01/18/16

ဖားကန့်မြို့နယ် လုံးခင်းကျေးရွာအုပ်စု ဆန်ခါကျေးရွာအနီးက မှော်ပုံ တောင်ကြောမှာ ကုမ္ပဏီတွေက သိုဝှက် ထားတဲ့ ကျောက်တူးဖော်ရေးလုပ်ငန်းမှာ အသုံးပြုတဲ့ စက်ယန္တရားများကိုတွေ့ရစဉ် Photo: Ko Tin Hlaing
ကချင်ပြည်နယ် ဖားကန့်ကျောက်စိမ်းတွင်းလုပ်ကွက်တွေမှာ အသုံးပြုနေတဲ့ စက်ယန္တရားတွေကို ပြည် ထောင်စုအစိုးရအဖွဲ့ အထူးကွင်းဆင်းစစ်ဆေးရေးအဖွဲ့က ဒီကနေ့ ဒုတိယနေ့အဖြစ်စစ်ဆေးနေရာမှာ လက်ရှိအချိန်အထိ အစီးရေ တစ်ထောင်ကျော်လောက်ကို မှတ်ပုံတင်နိုင်ခဲ့ပါတယ်။

ကုမ္ပဏီလုပ်ကွက်တွေထဲမှာ စစ်ဆေးနေတဲ့ ကွင်းဆင်းစုံစမ်းရေးအဖွဲ့နဲ့ တွေ့ဆုံခဲ့တဲ့ ဖားကန့်မြို့နယ် NLD ပါတီဥက္ကဋ္ဌ ဦးတင့်စိုးက ဒီကနေ့ စစ်ဆေးနေတဲ့ အခြေအနေနဲ့ ပတ်သက်ပြီး ပြောပါတယ်။

"ကုမ္ပဏီထဲမှာရပ်နားထားတာကိုတွေ့ရတယ်၊ မြေစာပုံမှာတော့ ထားထားတာ မတွေ့ရဘူး၊ မြေသယ်ယာဉ်ကအစအားလုံးထိုးရပ်ထားတာတွေ့ရတယ်၊ ယာဉ်အကြီးအသေးကအစ တစုတဝေးတည်းရပ်နားထားတာကိုတွေ့ရတယ်၊ အားလုံးလူကြီးတွေအကုန်လုံးလိုက်စစ်သွားတယ်၊ သက်ဆိုင်ရာ ယာဉ်ယန္တရားတွေကို ကုမ္ပဏီလိုက်နံပါတ်တွေကို ရေးထားတာတွေ့ရတယ်၊ လုံးခင်းအုပ်စုမှာတော့ အသေးစိတ်တော့မသိရသေးပါဘူး၊ နောက်တော့သိရမယ် လို့တော့ပြောပါတယ်"

လုံးခင်းကျေးရွာအုပ်စုထဲက ကထန်မှော်၊ ကုဋေမှော် ပတ်ဝန်းကျင်တစ်ဝိုက်က ဖိုးသာထူး၊ ရှယ်ဖယ်မလီ စတဲ့ ကုမ္ပဏီတွေထဲက စက်ယန္တရားတွေကို ဒီနေ့ စစ်ဆေးနေတာဖြစ်ပါတယ်။

လုံးခင်းပတ်ဝန်းကျင်တစ်ဝိုက်မှာရှိတဲ့ မှော်လုပ်ကွက်တွေထဲက ကုမ္ပဏီ တစ်ခုချင်းစီကို ဇန်နဝါရီလ ၁၆ ရက်နေ့ ကနေ ၁၈ ရက်နေ့အထိ သုံး ရက်ကြာစစ်ဆေး ပြီးရင် ဆိပ်မူ၊ နမ့်မှော်၊ ဝှေခါ စတဲ့မှော်တွေ ဘက် မှာလည်း ဆက်လက်စစ်ဆေးမှာဖြစ်ပါတယ်။

ဒီကနေ့ စစ်ဆေးနေတဲ့ အခြေအနေတွေကို အသေးစိတ်သိရှိနိုင်ဖို့ စစ်ဆေးရေးအဖွဲ့နဲ့အတူ လိုက်ပါနေတဲ့ ဖားကန့်မြို့နယ် အုပ်ချုပ်ရေးမှူးကို RFA က ဆက်သွယ် ခဲ့ပေမယ့် ဖုန်းလိုင်းအခက်အခဲကြောင့် မေးမြန်းလို့မရခဲ့ပါဘူး။

စစ်ဆေးရေးအဖွဲ့ထဲမှာ စီးပွားကူးသန်းဝန်ကြီးဌာန၊ သတ္တုတွင်းဝန်ကြီးဌာန၊ ကုန်းလမ်းပို့ဆောင်ရေး ညွှန်ကြားမှုဦးစီးဋ္ဌာန၊ အကောက်ခွန်စတဲ့ ဋ္ဌာနတွေက အဆင့်မြင့်အရာရှိ အယောက် ၂၀ ကျော်တို့ ပါဝင်ကြပါတယ်။

ဖားကန့်မြို့နယ်အုပ်ချုပ်ရေးအဖွဲ့ရဲ့စာရင်းတွေအရ အခုနှစ်ရာသီအတွက် တင်သွင်းခွင့်ပြုထားတဲ့ ယာဉ်စက်ယန္တရားအရေအတွက်ဟာ ၁၀၉၉ စီးရှိပြီး လက်ရှိမှာ ဖားကန့်မြို့နယ်အတွင်း အစီးရေ ခုနှစ်ရာ ကျော် ရောက်ရှိပြီး ဖြစ်ပါတယ်။

အဲဒီဖားကန့်မြို့နယ် စက်ယန္တရားတွေ ဟာ Jadeland မြန်မာ၊ ခိုင်မြန်မာ၊ မြောက်ပိုင်း တော်ဝင်၊ ဧရာ ရတနာ စတဲ့ ကုမ္ပဏီ ၁၃ ခုတို့ရဲ့ တူးဖော်ရေး ယန္တရားတွေ ဖြစ်တယ်လို့ သိရပါတယ်။

စစ်ဆေးရေးအဖွဲ့က လိုက်လံပြီိးစစ်ဆေးနေချိန်မှာ ကုမ္ပဏီတချို့က သူတို့ရဲ့ စက်ယန္တရားတွေကို နေရာရွေ့ပြောင်းနေတာတွေရှိသလို နီးစပ်ရာ တောတောင်တွေ ကြားမှာ ဖွက်နေတာမျိုးတွေလဲ ရှိတယ်လို့ ဒေသခံတချို့က ပြောပါတယ်။

RFA Burmese
http://www.rfa.org/burmese

ရန်ကုန်တိုင်းဒေသကြီး မင်္ဂလာဒုံမြို့နယ် ပျဉ်းမပင်ကျေးရွာတွင်ဖယ်ရှားခိုင်းတဲ့ မြေနေရာတွေပေါ်မှာ ဒေသခံတွေကသီးနှံတွေကို စိုက်ပျိုးလုပ်ကိုင်နေစဉ် Photo:Aung Thainkha/RFA
ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ ပျဉ်းမပင်ကျေးရွာအုပ်စုမှာရှိတဲ့ မြေဧက ၅၀၀ ကျော်ဟာ မြန်မာ့စီပွားရေးဦးပိုင်လီမီတက်က ပိုင်တဲ့မြေတွေဖြစ်တယ် ဆိုပြီး ဇန်န၀ါရီလ ၁၇ ရက် ဒီကနေ့နောက်ဆုံးထား ဖယ်ရှားပေးဖို့ မြို့နယ်အုပ်ချုပ်ရေးမှုးက အမိန့်ထုတ်ထားတယ်လို့ ဒေသခံတွေက ပြောပါတယ်။

အခုလို အမိန့်ထုတ် ဖယ်ရှားခိုင်းတဲ့အပေါ် ကျေးရွာဒေသခံတွေက လက်မခံဘဲ ဥပဒေကြောင်းအရ တရားရင်ဆိုင်သွားမယ်လို့  ဒေသခံ တစ်ဦးဖြစ်တဲ့ ကိုရွှေသီးက ပြောပါတယ်။

"ကျနော်တို့ကလဲ ဥပဒေကြောင်းအရကန့်ကွက်စာကိုပြန်တင်ထားပါတယ်၊ ဥပဒေလမ်းကြောင်းတိုင်းပဲ ကျနော်တို့ကဆက်ပြီးတော့လှုပ်ရှား သွားမှာပါ၊ ဇွတ်လုပ်လာရင်လည်း ကျနော်တို့ကလဲဇွတ်တိုးမှာပဲ၊ ဖယ်ပေးဖို့တော့ရည်ရွယ်ချက်မရှိဘူး၊ ဘာလို့လဲဆိုတော့ ကျနော်တို့နေလာတာ နှစ် ၂ဝ ဆိုတော့ ကျနော်တို့မှာကိုယ်ပိုင်လုပ်စားပိုင်ခွင့်ကိုရသင့်တယ်"

အဲ့ဒီ ဖယ်ရှားခိုင်းတဲ့ မြေနေရာတွေပေါ်မှာ မြဲမြန်အောင် စိုက်ခင်းဆိုတဲ့ နာမည်နဲ့ ဒေသခံတွေက သီးနှံတွေကို စိုက်ပျိုးလုပ်ကိုင်နေတာလည်း ဖြစ်ပါတယ်။

အဲ့ဒီမြေဧကတွေဟာ အရင်က ဦးချန်ခိန်ပိုင် ဆိုသူ  တရုတ်-မြန်မာ ကပြား တစ်ဦးပိုင်တဲ့ ရာဘာတောကြီးဖြစ်ပြီး၊ ၁၉၉၀ ခုနှစ် မှာ စစ်အစိုးရက သိမ်းဆည်း ခဲ့တာဖြစ်ကြောင်း၊ နောက်ပိုင်းမှာ အဲ့ဒီမြေနေရာကို ခုတ်ထွင်ရှင်းလင်းပြီး လယ်ယာလုပ်ငန်းလုပ်ကိုင်ဖို့ အခြေချ နေထိုင် လာခဲ့တာ နှစ် ၂၀ ကျော် ရှိပြီ ဖြစ်ကြောင်း ဒေသခံတွေက ပြောပါတယ်။

အခုလို အမိန့်ထုတ်ဖယ်ရှားခိုင်းတာဟာ ဒုတိယအကြိမ်ဖြစ်ပြီး၊ ၂၀၁၅ ခုနှစ်တုန်းကလည်း ဖယ်ရှားပေးဖို့ သက် ဆိုင်ရာက ညွန်ကြားချက်ထုတ်ဖူးတယ်လို့ လဲ ဆိုပါတယ်။

မင်္ဂလာဒုံမြို့နယ်၊ ပျဉ်းမပင်ကျေးရွာအုပ်စုအနီးတ၀ိုက်မှာ တိုက်ဂါးဘီယာစက်ရုံအပါအ၀င် စက်ရုံအတော်တော် များများရှိပြီး အဲဒီစက်ရုံမြေနေရာတွေ ကို မြန်မာ့စီပွားရေးဦးပိုင်လီမီတက်က နှစ်ချုပ်နဲ့ ငှားရမ်းလုပ်ပိုင်ခွင့် ပေးထားတယ်လို့လည်း ဒေသခံတွေက ပြောပါတယ်။

RFA Burmese
http://www.rfa.org/burmese

နယ်ဒေသ အချို့မှာ ကလေးသူခိုး တွေ ရောက်နေတယ်ဆိုတဲ့ တိုင်းတန်းမှုတွေ ရှိခဲ့
မြန်မာပြည်က နေရာရာ အနှံ့မှာ ကလေး သူခိုး တွေ သောင်းကျန်း တယ်ဆိုတဲ့ ကောလာဟလကို အခြေခံပြီး ထင်ယောင်ထင်မှားဖြစ်သူတွေကို ဝိုင်းရိုက်တဲ့ ဖြစ်စဉ်တွေ ပေါ်ပေါက်နေပါတယ်။

မကွေးမြို့မှာ ကလေးခိုးတယ်ဆိုပြီး စွပ်စွဲခံရလို့ အမျိုးသမီး တစ်ဦး ဝိုင်းရိုက် ခံရသလို မန္တလေး မရမ်းခြံသင်္ဘောဆိပ်မှာ အမျိုးသားတစ် ဦးကို ဝိုင်းရိုက်လို့ အသက်ဆုံးတဲ့ ထိဖြစ်ခဲ့ပါတယ်။

ကလေးခိုးတဲ့အမှုတွေ တကယ်ရှိနေလားလို့ လူကုန်ကူးမှုတားဆီးနှိမ်နှင်းရေး အဖွဲ့က ရဲမှူးကြီး ခင်မောင်လှ ကို ဆက်သွယ်မေးမြန်းကြည့်တော့ ၂၀၁၅ ခုနှစ်မှာ ဆိုရင် မလေးရှား နိုင်ငံမှာ တောင်းရမ်းခိုင်းဖို့ ခေါ်သွားတဲ့ ကလေး ၃ ယောက် အမှု ရှိခဲ့တယ်လို့ ပြောပါတယ်။

၂၀၁၆ ခုနှစ်မှာတော့ ပြည်တွင်း လူကုန် ကူးမှု အဖြစ် အသက် ၁၃ နှစ် အရွယ် အမျိုး သမီးငယ် တစ်ယောက်ကို ပြည့်တန်ဆာ လုပ်ငန်း မှာ ခိုင်းစားဖို့ ခေါ်ဆောင်လာတဲ့ အမျိုးသမီး တစ်ဦးကို အရေးယူခဲ့တာတွေ ရှိတယ်လို့ ပြောပါတယ်။

မန္တလေးတိုင်း၊ မကွေးတိုင်း၊ ဧရာဝတီ တိုင်းနဲ့ နယ်ဒေသ အချို့မှာ ကလေးသူခိုး တွေ ရောက်နေတယ်ဆိုတဲ့ တိုင်းတန်းမှုတွေ ရှိခဲ့ပြီး စုံစမ်း ဖော်ထုတ် တဲ့ အခါမှာ တကယ့် ကလေးခိုးတဲ့ အဖြစ်မှန် မရှိဘူးလို့ ဆက်ပြောပါတယ်။

ကလေးသူငယ်တွေကို ခိုးယူနေတယ်လို့ သံသယ ရှိခဲ့မယ် ဆိုရင် သက်ဆိုင်ရာ အဖွဲ့အစည်းတွေကို လူထု အနေနဲ့ အကြောင်းကြားဖို့ နဲ့ လူမှုကွန်ယက်တွေ ပေါ်မှာ ပျံနှံ့နေတာ ဟာ မမှန် သတင်းတွေသာ ဖြစ်တယ်လို့လည်း ပြောပါတယ်။

ကလေး ခိုးယူ သူ တွေ ရှိနေတယ်လို့ ဖုန်းဆက် တိုင်ကြား ခဲ့တဲ့ အမှုတွေကိုလည်း အချိန်နဲ့ တပြေးညီ စုံစမ်းဖော်ထုတ် အရေးယူဖို့ ဆောင်ရွက် နေတယ်လို့ ရဲမှူးကြီးက ဆက်ပြောပါတယ်။

BBC Burmese
http://www.bbc.com/burmese

ဂျကာတာမြို့တော် အကြမ်းဖက်တိုက်ခိုက်မှုဖြစ်ခဲ့သည့်နေရာ 
အင်ဒိုနီးရှားနိုင်ငံ ဂျကာတာမြို့တော်မှာ အရင်အပတ်ကဖြစ်ခဲ့တဲ့ အကြမ်းဖက်တိုက်ခိုက်မှုကြောင့် တတိယမြောက် ဒဏ်ရာ ပြင်းပြင်းထန်ထန်ရထားသူဟာ ဒီနေ့ တနင်္ဂနွေနေ့မှာ သေဆုံးသွားပါတယ်။

သေဆုံးသူ အသက် ၃၇ နှစ်အရွယ် ဘဏ်ဝန်ထမ်း Rais Karna ဟာ ဂျကာတာမြို့ထဲမှာ လက်ပစ်ဗုံးနဲ့ သေနတ်တွေသုံးပြီး တိုက်ခိုက်ခဲ့တဲ့ IS စစ်သွေးကြွတွေရဲ့ အကြမ်းဖက်မှုအတွင်း သေနတ် ထိမှန်ခံခဲ့ရသူ ဖြစ်တယ်လို့ ဂျကာတာ ရဲတပ်ဖွဲ့ ပြောခွင့်ရသူ Mohammad Iqbal က အတည်ပြု ပြောဆိုပါတယ်။

တ်ိုက်ခိုက်မှုလုပ်ခဲ့တဲ့ ISစစ်သွေးကြွအဖွဲ့ဝင် ၅ ယောက်စလုံး လည်းသေဆုံးခဲ့ပါတယ်။ အဲဒီ ၅ ယောက်ထဲက ၁ ယောက်ဟာ အမေရိကန်သမ္မတ အိုဘားမား အင်ဒိုနီးရှားနိုင်ငံကို အလည်အပတ်ခရီးလာတုန်းက ဖောက်ခွဲရေးပစ္စည်းတွေ လက်ဝယ်တွေ့ရှိမှုနဲ့ အဖမ်းခံခဲ့ရဖူးသူလည်းဖြစ်ပါတယ်။

ဂျကာတာ ဗုံးခွဲ တိုက်ခိုက်မှုနဲ့ ဆက်နွယ်တဲ့ လူ ၁၂ ယောက်ကို စနေနေ့ကလုပ်တဲ့ တနိုင်ငံလုံး ရှာဖွေစစ်ဆေးမှု တွေအတွင်း ဖမ်းဆီးနိုင်ခဲ့တယ်လို့ အမျိုးသား ရဲတပ်ဖွဲ့ ရဲချုပ် Badrodin Haiti က ပြောဆိုပါတယ်။

ဒီအကြမ်းဖက်အုပ်စုဟာ တိုက်ခိုက်မှုအတွက် တာဝန်ရှိတယ်လို့ ထုတ်ဖော်ပြောဆိုတဲ့ IS အဖွဲ့ရဲ့ အတိအကျ ထုတ်ဖော်လို့ မရသေးတဲ့ ထောက်ပံ့ရေး ရင်းမြစ်တခုကနေ ငွေကြေးအထောက်အပံ့ ရနေတယ်လို့ ရဲချုပ်က ပြောဆိုပါတယ်။ ကမ္ဘာပေါ်မှာ မူစလင်လူဦးရေ အများဆုံးနိုင်ငံထဲမှာ တခုဖြစ်တဲ့ အင်ဒိုနီးရှားနိုင်ငံမှာ ၂၀၀၉ ခုနှစ်တုန်းက လူ ၇ ယောက် အသက်ဆုံးခဲ့တဲ့ ဟော်တယ်နှစ်လုံးကို ဆက်တိုက်လို ဗုံးဖောက်ခွဲ တိုက်ခိုက်ခဲ့ တဲ့ဖြစ်ရပ်ပြီးရင် ဒီတိုက်ခိုက်မှုက အဆိုးဆုံးဖြစ်ပါတယ်။

ဒီတိုက်ခိုက်မှုအပြီး ဒေသထဲက တခြားနိုင်ငံတွေလည်း လုံခြုံရေးတိုးမြှင့်မှုတွေ လုပ်ခဲ့ကြပါတယ်။ အိမ်နီးချင်း မလေးရှားနိုင်ငံမှာ အသေခံအကြမ်းဖက်တိုက်ခိုက်မှုလုပ်မယ်လို့ ၀န်ခံခဲ့တဲ့ IS အဖွဲ့ဝင်အဖြစ် သံသယရှိသူ တယောက်ကို စနေနေ့က ဖမ်းဆီးခဲ့ပါတယ်။

သူ့ကို ကွာလာလမ်ပူမြို့တော်က ရထားဘူတာရုံတခုမှာ ဖမ်းမိခဲ့တာဖြစ်ပါတယ်။ သံသယဖြစ်ခံရသူဟာ IS အဖွဲ့အလံတွေနဲ့အတူ လက်နက်တွေ လက်ဝယ်ရှိနေတယ်ဆိုတဲ့ အချက်ကလွဲလို့ တိုက်ခိုက်ရေးအစီအစဉ် အတွက် တခြားအသေးစိတ်အချက်တွေကိုတော့ တာဝန်ရှိသူတွေက ခုထက်ထိ ထုတ်ဖော်ပြောဆိုမှု မရှိသေးပါဘူး။

ဗွီအိုအေ (မြန်မာပိုင်း)
http://burmese.voanews.com

တိုင်ဝမ်ကျွန်းရဲ့ ပထမဆုံး အမျိုးသမီး သမ္မတ ဖြစ်လာတဲ့ Tsai Ing-wen
တိုင်ဝမ်ကျွန်းရဲ့ ပထမဆုံး အမျိုးသမီး သမ္မတအဖြစ် Tsai Ing-wen ကို တိုင်ဝမ် မဲဆန္ဒရှင်တွေက ရွေးကောက် တင်မြှောက်ထားပါတယ်။

လွန်ခဲ့တဲ့ ၈ နှစ် နိုင်ငံအာဏာရယူခဲ့ချိန်ကစလို့ တရုတ်နဲ့ဆက်ဆံရေး တိုးတက်ဖို့ကိုပဲ အထူးတလည် အာရုံစိုက် ခဲ့တဲ့ Nationalist Party (KMT) ကို အနိုင်ရခဲ့တာလည်း ဖြစ်ပါတယ်။ တိုင်ဝမ် လွတ်လပ်ရေးကို ဇောင်းပေးတဲ့ Tsai Ing-wen ရဲ့ Democratic Progressive Party (DPP) က ပထမဆုံးအကြိမ်အဖြစ်နဲ့ အမတ်နေရာ အများ စု အနိုင်ရခဲ့ပြီး ဒါဟာဆိုရင် တရုတ်နဲ့ စီးပွားရေးအရရော တခြား မူဝါဒပိုင်းဆိုင်ရာမှာပါ သက်ရောက်မှု ကြီးကြီးမားမား ရှိလာမယ့် ဖြစ်ထွန်းမှုတခုလည်း ဖြစ်ပါတယ်။

ရွေးကောက်ပွဲရလာဒ်ကို ကြေညာအပြီး အချိန်တိုအတွင်းမှာဘဲ တိုင်ဝမ်ရဲ့ လွတ်လပ်ရေးဆောင်ရွက်မှု အားလုံး ကို ဆက်ပြီး ဆန့်ကျင် ကန့်ကွက်သွားမယ်လို့ တရုတ်နိုင်ငံရဲ့ တိုင်ဝမ်ရေးရာဌာနက ပြောဆိုလိုက်ပါတယ်။ တရုတ်ရဲ့ နယ်မြေပိုင်ဆိုင်မှုကို ကျောက်တုံး ကျောက်ဆိုင်လို ခိုင်ခိုင်မာမာ ကာကွယ်ဖို့အတွက် တရုတ် အစိုးရဘက်က ဆုံးဖြတ်ထားတယ်လို့ တရုတ်နိုင်ငံပိုင် Xinhua သတင်းအေဂျင်စီကလည်း ဖော်ပြပါတယ်။

ဗွီအိုအေ (မြန်မာပိုင်း)
http://burmese.voanews.com

အီးပီအေ

နေအိမ်အကျယ်ချုပ်ဖြင့် နှစ်များစွာ အထားခံခဲ့ရသည့် ဒေါ်အောင်ဆန်းစုကြည်က လူငယ်များ ကွန်ပြူတာဂိမ်းများနှင့် လူမှုအင်တာနက်ပေါ်တွင် အချိန်ဖြုန်း ကုန်လွန်နေခြင်းအပေါ် ညည်းညူပြောဆိုကြောင်း The Straits Times သတင်းတွင် ဇန်နဝါရီ ၁၇ ရက်က ဖော်ပြထားသည်။

ပြီးခဲ့သည့်နှစ် သမိုင်းဝင် နိုဝင်ဘာရွေးကောက်ပွဲတွင် အနိုင်ရရှိထားပြီး အာဏာလက်လွှဲရယူတော့မည့် ဝါရင့်အတိုက်အခံ နိုင်ငံရေးသမားတစ်ဦးလည်းဖြစ်သော ဒေါ်အောင်ဆန်းစုကြည်က ယင်းမှတ်ချက်စကားကို ရန်ကုန်မြို့တွင် ကျင်းပသည့် စာပေပွဲတော်သို့ သဝဏ်လွှာပါးရာတွင် ယခုကဲ့သို့ မှတ်ချက်ပြုထားခြင်းဖြစ်သည်။

"နည်းပညာတိုးတက်မှုတွေနဲ့အတူ ကျွန်မတို့ရဲ့ လူမှုဘဝများက ယနေ့ခေတ်မှာ ပြောင်းလဲရလာပါပြီ။"ဟု နိုဘယ်မြန်မာစာပေပွဲတော်သို့ ပေးပို့သည့် ဒေါ်အောင်ဆန်းစုကြည်၏ အမှာစကားကို ဇန်နဝါရီ ၁၆ ရက်က အွန်လိုင်းတင်ထားခြင်းဖြစ်သည်။

"ယနေ့ခေတ် ကျွန်မတို့ရဲ့ သားသမီးများက သူတို့ရဲ့ အချိန်တွေကို ကွန်ပြူတာဂိမ်းများ၊ အင်တာနက်ဂိမ်းများနှင့် လူမှုမီဒီယာများပေါ်မှာ အချိန်များစွာ ပေး ကုန်ဆုံးနေကြပါတယ်။ နည်းပညာဖက် ပိုအသုံးပြုလာကြခြင်းကြောင့် ကလေးများက စာဖတ်အားနည်းလာကြရပြီ ဖြစ်ပါတယ်။"ဟု ဒေါ်အောင်ဆန်းစုကြည်က ရေးသားထားသည်။

ရက်စက်သည့် အကျင့်ပျက်စစ်အုပ်ချုပ်ရေး ဆယ်စုနှစ်များစွာတွင် သံမဏိအတိုက်အခံသမားအဖြစ် နှစ်ပေါင်းများစွာ ရပ်တည်ခဲ့ခြင်းကြောင့် ဒေါ်အောင်ဆန်းစုကြည်အား မြန်မာပြည်သူများက လေးစားကြည်ညိုကြသည်။

ဒေါ်အောင်ဆန်းစုကြည်၏ အင်န်အယ်လ်ဒီပါတီသည် စစ်တပ်ကျောထောက်နောက်ခံပြု အာဏာရပါတီကို ရွေးကောက်ပွဲ၌ အနိုင်ရခဲ့ပြီး အစိုးရသစ် မကြာမီ ဖွဲ့ရတော့မည်ဖြစ်သော်လည်း စစ်အုပ်ချုပ်ရေးကာလက ရေးဆွဲခဲ့သည့် ဖွဲ့စည်းပုံအရ စစ်တပ်က အာဏာကို ကိုင်စွဲထားဆဲပင် ရှိနေဦးမည်ဖြစ်သည်။

အင်န်အယ်လ်ဒီ၏ ရွေးကောက်ပွဲအောင်နိုင်မှုသည် အသက် ၂၇ နှစ်အောက် လူငယ်အရေအတွက် လူဦးရေ၏ ထက်ဝက်ကျော်ရှိနေသည့် နိုင်ငံတွင် လူငယ်ထုအပေါ် လွှမ်းမိုးနိုင်မှုအရလည်း ပါဝင်သည်။

သို့သော် အသက် ၇၀ အရွယ် နိုင်ငံရေးသမားဖြစ်မလာမီ ပညာတတ်တစ်ဦးဖြစ်ခဲ့သည့် ဒေါ်အောင်ဆန်းစုကြည်က နည်းပညာကို ရှေ့တန်းတင် ပြောဆိုမှုမျိုး လုံးလုံး မရှိသလောက်ပဲဖြစ်သည်။

၂၀၁၀ ခုနှစ် အကျယ်ချုပ်က လွတ်ပြီး နိုင်ငံက အရပ်သားတစ်ပိုင်း ဒီမိုကရေစီသို့ နှေးကွေးစွာ အသွင်ကူးပြောင်းလာခြင်း မရှိသေးမီ နေအိမ်အကျယ်ချုပ် ကာလရှည်ကြာ ကျခံခဲ့ရသည့် ဆယ်စုနှစ် နှစ်ခုစာ အကောင်းဆုံးအချိန်များအဖြစ် ဒေါ်အောင်ဆန်းစုကြည်အတွက်က ဖုန်တက်စာအုပ်စင်နှင့် ရေဒီယိုတို့ကိုသာ အဖော်ပြု နေခဲ့ရခြင်းဖြစ်သည်။

နှစ်အနည်းငယ်အတွင်းမှ အင်တာနက်ကို အကန့်အသတ်ဖြင့် မြန်မာနိုင်ငံတွင် ချထား သုံးစွဲခွင့်ရလာခြင်းလည်း ဖြစ်သည်။

လက်ရှိ မြန်မာနိုင်ငံတွင် စမတ်ဖုန်းများကို တွင်တွင်ကျယ်ကျယ် အသုံးပြုနေကြပြီဖြစ်ပြီး လူမှုမီဒီယာအကောင့်များမှာ ဒေသတွင်း အိမ်နီးချင်းနိုင်ငံများနှင့် ရင်ဘောင်တန်း ရှိနေသည့် အနေအထားသို့ ရောက်လာခဲ့သည်။

ဒေါ်အောင်ဆန်းစုကြည်၏ ပေးစာတွင် ပညာရေးစံနှုန်းများကိုလည်း ဝေဖန်ပြောကြားထားသည်။ ပညာရေးဘဏ္ဍာငွေ နည်းပါးခြင်းအပြင် ဝေဖန်ပိုင်းခြားတတ်သည့် စနစ်ထက် အလွတ်ကျက်သင်ယူမှုကို ဦးစားပေးခြင်းများကို ထောက်ပြပြောဆို၍လည်း ထားသည်။

"ကျွန်မတို့ဆီက စာသင်ကျောင်းတွေမှာ စာကြည့်တိုက်တွေ အင်မတန်မှ နည်းပါးပါတယ်။ ကျွန်မတို့ရဲ့ ပညာရေးစနစ်က မေးခွန်းကျက် အလွတ်ဖြေစနစ်ဖြစ်နေပြီး ဝေဖန်တွေးခေါ်မှုနဲ့ ဖတ်ရှုမှတ်သားမှုကို အကန့်အသတ်ဖြစ်နေစေပါတယ်။"ဟုလည်း ဖြည့်စွက် ရေးသားထားသည်။

Ref: AFP
mizzimaburmese

 rakhine-refugees-620.jpg ရခိုင်ပြည်နယ်မှာ အစိုးရတပ်နဲ့ ရက္ခိုင့်တပ်မတော်တို့ရဲ့ တိုက်ပွဲတွေကြောင့် ထွက်ပြေးတိမ်းရှောင်နေရတဲ့ ဒေသခံ တချို့ကိုတွေ့ရစဉ်

ရခိုင်ပြည်နယ် မြောက်ဦးမြို့နယ် ကျီရာပြင်နဲ့ စေတီတောင်ကျေးရွာမှာ မှီခိုနေတဲ့ စစ်ဘေးဒုက္ခသည်တွေကို လာမယ့် ဇန်နဝါရီလ ၂၀ ရက်နေ့ နောက်ဆုံးထားပြီး နီးစပ်ဆွေမျိုးတွေအိမ်ကို ပြန်ကြဖို့ မြို့နယ်အုပ်ချုပ်ရေးမှူးက ညွှန်ကြားလိုက်တယ်လို့ သိရပါတယ်။

မြို့နယ်အုပ်ချုပ်ရေးမှူးနဲ့ တာဝန်ရှိသူအချို့က မနေ့က ဒုက္ခသည်တွေနဲ့တွေ့ဆုံပြီး ပြောခဲ့တာလို့ ဒုက္ခသည်အရေး ကူညီပေးနေတဲ့ စေတီတောင်ရွာခံ ကိုဦးဆန်းမောင်က ပြောပါတယ်။

"ဒီမှာဒုက္ခသည်တွေနေလို့မဖြစ်ဘူးလို့ ပြောတယ်လေ၊ ပြီးတော့ ဒုက္ခသည်တွေကတောင်းဆိုတယ်၊ အိမ်ပြန်ချင်တယ်၊ ဘယ်တော့ငြိမ်းချမ်းမှာလဲမေးတယ်၊ ကိုယ့်နေရာလဲပြန်လို့မရဘူး၊ ဒုက္ခသည်စခန်းမှာလဲမထားဘူးတဲ့၊ ရွာမှာရှိတဲ့ဆွေမျိုးတွေအိမ်မှာ တည်းခိုပြီးနေကြလို့ပြောတယ်"

မြောက်ဦးမြို့နယ် ကျီရာပြင်နဲ့ စေတီတောင်ကျေးရွာမှာ စစ်ဘေးဒုက္ခသည် ၂၀၀ ကျော်ရှိပြီး ပြီးခဲ့တဲ့လက ကျောက်တော်မြို့နယ်မှာ အစိုးရတပ်မတော်နဲ့ ရက္ခိုင့် တပ်မတော်တို့ဖြစ်ပွားခဲ့တဲ့ တိုက်ပွဲတွေကြောင့် ထွက်ပြေးတိမ်းရှောင်လာကြတာ ဖြစ်ပါတယ်။

အခုအချိန်မှာ တိုက်ပွဲဖြစ်ပွားတာမရှိတော့တာအပြင် လက်ရှိမှီခိုနေတဲ့ ဘုန်းတော်ကြီးကျောင်းတွေမှာ နေရာအခက်အခဲတွေကြောင့် နီးစပ်ရာ ဆွေမျိုးတွေဆီ ကိုသွားရောက်ကြဖို့ ပြောတာ ဖြစ်တယ်လို့လဲ ဒုက္ခသည်အရေးကူညီပေးနေသူတွေက ပြောပါတယ်။

ရခိုင်ပြည်နယ် ခေတ္တဝန်ကြီးချုပ် ဦးမြအောင်က ကျီရာပြင်စစ်ဘေးဒုက္ခသည်စခန်းကို ဒီနေ့ သွား ရောက်ပြီးတော့ သူတို့ရဲ့ မူရင်းဒေသတွေမှာ တရားဥပဒေစိုးမိုးမှု အားနည်းတာကြောင့် ဒုက္ခသည်တွေအတွက် ကျေးရွာသစ်တစ်ရွာထူထောင်ပေးမယ့် အကြောင်း ပြောဆိုခဲ့တယ်လို့ သိရပါတယ်။

RFA
http://www.rfa.org/burmese/news/war-refugees-leave-myauk-oo-refugee-camp-01172016091901.html

Author Name

Contact Form

Name

Email *

Message *

Powered by Blogger.