိုယ်စားလှယ် တာဝန်ပြန်လည်ရုပ်သိမ်းခြင်းဆိုင်ရာ ဥပဒေကြမ်းကို လာမယ့် သြဂုတ်လ ၁၈ ရက်နေ့ မှာ ပြန်လည်ကျင်းပမယ့် ၁၂ ကြိမ်မြောက် လွှတ်တော်အစည်းအဝေးမှာ အတည်ပြုသွား ဖို့ရှိတယ်လို့ ပြည်သူ့လွှတ်တော် ဥပဒေကြမ်းကော်မတီက ပြောပါတယ်။

လာမယ့်လွှတ်တော်အစည်းအဝေးမှာ ဆွေးနွေးအတည်ပြုမယ့် ဥပဒေကြမ်းတွေနဲ့ ပတ်သက်ပြီး ဒီနေ့ ပြည်သူ့လွှတ်တော် ဥပဒေကြမ်းကော်မတီက အစည်း အဝေးပြုလုပ်ပြီး ဆုံးဖြတ်ခဲ့တာလို့ ပြည်သူ့လွှတ်တော်ဥပဒေကြမ်းကော်မတီ အတွင်းရေးမှူး ဦးစောလှထွန်းက ပြောပါတယ်။

"လွှတ်တော်ကိုယ်စားလှယ်တာဝန်မှပြည်လည်ရုပ်သိမ်းခြင်း ဥပဒေကို ဥပဒေကြမ်း ပူးပေါင်းကော်မတီက လွှတ်တော် ကိုအတည်ပြုနိုင်ဖို့အတွက် အစီရင်ခံစာ တင်ပြပြီးပါပြီ၊ အဲ့လိုတင်ပြတဲ့အထဲမှာ သဘောကွဲလွဲချက် ၁၀ ချက်အပြင် ထူးခြားတဲ့အနေအထားရ လွှတ်တော်က ပြန်လည်စဉ်းစားသင့်တယ်ဆိုတဲ့ အချက်ကို တင်ပြထားပါတယ်၊ ဒီဥပဒေပြ ဌာန်းလိုက်ရင် အမျိုးသားပြန်လည်စည်းလုံးညီညွတ်ရေးကို ထိခိုင်နိုင်တဲ့ တိုင်းရင်း သားစည်းလုံးညီညွတ်ရေးကို ထိခိုက်နိုင်တဲ့ အချက်ကိုသုံးသက်ပြီးလွှတ်တော်မှာရှိတဲ့ ပါတီတွေတိုင်ပင်ပြီးတော့ သဘောထားကိုရယူပြီး၊ လွှတ်တော်ကိုဥပဒေကြမ်း ကော်မတီက ပြန်လည်အစီရင်ခံ တင်ပြပါလို့ ဆုံးဖြတ်ထားတာရှိပါတယ်၊ အဲ့ဒါတွေ ဆွေးနွေးပြီးရင် ပြည်တင်ပြမှာပါ၊ လွှတ်တော်အစည်းအဝေး ၁၈ ရက်စရင် တောက်လျှောက်ဆွေးနွေး သွားမှာပါ"

လက်ရှိမှာ ကိုယ်စားလှယ်အဖြစ်ကနေ ရုပ်သိမ်းပေးဖို့ ပြည်ထောင်စုရွေးကောက်ပွဲ ကော်မရှင်ထံ တိုင်ကြားခံထားရ သူတွေဟာ ပြည်ထောင်စုလွှတ်တော်နာယက သူရဦးရွှေမန်းအပါအ၀င် ၁ဝ ဦး ခန့်ရှိ တယ်လို့ သိရပါတယ်။

ပြည်ထောင်စုရွေးကောက်ပွဲကော်မရှင်က လွှတ်တော်ကိုယ်စားလှယ် တာဝန်ပြန်လည် ရုပ်သိမ်းခြင်းဆိုင်ရာဥပဒေကြမ်း ကို ရေးဆွဲပြီး ပြည်ထောင်စုလွှတ်တော်ထံ ပေးပို့ထားတာ ၃ နှစ်နီးပါးရှိနေပြီး အတည်ပြုပေးဖို့အတွက် ပြည်ထောင် စုရွေးကောက်ပွဲကော်မရှင်က ပြီးခဲ့တဲ့ သြဂုတ်လ ၁၃ ရက်နေ့က လွှတ်တော်ကို စာပေးပို့ခဲ့ပါတယ်။

အဲဒီဥပဒေကြမ်းမှာ လွှတ်တော်ကိုယ်စားလှယ်တစ်ဦးကို တာဝန်ကနေရုပ်သိမ်းပေးဖို့ သက်ဆိုင်ရာမဲဆန္ဒနယ်က မဲဆန္ဒရှင် တစ်ရာခိုင်နှုန်းက တောင်းဆိုမယ်ဆိုရင် ကော်မရှင်ကစစ်ဆေးရမှာ ဖြစ်တယ်လို့ ပါရှိပါတယ်။

RFA Burmese
http://www.rfa.org/burmese

Author Name

Contact Form

Name

Email *

Message *

Powered by Blogger.