September 2016



ရန်ကုန် - စက်တင်ဘာ ၂၉

ရန်ကုန်တိုင်းဒေသကြီးအတွင်း ၂ဝ၁၆ ခုနှစ် နှစ်စပိုင်းမှ စတင်၍ အိမ်ခြံမြေအရောင်းအဝယ်နှင့် အိမ်အငှား ဈေးကွက်များအေးခဲ့သော်လည်း ပြီးခဲ့သည့် သြဂုတ်လမှစတင်၍အိမ်ခြံမြေအရောင်းအဝယ်နှင့် အိမ်အငှား ဈေးကွက်များအနည်းငယ် ပိုမိုသွက်လာကြောင်း ရန်ကုန်တိုင်းဒေသကြီး အိမ်ခြံမြေလုပ်ငန်းရှင်များအသင်းမှ သိရသည်။

ကွန်ဒိုတိုက်ခန်းဈေးကွက်၌လည်း BCC ကျပြီးဆောက် လုပ်ပြီး ကွန်ဒိုတိုက်ခန်းများ အရောင်းအဝယ်ဖြစ်လာ ကြောင်းနှင့် မြေကွက်များ အရောင်းအဝယ်သွက် လာကြောင်း၊ ဈေးနှုန်းအရ အချို့ငွေလိုသူများမှ ပေါက်ဈေး နှုန်းထက်လျှော့ပြီး ရောင်းချမှုများလည်းရှိလာကြောင်း၊ လုပ်ငန်းလုပ်ကိုင်လိုသူများမှလည်း ပေါက်ဈေးနှင့် နီးနီးစပ်စပ်ပေးဝယ်ရကြောင်း၊ ကွန်ဒိုတိုက်ခန်းကြိုပွိုင့်များမှာလည်း အရောင်းအဝယ်အေးနေပြီး ဝယ်ယူသူများ မှလည်း စိတ်ဝင်စားမှု တော်တော်နည်းပါးသွားကြောင်း၊ လက်ရှိရန်ကုန်မြို့အတွင်း အရောင်းအဝယ်ဖြစ်နေသည့် ကွန်ဒိုတိုက်ခန်းများမှာ BCC ကျပြီးသားများသာဖြစ်ကြောင်း အိမ်ခြံမြေလုပ်ငန်းများ လုပ်ကိုင်နေကြသည့် ဝါရင့်ပုဂ္ဂိုလ်များ၏ပြောပြချက်အရ သိရသည်။

ရန်ကုန်တိုင်းဒေသကြီး အိမ်ခြံမြေလုပ်ငန်းရှင်များ အသင်းမှ ဒု-ဥက္ကဋ္ဌဖြစ်သော ဦးအောင်ထွန်းက ''ကွန်ဒို တိုက်ခန်းကြိုပွိုင့်နဲ့ ပတ်သက်ပြီးပြောရရင်တော့ BCC ကျပြီးသားအခန်းတွေက မြေပိုင်ရှင်အသိအမှတ်ပြု လက်မှတ်ရေးထိုးရင် ပိုင်ဆိုင်မှုအရှုပ်အရှင်းဖြစ်စရာ မရှိပါဘူး။ ကြိုပွိုင့်အတွက်ကတော့ တိုက်မပြီးမှာတို့၊ တိုက် မပြီးအောင် ဆက်မဆောက်လုပ်နိုင်တာတို့၊ တစ်ခန်းကို နှစ်ဦး၊ သုံးဦးရောင်းချထားတာတို့  ဖြစ်တတ်တော့ အခန်း ဝယ်ယူသူက မသိရင် ပြဿနာဖြစ်တတ်ပါတယ်။ လုံးချင်း အငှားဈေးကွက်မှာတော့ ကုမ္ပဏီတချို့ဆိုရင် မြန်မာပလာ ဇာတို့၊ အခြားသော Office Tower တွေကိုပြောင်းရွှေ့ပြီး ငှားရမ်းတာတွေလည်းတွေ့ရပါတယ်။ ပြီးတော့ လုံးချင်း အငှားဈေးနှုန်းတွေကျပြန်တော့လည်း အရင်နှစ်တွေ ကထက်စာရင် ဈေးနှုန်းနည်းနည်းကျသွားပါတယ်။ လမ်းမတန်း မြေကွက်၊ လုံးချင်းနဲ့ မြေညီတိုက်ခန်းတွေ ကတော့ ဈေးကွက်နဲ့ နေရာအနေအထားပေါ်မူတည်ပြီး ဈေးကျတာတွေလည်းရှိသလို ဈေးနှုန်းမြင့်တာတွေလည်း ရှိပါတယ်။ ဈေးကွက်အနေအထားအရတော့ ရှေ့လျှောက် ဈေးနှုန်းမြင့်တက်လာနိုင်တာရှိသလို ဈေးကျနိုင်တဲ့နေရာ တွေလည်းရှိပါတယ်။ ဈေးနှုန်းမြင့်တက်ခြင်း၊ ကျခြင်းကတစ်ပိုင်း ပါ။ အိမ်ခြံမြေအရောင်းအဝယ်၊ အငှားလုပ်ငန်းတွေကတော့ ပိုမိုကောင်းမွန်သွက်လက်လာပါတယ်'' ဟု ရှင်းပြသည်။

လက်ရှိအနေအထားအရ နိုင်ငံခြားရင်းနှီးမြှုပ်နှံမှုများနည်းပါးနေသေးသော်လည်း ၂ဝ၁၇ ခုနှစ်နှစ်ဆန်းပိုင်း ဖြစ်သော အနာဂတ်ကာလ၌ နိုင်ငံခြားရင်းနှီးမြှုပ်နှံမှု များပိုမိုများပြားလာပါက အိမ်ခြံမြေလုပ်ငန်းများ ပိုမိုသွက်လက်လာနိုင်စရာအကြောင်းရှိကြောင်း၊ နိုင်ငံခြားသား ခရီးသွားဧည့်သည်များမှ မြန်မာနိုင်ငံအတွင်း ပုဂ္ဂလိက ကုမ္ပဏီများအနေဖြင့် ဝင်ရောက်လာပါက ၎င်းတို့၏ ဝန်ထမ်းများ နေထိုင်ရေးအတွက်လည်းကောင်း၊ စက်ရုံ အလုပ်ရုံများ ဖွင့်လှစ်ရန်အတွက်လည်းကောင်း၊ ရုံးခန်း များဖွင့်လှစ်ရန်အတွက်လည်းကောင်း လုပ်ဆောင်မည်ဖြစ်သောကြောင့် အိမ်ခြံမြေအရောင်းအဝယ်နှင့် အိမ်အငှား ဈေးကွက်များမှာပိုမိုသွက်လက်လာနိုင်စရာအကြောင်း ရှိနေကြောင်း အိမ်ခြံမြေလုပ်ငန်းများ လုပ်ကိုင်နေကြသည့် ဝါရင့်ပုဂ္ဂိုလ်များက ဆိုသည်။ ''ရန်ကုန်မြို့အပါအဝင် အိမ်ခြံမြေအရောင်းအဝယ်ကောင်းနေတဲ့ မြို့တွေထဲမှာ တောင်မှ နိုင်ငံခြားသားလုပ်ငန်းရှင်အများစု အကြိုက်ဆုံးက ရန်ကုန်မြို့ပဲဖြစ်ပါတယ်။ နိုင်ငံခြားသားကုမ္ပဏီတွေနဲ့ တွေ့ဆုံပြီးဆွေးနွေးတဲ့အခါမှာ သူတို့အများစုရဲ့ အမြင်က ရန်ကုန်မြို့ဟာ အလျင်အမြန် တိုးတက်ဖွံ့ ဖြိုးနိုင်တယ်လို့ လက်ခံနားလည်ထားကြပါတယ်။ အဲဒီနေရာမှာလည်း ကျွန်တော့်အမြင်ပြောရမယ်ဆိုရင် အစိုးရနဲ့ တိုက်ရိုက် ချိတ်ဆက်ပြီး အိမ်ခြံမြေလာရောက်ရင်းနှီးမြှုပ်နှံမှုတွေက ကျွန်တော်တို့ လုပ်ငန်းလောကအပေါ် တိုက်ရိုက်ပတ်သက် မှုသိပ်မရှိပါဘူး။ အိမ်ခြံမြေကဏ္ဍကို ဖွံ့ဖြိုးတိုးတက်ချင် တယ်ဆိုရင် ပုဂ္ဂလိက ကဏ္ဍကိုလည်း လုပ်ငန်းလုပ်ကိုင်ရ လွယ်ကူအောင် ထားပေးစေချင်ပါတယ်။ ရင်းနှီးမြှုပ်နှံမှုနဲ့ ပတ်သက်ပြီးပြောရရင် တချို့တွေကမြေဝယ်၊ အိမ်ဝယ်ပြီး ရင်းနှီးမြှုပ်နှံရတာကြိုက်တဲ့ သူတွေရှိကြသလို တချို့တွေ ကတော့ ကွန်ဒိုတိုက်ခန်းဝယ်ယူပြီး ရင်းနှီးမြှုပ်နှံသူတွေ လည်းရှိပါတယ်။ မြေကွက်ရဲ့သဘောက တည်နေရာ၊ အကျယ်အဝန်း၊ အလှည့်၊ အိမ်နံပါတ်စတဲ့ အချက်တွေကို ဝယ်ယူသူကကြိုက်နှစ်သက်တယ်ဆိုရင် အဲဒီမြေကွက်ကို ဝယ်ယူသူကရောင်းချင်သူရဲ့ ဈေးနှုန်းအတိုင်းပေးဝယ်ကြ ရပါတယ်။ ကွန်ဒိုတိုက်ခန်းရဲ့သဘောသဘာဝကျတော့ ဝယ်ယူသူစိတ်ကြိုက် ရွေးချယ်ခွင့်ရှိပါတယ်'' ဟု ဦးအောင်ထွန်းက ဆိုသည်။

မကြာမီကာလတွင် ကွန်ဒိုမီနီယံနည်းဥပဒေ ထွက်လာတော့မည်ဖြစ်သောကြောင့် ကွန်ဒိုတိုက်ခန်းများ အတွက်အားသာချက်ရှိမည်ဖြစ်ကြောင်း၊ နိုင်ငံခြားသားများအား ခွင့်ပြုထားသည့် အတိုင်းအတာတစ်ခုအထိ ဝယ်ယူခွင့်၊ ပိုင်ဆိုင်ခွင့်၊ ရောင်းချပိုင်ခွင့်များကို ပေးထားမည် ဖြစ်ကြောင်း၊ ကွန်ဒိုမီနီယံနည်းဥပဒေထွက်ပေါ်လာလျှင် နိုင်ငံခြားသားရင်းနှီးမြှုပ်နှံသူများ ပိုမိုများပြားလာမည်ဟု မျှော်လင့်ကြောင်း၊ ယခုလက်ရှိ ပြည်တွင်းဝယ်လိုအား လျော့နည်းခိုက် ပြည်ပငွေကြေးဖြင့် ဝယ်ယူမည့်သူများ ပိုမိုဝင်ရောက်လာနိုင်သောကြောင့် ကွန်ဒိုတိုက်ခန်း အရောင်းအဝယ်လုပ်ငန်းများမှာလည်း ပိုမိုတိုးတက် ကောင်းမွန်လာနိုင်စရာအကြောင်းရှိကြောင်း အိမ်ခြံမြေ လုပ်ငန်းများလုပ်ကိုင်နေကြသည့် ဝါရင့်ပုဂ္ဂိုလ်များ၏ပြောချက်အရ သိရသည်။

၂ဝ၁၇ ခုနှစ် နှစ်ဆန်းပိုင်းဖြစ်သော အနာဂတ်ကာလတွင် ကိုယ်ပိုင်စီးပွားရေးလုပ်ငန်းများ ပိုမိုဖွံ့ဖြိုးတိုးတက် ကောင်းမွန်လာနိုင်သောကြောင့် အိမ်ခြံမြေအရောင်း အဝယ်ဈေးကွက်များ ပိုမိုကောင်းမွန်သွက်လက်လာနိုင် စရာရှိကြောင်း၊ ကိုယ်ပိုင်စီးပွားရေးလုပ်ဆောင်သည့် လုပ်ငန်းရှင်များကလည်း ရရှိသည့်အကျိုးအမြတ်ထဲမှ အိမ်ခြံမြေများဝယ်ယူကာ ရင်းနှီးမြှုပ်နှံမှုများပြုလုပ် လာနိုင်စရာအကြောင်းရှိကြောင်း၊ အိမ်ခြံမြေအရောင်း အဝယ်ဈေးနှုန်းများမှာလည်း သင့်တင့်သည့် ဈေးနှုန်းအနေ အထားရှိနေမည်ဖြစ်သောကြောင့် အရောင်းအဝယ်များပိုမိုသွက်လက်လာနိုင်စရာအကြောင်းရှိကြောင်း အိမ်ခြံ မြေလုပ်ငန်းများလုပ်ကိုင်နေကြသည့် ဝါရင့်ပုဂ္ဂိုလ်များထံမှ စုံစမ်းသိရသည်။

(စိုးဝင်း-MLA)
The Mirror Daily
https://www.facebook.com/TheMirrorDaily


ကျောက်ဆည်မြို့မှ မိဘအုပ်ထိန်းသူများမသိဘဲ ထွက်ခွါလာသူ အသက်(၁၄)နှစ်အရွယ် အမျိုးသမီးငယ် (၃)ဦးအား စောင့်ရှောက်၍ မိဘများထံ ပြန်လည်အပ်နှံ
ရန်ကုန်၊စက်တင်ဘာ ၃၀

၂၉.၉.၂၀၁၆ရက်နေ့ ၁၄၀၀အချိန်တွင် ရန်ကုန်တိုင်း ဒေသကြီး မြောက်ဥက္ကလာပမြို့နယ်၊ (ဃ)ရပ်ကွက်၊ မိခင်နှင့်ကလေး စောင့်ရှောက်ရေး အသင်းဝင်ဖြစ်သူ ဒေါ်ချိုချိုစန်းသည် မြောက်ဥက္ကလာပမြို့နယ်၊ (ဃ)ရပ်ကွက်၊ သုဓမ္မာလမ်းမကြီး၊ မြို့နယ်မီးသတ်ရုံးရှေ့ လမ်းမပေါ်တွင် အသက်(၁၄)နှစ်အရွယ် အမျိုးသမီးငယ် (၃)ဦးအားတွေ့ရှိသဖြင့် မေးမြန်းရာ ၎င်းတို့သည် မန္တလေး တိုင်းဒေသကြီး၊ ကျောက်ဆည်မြို့နယ်မှ မိဘအုပ်ထိန်းသူများမသိဘဲ ရန်ကုန်မြို့သို့ ထွက်ခွါလာခြင်းဖြစ်ကြောင်း သိရှိခဲ့ရသဖြင့် ၎င်းမှ မြောက်ဥက္ကလာပမြို့နယ်၊ (ဆ)ရပ်ကွက်အုပ်ချုပ် ရေးမှူးရုံးသို့ခေါ်ဆောင်ကာ အပ်နှံပေးခဲ့ပါသည်။

ရပ်ကွက်အုပ်ချုပ်ရေးမှူးရုံးတွင် တာဝန်ရှိသူများက ထပ်မံမေးမြန်းခဲ့ရာ ၎င်းတို့(၃)ဦးသည် ကျောင်းသူများဖြစ်ကြောင်း၊ ၎င်းတို့သည် မိဘအုပ်ထိန်း သူများအား ကျောင်းသွားမည်ဟုဆိုကာ နေအိမ်များမှထွက်ခွါလာခဲ့ပြီး ၂၈.၉.၂၀၁၆ ရက်နေ့ နံနက်တွင် ကျောက်ဆည်မြို့မှ မန္တလေးမြို့သို့ လည်းကောင်း၊ ယင်းနေ့ညတွင် မန္တလေးမြို့မှ ရန်ကုန်မြို့သို့လည်းကောင်း မော်တော်ယာဉ်ဖြင့် လိုက်ပါလာခဲ့ရာ ၂၉.၉.၂၀၁၆ရက်နေ့ နံနက်တွင်
ရန်ကုန်မြို့သို့ရောက်ရှိခဲ့ပြီး မြောက်ဥက္ကလာပမြို့နယ်၌ ၎င်းတို့ နေထိုင်ရန်အတွက် နေအိမ်လိုက်လံငှားရမ်းနေခြင်းဖြစ်ကြောင်း သိရှိရပါသည်။

အဆိုပါ အမျိုးသမီးငယ် (၃)ဦးနှင့်ပတ်သက်၍ ကျောက်ဆည်မြို့မရဲစခန်းသို့ ဆက်သွယ် အကြောင်းကြားခဲ့ရာ ၎င်းတို့ပျောက်ဆုံးသွားမှုနှင့်ပတ်သက်၍ ကျောက်ဆည်မြို့မရဲစခန်း၌ လူပျောက်အမှတ်စဉ် (၈/၂၀၁၆)ဖြင့် ရေးဖွင့် စုံစမ်းရှာဖွေလျက်ရှိကြောင်းသိရှိရပြီး ၎င်းတို့၏ မိဘအုပ်ထိန်းသူများနှင့် အတူလာရောက် ခေါ်ဆောင်မည်ဖြစ်ကြောင်းသိရှိရ၍ ရပ်ကွက်အုပ်ချုပ်ရေးမှူးရုံးတွင် စောင့်ရှောက်ထားရှိခဲ့ပါသည်။

၃၀.၉.၂၀၁၆ ရက်နေ့ နံနက် (၀၆၃၀)အချိန်တွင် မြောက်ဥက္ကလာပမြို့နယ်၊ (ဆ)ရပ်ကွက်အုပ်ချုပ်ရေးမှူးရုံးသို့ ၎င်းအမျိုးသမီးငယ်(၃)ဦး၏ ဖခင်များမှ ကျောက်ဆည်မြို့မရဲစခန်း ဒုတိယစခန်းမှူး၊ ကျောက်ဆည်မြို့နယ်
အမျိုးသမီးရေးရာအဖွဲ့ဝင်များနှင့်အတူ လာရောက်ခေါ်ဆောင်သဖြင့် မိဘများထံ စနစ်တကျပြန်လည်အပ်နှံပေးခဲ့ကြောင်း သတင်းရရှိပါသည်။

Yangon Police
https://www.facebook.com/yangonpolice



ရန်ကုန် စက်တင်ဘာ ၂၉

ရန်ကုန်မြို့ ကြည့်မြင်တိုင်တစ်ဖက်ကမ်းတွင် အကောင်အထည်ဖော်မည့် ရန်ကုန်မြို့သစ်စီမံကိန်းကို တစ်နှစ်အတွင်း စတင်အကောင်အထည်ဖော်ရန် ရန်ကုန်တိုင်း ဒေသကြီးအစိုးရအဖွဲ့က စီစဉ်ဆောင်ရွက်နေပြီး လွှတ်တော်မှ အတည်ပြုပြီးပါက တင်ဒါခေါ်သွားမည်ဖြစ်ကြောင်း ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါ်စန္ဒာမင်းက ပြောသည်။

ဒုတိယအကြိမ် ရန်ကုန်တိုင်းဒေသကြီးလွှတ်တော် တတိယပုံမှန်အစည်းအဝေး ပထမနေ့အပြီးတွင် သတင်းမီဒီယာများအား ယင်းသို့ ပြောကြားခြင်းဖြစ်သည်။
''အရင်တုန်းက ရန်ကုန်မြို့သစ်စီမံကိန်းမှာ ကုမ္ပဏီ သုံးခုကိုပဲ တင်ဒါခေါ်ပြီး ဒီသုံးခုကနေ မြို့သစ်ကြီးကို အကောင်အထည်ဖော်မယ့်ပုံစံရှိနေတယ်။ အခုဆိုရင် ရန်ကုန်တိုင်းဒေသကြီး ဝန်ကြီးချုပ်က အရင်ပုံစံနဲ့အကောင် အထည်မဖော်တော့ဘူး။ ရန်ကုန်မြို့သစ်စီမံကိန်းကို တိုင်း ဒေသကြီးအစိုးရက ကြီးကြပ်မယ်၊ ကွပ်ကဲမယ်၊ ကုမ္ပဏီ တွေကို တင်ဒါခေါ်ပြီး ယှဉ်ပြိုင်ခိုင်းမယ်။ အဲဒီလိုယှဉ်ပြိုင် တဲ့အခါမှာလည်း နဂိုကဝင်ရောက်ယှဉ်ပြိုင်ခဲ့တဲ့ ကုမ္ပဏီ သုံးခုကိုလည်း ပြန်ပြီးယှဉ်ပြိုင်ခိုင်းမယ်။ ပြီးတော့မှ ရွေးချယ်မယ်။

ဒါနည်းလမ်းကျတဲ့ လုပ်ငန်းတစ်ခုဖြစ်တယ် လို့လည်း လွှတ်တော်ဘက်က သုံးသပ်ထားတယ်''ဟု လွှတ်တော်ကိုယ်စားလှယ် ဒေါ်စန္ဒာမင်းက ပြောသည်။
ထို့အပြင် လွှတ်တော်ကိုယ်စားလှယ်က ရန်ကုန်တိုင်း ဒေသကြီးအစိုးရအဖွဲ့က ရန်ကုန်တိုင်းဒေသကြီးအတွင်း အကောင်အထည်ဖော်မည့် စီမံကိန်း ၂၄ ခုကို လွှတ်တော် သို့ပေးပို့ထားပြီး အဆိုပါစီမံကိန်းများအနက် စီမံကိန်း ၁၁ ခုကို ယခုနှစ်အတွင်းစတင်အကောင်အထည်ဖော် ဆောင်ရွက်သွားမည်ဖြစ်ကြောင်း အဆိုပါ စီမံကိန်းများတွင် ရန်ကုန်မြို့သစ်စီမံကိန်းလည်း တစ်ခုအပါအ ဝင်ဖြစ်ကြောင်း ပြောကြားခဲ့သည်။

''ဒါတွေက တစ်နှစ်အတွင်းမှာ အကောင်အထည်ဖော် ရပါလိမ့်မယ်။ လုပ်ဖို့လည်း လုပ်နေပါတယ်။ မြို့သစ်စီမံ ကိန်းမှာ ပါတာတွေကို အပိုင်းလိုက်အကောင် အထည်ဖော် ရပါမယ်။ အဲဒီလိုဖော်တဲ့အတွက် ဝန်ကြီးချုပ်အနေနဲ့ ဆွေးနွေးမှုတွေလုပ်နေတယ်။ ဝန်ကြီးချုပ်က ဆွေးနွေးပြီး အကြမ်းဖျင်းလျာ ထားပြီးပြီဆိုရင်တော့ လွှတ်တော် ကိုတင်ပြမယ်လို့ ပြောတယ်''ဟု ၎င်းက ဆက်ပြောသည်။

ရန်ကုန်တိုင်းဒေသကြီးအစိုးရမှ တစ်နှစ်အတွင်း ဦးစားပေးဆောင်ရွက်မည့် လုပ်ငန်းများတွင် ရန်ကုန်မြို့ သစ်စီမံကိန်း၊ မြို့ပတ်ရထားလမ်းစီမံကိန်း၊ ဘတ်စ်ကား လိုင်းအသစ်လုပ်မည့်စီမံကိန်း၊စက်မှုဇုန်စီမံကိန်း၊ ဆိပ်ကမ်း ရွှေ့ပြောင်းမည့်ကိစ္စများနှင့် ကျူးကျော်ကိစ္စများ ပါဝင်ကြောင်း သိရသည်။

ရန်ကုန်မြို့ ကြည့်မြင်တိုင်တစ်ဖက်ကမ်းတွင် အကောင်အထည်ဖော်မည့် ရန်ကုန်မြို့သစ် စီမံကိန်းတွင် ကြည့်မြင့်တိုင် တစ်ဖက်ကမ်း၊ တွံတေးနှင့် ဆိပ်ကြီးခနောင် တို မြို့နယ်များရှိ မြေဧက စုစုပေါင်း နှစ်သောင်းကျော် ပါဝင်ကြောင်း သိရသည်။

ယခင်အစိုးရလက်ထက်က မဟာရန်ကုန် မြို့ပြ ဖွံ့ဖြိုးရေး မဟာဗျူဟာစီမံကိန်း အရ ရန်ကုန်မြို့တိုးချဲ့ရန် ဦးစားပေး(၁) ရန်ကုန်အရှေ့ပိုင်းမြို့သစ် ၁၇၃၇၅ ဧက၊ ဦးစားပေး(၂) ရန်ကုန်အနောက်တောင်ပိုင်းမြို့သစ် (ရန်ကုန်မြို့သစ်) ၂၁၇၁၆ ဧက၊ ဦးစားပေး(၃) သန်လျင်မြို့ သစ် ၂၁၁၉၃ ဧက၊ ဦးစားပေး(၄) ဒလမြို့သစ် ၁၅၁၇၃ ဧက၊ ဦးစားပေး(၅) ထန်းတပင်မြို့သစ် ၂၄၇၄၈ ဧက၊ ဦးစားပေး(၆) မှော်ဘီမြို့သစ် ၁၁၅၉၄ ဧကနှင့် ဦးစားပေး(၇) လှည်းကူးမြို့သစ် ၆၉၃၃ ဧက စုစုပေါင်း ၁၁၈၇၃၂ ဧက လျာထားကြောင်း သိရသည်။

သတင်း၊ ဓာတ်ပုံ - မင်းသစ်(သတင်းစဉ်)
MOI Webportal Myanmar
https://www.facebook.com/MOIWebportalMyanmar



အမေရိကန်ပြည်ထောင်စုက အကြီးမာဆုံး နျူကလီးယား စခန်းဖြစ်တဲ့ Kirtland လေတပ်စခန်း
အမေရိကန်ပြည်ထောင်စုက နျူကလီးယားစစ် ဟန့်တားရေးအတွက်လုပ်နေတာ ဆိုတဲ့ နျူကလီးယား လက်နက်အစီအစဉ် ကိုအဆင့်မြှင့်တင်ရေးအတွက် လာမယ့် ၅ နှစ်အတွင်း ဒေါ်လာသန်းပေါင်း ၁၀၈ ဘီလျံတန် စီမံကိန်း ချမှတ်ထားပါတယ်။ ဒီစီမံကိန်းအတွက် ကာကွယ်ရေးဝန်ကြီး Ash Carter ဟာ New Mexico ပြည်နယ်ကိုသွားရောက် ဆွေးနွေးရာမှာ လိုက်ပါသွားခဲ့တဲ့ VOA သတင်းထောက် Carla Babb အကြီးမာဆုံး နျူကလီးယား စခန်းဖြစ်တဲ့ Kirtland လေတပ်စခန်းက ပေးပို့တဲ့ သတင်းလွှာကို ဦးကျော်ဇံသာက တင်ပြထားပါတယ်။

Kirtland လေတပ်စခန်းထဲက Sandia အမျိုးသားဓါတ်ခွဲခန်းကြီးထဲမှာ နျူကလီးယားလက်နက်လုပ် ပစ္စည်းကရိယာတွေ လည်ပတ်လှုပ်ရှားနေတာ ထုထောင်းနေတာ၊ ပေါက်ကွဲနေတာတွေအထိ တွေ့မြင်နေရပါတယ်။

“ဒါတွေအားလုံးဟာ အစုလိုက်အပြုံလိုက်ရှိနေတဲ့ အမေရိကန်စစ်တပ် နျူကလီးယားလက်နက်တွေကို ခေတ်မှီလာအောင်လုပ်ဆောင်နေတာတွေဖြစ်ပါတယ်။ ဒါဟာ သူတို့ကာကွယ်ရေးဝန်ကြီးဌာနအတွက် ထိပ်တန်းဦးစားပေးလုပ်ငန်းဖြစ်တယ်”လို့ အမေရိကန်ကာကွယ်ရေးဝန်ကြီး Ash Carter က အခုလိုပြောပါတယ်။

နျူကလီးယားလုပ်ငန်းတွေဟာ အမေရိကန်လုံခြုံရေးအတွက် အခြေခံအုတ်မြစ်ဖြစ်ပါတယ်လို့ ပြောသွားတာပါ။

အခုအခါ အမေရိကန်ပြည်ထောင်စုက နျူကလီးယားလက်နက်တွေကို နည်း ၃ နည်းနဲ့ ပစ်ခတ်နိုင်ပါတယ်။ တိုက်ခြင်းပစ်ပဲ့ထိန်းတပ် ဒုံးကျည်တွေနဲ့ မြေပြင်က ပစ်လွှတ်တဲ့နည်း ၊ နျူကလီးယားလက်နက်တွေကို ဗုံးကြဲလေယာဉ် ဒါမှမဟုတ် ဂျက်တိုက်လေယာဉ် တွေမှာ သယ်ဆောင်ပြီး ဝေဟင်က ပစ်ခတ်တဲ့နည်း၊ ရေငုတ်သဘောင်္တွေက သမုဒ္ဒရာထဲမှာ လှည့်လည်ရင်း ရေထဲက ပစ်ခတ်တဲ့နည်းတို့ပဲ ဖြစ်ပါတယ်။ဒါပေမယ့်လည်း ဒီ ၃ နည်းစလုံးဟာ အခုအခါမှာ ခေတ်နောက်ကျသွားပြီဖြစ်တဲ့အတွက် ခေတ်မှီအောင်ပြန်လုပ်ဖို့လိုအပ်လာနေပါပြီ။ ဒီဓါတ်ခွဲခန်းတွေထဲမှာ အခုထုတ်လုပ်နေတဲ့ ဗုံးအသစ်တွေကတော့ လွန်ခဲ့တဲ့ ဆယ်စုနှစ်များစွာကတည်းကရှိလာတဲ့ပညာတွေကို ခေတ်သစ်ပစ္စည်းတွေတပ်ဆင်ပြီး ခေတ်မှီအောင်လုပ်နေတာဖြစ်ပါတယ်။ ဒါပေမယ့် ၂၀၂၀ ပြည့်လောက်ကျမှ သုံးနိုင်တဲ့အဆင့်ကိုရောက်ရှိလာပါလိမ့်မယ်။

တိုက်ခြင်းပစ်ပဲ့ထိန်းတပ် ဒုံးကျည်စနစ်ကိုတော့ လုံးဝအသစ်အဆန်းဖြစ်လာအောင်ပြန် ပြင်ရမှာဖြစ်တယ်လို့ လုံခြုံရေးသိပ္ပံနဲ့ နည်းပညာဆိုင်ရာ လက်ထောက် နိုင်ငံခြားရေးဝန်ကြီးဟောင်း William Schneider ကအခုလိုပြောပါတယ်။

“ဒီဟာတွေက ဟိုတုန်းကတော့ အဆင့်အမြင့်ဆုံးဖြစ်ခဲ့တယ် floppy disks တွေ အခုရှေးဟောင်းပစ္စည်း ရောက်နေတဲ့ ကွန်ပြူတာတွေနဲ့ သုံးနေရစဲပါ။”

အမေရိကန်ကာကွယ်ရေးဝန်ကြီး Ash Carter ကတော့ အမေရိကန်ပြည်ထောင်စုဟာ နျူကလီးယားလုပ်ငန်းကို ပစ်ပယ်ထားခဲ့တာ နှစ်အတန်ကြာခဲ့ပြီလို့ ဆိုပါတယ်။

“ဒါတွေကို အစောပိုင်းကမလုပ်ခဲ့တာက ရှင်းရှင်းပြောရရင် လွန်ခဲ့တဲ့ ၁၅ နှစ်လုံးလုံး အီရတ်ပြဿနာ ၊ အာဖဂန် ပြဿနာတွေနဲ့ အလုပ်ရှုပ်နေခဲ့တယ်။”

အမေရိကန်ပြည်ထောင်စုဟာ ဒီလို နှောင့်နှေးကြန့်ကြာနေတဲ့အတွက် တခြား နျူကလီးယားအင်အားကြီးနိုင်ငံတွေထက် ခေတ်နောက်ကျ ကျန်ရစ်ခဲ့ပြီလို့ ကျွမ်းကျင်သူတချို့ကဆိုပါတယ်။

လက်ထောက် နိုင်ငံခြားရေးဝန်ကြီးဟောင်း William Schneider က အခုလိုပြောတာပါ။

“ကျနော်တို့ရဲ့ နျူကလီးယားခေတ်မှီရေးအစီအစဉ်ဟာ ရရှားနဲ့ တရုတ်တို့ရဲ့ ခေတ်မှီရေးအစီအစဉ်ပြီးမြောက်လို့ နောက်အနှစ် ၂၀ ကြာမှပဲ ပြီးပြည့်စုံပါလိမ့်မယ်။”

တခြားကျွမ်းကျင်သူတွေက နျူကလီးယားခေတ်မှီရေးအစီအစဉ်ကို အခုပဲ လုပ်ရတော့မယ်။ မလုပ်ရင် အမေရိကန်ပြည်ထောင်စု နျူကလီးယားယန္တရားဟာ မထိရောက်ပဲ အားမထားလောက်အောင် ဖြစ်သွားလိမ့်မယ်လို့ ဆိုနေကြပါတယ်။ကြည်း၊ရေ၊ လေ ၃ နည်းစလုံးနဲ့ ပြင်ဆင်ထားတဲ့ နျူကလီးယား စစ်ဟန့်တားရေးဆိုတဲ့ ဒီအပိုင်းအားလုံးဟာ နောင်လာမယ့် ဆယ်စုနှစ်မှာ အသုံးပြုလို့ ရနိုင်တော့မှာမဟုတ်ဘူးလို့လည်းပြောနေကြကြောင်းပါ။

 ဦးကျော်ဇံသာ / ဗွီအိုအေ (မြန်မာပိုင်း)
http://burmese.voanews.com



ကရင်ပြည်နယ် အတွင်းဖြစ်နေတဲ့ တိုက်ပွဲတွေဟာ KNLA ထိန်းချုပ်နယ်မြေထဲထိ ရောက်လာမယ်ဆိုရင် သူတို့ဘက်ကလည်း ခုခံတုန့်ပြန်ရမှာဖြစ်တယ်လို့ KNU ကရင်အမျိုးသားအစည်းအရုံးဘက်က သတိပေးလိုက်ပါတယ်။ တချိန်တည်းမှာပဲ တိုက်ပွဲတွေကြောင့် ဒုက္ခသည်အရေအတွက်တိုးလာတယ်လို့ဆိုပါတယ်။ အကြောင်းစုံကိုတော့ ဆက်သွယ်မေးမြန်းထားတဲ့ ရှားဖောင်က ပြောပြပေးပါမယ်။

ကရင်ပြည်နယ် ကေအဲန်ယူ -ကရင်အမျိုးသားအစည်းအရုံး ထိန်းချုပ်နယ်မြေမှာရှိနေတဲ့ မဲသဝေါဒေသ အတွင်း DKBA ခေါ် တိုးတက်သောကရင်ဗုဒ္ဓဘာသာ လက်ကနက်အကိုင် ခွဲထွက်အဖွဲ့ကို ကရင်နယ်ခြားစောင့်တပ် - BGF နဲ့ မြန်မာစစ်တပ်တို့ ပူးပေါင်း ထိုးစစ်ဆင်နေတာတွေ ဟာ ကရင်အမျိုးသား လွတ်မြောက်ရေး တပ်မတော် - KNLA ထိန်းချုပ်နယ်မြေထဲအထိ ရောက်လာမှာကို ကရင်အမျိုးသားအစည်းရုံးက စိုးရိမ်မကင်းဖြစ်နေတာဖြစ်ပါတယ်။

ကရင်အမျိုးသားအစည်းအရုံးအနေနဲ့ တနိုင်ငံလုံးအပစ်အခတ်ရပ်စဲရေးသဘောတူညီမှုစာချုပ်ကို ရေးထားပေမယ့်လည်း အခုဖြစ်နေတဲ့မယ်ဝေ၀ါ ဒေသတွင်းတိုက်ပွဲကနေ KNLA ထိန်းချုပ်နယ်မြေထဲအထိ ရောက်လာမယ်ဆိုရင်တော့ ကေအဲန်ယူအနေနဲ့ ပြန်လည်ခုခံရမှာဖြစ်တယ်လို့ ကေအဲန်ယူက ဗိုလ်ချုပ်ကြီးစောကျော်နီက ဗွီအိုအေကို အခုလိုပြောပါတယ်။

“ကျနော်တို့က လက်မှတ်ထိုးထားတာ တကယ်တမ်း ကျနော်တို့ဆီလာရင်လည်း ကျနော်တို့ကတော့ ကာကွယ်မှာပဲ။ အခုက ကျနော်တို့ဆီ လာမှမလာတာနော်။

မေး။ ။ ကာကွယ်မယ်ဆိုတာက ရှောင်ပေးမှာလား ၊ ထိပ်တိုက်တိုက်ပွဲဖြစ်နိုင်တဲ့အလားအလာရှိသလား။

ဖြေ။ ။ တကယ်လို့ လာရင်တော့ အကြောင်းမကြားဘာမကြား ကျနော်တို့လည်း ခုခံရမှာပေ့ါနော်။”

အခုဖြစ်နေတဲ့ မယ်သဝေါဒေသတွင်းက တိုက်ပွဲတွေဟာ DKBA - တိုးတက်သော ကရင်ဗုဒ္ဓဘာသာလက်ကနက်အကိုင်ခွဲထွက်အဖွဲ့ရဲ့ ထိန်းချုပ်ရာဒေသအတွင်းမှာဖြစ်နေတာဖြစ်ပြီး လက်ရှိတိုက်ပွဲနဲ့ပတ်သက်ပြီးတော့ DKBA ခွဲထွက်အဖွဲ့ကနေပြီး ကေအဲန်ယူကို တစုံတရာ အကြောင်းကြားတာ ဆက်သွယ်တာမရှိပါဘူး။ ဒါပေမယ့်လည်း DKBA အဖွဲ့အနေနဲ့ ကေအဲန်ယူထဲကို ပြန်ပြီး ၀င်လာမယ့်ဆိုရင်တော့ ကေအဲန်ယူဘက်က လက်ခံဖို့ ကေအဲန်ယူခေါင်းဆောင်ပိုင်းတွေက ပြောဆိုနေတာတွေရှိတယ်လို့လည်း ဗိုလ်ချုပ်ကြီးစောကျော်နီကပြောပါတယ်။

“DKBA ခွဲထွက်အဖွဲ့တွေကိုတော့ ကျနော်ကတော့ ကျနော်တို့ဆီပြန်လာရင်တော့ ကျနော်တို့ လက်ခံမယ်လေနော်။”

မယ်သဝေါဒေအတွင်းက တိုက်ပွဲတွေဟာ အခုရက်ပိုင်းတွေမှာ ပြန်ပြီးအရှိန်နည်းနည်း လျော့ကျလာနေပေမယ့် ကြိုကြိုကြားကြား တိုက်ပွဲတွေ ဆက်ပြီးနေတုန်းပဲဖြစ်သလို၊ ထွက်ပြေးလာတဲ့ဒုက္ခသည်အရေအတွက်ဟာလည်း တိုးလာနေတယ်လို့ ထိုင်း-မြန်မာနယ်စပ်ဘက်ကိုထွက်ပြေးလာကြတဲ့ စစ်ရှောင်ဒုက္ခသည်တွေကို သွားရောက်အကူအညီပေးနေတဲ့ ကရင်လူထုအခြေပြုအဖွဲ့အစည်းတခုဖြစ်တဲ့ - ကရင်မြစ်ချောင်းများစောင့်ကြည့်ရေးကွန်ရက်က တာဝန်ရှိသူ စောသာဘိုးကပြောပါတယ်။

“ဒီနယ်စပ်မှာ မနေ့ကဆိုရင် ဒီနယ်စပ်ဘက် နော့သ ဘက်မှာဆိုရင် နောက်ထပ် အိမ်ထောင်စု ၅၀ ကျော်ပေါ့ အခုတော့ လူ ၈၀၀ ၀န်းကျင်လောက်ဖြစ်သွားပြီဗျ။လက်တလောတော့ ကျနော်တို့ အရေးပေါ်ကယ်ဆယ်ရေးပေါ့ သူတို့ တောထဲကပြေးလာတယ်၊ ဘာမမပါကြဘူးပေါ့နော်။ လောလောဆယ် စားဖို့မပါလာတဲ့အခါမှာ ကျနော်တို့ကတော့ လောလောဆယ် ဆန်၊ဆီ၊ဆားအခြေခံစားသောက်ကုန်တွေ အရေးပေါ်စားလို့ရမယ့်ဟာမျိုးတွေ ပြီးတော့ အ၀တ်အထည်လေးတွေပေါ့ အဲဒါတွေကို ကျနော်တို့အရွယ်စုံပေါ့၊ အထူးသဖြင့် အမျိုးသမီး၊ ကလေး တွေအတွက် ကျနော်တို့ ပံ့ပိုးတယ် ပြီးတော့ သူတို့အိမ်မှာသုံးဖို့ ခွက်တွေ ၊ ရေပုံးတွေ စသဖြင့် အဲဒီအနေအထားလေးတွေကို ကျနော်တို့ ပံ့ပိုးပေးနေပါတယ်ခင်ဗျ။”

လက်ရှိဖြစ်နေတဲ့တိုက်ပွဲကြောင့် ဒေသတွင်းမှာရှိတဲ့ ကျေးရွာသူရွာသား ထောင်နဲ့ချီပြီး ထွက်ပြေးတိမ်းရှောင်နေကြရပါတယ်။ စစ်ဘေးရှောင်ဒုက္ခသည် ၄ ထောင်လောက်ဟာ မြိုင်ကြီးငူဒေသဘက်ကို ထွက်ပြေးခိုလုံနေကြတာဖြစ်ပြီးသူတို့ကို မြန်မာအစိုးရ လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာနနဲ့ လူမှုအဖွဲ့အစည်းတွေက အကူအညီတွေ ပေးနေတာဖြစ်ပါတယ်။ နယ်စပ်ဘက်ကို ထွက်ပြေးလာကြတဲ့ဒုက္ခသည်တွေကတော့ ကရင်မြစ်ချောင်းများစောင့်ကြည့်ရေးကွန်ရက် အပါအ၀င် လူထုအခြေပြုအဖွဲ့တွေက သွားရောက်ကူညီပေးနေတာပါ။ တိုက်ပွဲတွေအရှိန်လျော့လာလို့ မြိုင်ကြီးငူဒေသဘက်ကို ထွက်ပြေးတိမ်းရှောင်ကြတဲ့ ဒုက္ခသည်တွေ နေရပ်ကိုပြန်ဖို့ အစီအစဉ်တွေရှိပေမယ့်လည်း ကြိုကြိုကြားကြား ဆက်ပြီးဖြစ်နေတဲ့တိုက်ပွဲနဲ့ ဒေသတွင်းမှာ ထောင်ထားတဲ့ မိုင်းတွေကြောင့် ဒုက္ခသည်တွေဟာ နေရပ်ရင်းကို မပြန်နိုင်ဖြစ်နေရပါတယ်။

 ရှားဖောင် / ဗွီအိုအေ (မြန်မာပိုင်း)
http://burmese.voanews.com


SME ဆိုတဲ့ အသေးစားနဲ့ အလတ်စား လုပ်ငန်းရှင် တွေကို လက်တွဲ ခေါ်သင့်
မြန်မာနိုင်ငံ ကုန်သည်များနဲ့ စက်မှု လုပ်ငန်းရှင်းများ အသင်းချုပ် UMFCCI ရဲ့ ရွေးကောက်ပွဲကို ပြီးခဲ့တဲ့ စက်တင်ဘာ ၁၇ ရက်နေ့က ကျင်းပခဲ့ပြီး အများမျှော်လင့် ထားသလို အလုပ်မှုဆောင် အဖွဲ့သစ်တွေ အစား အဖွဲ့ဝင်ဟောင်းတွေဘဲ ပြန်အရွေးခံခဲ့ရပါတယ်။

ဈေးကွက် စီးပွားရေး စံနစ် တခေတ် ထွန်းလာချိန်မှာ ပေါ်ပေါက်လာတဲ့ UMFCCI အသင်းမှာ အရင်ကဆိုရင် လုပ်ငန်းရှင်ကြီးတွေ အလုပ်အမှုဆောင် အဖွဲ့ဝင်တွေက လွှမ်းမိုး ကြီးစိုး ထားခဲ့ပြီး အခုအခါ အားနည်းချက် ရှိနေတဲ့ သင်းဖွဲ့ စည်းမျဉ်း ပြင်ဖို့ အရင်ဆုံး ပြင်ဖို့ လုပ်နေပါပြီ။

ပြည်နယ်နဲ့ တိုင်းက အသင်းငယ်တွေရဲ့ စွမ်းဆောင်ရည်မြှင့်ပေးဖို့နဲ့ အစိုးရနဲ့ အဲဒီ အသင်းငယ်တွေကြား ကြားခံ ပေါင်းကူး ဆက်ဆံ လုပ်ဆောင်သွားမယ်လို့ ရွေးကောက်ခံ UMFCCI ဥက္ကဌ ဉီးဇော်မင်းဝင်းက ပြောပါတယ်။

အသစ်ဖွဲ့လိုက်တဲ့ အလုပ်မှုဆောင် အဖွဲ့ ဟာ SME ဆိုတဲ့ အသေးစားနဲ့ အလတ်စား လုပ်ငန်းရှင် တွေကို လက်တွဲ ခေါ်သင့်တယ်လို့ အလတ်စား သွင်းကုန် ထုတ်ကုန် လုပ်ငန်းရှင် တယောက်က အပြောပါတယ်။

တကယ်တော့ လက်ရှိအခြေအနေမှာ SME လုပ်ငန်းရှင်တွေ အနေနဲ့ ရင်းနှီးမြုပ်နှံဖို့ ငွေကြေးပိုင်ဆိုင်ရာ အပြင် ဘဏ်တွေနဲ့ ချိတ်ဆက်ပြီး လုပ်ဆောင်နိုင်ဖို့ အပြင် ပြည်ပ ရင်းနှီးမြုပ်နှံသူတွေနဲ့ ပွင့်ပွင့်လင်းလင်း တိုက်ရိုက်တွေ့ပြီး အခွင့်အလမ်းတွေ ရနိုင်ဖို့ အခက်အခဲတွေ ရင်ဆိုင်နေရတယ်လို့ သိရပါတယ်။

UMFCCI ရဲ့ ရည်ရွယ်ချက်တွေထဲမှာ အသေးစားနဲ့ အလတ်စား SME လုပ်ငန်းတွေ တိုးတက်လာအောင် လုပ်ဆောင်ပေးဖို့ အချက်တစ်ချက် အနေနဲ့ပါဝင်ပါတယ် ။

ဒါပေမယ့် အသင်းဝင် အလုပ်မှုဆောင် ကော်မတီဝင် လုပ်ငန်းရှင်ကြီးတွေကသာ ကြီးစိုး လွှမ်းမိုးထားခဲ့တဲ့ UMFCCI ပေါ်ထွန်းလာတဲ့ ခေတ်မှာ အသေးစားနဲ့ အလတ်စား လုပ်ငန်းရှင်တွေ အနေနဲ့ ပြည်ပက ရင်းနှီးမြုပ်နှံမယ့် လုပ်ငန်းရှင်ကြီးတွေနဲ့ လက်တွဲ လုပ်ပိုင်ခွင့် နည်းပါးခဲ့တယ်လို့ ပြည်တွင်းက လုပ်ငန်းရှင် တယောက်က ပြောပါတယ်။

လက်ရှိ အခြေအနေမှာ အလုပ်မှုဆောင် ဖွဲ့ဝင် လုပ်ငန်းရှင်ကြီးတွေ ရဲ့ လွှမ်းမိုးမှု လက်ဝါးကြီး အုပ်ခံနေရတာကို နားလည် လက်ခံပြီး ဒီလို အခြေအနေတွေကနေ တိုးတက်မှု ရှိလာအောင် အလေးထား လုပ်ဆောင်သွားမယ်လို့ ရွေးကောက်ခံ ဥက္ကဌ ဉီးဇော်မင်းဝင်းက ပြောပါတယ်။

လက်ရှိ အခြေအနေမှာ ပြည်ပ ရင်းနှီးမြုပ်နှံမှုတွေ တံ့နေတာဟာ အစိုးရ အပြောင်းအလဲကြောင့် မူဝါဒ သစ် ဘာတွေများ ချမှတ်လာမလဲ ဆိုပြီး စောင့်နေတွေလည်းရှိပြီး အစိုးရသစ် အနေနဲ့ ဆွဲဆောင်မှု ရှိတဲ့ စီးပွားရေး မူဝါဒတွေ ချဖို့ လိုအပ်ပါတယ်။

နောက်ပိုင်းမှာ အထူးကုန်သွယ်ခွင့် ရလာပြီ ဖြစ်တဲ့ အတွက် အထည်ချုပ်လုပ်ငန်းတွေ တိုးတက်လာမှာ ဖြစ်သလို စိုက်ပျိုးရေး လုပ်ငန်းကလည်း ဖွံ့ဖြိုးလာတဲ့ အပြင် အစိုးရ အနေနဲ့ တရားမ၀င် ကုန်သွယ်မှုတွေလျော့ကျအောင် ထိန်းပေးမယ် ဆိုရင် မြန်မာ စီးပွားရေး ဉီးမော့လာဖို့ ရှိတယ်လို့ ဉီးဇော်မင်းဝင်းက ဆိုပါတယ်။

မြန်မာနိုင်ငံမှာ နှစ်ပေါင်းများစွာ လည်ပတ် လုပ်ဆောင်နေတဲ့ UMFCCI အဖွဲ့ကြီး အတွင်းမှာ ကြီးစိုး လွှမ်းမိုးမှုတွေ လျော့ကျပြီး အလုပ်မှုဆောင် အဖွဲ့သစ် အနေနဲ့ ဘယ်လောက် အောင်မြင်မှု ရအောင် လုပ်ဆောင်နိုင်မလဲ ဆိုတာကိုတော့ စောင့်ကြည့်ရမှာ ဖြစ်ပါတယ်။

BBC Burmese
http://www.bbc.com/burmese


ငွေကြေးဈေးကွက်မှာ ဒေါ်လာငွေလဲနှုန်းမြင့်တက်နေတဲ့အတွက်အခုတစ်ပတ် အတွင်းရွှေဈေးဟာ အခေါက်ရွှေတစ်ကျပ်သားကို ကိုးသိန်းနီးပါးခန့် စံချိန်တင်မြင့်တက်ခဲ့တယ်လို့ ရွှေလုပ်ငန်းရှင်တွေကသုံးသပ်ပြောဆိုကြပါ တယ်။

 ဈေးတက်နေပေမယ့် ဈေးကွက်အတွင်းရွှေကို တက်ဈေး နဲ့ပဲဝယ်ယူသူများနေတယ်လို့ ရန်ကုန်အောင်သမာဓိရွှေဆိုင်ရဲ့ အရောင်း တာဝန်ခံကိုမျိုးမျိုးအောင်ကပြောပါတယ်။

 ဒါ့အပြင် ပြည်တွင်းဘဏ်တွေမှာ အတိုးနှုန်းနဲ့ပတ်သက်တဲ့ မူဝါဒအပြောင်းအလဲသတင်းတွေဖြစ်ပေါ်နေတဲ့ အတွက်လည်း ရွှေဝယ်ယူမှုပိုများလာတယ်လို့ သူကသုံးသပ်ပြောဆိုပါတယ်။

ပြည်တွင်းရွှေဈေးနှုန်းဟာ ကမ္ဘာ့ရွှေဈေးနဲ့ အမေရိကန်ဒေါ်လာဈေး အတက်အကျတို့အပေါ်မူတည်ပြီး ဈေးနှုန်းအတက်အကျဖြစ်ပေါ်တာဖြစ်ပါတယ်။

လက်ရှိမှာကမ္ဘာရွှေဈေးနှုန်းငြိမ်နေပေမယ့်လည်း ပြည်တွင်းမှာဒေါ်လာငွေ လဲနှုန်းမြင့်တက်နေတဲ့အတွက် ပြည်တွင်းရွှေဈေးဟာ ဈေးနှုန်းအတက်ပိုင်းကို ဦးတည်နေတယ်လို့သိရပါတယ်။

5 Plus News
https://www.facebook.com/5plusnews


မြန်မာ အစိုးရ တပ်မတော်က ကေအိုင်အေ ကချင် လွတ်လပ်ရေး တပ်မတော်ရဲ့ စခန်းတွေကို သိမ်းဖို့ ရည်ရွယ်ချက်ရှိရှိ တိုက်ခိုက်မှုတွေ လုပ်နေတယ်လို့ ကေအိုင်အေဖက်က ပြောပါတယ်။

ကချင်ပြည်နယ် အတွင်းက ကေအိုင်အေ အတွက် ဗျူဟာ အရ အရေးပါတဲ့ ဂိဒေါင် Gidon စခန်းကို အစိုးရ တပ်မတော် ဖက်က ရက်အတန်ကြာ အပြင်းအထန် ထိုးစစ်တွေ ဆင်နေပြီး ကေအိုင်အေ နယ်စပ် ဌာနချုပ်ဖြစ်တဲ့ ပါဂျောင်ကို စစ်ဆင်ရေးတွေ စလုပ်ဖို့ လည်း ဆောင်ရွက် နေတယ်လို့ ကေအိုင်အေ ဖက်က စွပ်စွဲ ပြောဆို ပါတယ်။

တပ်မတော်ဖက်က ထိုးစစ်တွေ နဲ့ တိုက်ခိုက်နေတာ ရက်ပေါင်း ၂၀ ကျော်ရှိနေပြီဖြစ်ပြီး လိုင်ဇာ ဌာနချုပ်နဲ့ အလွန်နီးကပ်တဲ့ ဂိဒေါင် စခန်းကို မရမနေ တိုက်ပြီး သိမ်းယူမယ် ဆိုတဲ့ သတင်းတွေ ကြားနေရ တယ်လို့ ကေအိုင်အေ နည်းပညာ အကြံပေးအဖွဲ့ တာဝန်ခံ ဦးဒေါင်ခါးက ဘီဘီစီကို ပြောပါတယ်။

ဂိဒေါင် စခန်းကို စစ်ကြောင်း သုံးကြောင်း ပါဝင်တဲ့ အင်အား အလုံးအရင်းနဲ့ တိုက်ခိုက်ဖို့ စီမံချက်ရှိတာ သိရပြီး စက်တင်ဘာလ ၂၈ ရက်နေ့က လက်နက်ကြီးတွေနဲ့ ပစ်ခတ် ခဲ့တယ်လို့ ဦးဒေါင်ခါးကပြောပါတယ်။

လေယာဉ်တွေနဲ့ပါ အဲဒီကို သွားခဲ့ပေမဲ့ ပစ်ခတ်လို့ မရတဲ့ အတွက် ပြန်လှည့် သွားတယ်လို့ သတင်းတွေ ရရှိကြောင်းလည်း သူကဆိုပါတယ်။

စက်တင်ဘာလ ၂၉ ရက် ညနေမှာ ပါဂျောင်စခန်းဖက်မှာလည်း အင်အားအလုံးအရင်နဲ့ စစ်ရေး ပြင်ဆင်တာ တွေ့နေရပြီး ထိုးစစ်ဆင်ဖို့ ပြင်နေကြောင်း သိရတယ်လို့လည်း ဦးဒေါင်ခါးကပြောပါတယ်။

ကေအိုင်အေကို ထိန်းချုပ်နိုင်မယ့် ဗျူဟာမြောက် တောင်ကုန်းတွေကို တပ်မတော် ဖက်က တိုက်လေယာဉ်တွေပါသုံးပြီး မရမနေ ထိုးစစ် ဆင်တဲ့ အတွေ့အကြုံက ငါးနှစ် အတွင်းမှာ ကြုံလာခဲ့ရတာ အခုချိန်ထိပဲလို့ သူကဆိုပါတယ်။

ကေအိုင်အေဖက်ကလည်း ကိုယ့်နယ်မြေကို ကာကွယ်တဲ့ အနေနဲ့ ပြန်လည် တိုက်ခိုက်ခဲ့ရတယ်လို့ ဦးဒေါင်ခါးကဆိုပါတယ်။

တိုက်ပွဲ တွေကြောင့် နှစ်ဖက် ထိခိုက် သေဆုံးမှုတွေ ရှိခဲ့ရာမှာ ကေအိုင်အေဖက်က တပ်ကြပ် အဆင့် နဲ့ အရာခံဗိုလ် အဆင့် သုံးယောက် သေဆုံးခဲ့ရပြီး ဒဏ်ရာရသူ တချို့လည်း ရှိတယ်လို့ ကေအိုင်အေ ဖက်က ပြောပါတယ်။

BBC Burmese
http://www.bbc.com/burmese


စက်တင်ဘာ ၂၉ ။

မန္တလေး၊ မဟာအောင်မြေမြိုနယ်၊ ရတနာဘုမ္မိ အရှေ့၊ သုစရိတဓမ္မာရုံတွင် စက်တင်ဘာ၂၃-ရက် ညက ၀တ်ရွတ် နေစဉ် အသံချဲ့စက် မိုက်ကြိုးများ ဆွဲဖြုတ်ခဲ့သည့် နယ်သာလန်နိုင်ငံသား အမှုကို စက်တင်ဘာ၂၉- ရက်၊က မဟာအောင်မြေတရားရုံးတွင် တရားလိုနှင့် သက် သေများအား စစ်ဆေး ခဲ့သည်။

အဆိုပါ နိုင်ငံခြားသားမှာ ရာဇသတ်ကြီးပုဒ်မ၂၉၅နှင့် လူဝင်မှုကြီးကြပ်ရေး အက်ဥပဒေပုဒ်မ(၄)၂/၁၃(၁)ဖြင့်၊တရားရင်ဆိုင်နေရ၍ စက်တင်ဘာ၂၈-ရက်နေ့ပထမ ရုံးချိန်းတွင်(လ၀က)နှင့်နယ်သာလန်နိုင်ငံသားတို့ အားစစ်မေးခဲ့သည်။

“နိုင်ငံရဲ့ တည်ဆဲဥပဒေနဲ့ဘာသာသာနာ ဓလေ့ထုံး တမ်းစဉ်လာတွေကို လိုက်နာရမယ်ဆိုတာ ဗီဇာလျှောက် ထားစဉ်ကလက်မှတ်ရေးထိုးရတယ်။ခုဖြစ်စဉ်မှာ ဗီဇာ စည်းကမ်းနဲ့ မညီပါဘူး။”ဟု လ၀က)ဦးစီးမှုးက ပထမရုံးချိန်းတွင် ထွက်ဆိုသည်။


နယ်သာလန်နိုင်ငံသားMr. KLAAS HAYTEMA (၃၀နစ်)က မန္တလေးမြို့အခင်းဖြစ်ရာအနီးရှိ FOUR RIVERS တွင် တည်းခိုခြင်းဖြစ်ပြီး ၄င်းအနေနှင့် ရည်ရွယ်လုပ်ဆောင်ခြင်း မဟုတ်ဘဲ ဘာသာရေး အဆောက်အဦမှန်း မသိရှိပါဟု ထွက်ဆိုခဲ့သည်။

စက်တင်ဘာ ၂၉-ရက်တွင် တရားလိုဖြစ်သူ ၀တ်အသင်း ခေါင်းဆောင်ဦးကျော်ဆန်းနှင့် သက်သေများ ၂ ဦးအား စစ်မေးသည်။

“မျက်လုံးမှိတ်ပြီး ၀တ်ရွတ်နေတယ်။ စက်သံမကြားမှ သတိထားမိတယ်။နိုင်ငံခြားသား တစ်ဦးဝင်လာပြီး အသံချဲ့စက်ကြိုးတွေဖြုတ်သွားတာသိတယ်။ သူတည်းတဲ့ဟိုတယ်သွားတော့ နိုင်ငံခြားသားက ဓမ္မာရုံထဲဖိနပ်စီးပြီး အသံချဲ့စက်ကြိုးတွေဖြုတ်သွား တာသိတယ်”ဟုဦးကျော်ဆန်းကထွက်ဆိုသည်။

သက်သေ ဦးချစ်ဆန်းကထွက်ဆိုရာတွင်“ဟိုတယ်ဝန် ထမ်း နှစ်ယောက်ကိုဒီမှာတည်းတဲ့နိုင်ငံခြားသားက ပျက်စီးတာတွေပြင်ပေးဖို့နဲ့ တောင်းပန်ဖို့ ပြောတယ်။ဒီမှာမရှိဘူးချည်းပဲ ငြင်းနေတာရယ်၊လူအုပ်စုများလာ လို့-သက်ဆိုင်ရာနဲ့ရှင်းတော့ဆိုပြီး ရဲကို ဖုန်းဆက်ခဲ့ တယ်။“ဟု ဆိုသည်။

” ၀တ်ရွတ်တာကို မမြင်ဘူးလို့ လာလေ့လာတယ်လို့ ထင်နေတယ်။သူ့ကိုလှည့်ကြည့်တော့ သူက အင်္ဂလိပ် လိုတွေ လှမ်းပြောတယ်။ကျွန်မတို့လည်းနားမလည် လို့ဆက်ပြီးဝတ်ရွတ်တာပါ။အသံချဲ့စက်ကြိုးဖြုတ်
ပြီး ထွက်သွားတယ်”သက်သေဒေါ်ဥမ္မာချိုက ထွက်ဆို သည်။

တရားခွင်စစ်ဆေးမှုကို မွန်းလွဲ၂ နာရီ ခွဲကျော်က စတင်စစ်ဆေးခဲ့ပြီး ညနေ ၅နာရီအချိန်တွင် ပြီးစီးကာ စက်တင်ဘာ ၃၀-ရက်နေ့သို့ထပ်မံချိန်းဆိုခဲ့သည်။

Mandalay News
https://www.facebook.com/lin.aung.777/



ဆီအုန်းစိုက်ပျိုးထားတဲ့ ခြံတစ်ခြံကို တွေ့ရစဉ်။ Photo: naw pe tha law
တနသာင်္ရီတိုင်းဒေသကြီးမှာ စိုက်ပျိုးရေးလုပ်ငန်းအတွက် လျှောက်ထားပြီး စိုက်ပျိုးမှု မရှိတဲ့ မြေလွတ်၊ မြေရိုင်းနဲ့ သစ်တောမြေ ဧက ၆ သိန်းကျော်ကို တိုင်းဒေသကြီးအစိုးရက ပြန်လည်သိမ်းယူသွားမယ်လို့ တိုင်းအစိုးရ အဖွဲ့က ပြောပါတယ်။

ဆီအုန်းနဲ့ ရော်ဘာစိုက်ပျိုးဖို့ လုပ်ကိုင်ခွင့်တောင်းခံထားတဲ့မြေတွေမှာ သတ်မှတ်ကာလအတွင်း အမှန်တကယ် အသုံးပြုထားခြင်းမရှိတဲ့အတွက် ပြန်လည်သိမ်းယူတာဖြစ်တယ်လို့ တနသာင်္ရီတိုင်းဒေသကြီး သယံဇာတနဲ့ ပတ်ဝန်းကျင်းထိမ်းသိမ်းရေးဝန်ကြီး ဦးမြင့်မောင်က ပြောပါတယ်။

"ယခင်က သူတို့လျှောက်တုန်းကတော့ ဆီအုန်းတို့ ရော်ဘာတို့ စိုက်ဖို့လျှောက်တာ အမှန်တကယ်စိုက်ပျိုး ထားတဲ့ဟာက နည်းနည်းလေးပဲရှိတယ်၊ အခုသိမ်းတယ်ဆိုတဲ့ဟာက ကျန်တဲ့ဟာကိုသိမ်းတာ နည်းနည်းလေးပဲ စိုက်တယ်၊ လုံးဝမစိုက်ဘူး၊ တကယ်တော့ ဆီအုန်းစိုက်တယ်ဆိုတာကလည်း လမ်းမတန်းလောက်ပဲ သူတို့ ဟန်ပြလောက်ပဲစိုက်တာ နောက်များအများကြီးကျန်သေးတယ် လျှောက် ထားပြီး သူတို့မစိုက်လို့ပါ"

လုပ်ကိုင်ခွင့်ရယူထားပြီး လေးနှစ်အတွင်း အသုံးပြုထားခြင်းမရှိတဲ့ သစ်တောမြေဧက သုံးသိန်းခြောက်ထောင်ကျော် နဲ့ မြေလွတ်မြေရိုင်းဧက သုံးသိန်းသုံးသောင်းကျော်ကို ပြန်လည်သိမ်းယူမှာဖြစ်ပါတယ်။

အဲဒီ မြေတွေထဲက သစ်တောမြေတွေကို ပြန်လည်သိမ်းယူထားပြီးဖြစ်ပေမယ့် မြေလွတ်မြေရိုင်း အသုံးပြုခွင့်မှာ ဗဟိုအစိုးရက ခွင့်ပြုထားတဲ့မြေနဲ့ တိုင်းဒေသကြီးအစိုးရက ခွင့်ပြုထားတဲ့မြေဆိုပြီး နှစ်မျိုးရှိတဲ့အတွက် ပြန်လည် သိမ်းယူဖို့ လုပ်ဆောင်နေပြီလို့ ပြောပါတယ်။

RFA Burmese
http://www.rfa.org/burmese



 ရထားတွဲတွေ အတော်များများ ထိခိုက်ပျက်စီး
အမေရိကန်ပြည်ထောင်စု နယူးဂျာဆီပြည်နယ်မှာ ဘူတာရုံတခုထဲ လူစီးရထားတစီး ဝင်တိုက်ခဲ့တာကြောင့် အနည်းဆုံး လူတဦးသေဆုံးပြီး လူတရာကျော် ထိခိုက်ဒဏ်ရာရခဲ့ပါတယ်။

နယူးယောက်မြို့ရဲ့ မြစ်တဖက်ကမ်းက Hoboken ဘူတာရုံမှာ ရထားဟာ အရှိန်မထိန်းနိုင်ဘဲ ရထားလမ်းအဆုံး ကွန်ကရက် အကာအရံကို ကျော်ပြီး ဘူတာရုံထဲက လက်မှတ်ရောင်းတဲ့နေရာနဲ့ ခရီးသည်တွေနားတဲ့ နေရာအထိ ဝင်တိုက်ခဲ့တာလို့ မျက်မြင်တွေက ပြောပါတယ်။

မနက်ပိုင်း လူသွားလူလာ များတဲ့ အလုပ်သွားချိန်မှာ အခုလို ရထားတိုက်ခဲ့တာဖြစ်ပြီး ရထားတွဲတွေ အတော်များများ ထိခိုက်ပျက်စီးခဲ့သလို ဘူတာရုံ အမိုး တစိတ်တပိုင်းပြိုကျသွားတယ်လို့ ဆိုပါတယ်။

နယူဂျာဆီမြို့တော်ဝန်က လူတဦးသေဆုံးခဲ့တယ်ဆိုတာကို အတည်ပြုခဲ့ပြီး ရထားအင်ဂျင်နီယာကိုတော့ ဆေးရုံတင်ထားတယ်လို့ ပြောပါတယ်။

BBC Burmese
http://www.bbc.com/burmese


စီမံကိန်းနဲ့ ဘဏ္ဍာရေးဝန်ကြီးဌာနက တင်သွင်းထားတဲ့ မြန်မာနိုင်ငံ ရင်းနှီးမြုပ်နှံမှုဥပဒေကြမ်းကို ပြည်သူ့လွှတ်တော်က အတည်ပြုပေးလိုက်ပါပြီ။ ဥပဒေကြမ်းထဲမှာ လုံခြုံရေး၊ စီးပွားရေး၊ သဘာဝပတ်ဝန်းကျင်နဲ့ လူမှုအကျိုးစီးပွားတွေအပေါ် အကျိုးသက်ရောက်မှု ကြီးမားနိုင်တဲ့ ရင်းနှီးမြှုပ်နှံမှု လုပ်ငန်းတွေကို ပြည်ထောင်စုလွှတ်တော်ရဲ့ အတည်ပြုချက် ရယူဖို့ လိုအပ်တယ်ဆိုတာကို ထည့်သွင်းထားပါတယ်။ ရင်းနှီးမြုပ်နှံမှုနဲ့ပတ်သက်လို့ ဥပဒေတွေက ရှိထားပြီးဖြစ်ပေမယ့်၊ ဘာကြောင့် ဒီ ဥပဒေကို ပြောင်းလဲ အတည်ပြုရသလဲဆိုတာကိုတော့ ပြည်သူ့လွှတ်တော် ဥပဒေကြမ်းကော်မတီ ဥက္ကဌ ဦးထွန်းထွန်းဟိန်က အခုလို ပြောပါတယ်။

“နိုင်ငံခြားသားရော၊ နိုင်ငံသားရော အားလုံးအတွက် တခုပါပဲ။ နိုင်ငံသားတွေကို ပိုပြီးအခွင့်အရေးပေးတယ်၊ နိုင်ငံခြားသားတွေဆိုပြီးတော့ ခွဲထားတယ်။ ဒီလိုခွဲခြားတယ်ဆိုပြီးတော့ ပြောတဲ့အခါမှာ ဒါကို ရင်းနှီးမြုပ်နှံတဲ့လူတွေက သံသယဖြစ်တာပေါ့ဗျာ။”

လက်ရှိပြဌာန်းထားတဲ့ နိုင်ငံခြားရင်းနှီးမြှုပ်နှံမှု ဥပဒေနဲ့ မြန်မာနိုင်ငံသားများ ရင်းနှီးမြှုပ်နှံမှု ဥပဒေတွေကို ပေါင်းစပ်ရေးဆွဲထားတဲ့ ဥပဒေမှာ တာဝန်ရှိတဲ့ ရင်းနှီးမြှုပ်နှံမှုတွေ ဖြစ်စေရေး ရည်ရွယ်ပြီး၊ လုပ်ငန်းကြီးတွေအတွက် ပြည်ထောင်စု လွှတ်တော်က အတည်ပြုချက်ရယူဖို့ ဥပဒေကြမ်းမှာ ထည့်သွင်းထားတယ်လို့ ဆိုပါတယ်။ စစ်အစိုးရတွေ လက်ထက်က မြန်မာနိုင်ငံမှာ ပြည်ပက ရင်းနှီးမြှုပ်နှံ လုပ်ကိုင်ကြတဲ့ စီးပွားရေးလုပ်ငန်းတွေ၊ စီမံကိန်းကြီးတွေမှာ ပတ်ဝန်းကျင်နဲ့ လူမှုအသိုင်းအ၀ိုင်းအပေါ် အကျိုးဆက်တွေ ရှိနိုင်ပေမဲ့ ပွင့်လင်းမြင်သာမှု မရှိခဲ့တဲ့ အခြေအနေမျိုးတွေ ကြုံခဲ့ရတာတွေကို ပြင်ဆင်ဖို့ ဒီ ဥပဒေက ရည်ရွယ်ထားတာပါ။

မကြာသေးခင်က နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရဲ့ အမေရိကန် ခရီးစဉ်အတွင်း မြန်မာနိုင်ငံအပေါ် အမေရိကန်က ဒဏ်ခတ်မှုတွေ ရုပ်သိမ်းဖို့ ကြေညာထားတဲ့အတွက် ရင်းနှီးမြှုပ်နှံမှု အခွင့်အလန်းတွေ ပေါ်ပေါက်လာဖို့ မျှော်လင့်နေချိန်မှာပဲ လွှတ်တော်မှာ ရင်းနှီးမြှုပ်နှံမှုဆိုင်ရာ ဥပဒေသစ်တရပ် အတည်ပြုနိုင်ဖို့ ဆွေးနွေးနေကြတာလည်း ဖြစ်ပါတယ်။ အခု ဥပဒေကြမ်းကို ပြည်သူ့လွှတ်တော်က အတည်ပြုပြီးဖြစ်ပေမယ့်၊ ဥပဒေအသက်ဝင်လာဖို့တော့ အမျိုးသားလွှတ်တော်ကနေ အတည်ပြုပေးဖို့ ကျန်ရှိပါသေးတယ်။
ဗွီအိုအေ (မြန်မာပိုင်း)
http://burmese.voanews.com



ရန်ကုန်တိုင်းဒေသကြီး လွှတ်တော်အစည်းဝေးကို စက်တင်ဘာလ ၂၉ ရက်နေ့က တွေ့ရစဉ်။ Photo:Htet Arkar/RFA
ရန်ကုန်တိုင်းဒေသကြီး သန်လျင်မြို့နယ်က လယ်သမား ၁၃၅ ယောက်ဟာ မြေယာလုပ်ပိုင်ခွင့် ပုံစံ ၇ မရှိ တာကြောင့် ပြီးခဲ့တဲ့နှစ်ကစပြီး စိုက်ပျိုးစားရိတ်ချေးငွေ မရရှိတဲ့အကြောင်း ဒီကနေ့ ပထမဆုံးနေ့အဖြစ် ပြန်လည် ကျင်းပတဲ့ ရန်ကုန်တိုင်းဒေသကြီး လွှတ်တော်အစည်းအဝေးမှာ ဆွေးနွေးပါတယ်။

ဒုတိယအကြိမ် ရန်ကုန်တိုင်းဒေသကြီး လွှတ်တော်အစည်းအဝေးကို ၃ လကြာ ရပ်နားပြီးနောက် ဒီကနေ့ ပြန် လည်စတင်ခဲ့တာဖြစ်ပြီး ကိုးကိုးကျွန်းမြို့နယ် တိုင်းဒေသကြီး လွှတ်တော်ကိုယ်စားလှယ် ဦးတင်ဝင်းက အခုလို ဆွေးနွေးပါတယ်။

"ဒီလယ်သမားတွေဟာ ၂ဝ၁၅ ခုနှစ်ကစပြီးတော့ ဥပဒေအရ ပုံစံ ၇ ရှိမှသာလျှင် စိုက်ပျိုးစရိတ်ချေးငွေ ထုတ်ပေးတော့မှာဖြစ်တဲ့အတွက် မရရှိခဲ့ပါဘူး၊ ဒီလယ်သမားတွေဟာ (N)ပြေစာနဲ့ တာတမံခွန်တွေလည်း ၁၉၇၈ ခုနှစ်ကတည်းက နှစ်စဉ်ပေးဆောင်ခဲ့ပါတယ်၊ N ပြေစာဖြစ်နေတဲ့အတွက် ကျွန်တော်တို့ ပုံစံ ၇ မရတာဖြစ်ပါ တယ်၊ ပုံစံ ၇ မရတော့တဲ့အတွက်ကြောင့် ၂ဝ၁၅ ခုနှစ်မှာ ကျွန်တော်တို့ စိုက်ပျိုးစရိတ်ချေးငွေ မရတော့တဲ့ အတွက်ကြောင့် တော်တော်အခက်အခဲဖြစ်နေပါတယ်"

သန်လျင်မြို့နယ် ရုံးသပြေကန်ကျေးရွာအုပ်စုနဲ့ ဝင်းခနီကျေးရွာက လယ်သမားတွေ စိုက်ပျိုးစားရိတ်ချေးငွေ မရတာဖြစ်ပါတယ်။

ရန်ကုန်တိုင်းဒေသကြီး လယ်ယာစိုက်ပျိုးရေးနဲ့ မွေးမြူရေးဝန်ကြီး ဦးဟန်ထွန်းက မြေယာလုပ်ပိုင်ခွင့် ပုံစံ ၇ ရှိမှသာ စိုက်ပျိုးချေးငွေရမှာဖြစ်ကြောင်း ဖြေကြားခဲ့ပါတယ်။

ချေးငွေ မရတဲ့ လယ်သမား ၁၃၅ ဦးဟာ ၁၉၇၈ ခုနှစ်ကနေ ၂ဝ၁၄ ခုနှစ်အထိ ၃၆နှစ်ကြာ တာတမံခွန် နဲ့မြေခွန်တွေ ဆောင်ထားသူတွေဖြစ်ပြီး  ပုံစံ ၇ မြေယာလုပ်ပိုင်ခွင့် မရှိပေမယ့် စိုက်ပျိုးစားရိတ် ချေးငွေ ရရှိခဲ့သူတွေဖြစ်ပါတယ်။ ၂ဝ၁၄ နောက်ပိုင်းမရတဲ့အတွက် လွှတ်တော်မှာ တင်ပြတာလို့ ကိုယ်စားလှယ် ဦးတင်ဝင်းက ပြောပါတယ်။

ဒီကနေ့ ပြန်လည်ကျင်းပတဲ့ ရန်ကုန်တိုင်းဒေသကြီးလွှတ်တော် အစည်းဝေးကို ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းနဲ့ အစိုးရအဖွဲ့ဝင် ဝန်ကြီးတချို့ တက်ရောက်ခဲ့ပါတယ်။

RFA Burmese
http://www.rfa.org/burmese

ကျောင်းဆရာ ဦးရန်နိုင်
ကျိုက်လတ်မြို့မရဲစခန်း (ဓာတ်ပုံ- ဆလိုင်းသန့်စင်/ဧရာဝတီ)

မျိုးမင်းထွန်း (မြစ်မခ)

ပုသိမ်၊ စက်တင်ဘာ (၂၈)ရက်။

ဧရာဝတီတိုင်းဒေသကြီး၊ ကျိုက်လတ်မြို့နယ်၊ ရွှေညောင်ပင်ကျေးရွာ အလက(ခွဲ)မှ (၈)တန်းကျောင်းသူ နှစ်ဦးကို စာသင်ကျောင်းအတွင်း အကြိမ်ကြိမ် သားမယားအဖြစ်ပြုကျင့်သည့် သမိုင်းဘာသာရပ်သင် ဆရာကို ကျူးလွန်ခံရသူများ၏ သူငယ်ချင်းကျောင်းသူတစ်ဦးမှ စတင်ဖော်ထုတ်မှုကြောင့် စက်တင်ဘာလ (၂၇)ရက်တွင် အမှုဖွင့်ဖမ်းဆီးနိုင်ခဲ့ကြောင်း သိရှိရသည်။

ရွှေညောင်ပင် အလက(ခွဲ)မှ သမိုင်းဘာသာရပ်သင်ဆရာ ဦးရန်နိုင်အသက်(၂၈)နှစ်သည် (၁၅)နှစ်အရွယ် (၈)တန်း ကျောင်းသူ တစ်ဦးအား ကျောင်းပိတ်ရက် အချိန်ပိုခေါ်ယူသင်ကြားချိန်များတွင် ဆရာများနားနေခန်း အတွင်း (၅)ကြိမ်တိုင် သားမယားပြုကျင့်ခဲ့ပြီး (၁၄) နှစ်အရွယ်(၈) တန်းကျောင်းသူတစ်ဦးအား ညနေကျောင်း ဆင်းပြီးချိန်များတွင် စာသင် ခန်းအတွင်း (၃)ကြိမ် တိုင်တိုင်သားမယားအဖြစ်ပြုကျင့်ခဲ့ကြောင်း ကျိုက်လတ်မြို့မ ရဲစခန်းမှ စစ်ဆေးချက်များအရ သိရသည်။

“တစ်ယောက်ကတော့ ကျောင်းပိတ်ရက် မနက်ပိုင်းတွေမှာ အချိန်ပိုခေါ်ရင်းကျူးလွန်တာ၊ ကလေးမလေးကို ခေါ်ပြီး အမှတ်ကူဖျက်ခိုင်း နှိပ်ခိုင်းတာတွေ ရှိတော့ တခြားကျောင်းသားတွေကို စာကျက်ခိုင်းထားပြီး ဆရာ များနားနေခန်းမှာ ကျူးလွန်တာ၊ တစ်ယောက်က တစ်လမ်းတည်းနေတော့ ကျောင်းဆင်းချိန် အတူတူပြန်ရင်း ညနေပိုင်းတွေမှာ စာသင်ခန်းအတွင်းမှာပဲ ကျူးလွန်လေ့ရှိတယ်။”ဟု ကျိုက်လတ်မြို့မ ရဲစခန်မှ ဒုရဲမှူး ထင်အောင်က ပြောသည်။

ကျောင်းသူများအား သားမယားအဖြစ်ကျူးလွန်ခဲ့သည့် သမိုင်းဘာသာရပ်သင် ဆရာရန်နိုင်အား ကျိုက်လတ် မြို့မရဲစခန်းတွင် ဖမ်းဆီးစစ်ဆေးနေပြီး ၎င်းတာဝန်ကျရာ မအူပင်ခရိုင်အတွင်းမှ စာသင်ကျောင်းများ၊ ရွှေ ညောင်ပင်ကျေးရွာ အလက(ခွဲ)မှ ကျောင်းအုပ်ဆရာကြီးအား ၎င်းတာဝန် ထမ်းဆောင်ချိန်မှစ၍ အလား တူဖြစ်ရပ်များ ကျူးလွန်ခဲ့ခြင်းရှိမရှိ စုံစမ်းနေကြောင်း ဒုရဲမှူးထင်အောင်ကဆက်ပြောသည်။

သမိုင်းဘာသာရပ်သင်ဆရာ ဦးရန်နိုင်သည် ပညာရေးကောလိပ်မှ ၂၀၀၅-၂၀၀၆ ခုနှစ်တွင် ကျောင်းဆင်းကာ မူလတန်းပြ ဆရာအဖြစ် တာဝန်ထမ်းဆောင်ခဲ့ပြီး မအူပင်မြို့နယ် ရေနုတ်ချောင်းကျောင်း၊ ဂင်္ဂါးကျောင်းများတွင် တာဝန်ထမ်းဆောင်ခဲ့ဖူးပြီး ၂၀၁၄ အောက်တိုဘာလမှ စတင်ကာ ရွှေညောင်ပင်အလက (ခွဲ)တွင် တာဝန် ထမ်းဆောင်ပြီး ကညင်ကုန်းကျေးရွာရှိ နေအိမ်တစ်ခုတွင် နေထိုင်နေသူဖြစ်ကြောင်း သိရသည်။

“ကျောင်းက ဆရာမတစ်ယောက်ရဲ့ တူမတော်စပ်တဲ့ ကျောင်းသူတစ်ယောက်က တစ်နေ့ကျောင်းက အပြန် အိမ်မှာ ဒီလိုအကျင့်မကောင်းတဲ့ ဆရာဆီမှာ စာမသင်ချင်ဘူးလို့ လူကြီးတွေကို ပြောရာကနေ ဘာဖြစ်တာလဲ လို့မေးကြည့်မှ သူ့သူငယ်ချင်းနှစ်ယောက်ကို ဆရာက ဒီလိုတွေကျူးလွန်နေတယ် ဆိုတာပေါ်ပေါက်ခဲ့တာပါ။” ဟု ကညင်ကုန်းကျေးရွာ နေထိုင်သူတစ်ဦးကပြောသည်။

ဆရာဦးရန်နိုင်ကို ၁၅ နှစ်အရွယ် ၈ တန်းကျောင်းသူအား ၅ ကြိမ်တိုင်တိုင် သားမယားပြုကျင့်ကျူးလွန်ခဲ့ခြင်းကို အရေးယူ ပေးပါရန် ဖခင်ဖြစ်သူမှ တိုင်တန်းချက်အရ ကျိုက်လတ်မြို့မရဲစခန်းမှ (ပ)၁၉၆/၂၀၁၆ ရာဇသတ်ကြီး ဥပဒေပုဒ်မ ၃၇၆ ဖြင့်လည်းကောင်း၊ ၁၄ နှစ်အရွယ် ၈ တန်းကျောင်းသူကို ၃ ကြိမ်တိုင်တိုင် သားမယားပြုကျင့် ကျူးလွန်ခဲ့ခြင်းကို အရေးယူပေးပါရန် ဖခင်ဖြစ်သူ၏ တိုင်တန်းချက်အရ ကျိုက်လတ်မြို့မ ရဲစခန်းမှ(ပ) ၁၉၇/၂၀၁၆ ရာဇသတ်ကြီး ဥပဒေပုဒ်မ ၃၇၆ ဖြင့်လည်းကောင်း အသီးသီးအမှုဖွင့်ဖမ်းဆီး အရေးယူ ထားကြောင်း သိရသည်။

Shwe Myitmakha Media Group
http://myitmakhamediagroup.com/news/crime-news/9886/


( ၁ ) RCSS/SSA ရှမ်းလက်နက်ကိုင် ၊ UWSA “၀” နဲ့ ရေအားလျှပ်စစ် စီမံကိန်းတွေ
.
၂၀၁၄ ခုနစ် အောက်တိုဘာလက အစိုးရနဲ့ “၀” UWSA ၊ မိုင်းလား NDAA စတဲ့ အဖွဲ့တွေ တွေ့ဆုံဆွေးနွေးမှု တစ်ရပ် ပြုလုပ်ခဲ့ပါတယ်။ အစိုးရ ဘက်ကတော့ ကိုယ်စားလှယ်အဖွဲ့ ခေါင်းဆောင်အဖြစ် ဦးသိန်းဇော်က ဦးဆောင်ခဲ့သလို ၊ ဦးခင်မောင်စိုး ၊ ဦးဝင်းမြင့်စတဲ့ ဦးသိန်းစိန်အစိုးရရဲ့ ၀န်ကြီးတွေ ၊ တပ်မတော်ဘက်က အရာရှိတွေ ၊ ရှမ်းပြည်နယ် ၀န်ကြီးချုပ်ဟောင်း စ၀်အောင်မြတ်စတဲ့ ပုဂ္ဂိုလ်တွေ တက်ရောက်ခဲ့ပါတယ်။ “၀” နဲ့ မိုင်းလား အဖွဲ့တွေဘက်ကတော့ “၀” ရဲ့ လက်ရှိမှာ အာဏာအရှိဆုံးလို့ ဆိုနိုင်တဲ့ ဦးရှောက်မီလျှံ ကိုယ်တိုင် တက်ရောက်ခဲ့သလို ( ဦးပေါက်ယူချန်းက ကျန်းမာရေး အခြေနေအရ ကိစ္စတော်တော်များများမှာ ပါဝင်ဆောင်ရွက်မှု မရှိနိုင်တော့ ) မိုင်းလား NDAA အဖွဲ့ဘက် ကတော့ ဥက္ကဋ္ဌ ဖြစ်သူ ဦးစိုင်းလင်း ကိုယ်တိုင် တက်ရောက်ခဲ့ပါတယ်။

တစ်ဖွဲ့ချင်းစီအလိုက် တင်ပြချက်တွေထဲမှာ စိတ်ဝင်စားစရာ အချက်အနေနဲ့ UWSA “၀” တပ်ဖွဲ့ကနေ သံလွင်မြစ်ပေါ်မှာ ရေအားလျှပ်စစ် ဓာတ်အားပေး စက်ရုံ တည်ဆောက်ဖို့နဲ့ သီပေါမြို့နယ်က ဒုဋ္ဌ၀တီမြစ်ပေါ်မှာ ရေအားလျှပ်စစ် ဓာတ်အားပေးစက်ရုံ တည်ဆောက်ဖို့ ဆိုတဲ့ ကိစ္စတွေပဲဖြစ်ပါတယ်။ သီပေါမြို့နယ်မှာ “၀” တပ်ဖွဲ့က လျှပ်စစ်ဓာတ်အား စီမံကိန်း တည်ဆောက်ဖို့ ကိစ္စမှာဆိုရင် ကွင်းဆင်းလေ့လာ ဆောင်ရွက်ဖို့ ရှိနေပေမယ့် ဦးယွက်စစ်ရဲ့ RCSS/SSA ရှမ်းပြည်တပ်မတော် တောင်ပိုင်းအဖွဲ့က တားဆီးမှုတွေ ပြုလုပ်တာကြောင့် ကွင်းဆင်းလေ့လာမှုတွေ ဆောင် ရွက်နိုင်တာ မရှိသေးဘူး။ ဒါကြောင့် အဲဒီကိစ္စ အကောင်ထည်ဖော်နိုင် ဖို့ တောင်းဆိုတယ်လို့ “၀” တပ်ဖွဲ့ တာဝန်ရှိသူတွေက တင်ပြခဲ့ပါတယ်။ သီပေါဆိုတာ အစဉ်အဆက် ရှမ်းစော်ဘွားတွေ နေရာစိုက်ခဲ့ တဲ့ ဒေသလည်း ဖြစ်ပါတယ်။

၂၀၁၅ ခုနစ် ဒီဇင်ဘာလမှာတော့ နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးခဲ့တဲ့ RCSS/SSA ရှမ်းပြည်ပြန်လည် ထူထောင်ရေး ကောင်စီ တပ်ဖွဲ့တွေဟာ တရုတ်နယ်စပ် နမ့်ခမ်းမှာ ပြန်လည် အခြေချဖို့ ကြိုးစားရင် တအာင်းပလောင် TNLA/PSLF တပ်ဖွဲ့တွေနဲ့ တိုက်ပွဲတွေ စတင်ဖြစ်ပွားခဲ့ကာ အခု ၂၀၁၆ ခုနစ်အထိပါပဲ။ တစ်ချိန်က ရှမ်းမြောက်မှာ RCSS/SSA တပ်တွေ အနည်းငယ်သာ ရှိပေမယ့် NCA လက်မှတ်ရေးထိုးပြီးချိန်ကစလို့ အလုံးအရင်းနဲ့ ရောက်ရှိလာပါတယ်။

RCSS/SSA အဖွဲ့အနေနဲ့ ၂၀၀၉ ခုနစ်ကလည်း အရှေ့တောင်အာရှ အကြီးဆုံး ရေကာတာ ဖြစ်လာဖွယ်ရှိနေတဲ့ သံလွင်မြစ်ပေါ်က မိုင်းတုံ တာဆန်းလျှံစီမံကိန်း (လျှပ်စစ်ကို တရုတ်နဲ့ ထိုင်းကို ၉၀ ရာခိုင်နှုန်းပေးပို့ဖို့ သဘောတူထား) တိုင်းတာမှုတွေ ပြုလုပ်ဖို့ လာတဲ့ တရုတ်အင်ဂျင်နီယာတွေ ကို ဖမ်းဆီးခဲ့ပါသေးတယ်။ (နောက်ပိုင်းမှာ ပြန်လွတ်ပေးခဲ့ ) RCSS/SSA အဖွဲ့နဲ့ UWSA “၀” တပ်ဖွဲ့အကြား လွန်ခဲ့တဲ့ နှစ်ပေါင်းနှစ်ဆယ်အတွင်း ဆယ်စုနှစ် တစ်စုကျော်အကြာ တိုက်ပွဲတွေ ပြင်းပြင်း ထန်ထန် ဖြစ်ခဲ့ဖူးပါတယ်။

(၂) ရှမ်းပြည်နယ်အတွင်းက ရေအားလျှပ်စစ်စီမံကိန်း ဆန္ဒပြပွဲတွေ
.
ပြီးခဲ့တဲ့ စက်တင်ဘာလ ၂၆ ရက်နေ့ကပဲ သီပေါမြို့နယ် တာလုံကျေး ရွာက ဒေသခံ ရှမ်းရွာသား ၅၀၀ လောက်ဟာ နမ္မတူမြစ် ( ခ) မြစ်ငယ် ( ခ ) ဒုဋ္ဌ၀တီမြစ်ပေါ်မှာ တည်ဆောက်နေတဲ့ အထက်ရဲရွာရေကာတာနဲ့ “၀” တပ်ဖွဲ့က ဆောက်လုပ်နေတဲ့ သီပေါမြို့နယ်က လျှပ်စစ်ဓာတ်အား စီမံကိန်း အပါအ၀င် စီမံကိန်းအားလုံး ရပ်တန့်ပေးဖို့အတွက် ဆန္ဒပြခဲ့ကြပါတယ်။ သူတို့နေထိုင်တဲ့ တာလုံကျေးရွာဟာ မြစ်ငယ်မြစ်ပေါ်က လျှပ်စစ်ဓာတ်အား စီမံကိန်းကြောင့် ရေနှစ်မြုပ်ရမယ့် ကျေးရွာဖြစ်ပါတယ်။ သူတို့ ရပ်တန့်ခိုင်းတဲ့ စီမံကိန်းဟာ တရုတ် ကုမ္ပဏီတွေက တည်ဆောက်နေပြီး တိုင်းတာ မှုတွေ ပြုလုပ်တဲ့ ကုမ္ပဏီတွေထဲမှာ ဆွစ်ဇာလန် ၊ ဂျာမနီ စတဲ့ ကုမ္ပဏီ အချို့လည်းပါဝင်ပါတယ်။ မြစ်ငယ်မြစ် ( ခေါ် ) ဒုဋ္ဌ၀တီ မြစ်ပေါ်မှာ တည်ဆောက်ဖို့ ရည်ရွယ်ထားတဲ့ စီမံကိန်းကတော့ လေး ၊ ငါးခု ရှိနေပြီး အများစုက ပွင့်လင်းမြင်သာမှု မရှိပါဘူး။ “၀” တပ်ဖွဲ့နဲ့ သက်ဆိုင်တယ်ဆိုတဲ့ အထက်မှာ ဖော်ပြခဲ့တဲ့ စီမံကိန်းတွေထဲမှာ သီပေါမြို့နယ်ထဲက ဒုဋ္ဌ၀တီမြစ်ပေါ်က စီမံကိန်းလည်းပါဝင်ပါတယ်။

ဒုဋ္ဌ၀တီ မြစ်နားက စီမံကိန်းတွေနားမှာ SSPP/SSA ရှမ်းတပ်မတော် မြောက် ပိုင်းနဲ့ အစိုးရ တပ်မတော် မကြာခဏ တိုက်ပွဲတွေ ဖြစ်ပွားခဲ့ဖူးပါတယ်။ SSPP/SSA နဲ့ တပ်မတော်တို့အကြား သံလွင်စီမံကိန်းဖြစ်တဲ့ နောင်ဖဒေသ မှာလည်း ၂၀၁၃ ခုနစ်အတွင်းက တိုက်ပွဲတွေ ပြင်းပြင်းထန်ထန် ဖြစ်ဖူး တာကြောင့် ဒေသခံ ထောင်နဲ့ချီ နေရပ်စွန့်ခွာ ပြေးခဲ့ရဖူးပါတယ်။

ရှမ်းပြည်နယ်အတွင်း သံလွင်မြစ်ပေါ်မှာ သံလွင်ရေကာတာတွေ တည်ဆောက်ဖို့ လျာထားတာ သုံးခု ရှိပြီး ကွန်လုံ ၊ နောင်ဖ ၊ နဲ့ တာဆန်း (မိုင်းတုံ ) တို့ ဖြစ်ပါတယ်။ နောင်ဖစီမံကိန်း ရပ်တန့်ဖို့နဲ့ မိုင်းတုံ ( တာဆန်း ) စီမံကိန်း ရပ်တန့်ဖို့ ဆန္ဒပြပွဲတွေက မကြာခဏ ဖြစ်ပွားနေတာ ရှိပါတယ်။

သံလွင်စီမံကိန်း အားလုံးရဲ့ ရင်းနှီးမြှုပ်နှံသူဟာ ထုံးစံအတိုင်း တရုတ်ဖြစ်ပြီး ထွက်ရှိတဲ့ လျှပ်စစ်အားလုံးနီးပါးဟာ တရုတ်နဲ့ ထိုင်းနိုင်ငံ ကို ရောက်ရှိဦးမှာပါ။ နောင်ဖ စီမံကိန်းဟာ လားရှိုးနဲ့ ဟိုပန်မြို့နယ်အကြား သံလွင်မြစ်ပေါ်မှာ တည်ရှိပြီး ၂၀၀၉ ခုနစ်က စစ်အစိုးရနဲ့ တရုတ် အစိုးရအကြား နားလည်မှု စာချွန်လွှာ ရေးထိုးခဲ့တာပါ။ နောင်ဖ စီမံကိန်း အရှေ့ဘက်မှာတော့ ၀ ဒေသ ရှိပြီး ၊ သံလွင်မြစ် အနောက်ဘက်ကမ်းကတော့ ရှမ်းနဲ့ တအာင်းပလောင် လက်နက်ကိုင်တွေ လှုပ်ရှားရာဒေသ ဖြစ်ပါတယ်။ မဂ္ဂါဝပ် ၁၂၀၀ ထွက်ရှိမယ့် လျှပ်စစ်ဓာတ်အားတွေကို တရုတ်နိုင်ငံ က ၉၀ ရာခိုင်နှုန်းရရှိမှာပါ။ စီမံကိန်းကြောင့် ဒေသခံ ထောင်ပေါင်းများ စွာက နေရပ်စွန့်ခွာ ရမှာဖြစ်ပါတယ်။

မိုင်းတုံ ( တာဆန်းလျှံ ) စီမံကိန်းကတော့ မြန်မာပြည်မြေပုံကို ကြည့်မယ်ဆိုရင် ရှမ်းပြည်နယ် ကယားပြည်နယ် အစပ် သံလွင်မြစ် ချိုးကွေ့သွားတဲ့ အနားမှာ တည်ရှိပြီး သံလွင်မြစ်နဲ့ ထိုင်းနယ်စပ်မျဉ်း အပြိုင်ဒေသနားမှာပါ။ ထွက်ရှိလာတဲ့ လျှပ်စစ်ဓာတ်အား အများစုက ထိုင်းနဲ့ တရုတ်ကို ပေးပို့ရမှာဖြစ်ပါတယ်။ ၉၀ ရာခိုင်နှုန်းပါ။

ထိုင်းနယ်စပ်အနီးမှာ RCSS/SSA ရဲ့ ဌာနချုပ်ရှိသလို တာချီလိတ် ကနေ အောက်ဘက် နယ်စပ်မျဉ်း အဲဒီ မိုင်းတုံ ဒေသအထိ “၀” လက်နက်ကိုင် UWSA လည်း ရှိပါတယ်။ မိုင်းတုံ ရေကာတာကြောင့် အလွန်လှပတဲ့ ကွန်ဟိန်းဒေသ ( သံလွင်မြစ် အနောက်ဘက်ကမ်း ) ကျွန်းတစ်ထောင်ဒေသ ဟာ ရေမြုပ်မယ့် ဧရိယာထဲမှာ ပါသွားမှာဖြစ်ပါတယ်။ ကွန်ဟိန်းမြို့နယ် အတွင်း အနည်းဆုံး လူဦးရေ ၅ သောင်းလောက် နေရပ်စွန့်ခွာ ထွက်ပြေးရမှာ ဖြစ်ပါတယ်။ ဒါတောင် မြစ်အနောက်ဘက်ကမ်း ဒေသကိုပဲ တွက်ချက်ထားတာဖြစ်တယ်လို့ ကွန်ဟိန်းလွှတ်တော် ကိုယ်စားလှယ် နန်းခင်ထားရီက ပြောပါတယ်။ တစ်ချိန်တည်းမှာလည်း “၀” တောင်ပိုင်း စခန်းတွေကို တပ်မတော်က ဆုတ်ခိုင်းတာတောင် မဆုတ်တဲ့ ကိစ္စတွေက ရှိနေပါသေးတယ်။

(၃) သံလွင်စီမံကိန်း ဆက်လုပ်မယ်ဆိုရင် ရင်ကြားစေ့ရေး ထိခိုက်နိုင်တယ် ဆိုတဲ့ ဦးခွန်ထွန်းဦး
.
တိုင်းရင်းသားတွေရဲ့ သဘောဆန္ဒတွေမပါဘဲ သံလွင်မြစ်ပေါ်မှာ ဆည်စီမံကိန်းတွေ ဆက်လက်ဆောင်ရွက်မယ် ဆိုရင် အမျိုးသားရင်ကြားစေ့ရေး ထိခိုက်နိုင်မယ်လို့ ရှမ်းတိုင်းရင်းသားများ ဒီမိုကရေစီ အဖွဲ့ချုပ် ဥက္ကဋ္ဌ ဦးခွန်ထွန်းဦးက စက်တင်ဘာလ ၂၈ ရက်နေ့က ပြောပါတယ်။ သူပြောခဲ့တာက “တိုင်းရင်းသားအားလုံး နယ်မြေတွေမှာ ပစ္စည်းထုတ်တယ်။ တိုင်းရင်းသားတွေ အတွက် ဘာမှလည်း ခံစားခွင့်မရှိဘူး။ ဒုတိယ တာဝန်ဖြစ်တဲ့ တန်းတူရေး ကိုယ်ပိုင်ပြဋ္ဌာန်းခွင့်ကို တည်ဆောက်မယ်ဆိုရင် ဘယ်လိုလုပ် ရှောရှောရှူရှူ သွားလို့ရမလဲဆိုတာ မေးခွန်းထုတ်စရာ ဖြစ်လာပြီ၊ သံလွင်ကို ဆည်တွေ ဆောက်ရမယ်။ ကျွန်တော်တို့ ခံစားခွင့်အရ သက်ဆိုင်ရာ တိုင်းရင်းသားတွေရဲ့ ဆန္ဒမပါဘဲ ဆက်သွားဖို့ဆိုရင် အမျိုးသားရင်ကြားစေ့ရေး ဆိုတာ ကြာသထက် ကြာသွားဦးမယ်။ ကံဆိုးရင်လည်း ငြိမ်းချမ်းရေးကို ထိခိုက်နိုင်တယ်” လို့ ဦးခွန်ထွန်းဦးက စက်တင်ဘာလ ၂၈ ရက်နေ့က သံလွင်ဆည်ကြောင့် ကျွန်းတစ်ထောင် ကွယ်ပျောက်တော့မယ်ဆိုတဲ့ မှတ်တမ်းရုပ်ရှင် ပြသတဲ့ အခမ်းအနားမှာ ပြောပါတယ်။

ရှမ်းအင်အားစုတွေကတော့ အစိုးရသစ်က သံလွင်စီမံကိန်းတွေ အကုန်လုံးကို ဆက်လုပ်ဖို့ ဆုံးဖြတ်လိုက်ရင်လည်း ဒေသခံပြည်သူတွေရဲ့ ဆန္ဒနဲ့အညီ ဆက်လက် ဆန့်ကျင်သွားမယ်လို့ ဆိုပါတယ်။ တစ်ချိန်က NLD ရဲ့ ကာလရှည် မဟာမိတ်ဟောင်း ရှမ်းအင်အားစုတွေနဲ့ သံလွင်ရေကာတာ ကိစ္စတွေမှာ NLD အစိုးရ အခန့်မသင့် ထိပ်တိုက် တွေ့နိုင်တဲ့ အခြေနေလို့ ဆိုရမှာပါ။ မြန်မာပြည် က ဖြစ်ရပ်တွေနဲ့ ဆန့်ကျင်ဘက်အနေနဲ့ တရုတ်နိုင်ငံမှာတော့ သံလွင်မြစ်ပေါ် မှာ ဆည်တွေ တည်ဆောက်ဖို့ ရည်ရွယ်ခဲ့ပေမယ့် ဒေသခံတွေရဲ့ အကြီးအကျယ် ကန့်ကွက်မှုတွေ ကြောင့် ဆောက်လက်စ ဆည်တွေ ဆောက်ပြီးသွားတဲ့ ဆည်တွေပါ ပြန်ဖျက်ခဲ့ရပါတယ်။ တစ်ဖက်မှာလည်း သံလွင်မြစ်တစ်လျှောက်မှာ အလွန်ရှားပါးတဲ့ မျိုးစိပ်တွေ ၊ ပန်းမန်တွေရှိတဲ့အပြင် မတူကွဲပြားရှေးကျတဲ့ မျိုးနွယ်စုတွေ မီတင်းနေထိုင်ကြ တာကြောင့် သံလွင်ကို UNESCO ရဲ့ ထိန်းသိမ်းဧရိယာအဖြစ် တရုတ်နိုင်ငံမှာ သတ်မှတ်ထား ခဲ့ပါတယ်။ ဒါကြောင့် တရုတ်နိုင်ငံမှာ ဆောက်ခွင့် မရှိတော့တဲ့အတွက် မြန်မာနိုင်ငံကနေ ထုတ်ယူဖို့ စဉ်းစားတာလား ဆိုတာ သံသယ၀င်စရာရှိပါတယ်။

ရှမ်းမှာရှိတဲ့ လျှပ်စစ်စီမံကိန်းတွေ အတော်များများကို ရှမ်းအင်အားစုတွေ အပါအ၀င် ဒေသခံတွေ ကန့်ကွက်နေတာ သိပ်တော့ မဆန်းပါဘူး။ အများစုဟာ နှစ်ပေါင်းများစွာ စီမံကိန်းကြောင့် နေရပ်စွန့်ခွာပေးရတဲ့ ဒဏ် လျော်ကြေး ကုစားမှုတွေ မရတဲ့ ဒဏ် ကိုယ့်ဒေသက ထွက်ရှိတဲ့ လျှပ်စစ် ၊ ဥပမာ လောပိတ လျှပ်စစ်ဆိုရင် ဘီလူးချောင်းက ရှမ်းပြည်နယ် ကနေစ လောပိတအတွက် ရေကာတာဖြစ်တဲ့ မိုးဗြဲရေကာတာက ရှမ်းပြည်နယ်အတွင်းမှာရှိပေမယ့် ဒေသခံတွေ လျှပ်စစ်မရတာတွေ ရှိခဲ့တာ ၊ ကျိုင်းတောင်း ရေအားလျှပ်စစ် စီမံကိန်းဆိုရင်လည်း ရှမ်းမှာပဲရှိပေမယ့် အနီးနားက ရွာတွေ လျှပ်စစ်မရ စတဲ့ ကိစ္စရပ်ပေါင်းမြောက်မြားစွာ ကြုံဖူးတာ ကြောင့်ဖြစ်ပါတယ်။ ပြီးတော့ စီမံကိန်းအကြောင်း ပြ စစ်ဆင်ရေး ထိုးတာ ၊ စီမံကိန်းနယ်မြေကနေ အထက်စီးယူပြီး အခိုင်အမာ စခန်းတွေ တည်ဆောက်ပြီး ပစ်ခတ်တာစတဲ့ ကိစ္စရပ်တွေကို နှစ်ပေါင်းများစွာ ကြုံတွေ့ခဲ့ရတာကြောင့် ဖြစ်ပါတယ်။ အခု သံလွင်စီမံကိန်းကြောင့် ဖယ်ပေးရမယ့် ကွန်ဟိန်းဒေသဆိုရင် စစ်အစိုးရလက်ထက် ၁၉၉၆ နဲ့ ၉၈ ခုနစ် ၀န်းကျင်တွေတုန်းက တပ်မတော်ရဲ့ ဖြတ်လေးဖြတ် စီမံချက်ဒဏ်ကို အကြီးအကျယ်ခံခဲ့ရတဲ့ ဒေသလည်း ဖြစ်ပါတယ်။ အခုထိလည်း EIA ၊ SIA လုပ်နေတာတွေက ပွင့်လင်းမြင်သာမှုမရှိပါဘူး။ ဒေါ်အောင်ဆန်းစုကြည်ရဲ့ ထိုင်းခရီးစဉ်အတွင်းမှာ ထိုင်းတာဝန်ရှိသူအချို့က မိုင်းတုံ ရေကာတာ တည်ဆောက်ရေးနဲ့ ပတ်သက်လို့ ဆွေးနွေးခဲ့ဖွယ်ရှိတယ်လို့ ထိုင်းအစိုးရနဲ့ နီးစပ်သူ အချို့က ဆိုပါတယ်။ ဒေါ်အောင်ဆန်းစုကြည် ထိုင်း မလာခင် ရက်ပိုင်းအတွင်း ချင်းမိုင်မှာရှိတဲ့ မြန်မာမီဒီယာအချို့ကို ထိုင်းတာဝန်ရှိသူတွေက ခေါ်တွေ့ပြီး မိုင်းတုံဆည် ဆောက်ရင် ဘယ်လိုနေမလဲဆိုတာ မေးမြန်းခဲ့တာတွေလည်း ရှိခဲ့ပါတယ်။

(၄) လုပ်ခဲ့တာ အစိုးရဟောင်းဆိုပေမယ့် ၊ မရှင်းတတ်ရင် ရှုပ်နိုင်တဲ့ အခြေနေမှာရှိနေ
.
ဦးခွန်ထွန်းဦး ပြောစကားအရဆိုရင် ရှမ်းမှာရှိတဲ့ အင်အားစု တော်တော် များများက စီမံကိန်းတွေကို ကန့်ကွက်မယ့် သဘောရှိပါတယ်။ ဒါပေမဲ့ အသံပျောက်နေတာက တရုတ်နဲ့နီးတဲ့ “၀” UWSA ဦးဆောင်တဲ့ အုပ်စုတွေပဲဖြစ်ပါတယ်။ သေချာကြည့်မယ်ဆိုရင် သံလွင်စီမံကိန်း ရပ်တန့်ရေးလှုပ်ရှားမှုတွေမှာ ကိုးကန့် MNDAA အပါဝင် ၊ “၀” အဖွဲ့အစည်းတွေ အသံတိတ်နေပါတယ်။ ရှမ်းအဖွဲ့အစည်းတွေက စက်တင်ဘာ လ ၂၈ ရက်နေ့က ဖြန့်ဝေတဲ့ နောင်ဖရေကာတာနဲ့ ပတ်သက်တဲ့ အချက်အလက်မှာ ကြည့်မယ်ဆိုရင် ဒေသခံ လူထုကို ထိခိုက်စေသည့်တိုင် UWSA အား တရုတ်၏ ဖိအားပေးမှုကို ဝေဖန်သင့်သည် ဆိုပြီး ဖော်ပြထားပါတယ်။ UWSA “၀” တပ်ဖွဲ့အနေနဲ့ အဲဒီသဘော အတိုင်းသာ ဆက်လက် ရပ်တည်မယ်ဆိုရင် သံလွင်ရေကာတာ ကို ဆန့်ကျင်တဲ့ အခြားမျိုးနွယ်စုတွေရဲ့ သဘောဆန္ဒနဲ့ ဆန့်ကျင်နေတယ်။

တိုင်းရင်းသားတွေ အကြား သွေးကွဲပြီး ငြိမ်းချမ်းရေးရစေမှာ မဟုတ်ဘူးလို့လည်း ဖော်ပြထားပါတယ်။ ဒါကြောင့် တရုတ်နဲ့ “၀” ရဲ့ စီမံကိန်းတွေရှိနေတဲ့ ရှမ်းပြည်နယ်မြောက်ပိုင်း မြစ်ငယ်မြစ် တစ်လျှောက် ဧရိယာတွေမှာ RCSS/SSA ရှမ်းတောင် တပ်ဖွဲ့က အပြည့်အ၀ နေရာဝင်ယူဖို့ ကြိုးစားသလား ဆိုတာလည်း မေးခွန်းထုတ်စရာ ရှိနေပါတယ်။ UWSA အပါဝင် “၀” တပ်ဖွဲ့နဲ့ အပေါင်းအပါတွေက အသံတိတ်နေပေမယ့် သံလွင်စီမံကိန်း ဆက်စပ်နယ်မြေဖြစ်တဲ့ “၀” ဒေသ ဟိုပန်ဟာ မကြာခဏ ငလျင်လှုပ်တတ်တဲ့ နေရာပါ။ ပြီးခဲ့တဲ့လက ငလျင်အသေးစား လှုပ်ပြီး မိုးရွာခဲ့တာကြောင့် တောင်ပေါ်က ရွှံ့တွေက ဟိုပန်တစ်မြို့လုံးကို ဖုံးလွှမ်းခဲ့ပါတယ်။ သံလွင်မြစ် အနောက်ဘက်ကမ်းမှာလည်း “၀” လူမျိုးတွေ နေထိုင်တဲ့ရွာတွေ ရှိတဲ့အတွက် နောင်ဖစီမံကိန်းသာ အကောင်ထည်ဖော်ခဲ့ရင် အဲဒီ “၀” လူမျိုးတွေရဲ့ ကျေးရွာတွေ လည်း ရွှေ့ပြောင်းပေးရမှာပါ။

အမှန်တော့ ရှမ်းပြည်နယ်အတွင်းက စီမံကိန်းအားလုံးဟာ အစိုးရ အဟောင်းတွေက သဘောတူခဲ့တာ ဆိုပေမယ့် အဲဒီအဟောင်းတွေရဲ့ အရှုပ်ထုပ်တွေဟာ ၂၀၀၈ အခြေခံဥပဒေအောက် ၀င်လာတဲ့ အရပ်သား အစိုးရသစ်မှာလည်း လက်ဆင့်ကမ်းရမယ့် တာဝန်ရှိနေပြန်ပါတယ်။ အခုအထိ အစိုးရသစ်ရဲ့ ရှမ်းပြည်နယ်အတွင်းက အငြင်းပွားဖွယ် ရေအား လျှပ်စစ်စီမံကိန်းတွေနဲ့ ပတ်သက်လို့ ပြုမူဆောင်ရွက်မှုတွေက ပွင့်လင်းမြင်သာမှု မရှိပါဘူး။ ဥပမာအားဖြင့် ရှမ်းပြည်နယ်အစိုးရ ရဲ့ ပြောခွင့်ရပုဂ္ဂိုလ် ဦးစိုးညွှန့်လွင်က နောင်ဖ စီမံကိန်းအပါဝင် စီမံကိန်း ၂၀ ကျော်ဟာ ပြန်လည်စိစစ်ရမဲ့ စီမံကိန်းတွေဖြစ်တယ်လို့ ဘီဘီစီမြန်မာ ပိုင်းနဲ့ အင်တာဗျူးမှာ ပြောဆိုခဲ့ပါတယ်။ တစ်ခါ နောင်ဖကို မလုပ်ဘူးလို့ လားရှိုးမှာလုပ်တဲ့ လူထုတွေ့ဆုံပွဲမှာ ပြောပါတယ်။ နေပြည်တော် အစိုးရကတော့ စွမ်းအင်အတွက် ရေအားလျှပ်စစ်ကနေ ထုတ်ယူမယ်လို့ ရက် ၁၀၀ သတင်းစာရှင်းလင်းမှုမှာ ပြောဆိုခဲ့ပြီး ပြီးခဲ့တဲ့အပတ်က ရှမ်းပြည်နယ် လွှတ်တော်မှာ သံလွင်ရေအားလျှပ်စစ်နဲ့ ရေကာတာ စီမံကိန်းတွေနဲ့ ပတ်သက်လို့ ဆက်လက် ဆောင်ရွက်ဖို့ ရှိမရှိ မေးခွန်းကိုတော့ ရှမ်းပြည်နယ်အစိုးရ ပြောခွင့်ရ ပုဂ္ဂိုလ် ဦးစိုးညွှန့်လွင်က ဒါဟာ သူတို့နဲ့ မဆိုင်တော့တဲ့အတွက် ပြည်ထောင်စု အဆင့်မှာသာ မေးမြန်းဖို့ ဆိုပြီး ပြောပြန်ပါတယ်။ တစ်ပါတီတည်းက အစိုးရဖြစ်နေပေမယ့် ပြည်နယ်နဲ့ ဗဟို ရှေ့နောက်မညီတဲ့ ပြောဆိုမှုတွေပါ။ လတ်တလောအတွင်းမှာ ပဲ နောင်ဖရေကာတာနဲ့ ပတ်သက်လို့ လုံခြုံရေးထူထူထပ်ထပ်ချထားပြီး EIA ၊ SIA လူမှု စီးပွား အကျိုးသက်ရောက်မှု ရှိနိုင်မှု ၊ သဘာဝ ပတ်ဝန်းကျင် ဆိုင်ရာ ထိခိုက်နစ်နာမှုတွေကို SMEC ကုမ္ပဏီကနေ လုပ်ဆောင်နေပါ တယ်။ ဒေသခံတွေဆီ မေးမြန်းမှု အရ ပွင့်လင်းမြင်သာမှုလည်း မရှိပါ။

ရှမ်းပြည်နယ်ထဲက ရေအားလျှပ်စစ်စီမံကိန်းတွေကို ကြည့်မယ်ဆိုရင် စီမံကိန်းစဖို့လုပ်နေတာ ၊ စနေတာတွေရှိပေပြီး ကန့်ကွက်သူတွေလည်း ကန့်ကွက်တာတွေရှိနေပေမယ့် မကန့်ကွက်တဲ့ အဖွဲ့တွေက တပ်မတော်နဲ့နီးစပ်တဲ့ ဒေသခံ ပြည်သူ့စစ်အဖွဲ့တွေ ၊ “၀” UWSA လို အုပ်စုတွေသာ ဖြစ်နေပါတယ်။ UWSA အနေနဲ့ အစိုးရနဲ့ တင်းမာမှုရှိတဲ့ အဖွဲ့ချင်းအတူတူ သံလွင်မြစ် အနောက်ဘက်ကမ်းက စီမံကိန်းတွေကို မျက်စပစ် အကောင်ထည်ဖော်နေတာ အားလုံး တရုတ်စီမံကိန်းတွေမှာ တစ်ခွန်းမှ မပြောဖြစ်နေတဲ့ ကိစ္စတွေက ဘ၀တူ တိုင်းရင်းသား အင်အားစုချင်းအတူတူ ကိုယ်ရှင်ရင်ပြီးရော ဘယ်သူသေသေဆိုတဲ့ သဘောလည်း သက်ရောက်နေပါတယ်။ ဒါက သူ့အတွက် ဟုတ်သယောင်ယောင် ရှိပေမယ့် ရေရှည် တိုင်းရင်းသား ညီညွတ်ရေးမှာ ပြသ၁နာရှိပါတယ်။ လူ့စည်း ၊ ဘီလူးစည်း ဆိုတာ ရှိတယ်မဟုတ်လား။

ရှမ်းကလက်နက်ကိုင် တိုင်းရင်းသား အင်အားစုတွေကို ကြည့်မယ်ဆိုရင် ဖက်ဒရယ်ကို တောင်းတဲ့ အုပ်စု SSPP/SSA ၊ ကေအိုင်အေ ကချင်လွတ်မြောက်ရေး တပ်မတော်တို့လို UNFC အဖွဲ့တွေက တစ်စု ၊ ကိုးကန့် စစ်ပွဲအပြီး UWSA ၊ MDAA တို့နဲ့ ပိုမိုနီးစပ်တဲ့ ဆက်ဆံရေးရှိသွားတဲ့ တအာင်းပလောင် TNLA/PSLF အဖွဲ့လို ကိစ္စနဲ့ သူတို့က တစ်အုပ်စု (တအာင်းပလောင်အဖွဲ့ အနေနဲ့ မူလ လက်ဦးဆရာဖြစ်တဲ့ KIA နယ်မြေမှာ ကျင်းပတဲ့ မိုင်ဂျာယန် တိုင်းရင်းသား ဆွေးနွေးပွဲတောင် မလာတော့ ) UWSA နဲ့နှစ်ရှည်လများ တိုက်ခဲ့တဲ့ RCSS/SSA အဖွဲ့က တစ်စုဆိုပြီး တွေ့နိုင်ပါတယ်။ အဲဒီအဖွဲ့တွေကို ကြည့်မယ်ဆိုရင် အကုန်လုံးက တပ်မတော်နဲ့ အစိုးရဆီက တိုင်းရင်းသား အခွင့်အရေး တောင်းနေတာခြင်း တူပေမယ့်အုပ်စုကွဲ ၊ အကျိုးစီးပွားကွဲမှုတွေကြောင့် ဆက်ဆံရေး မကောင်းကြတာလည်း အသေချာပါပဲ။ တစ်ချိန်တည်းမှာလည်း တအာင်းပလောင် လူမှုအသင်းအဖွဲ့တွေလည်း အငြင်းပွားဖွယ် စီမံကိန်းတွေနဲ့ ပတ်သက်လို့ အသံမထွက်သလောက် ဖြစ်နေပါတယ်။

“၀” ပါတီအနေနဲ့ သံလွင်မြစ်အနောက်ဘက်ကမ်းက တန့်ယန်းဒေသကို “၀” ပြည်နယ် သတ်မှတ်ပေးရေး တောင်းဆိုရာမှာ ထည့်သွင်းတောင်းဆို ခဲ့တာကလည်း တခြားအင်အားစုတွေ အတွက် စိုးရိမ်စရာ အခြေအနေ ဖြစ်စေပြီး သံလွင်မြစ်အနောက်ဘက်ကမ်း သီပေါမြို့နယ်လောက်အထိကို “၀” တပ်ဖွဲ့က တရုတ်စီမံကိန်းတွေနဲ့ အတူ လျှပ်စစ်တွေ ရယူချင်နေတာဟာ တိုင်းရင်းသားအချင်းချင်း တိုက်ခိုက်မှုကို ပိုမိုအားကောင်းစေမယ့် အချက်တွေပဲ ဖြစ်ပါတယ်။ ထူးခြားမှုကတော့ ကိုးကန့် စစ်ပွဲမှာ ပါဝင်ခဲ့တဲ့ တအာင်းပလောင် အဖွဲ့အနေနဲ့ နမ္မတူ မြစ်ငယ်မြစ် တစ်လျှောက်က ရေကာတာ စီမံကိန်းတွေနဲ့ ထိစပ်နယ်မြေတွေမှာ လှုပ်ရှားနေခဲ့တာဖြစ်ပြီး KIA နဲ့လည်း ဆက်ဆံရေး အေးခဲလာချိန်မှာ ဆက်လက် ရပ်တည်နေနိုင်မှုပဲ ဖြစ်ပါတယ်။

မြန်မာပြည်သူအများစု အထူးသဖြင့် ပြည်မနေပြည်သူတွေ အကြားမှာ ရေပန်းစားတဲ့ ကိစ္စက မြစ်ဆုံ ကိစ္စသာ ဖြစ်ပါတယ်။ ဒါပေမဲ့ သံလွင်ကိစ္စကိုလည်း မပေါ့ဖို့လိုပါတယ်။ သံလွင်ဟာ ရှမ်းတင်မကဘဲ မွန်၊ ကရင် ၊ ကရင်နီနယ်တွေကိုပါ ဖြတ်သွားတဲ့ မြစ်ဖြစ်တာကြောင့် ဖြစ်ပါတယ်။ ကရင်နီနဲ့ ကရင်ပြည်နယ်ထဲမှာလည်း သံလွင်စီမံကိန်းတွေ ရှိနေပါတယ်။ တစ်နည်းအားဖြင့်ဆိုရရင် သံလွင်ဟာ ပြည်ထောင်စု မြစ်လို့တောင် ဆိုနိုင်ပါတယ်။ ပြန်ကြည့်မယ်ဆိုရင် ရှမ်းပြည်နယ်အတွင်း အင်အားအကြီးဆုံး ဖြစ်တဲ့ UWSA “၀” တပ်ဖွဲ့ဟာ အငြင်းပွားဖွယ် တရုတ်စီမံကိန်းတွေ လူထုက ဆန့်ကျင်နေတဲ့ တရုတ်ရင်းနှီးမြှုပ်နှံမှုနဲ့ တည်ဆောက်တဲ့ ရေအားလျှပ်စစ် စီမံကိန်းတွေမှာ လိုလားသယောင် သံယောင်လိုက်နေတဲ့ ကိစ္စက တိုင်းရင်းသား အချင်းချင်း ညီညွတ်ရေးအတွက် ပြဿနာရှိရုံမက ပထ၀ီနိုင်ငံရေးအရပါ မေးခွန်းထုတ်စရာ ဖြစ်လာနေပါတယ်။

အချူပ်အားဖြင့်ဆိုရင်တော့ ရှမ်းပြည်နယ်အတွင်းမှာ တည်ဆောက်နေဆဲ ဒါမှမဟုတ် တည်ဆောက်ဖို့ ရည်ရွယ်ထားတဲ့ ရေအားလျှပ်စစ်စီမံကိန်းတွေ ၊ ရေကာတာ စီမံကိန်းတွေဟာ မတူညီတဲ့ အကျိုးစီးပွား ဒေသခံတွေအတွက် အကျိုးနည်းပါးမှုတွေကြောင့် ပြသ၁နာတွေ ပိုမိုရှုပ်ထွေးလာနိုင်တဲ့ စီမံကိန်းတွေ ဖြစ်တာကြောင့် ပွင်းလင်းမြင်သာစွာ ဘက်လိုက်မှု မရှိဖြေရှင်းကြဖို့ ၊ တစ်ဖွဲ့ချင်း အကျိုးစီးပွားကိုသာ ရှေးရှု မဆုံးဖြတ်ကြဖို့ လိုအပ်နေပါတယ်။

စိုင်းထွန်းအောင်လွင်
http://www.theladiesnewsjournal.com/articles/thu-2016-09-29-1722/3621
The Ladies News


ဒိန်းမတ်နိုင်ငံသည် မြန်မာနိုင်ငံ၏ ဖွံ့ဖြိုးရေးနှင့် ငြိမ်းချမ်းရေးကို အထောက်အကူ ဖြစ်စေရန် လာမည့် လေးနှစ်အတွင်း ကရိုနာ သန်းရာချီ၍ ထောက်ပံ့ပေးမည်ဟု ဒိန်းမတ်ဝန်ကြီးချုပ် လာစ်လော့ကီရာစ်မူဆန်က ပြောကြားသည်။

ဝန်ကြီးချုပ်သည် နယူးယောက်မြို့၌ ကုလသမဂ္ဂ အထွေထွေညီလာခံ တက်ရောက်စဉ် စက်တင်ဘာ ၂၆ က နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နှင့် တွေ့ဆုံစဉ် ထိုသို့ပြောကြားခဲ့ခြင်းဖြစ်သည်။

မြန်မာနိုင်ငံ၏ ဖွံ့ဖြိုးရေးနှင့် ငြိမ်းချမ်းရေးအတွက် ဒိန်းမတ်နိုင်ငံက လာမည့်လေးနှစ်အတွင်း ခရိုနာသန်း ၄၇၀ (ဒေါ်လာ သန်း ၇၀ ကျော်) ခန့် ထောက်ပံ့မည်ဟု ဆိုသည်။ ၀န်ကြီးချုပ်က “ဒေါ်အောင်ဆန်းစုကြည်ဟာ ကျွန်တော်တို့ခေတ်ရဲ့ အကြီးကျယ်ဆုံး လွတ်မြောက်စေသူတစ်ဦးဖြစ်ပြီး ဒီမိုကရေစီရေးအတွက် တိုက်ပွဲဝင်ခဲ့သူပါ” ဟု ပြောကြားသည်။ ယင်းက “ဒိန်းမတ်မှာ မြန်မာ့ဒီမိုကရေစီအင်အားစုတွေကို ဆယ်စုနှစ်များစွာ ထောက်ပံ့ခဲ့ပြီး အခုလမ်းကြောင်းမှန်ပေါ်မှာ ရှိနေပါတယ်” ဟု ဆိုသည်။

ယခုအစီအစဉ်မှာ နှစ်နိုင်ငံ ပူးပေါင်းဆောင်ရွက်မှုတွင် ပထမဆုံး အမှန်တကယ် ထောက်ပံ့မှုဖြစ်သည်။ မြန်မာနိုင်ငံတွင် ပြီးခဲ့သည့် နှစ်များအတွင်း ဖြစ်ပေါ်ခဲ့သည့် ဒီမိုကရေစီ ပြုပြင်ပြောင်းလဲမှုများကို ထောက်ခံမှုအဖြစ် ယခုကဲ့သို့ အကူအညီပေးခြင်း ဖြစ်သည်ဟု ဆိုသည်။
The Ladies News


KIA လိုင်ဇာရှေ့တန်းတပ်များ
KIA လိုင်ဇာရှေ့တန်းတပ်များ

ကချင်ပြည်နယ်အတွင်း တိုက်ပွဲတွေဟာ ရက်ခြားဆိုသလို ဖြစ်ပွားလာတာ အခုဆိုရင် ရက်သတ္တ ၂ပတ်ကျော် လောက်ရှိခဲ့ပြီး မနေ့ညနေခင်းပိုင်းကတော့ ကချင်လွတ်လပ်ရေးတပ်ဖွဲ့ KIA ဌာနချုပ်အနီးမှာ တိုက်ပွဲတွေပြင်းပြင်းထန်ထန် ဖြစ်ပွားခဲ့ပါတယ်။ ဒီကနေ့မှာလည်း အစိုးရစစ်တပ်ဖက်က မြစ်ကြီးနားကနေ လိုင်ဇာဒေသဖက်ကို စစ်ကူတွေထပ်မံသွားရောက်နေတာကြောင့် တိုက်ပွဲတွေ ပြင်းထန်လာမှာကို စိုးရိမ်မှုတွေလည်း ရှိနေပါတယ်။ ဒီသတင်းကိုတော့ ဗွီအိုအေမြန်မာပိုင်းရဲ့သတင်းထောက်ကိုမိုးဇော်က တင်ပြထားပါတယ်။

ကချင်လွတ်လပ်ရေးတပ်ဖွဲ့ KIA ဌာနချုပ် လိုင်ဇာအနီးမှာ ဒီလ ၁၅ရက်နေ့လောက်ကတည်းက စတင်ခဲ့ရာက ပြီးခဲ့တဲ့သောကြာနေ့က လေကြောင်းကနေ့ ပစ်ခတ်တိုက်ခိုက်တာတွေဖြစ်ခဲ့ပြီးနောက် ငြိမ်သက်နေခဲ့ပါတယ်။

အင်္ဂါနေ့မှာတော့ လက်နက်ကြီးနဲ့ပစ်ခတ်တာတွေရှိခဲ့သလို ဗုဒ္ဓဟူးနေ့မှာတော့ တိုက်ပွဲတွေ ပြင်းထန်ခဲ့တယ်လို့ TAT ခေါ် KIO ရဲ့ ထောက်ကူပြုအဖွဲ့က ပြောခွင့်ရသူ ဦးဒေါင်ခါးက ပြောပါတယ်။

“သံအမတ်လာတဲ့ည ကျနော်တို့ TAT ရုံးမှာ သူနဲ့ တွေ့ဆုံစကားပြောနေတဲ့အချိန်မှာ ၈ ချက်ပစ်တယ်။ မနေ့ကလည်း တိုက်နေကြတယ်။ လေယာဉ်နဲ့ သွားတယ် ဟိုဘက်မှာ မိုးအုံ့တော့ လေယာဉ်နဲ့မတိုက်ပဲ ပြန်သွားတယ်လို့ပြောတယ်။ ဒါပေမယ့် တပ် ထိုးတာ သေချာတယ်။ အကြိမ်အခေါက်ရေ တော်တော်လေးကြိုးစားကြရတယ်လို့ပြောတယ်။ ဒီနေ့တော့ ဖြစ်နေတယ်လို့ပဲ ကြားရေသေးတယ်။ အောက်ခြေသတင်းက မတက်သေးဘူး။”

KIOရဲ့ ထောက်ကူပြုအဖွဲ့ TATနဲ့ အမေရိကန်သံအမတ်ဟာ အင်္ဂါနေ့ ညနေ ၃နာရီလောက်က တွေ့ဆုံခဲ့တာဖြစ်ပါတယ်။

လောလောဆည်တိုက်ပွဲဖြစ်ပွားနေတဲ့နေရာတော့ မြစ်​ကြီးနား ဗန်မော်လမ်း အရှေ့ဘက်ခြမ်းရှိ အင်ခရန်တောင်ကြောက KIAရဲ့ Gidon စခန်းမှာဖြစ်ပွားခဲ့တာဖြစ်ပါတယ်။

လိုင်ဇာက KIOတာဝန်ရှိသူတဦးကတော့ ကြာသပတေးနေ့မှာ တိုက်ပွဲဖြစ်ပွားတာမကြားရသေးကြောင်း၊ ဗုဒ္ဓဟူးနေ့ကတော့ မနက်၈နာရီလောက်တည်းက အပြန်အလှန် လက်နက်ကြီးနဲ့ပစ်ခတ်ခဲ့ကြပြီး ညနေ၂နာရီကနေ ၄နာရီအထိမှာ အစိုးရတပ်ဖက်က KIA တပ်စခန်းကို ၅ကြိမ်လောက် ထိုးစစ်ဆင် တိုက်ခိုက်ခဲ့ကြောင်း ပြောပါတယ်။

တိုက်ပွဲဖြစ်ပွားတာမရှိပေမဲ့ စစ်အင်အားတွေ ထပ်မံပို့လွှတ်နေတာကြောင့် တိုက်ပွဲတွေ ပြင်းထန်လာနိုင်တယ်လို့ ကချင်ငြိမ်းချမ်းရေးအကျိုးဆောင်အဖွဲ့က ဦးအင်ရှန်ဆန်အောင်က ပြောပါတယ်။

“ဒီနေ့နောက်ဆုံးအခြေအနေကတော့ လေယာဉ်ရော၊ မြေပြင်ရောအကုန် စစ်ကြောင်းမျိုးစုံနဲ့တော့ သွားနေတာတော့တွေ့လိုက်တယ်။ မြစ်ကြီးနားနဲ့တော့ သူကစစ်ကြောင်းကတော့ တလျှောက်သွားနေတယ်ဆိုတော့ အဲဒီမှာလည်း တောက်လျှောက်နေရာယူထားတယ်ဆိုတော့ အဲဒီဘက် ၃- ၄ နေရာတွေ လောက်ကို သူတို့ထိုးစစ်ဆင်နေတယ်ခင်ဗျ။ KIO ၊ KIA ဌာနချုပ်ရှေ့က တပ်ရင်းတပ်ဖွဲ့တွေစခန်းကိုအားလုံးကို သူက ထိုးစစ်ဆင်နေတယ်။ ဒီအတိုင်းဆို၇င်တော့ အများကြီးပြင်းထန်နိုင်စရာရှိပါတယ်ခင်ဗျ။”

ပြီးခဲ့တဲ့ သောကြာနေ့တိုက်ပွဲမှာတော့ အစိုးရတပ်မတော်ဖက်က စစ်ရဟတ်ယာဉ်သုံးပြီး တိုက်ခိုက်ခဲ့တယ်လို့ KIO သတင်းထုတ်ပြန်ထားပါတယ်။

ဒီလို ကချင်ပြည်နယ်အတွင်းမှာ တိုက်ပွဲတွေပြင်းထန်နေချိန်မှာ အစိုးရရဲ့ ငြိမ်းချမ်းရေးကော်မရှင်နဲ့ တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် NCAလက်မှတ် မထိုးသေးတဲ့ တိုင်းရင်းသား လက်နက်ကိုင်တွေအကြား ဆွေးနွေးနေပါတယ်။ တိုင်းရင်းသားလက်နက်ကိုင်အဖွဲ့တွေက တနိုင်ငံလုံးအပစ်အခတ်ရပ်စဲရေးကြေညာပြီးမှသာ NCA ကို လက်မှတ်ရေးထိုးမယ်လို့ ပြောဆိုထားပြီး ငြိမ်းချမ်းရေးကော်မရှင်ကတော့ နှစ်ဖက်ဆွေးနွေးမှုဟာ တိုးတက်မှုရှိကြောင်း ပြောဆိုထားပါတယ်။

တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် NCA ကို တိုင်းရင်းသားလက်နက်ကိုင်အဖွဲ့ ၈ဖွဲ့သာ လက်မှတ်ရေးထိုးထားပြီး ကျန် လက်နက်ကိုင်အဖွဲ့ ၁၃ဖွဲ့ကတော့ လက်နက်ကိုင်အဖွဲ့အားလုံးပါဝင်မှသာ လက်မှတ်ထိုးမှာဖြစ်ကြောင်း သတင်းထုတ်ပြန်ထားပါတယ်။
VOA Burmese News



လွန်ခဲ့တဲ့ ၁၀ နှစ်အတွင်း အမေရိကန်ပြည်ထောင်စုမှာ လာရောက်အခြေချနေထိုင်သူ မြန်မာနိုင်ငံသားဦးရေဟာ ၁ သိန်း ၆ သောင်းနီးပါးရှိပါတယ်။ California ပြည်နယ်၊ San Francisco Bay ဒေသမှာဆိုရင် မြန်မာပြည်ကလာသူ ထောင်နဲ့ချီ အခြေချနေထိုင်နေကြပါတယ်။ သူတို့တတွေဟာ အမိမြန်မာပြည်မှာ ဒီမိုကရေစီအသွင်ကူးပြောင်းရေးရှေ့ရှုတဲ့ခြေလှမ်းတွေကို တွေ့မြင်ခဲ့ကြရပြီး မွေးစားမိခင်နိုင်ငံဖြစ်တဲ့ အမေရိကန်ပြည်ထောင်စုရဲ့ ဒီနှစ် ရွေးကောက်ပွဲမှာလည်း ဒီမိုကရေစီရေး လေ့ကျင်တဲ့အနေနဲ့ ပါဝင်ဆင်နွဲကြဖို့ ပြင်ဆင်နေကြပါပြီ။ VOA သတင်းထောက် Mike O’Sullivan ကသတင်းပေးပို့ထားတာကို ဒေါ်ခင်စိုးဝင်းကပြောပြပေးမှာပါ။

San Francisco မြို့အနီးမှာရှိတဲ့ အမေရိကန်နိုင်ငံသားခံယူဖို့ပြင်ဆင်တဲ့သင်တန်းမှာ သင်တန်းတက်နေသူတဦးဖြစ်တဲ့ ဒေါ်ကြင်သန်းက ဒီနိုင်ငံရဲ့ အခြေအနေနဲ့ အနှစ် ၅၀ စစ်အစိုးရအုပ်ချုပ်မှုအောက်မှာ ရှိခဲ့တဲ့ မြန်မာပြည်ရဲ့ အခြေအနေကွားခြားမှုကို ထောက်ပြလိုက်ပါတယ်။

“လွတ်လပ်မှုမရှိတာကတော့ နေရာတကာမှာပါဘဲ။ ကျမကလွတ်လပ်မှုကို လိုချင်လို့ ဒီနိုင်ငံကို လာခဲ့တာပါ။”

အမေရိကန်ပြည်ထောင်စုကိုရောက်နေတဲ့မြန်မာပြည်သားတွေကြားမှာတော့ အမေရိကန်နိုင်ငံခြားရေးဝန်ကြီးဟောင်း Hillary Clinton ကိုရေပန်းစားလူကြိုက်များလှပါတယ်။ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် အတိုက်အခံဘဝတုန်းက Hillary Clinton က ထောက်ခံခဲ့တာကို အသိအမှတ်ပြုနေကြဆဲဖြစ်ပါတယ်လို့ ကိုထက်ဝင့်ကပြောပါတယ်။

“မြန်မာပြည်အကြောင်း ကောင်းကောင်းသိတဲ့သူတယောက် အမေရိကန်သမ္မတ ဖြစ်ရင်တော့ သိပ်အထောက်အကူဖြစ်မယ်လို့ ကျနော်ကတော့ယူဆတာပါဘဲ။”

ကယ်လီဖိုးနီးယားပြည်နယ်မှာ နှစ်စဉ်ကျင်းပတဲ့ မြန်မာ့ရုပ်ရှင်ပွဲတော်ကတော့ မြန်မာပြည်သားတွေ စုစုစည်းစည်းတွေ့ဆုံကြပြီး မြန်မာပြည်ရဲ့ နိုင်ငံရေးဖြစ်ထွန်းမှုတွေနဲ့ ပတ်သက်ပြီးဆွေးနွေး ပြောဆိုနိုင်ကြတဲ့ပွဲတပွဲဖြစ်ပါတယ်။ ဒီပွဲတော်ကိုတက်ရောက်လာတဲ့ လူမှုရေးလုပ်ငန်းတွေ လုပ်ကိုင်နေတဲ့ နာမည်ကျော် ရုပ်ရှင်မင်းသား၊ ဒါရိုက်တာကျော်သူဟာဆိုရင် စစ်အစိုးရအဆက်ဆက် ဆင်ဆာ အပိတ်ခံခဲ့ရသူဖြစ်ပါတယ်။

“ဒီလိုပိတ်ဆို့မှုကြားထဲကနေပြီးတော့မှ ခက်ခက်ခဲခဲရပ်ခဲ့ရတဲ့အခါ အခုအစိုးရအပြောင်းအလဲဖြစ်တဲ့အခါမှာ တချို့နဂိုရှိတဲ့အစိုးရအပြောင်းအလဲရဲ့ သူ့ရဲ့အဆက်အနွယ်တွေရှိသေးတယ်။ ဒါတွေကိုလည်း ပြတ်ပြတ်သားသားလုပ်မှရမယ် ။ မှန်ကန်တဲ့ဥပဒေနဲ့ပဲ ထိန်းချုပ်မှရမှာ ၊ မျက်နှာမလိုက်တဲ့ ဥပဒေနဲ့ ထိန်းချုပ်မှရမှာပါ။”

အမိမြေမှာ ဒီထက်မကပိုပြီး ဒီမိုကရေစီရေးအပြောင်းအလဲတွေပိုပြီးတွေ့ချင်ကြသလို လာမယ့်အမေရိကန်ရွေးကောက်ပွဲကိုလည်း မျှော်လင့်ချက်တွေနဲ့အတူ စိုးရိမ်မှုတွေလည်းရှိနေကြပါတယ်။ အမေရိကန်နိုင်ငံရေးအတွက်လည်း ရင်လေးနေကြ သူတွေရှိတယ်လို့ မဖြူဖြူလှိုင်ကပြောပါတယ်။

“ကျမကတော့ Hillary Clinton ကိုထောက်ခံမှာပါ။ မြန်မာပြည်လိုနိုင်ငံမျိုးကလာတာဆိုတော့ Donald Trump ဟာ စစ်အစိုးရပုံစံမျိုးကို ပြန်ပြောင်းသတိပေးသလိုဖြစ်နေတယ်လို့ ကျမယူဆပါတယ်။ အဲလိုအဖြစ်မျိုးကိုတော့ ပြန်မသွားချင်ပါဘူး။”

မြန်မာအသိုင်းအဝိုင်းအနေနဲ့ အမေရိကန်ရွေးကောက်ပွဲမှာ သိသိသာသာအပြောင်းအလဲဖြစ်အောင် မဲပေးနိုင်တဲ့သူဦးရေ သိပ်မများလှပါဘူး။ ဒါပေမယ့် အမေရိကန်ရောက်မြန်မာပြည်သားတွေဟာ အမေရိကန်လူနေမှုဘဝနဲ့ နိုင်ငံရေးမှာ တက်တက်ကြွကြွနဲ့ ပါဝင်လှုပ်ရှားနေကြပါတယ်။
VOA Burmese News


NLD အစိုးရသစ်
NLD အစိုးရသစ်

အမျိုးသားဒီမိုကရေစီ အဖွဲ့ချုပ် NLD ပါတီ ဦးဆောင်တဲ့ အစိုးရရဲ့ အုပ်ချုပ်မှုသက်တမ်း အခုဆိုရင် ၆ လပြည့်တော့မှာ ဖြစ်ပါတယ်။ အရပ်သားစစ်စစ် အစိုးရရဲ့ ၆ လတာ ဆောင်ရွက်ချက်တွေ အပေါ်မှာတော့ အားရသူတွေရှိသလို၊ အားမရသူတွေလည်း ရှိနေကြပါတယ်။ အပြည့်အစုံကိုတော့ ဗွီအိုအေမြန်မာပိုင်း သတင်းထောက် မမြင့်မြင့်ခိုင် ရန်ကုန်မြို့ကနေ သတင်းပေးပို့ထားပါတယ်။

ပြောင်းလဲချိန်တန်ပြီဆိုတဲ့ ဆောင်ပုဒ်နဲ့ ရွေးကောက်ပွဲမှာ တခဲနက်အနိုင်ရပြီး တက်လာတဲ့ NLD အစိုးရ ၆ လတာ အုပ်ချုပ်မှု အပေါ် ကျေနပ်သူတွေ ရှိသလို၊ သိသိသာသာ ပြောင်းလဲတာ မတွေ့ရဘူးဆိုပြီး ပြောတဲ့သူတွေလည်း ရှိပါတယ်။ အစိုးရသစ်ရဲ့ ဆောင်ရွက်ချက်တွေဟာ လတ်တလောမှာ အခြေခံလူတန်းစားတွေ သိသိသာသာ အကျိုးခံစားရတဲ့ အခြေအနေမျိုး မရှိသေးပေမဲ့ မျှော်လင့်စရာတွေတော့ တွေ့နေရပြီလို့ အနှေးယာဉ်မောင်း ဦးစိန်သန်း က ပြောပါတယ်။ အစိုးရသစ် တက်လာတာ ၆ လသာ ရှိသေးတဲ့ အတွက်လည်း ဆယ်စုနှစ်တွေနဲ့ချီ ကြုံခဲ့ရတဲ့ အကျပ်အတည်းတွေ ချက်ခြင်းဖြေရှင်းနိုင်ဖို့ဆိုတာ မလွယ်ဘူးလို့လည်း ဆိုပါတယ်။

“ဦးလေးတယောက်တည်းအမြင်က အားရရဲ့လားဆိုတာက ဦးလေးတို့ အောက်ခြေအဆင့်အထိတော့ မရောက်သေးဘူးပေါ့။ ဒါပေမယ့်လို့ ခုနပြောသလိုပြော နေရာတိုင်းမှာ နေရာတိုင်းမှာ တန်ဖိုးနည်းအိမ်ရာတွေပေါ်လာပြီဆိုတော့ ဦးလေးကလည်း အငြိမ်းစားတယောက်လေ ဒါလေးတွေတော့ မျှော်မှန်းတာပေါ့နော်။ နောက်ပြီး ဟိုတုန်းကနဲ့ မတူတော့ဘူးပေါ့။ ဟိုတုန်းကဆိုရင် ဦးလေးတို့မှာ မြေ၀ယ်ဖို့၊ ခြံဝယ်ဖို့ဆိုတာ ဘယ်နည်းနဲ့မှ အဆင်မပြေနိုင်ဘူး။ အခုလိုတန်ဖိုးနည်းအိမ်ရာတွေပေါ်လာတော့ ဦးလေးတို့အတွက်လည်း တနေ့နေ့ တချိန်ချိန်မှာ ရနိုင်လိမ့်မယ်လို့ ထင်တယ်လေ။ အဲဒီတော့ နည်းနည်းတော့ စိတ်ချမ်းသာမှုရှိတာပေါ့လေ။”

NLD အစိုးရသစ် လက်ထက်မှာ နိုင်ငံရေး၊ ပြည်တွင်းငြိမ်းချမ်းရေး စတဲ့ တိုင်းပြည်မှာ ရင်ဆိုင်နေရတဲ့ ပြဿနာတွေကို ဦးစားပေး ဖြေရှင်းနေတာ တွေ့ရပေမဲ့၊ စီးပွားရေးကဏ္ဍမှာတော့ သိသာတဲ့ တိုးတက်မှု မတွေ့ရဘူးလို့ ယူဆသူတွေလည်း ရှိပါတယ်။ အစိုးရသက်တမ်း ၆ လပြည့်မယ့် အချိန်မှာပဲ၊ ပြည်တွင်းမှာ ရွှေဈေးနဲ့ ဒေါ်လာဈေးနှုန်းတွေ အဆမတန် တက်လာနေတဲ့ အတွက်လည်း ကုန်ဈေးနှုန်းတွေ မတည်မငြိမ်ဖြစ်မှာ စိုးရိမ်သူတွေလည်း ရှိပါတယ်။ ထီလက်မှတ်ရောင်းနေတဲ့ မခင်သန်းဌေး ကတော့ လူထုကြားမှာ စားဝတ်နေရေး ပြဿနာဟာ ကြီးသထက် ကြီးလာနေတယ်လို့ ပြောပါတယ်။

“အဓိကတော့ ပြည်သူတွေမှာ စားဝတ်နေရေးကျပ်တည်းတယ်။ အလုပ်အကိုင်တွေအရမ်း အဆင်မပြေတွေဖြစ်တယ်။ အထူးသဖြင့်အောက်ခြေလူတန်းစားတွေမှာ ကူးသန်းရောင်းဝယ်ရေးအစစက အဆင်မပြေဘူး။ အဆင်မပြေတဲ့အတွက် သူတို့မှာ စားဝတ်နေရေးအတွက် နေ့စဉ်နဲ့အမျှ ဖြေရှင်းနေရတဲ့ အခက်အခဲတွေ ရှိတယ်။”

ဒါပေမဲ့လည်း NLD အစိုးရသစ် လက်ထက်မှာပဲ စီးပွားရေး လုပ်ငန်းတွေ၊ သယံဇာတတူးဖော် ထုတ်လုပ်မှုလို လုပ်ငန်းတွေမှာ အလွန်အကျွံ လုပ်ကိုင်နေတာတွေကို ထိန်းချုပ်ဖို့ ကြိုးစားတာတွေလည်း ရှိပါတယ်။ ဒါကြောင့်လည်း တာဝန်ယူမှုပိုရှိတဲ့ NLD အစိုးရသက်တမ်း ပထမ ၆ လ ဆောင်ရွက်ချက်တွေအပေါ်မှာ အားရတယ်လို့ ခရီးသွားလုပ်ငန်းရှင် ကိုအောင်ရဲကျော်က ပြောပါတယ်။

“ဒီအစိုးရပိုင်းမှာ ဘယ်လိုပြောမလဲ တာဝန်ယူမှုတွေ ဒီကတိပေးပြီးတော့မှ လုပ်ဆောင်မှုတွေက အရင်ထက်စာရင်တော့ အများကြီးတိုးတက်ပြောင်းလဲလာတယ်လို့တော့ ထင်ပါတယ်။ စစခြင်းပြောင်းလဲတာ ၆ လဆိုတော့ဘာမှ ၆ နှစ်မဟုတ်သေးဘူးလေ။ ဒါပေမယ့် တော်တော်လေးတော့ ပြောင်းလဲလာတယ်ပေါ့။ ရာခိုင်နှုန်းတော်တော်များတယ်ပေါ့ အဲဒီအတွက်လည်း အားရတယ် နောက်ပြီးရှေ့လျောက်လည်း ဒီလိုမျိုး ထပ်ပြီးတော့မှ ဆက်သွားရင်ကောင်းတာပေါ့နော်။”

NLD အစိုးရအနေနဲ့ ပြီးခဲ့တဲ့ ၆ လ သက်တမ်းအတွင်း ဆောင်ရွက်မှုတွေမှာ အားနည်းချက်တွေ ရှိခဲ့သလို၊ ရှေ့မှာလည်း စိန်ခေါ်မှုတွေ ရှိနေတုန်းပဲလို့ မြင်သူတွေလည်း ရှိပါတယ်။ နိုင်ငံရေး လေ့လာသူ ဒေါက်တာရန်မျိုးသိမ်း ကတော့ အစိုးရသက်တမ်း ၆ လအတွင်း အားနည်းချက်တွေကို အခုလို ထောက်ပြပါတယ်။

“လက်ရှိအစိုးရသစ်ရဲ့ ၆လပြည့်တော့မယ့် သက်တမ်းအတွင်းမှာ ဆောင်ရွက်ချက်တွေကို ကြည့်မယ်ဆိုရင် အားရကျေနပ်စရာသိပ်မရှိဘူးလို့တော့ ကျနော်မြင်တယ်။ အထူးသဖြင့်ပေါ့လေ အစိုးရသစ်အနေနဲ့ ဒီ ၆ လ သက်တမ်းအတွင်းမှာ ၀န်ကြီးဌာနအားလုံးပြည်ထောင်စု အဆင့်အဖွဲ့အစည်းအားလုံးရဲ့ ဆောင်ရွက်ချက်တွေကို အားနည်းချက် အားသာချက် ၊လိုအပ်ချက်၊ ချို့ယွင်းချက်တွေကို စနစ်တကျ ပြန်သုံးသပ်ပြီးတော့ စနစ်တကျ ဆုံးဖြတ်နိုင်ဖို့ လိုအပ်တယ်လို့မြင်ပါတယ်။ လက်ရှိအစိုးရသစ်ရဲ့ ၆ လ သက်တမ်းအတွင်းမှာ အဂတိလိုက်စားမှု နဲ့ ပတ်သက်ပြီးတော့ ထိထိရောက်ရောက်ဆောင်ရွက်တာကို မတွေ့ရဘူး။ အဲဒီအပြင် အဂတိလိုက်စားမှုတိုက်ဖျက်ရေးကော်မရှင်ကိုလည်း အသစ်ပြင်ဖွဲ့စည်းတာမျိုးမတွေ့ရဘူး။ အဲဒီအခါကျတော့ အဲဒီအပိုင်းဟာ အင်မတန်မှ အားနည်းတယ်လို့ မြင်ပါတယ်။”

NLD အစိုးရရဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အနေနဲ့ ၂၁ ရာစု ပင်လုံညီလာခံလို တိုင်းရင်းသား လက်နက်ကိုင် ပဋိပက္ခတွေလို ဖြေရှင်းဖို့ ကြိုးပမ်းမှုတွေ၊ လူမှုအသိုင်းအ၀ိုင်းကြား ပြဿနာတွေ ပေါ်ခဲ့တဲ့ ရခိုင်ပြည်နယ်အရေး ဖြေရှင်းဖို့ ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ကော်မရှင်တရပ် ဖွဲ့စည်းခဲ့တာလို ဆောင်ရွက်ချက်တွေဟာ ထူးခြားတဲ့ အောင်မြင်မှုတွေ အဖြစ်နဲ့လည်း မြင်ကြပါတယ်။ ဒီလိုပဲ မကြာသေးခင်က အမေရိကန် ပြည်ထောင်စုကို သွားရောက်ခဲ့ပြီး သမ္မတ ဘရက်ခ် အိုဘားမား နဲ့ တွေ့ဆုံရာမှာ မြန်မာနိုင်ငံအပေါ် ဒဏ်ခတ်မှုတွေ ဖယ်ရှားဖို့ အမေရိကန်က ကြေညာခဲ့တာ၊ ကုလသမဂ္ဂ အထွေထွေညီလာခံမှာ တက်ရောက်ပြီး မြန်မာနိုင်ငံအပေါ် နိုင်ငံတကာက နားလည်အောင် ကြိုးပမ်းနိုင်ခဲ့တာတွေဟာလည်း အောင်မြင်မှုတွေအဖြစ်နဲ့ အများက ယူဆထားကြပါတယ်။
VOA Burmese News


မြန်မာစစ်ခေါင်းဆောင်များနဲ့ မြောက်ကိုရီးယား စစ်ခေါင်းဆောင်များ တွေ့ဆုံ။ (ဇွန် ၂၄၊ ၂၀၀၉)
မြန်မာစစ်ခေါင်းဆောင်များနဲ့ မြောက်ကိုရီးယား စစ်ခေါင်းဆောင်များ တွေ့ဆုံ။ (ဇွန် ၂၄၊ ၂၀၀၉)

မြန်မာနဲ့ အမေရိကန်ပြည်ထောင်စုအကြား ဆက်ဆံရေးတွေ တိုးတက်ကောင်းမွန်လာပြီဆိုပေမယ့်၊ မြောက်ကိုရီးယားနိုင်ငံနဲ့ မြန်မာနိုင်ငံအကြား စစ်ဖက်ဆက်ဆံမှုတွေ ကျန်နေသေးနိုင်တဲ့အပေါ်မှာ အမေရိကန်ပြည်ထောင်စုဖက်က စိုးရိမ်မကင်းရှိနေတုန်းပါ။ ဒါဟာလည်း အရပ်ဖက်အုပ်ချုပ်ရေးပိုင်းက မြန်မာ စစ်တပ်အပေါ် လွှမ်းမိုးနိုင်ဖို့ အားနည်းနေတာကြောင့်လို့ သုံးသပ်မှုကြပါတယ်။ မြန်မာစစ်ဖက်ကတော့ မြန်မာနဲ့ မြောက်ကိုရီးယားအကြား စစ်ဖက်ဆက်ဆံမှုတွေ မရှိတော့ပါဘူးလို့ မြန်မာတာဝန်ရှိသူတွေဖက်ကတော့ ငြင်းဆန်လျက်ရှိပါတယ်။ ဒီအကြောင်းတွေကိုတော့ ကိုသားညွန့်ဦးက စုစည်းတင်ဆက်ပေးပါမယ်။

မြန်မာနဲ့ မြောက်ကိုရီးယားကြား စစ်ဖက်ဆက်ဆံရေးတွေ ဖြတ်တောက်ဖို့၊ မြောက်ကိုရီးယားရဲ့ ဒုံးလက်နက်အစီအစဉ်တွေနဲ့ပတ်သက်လို့ ကုလသမဂ္ဂရဲ့ ဆုံးဖြတ်ချက်တွေကို မြန်မာဖက်က လေးစားလိုက်နာဖို့ဆိုတာတွေကို အမေရိကန်တာဝန်ရှိသူတွေဖက်က မြန်မာအာဏာပိုင်တွေကိုရော မြန်မာစစ်တပ်ကိုပါ တလျှောက်လုံး သတိပေး ပြောဆိုလာတာပါ။ မြန်မာနိုင်ငံမှာ ရွေးကောာက်ပွဲနဲ့တက်လာတဲ့ အရပ်သားအစိုးရတွေ ပေါ်လာပြီးတဲ့နောက်မှာလည်း၊ မြန်မာနဲ့ မြောက်ကိုရီးယားဆက်ဆံရေးနဲ့ပတ်သက်လို့ အမေရိကန်ဖက်က သတိထား စောင့်ကြည့်နေတုန်းရှိပါသေးတယ်။ မနေ့ ဗုဒဟူးနေ့က အထက်လွှတ်တော်နိုင်ငံခြားဆက်ဆံရေးဆပ်ကော်မတီ ကြားနာပွဲမှာလည်း လွှတ်တော်အမတ်တွေက မြန်မာနဲ့ မြောက်ကိုရီယား ဆက်ဆံရေးနဲ့ပတ်သက်လို့ ကြားနာစစ်ဆေးခံဖို့ ရောက်ရှိနေတဲု့ အမေရိကန် လက်ထောက်နိုင်ငံခြားရေးဝန်ကြီး Daniel Russel ကို မေးမြန်းခဲ့ပါတယ်။ ပြီးခဲ့တဲ့ သီတင်းပတ်တုန်းက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ၀ါရှင်တန်ဒီစီကို ရောက်နေစဉ်မှာလည်း အမေရိကန်သမတအပါအ၀င် အမေရိကန်အစိုးရခေါင်းဆောင်ပိုင်းအနေနဲ့၊ မြန်မာစစ်တပ်တွင်းက မြောက်ကိုရီယားနဲ့ ဆက်ပြီး လုပ်ကိုင်နေသူတွေကို ဖော်ထုတ်တားဆီးဖို့ ပြောဆိုတိုက်တွန်းခဲ့ကြတယ်လို့ လက်ထောက်နိုင်ငံခြားရေးဝန်ကြီး Daniel Russel က ဖြေဆိုသွားပါတယ်။ အမေရိကန်ဖက်က ဒီ စိုးရိမ်မှုတွေနဲ့ပတ်သက်လို့ မြန်မာတာဝန်ရှိသူတွေဖက်ကလည်း သဘောပေါက်နားလည်ပါတယ်လို့ လက်ထောက်နိုင်ငံခြားရေးဝန်ကြီး Russel က ပြောခဲ့ပါတယ်။

“ကျနော်တို့အနေနဲ့ မြန်မာစစ်ခေါင်းဆောင်ပိုင်းနဲ့လည်းပဲ မြောက်ကိုရီးယားနဲ့ ပတ်သက်လို့ စကားပြောခဲ့ပါတယ်။ ကျနော်ကိုယ်တိုင်လည်း မြန်မာနိုင်ငံ ရောက်စဉ်က တပ်ချုပ်နဲ့ ပြောဆိုခဲ့သလို လက်ရှိ သံအမတ်ကြီး Scot Marciel လည်း သူနဲ့တွေ့ဆုံခဲ့ပါတယ်။ ကျနော်တို့အထင်က မြန်မာစစ်တပ်အတွင်းမှာ မြောက်ကိုရီးယားနဲ့ ဆက်လက် လုပ်ကိုင်နေတဲ့သူတွေ ရှိနေသေးတယ် ဆိုတာပါပဲ။ ဒီလူတွေဟာ ဆက်ပြီး မြောက်ကိုရီးယားနဲ့ ဆက်ဆံမှုတွေကို ပြုလုပ်နေဆဲရှိပြီး၊ ဒါဟာ လွန်ခဲ့တဲ့ ၅ နှစ် စစ်အာဏာရှင်လက်ထက်တုန်းက လက်ကျန်တွေပါ။ ဒါပေမဲ့ လက်ရှိအစိုးရရော၊ စစ်တပ်ကပါ ဒါကို တားမြစ်ရမယ်ဆိုတာကို နားလည်သဘောပေါက်ကြတယ်လို့ ကျနော် မြင်ပါတယ်။”

အမေရိကန်တာဝန်ရှိသူတွေဖက်က ဒီစိုးရိမ်ချက်နဲ့ ပတ်သက်လို့ ပြောတိုင်းလည်း မြန်မာတာဝန်ရှိသူတွေဖက်ကတော့ မြန်မာနိုင်ငံဟာ မြောက်ကိုရီယားနဲ့ စစ်ရေးဆက်ဆံမှုတွေ မရှိတော့ပါဘူးလို့ အမြဲလိုလို ငြင်းဆိုခဲ့ဖူးပါတယ်။ ပြည်ခိုင်ဖြိုးပါတီက ခေါင်းဆောင်တဦးဖြစ်တဲ့ အငြိမ်းစား ဒုတိယ ဗိုလ်ချုပ်ကြီးမြင့်စိုးဟာ မနှစ်ကအထိ တပ်မတော်အတွင်း တာဝန်ကြီးတွေကို ယူခဲ့ပြီး၊ နိုင်ငံရေးဖက်ကို ပြောင်းလာခဲ့သူပါ။ နိုင်ငံတကာရဲ့ စိုးရိမ်ချက်တွေ တိုက်တွန်းချက်တွေကြောင့် တပ်မတော်အနေနဲ့ မြောက်ကိုရီယားနဲ့ စစ်ရေးဆက်စပ်မှုတွေကို ဖြတ်တောက်ခဲ့ပြီးဖြစ်တယ်လို့ သူက ပြောပါတယ်။

“ဥပမာ - အရင်တုန်းက ဗိုလ်ချုပ်ကြီးရွှေမန်းတို့သွားခဲ့တာရှိတယ် တပ်မတော်အနေနဲ့ပေါ့နော် နောက်ပိုင်းမှာ သူတို့လုပ်တဲ့အနေအထားမှာတော့ တခြားအဲဒီကိုသွားတယ်ဆိုတဲ့အဖွဲ့ ဘယ်အဖွဲ့မှ မရှိတော့ဘူးပေါ့နော်။ နောက်တခုကလည်း စစ်ရေးဆက်ဆံမှုပေါ့ အရင်တုန်းကတော့ မြောက်ကိုရီယားနဲ့ ဆက်ဆံမှုလေးတွေရှိခဲ့တယ်။ ရှိခဲ့ပေမယ့် နောက်ပိုင်းမှာ အဲလိုဖိအားပေးမှုတွေရော ၊ နောက်တခုက နိုင်ငံတကာတွေအနေအထားတွေအရကော တပ်မတော်ပိုင်းကတော့ သူတို့နဲ့ လုံးဝအဆက်အဆံမရှိတော့တဲ့အနေအထား ဖြစ်တယ်။ အဲဒီနောက်ပိုင်း ကျနော်တို့တပ်ထဲမှာရှိတုန်းက တချို့မြောက်ကိုရီးယားရှိတဲ့အဖွဲ့တွေတောင်မှ အကုန်လုံးပြန်သွားတဲ့အနေအထားတွေကိုတွေ့ရတာပေါ့နော်။ နောက်ထပ်လည်း ထပ်ပြီးတော့ဆက်ဆံမှုကတော့ မရှိဘူးလို့တော့ထင်တယ်လေ။ တကယ်လည်းပဲ ကျနော်တို့ရှိတုန်းကတော့ အဲဒီဟာတွေက အကုန်လုံး စစ်ရေးအရဆက်ဆံမှုတွေ နောက်တခုက သူတို့နဲ့ ၂ နိုင်ငံဆက်ဆံမှုတွေ တပ်မတော်ပိုင်းအနေနဲ့ကတော့ လုံးဝမရှိသလောက်ပါပဲ။”

ဒါပေမယ့်လည်း မြန်မာနဲ့ အမေရိကန်ဆက်ဆံရေး ပြန်ကောင်းလာတဲ့ ပြီးခဲ့တဲ့ ဦးသိန်းစိန်အစိုးရလက်ထက်မှာပဲ အမေရိကန်ဖက်က မြောက်ကိုရီယားနဲ့ပတ်သက်လို့ မြန်မာစစ်တပ်အပေါ် အရေးယူမှုအချို့ လုပ်ခဲ့တာရှိပါတယ်။ မြောက်ကိုရီယားထံကနေ စစ်လက်နက်ပစ္စည်းဝယ်ယူမှုနဲ့ပတ်သက်လို့ ၂၀၁၃ ဇူလှိုင်လအတွင်းမှာပဲ ကာကွယ်ရေးဌာန ပစ္စည်းထုတ်လုပ်ရေးရုံးရဲ့ အရာရှိချုပ် ဒုတိယ ဗိုလ်ချုပ်ကြီးသိန်းဌေးကို မြောက်ကိုရီယားထ့က စစ်သုံးပစ္စည်းတွေ မ၀ယ်ဖို့ ကန့်သတ်ထားတဲ့ ကုလသမဂ္ဂဆုံးဖြတ်ချက်ကို ချိုးဖောက်တယ်ဆိုပြီး အမေရိကန်ဘဏ္ဍာရေးဌာနက အရေးယူခဲ့တာဖြစ်ပါတယ်။ ဒါပေမယ့်လည်း အရင်ရှိပြီးသား ကန်ထရိုက်အချို့နဲ့ ၀ယ်ပြီးသား စစ်လက်နက်ပစ္စည်းထိမ်းသိမ်းရေးအတွက် မြောက်ကိုရီးယားနဲ့ ဆက်ဆံခဲ့တာပဲရှိတယ်လို့ မြန်မာတာဝန်ရှိသူအချို့က ပြောဖူးပါတယ်။ အခု လက်ထောက်နိုင်ငံခြားရေးဝန်ကြီး Russel ပြောသွားတဲ့အထဲ တပ်တွင်းမှာ မြောက်ကိုရီးယားနဲ့ ဆက်လက်လုပ်ကိုင်နေသူတွေလို့ ဆိုတဲ့ကိစ္စမှာတော့ အသေးစိတ် ကန် နိုင်ငံခြားရေးဌာနက ပြောဆိုထုတ်ပြန်တာမရှိသေးပါဘူး။

မြန်မာ့အရေးလေ့လာသူ ဦးစည်သူအောင်မြင့်ကတော့ NLD အစိုးရအနေနဲ့ကတော့ တပ်မတော်နဲ့ပတ်သက်လို့ ကိစ္စရပ်တွေမှာ ကြီးကြပ်နိုင်တဲ့အနေအထားမရှိသေးတာကြောင့် မြောက်ကိုရီးယားနဲ့ မြန်မာတပ်အကြား ဆက်ဆံရေးတွေ ပြတ်ပြီလားဆိုတာ ယတိပြတ်မပြောနိုင်သေးဘူးလို့ ဆိုပါတယ်။

“ဒေါ်အောင်ဆန်းစုကြည်ဦးဆောင်တဲ့ NLD အစိုးရတက်လာတယ်ဆိုပေမယ့် တပ်မတော်နဲ့ပတ်သက်တဲ့ကိစ္စတွေပေါ့နော် တပ်တွင်းဆိုင်ရာကိစ္စတွေ ၊ နောက်တပ်ရဲ့ စီးပွားရေးဆိုင်ရာ ကိစ္စတွေ နောက်တပ်က သီးသန့်ဆက်ဆံနေတဲ့ နိုင်ငံတကာရေးရာ ကိစ္စတွေကို ကြီးကြပ်နိုင်မယ့်အနေအထားကတော့ ကျနော်မတွေ့သေးဘူး။ ဘာဖြစ်လို့လဲဆိုတော့ ဒါတွေက နှစ်ပေါင်းများစွာ သီးသန့်တပ်မတော်ဘက်က လုပ်ခဲ့တာတွေဖြစ်တဲ့အခါကျတော့ အဲလိုမျိုးပွင့်ပွင့်လင်းလင်းနဲ့ မြင်ခွင့်တွေရခဲ့မယ်မဟုတ်ဘူးလို့ ကျနော်မြင်ပါတယ်။”

မြန်မာနိုင်ငံဟာ နိုင်ငံရေးပြုပြင်ပြောင်းလဲမှုတွေမတိုင်ခင် နိုင်ငံတကာရဲ့အထီးကျန်ပိတ်ဆို့မှုခံနေရချိန်အတွင်းမှာ အိမ်နီးချင်းတရုတ်နဲ့ ဆက်ဆံရေးနီးစပ်သလို၊ မြောက်ကိုရီးယားနဲ့လည်း စစ်ဖက်ဆက်ဆံမှုတွေ လုပ်ခဲ့ပါတယ်။ မြောက်ကိုရီယားရဲ့ နူကလီယားနဲ့ ဒုံးလက်နက် နည်းပညာ အကူအညီတွေ ရယူဖို့ ကြိုးစားခဲ့တယ်လို့ နိုင်ငံတကာက မြန်မာကို သံသယ ဖြစ်ခဲ့ကြပါတယ်။ ဒါကြောင့်လည်း မြန်မာဖက်က အပြောင်းအလဲတွေ စတင်လုပ်လာချိန်မှာတော့ မြောက်ကိုရီးယားနဲ့ စစ်ရေးဆက်ဆံမှုဖြတ်တောက်ဖို့၊ ကုလသမဂ္ဂ ဆုံးဖြတ်ချက်တွေကို လေးစားလိုက်နာဖို့ အနောက်နိုင်ငံ့တွေ အထူးသဖြင့် အမေရိကန်ပြည်ထောင်စုက မြန်မာကို ဖိအားတွေ ပေးခဲ့တာဖြစ်ပါတယ်။
VOA Burmese News



(၂၁)ရာစု ပင်လုံညီလာခံမှာ ဒေါ်အောင်ဆန်းစုကြည် အဖွင့်မိန့်ခွန်း ပြောကြားနေစဉ်
ကျန်းမာရေးပြန်ကောင်းလာပြီဖြစ်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ သောကြာနေ့ နေပြည်တော်မှာ စတင်ကျင်းပမယ့် AIPA အာဆီယံ ပါလီမန်များညီလာခံမှာ အဖွင့် မိန့်ခွန်းပြောကြားမှာ ဖြစ်ပါတယ်။ NLD ပါတီ လွှတ်တော် ကိုယ်စားလှယ်ဦးရေ အများစု လွှမ်းမိုးထား တဲ့ မြန်မာ လွှတ်တော် ကနေ ပထမဆုံးအကြိမ် အိမ်ရှင်အဖြစ် လက်ခံကျင်းပတဲ့ အာဆီယံပါလီမန်များ ညီလာခံရဲ့ ထူးခြားချက်တွေ ဘာတွေရှိမလဲဆိုတာ မအင်ကြင်းနိုင်က တင်ပြထား ပါတယ်။

ပြည်ပခရီးစဉ်တွေကြောင့် ပင်ပန်းပြီး နေထိုင်မကောင်းဖြစ်ခဲ့ တဲ့ ဒေါ်အောင်ဆန်း စုကြည်ရဲ့ ကျန်းမာရေးကို ပြည်သူအများ စိုးရိမ်နေကြချိန်မှာ ပထမဆုံးအကြိမ် လူမြင်ကွင်း ထွက်လာတဲ့အနေနဲ့ မနက်ဖြန်မှာ ကျင်းပမယ့် (၃၇) ကြိမ်မြောက် အာဆီယံပါလီမန်များညီလာခံကို ဒေါ်အောင်ဆန်းစုကြည် တက်ရောက်ပြီး အဖွင့်မိန့်ခွန်း ပြောကြားမှာ ဖြစ်ပါတယ်။ ဒေသတွင်း အာဆီယံနိုင်ငံတွေက ပါလီမန်အမတ် အများအပြားတက်ရောက်မယ့် ဒီညီလာခံအစီအစဉ်နဲ့ ပတ်သက်လို့ နိုင်ငံပိုင်ရုပ်သံသတင်းဌာနက မနေ့က အခုလို ကြေညာသွားပါတယ်။

“ဒီညီလာခံဖွင့်ပွဲအခမ်းအနားမှာ နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်း စုကြည်က အဖွင့်မိန့်ခွန်း ပြောကြားမှာဖြစ်ပါတယ်။ ညီလာခံမှာ နိုင်ငံရေး၊ စီးပွားရေး၊ လူမှုရေး၊ ရုံးလုပ်ငန်းဆိုင်ရာနဲ့ အမျိုးသမီးလွှတ်တော် စတဲ့ ကော်မတီ ၅ ခုက ခေါင်းစဉ် ၅ ခုနဲ့ အကြောင်းအရာ ၁၃ ချက်ကို ဆွေးနွေးသွားမှာ ဖြစ်ပါတယ်။”

စစ်အစိုးရအုပ်ချုပ်ခဲ့တဲ့ နှစ်ပေါင်း (၂၀) ကျော်ကာလအတွင်း အာဆီယံနိုင်ငံများ ဆိုင်ရာ ပါလီမန်အဖွဲ့မှာ လေ့လာသူ အဖြစ် ရှိခဲ့တဲ့ မြန်မာနိုင်ငံဟာ ၂၀၁၀ ပြည့်နှစ် ရွေးကောက်ပွဲကနေ အရပ်သားတပိုင်း အစိုးရတက်လာချိန် ၂၀၁၁ ခုနှစ်မှာ တင်းပြည့်အဖွဲ့ဝင် ဖြစ်လာခဲ့တာပါ။ ဒါပေမဲ့လည်း အဖွဲ့ရဲ့ ဥက္ကဌတာဝန်ယူဖို့ နဲ့ ညီလာခံကို လက်ခံကျင်းပဖို့ အလှည့်ကိုတော့ ၂၀၁၅ ရွေးကောက်ပွဲ ကနေ ဒေါ်အောင်ဆန်းစုကြည်ဦးဆောင်တဲ့ NLD အမျိုးသားဒီမိုကရေစီအဖွဲ့ချုပ် အပြတ်အသတ် အနိုင်ရပြီးချိန်မှ အကောင်အထည် ဖော်နိုင်တာဖြစ်ပါတယ်။ အခုလို မြန်မာနိုင်ငံမှာ ပထမဆုံးအကြိမ်အဖြစ် အာဆီယံအမတ်များ ညီလာခံ ကျင်းပရတာနဲ့ ပတ်သက်လို့ တာဝန်ရှိသူတဦးဖြစ်တဲ့ ဒေါက်တာသန်းဝင်းက အခုလို ပြောသွားပါတယ်။

“ပြီးခဲ့တဲ့နှစ် ၃၆ ကြိမ်မြောက် အာဆီယံပါလီမန်ညီလာခံက မလေးရှားမှာလုပ်တယ်။ မလေးရှားမှာလုပ်တဲ့အချိန်တုန်းကတော့ ဒီအချိန် စက်တင်ဘာပေ့ါ မှတ်တမ်းတွေအရတော့ အဲဒီအချိန်မှာ မြန်မာနိုင်ငံက လွှတ်တော်ကိုယ်စား လှယ်အဖွဲ့တွေ သွားကြတဲ့အချိန်ကျတော့ နောက်နှစ် က မြန်မာနိုင်ငံရဲ့ အလှည့်ဖြစ်ပေမဲ့ ၂၀၁၅ တုန်းကတော့ ရွေးကောက်ပွဲကလည်း မကြာခင် လာတော့မယ်။ လွှတ်တော်ကလည်း ဇန်န၀ါရီဆိုရင် ပြီးဆုံးမယ် ဆိုတဲ့အ တွက်ကြောင့် အဲဒီတုန်းကတော့ ဥက္ကဌတာဝန်ကို လက်ခံမယူခဲ့သေးပါဘူး။ အခု ၂၀၁၆ လွှတ်တော် ဒုတိယအကြိမ် စတော့မှပဲ ညီလာခံတာဝန်ကိုရော ယူပါမယ်ဆိုပြီးတော့ ဧပြီလလောက်က ဆုံးဖြတ်တဲ့အတွက် ဇွန်လလောက် ကတည်းက ဒီအစည်းအဝေးအတွက် စတင်ပြင်ဆင်တာ ဖြစ်ပါတယ်။”

အာဆီယံနိုင်ငံများဆိုင်ရာ ပါလီမန်အဖွဲ့ရဲ့ မြန်မာနိုင်ငံနဲ့ ပတ်သတ် တဲ့ နောက်ခံ သမိုင်းကြောင်းကို ၁၉၉၀ ခုနှစ်ရွေးကောက်ပွဲမှာ လွှတ်တော် အမတ်ဖြစ်ခဲ့ ပြီး ပြည်ပရောက် ညွန့်ပေါင်းအစိုးရအဖွဲ့မှာ တာဝန်ယူခဲ့သူ တဦးဖြစ်တဲ့ ဒေါက်တာ တင့်ဆွေက အခုလို ပြောပါတယ်။

“အခု AIPA မှာ ကျနော်တို့အနေနဲ့ အဝေးရောက်အမတ်တွေအနေနဲ့ နေရာရအောင် ကြိုးစားခဲ့ပေမဲ့လို့ အဲဒီအချိန်မှာ စစ်အစိုးရဆိုတော့ စစ်အစိုးရက အမတ်ဆိုတာ မရှိဘူး။ အမတ်တွေ ထောင်ထဲနဲ့ ပြည်ပမှာ ရောက်နေတဲ့အချိန်မှာ သူကနေပြီးတော့ တရားသူကြီးချုပ်တို့၊ ရှေ့နေချုပ်တို့ပဲ ကိုယ်စားလွှတ်တဲ့အချိန် ကျနော်တို့က အဲဒီအစည်းအဝေးခန်းမရဲ့ ဘေးကပဲ လုပ်ခွင့်ရခဲ့တဲ့ အနေအထားပေါ့။ အဲ့လောက်အထိ အာဆီယံဟာ ကျနော်တို့ကို ကန့်သတ်မှုတွေ ရှိတယ်။ ဒီအတွက်လည်းပဲ မိတ်ဆွေ အာဆီယံအမတ်တွေနဲ့ ကြိုးစားခဲ့ရတာ ဖြစ်တဲ့အတွက် ဒီမိုကရေစီ လှုပ်ရှားမှုအပေါ်မှာတော့ အာဆီယံနဲ့ အာဆီယံလွှတ်တော်အမတ် အဖွဲ့ဟာ စစ်အစိုးရဘက်က လိုက်ခဲ့တယ်လို့ ဒါကတော့ သမိုင်းကြောင်းအရ မှတ်တမ်းတင်ရမှာပေါ့။”

မေး - အခု ဒီအာဆီယံအမတ်တွေရဲ့ ညီလာခံကို မြန်မာနိုင်ငံက အိမ်ရှင်အဖြစ် လက်ခံကျင်းပပြီဆိုတော့ ဘယ်လိုထူးခြားချက်တွေ ရှိလာနိုင်မလဲရှင့်။

ဖြေ - “အာဆီယံနိုင်ငံများအစုကတော့ ကျနော်တို့ ဗမာနိုင်ငံအတွက် အရေးကြီး ပါတယ်။ အင်အားကြီး နိုင်ငံကြီး ၂ ခုအပြင် အရေးကြီးတာက အာဆီယံအုပ်စု ပဲဖြစ်ပါတယ်။ ဒီနှစ်တော့ ဒေါ်အောင်ဆန်းစုကြည်ကိုယ်၌ကလည်း အမတ်တ ဦးဖြစ်လာတယ်။ နိုင်ငံရဲ့ အကြံပေးပုဂ္ဂိုလ်နဲ့ နိုင်ငံခြားရေး ၀န်ကြီး ဖြစ် လာပြီးတော့ ဒီအစည်းအဝေးက ဗမာနိုင်ငံမှာ လာပြီး ကျင်းပတော့ ဒါက ကြီးမား တဲ့ ပြောင်းလဲမှု ခြေလှမ်းကြီးတခုဖြစ်တယ်လို့ မြင်ပါတယ်။”

အာဆီယံပါလီမန်များညီလာခံကို စက်တင်ဘာလ ၃၀ ရက်နေ့ ကနေ အောက် တိုဘာလ ၃ ရက်နေ့ထိ နေပြည်တော်မှာ ၄ ရက်တာ ကျင်းပ မှာဖြစ်ပြီး၊ နိုင်ငံ ပိုင်ရုပ်သံနဲ့ ရေဒီယိုတို့ကနေ ဒီညီလာခံမှာ ဆွေးနွေးပြောဆိုမှုတွေကို တိုက်ရိုက် ထုတ်လွှင့်ပြသမှာ ဖြစ်ပါတယ်။

အင်ကြင်းနိုင် / ဗွီအိုအေ (မြန်မာပိုင်း)
http://burmese.voanews.com



ရန်ကုန် စက်တင်ဘာ ၂၉

ပါးစပ်ထဲအ၀တ်ဆို့ ပြီးလည်ပင်းညှစ်အသတ်ခံရတဲ့ဗဟန်းမြို့ နယ်နေအိမ်အတွင်း အမျိုးသမီး သတ်ခံရမှူနဲ့ ဖမ်းစီးထားသူကိုသက်ဆိုင်ရာရဲတပ်ဖွဲ့ ကစစ်ဆေးခဲ့ပြီး ယနေ့ခရိုင်တရားရုံးကိုတရားစွဲဆို တင်ပို့ပါတယ်။

ယခုအမှုနဲ့ စွပ်စွဲခံရသူ အောင်ဇင်ဗိုလ်(ခ)ဇင်ဗိုလ်ကို ဗဟန်းရဲစခန်းက အနောက်ပိုင်းခရိုင်တရားရုံးကို ယနေ့တရားစွဲတင်ပို့တာဖြစ်ပါတယ်။

သည်အမှုကိုရာဇသတ်ကြီးဥပဒေပုဒ်မ ၃၀၂/၃၀၇ ဖြင့် ရန်ကုန်အနောက်ပိုင်းခရိုင်တရားရုံး ရာဇ၀တ်ကြီးအမှုအမှတ် ၁၁၄/၂၀၁၆နဲ့လက်ခံပြီးဒုတိယခရိုင် တရားသူကြီး ၁ တရားခွင်မှာလက်ခံစစ်ဆေးသွားမှာဖြစ်ပါတယ်။

လာမယ့်စက်တင်ဘာလ ၇ ရက်နေ့မှာ တရားလိုဖြစ်သူကို စတင်စစ်ဆေးဆောင်ရွက်သွားမှာဖြစ်ပါတယ်။

Kumudra
https://www.facebook.com/newsKumudra


၂၀၀၁ ခုနှစ် စက်တင်ဘာလ ၁၁ ရက်နေ့တုန်းက အမေရိကန်ပြည်ထောင်စုမှာ တိုက်ခိုက်ခံခဲ့ရတာနဲ့ ပတ်သက်ပြီး ဆော်ဒီအာရေးဗျနိုင်ငံကို တရားစွဲဖို့ ခွင့်ပြုတဲ့ဥပဒေမူကြမ်းကို သမ္မတ Barack Obama က ဗီတိုအာဏာသုံး ပယ်ချခဲ့တာကို အမေရိကန်ကွန်ဂရက်က လက်မခံကြောင်း မဲပေး ဆုံးဖြတ်ခဲ့ကြပါတယ်။

ဒါဟာ အထက်နဲ့ အောက်လွှတ်တော် ၂ ရပ်စလုံးက သမ္မတ Obama ရဲ့ ဗီတိုအာဏာကို ပထမဆုံးအကြိမ်အဖြစ် တခဲနက် ပယ်ဖျက်ခဲ့တာ ဖြစ်ပါတယ်။

အထက်လွှတ်တော်က ဒီမိုကရက်တစ်ပါတီ လူနည်းစုခေါင်းဆောင် Nevada ပြည်နယ်အမတ် Harry Reid တဦးတည်းသာ သမ္မတဘက်က ရပ်တည်ခဲ့တာပါ။ အောက်လွှတ်တော်မှာတော့ ထောက်ခံမဲ ၃၄၈ မဲ ကန့်ကွက်မဲ ၇၇ မဲနဲ့ ပယ်ဖျက်ခဲ့ပါတယ်။

ဒီအတွက် ရလဒ်ကတော့ ၂၀၀၁ ခုနှစ် စက်တင်ဘာလ ၁၁ ရက် အကြမ်းဖက် အတိုက်ခိုက်မှုမှာ သေဆုံးခဲ့ရသူတွေရဲ့ မိသားစုဝင်တွေအတွက် အဓိက အောင်ပွဲဖြစ်ပါတယ်။ သူတို့ဟာ ဆော်ဒီအာရေးဗျရဲ့ သူ့အပြစ်ဒဏ်တွေကနေ တရားဝင် ကင်းလွတ်ခွင့်ရနေတာအတွက် တရားမျှတမှု ရနိုင်ဖို့ အမေရိကန်တရားရုံးတွေမှာ ကြိုးစားနေပေမဲ့ အခုချိန်ထိ မအောင်မြင်နိုင်ဘဲ ဖြစ်နေတာပါ။

အမေရိကန်ပြည်ထောင်စု မြေပေါ်မှာ အကြမ်းဖက်တိုက်ခိုက်မှုအတွက် ထောက်ခံပံ့ပိုးတဲ့ နိုင်ငံခြား အဖွဲ့အစည်း လူပုဂ္ဂိုလ်တွေကို The Justice Against Sponsors of Terrorism အက်ဥပဒေအရ တရားစွဲပိုင်ခွင့် ရှိပါတယ်။ ဒီဥပဒေမူကြမ်းမှာ ဘယ်နိုင်ငံဆိုတာ မပါဝင်ပေမဲ့လည်း 9/11 အကြမ်းဖက်မှု လုပ်ဆောင်သူတွေဟာ ဆော်ဒီအာရေးဗျ နိုင်ငံထဲမှာပဲ ထောက်ခံပံ့ပိုးမှု တစုံတရာ ရနိုင်ကြောင်း အများက ရှုမြင်ကြပါတယ်။

သေဆုံးခဲ့ရသူတွေရဲ့ မိသားစုဝင်တွေဟာ သူတို့ချစ်ခင်တဲ့ သူတွေကို ဘယ်တော့မှ ပြန်ရနိုင်တော့မှာ မဟုတ်ပေမယ့် သူတို့နဲ့ ထိုက်တန်တဲ့ တရားမျှတမှုကို တရားရုံးမှာ တရက်လောက်တော့ ရသင့်တယ်လို့ Connecticut ပြည်နယ်က ဒီမိုကရက်တစ်ပါတီ အထက်လွှတ်တော်အမတ် Richard Blumenthal က ပြောပါတယ်။ Obama အစိုးရအဖွဲ့ကတော့ ဒီ JASTA ဥပဒေဟာ ပြည်ပရောက် အမေရိကန် နိုင်ငံသားတွေအတွက် ထိခိုက်စေနိုင်တယ် လို့ ပြောပါတယ်။

 ဗွီအိုအေ (မြန်မာပိုင်း)
http://burmese.voanews.com


မင်းပြား (Sep 29, 2016)

ရခိုင်ပြည်၊ မင်းပြားမြို့နယ်အတွင်း မြစ်ချောင်းများကို ကူးတို့လှေများဖြင့် ဖြတ်ကူး၍ ကျောင်းတက်နေကြရသည့် ကျောင်းသား/သူ ၂၀၀ ဦးခန့်အတွက် အသက်ကယ်အင်္ကျီများ လိုအပ်နေကြောင်း သိရသည်။

မင်းပြားမြို့နယ်ရှိ အထက-ပန်းမြောင်း၊ အထက(ခွဲ)မင်းဖူး၊ အထက(ခွဲ) င/ပုကွ၊ အထက(ခွဲ)ပြားချောင်းနှင့် အထက(ခွဲ)ကျားပိုက္ကေ ကျောင်းများသို့ အနီးအနားကျေးရွာများမှ အလယ်တန်း/အထက်တန်း ကျောင်းသား/သူ စုစုပေါင်း ၂၀၀ ဦးခန့်ရှိမှာ မြစ်ချောင်းများဖြစ်ကူး၍ ကူးတို့လှေများဖြင့်လာရောက် ကျောင်းတက်နေကြရသည်။

မင်းပြားမြို့နယ် အထက-ပန်းမြောင်းသို့ မြောက်ဦးမြို့နယ် ပိုးဖြူကျွန်း၊ မြက်ရိတ်ကျွန်း၊ ကျောက်တွင်းကုန်းနှင့် ပုရိန်ကုန်းကျေးရွာများမှ လယ်/ထက်ဆင့် ကျောင်းသား/သူ ၃၅ ဦးမှာ ပိုးဖြူကျွန်းကူးတို့လှေဖြင့် ဖြတ်ကူး၍ ကျောင်းတက်နေကြရသည်ဟု အထက-ပန်းမြောင်းမှ အလယ်တန်းပြဆရာ ဦးထွန်းအေး ပြောကြားချက်အရ သိရသည်။

ထို့အတူ မင်းပြားမြို့နယ် အထက(ခွဲ)မင်းဖူးသို့ အနီးအနား ကျေးရွာများဖြစ်ကြသည့် မြင်းကဆိပ်၊ အသေကာလ၊ ကပ်ပဲ့ပုလဲတောင်၊ ဝါးတောင်၊ ပွဲရကံဆိပ်၊ သာစည်ကျေးရွာများမှ အလယ်တန်းအဆင့် ကျောင်းသား/သူ ၃၇ ဦး ကူးတို့လှေများဖြင့် လာရောက် ကျောင်းတက်လျှက်ရှိနေသည်ဟု အဆိုပါကျောင်းမှ ကျောင်းအုပ်ဆရာမကြီးအား မေးမြန်းချက်အရ သိရသည်။


မင်းပြားမြို့နယ် အထက(ခွဲ) ငပုကွသို့လည်း မင်းပြားမြို့နယ် စပါးထားကျေးရွာနှင့် မြောက်ဦးမြို့နယ် လက်သန်းချေကျေးရွာမှ အလယ်တန်းအဆင့် ကျောင်းသား/သူ ၅၀ ဦးတို့မှာ ကူးတို့လှေဖြင့် လာရောက်ကျောင်းတက်နေကြရကြောင်း အဆိုပါကျောင်းမှ အထက်တန်းပြဆရာ ဦးမြတ်စိုးကျော် ကဆိုသည်။

၎င်းအပြင် မင်းပြားမြို့နယ် သောင်းခေါင်မော်ကျေးရွာမှ အလယ်တန်းအဆင့် ကျောင်းသား/သူ ၁၃ ဦးမှာ အထက(ခွဲ)ပြားချောင်းသို့ လည်းကောင်း၊ သင်္ဂနက်ကျေးရွာမှ ထက်/လယ်အဆင့် ကျောင်းသား/သူ ၅၁ ဦးမှာ အထက(ခွဲ)ကျားပိုက္ကေသို့ လည်းကောင်း ကူးတို့လှေများဖြင့် လာရောက်၍ ကျောင်းတက်နေကြရသည်။

အဆိုပါကျောင်းများမှ ကူးတို့လှေများဖြင့် လာရောက်ကျောင်းတက်နေကြရသည့် ကျောင်းသား/သူများ စာရင်းကို ဌာနမှတောင်းခံထားပြီး ဖြစ်သော်လည်း ယနေ့အထိ တစ်စုံတစ်ရာ ထူးခြားမှုမရှိသေးကြောင်း သိရသည်။

မင်းပြားမြို့နယ်အတွင်း ကူးတို့လှေများ၌ အသက်ကယ်အင်္ကျီများ ဝတ်ဆင်ပြီး လူအရေအတွက် ကန့်သတ်ချက်ဖြင့် ကူးတို့ကူးခြင်းကို ဆောင်ရွက်ရန် မင်းပြားမြို့နယ် စည်ပင်ကော်မတီက ၂၀၁၆ ခုနှစ် သြဂုတ်လအတွင်းက ကွင်းဆင်း၍ လမ်းညွှန်ဆောင်ရွက် ပေးခဲ့သော်လည်း ၎င်းနောက်ပိုင်း၌ ကူးတို့လုပ်ငန်းများမှ လမ်းညွှန်ချက်များအား လိုက်နာဆောင်ရွက်မှု အားနည်းနေသည်ဟု ကြားသိရသည်။

သို့ဖြစ်ရာ မင်းပြားမြို့နယ်အတွင်း မြစ်ချောင်းများ ဖြတ်ကူးကာ ကျောင်းတက်နေကြရသည့် ကျောင်းသား/သူများ ဘေးကင်းလုံခြုံစွာ ကျောင်းတက်နိုင်ရန်အတွက် အသက်ကယ်အင်္ကျီများ ပြည့်စုံစွာ ရရှိနိုင်စေရန်နှင့် ခရီးသွားပြည်သူများ ဘေးကင်းစွာ မြစ်ဖြတ်ကူးနိုင်စေရန်အတွက် သက်ဆိုင်ရာများမှ အမြန်ဆုံး ကူညီဆောင်ရွက်ပေးနိုင်စေရန် "မင်းပြား-သတင်း"မှ အကြံပြု တင်ပြလိုက်ရပါသည်။

မင်းပြား - သတင်း
29 . 09 . 2016
Photo: Facebook
https://www.facebook.com/mongbranews

ပြည်ထောင်စုသမ္မတမြန်မာနိုင်ငံတော်အစိုးရ
ပြည်ထောင်စုအစိုးရအဖွဲ့
အမိန့်ကြော်ငြာစာ အမှတ် ၆၂/၂၀၁၆
၁၃၇၈ ခုနှစ်၊ တော်သလင်းလပြည့်ကျော် ၁၂ ရက်
(၂၀၁၆ ခုနှစ်၊ စက်တင်ဘာလ ၂၈ ရက်)

အမျိုးသားပညာရေးမူဝါဒကော်မရှင် ဖွဲ့စည်းခြင်း

၁။ အမျိုးသားပညာရေးဥပဒေကို ပြင်ဆင်သည့် ဥပဒေ (၂၀၁၅ ခုနှစ်)၊ အခန်း (၄)၊ ပုဒ်မ (၅) (က) အရ ပြည်ထောင်စု အစိုးရအဖွဲ့သည် အမျိုးသားပညာရေးမူဝါဒ ကော်မရှင်ကို ပြည်ထောင်စု လွှတ်တော်၏ အတည်ပြုချက်ဖြင့် အောက်ပါအတိုင်း ဖွဲ့စည်းလိုက်သည် -

(က) ဒေါက်တာမျိုးမြင့် ဒုတိယ၀န်ကြီး (ငြိမ်း)
ပညာရေးဝန်ကြီးဌာန ဥက္ကဌ

(ခ) ဒေါက်တာညီလှငယ် ဒုတိယ၀န်ကြီး (ငြိမ်း)
သိပ္ပံနှင့် နည်းပညာ ၀န်ကြီးဌာန ဒု-ဥက္ကဌ

(ဂ) ဦးဝင်းမော်ထွန်း ဒုတိယ၀န်ကြီး
ပညာရေးဝန်ကြီးဌာန အဖွဲ့ဝင်

(ဃ) ဒေါက်တာမြဦး ညွှန်ကြားရေးမှူးချုပ် (ငြိမ်း)
အဆင့်မြင့်ပညာ ဦးစီးဌာန
(အထက်မြန်မာပြည်) အဖွဲ့ဝင်

(င) ဦးထွန်းအောင်ချိန် ပါမောက္ခ(ငြိမ်း)
သမိုင်းဌာန၊ ရန်ကုန် တက္ကသိုလ် အဖွဲ့ဝင်

(စ) ဦးထွန်းလှ ဒုတိယညွှန်ကြားရေးမှူးချုပ် (ငြိမ်း)
ပညာရေးစီမံကိန်းနှင့် လေ့ကျင့်ရေး ဦးစီးဌာန အဖွဲ့ဝင်

(ဆ) ဒေါ်ခင်သန်းနွယ် လက်ထောက်ညွှန်ကြားရေးမှူး (သင်ရိုး) (ငြိမ်း)၊ ပညာရေးစီမံကိန်းနှင့် လေ့ကျင့်ရေး ဦးစီးဌာန အဖွဲ့ဝင်

(ဇ) ဒေါက်တာမျိုးဝင်း ပါမောက္ခချုပ် (ငြိမ်း)
သွားဘက်ဆိုင်ရာ ဆေးတက္ကသိုလ်၊ ရန်ကုန် အဖွဲ့ဝင်

(ဈ) ဦးသန်းနွယ် တာဝန်ခံပါမောက္ခချုပ်(ငြိမ်း)
ရတနာပုံတက္ကသိုလ် အဖွဲ့ဝင်

(ည) ဒေါက်တာသက်လွင် ပါမောက္ခ/ဌာနမှူး(ငြိမ်း) စာရင်းအင်းပညာဌာန ရန်ကုန်စီးပွားရေးတက္ကသိုလ် အဖွဲ့ဝင်

(ဋ) ဒေါက်တာမြင့်ဝင်း ဒုတိယညွှန်ကြားရေးမှူး ရောဂါရှာဖွေထိန်းချုပ်ရေးဌာန မွေးမြူရေးနှင့် ကုသရေးဦးစီးဌာန အဖွဲ့ဝင်

(ဌ) ဦးထွန်းနိုင် ရုံးအဖွဲ့မှူး မော်လမြိုင်တရားမျှတမှုစင်တာ အဖွဲ့ဝင်

(ဍ) ဒေါက်တာမြင့်သောင်း ပါမောက္ခချုပ်(ငြိမ်း)
ရေဆင်းစိုက်ပျိုးရေး တက္ကသိုလ် အဖွဲ့ဝင်

(ဎ) ဒေါက်တာဝင်းအောင် ယူနီဆက်ပညာရေးစီမံကိန်း အရာရှိ(ငြိမ်း)
အလွတ်တန်းပညာရေးအကြံပေး
(Freelance Education Consultant) အဖွဲ့ဝင်

(ဏ) ဦးမြကျော် ကျောင်းအုပ်ကြီး(ငြိမ်း) ရန်ကင်းပညာရေးကောလိပ်
ပညာရေးစီမံကိန်းနှင့် လေ့ကျင့်ရေး ဦးစီးဌာန အဖွဲ့ဝင်

(တ) ဦးစောအောင် ညွှန်ကြားရေးမှူး (ငြိမ်း)
မြန်မာနိုင်ငံ ပညာရေးသုတေသနအဖွဲ့ ဦးစီးဌာန အဖွဲ့ဝင်

(ထ) ဒေါက်တာသိန်းလွင် ပါမောက္ခ(ငြိမ်း)
ပညာရေး စိတ်ပညာဌာန၊ ရန်ကုန်ပညာရေးတက္ကသိုလ် အဖွဲ့ဝင်

(ဒ) ဦးသက်မောင် ဦးစီးအရာရှိ(ငြိမ်း)
သင်ရိုးဌာန၊ ပညာရေးစီမံကိန်းနှင့် လေ့ကျင့်ရေးဦးစီးဌာန အဖွဲ့ဝင်

(ဓ) ဒေါက်တာခင်မာရီ ပါမောက္ခ(ဌာနမှူး)
ဥပဒေပညာဌာန ရန်ကုန်တက္ကသိုလ် အဖွဲ့ဝင်

(န) ဒေါက်တာခိုင်မြဲ ညွှန်ကြားရေးမှူးချုပ်
မြန်မာနိုင်ငံ ပညာရေးသုတေသန ဦးစီး ဌာန အတွင်းရေးမှူး

(ပ) ဒေါက်တာနေဝင်းဦး ဒုတိယညွှန်ကြားရေးမှူးချုပ် အဆင့်မြင့်ပညာဦးစီးဌာန တွဲဖက် အတွင်းရေးမှူး

၂။ အမျိုးသားပညာရေးမူဝါဒကော်မရှင်၏ တာဝန်နှင့် လုပ်ပိုင်ခွင့်များမှာ အောက်ပါအတိုင်း ဖြစ်ပါ သည်-
(က) အမျိုးသားပညာရေးရည်မှန်းချက်များနှင့် ပညာရေးဆိုင်ရာမူဝါဒများ ချမှတ်ပေးခြင်း၊

(ခ) အမျိုးသားပညာရေးရည်မှန်းချက်များ အကောင်အထည်ဖော် ဆောင်ရွက်နိုင်ရန် လိုအပ် သော အမျိုးသား သင်ရိုးညွှန်းတမ်းကော်မတီ၊ အမျိုးသားပညာရေး အဆင့်အတန်းနှင့် အရည်အသွေးအာမခံမှု အကဲဖြတ်ရေးကော်မတီ၊ ပုဒ်မ (၂၇) အရ ဖွဲ့စည်းသော ကော်မတီ၊ အခြားလိုအပ်သော ကော်မတီ၊ ကောင်စီနှင့် အဖွဲ့များကို ဖွဲ့စည်း တာဝန်ပေးအပ်ခြင်း၊

(ဂ) ပညာရေးစနစ်နှင့် ပညာရေးဆိုင်ရာ မူဝါဒများ၊ ပညာရေးဆိုင်ရာ စီမံကိန်းများ အကောင် အထည်ဖော်မှုအပေါ် အကဲဖြတ်သုံးသပ်ခြင်းနှင့် အကြံပြုခြင်း၊

(ဃ) အရည်အသွေးအာမခံမှု စံချိန်စံညွှန်းများ သတ်မှတ်နိုင်ရန် မူဝါဒများ ချမှတ်ခြင်းနှင့် လမ်းညွှန်ခြင်း၊

(င) ပညာရေးကဏ္ဍအတွက် အစိုးရအဖွဲ့၊ ဒေသဆိုင်ရာ အုပ်ချုပ်ရေးအဖွဲ့များထံမှ ငွေကြေးနှင့် အထောက်အပံ့များ ရရှိရန် ညှိနှိုင်းဆောင်ရွက်ခြင်း၊

(စ) ပညာရေးကဏ္ဍအတွက် ပြည်တွင်းပြည်ပမှ ငွေကြေးနှင့် အထောက်အပံ့များ ရယူ သုံးစွဲနိုင် ရန် အလို့ငှာ မူဝါဒချမှတ်ခြင်း၊

(ဆ) ကျောင်းများဖွင့်လှစ်ခြင်း၊ ဖွင့်လှစ်ခွင်ရပ်ဆိုင်းခြင်းနှင့် ပိတ်သိမ်းခြင်းဆိုင်ရာ မူဝါဒများ ချမှတ်ခြင်း၊

(ဇ) ဝန်ကြီးဌာနနှင့် သက်ဆိုင်ရာဝန်ကြီးဌာနများက ပြုစုတင်ပြသော ပညာရေးဆိုင်ရာ စီမံကိန်းများနှင့် စပ်လျဉ်း၍ ပေါင်းစပ်ညှိနှိုင်းပေးခြင်း၊

(ဈ) ကော်မရှင်သည် မိမိ၏ လုပ်ငန်းဆောင်ရွက်ချက်များကို ပြည်ထောင်စုလွှတ်တော်နှင့် အစိုးရအဖွဲ့သို့ အနည်းဆုံး ခြောက်လတစ်ကြိမ် အစီရင်ခံတင်ပြခြင်း။


အမိန့်အရ
ဇော်သန်းသင်း
အတွင်းရေးမှူး
ပြည်ထောင်စုအစိုးရအဖွဲ့

Myanmar President Office
https://www.facebook.com/myanmarpresidentoffice.gov.mm

၂၉.၉.၂၀၁၆ ရက် ညနေ ၁၆:၄၉ နာရီ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းမာရွှင်လန်းစွာဖြင့် ရန်ကုန်အပြည်ပြည်ဆိုင်ရာလေဆိပ်မှ နေပြည်တော်သို့ လေကြောင်းခရီးဖြင့် ပြန်လည်ထွက်ခွာ။

REF: ဖြိုးမင်းသိန်း (facebook)