01/13/16

သာယာဝတီအကျဉ်းထောင်မှာ ဖမ်းဆီးခံထားရတဲ့ ဗကသ ကျောင်းသား ခေါင်းဆောင်တစ်ဦးဖြစ်သူ ကိုမင်းသွေးသစ် ကိုရုံးထုတ်လာစဉ် Photo:Aung Thain Kha/RFA
သာယာဝတီအကျဉ်းထောင်ကနေ ရန်ကုန်ပြည်သူ့ဆေးရုံကြီးမှာ ဆေးဝါးကုသမှု ခံယူနေတဲ့ ဗကသအဖွဲ့ချုပ် အတွင်းရေးမှူး ကိုမင်းသွေးသစ်ကို လွန်ခဲ့တဲ့ ၂၀၁၄ ခုနှစ် နိုဝင်ဘာလက လမ်းမတော်နဲ့ ကမာရွတ်မြို့နယ်တွေမှာ အမျိုးသားပညာရေးဥပဒေကို ဆန္ဒပြခဲ့တဲ့အတွက် အဲဒီမြို့နယ်ရဲစခန်းတွေက တရားမ၀င်စီတန်း လှည့်လည်မှု၊ ပိုင်နက် ကျူးလွန်မှုတို့နဲ့  တရားစွဲဆိုလိုက်ပါတယ်။

ကျောင်းသားသပိတ်စတင်ခဲ့တဲ့ နေ့ရက်တုန်းက ဆန္ဒပြခဲ့တာတွေအတွက် မနေ့ တရားစွဲတာ ဖြစ်တယ်လို့ ကျန်းမာရေးကြောင့် သာယာဝတီထောင်ဆေးရုံကနေ ရန်ကုန်ပြည်သူ့ဆေးရုံကြီးမှာ ဆေးကုသခံနေတဲ့ ကိုမင်းသွေးသစ်က ပြောပါတယ်။

"ရန်ကုန်နှစ်မြို့နယ်လုံးပေါ့၊ လမ်းမတော်ရယ်၊ ကမာရွတ်ရယ်၊ သမိုင်းလမ်းဆုံကနေ လှည်းတန်းကိုလာတယ်၊ ပြီးတော့ရန်ကုန်တက္ကသိုလ်ထဲကိုသွားတယ်၊ အဲ့ကိစ္စတွက် ၁၈နဲ့ ၄၄၇နဲ့စွဲတယ်၊ လမ်းမတော်ကတော့ ကျနော်တို့နောက်ဆုံးရက်မှာ မြို့တော်ခန်းမရှေ့ကိုချီတက်လမ်းလျှောက်တဲ့အတွက် ကျနော်ရယ်၊ ကိုနန္ဒာစစ်အောင်ရယ်ကိုစွဲတယ်၊ ကမာရွတ်ရဲစခန်းကကျတော့ ၁၈နဲ့ ၄၄၇နဲ့က ဖြိုးဖြိုးအောင်ရယ်၊ ကိုကျော်ကိုကိုရယ်၊ ကိုနန္ဒာစစ်အောင်ရယ်၊ ကျနော်ရယ်ပေါ့"

ကိုမင်းသွေးသစ်ဟာ လက်ရှိ နိုင်ငံတော်အကြည်ညိုပျက်စေမှု၊ တရားမ၀င်စီတန်း လှည့်လည်မှု၊ ဥပဒေမဲ့အစုအဖွဲ့မှာ ပါဝင်မှုစတဲ့ အမှုပေါင်း ၄၀ ကျော်နဲ့ တရားရင်ဆိုင် နေရတာဖြစ်ပြီး အစာအိမ်ရောဂါကြောင့် ရန်ကုန်ပြည်သူ့ဆေးရုံကြီးမှာ ဒုတိယအကြိမ် တက်ရောက်ကုသနေတာဖြစ်ပါတယ်။

ပြီးခဲ့တဲ့နှစ် မတ်လ ၁၀ရက်နေ့က လက်ပံတန်းကျောင်းသားသပိတ်စစ်ကြောင်း အကြမ်းဖက်ဖြိုခွဲခံရပြီး ကျောင်းသား ကျောင်းသူတွေနဲ့ ၀န်းရံသူ ၅၀ ကျော်ဟာ သာယာဝတီအကျဉ်းထောင်မှာ ပုဒ်မ ၅ ခုနဲ့ ဖမ်းဆီးခံထားရတာ တစ်နှစ်နီးပါး ရှိနေပြီဖြစ်ပါတယ်။ ကျန်းမာရေးအခြေအနေကြောင့် ရန်ကုန်ပြည်သူ့ဆေးရုံကြီးမှာ လက်ရှိဆေးကုသမှုခံယူနေသူ ၅ ဦး ရှိနေပါတယ်။

RFA Burmese
http://www.rfa.org/burmese

မိခင် ၂ ဦးနဲ့ အမဖြစ်သူတို့က ဘန်ကောက်မြို့က မှုခင်းနှိမ်နှင်းရေးရဲတပ်ဖွဲ့နဲ့ ဒီအက်စ်အိုင် အထူးမှုခင်းစုံစမ်းရေးဌာနကို သွားရောက်တိုင်ကြားတာဖြစ်
ထိုင်းနိုင်ငံ ရနောင်းမြို့က လူသတ်မှုစွပ်စွဲခံရတဲ့ မြန်မာလုပ်သား ၄ ဦး ကို မတရားဖမ်းဆီးနှိပ်စက်ခံရတာဖြစ်တယ်ဆိုပြီး အမေနဲ့အစ်မဖြစ်သူတွေက ဘန်ကောက်မြို့ မှုခင်းနှိမ်နှင်းရေးတပ်ဖွဲ့နဲ့ အထူးမှုခင်းစုံစမ်းရေးဌာနကို ဇန်နဝါရီလ ၁၂ ရက်နေ့က သွားရောက်တိုင်ကြားခဲ့ပါတယ်။

ထိုင်းနိုင်ငံတောင်ပိုင်း ရနောင်းမြို့မှာ အသက် ၁၈ နှစ်အရွယ် ထိုင်းကျောင်းသူတစ်ဦး ပြီးခဲ့တဲ့နှစ် စက်တင်ဘာ ၂၈ ရက်က အသတ်ခံရခဲ့ရတာနဲ့ပတ်သသက်ပြီး မြန်မာရေလုပ်သား မိုးဇင်အောင်၊ စိန်ကတုံး၊ ကျော်စိုးဝင်းနဲ့ ဝေလင်းတို့ကို ရနောင်းရဲတပ်ဖွဲ့က ဖမ်းဆီးထားပါတယ်။

ဖမ်းဆီးချိန်မှာ ရိုက်နှက်ပြီး ဝန်ခံခိုင်းစေခဲ့တယ်တာကြောင့် အဖမ်းခံရသူ မိခင် ၂ ဦးနဲ့ အမဖြစ်သူတို့က ဘန်ကောက်မြို့က မှုခင်းနှိမ်နှင်းရေးရဲတပ်ဖွဲ့နဲ့ ဒီအက်စ်အိုင် အထူးမှုခင်းစုံစမ်းရေးဌာနကို သွားရောက်တိုင်ကြားတာဖြစ်ပါတယ်။

မြန်မာရေလုပ်သား ၄ ယောက်အမှုကို FED ပညာရေးနဲ့ဖွံ့ဖြိုး တိုးတက်ရေး ဖောင်ဒေးရှင်း က ကူညီဆောက်ရွက်နေတာဖြစ်ပါတယ်။

ထိုင်းလူ့အခွင့်အရေးကော်မရှင်ကိုလည်း တိုင်ကြားခဲ့တာကြောင့် ထိုင်းလူ့အခွင့်အရေးကော်မရှင်ကလည်း ရနောင်းကို သွားရောက်ပြီးကွင်းဆင်း လေ့လာမှာဖြစ်တယ်။

မြန်မာသံရုံးအနေနဲ့ကလည်း လိုအပ်တဲ့စာရွက်စာတမ်းတွေကို ကူညီဆောင်ရွက်ပေးတယ်လို့ ဦးထူးချစ်က ပြောပါတယ်။

ဒီအမှုကိုတော့ ထိုင်းလူ့အခွင့်အရေးရှေ့နေများအစည်းအရုံးကရှေ့နေ၊ ထိုင်းရှေ့နေများ ကောင်စီက ရှေ့နေနဲ့ FED က ရှေ့နေတို့ စုပေါင်း အကျိုးဆောင် ကြမှာဖြစ်တယ် လို့ ဦးထူးချစ်ကပြောပါတယ်။

BBC Burmese
http://www.bbc.com/burmese


တူရကီ နိုင်ငံ အစ္စတန်ဘူလ် မြို့မှာ အသေခံ ဗုံးခွဲ တိုက်ခိုက် ခံခဲ့ရလို့ ဂျာမနီ နိုင်ငံသား အများစု ဖြစ်တဲ့ အနည်းဆုံး လူ ၁၀ ဦး သေဆုံး ခဲ့ရမှု အပေါ် ဂျာမနီ အစိုးရက ပြစ်တင် ရှုတ်ချ လိုက်ပါတယ်။

အဲဒီ့ တိုက်ခိုက်မှု ဟာ အရိုင်းအစိုင်း တွေရဲ့ လုပ်ရပ် ဆိုပြီး ဂျာမနီ အစိုးရ ပြောပါတယ်။

ကျူးလွန်သူ အကြမ်းဖက်သမား တွေဟာ လူသား မျိုးနွယ် တစ်ခုလုံးရဲ့ ရန်သူ ဖြစ်တယ် ဆိုပြီး ဂျာမနီ ဝန်ကြီးချုပ် အိန်ဂလာ မာ့ခဲလ် က ဆိုပါတယ်။

တူရကီ မြို့ဟောင်းရဲ့ အချက်အခြာ နေရာ ဖြစ်တဲ့ ဆူလ်တန်အာမက် ရင်ပြင်မှာ အစ္စလာမ်မစ် နိုင်ငံအဖွဲ့ IS တစ်ဦး က အသေခံ ဗုံးခွဲ ခဲ့တာ ဖြစ်တယ် ဆိုပြီး တူရကီ အစိုးရ က ပြောထား ပါတယ်။

တူရကီ နိုင်ငံ မှာ ရောက်ရှိနေတဲ့ ဂျာမနီ နိုင်ငံသား တွေ ကို ကမ္ဘာလှည့် ခရီးသည် တွေ အတွက် စွဲဆောင် မှု ရှိတဲ့ လူထူထပ်ရာ နေရာ တွေကို ရှောင်ကြဖို့ ဂျာမနီ အစိုးရ က သတိ ပေးထားပြီး၊ တူရကီ နိုင်ငံ တလွှား နောက်ထပ် တိုက်ခိုက်မှု တွေ ဖြစ်လာ နိုင်တယ် လို့လည်း ဆိုပါတယ်။

BBC Burmese
https://www.facebook.com/bbcburmese/


ဂျာမနီ နိုင်ငံထဲမှာ ရာဇဝတ် ကျူးလွန်တဲ့ ရွှေ့ပြောင်း ဝင်ရောက်သူတွေ ကို တိုင်းပြည် ကနေ နှင်ထုတ် ရာမှာ ပိုပြီး အလွယ်တကူ ဖြစ်စေမယ့် ဥပဒေကြောင်း ဆိုင်ရာ ပြုပြင် ပြောင်းလဲမှုတွေ နဲ့ ပတ်သက်တဲ့ အသေးစိတ် အစီအစဉ် တွေကို ဂျာမနီ အစိုးရ က ထုတ်ဖော် ကြေညာ ခဲ့ပါတယ်။

ကိုလုံးမြို့ မှာ နှစ်သစ်ကူးည က အမျိုးသမီး အရေအတွက် ရာဂဏန်းကျော် ပစ်မှတ် ထား တိုက်ခိုက် ခံခဲ့ရ တာမှာ ကျူးလွန်သူ အားလုံး နီးပါးဟာ ရွှေ့ပြောင်း ဝင်ရောက်သူတွေ ဖြစ်တယ် ဆိုပြီး ဂျာမနီ အာဏာပိုင် တွေက ပြောထား ပါတယ်။


အခု ပြုလုပ် လိုက်တဲ့ ဥပဒေ ပြင်ဆင် မှု အရ ထောင်ဒဏ် တစ်နှစ်နဲ့ တစ်နှစ် အထက် ကျခံရမယ့် ရာဇဝတ်မှုမျိုး ကျူးလွန်သူ ဘယ် နိုင်ငံခြားသား ခိုလှုံခွင့် လျှောက်ထား ထားသူ မဆို ဂျာမနီ နိုင်ငံကနေ နှင်ထုတ် ခံရမှာ ဖြစ်ပါတယ်။

လိင်ပိုင်း ဆိုင်ရာ ကျူးလွန် တဲ့ ရာဇဝတ်မှု မျိုး အပါအဝင် တချို့သော ရာဇဝတ်မျိုး တွေ ကျူးလွန်သူ ဆိုရင် ဆိုင်းငံ့ ထောင်ဒဏ်ပဲ အချ ခံရရင်တောင် လာရာ နိုင်ငံ ကို ပြန်အပို့ ခံရ မှာ ဖြစ်ပါတယ်။

တခါ၊ ဂျာမနီ နိုင်ငံ အရှေ့ဘက် မြို့ ဖြစ်တဲ့ လိုက်ပ်ဇစ် မှာ နိုင်ငံခြားသား တစ်သန်းကျော် ကို လက်ခံ ခဲ့တဲ့ အစိုးရ ရဲ့ မူဝါဒ အပေါ် ဆန့်ကျင် ဆန္ဒ ပြကြ ရင်းသား ကားတွေကို မီးရှို့ကြ၊ အဆောက်အဦ ပစ္စည်းတွေကို ဖျက်စီး ကြ ပြုလုပ် ခဲ့ကြတဲ့ လက်ျာစွန်းရောက် ၂၀၀ ကျော်ကို ဖမ်းဆီး ခဲ့တယ် ဆိုပြီး ဂျာမန် ရဲတပ်ဖွဲ့က ပြောပါတယ်။

အစ္စလာမ် ဆန့်ကျင်ရေး ပေဂီးဒါး လှုပ်ရှားမှု အဖွဲ့ က ပြုလုပ် ခဲ့တဲ့ လိုက်ပ်ဇစ် မြို့ ဆန္ဒပြပွဲမှာ ဂျာမနီ ဝန်ကြီး အိန်ဂလာ မာ့ခဲလ် ကို ရာထူးကနေ နှုတ်ထွက်ဖို့ တောင်းဆို ခဲ့ကြပါတယ်။

BBC Burmese
https://www.facebook.com/bbcburmese/

ရန်ကုန်တိုင်းဒေသကြီးမြေငလျင်တိုင်းတာရေးစခန်း၏အရှေ့တောင်ဘက် ၄၁မိုင် ခန့်အကွာကိုဗဟိုပြုကာအင်အား ၄.၈ အဆင့်ရှိမြေငလျင် လှုပ်ခတ်မှုတစ်ခု ရန်ကုန်တိုင်းဒေသကြီးတွင်ဖြစ်ပွားခဲ့ကြောင်းသိရသည်။

အဆိုပါငလျင်သည် ဇန်နဝါရီ ၁၂ ရက် ည၉နာရီ ၂၉မိနစ်ကဖြစ် ပွားခဲ့ ခြင်းဖြစ်ပြီး ငလျင်အမျိုးအစားမှာ စောက် တိမ်ငလျင်ဖြစ်သည့်အတွက် ရန်ကုန်တိုင်း ဒေသကြီးတွင်ရှိသည့် မြို့နယ်အများစုတွင် ခံစားခဲ့ရကြောင်း သိရသည်။

ယင်းကဲ့သို့ငလျင်လှုပ်ခတ်မှုကို ပြည်သူအချို့ စကန့်နီးပါးခံစားခဲ့ရပြီး ငလျင်လှုပ်ခတ်ပြီးနောက်အချိန်အနည်းငယ်အတွင်းတွင်လည်းလျှပ်စစ်မီးများပြတ် တောက်ခဲ့ကြောင်းသိရသည်။

''ကျွန်တော်တို့ကဒုတိယထပ်မှာ နေတာဆိုတော့ နည်းနည်းယိမ်းသွား တဲ့ ဒဏ်ကိုခံစားလိုက်ရတယ်။စကန့်အားဖြင့် တော့ ၁၀ စကန့်လောက်ရှိ မယ်လို့ထင် ပါတယ်''ဟုဗဟန်းမြို့ရှိကွန်ဒိုတစ်ခုတွင် ထိုင်သူဦးအောင်သိန်း ကပြောသည်။

ယခုလှုပ်ခတ်ခဲ့သည့်ငလျင် သည်အချိန်အားဖြင့် ၁ဝစကန့်နီးပါးလှုပ် ခတ်ခဲ့ခြင်းဖြစ်နိုင်သည်ဟုရန်ကုန်တိုင်းဒေသကြီးမှမြို့နယ်အချို့တွင်နေထိုင်သူများ၏ပြောကြားချက်အရသိရသည်။

''နေရာအတိအကျ အားဖြင့် ပြောရရင်တော့ရန်ကုန်မြို့ရဲ့ပင်လယ်ဝကို ဗဟိုပြုတာဖြစ်ပါတယ်။သန်လျင်မြို့နဲ့ဆိုရင် ၂၉ မိုင်အကွာဖြစ်ပြီး ကုလားဒန်း ရွာနဲ့ဆို ရင် ၁၀ မိုင်အကွာကို ဗဟိုပြုပြီးတော့ လှုပ်သွားတာဖြစ်ပါ တယ်။ ငလျင်ဗဟိုချက်ကတော့ မြေအောက် ၁၀ ကီလိုမီတာကို ဗဟိုပြုတဲ့ အတွက် ပြည်သူတွေတော်တော် များများကငလျင်လှုပ်တာ ကိုသိလိုက်ကြ တာ ဖြစ်ပါတယ်''ဟုမိုးလေဝသနှင့်ဇလဗေဒညွှန့်ကြားမှုဦးစီးဌာနမြေ ငလျင်ဌာနခွဲမှ တာဝန်ကျသူအရာရှိတစ်ဦးက ဒီမိုကရေစီတူဒေးသတင်းစာသို့ ဇန်နဝါရီ ၁၂ ရက်ည ၁ဝနာရီ ၃၀ မိနစ်က အတည်ပြုပြောကြားလိုက်သည်။

SMT
‪#‎Democracytoday‬

[youtube src="l5Kt4ectX6c"/]

ယနေ့ကျင်းပခဲ့တဲ့ ပြည်ထောင်စုငြိမ်းချမ်းရေး ညီလာခံမှာ အမျိုးသားဒီမို ကရေစီအဖွဲ့ချုပ် ဥက္ကဌဒေါ်အောင်ဆန်းစုကြည်က မိန့်ခွန်းပြောကြား ခဲ့ရာမှာ နိုင်ငံမှာ တစ်မျိုးသား လုံးပြန်လည်သင့်မြတ်ဖို့ အထူးလိုအပ်နေပြီး အမျိုးသား ပြန်လည်သင့်မြတ်ရေးကို ငြိမ်းချမ်းရေး လုပ်ငန်းစဉ်များမှာ လျစ်လျူရှုထားလို့ မရနိုင်ပဲ အမျိုးသားပြန်လည် သင့်မြတ်ရေး မရှိဘဲနဲ့ တည်တံ့ခိုင်မြဲတဲ့ ငြိမ်းချမ်းရေးကို ဘယ်လိုမှ မတည်ဆောက်နိုင်ဘူးလို့ထည့်သွင်းပြောကြားလိုက်ပါတယ်။

ဒါအပြင် တစ်နိုင်ငံလုံး အပစ်အခတ်ရပ်စဲရေးဆိုင်ရာ စာချုပ်ဟာ ပြည်ထောင်စုကြီး ငြိမ်းချမ်းရေးအတွက် ပထမ အစ ခြေလှမ်းသာ ဖြစ်ပြီး တိုင်းရင်းသား လက်နက်ကိုင် အဖွဲ့များအားလုံး ပါဝင်လက်မှတ်ရေးထိုးနိုင်ရန် မလွဲမသွေ ပူးပေါင်းဆောင်ရွက် သွားရမှာ ဖြစ်တယ်လို့ဒေါ်အောင်ဆန်းစုကြည်က ပြောကြားခဲ့ပါတယ်။

ပြည်ထောင်စုဖွား တိုင်းရင်းသား အချင်းချင်းကြားမှာ NCA စာချုပ်ကို လက်မှတ်ရေးထိုးသော တိုင်းရင်းသား လက်နက်ကိုင် အဖွဲ့များနဲ့ NCA လက်မှတ်ရေးထိုးခြင်း မပြုရသေးသော တိုင်းရင်းသား လက်နက်ကိုင် အဖွဲ့များ အချင်းချင်း စိတ်ဝမ်းမကွဲပြားဖို့ အရေးကြီးကြောင်းကိုလည်း ယင်းကပြောကြားခဲ့ပါတယ်။

ပထမအကြိမ်ကျင်းပတဲ့ပြည်ထောင်စုငြိမ်းချမ်းရေးညီလာခံကို နေပြည်တော်ကောင်စီနယ်မြေရှိ MICC 2 မှာ ၂၀၁၆ ခုနှစ် ဇန်န၀ါရီလ ၁၂ ရက်နေ့ကနေ ၁၆ ရက်နေ့အထိ (၅)ရက်ကြာ ကျင်းပသွားမှာဖြစ်ပါတယ်။
အဲ့ဒီညီလာခံကို တိုင်းရင်းသားကိုယ်စားလှယ်တွေ၊ တိုင်းရင်းသားလက်နက်ကိုင်တွေ၊ အစိုးရအဖွဲ့ ကိုယ် စားလှယ်တွေ၊ တပ်မတော်နဲ့နိုင်ငံရေးပါတီတွေက ကိုယ်စားလှယ်တွေ တက်ရောက်လျက်ရှိပါတယ်။ အဲ့ဒီဆွေး နွေးပွဲကိုတော့ ကိုယ်စားလှယ်စုစုပေါင်း ၇၀၀ ထက်မနည်း တက်ရောက်နေတာဖြစ်ပါတယ်။

Eleven Media Group

၂၀၁၅ စာသင်နှစ်မှာ ၁၀တန်းကို ၅ ဘာသာဂုဏ်ထူးနဲ့  အောင်ခဲ့သူ ဖြစ်ပါတယ်။ ၅၂၇ မှတ်ရပြီး၊ ဆေးတက္ကသိုလ်ဝင်ခွင့်အမှတ်က ၅၀၉မှတ်ဆိုတော့ ဆေးတက္ကသိုလ်ဝင်ခွင့် လျှောက်ထားခဲ့ပေမယ့် စာရင်းထွက်တော့ E major ထဲမှာသာ ပါနေခဲ့ပါတယ်။

အခြေခံပညာအဆင့်မြင်ဦးစီးဋ္ဌာန အောက်မြန်မာပြည်ကနေ မှတ်ပုံတင်မရှိလို့ ဆိုပြီး E Major ထဲမှာ ထည့်ထားတာပါတဲ့။

ယခုထိ အမှတ်မှီတဲ့ ဆေးတက္ကသိုလ်ကို ၀င်ခွင့်အမှတ်ထက်ကျော်နေပါလျက်နဲ့  တက်ရောက်ခွင့် မရရှိသေးတာ ပညာရည်ထူးချွန်သော ပြည်သူ့ သားသမီးတစ်ယောက် ဘ၀ရှေ့ ရေးကိုရော၊ အနာဂါတ်တိုင်းပြည်အတွက် အကျိုးရှိစေနိုင်တဲ့ ပညာတတ်တစ်ယောက်ရဲ့  ဘ၀ရိုက်ချိုးထားတာ ဖြစ်နေပါတယ်။

ပညာအရည်အချင်းကို တန်ဖိုးထားစေချင်ပါတယ်။

Nik Nayman Fb

ရဲရင့်သည့် လုပ်ဆောင်မှုတစ်ရပ်အဖြစ် လိပ်ကျွန်းတွင် အသတ်ခံရသူ ဗြိတိန်သူ ဟန်နာ၏ အစ်မ လော်ရာဝှစ်သာရိုက်က ထိုင်းအာဏာပိုင်များ၏ ကြောက်ဖွယ်ကောင်းသော ၎င်းတို့၏ မိသားစုအပေါ် ဆက်ဆံလိုက်ပုံများကို လူသိရှင်ကြား ဖွင့်ချလာသည်။ လော်ရာ၏ ဖွင့်ချလိုက်မှုက မီဒီယာများတွင် ပျံ့နှံ့နေသည်။ အမှုနှင့် ပတ်သက်ပြီး ကြုံတွေ့ခဲ့ရသည်များကို လော်ရာက ၎င်း၏ ဖေ့ဘုတ်စာမျက်နှာတွင် ဖော်ပြလိုက်ခြင်းဖြင့် သောသောညံအောင် ပျံ့နှံ့သွားခဲ့ပြီဖြစ်သည်။

"လိပ်ကျွန်းမှာ နောက်ထပ် ဗြိတိန်နိုင်ငံသားတွေ အသတ်ခံရတာမျိုးကို မြင်ရလာနိုင်တာပါပဲ။ ကျွန်မအနေနဲ့ ဖေ့ဘုတ်ပို့စ် ရေးတင်ဖို့ မရှိခဲ့ဘူး။ ဒါပေမယ့် သူငယ်ချင်းတစ်ယောက် ရှယ်ထားတဲ့ ပို့စ်ကို ဒီမနက်မှာ တွေ့ရတယ်။ ဒါကတော့ လိပ်ကျွန်းကို မသွားကြဖို့ သတိပေးထားတာပဲ။ ထိုင်းနိုင်ငံက ကမ္ဘာ့အလှဆုံး စာရင်းဝင် လိပ်ကျွန်းကတော့ ကျွန်မအတွက် စိတ်အနှောင့်အယှက် ကောင်းကောင်းပေးနေပါပြီ။ ဒီလှပတဲ့ နေရာက ရှင်တို့ကို အန္တရာယ်ရှိရာဆီကို ဆွဲဆောင်နေတဲ့ နေရာတစ်နေရာပဲဖြစ်ပါတယ်။"ဟု လော်ရာက ဖေ့ဘုတ်ပေါ်တွင် ရေးသားထားသည်။

ဟန်နာ၏ အမှုဖြစ်ပြီးနောက် လူအများကို သတိပေးချင်ခဲ့ကြောင်း၊ သတိပေးခဲ့လျှင် တစ်စုံတစ်ဦး တစ်ယောက်ယောက်၏ အသက်ကို ကယ်တင်တာမျိုးဖြစ်လာနိုင်ကြောင်း၊ လိပ်ကျွန်းသည် လှပသော်လည်း မျက်ရည်များကို ဖန်တီးလာနိုင်သည့် အလှအပဖြင့် ဆွဲဆောင်နေသော နေရာတစ်ခုဖြစ်ကြောင်း လော်ရာက ရေးသားထားသည်။

ဟန်နာကိစ္စတွင် လော်ရာအနေဖြင့် ထိုင်းနိုင်ငံ၏ အန္တရာယ်ကြီးပုံကို ဖော်ပြရန် စဉ်းစားအကြံဥာဏ် တောင်းခဲ့ဖူးကြောင်းလည်း ၎င်းက ပြောသည်။ ထိုင်းနိုင်ငံက မုဒိမ်းမှုနှင့် လူသတ်မှုများထက် မူးယစ်ဆေးသံသရာတွင် လည်နေသည့် နိုင်ငံဖြစ်ကြောင်းကို လော်ရာက ရေးသားသည်။ ထိုင်းရဲများ အများစုကလည်း အကျင့်ပျက်ခြစားနေကြသူများဖြစ်ကြောင်း ၎င်းက ပြောသည်။

ဟန်နာအသတ်ခံရမှုအတွက် ထိုင်းတော်ဝင် ရဲဌာနချုပ်သို့ ဖိတ်ခေါ်ခံရကြောင်း၊ သို့သော်လည်း ရောက်ရှိချိန်တွင် အခန်းကျယ်အတွင်း ငါးမိနစ်ခန့် စောင့်ဆိုင်းခဲ့ရသော်လည်း နောက်ဆုံး တွေ့ဆုံလိုက်ရသူများမှာ သတင်းထောက် ၂၀၀ ကျော်က ဝိုင်းအုံ ဓာတ်ပုံများ ရိုက်ခြင်းပင်ဖြစ်ကြောင်း၊ သတင်းများက ကျွန်မတို့၏ ပုံများကို ဖော်ပြနိုင်ရန်သာ ဖန်တီးလိုက်ပုံမျိုးပင်ဖြစ်ကြောင်း လော်ရာက ရေးသားသည်။

"ထိုင်းရဲတပ်ဖွဲ့အကြီးအကဲ ကျွန်မတို့ကို အမှုနောက်ဆုံး တွေ့ရှိချက်များအကြောင်း တစ်စုံတစ်ရာမှ ပြောကြားခြင်းမရှိ" ဟု လော်ရာက ဆိုသည်။ "ကျွန်မတို့ကို ခေါ်ယူတွေ့ဆုံသည်က မီဒီယာများအတွက် သတင်းဖော်ပြဖြစ်အောင်ပဲ ဖြစ်သည်"ဟုလည်း ရေးသားထားသည်။

လိပ်ကျွန်းတွင် ဟန်နာအသတ်ခံရမှုက သံသယဖြစ်စရာ အချက်များ များစွာရှိနေကြောင်း လော်ရာက ရေးသားထားသည်။

ညီမဖြစ်သူ ဟန်နာအသတ်ခံရပြီးနောက်ပိုင်း ထိုင်းနိုင်ငံမှ အသက်အန္တရာယ် ခြိမ်းခြောက်မှုများကိုလည်း ကြုံတွေ့ရကြောင်း၊ ကျွန်မ၏ ဓာတ်ပုံကို ဖျက်ဆီးထားပြီး လူသတ်သမားများက အလုပ်ကို တစ်ပိုင်းသာလုပ်ရသေးပြီး နောက်ထပ်လုပ်စရာ ကျန်နေသေးသည်ဟု ခြိမ်းခြောက်ကြောင်းများလည်း ရေးသားထားသည်။

လက်ရှိတွင် ကိုယ့်အရိပ်ကိုပင် ပြန်ကြောက်လန့်နေပြီဖြစ်ကြောင်း၊ အိပ်မက်ဆိုးများလည်း မက်နေရကြောင်း၊ စိတ်ပင်ပန်းလွန်းရကာ မောပန်းနေပြီဖြစ်ကြောင်း ရေးသားထားသည်။

Mizzima


ငြိမ်းချမ်ရေးညီလာခံစတင်သည့် ဇန်န၀ါရီ ၁၂ရက်နေ့တွင်ပင် ပလောင်အဖွဲ့နှင့် အစိုးရတပ်တို့အကြား တိုက်ပွဲများပြန်လည်ဖြစ်ပွားနေပြီဟု TNLA တအာင်းအမျိုးသား လွတ်မြောက်ရေးအဖွဲ့ သတင်းပြန်ကြားရေး အဖွဲ့က ယနေ့နေ့လည်ပိုင်းတွင် သတင်းထုတ်ပြန်သည်။

"ဒီနေ့ကျွန်တော်တို့တပ်မတော်နေ့လုပ်နေတာကို အစိုးရတပ်ကထိုးတယ်။ နေပြည်တော်မှာလည်းငြိမ်းချမ်းရေး ဆွေးနွေးပွဲလုပ်နေတယ်လေ။ ဒီလိုနေ့မျိုးတော့ ရှောင်သင့်ပါတယ်။ ဒါကို ဒီနေ့ကိုပဲ ၂ကြိမ်ထိုးစစ်ဆင်တယ် " ဟု TNLA ၏ ဗိုလ်မှူးချုပ် တာဂျုတ်ဂျားက မဇ္ဈိမကိုပြောသည်။

၂၀၁၆ ခုနှစ် ဇန်နာဝါရီလ ၁၂ရက်၊ ယနေ့နေပြည်တော်တွင် အစိုးရနှင့် အပစ်အခတ်ရပ်စဲထားသည့် အဖွဲ့ ၈ဖွဲ့တို့က ငြိမ်းချမ်းရေးညီလာခံပြုလုပ်ဆွေးနွေးနေသည့် နေလည်းဖြစ်သည့်အပြင် TNLA ဖွဲ့စည်းသည့် ၂၄နှစ် ပြည့်လည်းဖြစ်သည်။

အဆိုပါနေ့တွင် ရှမ်းပြည်နယ်၊ နမ္မတူမြို့နယ် ပန်ကွတ်ကျေးရွာနှင့် ကွတ်ခိုင်မြို့နယ် ဟိုပုံကျေးရွာများတွင် TNLA နှင့် အစိုးရတပ်များဖြစ်သည့် ခမရ (၃၂၄)၊ တပ်မ (၉၉)တို့က နေ့လည် ၁နာရီ ခွဲအချိန်မှ ညနေပိုင်း ၄နာရီခန့်အထိ တိုက်ပွဲများဖြစ်ပွားလျက်ရှိသည်ဟု ဗိုလ်မှူးချုပ် တာဂျုတ်ဂျားက မဇ္ဈိမကိုပြောသည်။

နေပြည်တော်တွင် ကျင်းပနေသည့် ငြိမ်းချမ်းရေးဆွေးနွေးပွဲများကိုလည်း မိမိတို့အဖွဲ့သို့ ဖိတ်ကြားခြင်းမရှိ သကဲ့သို့ TNLA ကတက်ရောက်ရန်လည်း ပြင်ဆင်ထားခြင်းမရှိကြောင်း ၄င်းကဆိုသည်။

အစိုးရသစ်တက်ရောက်လာပါက ၄င်းတို့အနေဖြင့် ငြိမ်းချမ်းရေးဆွေးနွေးနိုင်ရေးအတွက် အစိုးရသစ်နှင့် တွေ့ဆုံသွားရန်ပြင်ဆင်ထားသည်ဟုလည်း ၄င်းကပြောသည်။

TNLA နှင့် အစိုးရတပ်တို့၏ ယခုတိုက်ပွဲများသည့် ၂၀၁၆ခုနှစ်၊ နှစ်စအတွင် ၅ကြိမ်မြောက်တိုက်ပွဲလည်း ဖြစ်သည်ဟု TNLAမှသိရသည်
 Mizzima
http://mizzimaburmese.com/article/9763


NLD ပါတီ အောင်နိုင်ရေးအတွက် ရည်ရွယ် ရိုက်ကူးထားသည့် ဒါရိုက်တာ အကယ်ဒမီ ညီညီထွန်းလွင်၏ ပထမဆုံး နိုင်ငံရေး ဇာတ်ကားဖြစ်သည့် အီဖေကိုတို့ ရွေးကောက်ပွဲ ရုပ်ရှင်ဇာတ်ကားကြီးကို ဇန်နဝါရီလ နောက်ဆုံးပတ်တွင် ရန်ကုန်မြို့ရှိ ရုပ်ရှင်ရုံများ၌ ရုံတင်ပြသသွားမည် ဖြစ်သည်။

အီဖေကိုတို့ရွေးကောက်ပွဲ ရုပ်ရှင် ဇာတ်ကားကို အိပ်မက်မျှဝေ ရုပ်ရှင် ထုတ်လုပ်ရေးမှ ရိုက်ကူးခြင်း ဖြစ်ပြီး စီစဉ်သူ သြရသ၊ ဝတ္တု လူနေ၊ ဇာတ်ညွှန်း လွင်မင်းအံ့ ဖြစ်ကာ ဒါရိုက်တာ အကယ်ဒမီ ညီညီထွန်းလွင်မှ ရိုက်ကူးထားသည်။

သရုပ်ဆောင်များ အဖြစ် ဇေရဲထက်၊ ညီထွဋ်ခေါင်၊ နန်းမြတ်ဖြိုးသင်း၊ ခန့်စည်သူ၊ ထွန်းထွန်း၊ ခင်လှိုင်၊ ဆင်မ၊ မျိုးမျိုးခိုင်၊ အေးသီတာ၊ Kညီ ၊ မေပန်းချီ တို့အပြင် အခြား သရုပ်ဆောင်များစွာဖြင့် ရိုက်ကူးထားသည်။

ဒါရိုက်တာ ညီညီထွန်းလွင်က "ဒီဇာတ်ကားလေးက နိုင်ငံရေး ဇာတ်ကားပေါ့ မြန်မာရုပ်ရှင်မှာ နိုင်ငံရေးကားလည်း မရှိပါဘူး။ ဒါကတော့ ပေါ်တင် နိုင်ငံရေးကားပဲ တိုင်းပြည်တစ်ပြည်ကို လက်ရုံးရည်သမား၊ တိုက်ခိုက်ရေး သမားတွေက ဦးဆောင်သင့်သလား ပညာတတ် နှလုံးရည် သမားတွေက ဦးဆောင်သင့်သလား အဲတာကို Message (သတင်းစကား) ပေးထားတာ။ တိုင်းပြည်တစ်ပြည်က ပညာတတ်တွေ ဦးဆောင်မှ ကောင်းမယ်ဆိုတဲ့ အရာကို ရိုက်ပြထားတာပါ" ဟု ပြောသည်။

ဇာတ်လမ်းမှာ ရွေးကောက်ရွာတွင် ပညာတတ် မောင်ဖေ(ဇေရဲထက်) နှင့် တိုက်ခိုက်ရေး သမား လက်ရုံးရည် သမား ဖြစ်သည့် မောင်ကို(ညီထွဋ်ခေါင်) တို့ နှစ်ဦး ရှိကြသလို ထိုရွာတွင် ရှိသည့် ချောမောလှပသည့် ချိုအီ( နန်းမြတ်ဖြိုးသင်း) ဆိုသည့် ကောင်မလေးကို မောင်ကို နှင့် မောင်ဖေ ဘယ်သူနှင့် သဘောတူလဲ ဆိုတာကို ရွာသူရွာသားများမှ မဲပုံးထောင်ပြီး ရွေးကောက်ပွဲ ကျင်းပကြသလို ရွေးကောက်ပွဲ ကျင်းပချိန်တွင် ရွာသို့ ဓားပြဗိုလ် ဗိုလ်နေတိုး (ခန့်စည်သူ) တို့ အဖွဲ့ ဓားပြဝင်တိုက်ကြသည့် အခါ ချိုအီကိုတွေ့ ပြီး သဘောကျသွားရာမှ သူပါ ရွေးကောက်ပွဲ ဝင်ရွေးခံသည့် အခါ နောက်ဆုံး ထိုရွာကို ပညာတတ် နှလုံးရည်သမားက ကယ်တင်သွားပုံကို ဒါရိုက်တာမှ ဟာသဆန်ဆန် ရိုက်ကူးထားသည့် ဇာတ်ကားတစ်ကား ဖြစ်သည်။

ထို ရုပ်ရှင် ဇာတ်ကားကြီးကို ၂၀၁၅ ခုနှစ်က ရိုက်ကူးထားခြင်းဖြစ်ပြီး NLD ပါတီ ရွေးကောက်ပွဲ အတွက် ရည်ရွယ် ရိုက်ကူးထားသည့် ရုပ်ရှင် ဇာတ်ကားလည်း ဖြစ်သည်။

ဒါရိုက်တာ ညီညီထွန်းလွင်က "ဒီကားလေးက NLD ပါတီ အတွက် ရည်ရွယ်ပြီး ရိုက်ကူးထားတာပါ။ ပါတီအလံ ကြည့်ပြီး ပေး လူကို ကြည့် မပေးနဲ့ ဆိုတာနဲ့ အသာ နောက်ဆုတ်ပြီး အခုမှ ရုံတင်ဖြစ်တာပါ။ နိုင်ငံကလည်း NLD အစိုးရ လက်ထက် ရောက်လာပါပြီ။ ပြောင်းလဲချိန်တန်ပြီ ဆိုတဲ့ ကြွေးကြော်သံ နဲ့အတူ ဒီကားလေးကလည်း ချစ်ကြိုက်ကွဲညား ပုံစံ ပြောင်းလဲထားတာပါ။ ကြည့်ရင်တော့ ကျေနပ်လိမ့်မယ် ပျော်ရွှင်လိမ့်မယ်လို့ ထင်ပါတယ်" ဟု ထပ်မံ ပြောပြသည်။

အီဖေကိုတို့ ရွေးကောက်ပွဲ ရုပ်ရှင် ဇာတ်ကားကြီးသည် ဒါရိုက်တာ ညီညီထွန်းလွင် ရိုက်ကူး နေကျ ပုံစံများထဲမှ ခွဲထွက်ကာ ပထမဆုံး အနေဖြင့် နိုင်ငံရေး နှင့် သက်ဆိုင်သည့် အကြောင်းအရာကို ပုံဖော် ရိုက်ကူးထားခြင်း ဖြစ်သည်။

ဇာတ်ကား ရိုက်ကူး ပုံဖော်ရာတွင် အခက်အခဲ မရှိခဲ့သော်လည်း ရုံတင် မပြသခင် ဆင်ဆာသည့် အခါတွင် ဆင်ဆာ ဖြတ်တောက်မှုများ ရှိခဲ့သည်။ ဇာတ်ကား၏ ဇာတ်ဝင်ခန်းတစ်ခန်းတွင် ချိုအီကို PR စနစ်နဲ့ အချိုးကျ ခွဲယူရအောင် မဟုတ်ဘူး နိုင်သူအကုန်ယူစနစ်ပဲ ကောင်းတယ် ဆိုသည့် ဇာတ်ဝင်ခန်း နှင့် ကြိုတင်မဲ အလိုမရှိဟု အော်ထားသည့် ဇာတ်ဝင်ခန်းများကို ဖြတ်တောက်ခံရသည်။

အီဖေကိုတို့ရွေးကောက်ပွဲ ရုပ်ရှင် ဇာတ်ကားကြီးကို ဇန်နဝါရီလ နောက်ဆုံးပတ်တွင် အုပ်စု A ဖြစ်သည့်
သမ္မတ၊ မင်္ဂလာ (သိမ်ကြီးဈေး)၊ Junction MawTin၊ Junction Square၊ Top Royal ၊ ရွှေဗဟို၊ မြရတနာ၊ မြဟံသာ၊ မဟာမြိုင် နှင့် မန္တလေးမြို့တွင် ဝင်းလိုက်၊ မြို့ဂုဏ်ရောင်၊ JCGV Mdy နှင့် နေပြည်တော်တွင်
Junction Nay Pyi Taw ၊ အောင်သပြေ၊ ဇေယျာသီရီ တို့အပြင် နယ်မြို့များ ဖြစ်သည့် တောင်ကြီး၊ လားရှိုး၊ ပြင်ဦးလွင်၊ ပုသိမ်၊ ဘားအံ၊ မြိတ် တို့တွင်ပါ တစ်ပြိုင်တည်း ပြသသွားမည် ဖြစ်သည်။
.
Mizzima

အမျိုးသား ဒီမိုကရေစီအဖွဲ့ချုပ် (NLD) သည် ရွေးကောက်ပွဲ အပြတ်အသတ်
နိုင်ခဲ့သောကြောင့် မကြာမီ အစိုးရဖွဲ့ရတော့မည် ဖြစ်သည်။ ဒီဇင်ဘာလလယ်မှ
အစပြုပြီး အစိုးရ၏ နိုင်ငံတော် အကြီးအကဲ တာဝန်လွှဲပြောင်းမှု အထောက်အကူပြု
ကော်မတီ၊ NLD ၏ အသွင်ကူးပြောင်းရေး အဖွဲ့တို့ မကြာခဏ တွေ့ဆုံပြီး
ညှိနှိုင်းလျက်ရှိသည်။

မကြာသေးမီက Myanmar Now သတင်းထောက် ထက်ခေါင်လင်းနှင့် ရန်ကုန်မြို့
NLD ရုံးချုပ်တွင် တွေ့ဆုံစဉ် NLD ၏ ဗဟိုကော်မတီဝင်လည်းဖြစ် ပြောရေးဆိုခွင့်ရှိသူ
တစ်ဦးလည်း ဖြစ်သည့် ဦးဉာဏ်ဝင်းက အာဏာလွှဲပြောင်းရေး၊ အစိုးရအဖွဲ့သစ်၏
မူဝါဒ၊ ပြုပြင်ပြောင်းလဲရေး၊ တရားစီရင်ရေး စသည့် အကြောင်းအရာများကို
ပြောပြခဲ့သည်။ ပြောဆိုချက်များထဲမှ တချို့ကို ကောက်နုတ် ဖော်ပြလိုက်ပါသည်။

မေး - အခု လက်ရှိအစိုးရအဖွဲ့နဲ့ ဝန်ကြီးဌာနတွေ အာဏာလွှဲပြောင်းရေးကိစ္စ
ဆွေးနွေးနေတာ ဘယ်အခြေအနေအထိ ခရီးရောက်နေပြီလဲဆိုတာ ပြောပြပါခင်ဗျ။

ဖြေ - အဲဒီဆွေးနွေးတဲ့ အဖွဲ့မှာ ကျွန်တော်တော့ မပါဘူး။ သို့သော် ကျွန်တော်
သိရသလောက်တော့ အားလုံး အဆင်ပြေပါတယ်။ သဘောထား အားလုံးတူတယ်
လို့ ကျွန်တော် ပြောတာမဟုတ်ဘူး။ လွှဲပြောင်းရေးနဲ့ ပတ်သက်ပြီးတော့ ခက်ခဲနေတဲ့၊
အဟန့်အတား ဖြစ်နေတာတွေတော့ မရှိပါဘူး။ အဆင်ပြေတယ်လို့ သာမန်အားဖြင့်
ပြောလို့ရပါတယ်။ အသေးစိတ်တော့ ကျွန်တော်မသိဘူး။ ကျွန်တော်တို့ဆီက
အဖွဲ့လည်း ရှိတယ်။ ဟိုဘက်မှာလည်း အဖွဲ့ရှိတယ်။ ဒီနှစ်ဖွဲ့ မကြာခဏ တွေ့ပြီးတော့
ညှိနေကြတယ်။

မေး - လာမယ့် အစိုးရအဖွဲ့အတွင်းမှာ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီက
တချို့လူတွေ၊ လက်ရှိအစိုးရ အဖွဲ့ထဲက တချို့ကို တာဝန်ပေးဖို့ အစီအစဉ်ရှိလား။

ဖြေ - ကျွန်တော်တို့ ဘယ်သူ့ကိုသုံးမယ်၊ ဘယ်သူ့ကို မသုံးဘူးဆိုတာ မပြော
နိုင်ပါဘူး။ တစ်ခုတော့ ရှိတယ်၊ ကျွန်တော်တို့ စဉ်းစားတာက ဒီမိုကရေစီနဲ့
လူ့အခွင့်အရေး ကိစ္စတွေ၊ နိုင်ငံသားတွေကို အကာအကွယ်ပေးဖို့ ကိစ္စတွေ၊ တရား
ဥပဒေ စိုးမိုးရေးတွေ အဲဒါတွေက ဦးစားပေးလုပ်မှာပါ။

မေး - လက်ရှိ အစိုးရအဖွဲ့မှာ သတင်းထုတ်ပြန်မှုအပိုင်း အားနည်းနေတယ်။ NLD
အစိုးရအဖွဲ့မှာ သတင်းမြန်မြန်ဆန်ဆန် စီးဆင်းဖို့ ဘယ်လို ပြင်ဆင်ထားလဲ။

ဖြေ - သတင်းဌာနတွေ အနေနဲ့ကတော့ ပြန်ကြားရေးကပဲ သတင်းထုတ်ပြန်ရေးကို
ကိုင်ရဦးမှာပဲ။ ဒါ သူ့အလုပ်လည်း ဖြစ်ပါတယ်။ ပြီးတော့ သတင်းနဲ့ ပတ်သက်ရင်
ကျွန်တော်တို့ ကိုယ်တိုင် သတင်းတွေဟာ အရေးကြီးတဲ့ဟာကို Quote
(ကိုးကားချက်) မလုပ်ဘဲနဲ့ ထည့်တယ်၊ ဆိုတော့ စွပ်စွဲလို့လည်း မရဘူး။ Quote
လုပ်ထားတယ်ဆိုရင် ကျွန်တော်တို့ ရှင်းကြလို့ရတယ်။ အဲဒါမျိုးတွေ တော်တော်
များများ ဖြစ်နေပါတယ်။ ကျွန်တော်က အပြစ်တင်တာ မဟုတ်ပါဘူး။ အဲဒါတွေ
မဖြစ်အောင် ကျွန်တော်တို့ အစိုးရဖွဲ့တဲ့အခါ လုပ်မယ်၊ စီစဉ်ဆောင်ရွက်မယ်လို့
စိတ်ကူးထားပါတယ်။

မေး - ဒါဆို ပြန်ကြားရေး ဝန်ကြီးဌာနက ဆက်ရှိနေဦးမှာပေါ့။

ဖြေ - လောလောဆယ်တော့ ပြန်ကြားရေးဝန်ကြီးဌာနက ဆက်ရှိနေဦးမှာပါ။
နိုင်ငံတကာမှာလို သက်ဆိုင်ရာ ဝန်ကြီးဌာနအလိုက် ပြန်ကြားရေးဌာနတွေ၊
သတင်းထုတ်ပြန်ရေး အဖွဲ့တွေ ထားဖို့ဆိုတာ နောင်တော့ မပြောတတ်ဘူး၊
လောလောဆယ်တော့ မရှိသေးဘူး။

မေး - သမ္မတ ဦးသိန်းစိန်လက်ထက်မှာ လုပ်ခဲ့တဲ့ စီမံကိန်းတွေဟာ တိုင်းပြည်
အပေါ်မှာ ဘယ်လောက်အထိ အကျိုးသက်ရောက်မှု ရှိတယ်လို့ ယူဆလဲ။

ဖြေ - အဲဒါနဲ့ ပတ်သက်ပြီး ကျွန်တော်တို့က မေးထားပါတယ်၊ သူတို့က မဖြေသေး
ပါဘူး။ စီမံကိန်းကြီးတွေ ဘာရှိလဲ၊ ဘယ်လိုပုံစံနဲ့ ဒီစီမံကိန်းကို အကောင်အထည်
ဖော်တာလဲ၊ ဘယ်လောက် ဖော်ပြီးပြီလဲ၊ ဘယ်လောက် ကျန်သေးလဲ။ ဒါတွေကို
နောင်တက် လာမယ့် NLD အစိုးရ သိဖို့လိုတယ်။ ဒါသိမှ အလုပ်လုပ်လို့ရမှာ။
အဲဒီမေးခွန်းရဲ့ အဖြေက အဲဒီထဲမှာပါမှာ။ ကျွန်တော်တို့ အခုချိန်ထိ အဲဒီရဲ့ စာရင်း
မရသေးပါဘူး။ နှစ်ဖက်ညှိနှိုင်းတဲ့အထဲက ထွက်လာတာ မရှိသေးပါဘူး။ အဓိက
အဲဒါပဲ။ စီမံကိန်းတွေ ဘယ်တုန်းက လုပ်တာလဲ၊ ရည်ရွယ်ချက်က ဘာလဲ၊
ဘယ်လောက် သုံးပြီးပြီလဲ၊ ဘယ်ငွေနဲ့ သုံးတာလဲ၊ ဘယ်လောက် ကျန်သေးလဲ။ ဒါမှ
ရှေ့ဆက်ပြီးတော့ ဒါကိုအကောင်အထည် ဖော်မလဲ၊ မနိုင်လို့ နောက်ထက်
အများကြီးလိုသေးတယ် ဆိုရင်လည်း ခဏရပ်ပေါ့ဗျာ။ ငွေရှာပေါ့။ သူ့ဘာသာသူ
ဆက်သွားနိုင်ရင်လည်း ဆက်သွားပေါ့။ ဒါတွေကို ပထမ သိဖို့လိုတယ်။ NLD
ကိုယ်တိုင်ကို အဲဒါတွေ မသိသေးပါဘူး။

မေး - NLD အနေနဲ့မဟုတ်ဘဲ ကိုယ့်ရဲ့ ပုဂ္ဂလိက အမြင်ကရော ဘယ်လိုလဲ။

ဖြေ - ကျွန်တော့်ရဲ့ တသီးပုဂ္ဂလ အမြင်အရပြောရင်လည်း အဲဒီလို မြင်နိုင်ဖို့ဆိုတာ
အရေးကြီးတာက အဲဒီစီမံကိန်းတွေနဲ့ ပတ်သက်ပြီး ပွင့်လင်းမြင်သာမှု ရှိဖို့လိုတယ်။
ကိုင်တွယ်တဲ့သူတွေက ပွင့်ပွင့်လင်းလင်း မပြောဘူး၊ မထုတ်ပြန်ဘူးဆိုရင် သုံးသပ်
ရတာလဲ အမှန်မရနိုင်ဘူး။ အမှန်မရလို့ ကောင်းစွာ မဝေဖန်နိုင်ရင် ဘယ်ဟာမှ
မချောပါဘူး။ ဝေဖန်မှုဆိုတာ အိုးဖုတ်သလိုပါပဲ၊ ရိုက်ချက်များမှပဲ ချောမှာပါ။

မေး - NLD အစိုးရအနေနဲ့ တပ်မတော်အပေါ်မှာ ဘယ်လိုသဘောထားမလဲ။

ဖြေ - တပ်မတော်ဆိုတာ တိုင်းပြည်မှာ မရှိမဖြစ် အရေးကြီးတဲ့ ဌာနကြီးတစ်ခုပါ။
စစ်သားအရေအတွက်၊ တပ်ရင်းအရေအတွက်က အရေးမကြီးဘူး။ အရှေ့တောင်
အာရှမှာ ဆိုရင်လည်း အင်အားကြီး နိုင်ငံကြီးတွေ အများကြီး ရှိတယ်။ ကျွန်တော်
တို့က အရေအတွက်နဲ့၊ ခိုင်းကောင်းတဲ့ဟာ ရှိနေရုံနဲ့ မဖြစ်ဘူး။ ခေတ်မီတပ်မတော်
ဖြစ်ဖို့ကို ဦးတည်ဖို့လိုတယ်လို့ ထင်ပါတယ်။

မေး - အရပ်သားစစ်စစ် သမ္မတဖြစ်လာရင် တပ်အပေါ် သြဇာလွှမ်းမိုးမှု အားနည်း
နေလိမ့်လို့ တချို့က ယူဆကြတယ်။

ဖြေ - အဲဒါက သမ္မတဖြစ်လာမယ့် သူရယ်၊ သူတို့ရဲ့ အဖွဲ့အစည်းတွေရဲ့
အခြေအနေ ပေါ်မှာ မူတည်တယ်။ ကမ္ဘာ့နိုင်ငံတွေကို လှည့်ကြည့်လိုက်ရင်
အရပ်သား အစိုးရတွေက တိုင်းပြည်ကို အုပ်ချုပ်တယ်။ တပ်မတော်ဆိုတာ အဲဒီ
ထဲကမှ Institution (အဖွဲ့အစည်း) တစ်ခု။ ဒီမှာလည်း အဲဒီလို ဖြစ်သင့်တယ်။

မေး - အုပ်ချုပ်ရေး ယန္တရားတွေထဲက ဘယ်အချက်တွေကို အဓိက ဦးစားပေး
ပြုပြင်မလဲ။

ဖြေ - ကျွန်တော့် အမြင်အရတော့ ဗျူရိုကရေစီယန္တရား တည်ဆောက်မှရမှာပဲ။
မြန်မာနိုင်ငံမှာ ဒီလိုဟာရှိခဲ့တယ်။ ဒါပေမဲ့ ၁၉၆၂ ခုနှစ်က စပြီးတော့ ၂ဝ၁ဝ
ခုနှစ်အထိ သူတို့ (စစ်အာဏာရှင်တွေ) က ဖျက်ဆီးလိုက်တယ်။ ဦးသိန်းစိန်
အစိုးရလက်ထက်မှာ ပြုပြင်ဖို့ ကြိုးစားတယ်။ အမြဲတမ်း အတွင်းဝန်ဆိုတာကို
ခန့်တယ်။ အဲဒီဟာက ဘယ်အစိုးရတက်တက်၊ ဘယ်နိုင်ငံရေး သမားလာလာ
အုပ်ချုပ်ရေးက သူ့ဘာသာသူ ရှိနေမှာ။ အုပ်ချုပ်ရေးအရာရှိက သူ့အလုပ်သူ
လုပ်သွားမှာ၊ ဒီပုံစံနဲ့ သွားရမှာ။ အခုအစိုးရ ကြိုးစားတာလည်း တပိုင်းတစ်စပေါ့။
ကျွန်တော်တို့က ဒီလိုအုပ်ချုပ်ရေး ယန္တရားကြီး ခိုင်ခိုင်မာမာရှိဖို့ လုပ်ရမယ်။

မေး - နည်းနည်းအသေးစိတ် ပြောပြပေးပါ။

ဖြေ - နိုင်ငံရေး ခေါင်းဆောင်က သူလိုချင်တဲ့ဟာကို အောက်ကိုချပေး၊ အောက်က
ပုံဖော်။ အောက်က ပုံဖော်တာကိုတော့ သွားပြီး ဆရာမလုပ်နဲ့၊ သူက အဲဒီလောက်
မတတ်ဘူး၊ သူက Policy Guide Line (မူဝါဒဆိုင်ရာ ညွှန်ကြားချက်) ပဲ ပေးရမှာ။
အသေးစိတ်ကို သွားဝင်ပါလိုက်တာနဲ့ ပျက်တာပဲ။ ကျွန်တော်တို့ ကြီးပြင်းလာတဲ့
ဘဝမှာ တပ်တွေက ဌာနဆိုင်ရာတွေကို ဝင်တယ်၊ သူတို့ အကုန်တတ်တယ်လို့
ပြောတာပဲ၊ အဲဒီလို ပြောပြီးလုပ်ခဲ့လို့ ပျက်နေခဲ့တာ။ ကျွန်တော်တို့က သူ့လိုင်းနဲ့သူ
သွားမှာ၊ ဆင်အလုပ် ဆင်လုပ်၊ မြင်းအလုပ် မြင်းလုပ်ပဲ။

မေး - ခြစားမှုကိစ္စတွေကရော ဘယ်လိုလဲ။

ဖြေ - ဒါက ဥပဒေစိုးမိုးရေး ကိစ္စတွေပဲ။ တရားဥပဒေ စိုးမိုးရေးကို လူတွေကလည်း
နားလည်ရမယ်။ စနစ်ချည်းပဲလည်း မဟုတ်ဘူး။ ဥပဒေမှာ ပေးထားတဲ့ဟာကို
မလုပ်တာ၊ နောက်တစ်ခုက ဥပဒေမှာ ပေးထားတဲ့ဟာကို ပိုလုပ်တာ၊ ဒီနှစ်ခု
ရှိနေသမျှ တိုင်းပြည် မတိုးတက်ဘူး၊ အုပ်ချုပ်ရေး ယန္တရားလည်း မခိုင်မာဘူး။
လုပ်ပိုင်ခွင့်ဆိုတာက ဥပဒေက လာရမှာ၊ ပါးစပ်ကလာရမှာ မဟုတ်ဘူး။

မေး - လက်ရှိ တရားစီရင်ရေး မဏ္ဍိုင်က ယိုင်နဲ့နေတယ်လို့ အများကလည်း
ဝေဖန်ထားကြတော့ အဲဒီဟာကို ဘယ်လိုပြုပြင်ဖို့ လိုမယ်လို့ ဥပဒေသမား
တစ်ယောက်ဖြစ်တဲ့ ဦးဉာဏ်ဝင်းက ယူဆသလဲ။

ဖြေ - စနစ်ဟောင်းတွေ ပြန်ဖော်ထုတ်ရမယ်။ ကျွန်တော်တို့ မီလိုက်တဲ့ခေတ်မှာ
တရားရေး အရာရှိတစ်ယောက်ဟာ ရာထူးတက်ဖို့ဆိုတာ သူစစ်ဆေးခဲ့တဲ့
အနည်းဆုံး အမှုတွဲ ၃ တွဲလောက် အထက်အဆင့်ဆင့် တင်ပြရတယ်။ အထက်က
လူကိုမကြည့်ဘူး၊ ဖိုင်ကိုပဲကြည့်တာ။ ဘယ်လောက် စနစ်တကျ စီရင်ခဲ့လဲ၊ အဲဒါ
မလုပ်ရင် ဘယ်တော့မှ ရာထူးမတိုးဘူး။ အဲဒီလိုလုပ်မှ တရားရုံးအမှုတွဲတွေကို
တရားသူကြီးတွေက ခိုင်ခိုင်လုံလုံလုပ်မှာ။ လာဘ်စားဦးတော့၊ ရက်ရက်စက်စက်
မစားရဘူး။ သူ တစ်သက်လုံး ရာထူးမတက်ဘဲ နေချင်သလား၊ လူတိုင်းက
ရာထူးတက်ချင်တာပေါ့၊ အဲဒီတော့ ကောင်းကောင်းလုပ်၊ ရှိနေတဲ့ ဥပဒေကိုလည်း
ပေးထားတဲ့ အတိုင်းပဲလုပ်ပေါ့၊ ပိုမလုပ်ရဘူး။ ဒီနှစ်ခုနဲ့သာ လုပ်သွားမယ်ဆိုရင်
လာဘ်ပေးလာဘ်ယူက လျော့သွားမယ်။

မေး - NLD ဘက်က ဥပဒေကိစ္စနဲ့ ပတ်သက်ပြီး တရားရေးသမား ၄ဝ လောက်
လျာထားတာ ရှိတယ်လို့ အသံတွေ ထွက်နေတယ်။

ဖြေ - သတင်းထဲမှာ အဲဒီလိုပါလာတာကိုလည်း တစ်ယောက်က ပြောတယ်။ ဒါပေမဲ့
ကျွန်တော် အဲဒါမသိဘူး။ တရားရေးက အစိုးရအဖွဲ့နဲ့ မဆိုင်ဘူး။ အစိုးရအဖွဲ့
သက်တမ်း ကုန်တာ၊ လွှတ်တော် သက်တမ်းကုန်တာ တရားရေးနဲ့ ဘာမှမဆိုင်ဘူး။
တရားရေးက သက်သက်။ ဒီဘက်မှာ ရှိနေတာက ရှေ့နေချုပ်ပဲရှိတာ၊ ရှေ့နေချုပ်က
အစိုးရပြုတ်ရင် သူပြုတ်တယ်။ လူစားထိုးလည်း ရတယ်။ အခု ၄ဝ တို့၊ ၆ဝ တို့
ဘာ့ကြောင့် အဲဒီလိုပြောနေကြလဲ ကျွန်တော်မသိဘူး။

မေး - NLD မှာ သမ္မတရာထူးအတွက် လျာထားတာ ရှိတယ်လို့ ဦးဉာဏ်ဝင်းက
ပြောကြောင်း ဂျပန်သတင်းဌာနတစ်ခုက ရေးခဲ့ဖူးတယ်။ ဘယ်သူတွေကို
လျာထားတာလဲ။

ဖြေ - အဲဒီဟာက သတင်းမှားပါ။ ရေးပုံရေးနည်း မှားတာပါ။ ကျွန်တော်ပြောခဲ့တာက
သမ္မတ ဖြစ်ထိုက်တဲ့သူ ၁ဝ ဦးမက ရှိတယ်လို့။ အဲဒါကို သူတို့က ၁ဝ ဦးရှိတယ်လို့
ရေးလိုက်တာ။ အဲဒီဟာက ကျွန်တော်တို့ ပါတီထဲမှာ ရှိတာကိုပြောတာ။ ပါတီထဲမှာ
ဝါရင့်တယ်၊ ပညာလည်း ရှိတယ်၊ လုပ်သက်လည်း ရင့်တယ်၊ နိုင်ငံရေးဝါလည်း
ရင့်တယ်၊ သစ္စာလည်း ရှိတယ်။ အဲဒီလိုလူမျိုးတွေ ပါတီထဲမှာ အများကြီးပါလို့
ကျွန်တော်ဖြေခဲ့တာ။

မေး - ပြည်ပရောက်နေတဲ့ သူတွေအတွက်ရော အထွေထွေ လွတ်ငြိမ်းချမ်းသာခွင့်
ဆိုတာမျိုး ကြေညာမယ့် အစီအစဉ် ရှိလား။

ဖြေ - ကျွန်တော်တော့ အဲဒါလက်ခံတယ်၊ ဒါက နိုင်ငံရေးအရ။ ဥပဒေအရတော့
အဲဒါ မမှန်ပြန်ဘူး။ နိုင်ငံခြားသားပတ်စ်ပို့ ကိုင်လိုက်တာနဲ့ နိုင်ငံသားအဖြစ်က
ဥပဒေအရ အလိုလို ရပ်ဆိုင်းသွားတယ်၊ အဲဒါကို ဘယ်လို ပြန်လုပ်မလဲဆိုတာ
ဥပဒေမှာ မပါဘူး။ ပါတာတစ်ခုက နိုင်ငံတော်သမ္မတက ဘယ်ဟာမဆို
သူကယ်တင်နိုင်တယ်၊ ဒါနဲ့ပဲလုပ်ရမှာ။ အခု လုပ်နေခဲ့တာလည်း ဒါနဲ့ပဲလုပ်ခဲ့တာ။
တချို့နိုင်ငံသား ပြန်ရတယ်၊ တချို့မရဘူး၊ မရတဲ့သူတွေမှာ ကျွန်တော့်မိတ်ဆွေ
တချို့လည်း ပါပါတယ်။ လိုအပ်ရင် ဥပဒေကို ပြင်သင့်တယ်လို့ ထင်တယ်။ နိုင်ငံသား
ပြန်ပေးတာနဲ့ ပတ်သက်ပြီး ကန့်သတ်ထားတာတွေကို ဖြေလျှော့ဖို့တော့ အစီအစဉ်
ရှိလာမယ်လို့ ထင်ပါတယ်။

ထက်ခေါင်လင်း/Myanmar Now
The Ladies News Journal


ဒီကနေ့ကျင်းပတဲ့ ပြည်ထောင်စုငြိမ်းချမ်းရေးညီလာခံကို တိုင်းရင်းသား လက်နက်ကိုင်အဖွဲ့ အနည်းဆုံး ၂၂ အနက်က ၉ ဖွဲ့သာ တက်ရောက်လာတဲ့အပေါ် ပြီးပြည့်စုံမှုမရှိဘူးလို့ ဝေဖန်တာတွေ ရှိနေပါတယ်။

ဒီလို မတက်ရောက်တဲ့အပေါ် နိုင်ငံရေး သုံးသပ်သူ စာရေးဆရာ ကျော်ဝင်းက ပြည်ပနိုင်ငံ တခုခုရဲ့ စွက်ဖက်မှုရှိနေသလားဆို သုံးသပ်ပါတယ်။ ဒီသတင်းကို ညီလာခံကို တက်ရောက်သတင်းယူနေတဲ့ ဗွီအိုအေမြန်မာပိုင်းရဲ့သတင်းထောက် ကိုမိုးဇော်က တင်ပြထားပါတယ်။

ပြည်ထောင်စုငြိမ်းချမ်းရေးညီလာခံဟာ တနိုင်ငံလုံး ပစ်ခိုက်တိုက်ခိုက်မှု ရပ်စဲရေးစာချုပ် အစိုးရနဲ့တိုင်းရင်းသား လက်နက်ကိုင်အဖွဲ့ ၁၇ ဖွဲ့ အကြား ၁၇ လ ကျော်ကြာ ဆွေးနွေးသဘောတူ လက်မှတ်ရေးထိုး တဲ့နောက် ပေါ်ထွက်လာတာ ဖြစ်ပါတယ်။

ဒီလို NCA စာချုပ်ဖြစ်ပေါ်လာရေးအတွက် ဆွေးနွေးရာမှာ လက်နက်ကိုင်အဖွဲ့ ၁၇ ဖွဲ့လောက် ကိုယ်စားပြုပါဝင်ခဲ့ပေမဲ့ ညီလာခံကျင်းပရာမှာတော့ လက်မှတ်ရေးထိုးတဲ့ အဖွဲ့ ၈ ဖွဲ့နဲ့ လက်မှတ်မထိုးသေးတဲ့ နာဂ အမျိုးသားဆိုရှယ်လစ်ကောင်စီ NSCN-K တို့သာ ပါဝင်ခဲ့ပါတယ်။

လက်မှတ်မရေးထိုးထားတဲ့အဖွဲ့ ၁၀ဖွဲ့လောက်ကို ဖိတ်ကြားထားပေမဲ့ တက်ရောက် လာတာ မရှိပါဘူး။ဒီလို တိုင်းရင်းသားလက်နက်ကိုင်အဖွဲ့ အများစု မပါဝင်တာကတော့ အစိုးရဖက်က ပြည်နယ်အဆင့်၊ ပြည်ထောင်စုအဆင့် လက်မှတ်ရေးထိုး ထားတဲ့အဖွဲ့တွေကိုသာ NCA မှာ ပါဝင် လက်မှတ်ထိုး ဖိတ်ခေါ်ခဲ့တာနဲ့ တိုင်းရင်းသားတွေဖက်က အဖွဲ့အားလုံးပါဝင်မှ လက်မှတ်ထိုးမယ် ဆိုတဲ့ သဘောထားတွေ ရှိနေတာကြောင့်ဆိုပြီး သတင်းထုတ်ပြန်တာတွေ ရှိခဲ့ပါတယ်။

နိုင်ငံရေးသုံးသပ်သူ စာရေးဆရာ ကျော်ဝင်းကတော့ ဒီထက် ကျယ်ပြန့်တဲ့အခြေအနေတရပ်နဲ့ ဆက်စပ်နိုင်ကြောင်း အခုလို သုံးသပ်ပါတယ်။

“အဖွဲ့အားလုံးပါမလာတာ ၂ မျိုးဖြစ်နိုင်တယ်။ ပထမအချက်ကတော့ လက်ရှိအစိုးရကို credit မပေးချင်လို့ဖြစ်မယ်။ လက်ရှိအစိုးရကို credit မပေးချင်လို့ နောင်အစိုးရလက်ထက်မှာ ပါချင်ပါမယ်။ ဒါတမျိုးပေါ့ နောက်တခုကတော့ ကျနော်တို့ အိမ်နီးချင်းနိုင်ငံတခုရဲ့ စွက်ဖက်မှုလည်း ဖြစ်ချင်ဖြစ်မယ်။ အခုပွင့်ပွင့်လင်းလင်းပြောရင် ထိုင်းနယ်စပ်မှာရှိတဲ့ လက်နက်ကိုင်အင်အားစုတွေအားလုံးနဲ့ ok သွားတယ်။ ဒါပေမယ့် တရုတ်နယ်စပ်မှာရှိတဲ့တော်တော်များများနဲ့ မ အိုကေ သေးဘူး။ အဲတော့ ဒါက အမေရိကန်နဲ့ တရုတ်ရဲ့ Great Power ယှဉ်ပြိုင်မှုနဲ့ ဆက်စပ်နေလိမ့်မယ်ထင်တယ်။ အဲတော့ ဒီကိစ္စဟာ ပြည်တွင်းကိစ္စ သပ်သပ်မဟုတ်တော့ဘူး၊ နိုင်ငံတကာနဲ့ ဆက်စပ် ဖြေရှင်းရမယ့် ပြဿနာ ဖြစ်လာတယ်။ ပိုပြီးတော့ ရှုပ်ထွေးတာပေါ့ဗျာ။”

ဒီ အခြေခံအချက်တွေအပေါ်မှာ တိုင်းရင်းသားလက်နက်ကိုင်အဖွဲ့တွေ အားလုံးပါဝင်ရေးနဲ့ ပတ်သက်ပြီး ဆရာကျော်ဝင်းက သူ့အမြင်ကို အခုလို ဆက်ပြောပါတယ်။

“အဲတော့ ဘယ်တော့အဖြေပေါ်မလဲဆိုတော့ နောင်အစိုးရပြောင်းပြီးရင်တော့ အဖြေပေါ်မယ်။ နောင်အစိုးရလက်ထက်မှာ ဒေါ်အောင်ဆန်းစုကြည်ကောင်းကောင်းခေါ်လို့ ကျန်တဲ့အဖွဲ့အစည်းတွေပါလာပြီဆိုရင်တော့ ဒါပြဿနာ သိပ်မရှိဘူး။ ဒါမှမဟုတ် အိမ်နီးချင်းနိုင်ငံတခုရဲ့ ပယောဂ ကြောင့်ဆိုလို့ရှိရင်တော့ နဲနဲပြဿနာရှိနိုင်တယ်ပေါ့လေ။ ကျနော်တို့ တော်တော်ကြိုးစားပြီးဖြေရှင်းရဦးမယ့် သဘောရှိမှာပေါ့။”

တရုတ်နိုင်ငံခြားရေးဝန်ကြီးဌာနက အာရှရေးရာအထူးသံတမန် မစ္စတာ ဆွန်ကော်ရှန် (Sun Guo Xiang) ကတော့ တရုတ်အစိုးရရဲ့ ရပ်တည်ချက်ကို အခုလို ပြောပါတယ်။

“တကယ်တော့ပြောမယ်ဆိုရင် တရုတ်ဘက်ကတော့ အမြဲတမ်းလေ စဉ်ဆက်မပျက် သူတို့ကို ပါဝင်ဖို့အတွက် တိုက်တွန်းနေပါတယ်။ တရုတ်ဘက်ကတော့ မြန်မာနိုင်ငံရဲ့အိမ်နီးချင်းကောင်းနိုင်ငံ၊ မိတ်ဆွေကောင်းနိုင်ငံ အနေနဲ့လည်း ဆက်လက်ပြီးတော့ အကူအညီပေးဖို့ ကြိုးစားသွားမယ်။ ဒီမြန်မာနိုင်ငံမှာ အမြန်ဆုံးငြိမ်းချမ်းရေးရရှိဖို့အတွက် ကျနော်တို့ မျှော်လင့်ပါတယ်။”

အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်ကတော့ NCA စာချုပ်ကို အားလုံး ပါဝင်လက်မှတ်ရေးထိုးရေးဟာ မလွဲမသွေ ဆောင်ရွက်ရမယ်လို့ ပြည်ထောင်စု ငြိမ်းချမ်းရေးညီလာခံ မှာ ပြောဆိုခဲ့ပါတယ်။

“တနိုင်ငံလုံးအပစ်အခတ်ရပ်ဆဲရေးစာချုပ်ဟာ ပြည်ထောင်စုကြီး ငြိမ်းချမ်းရေးအတွက် ပထမအစ ခြေလှမ်းဖြစ်ပါတယ်။ တိုင်းရင်းသားလက်နက်ကိုင်အဖွဲ့များအားလုံး ပါဝင်လက်မှတ်ရေးထိုးနိုင်ရန် မလွှဲမသွေ ကြိုးပမ်းဆောင်ရွက်သွားရမှာဖြစ်ပါတယ်။ ပြည်ထောင်စုဖွား တိုင်းရင်းသားများအချင်းချင်းကြားမှာ NCA စာချုပ်ကို လက်မှတ်ရေးထိုးသော တိုင်းရင်းသားလက်နက်ကိုင်အဖွဲ့များနှင့် လက်မှတ်ရေးထိုးခြင်း မပြုရသေးသော တိုင်းရင်းသားလက်နက်ကိုင်အဖွဲ့အချင်းချင်း စိတ်မကွဲကြဖို့ အရေးကြီးပါတယ်။”

တပ်မတော်ကာကွယ်ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင်ကတော့ လက်မှတ်မရေးထိုးသေးတဲ့ အဖွဲ့တွေအပေါ် သံသယမရှိကြောင်းနဲ့ လက်မှတ် ရေးထိုးရေးအတွက် တံခါးဖွင့်ထားကြောင်း ညီလာခံမှာ ပြောဆိုထားပါတယ်။

လောလောဆည် ကျင်းပနေတဲ့ညီလာခံမှာတော့ တိုင်းရင်းသား လက်နက်ကိုင်အဖွဲ့တွေ ပါဝင်လာရေးကို ဆွေးနွေးမှာ မဟုတ်ဘဲ NCA လက်မှတ်ရေးထိုးရေးနဲ့ ညီလာခံကို ပါဝင်ရေးအတွက်ကို ငြိမ်းချမ်းရေး ဆွေးနွေးရေးဆိုင်ရာအဖွဲ့တွေက ဆက်လက်ကြိုးပမ်းသွားဖို့ ရှိနေပါတယ်။ ငြိမ်းချမ်းရေးညီလာခံ မကျင်းပမီ ဒီရက်ပိုင်းတွေ အတွင်းမှာတော့ ရှမ်းပြည်နယ်နဲ့ ရခိုင်ပြည်နယ်တွေအတွင်းမှာ တိုက်ပွဲတွေ ဖြစ်ပွားခဲ့ပါတယ်။



ကိုမိုးဇော်/VOA
http://burmese.voanews.com/content/myanmar-peace-conference-react/3141436.html

 koh-tao-620.jpeg ထိုင်းနိုင်ငံ လိပ်ကျွန်းလူသတ်မှုနဲ့ မြန်မာနိုင်ငံသား ကိုဇော်လင်းနဲ့ ကိုဝင်းဇော်ထွန်း တို့ကို ကော့စမွီး တရားရုံးမှာ ရုံးထုတ်လာစဉ်
Photo: thaivisa website

ထိုင်းနိုင်ငံမှာ သေဒဏ်ချမှတ်ခံထားရတဲ့ မြန်မာနိုင်ငံသားနှစ်ဦးအမှုကို ကူညီဖို့ မြန်မာ အစိုးရက စေလွှတ်လိုက်တဲ့ တရားရေးဆိုင်ရာကျွမ်းကျင်သူ အထူး ကိုယ်စားလှယ် ၃ ဦး ဟာ မနေ့က ထိုင်းနိုင်ငံကိုရောက်ရှိပြီး ထိုင်းအစိုးရအဖွဲ့ တာဝန်ရှိသူတွေနဲ့ တွေ့ဆုံနိုင် ဖို့ စီစဉ်နေတယ်လို့ သိရပါတယ်။

ထိုင်းရဲဌာန၊ မှုခင်းဌာနနဲ့ နိုင်ငံခြားရေးဌာနက အစိုးရတာဝန်ရှိသူတွေကို တွေ့ဆုံဖို့ စီစဉ်နေတာ ဖြစ်တယ်လို့ မြန်မာသံရုံးအထူးကိုယ်စားလှယ်အဖွဲ့ဝင် ဦးထူးချစ်က ပြောပါတယ်။

"ထိုင်းအစိုးရနဲ့ ပတ်သက်ပြီးတော့ ကျနော်တို့ တာဝန်ရှိတဲ့သူတွေနဲ့လည်းတွေ့ဖို့ မြန်မာသံအမတ်ကြီးကတော့ စီစဉ်ထားတာရှိပါတယ်၊ အတိအကျတော့မသိဘူး၊ အဓိကကတော့ ရဲဌာနတို့၊ မှုခင်းဌာနတို့ နိုင်ငံခြားရေးဌာနက တာဝန်ရှိတဲ့သူတွေနဲ့ တွေ့ဖြစ်မယ်လို့ ကျနော်တို့ထင်ပါတယ်၊ ဒါပေမယ့် တိတိကျကျတော့ လူပုဂ္ဂိုလ်၊ ဘယ်အဖွဲ့အစည်းလဲဆိုတာတော့ မသိရသေးပါဘူး"

ပြည်ထောင်စုရှေ့နေချုပ်ရုံးက ဥပဒေပညာရှင် ဒေါ်ခင်ချိုအုန်း၊ မြန်မာနိုင်ငံရဲတပ်ဖွဲ့က မှုခင်းဆေးပညာဆိုင်ရာ ကျွမ်းကျင်သူ ရဲမှူးကြီး စိုးနိုင်ဦးနဲ့ မြန်မာနိုင်ငံရှေ့နေ များ ကောင်စီက အယူခံမှုဆိုင်ရာကျွမ်းကျင်သူ ဦးဖေခင်တို့ ၃ဦးဟာ မနေ့က ထိုင်းနိုင်ငံကို ရောက်ရှိနေတာဖြစ်ပြီး ထိုင်းနိုင်ငံဆိုင်ရာမြန်မာသံအမတ်ကြီး နဲ့ တွေ့ဆုံခဲ့သလို ထိုင်းရှေ့နေများကောင်စီက တာဝန်ရှိသူတွေနဲ့လည်း တွေ့ဆုံခဲ့ပါတယ်။

ထိုင်းရှေ့နေများကောင်စီက မြန်မာအစိုးရအနေနဲ့ မြန်မာနိုင်ငံသားနှစ်ဦးအမှုအပေါ် လိုက်ပါကူညီ ဆောင်ရွက်တာကို ကြိုဆိုကြောင်းနဲ့ ထိုင်းနိုင်ငံ ရနောင်းမြို့က လူသတ်မှု အပါအဝင် တခြားရွှေ့ပြောင်း အလုပ်သမားအရေးနဲ့ သက်ဆိုင်တဲ့အမှုတွေကိုလည်း ဝိုင်းဝန်းကူညီစေလိုကြောင်း ပြောကြားခဲ့တယ်လို့ ဦးထူးချစ်က ပြောပါတယ်။

မြန်မာနိုင်ငံသား ကိုဇော်လင်းနဲ့ ကိုဝင်းဇော်ထွန်းတို့နှစ်ဦးအမှုကို ဖေဖော်ဝါရီလ ၂၄ ရက်နေ့ မတိုင်ခင် အယူခံဝင်မှာဖြစ်ပြီး သေဆုံးသူတွေရဲ့ ခန္ဓာကိုယ်ပေါ် မှာ တွေ့ရတဲ့ မျိုးရိုးဗီဇ DNA လွဲမှားနေမှုအပေါ် အခြေခံပြီး အယူခံဝင်သွားမှာ ဖြစ်တယ်လို့ သိရပါတယ်။

မြန်မာအစိုးရက စေလွှတ်ထားတဲ့ အထူးကိုယ်စားလှယ် ၃ ဦးဟာ အကျဉ်းကျခံနေရတဲ့ မြန်မာနိုင်ငံသား ကိုဇော်လင်းနဲ့ ကိုဝင်းဇော်ထွန်းတို့ နှစ်ဦးကိုလည်း ဒီရက်ပိုင်းအတွင်း သွားရောက် တွေ့ဆုံဖို့ရှိတယ်လို့ သိရပါတယ်။

RFA
http://www.rfa.org/burmese/news/myanmar-legal-expert-team-arrives-thailand-01122016095831.html

ဖားကန့် ကျောက်စိမ်းတွင်း ဒေသမှာ မြေစာသယ်ကားတွေ အသုံးပြုပြီး ကျောက်စိမ်း တူးဖော် လုပ်ကိုင်နေမှုကို ၂၀၁၄ ခုနှစ် နိုဝင်ဘာလ အတွင်းက တွေ့ရစဉ်။ Photo: Kyaw Myo Min/ RFA
ကချင်ပြည်နယ် ဖားကန့်ကျောက်စိမ်းတွင်း လုပ်ကွက်တွေမှာ အသုံးပြုနေတဲ့ ကုမ္ပဏီတစ်ခုချင်းစီရဲ့ ကျောက်စိမ်း တူးဖော်ရေး ယာဉ်ယန္တရားတွေကို စစ်ဆေးဖို့ နဲ့ မှတ်ပုံတင်ဖို့အတွက် ပြည်ထောင်စု အစိုးရအဖွဲ့က ဖွဲ့စည်းထားတဲ့ ကွင်းဆင်း စစ်ဆေးရေး အဖွဲ့ဟာ ဒီရက်ပိုင်းအတွင်း ဖားကန့်ဒေသကို သွားရောက် မှာဖြစ်ပါတယ်။

စစ်ဆေးရေးအဖွဲ့ဟာ ဖားကန့်မှာ အခြေစိုက်ပြီး ကုမ္ပဏီတစ်ခုချင်းစီကို အချိန်ယူစစ်ဆေးမှာဖြစ်တယ်လို့ ဖားကန့်မြို့နယ် အုပ်ချုပ်ရေးမှူး ဦးတင်ဆွေမြင့်က ပြောပါ တယ်။

"ဒီမှာကတော့ ကျောက်စိမ်းတူးဖော်ရေးဌာနကနေပြီးတော့ ကုမ္ပဏီလိုက်၊ ယာဉ်ယန္တရားတွေ အသေးစိတ်တော့ စုစုနေတယ်၊ အခုစိစစ်မှာကတော့ ကုမ္ပဏီ တစ်ခုချင်းလိုက် အုပ်ချုပ်မှုယာဉ်တွေကအစပေါ့ ယန္တရားတွေအားလုံးကို အသေးစိတ်စိစစ်ပြီးတော့မှ ကျနော်တို့တစ်ခါတည်း မှတ်ပုံတင်ပေးတာတို့၊ ကညနအဖွဲ့ တို့အားလုံးပါလာပြီးတော့ တစ်ပြိုင်နက်ထဲအချိန်တော်တော်ကြာကြာ ယူပြီးတော့လုပ်မယ့်သဘောရှိတယ်"

စစ်ဆေးရေးအဖွဲ့မှာ ကုန်လမ်းပို့ဆောင်ရေးညွှန်ကြားမှုဦးစီးဌာန၊ အကောက်ခွန် စတဲ့ ဌာနပေါင်းစုံက တာဝန်ရှိသူတွေ လိုက်ပါလာမယ်လို့ သိရပါတယ်။

တရုတ်-မြန်မာနယ်စပ် ကန်ပိုက်တီနယ်စပ်ကုန်သွယ်ရေးစခန်း၊ မန္တလေး၊ ရန်ကုန်စတဲ့ လမ်းကြောင်းတွေကနေ တရားမဝင် ကျောက်စိမ်းတူးဖော်ရေးယာဉ်၊ စက်ယန္တရားတွေ ဖားကန့်ဒေသဘက် သယ်ယူနေတယ်ဆိုတဲ့ သတင်းတွေ ထွက်ပေါ်လာပြီးတဲ့ နောက်ပိုင်း အခုလိုကွင်းဆင်း စုံစမ်းမှုတွေ ပြုလုပ်တာ ဖြစ်ပါတယ်။

ပြီးခဲ့တဲ့ နှစ် ဒီဇင်ဘာလကုန်ပိုင်းလောက်က ပြည်ထောင်စုဝန်ကြီး ဦးဝင်းထွန်း၊ ဘဏ္ဍာရေးနဲ့အခွန်ဝန်ကြီး ဦးဝင်းရှိန်တို့ ဦးဆောင်တဲ့ စုံစမ်းရေးအဖွဲ့ ဟာ မြစ်ကြီးနား၊ ကန်ပိုက်တီ နဲ့ ဖားကန့်ဒေသတွေကို သွားရောက်စစ်ဆေးခဲ့ပါတယ်။

ဖားကန့်မြို့နယ်အုပ်ချုပ်ရေးအဖွဲ့ရဲ့စာရင်းတွေအရ ဒီနှစ်အတွက် နိုင်ငံတော်ကို အခွန်ဆောင်ပြီး တင်သွင်းခွင့်ပြုထားတဲ့ ယာဉ်စက်ယန္တရားအရေအတွက် ၁၀၉၉ စီးရှိပြီး လက်ရှိမှာ ဖားကန့်မြို့နယ်အတွင်း အစီးရေ ခုနှစ်ရာကျော် ရောက်ရှိနေ ပြီဖြစ်ပါတယ်။

RFA Burmese
http://www.rfa.org/burmese

အမေရိကန်တပ် နဲ့ ဖိလစ်ပိုင်တပ်တို့ စစ်ရေးလေ့ကျင့်နေစဉ်
ဖိလစ်ပိုင်နိုင်ငံမှာ အစိုးရက အမေရိကန်ပြည်ထောင်စုနဲ့ ကာကွယ်ရေး သဘောတူညီမှုရယူထားတာကို တရားရုံးချုပ်က ထောက်ခံသွားပါတယ်။

အမျိုးသားလုံခြုံရေး၊ ပင်လယ်ရေကြောင်း နဲ့ ဘေးအန္တရာယ် တန်ပြန် ကိုင်တွယ်ရေးတွေ အတွက် အမေရိကန်တပ်ဖွဲ့တွေ ကျွန်းတွေပေါ်မှာ ပစ္စည်း ကိရိယာတွေ သိုလှောင်ခွင့်ပြုတဲ့ “ ပိုကောင်းမွန်တဲ့ ကာကွယ်ရေး ပူးပေါင်းဆောင်ရွတ်မှု သဘောတူညီချက်” ကို ဖိလစ်ပိုင် သမ္မတ Benigno Aquino အစိုးရအဖွဲ့နဲ့ အမေရိကန် ကာကွယ်ရေး အရာရှိတွေ ၂၀၁၄ မှာ လက်မှတ်ရေးထိုးခဲ့ကြတာပါ။

ဒါပေမယ့်လည်း ဒီ သဘောတူညီချက်နဲ့ပတ်သက်လို့ ဖိလစ်ပို်င်မြေပေါ် အမေရိကန် စစ်တပ်ရှိနေတာကို အစဉ်ကန့်ကွက်နေတဲ့ အုပ်စုတွေရဲ့ တရားရေးအရ စိန်ခေါ် မှုတွေ ရှိခဲ့ပါတယ်။ တရားရုံးချုပ်ကတော့ ဒီသဘောတူညီချက်ဟာ လွှတ်တော်ရဲ့ ခွင့်ပြုချက်မလိုဘူး၊ သမ္မတ အမိန့်နဲ့ သဘောတူညီချက်အရ တည်ဆဲ ဥပဒေတွေနဲ့ နိုင်ငံတကာစာချုပ်တွေကို အကောင်အထည် ဖော်တာပဲဖြစ်တယ်ဆိုပြီး ဒီကနေ့ အင်္ဂါနေ့မှာ ၁၀ မဲ ၄ မဲ နဲ့ မဲခွဲဆုံးဖြတ်ခဲ့တယ်လို့ တရားရုံးချုပ် ပြောရေးဆိုခွင့် ရှိသူ Theodore Te က ပြောပါတယ်။

သဘာဝသံယံဇာတ ပေါကြွယ်တဲ့ တောင်တရုတ်ပင်လယ်မှာတရုတ်ဘက်က ပိုင်နက်ရယူမှုနဲ့ ပတ်သတ်လို့ ပြင်းပြင်းထန်ထန် လုပ်ဆောင်လာနေတာကို ချိန်ခွင်လျှာမျှဖို့အတွက် ဖိလစ်ပိုင်ရဲ့ စစ်ရေးစွမ်းအင်မြှင့်တင်ဖို့ရယ်ရွယ်ပြီး သမ္မတAquino ဒီသဘောတူညီမှုကို ရယူခဲ့တာပါ။

တရုတ်အပြင် ဖိလစ်ပိုင်၊ Vietnam, Taiwan, Malaysia နဲ့ Brunei နိုင်ငံတို့လည်း တာင်တရုတ်ပင်လယ်မှာ ရေပြင်ပိုင်နက် ကိစ္စ အငြင်းပွားနေကြတာဖြစ်ပါတယ်။ ဒီသဘောတူညီမှုဟာ အမေရိကန်ပြည်ထောင်စုအနေနဲ့ အာရှပိစိဖိတ် ဒေသကို ပြန်ပြီး အာရုံစိုက်ဖို့ လုပ်ဆောင်တဲ့ သမ္မတ Barack Obama မဟာဗျူဟာရဲ့ တစိတ်တဒေသဖြစ်ပါတယ်။

ဗွီအိုအေ (မြန်မာပိုင်း)
http://burmese.voanews.com


၂၀၁၆ ဇန်န၀ါရီ ၂၅ ရက်တွင် စတင်ဖွင့်လှစ်မည့် အစိုးရစက်မှုလက်မှုသိပ္ပံကျောင်း (GTI) ရွှေပြည်သာကို အရက်ချက်စက်ရုံ နှင့် ဖူဂျီဆပ်ပြာစက်ရုံအနီးတွင် တည်ဆောက်ထားရာ အနံ့အသက်ဆိုးရွားမှုရှိသဖြင့် ဝေဖန်မှုများထွက်ပေါ်လျက်ရှိသည်။

ယင်းကျောင်းနှင့်ပတ်သက်၍ `ဇန်န၀ါရီ ၁၈ ရက်မှာ ကျောင်းအပ်လက်ခံမှာ ဖြစ်ပြီး ၂၅ ရက်မှာ စဖွင့်မယ်။ အခု ကျောင်းက အရက်ချက်စက်ရုံနဲ့နီးတော့ တခါလေ လေတိုက်ရင် အနံ့အသက်ဆိုးတယ်`ဟု ယင်းကျောင်းတွင် တာဝန်ကျသည့် ဆရာမတဦးက News Watch သို့ ဇန်န၀ါရီ ၁၂ ရက်က ပြောကြားခဲ့သည်။ ယင်းကျောင်းတွင် ကျောင်းသား ၁၆၀ တက်ရောက်ပညာသင်ကြားခွင့်ရရှိပြီး ဆရာအင်အား ၂၄ ဦးအထိ ရှိသည်ဟု ၎င်းက ဆိုသည်။


ရွှေပြည်သာ စက်မှုလက်မှုသိပ္ပံအထက်တန်းကျောင်း၏ ဘေးဘက်တလမ်း ကျော်တွင် ရွှေအိုးအရက်ချက်စက်ရုံနှင့် မျက်နှာချင်းဆိုင်တွင် ဖူဂျီဆပ်ပြာ စက်ရုံတည်ရှိသောကြောင့် အနံ့အသက်ဆိုးရွားမှုများ ကြုံတွေ့နေရသည်ဟု ဆိုသည်။ ` အရက်ချက်စက်ရုံက မီးခိုးခေါင်းတိုင်မြင့်ပေမယ့် အရက်စိမ်တဲ့ စိမ်ရည်နံ့တွေက လေသင့်ရင် နံတယ်။ GTI ကျောင်းကို ဒီလို စက်ရုံတွေကြားဆောက်လုပ်ထားတာကိုက သိပ်မဟုတ်ဘူး’ဟု တာဝန်ကျ ဆရာမတဦးက ပြောကြားသည်။


အဆိုပါကျောင်းသည် ရန်ကုန်တိုင်းဒေသကြီး ရွှေပြည်သာမြို့နယ် ရွှေပြည်သာစက်မှုဇုန် (၁)ထဲတွင် တည်ရှိပြီး အဓိက ဘာသာရပ်လေးခု သင်ကြားမည်ဟု သိရသည်။ သင်ကြားမည့် ဘာသာရပ်များမှာ Civil, Ec, Ep, Machine ဘာသာရပ်လေးခုဖြစ်ပြီး နည်းပညာအထက်တန်းကျောင်း အောင်မြင်သူအချို့နှင့် တက္ကသိုလ်ဝင်တန်း အောင်မြင်ပြီး သတ်မှတ် အရည်အချင်းနှင့် ကိုက်ညီသူများတက်ရောက်ခွင့်ရရှိမည်ဖြစ်သည်ဟု ဆိုသည်။ လက်ရှိ မြန်မာနိုင်ငံတွင် GTI ကျောင်းပေါင်း ၂၂ ကျောင်းရှိပြီး ဇန်န၀ါရီ ၂၅ ရက်တွင် အဆိုပါ GTI ကျောင်းအားလုံး ဖွင့်လှစ်သွားမည်ဟု သိရှိရသည်။

ကိုခက်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal/

ပုံစာ = ဧရာဝတီမြစ်ကြောင်းသွား ရေယာဉ်များအား မြင်တွေ့ရစဉ်
ကသာ၊ ဇန္န၀ါရီ ၁၁

မန္တလေးတိုင်းဒေသကြီး မန္တလေးမြို့မှ ဧရာဝတီမြစ်ကြောင်းအတိုင်း စစ်ကိုင်းတိုင်းဒေသကြီး ကသာမြို့သို့ စက်သုံးဆီများသွားရောက်ပို့ဆောင်သည့် ရေယာဉ်ကြီး နှစ်စင်းသည် ဇန္န၀ါရီ ၉ ရက် မနက် ၃၀ မိနစ်အချိန်ခန့်က မတ္တရာမြို့နယ်၊ ဥဒိမ်ကျေးရွာအုပ်စု၊ သူဌေးကုန်းကျေးရွာအနီး ဧရာဝတီမြစ်ကြောင်းအတွင်း ညအိပ်ရပ်နားရန် ရေယာဉ်ဆိုက်ကပ်ထားစဉ် ဒုတ်၊ဓား၊ လေးခွများ ကိုင်ဆောင်ထားသည့် လူ(၁၂)ဦးခန့်က ဟွန်ဒါစက်တပ် ပဲ့ချိတ်နှစ်စီးဖြင့် ရောက်ရှိလာပြီး လေးခွကုန်းသီးများဖြင့် ပစ်ခတ်တိုက်ခိုက်ခဲ့ကာ ၎င်း ရေယာဉ်ပေါ်ရှိ သင်္ဘောသားများထံမှ ငွေကျပ်(၁၀)သိန်းနှင့် လက်ကိုင်ဖုန်း(၉)လုံးတို့အား လုယက်ယူငှင်သွားခဲ့ခြင်းဖြစ်သည်။

ထို့အပြင် အဆိုပါ ဒုတ်၊ဓား၊ လေးခွများ ကိုင်ဆောင်ထားသည့် လူ(၁၂)ဦးခန့်သည် မြစ်ကြောင်းအတိုင်း စုန်ဆင်းသွားခဲ့ပြီးနောက် မနက် ၁ နာရီခွဲအချိန်ခန့်တွင် ညအိပ်ရပ်နားရန် ဆိုက်ကပ်ထားသည့် ရေယာဉ် နောက်တစ်စီးအား အလားတူထပ်မံ တိုက်ခတ်ခဲ့ပြီးနောက် ၎င်းရေယာဉ်ပေါ်မှ ငွေကျပ်(၂၀)သိန်းနှင့် လက်ကိုင်ဖုန်း(၁၂)လုံးတို့ကို လုယူသွားကြောင်း သိရသည်။

`` လေးခွကုန်းသီးတွေနဲ့ ပစ်ခတ် တိုက်ခိုက်ပြီး ငွေကြေးနဲ့ လက်ကိုင်ဖုန်းများ လုယက်ခံရသည့် ရေယာဉ်နှစ်စီးကတော့ စိန်စွန်ညို ရေယာဉ်နဲ့ အေးချမ်းမြန်မာ(၁) ရေယာဉ်များဖြစ်ပါတယ်..´´ ဟု မတ္တရာမြို့မရဲစခန်းမှ အတည်ပြုပြောကြားသည်။

ထို့ကြောင့် ဒုတ်၊ ဓား၊ လေးခွများကိုင်ဆောင်ကာ အုပ်စုဖွဲ့၍ ရေယာဉ်များ ညအိပ်ရပ်နားထားစဉ် ပစ်ခတ် တိုက်ခိုက်၍ ငွေကြေးနှင့် လက်ကိုင်ဖုန်းများ လုယက်ယူငှင် ထွက်ပြေးတိမ်းရှောင်သွားသူများနောက်သို့ မတ္တရာမြို့မရဲစခန်းမှူး ဒုရဲမှူး အေးမင်းနှင့်အဖွဲ့က အပူတပြင်းလိုက်လံ ဖမ်းဆီးလျက်ရှိကြောင်း သိရှိရသည်။

သတင်း + ဓာတ်ပုံ = ကိုတိုးကြီး
https://www.facebook.com/KoToeChinDween/


တူရကီနိုင်ငံ Istanbul မြို့လည်ခေါင် သမိုင်းဝင်ရပ်ကွက်မှာ ဒီကနေ့ဖြစ်ပွားတဲ့ ပေါက်ကွဲမှုကြောင့် လူ ၁၀ ယောက် အနည်းဆုံးသေဆုံးပြီး နောက်ထပ် ၁၅ ဦး ဒဏ်ရာရရှိသွားတယ်လို့ Istanbul မြို့တော်ဝန်က ပြောပါတယ်။

Sultanahmet ရပ်ကွက်မှာ ဘာ့ကြောင့်ပေါက်ကွဲမှု ဖြစ်တာလဲ ၊ ဘယ်သူကလုပ်ဆောင်တာလဲဆိုတာ စုံစမ်းစစ်ဆေးမှုလုပ်နေတယ်လို့ မြို့တော် အစိုးရ website မှာ ဖော်ပြထားတဲ့ ကြေငြာချက်မှာ ပြောထားပြပါတယ်။

Ankara မြို့တော်က ရထား ဘူတာရုံ တရုံ အပြင်ဘက်မှာ စုဝေးနေကြတဲ့ ငြိမ်းချမ်းရေးတက်ကြွလှုပ်ရှားသူတွေကို အသေခံဗုံးခွဲတိုက်ခိုက်မှု ၂ ခု ပြုလုပ်ခဲ့လို့ လူရာကျော် သေဆုံးခဲ့ရတဲ့ အောက်တိုလာလ ကတည်းက တိုက်ခိုက်မှုထပ်ဖြစ်လာနိုင်လို့ သတိပေးချက် ထုတ်ပြန်ထားရတာပါ။

အသေခံဗုံးခွဲတိုက်ခိုက်ဖို့ ကြံစည်နေတဲ့ IS အစ္စလာမ်မစ်အကြမ်းဖက် အဖွဲ့ဝင် ၂ ဦး ကို ဖမ်းမိခဲ့ပြီး နောက်မှာလည်း Ankara မြို့တော်မှာ နှစ်သစ်ကူးပွဲတော် ကျင်းပဖို့အစီအစဉ်ကို အစိုးရက ဖျက်သိမ်းခဲ့ပါတယ်။

ဗွီအိုအေ (မြန်မာပိုင်း)
http://burmese.voanews.com


ဒီကနေ့ နေပြည်တော်မှာ စတင်ကျင်းပတဲ့ ပြည်ထောင်စု ငြိမ်းချမ်းရေးညီလာခံအဖွင့်မိန့်ခွန်းမှာ ထာဝရငြိမ်းချမ်းရေးရရှိအောင်ဆောင်ရွက်ဖို့ အဆင့်သင့်ဖြစ်နေကြောင်းနဲ့ ၂၁ ရာစုနှစ်နဲ့ ကိုက်ညီတဲ့ ပင်လုံညီလာခံမျိုးကို မျှော်လင့်ကြောင်း ဒေါ်အောင်ဆန်းစုကြည်က ထည့်သွင်း ပြောဆိုလိုက်ပါတယ်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင်ကတော့ တနိုင်ငံလုံးပစ်ခတ်တိုက်ခိုက်မှု ရပ်စဲရေးစာချုပ်ကို လက်မှတ်မရေးထိုးသေးတဲ့ လက်နက်ကိုင်အဖွဲ့တွေကို မိမိတို့ ဆန္ဒအလျောက်
ပါဝင်လက်မှတ်ရေးထိုးဖို့အတွက် ပြောကြားခဲ့သလို နိုင်ငံတော်ကာကွယ်ရေးအတွက် တိုင်းရင်းသား လက်နက်ကိုင်အဖွဲ့တွေ ပါဝင်ရေးကို ကြိုဆိုကြောင်း ပြောဆိုခဲ့ပါတယ်။ဒီသတင်းကို နေပြည်တော်ကို ရောက်ရှိသတင်းယူနေတဲ့ ဗွီအိုအေမြန်မာပိုင်းရဲ့ သတင်းထောက် ကိုမိုးဇော်က တင်ပြထားပါတယ်။

တနိုင်ငံလုံးထာဝရငြိမ်းချမ်းရေးရရှိရေးအတွက် စတင်လိုက်တဲ့ ဒီကနေ့ဆွေးနွေးပွဲမှာ နိုင်ငံတော်သမ္မတ ဦးသိန်းစိန်၊ ပြည်ထောင်စုလွှတ်တော်ဥက္ကဌ သူရဦးရွှေမန်း၊ တပ်မတေ်ာကာကွယ်ရေးဦးစီးချုပ် ဗိုလ်ချုပ်မှုးကြီး မင်းအောင်လှိုင်၊ တရားဥပဒေစိုးမိုးရေးနဲ့ တည်ငြိမ်အေးချမ်းရေးကော်မတီ ဥက္ကဌ ဒေါ်အောင်ဆန်းစုကြည်တို့က အဖွင့်မိန့်ခွန်းပြောကြားခဲ့ကြပါတယ်။

မကြာမီ အစိုးရသစ်ကို ဦးဆောင်ဖွဲ့စည်းတော့မယ့် အမျိုးသားဒီမိုကရေစီအဖွဲ့ချုပ် NLD ပါတီ ဥက္ကဌ ဖြစ်တဲ့ ဒေါ်အောင်ဆန်းစုကြည်က ထာဝရငြိမ်းချမ်းရေး ရရှိရေးနဲ့ပတ်သက်ပြီး အခုလို ပြောဆိုပါတယ်။

“ယခုအချိန်မှာ ပြည်သူပြည်သားတိုင်းရင်းသားများက ကျမတို့ကို ပေးထားသောလုပ်ပိုင်ခွင့်အာဏာ mandate အပေါ်အခြေခံပြီး ထာဝရငြိမ်းချမ်းရေး ရယူရမယ့်တာဝန်ကို ထမ်းဆောင်ဖို့ အဆင်သင့်ရှိပါတယ်။ အားလုံးက ပူးပေါင်းပါဝင်ကြမယ်လို့လည်း အထူးမျှော်လင့်ပါတယ်။ ကျမတို့မှာ ၂၁ ရာစုနှစ်နဲ့ ကိုက်ညီမှုရှိတဲ့ ပင်လုံညီလာခံမျိုးကို လုပ်ချင်ပါတယ်။”

တိုးတက်လာတဲ့ ဆက်သွယ်ရေးနည်းပညာတွေနဲ့အတူ ၂၁ရာစုညီလာခံကို ကျင်းပပြီး တိုင်းရင်းသားအကြား အပြန်အလှန်နားလည်ယုံကြည်မှုတွေနဲ့ ဖက်ဒရယ်ပြည်ထောင်စု တည်ဆောင်ဖို့ကိုလည်းထည့်သွင်းပြောဆို ပါတယ်။

“တိုင်းရင်းသားများအသီးသီးရဲ့ မျှော်လင့်ချက်များကို စုပေါင်းပြီး အကောင်အထည်ဖော်နိုင်မယ်ဆိုတဲ့ အတွေးအခေါ်အယူအဆဟာ ၂၀ ရာစုနှစ်က စခဲ့ပေမယ့်၊ ၂၁ ရာစုနှစ်မှာ လိုအပ်တဲ့ ပင်လုံစိတ်ဓါတ် ၊ တနည်းအားဖြင့် ပြည်ထောင်စုစိတ်ဓါတ်ပဲ ဖြစ်ပါတယ်။ ယခုအခါ ဆက်သွယ်ရေး နည်းပညာတိုးတက်မှုများကြောင့် ကမ္ဘာတ၀ှမ်း အချိန်နဲ့ တပြေးညီ ဆက်သွယ်မှုတွေရှိနေပါတယ်။ နည်းပညာသစ် အခွင့်အလှမ်းများကို အသုံးချပြီးတော့ ယခင်က မစွမ်းဆောင်နိုင်ခဲ့တာမျိုးကို အခုအခါမှာ အောင်အောင်မြင်မြင်လုပ်နိုင်ခြင်းအားဖြင့် ၂၁ ရာစုနှစ် ညီလာခံကြီးကို ကျင်းပ နိုင်မှာပါ။ တိုင်းရင်းသားများအားလုံး အပြန်အလှန် နားလည်မှု၊ အပြန်အလှန် ယုံကြည်မှု၊ အပြန်အလှန် ချစ်ခင်ရင်းနှီးမှု၊ အပြန်အလှန် လေးစားမှုတို့ဖြင့် ပူးပေါင်းဆောင်ရွက်ကြမှသာလျှင် စစ်မှန်တဲ့ ဒီမိုကရေစီ ပြည်ထောင်စုကြီးကို ဖော်ဆောင်နိုင်မှာဖြစ်ပါတယ်။”

တပ်မတော်ကာကွယ်ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင်ကတော့ တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် NCAကို လက်မှတ်မရေးထိုးသေးတဲ့ လက်နက်ကိုင်အဖွဲ့တွေနဲ့ပတ်သက်ပြီး အခုလိုပြောကြားပါတယ်။
“လက်မှတ်ရေးထိုးမှုမရှိသေးတဲ့အဖွဲ့များအပေါ်မှာ တပ်မတော်အနေနဲ့ သံသယစိတ်မထားဘဲ၊ မိမိတို့ စိတ်ဆန္ဒအတိုင်းအချိန်မရွေး လက်မှတ်ရေးထိုးနိုင်ဖို့လည်း တံခါးဖွင့်ထားသလိုပဲ နိုင်ငံတော်အစိုးရ၊ ပြည်သူနဲ့ တပ်မတော်တို့ရဲ့ ငြိမ်းချမ်းရေးလိုလားတဲ့၊ ပြင်းပြတဲ့ဆန္ဒအမှန်ကိုလည်း မြင်တွေ့ကြရမှာ ဖြစ်ပါတယ်။

တိုင်းရင်းသားလက်နက်ကိုင်တပ်ဖွဲ့တွေနဲ့ပတ်သက်ပြီး စစ်လက်နက်ဖြုတ်သိမ်းရေး၊ လုံခြုံရေးဆိုင်ရာပူးပေါင်းဆောင်ရွက်ရေး ကိစ္စရပ်တွေအတွက်လည်း အခုလို ဖိတ်ခေါ် ပြောဆိုပါတယ်။

“ ဒီမိုကရေစီနဲ့ Federal ကို အခြေခံတဲ့ ပြည်ထောင်စုအရေး ဆွေးနွေးကြတဲ့အခါ လက်နက်ကိုင်ဆောင်ပြီး နိုင်ငံရေးလုပ်ငန်းစဉ်ကို လုပ်ဆောင်လို့မရနိုင်တဲ့အတွက် ယနေ့နိုင်ငံတကာ ပဋိပက္ခ အပစ်အခတ်ရပ်စဲရေး ဖြေရှင်းဆောင်ရွက်ရာမှာ အသုံးပြုနေတဲ့ DDR/SSR လုပ်ငန်းစဉ်များအတိုင်း သင့်တင့်တဲ့ Time Line သတ်မှတ်ပြီးအကောင်အထည် ဖော်ဆောင်ရွက်ရမှာ ဖြစ်ကြောင်း ပြောကြားလိုပါတယ်။

ကမ္ဘာ့နိုင်ငံအသီးသီးမှာ မိမိနိုင်ငံမိမိကာကွယ်ရေးအတွက် တပ်မတော်တစ်ရပ်သာ ထားရှိကြတာကို တွေ့ကြ ရမှာဖြစ်ပါတယ်။ မိမိတို့နိုင်ငံအနေနဲ့လည်း ယင်းမူဝါဒအတိုင်း ကျင့်သုံးဆောင်ရွက်ပြီး မြန်မာ့တပ်မတော်ကို Standard Army အဖြစ် အဖက်ဖက်က တည်ဆောက် လျက်ရှိပါတယ်။ နိုင်ငံတော်ကာကွယ်ရေး တာဝန် ထမ်းဆောင်ရန် ဆန္ဒရှိတဲ့ တိုင်းရင်းသား လက်နက်ကိုင်များကိုလည်း တပ်မတော်မှာ တာဝန်ထမ်းဆောင် နိုင်ရေးအတွက် ဖိတ်ခေါ်ကြိုဆိုပါကြောင်း ပြောကြားလိုပါတယ်။”

လက်ရှိကျင်းပနေတဲ့ပြည်ထောင်စုငြိမ်းချမ်းရေးညီလာခံဟာ အစိုးရနဲ့ တိုင်းရင်းသား လက်နက်ကိုင်အဖွဲ့တွေ အကြား လက်မှတ်ရေးထိုးခဲ့တဲ့ တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်NCA အရ
စတင်ခဲ့တာဖြစ်ပါတယ်။ လောလောဆည်မှာတော့ NCA စာချုပ်ကို တိုင်းရင်းသားလက်နက်ကိုင်အဖွဲ့ ၈ဖွဲ့သာ လက်မှတ်ရေးထိုးပြီး အဖွဲ့ ၁၀ ဖွဲ့ကျော်လောက်က လက်မှတ်မရေးထိုးသလို ပြည်ထောင်စု ငြိမ်းချမ်းရေးညီလာခံကိုလည်း တက်ရောက်လာတာ မရှိပါဘူး။

ဒီကနေ့ စတင်တဲ့ ပြည်ထောင်စု ငြိမ်းချမ်းရေးညီလာခံကို အစိုးရ၊ လွှတ်တော်၊ တပ်မတော်၊ တိုင်းရင်းသားလက်နက်ကိုင်၊ နိုင်ငံရေးပါတီနဲ့ ဖိတ်ကြားအပ်တဲ့အစုအဖွဲ့က ကိုယ်စားလှယ်တွေအပြင် ကုလသမဂ္ဂနဲ့ နိုင်ငံတကာသံတမန်တွေ၊ အစိုးရမဟုတ်တဲ့ အဖွဲ့က ကိုယ်စားလှယ်တွေ ပါဝင်တက်ရောက်ခဲ့ပါတယ်။ ဒီညီလာခံကို ပထမအကြိမ်အဖြစ် ၅ရက်ကြာကျင်းပဖို့ ရှိနေပါတယ်။

ကိုမိုးဇော် / ဗွီအိုအေ (မြန်မာပိုင်း)
http://burmese.voanews.com


တရုတ် ဒု-လုံခြုံရေး အရာရှိဟောင်း ဖြစ်သူ Li Dongsheng ကို လာဘ်စားမှုတွေနဲ့ ထောင် ၁၅ နှစ်ချမှတ်လိုက်ကြောင်း နိုင်ငံပိုင်မီဒီယာက ပြောပါတယ်။

မစ္စတာ Li ဟာ တရုတ်နိုင်ငံရဲ့ အကြီးမားဆုံး လာဘ်စားမှုကြီး တစ်ခုကြောင့် ပြီးခဲ့တဲ့ ဇွန်လက ထောင် တသက်တကျွန်းချမှတ်ခံရတဲ့ တရုတ်လုံခြုံရေး အရာရှိချုပ်ဟောင်း Zhou Yongkang နဲ့ ပတ်သက်ဆက်နွယ်ခဲ့တာ ဖြစ်ပါတယ်။

မစ္စတာ Li အား ပြစ်ဒဏ်ချမှတ်ခဲ့တာကို တရုတ်အစိုးရ ဗဟိုရုပ်မြင်သံကြား လူမှုကွန်ယက်အကောင့်မှာ ဖော်ပြခဲ့ပါတယ်။

မစ္စတာ Li ဟာ ဒေါ်လာ ၃.၃ သန်းနဲ့ညီမျှတဲ့ ယွမ်ငွေ ၂၂ သန်းနီးပါး လာဘ်စားမှုနဲ့ စွဲချက်တင်ခံရတာဖြစ်ပါတယ်။

ဒါ့အပြင် ၁၉၉၆ ခုနှစ်နဲ့ ၂၀၁၃ ခုနှစ်တွေ အတွင်းမှာ အာဏာအလွဲသုံးစား လုပ်ခဲ့တယ် ဆိုပြီးတော့လည်း မစ္စတာ Li ဟာ စွဲချက်တင်ခံခဲ့ရတယ်လို့ နိုင်ငံပိုင်မီဒီယာက အဲဒီအချိန်က သတင်းထုတ်ပြန်ခဲ့ပါတယ်။

မစ္စတာ Li ဟာ ပြီးခဲ့တဲ့နှစ် ဖေဖော်ဝါရီလမှာ ရာထူးကအထုတ်ခံရပြီး တရုတ်လုံခြုံရေးအရာရှိချုပ်ဟောင်း Zhou Yongkang နဲ့ တခြားဆက်နွယ်နေသူတွေ နဲ့အတူ စုံစမ်းစစ်ဆေးခံခဲ့ရတာ ဖြစ်ပါတယ်။

မစ္စတာ Zhou ဟာ ၂၀၁၂ ခုနှစ် အငြိမ်းစားမယူခင်အချိန်အထိ တရုတ်နိုင်ငံရဲ့ အဆင့်မြင့်ဆုံး အာဏာပိုင်အဖွဲ့အစည်းမှာ ပါဝင်တဲ့ လုံခြုံရေး အရာရှိအဖြစ် တာဝန်ထမ်းဆောင်ခဲ့တာ ဖြစ်ပါတယ်။

BBC Burmese
https://www.facebook.com/bbcburmese/


ဇန်န၀ါရီ ၁၂ရက် ၂၀၁၆ထုတ် ထိုင်းဘီဘီစီ အင်္ဂလိပ် version သတင်းစာ၏ ရေးသား ဖော်ပြချက်အရ လိပ်ကျွန်းမှာ အသတ်ခံခဲ့ရသော ဟန်နာ ၀စ်တရစ်၏အစ်မ လော်ရာ ၀စ်တရစ်ရဲ့ဖေ့ဘွတ် စာမျက်နှာမှာ ရေးသားထားချက်အရ ကော့စမွီတရားရုံးမှ သူတို့ကို လိပ်ကျွန်းအမှု မလိုက်တော့ပါနဲ့လို့ ချိန်းခြောက်ခဲ့တယ်၊
သေသွားလည်း သေသွားပလေ့စေ ကလေးလိုချင်ရင် နောက်တစ်ယောက်ပြန်မွေးပေါ့။ အမှုဆက်မလိုက်တော့ရန်အတွက် ငွေဘယ်လောက် ပေးရမလဲလို့လည်း ကမ်းလှမ်းထားတယ်လို့သူမရဲ့ ၁၀ရက်နေ့ ဇန်န၀ါရီလ ၂၀၁၆ နေ့စွဲ ဖေ့ဘွတ်မှာရေးသား ဖော်ပြထားပါတယ်။

MGR online
MTF Channel
https://www.facebook.com/mtftv

Abu Bakar ကို အကျဉ်းထောင်မှာ တွေ့ရစဉ် (Credit: Reuters) 
အင်ဒိုနီးရှားနိုင်ငံChilicap ​မြို့မှာ ​အစွမ်းရောက် ​ဝါဒီသမား ​Abu ​Bakar ​Bashir ​က ​တရားရုံးမှာ ​အမှုရင်ဆိုင်ဖို့ ​ရှိတဲ့အတွက် ​စာသင်ကျောင်းတွေ ​ပိတ်ချထားပြီး ​စစ်ဆေးရေး ​ဂိတ်တွေ ​မြို့အနှံ့မှာ ​ချမှတ်ထားရပါတယ်။

ဘာသာရေး ​ဆရာ ​Abu ​Bakar ​Bashir ​ဟာ ​အကြမ်းဖက်မှု ​စစ်သင်တန်းကျောင်း ​တစ်ခုကို ​ငွေကြေး ​ထောက်ပံ့တဲ့ ​အမှုနဲ့ ​အနည်းဆုံး ​ထောင်ဒဏ် ​၉ ​နှစ် ​ချမှတ်ခံနေရ ​ပါတယ်။

သူ့ရဲ့ ​ရှေ့နေတွေကတော့ ​သူ့ကို ​ဖမ်းဆီးခဲ့တုန်းက ​မဖြစ်သင့်တာတွေ ​ဖြစ်ခဲ့လို့ ​အမှုကို ​ပြန်လည် ​ဆန်းစစ်ဖို့ ​တရားရုံးမှာ ​အယူခံ ​ဝင်ထားတာ ​ဖြစ်ပါတယ်။

အမှုကို ​ပြန်လည် ​စစ်ဆေးတဲ့အခါမှာလည်း ​Abu ​Bakar ​Bashir ​အနေနဲ့ ​အနိုင်ရဖို့ ​အလားအလာ ​မရှိပေမယ့်လည်း ​အမှုကို ​ပြန်လည် ​ကြားနာနေတုန်း ​သူ့ကို ​ထောက်ခံသူတွေက ​ပြဿနာ ​လုပ်မှာ ​စိုးလို့ ​ကျောင်းတွေ ​ပိတ်ချပြီး ​လုံခြုံရေးတွေ ​တင်းကြပ်ထားတာ ​ဖြစ်ပါတယ်။

ABC Radio Australia
http://www.radioaustralia.net.au/burmese


 ပြည်သူပြည်သား၊ တိုင်းရင်းသားများက ပေးထားတဲ့ လုပ်ပိုင်ခွင့်အပေါ် အခြေခံပြီး ထာဝရငြိမ်းချမ်းရေးရယူရမယ့် တာဝန်ကိုထမ်းဆောင်ဖို့အဆင်သင့်ရှိကြောင်းနဲ့ အားလုံးက ပူးပေါင်းပါဝဝင် ကူညီကြမယ်လို့ မျှော်လင့်ကြောင်း ဒေါ်အောင်ဆန်းစုကြည် က ပြောပါတယ်။

နေပြည်တော် မြန်မာကွန်ဗန်းရှင်းစင်တာ (၂) မှာ ဒီကနေ့စတင်ကျင်းပတဲ့ "ပြည်ထောင်စုငြိမ်းချမ်းရေး ညီလာခံ" ဖွင့်ပွဲအခမ်းအနားမှာ ဒေါ်အောင်ဆန်းစုကြည်က ပြောခဲ့တာ ဖြစ်ပါတယ်။

ဒါ့အပြင် ဒေါ်အောင်ဆန်းစုကြည်က တစ်နိုင်ငံလုံးအပစ်ခတ်ရပ်စဲရေးစာချုပ် (NCA) ဟာ ပြည်ထောင်စုကြီး ငြိမ်းချမ်းရေးအတွက် ပထမအစခြေလှမ်းသာဖြစ်ကြောင်းနဲ့ တိုင်းရင်းသားလက်နက်ကိုင်အဖွဲ့အားလုံး ပါဝင်ဖို့မလွဲမသွေကြိုးပမ်းအားထုတ်သွားရမှာ ဖြစ်ကြောင်းလည်း ပြောပါတယ်။

NCA မှာ လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့တွေနဲ့ လက်မှတ် မထိုးထားတဲ့ တိုင်းရင်းသားလက်နက်ကိုင်အဖွဲ့တွေအကြား စိတ်ဝမ်းမကွဲကြဖို့ အရေးကြီးကြောင်းကိုလည်း ထည့်သွင်း ပြောကြားခဲ့ပါတယ်။

ပြည်ထောင်စုငြိမ်းချမ်းရေးညီလာခံ ဖွင့်ပွဲအခမ်းအနားမှာ နိုင်ငံတော်သမ္မတ ဦးသိန်းစိန်၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၊ ပြည်သူ့လွှတ်တော် ဥက္ကဌ သူရဦးရွှေမန်းနဲ့ ကရင်အမျိုးသားအစည်းအရုံးဥက္ကဌ မူတူးစေးဖိုးတို့လည်း အဖွင့်မိန့်ခွန်း ပြောကြားခဲ့ကြပါတယ်။

ဖွင့်ပွဲအခမ်းအနားကို NCA လက်မှတ်ရေးထိုးထားတဲ့ တိုင်းရင်းသား လက်နက်ကိုင်အဖွဲ့ကိုယ်စားလှယ်တွေ၊ နိုင်ငံရေးပါတီ ကိုယ်စားလှယ်တွေ ၊ လွှတ်တော်ကိုယ်စားလှယ်တွေ ၊ အရပ်ဖက်လူမှုအဖွဲ့အစည်းက ကိုယ်စားလှယ်တွေ ၊ ငြိမ်းချမ်းရေး အကျိုးဆောင်တွေ ၊ နိုင်ငံတကာ NGOs တွေ အစိုးရကိုယ်စားလှယ်တွေ စုစုပေါင်း ၈၀၀ နီးပါး တက်ရောက်ခဲ့ပါတယ်။

RFA Burmese
https://www.facebook.com/RFA-Burmese


မကွေးတိုင်းဒေသကြီး အောင်လံမြို့နယ် မြွေရိုးကျေးရွာတွင် အမျိုးသမီးတစ်ဦးမှာ ကလေးသူခိုးဟုစွပ်စွဲခံရသ ဖြင့် လူအများရှေ့တွင် ကလေးကိုနို့တိုက်၍ သက်သေပြခဲ့ရကြောင်း အောင်လံမြို့မရဲစခန်းမှ သိရှိရသည်။

အောင်လံမြို့နယ် မြွေရိုးကျေးရွာ၌ ဇန်နဝါရီ ၁၀ ရက် ညပိုင်းက ကလေးသူခိုးအဖွဲ့ ဖမ်းဆီးရမိထားကြောင်း သတင်းရသဖြင့် အောင်လံမြို့မရဲစခန်းမှူးနှင့်အဖွဲ့က အဆိုပါကျေးရွာသို့သွားရောက်ရာတွင် ကျေးရွာသို့ရောက်ရှိ လာသည့်အဖွဲ့မှာ ကလေးသူခိုးဟု စွပ်စွဲခံရခြင်းဖြစ်၍ ရဲစခန်းသို့ခေါ်ဆောင်ထိန်းသိမ်းခဲ့ရကြောင်း အောင်လံမြို့မရဲစခန်းမှူး ဒုရဲမှူးနော်ခမ်း၏ ပြောကြားချက်အရ သိရသည်။

“အင်တာနက်ကတစ်ဆင့် ချစ်ကြိုက်ခဲ့ကြပြီး ခိုးယူပေါင်းသင်းဖို့ မြွေရိုးကျေးရွာကို ရောက်လာကြတာပါ။ ကောင်မလေးနဲ့ အဖော်ပြုလိုက်လာတဲ့အမျိုးသမီးမှာ တစ်နှစ်နဲ့သုံးလသားအရွယ် ကလေးငယ်တစ်ဦး ပါရှိလာတာကြောင့် ကလေးသူခိုးအဖွဲ့ထင်ပြီး ဖြစ်ကြတာပါ”ဟု ဒုရဲမှူး နော်ခမ်းကပြောသည်။
ကံမြို့နယ် ဇီးတောကျေးရွာနေ အမျိုးသမီးတစ်ဦးသည် ၎င်းနှင့် အင်တာနက်တွင် သမီးရည်းစားဖြစ်ခဲ့သူ အောင်လံမြို့နေ ဆက်ထွန်းဦးဆိုသူနှင့် ခိုးရာလိုက်ပြေးရာတွင် သူမနှင့် အဖော်အဖြစ် သားအမိနှစ်ဦးအား ခေါ်ဆောင်လာခဲ့ခြင်းဖြစ်သည်။

၎င်းတို့ကို ဆက်ထွန်းဦး၏ သူငယ်ချင်းဖြစ်သူ ချစ်တီး(ခ)သန့်ဇင်ထွန်းသည် မြွေရိုးကျေးရွာရှိ ၎င်းနှင့်ရင်းနှီးသူ ဦးမြင့်လွင်၏ နေအိမ်သို့ လာရောက်ပို့ဆောင်၍ တည်းခိုရန်ခေါ်ဆောင်လာရာမှ ၎င်းတို့လေးဦးအဖွဲ့ကို ကလေး သူခိုးအဖွဲ့ဟု စွပ်စွဲခဲ့ကြခြင်းဖြစ်သည်။

“ဦးမြင့်လွင်က ခရီးထွက်နေလို့ ရွာမှာရှိမနေတာကြောင့် ဆယ်အိမ်မှူးနေအိမ်ကို သွားပြီး ဧည့်စာရင်း တိုင်ကြတာပါ။ ကျွန်တော်တို့မှာ မှတ်ပုံတင်ပါမလာလို့ ဆယ်အိမ်မှူးနဲ့ စကားပြောဆိုနေတုန်းမှာ တုတ်တွေ၊ ဓားတွေကိုင် ထားတဲ့ ရွာသားတွေရောက်လာကြပြီး ကလေးသူခိုးအဖွဲ့လို့ စွပ်စွဲကြတာပါ”ဟု ချစ်တီး(ခ)သန့်ဇင်ထွန်းက ပြောသည်။

ရွာသားများက ၎င်းတို့အဖွဲ့တွင်ပါလာသည့် ကလေးအား ခိုးယူလာခြင်းဖြစ်မည်ဟု ထင်မှတ်၍ ကလေးသူခိုး မဟုတ်ပါက ကလေးကို နို့တိုက်၍သက်သေပြရန် တောင်းဆိုခဲ့ကြခြင်းကြောင့် ကလေးအမေဖြစ်သူမှာ လူပုံ အလယ်တွင် ကလေးကို နို့တိုက်ပြခဲ့ရကြောင်း သိရသည်။

ဆင်ပေါင်ဝဲမြို့နယ် စိုင်ကျကျေးရွာတွင်လည်း ဇန်နဝါရီ ၅ ရက်က ကလေးသူခိုးဟုစွပ်စွဲ၍ ရွှေပွဲစားအမျိုးသမီး တစ်ဦးအား နံရိုးနှစ်ချောင်းကျိုးသည်အထိ အုပ်ချုပ်ရေးမှူးနှင့် ကျေးရွာသားများက ဝိုင်းဝန်းရိုက်နှက်ခဲ့သည့် ဖြစ် စဉ်တစ်ခုဖြစ်ပွားခဲ့ကြောင်း သိရသည်။

သတင်း - MMK
The Ladies News Journal
https://www.facebook.com/News.TheLadies


မြန်မာနိုင်ငံမှာ အစိုးရရုံးစိုက်ရာ နေပြည်တော်ကို နိုင်ငံခြား သံရုံးတွေ ပြောင်းရွှေ့အခြေစိုက်ဖို့ စီစဉ်နေပါတယ်။ မကြာသေးခင်နှစ်တွေကစလို့ အပြောင်းအလဲတွေ တွေ့မြင်ခဲ့ရတဲ့ မြန်မာနိုင်ငံမှာ အစိုးရလုပ်ငန်းတွေ အများစုရှိရာ နေပြည်တော်မှာ သံတမန်တွေ အခြေစိုက် လှုပ်ရှားနိုင်အောင် ရေရှည်စီမံကိန်း တစိတ်တပိုင်းအဖြစ် စတင်ဆောင်ရွက်နေတာဖြစ်တယ်လို့လည်း တာဝန်ရှိသူတွေက ပြောပါတယ်။ ဒီသတင်းအပြည့်အစုံကို ဗွီအိုအေမြန်မာပိုင်းကမေခကပေးပို့ထားပါတယ်။

အမျိုးသားလွှတ်တော်မှာ တနင်္လာနေ့က ဆွေးနွေးမှုတွေအတွင်း နေပြည်တော်က ဖွံ့ဖြိုးရေးအစီအစဉ်တွေနဲ့ ပတ်သက်လို့ သက်ဆိုင်ရာ တာဝန်ရှိသူတွေကို မေးမြန်းစဉ်မှာ သံရုံးတွေ ပြောင်းရွှေ့ရေး အစီအစဉ်ကို ထည့်သွင်းပြောဆိုသွားတာ ဖြစ်ပါတယ်။ မြန်မာနိုင်ငံ အခြေစိုက် သံရုံးတွေပြောင်းရွှေ့နိုင်ရေး လုပ်ငန်းလုပ်ဆောင်နေတာ နဲ့ပတ်သတ်ပြီး နေပြည်တော်ကောင်စီဝင် ဦးကံချွန် က လွှတ်တော်မှာ အခုလို ဖြေကြားခဲ့တာပါ။

“သံရုံးများ ဆောက်လုပ်ရန်အတွက် ဒက္ခိဏ သီရိ မြို့ နယ်ဟိုတယ်ဇုန် နောက်ကြောမှာ၅၀၀ ပေ ၅၀၀ပေ အကျယ် မြေကွက် ၁၂၀ ကွက်ကို လည်းကောင်း၊ ၃၀၀ပေ ၃၀၀ပေ အကျယ် စစ်သံမှုးရုံး မြေကွက် ၅၀ကွက်ကိုလည်းကောင်း ဖော်ထုတ်ထားပြီး ဖြစ်ပါတယ်။ လောလောဆယ်အားဖြင့် သံရုံးများ မဆောက်သေးသော်လည်း ဘင်္ဂလားဒေ့ရ်ှနိုင်ငံ၊ မလေးရှားနိုင်ငံတို့က စာချုပ်ချုပ်ဆို ငှားရမ်းထားပြီး ဖြစ်ပါတယ်။ တရုတ်နိုင်ငံ၊ ကာတာ နိုင်ငံ၊ ဘရူနိုင်းနိုင်ငံနဲ့ အိန္ဒိယ နိုင်ငံတို့ မှလည်း ငှားရမ်းရေးနဲ့ စာချုပ် ချုပ်ဆိုရေး စီစဉ် ဆောင်ရွက်ဆဲ ဖြစ်ပါတယ်။”

နေပြည်တော်အတွင်းမှာသံတမန်တွေနဲ့ လုပ်ငန်းလုပ်ကိုင်နေတဲ့နိုင်ငံခြားသားေ တွနေဖို့အတွက် အိမ်နေရာတွေ စီစဉ်ထားရှိပြီး ဖြစ်ကြောင်း လက်ရှိနေပြည်တော်မှာနိုင်ငံခြားသားတွေ နေထိုင်နိုင်ဖို့လုပ်ဆောင်နေတဲ့ အိမ်ယာစီမံကိန်းတွေနဲ့ လမ်းပမ်း ဆက်သွယ်ရေး လုပ်ငန်းတွေနဲ့ပတ်သတ်ပြီး ဦးကံချွန်ကအခုလိုဆက်လက်ဖြေကြားခဲ့ပါတယ်။

“နေပြည်တော်သို့ long stay နေလိုသူများ၊ သံရုံးများ ရုံးခန်းများ ဖွင့်လှစ်လိုသူများအတွက် ဇဗ္မူသီရိ မြို့  နယ် ပျဉ်းမနား တောင်ညို လမ်းဘေး၊ Grand ACE Villa စီစဉ် ဆောင်ရွက်ထားပြီး၊ အဆင့်မြင့် apartment များ ရုံးခန်းများ ထိုဝင်းထဲမှာတင် Shopping mall၊ Swimming pool၊ Gymnasium၊ Spa တို့ ပါ ပါရှိပါတယ်။ လောလောဆယ်အားဖြင့် တရုတ်သံရုံး ရုံးခွဲ ဖွင့်လှစ်ထားပြီး၊ နိုင်ငံခြားသား ၂၆ဦး နေထိုင်လျှက်ရှိပါတယ်။”

မြန်မာပြည်အနှံ့ မြို့များကို လေယာဉ်ဖြင့် သွားလာနိုင်ပါတယ်။ ထို့ အပြင် ဘန်ကောက် အဲဝေးဖြင့် ဘန်ကောက်သို့ တစ်ပတ် ငါးကြိမ်၊ China Eastern Airline မှ ကူမင်းသို့ တစ်ပတ်လျှင် နှစ်ကြိမ် နေပြည်တော်မှ တိုက်ရိုက် သွားနိုင်ပါတယ် ခင်ဗျာ။ ပြည်တွင်းမှ အမြို့ မြို့ အနယ်နယ်သို့ တိုက်ရိုက် ခရီးသွားနိုင်ရန် အတွက် နေပြည်တော် အခြေပြု မော်တော်ယာဉ်လိုင်း ၁၉လိုင်း၊ ကားအစီးရေ ၂၅၀ စီးဖြင့် လည်းကောင်း၊ အခြား ပြည်နယ်တိုင်း အခြေပြု ယာဉ်လိုင်း ၅၉ လိုင်း၊ ယာဉ်အစီးရေ ၈၀၀စီးဖြင့် သွားလာနိုင်ပါတယ်။

အခုလိုမြန်မာနိုင်ငံအခြေစိုက် နိုင်ငံခြားသံရုံးတွေပြောင်းရွှေ့ဖို့ လုပ်ဆောင်တာနဲ့ ပတ်သတ်ပြီးနိုင်ငံခြားရေးဝန်ကြိးဌာန ဒုတိယဝန်ကြီး ဦးသန့်ကျော်က ဒီလုပ်ငန်းစဉ်ဟာ နှစ်ရှည်စီမံကိန်းဖြစ်ကြောင်း၊ ပြောင်းရွှေ့လိုသည့် နိုင်ငံခြားသံရုံးတိုင်းကိုကြိုဆိုကြောင်း ဒီလုပ်ငန်းစဉ်နဲ့ပတ်သတ်ပြီး အခုလိုဗွီအိုအေမေးမြန်းမှုကိုဖြေကြားခဲ့ပါတယ်။

 “လောလောဆယ်တော့ သံရုံးအချို့ ဟာ နေပြည်တော်မှာ ရုံးခွဲပေါ့ ဒါမှမဟုတ်လည်း liaison office လိုမျိုး ဖွင့်ချင်တယ် ဆိုပြီးတော့ နိုင်ငံခြားရေး ၀န်ကြီးဌာနကို ဆက်သွယ်ပြောဆိုတာမျိုး ရှိပါတယ်။ လောလောဆယ်မှာ သံရုံးတွေကို နိုင်ငံခြားရေး ၀န်ကြီးဌာနက ရွေ့ခိုင်းတယ်ဆိုတာတော့ မရှိသေးပါဘူး။”

 စစ်ခေါင်းဆောင်ဟောင်း ဗိုလ်ချုပ်မှူးကြီး သန်းရွှေ လက်ထက် ၂၀၀၂ ခုနှစ်က စတင်ပြီး ပျဉ်းမနားမြို့အနီးမှာ တည်ဆောက်ခဲ့တဲ့နေပြည်တော်ဟာ၂၀၀၅ ခုနှစ်မှာ အစိုးရရုံးစိုက်ရာမြို့အဖြစ် ပြောင်းလဲခဲ့ပါတယ်။ နေပြည်တော်ဟာ ဧရိယာ စတုရန်းမိုင် ၃၀၀၀၀ နီးပါးရှိပြီး၊ ခန့်မှန်းချေ လူဦးရေ ၁သန်းကျော် နေထိုင်ကြောင်းလည်း မြို့တာဝန်ရှိသူတွေက ပြောပါတယ်။

မေခ / ဗွီအိုအေ (မြန်မာပိုင်း)
http://burmese.voanews.com


ရန်ကုန် ဇန်နဝါရီ ၁၁

ရန်ကုန်မြို့ စမ်းချောင်းမြို့နယ် ကျွန်းတော(မြောက်) ရပ်ကွက်တွင် ယနေ့နံနက် ၁ဝ နာရီ ၅၅ မိနစ်က မီးသွေးမီးဖိုဖြင့် ထမင်းအိုးတည်ရာမှ မီးလောင်မှုဖြစ်ပွားခဲ့ပြီး အိမ်ခြေ ၁၄လုံး ဆုံးရှုံးခဲ့သည်။

''မီးလောင်တဲ့သတင်းရတာနဲ့ မီးသတ်ကားစေလွှတ်မှုကို Level-4 အထိ လွှတ်ခဲ့တယ်။ လောင်တဲ့နေရာက အိမ်ခြေကလည်း စိပ်၊ ပျဉ်ထောင်၊ ပျဉ်ခင်းတွေဖြစ်နေတဲ့အပြင် သတင်းပေးနောက်ကျတဲ့အတွက် မီးလောင်မှုများ သွားတာပါ။ လောင်နေတဲ့အချိန်မှာလည်း လေက အရပ်လေးမျက်နှာကို ဝှေ့ပြီးတိုက်နေတဲ့အတွက် အချိန်တိုအတွင်း ကူးစက်လောင်ကျွမ်းမှု မြန်သွားတာပါ''ဟု ရန်ကုန် တိုင်းဒေသကြီး မီးသတ်ဦးစီးဌာန ဒုတိုင်းဦးစီးမှူး လက်ထောက်ညွှန်ကြားရေးမှူး ဦးဝင်းဝင်းက ပြောသည်။

ဖြစ်စဉ်မှာ အဆိုပါရပ်ကွက် မြသီတာလမ်း အမှတ် (၁ဝ)ရှိ ဒေါ်ရင်သန်း၏ (ကုန်ခြောက်ဆိုင်)အိမ်အပေါ်ထပ် နောက်ဖေးတွင် မီးသွေးမီးဖိုဖြင့် ထမင်းအိုးတည်ထားခဲ့ရာမှ ဘေးပျဉ်ကာသို့ မီးကူးစက်၍ မီးစတင်လောင်ကျွမ်းခဲ့ ခြင်းဖြစ်သည်။

လောင်ကျွမ်းရာသို့ သက်ဆိုင်ရာ တာဝန်ရှိသူများနှင့်အတူ သန္ဓေမီးသတ်တပ်ဖွဲ့ဝင် ၃၄၉ ဦး၊ အရန်မီးသတ် တပ်ဖွဲ့ဝင် ၈၅ ဦး၊ ကြက်ခြေနီတပ်ဖွဲ့ဝင် ၁၅၇ ဦးတို့က မီးငြှိမ်းသတ်ယာဉ် ၅၅ စီး၊ ရေသယ်ယာဉ်တစ်စီး၊ အထောက်အကူပြုယာဉ်နှစ်စီး၊ တိုင်းကြက်ခြေနီမှ လူနာတင်ယာဉ် ၁ဝ စီး၊ မိတ်ဖက်ယာဉ်နှစ်စီး၊ ကွပ်ကဲမှုယာဉ် ရှစ်စီးတို့ဖြင့် ငြှိမ်းသတ်ခဲ့ရာ နံနက် ၁၁ နာရီ ၃၈ မိနစ်တွင် မီးငြိမ်းသွားသည်။

''မီးလုံးကြီးတက်လာတော့မှ သိရတာ။ အိမ်ချင်းကပ် ရက်ဆိုတော့ ဘာပစ္စည်းမှ ယူချိန်မရလိုက်ဘူး။ ဖိနပ် တောင်မပါဘဲထွက်ပြေးခဲ့ရတယ်။ တချို့တွေဆိုအိမ်အပေါ် ထပ်ကနေ ခုန်ဆင်းတာတွေရှိတယ်။ ကျွန်မတို့အိမ်ဆို ပြာပုံဖြစ်သွားပြီ။ အချိန်တိုအတွင်း အားကောင်းကောင်းနဲ့လောင်တာဆိုတော့ မီးလောင်ခံရတဲ့အိမ်တိုင်းလိုလို ဘာပစ္စည်းမှ ယူချိန်မရလောက်ပါဘူး''ဟု အဆိုပါ မီးလောင်မှုနှင့်ပတ်သက်၍ ဒေါ်သန်းက သူ၏အတွေ့ အကြုံကို ပြောသည်။

ထိုမီးလောင်မှုသည် ရှမ်းလမ်းဈေးကပ်လျက်တွင် ဖြစ်ပွားခဲ့မှုအပေါ် ဈေးသည် ဒေါ်ခင်အေးက ''မီးလောင်တော့ ဆိုင်ရှင်တွေက ပစ္စည်းတွေကို ဈေးအပြင် ရွှေ့ထား ကြတယ်။ အချိန်မီ မီးငြှိမ်းသတ်နိုင်လို့ ဈေးဘက်ကို မကူးခဲ့တာပါ။ လွန်ခဲ့တဲ့လေးနှစ်လောက်က ဒီဈေးလည်း မီးလောင်ခဲ့ဖူးတော့ ကျွန်မတို့လည်း ကြောက်တာပေါ့''ဟု ပြောသည်။

မီးလောင်မှုကြောင့် သွပ်မိုး၊ ပျဉ်ကာ၊ ပျဉ်ခင်း နှစ်ထပ်အိမ် ၁ဝ လုံး၊ သံကူကွန်ကရစ် တိုက်တစ်လုံး၊ အုတ်ညှပ်တိုက်တစ်လုံး၊ တိုက်ခံအိမ်အပေါ်ထပ်နှင့် ကွန်ကရစ်တိုက်မျက်နှာကြက်တို့အပါအဝင် စုစုပေါင်း နေအိမ် ၁၄ လုံး မီးလောင်ကျွမ်းခဲ့ပြီး အဆောက်အအုံနှင့် အတွင်းပစ္စည်းများ မီးလောင်ဆုံးရှုံးခဲ့သည်။

ယင်းမီးလောင်မှုကြောင့် အိမ်ရှင်ဒေါ်ရင်သန်းအား စမ်းချောင်းမြို့နယ် ရဲစခန်းက (ပ)၁၆/၂ဝ၁၆၊ ပုဒ်မ-၂၈၅ ဖြင့် အရေးယူထားပြီး အိုးမဲ့အိမ်မဲ့ဖြစ်ခဲ့ရသည့် အိမ်ထောင်စု ၂၇ စု(လူဦးရေ ၁ဝ၆ ဦး)တို့ကို သက်ဆိုင်ရာ က လင်းလွန်း(မြောက်)ရပ်ကွက်ရှိ ရှမ်းလမ်းဓမ္မာရုံတွင် ယာယီမီးဘေးကယ်ဆယ်ရေးစခန်းဖွင့်လှစ်၍ ကူညီစောင့် ရှောက်မှုပေးလျက်ရှိသည်။

အလားတူ ယင်းနေ့နံနက် ၃ နာရီ ဝ၅ မိနစ်တွင် မရမ်းကုန်းမြို့နယ် (၁ဝ)ရပ်ကွက် ကန်ရိပ်သာလမ်း၌ ပြန်လည်ပြုပြင်တည်ဆောက်နေသော RC နှစ်ထပ်တိုက် အတွင်း လှေကားအောက်ရှိ Change Over အပူ လွန်ကဲရာမှ မီးလောင်မှုဖြစ်ပွားခဲ့သည်။

ယင်းမီးလောင်မှုကြောင့် အပေါ်ထုပ်တန်း၊ လျောက်တန်း၊ လှေကားတို့ မီးလောင်ခဲ့၍ ညစောင့် ဦးသန်းနိုင် ကျော်အား မရမ်းကုန်းမြို့မရဲစခန်းက (ပ)၃၃/၂ဝ၁၆၊ ပုဒ်မ-၂၈၅ ဖြင့် အမှုဖွင့်အရေးယူထားကြောင်း သိရသည်။

ရန်ကုန်တိုင်းဒေသကြီးအတွင်း၌ ယခု မီးလောင်မှု အပါအဝင် ဇန်နဝါရီ ၁ ရက်မှ ၁၁ ရက်အထိ မီးလောင်မှု (၁ဝ)ကြိမ်ဖြစ်ပွားခဲ့ကြောင်း ရန်ကုန်တိုင်းဒေသကြီး မီးသတ်ဦးစီးဌာနမှ သိရသည်။

သတင်း-ဇော်ကြီး(ပဏီတ)၊
ဓာတ်ပုံ-တင်မောင်ဦး(အလုံ)
The Mirror Daily
https://www.facebook.com/TheMirrorDaily


ပေကျင်း ၊ ၁၂-၁-၂၀၁၆

တရုတ် ရင်းနှီးမြှုပ်နှံသူ များသည် ပြီးခဲ့သည့် ရက်သတ္တပတ် အတွင်း မငြိမ်မသက် ဖြစ်နေသော ရှယ်ယာဈေးကွက် များကြောင့် ၄င်းတို့၏ ရှယ်ယာများကို ထုတ်ရောင်းနေစဉ် ယခုအခါ အာရှရှယ်ယာ ဈေးများမှာ ၂ဝ၁၆ ခုနှစ် ဇန်နဝါရီ ၁၁ ရက်တွင် ဆက်လက် ကျဆင်းလျက် ရှိကြောင်း သိရသည်။

တရုတ်အစိုးရသည် ပြီးခဲ့သည့် ရက်သတ္တပတ်တွင် အစုရှယ်ယာ ရောင်းဝယ်မှုကို နှစ်ကြိမ် ရပ်ဆိုင်းခဲ့သဖြင့် ကမ္ဘာ့ရှယ်ယာ ဈေးကွက်များမှာ ဆိုးဝါးသော ဆုံးရှုံးမှုများနှင့် ကြုံတွေ့ခဲ့ ရသည်။

တရုတ် အစိုးရသည် ဇန်နဝါရီ ၉ ရက်တွင် ရှယ်ယာဈေးကွက်ကို ရပ်ဆိုင်းခဲ့ ရသည့်အပြင် ရှန်ဟိုင်းရှယ်ယာ ဈေးနှုန်းမှာ ယခုရက် သတ္တပတ်အစတွင် ၂ ဒသမ ၅ ရာခိုင်နှုန်း ကျဆင်း သွားကြောင်း၊ ရှယ်ယာ ဈေးနှုန်းတက်မှု နှေးကွေးခြင်းကြောင့် ရင်းနှီးမြှုပ်နှံသူ များအနေဖြင့် အခက်ကြုံလျက် ရှိကြောင်း သိရသည်။

အလားတူ ရှယ်ယာဈေးနှုန်း များမှာ ဟောင်ကောင်တွင် ၂ ဒသမ ၄ ရာခိုင်နှုန်း၊ သြစတြေးလျ နိုင်ငံတွင် ၂ ရာခိုင်နှုန်း၊ တောင်ကိုရီးယား နိုင်ငံတွင် သုည ဒသမ ၇ ရာခိုင်နှုန်း အသီးသီးကျဆင်း ခဲ့ကြောင်း သိရသည်။

PyiChitThar
http://www.pyichitthar.com