04/06/16

ဒီနေ့ပြည်သူ့လွှတ်တော်မှာ နိုင်ငံတော်အတိုင်ပင်ခံပုဂ္ဂိုလ် ဥပဒေကြမ်းနှင့်ပတ်သက်ပြီး သက်ဝင်လှုပ်ရှားမှုအပြည့်ဖြင့် ရင်ဖိုသည်းလှိုက်ဖွယ်ဆွေးနွေးသွားကြတယ်။ အဲဒီမှာ စစ်ဖက်-အရပ်ဖက် ဆက်ဆံရေးရဲ့အနာဖေးများဟာ ပွတ်တိုက်မှုများကြောင့် ဒါဏ်ရာအသစ်ပြန်ဖြစ်လာတာကို စိတ်မကောင်းဖွယ်တွေ့လိုက်ရတယ်။ အရင်အစိုးရလက်ထက်တုံးက တပ်ကလာတဲ့သမ္မတနှင့် တပ်ကလာသူအများစုပါတဲ့ ကက်ဘိနက်၊ တပ်ခေါင်းဆောင်ဟောင်းများ ဦးဆောင်တဲ့ အာဏာရပါတီကြီးစိုးသည့် လွှတ်တော်နှင့် တပ်မတော်သားကိုယ်စားလှယ်များဟာ အကိုကြီးညီလေးဆက်ဆံရေးနှင့် သူ့လူနှင့်သူ့ဘက်သားအချင်းချင်း ဖြစ်ခဲ့တော့ လွှတ်တော်တွင်း စစ်ဖက်-အရပ်ဖက် ပွတ်တိုက်မှုဟာ ၄၃၆ပြင်ဆင်ရေးအဆို ဆွေးနွေးသည်အထိ သိပ်တင်းတင်းမာမာမရှိခဲ့ပေ။ ယခုတော့နှစ်ပေါင်း ၅၀ကျော်အတွင်း ပထမဆုံးအကြိမ် အရပ်သားကြီးစိုးသည့် အစိုးရအဖွဲ့နှင့် လွှတ်တော်ဖြစ်လာသည့်အခါ စစ်တပ်၏ အရပ်ဖက်ပေါ်တင်းမာသည့် သဘောထားဟာ လယ်ပြင်မှာ ဆင်သွားသလို ထင်းထင်းကြီးပေါ်လာပါတော့တယ်။

ယနေ့စစ်တပ်ဖက်က ဆွေးနွေးကန့်ကွက်မှုများရဲ့ အများစုဟာ

၁) အခြေခံဥပဒေနဲ့ မညီညွတ်သဖြင့်ဟု အကြောင်းပြကာ စကားလုံးအသုံးအနှုံးများအား အခြေခံဥပဒေနှင့် ညီအောင်ပြင်ဆင်လိုပါသည်ဟု တင်ပြခြင်း

၂) ကပ်တီးကပ်ဖဲ့ စကားကပ်ပြီး ဥပဒေ၏အနှစ်သာရနှင့် တိုက်ရိုက်မသက်ဆိုင်သည့် စကားလုံးများကို ဖြုတ်ခိုင်းပြင်ခိုင်းခြင်း

၃) ဥပဒေမူကြမ်း ဖြစ်ပေါ်လာစေရန် အဓိက အခြေခံအချက်ဖြစ်သည့် အခြေခံဥပဒေ ပုဒ် ၂၁၇ပါပြဌာန်းချက်များအား လျစ်လျူရှုပြီး မိမိတို့အလိုရှိသည်များကိုသာ ငါ့စကားနွားရ ပြောဆိုခြင်း

၎) နိုင်ငံတော် အတိုင်ပင်ခံ၏ အခန်းကဏ္ဍအား နိုင်ငံတော်သမ္မတ အကြံပေးအဆင့်သို့ အတင်းဆွဲချကာ သေးသိမ်အောင်ကြိုးပမ်းခြင်း

၅) ဗိုလ်မှုးချုပ် တစ်ယောက်၊ ဗိုလ်မှုးကြီးနှစ်ယောက်ဖြင့် အချက်ပေါင်းများစွာကို ထပ်ခါတလဲလဲ ကန့်ကွက်ဆွေးနွေးသော်လည်း ယေဘုယျအားဖြင့် ဆွေးနွေးသည့်အကြောင်းအရာ အနှစ်သာရများမှာ အတူတူဖြစ်နေခြင်း

စတာတွေ တွေ့ရှိရတယ်။

အခြေခံဥပဒေနှင့် ညီညွတ်အောင် ပြင်ဆင်လိုသည်ဟု တပ်မတော်ကိုယ်စားလှယ်အားလုံးကဆိုသော်လည်း တစ်ဦးတစ်ယောက်ကမျှ အခြေခံဥပဒေပုဒ်မ ၂၁၇ပြဌာန်းချက်ပါပေးထားချက်များကို တို့ထိဆွေးနွေးခြင်းမရှိပဲ မဆိုင်သည့် အချက်အလက်များနှင့်သာထပ်ကာတလဲလဲ ကန့်ကွက်ဆွေးနွေးခဲ့ကြတယ်။ ဥပမာ အတိုင်ပင်ခံပုဂ္ဂိုလ်သည် နိုင်ငံတော်သမ္မတကို တာဝန်ခံရမည်ဟု ပြင်ဆင်လိုကြောင်းပြောကြသည်။ သို့သော် ပုဒ်မ ၂၁၇တွင် ပြည်ထောင်စုလွှတ်တော်က တာဝန်ပေးခန့်အပ်ပြီး လွှတ်တော်ကိုသာ တာဝန်ခံရမည်ဟု အတိအလင်းဖေါ်ပြထားသည်။ ထိုအချက်ကို မသိကျိုးကျင်ပြုပြီး ထပ်ခါတလဲလဲ ကန့်ကွက်ကြသည်။ ပြန်လည်ဆွေးနွေးသည့် ပြည်သူ့လွှတ်တော် ဥပဒေကြမ်းကော်မတီမှတာဝန်ရှိသူသည် တပ်မတော်သားကိုယ်စားလှယ်တို့ ကန့်ကွက်သည့်အချက်များအား တူညီသည့် အခြေခံဥပဒေပါ ပြဌာန်းချက်ကိုခဏခဏ ကိုးကားပြီးပြန်ဖြေရ၍ထင်သည် တိုတိုတုတ်တုတ်သာဖြေတော့သည်။

ဥပဒေ၏အနှစ်သာရအားတိုက်ရိုက်လွှမ်းမိုးသက်ရောက်မှုမရှိသည့် ဖက်ဒရယ်၊ တခဲနက်မဲပေး စသည့်စကားလုံးများကိုပင် ဖြုတ်ပယ်ခြင်းပြုလိုသည်။ လူထုမှတခဲနက် မဲပေးလိုက်သည့် ဆိုသည့်အစား တခဲနက်ကိုဖြုတ်ပေးပါဟုတောင်းဆိုသည်။ အကြောင်းမှာ NLDသည် မဲအရေအတွက် ၈၀%နီးပါးသာရ၍ဟု ကလေးကလားအကြောင်းပြသည်။ ဒါဟာ အာဏာကိုနှစ်ပေါင်းများစွာချုပ်ကိုင်လာသည့် စစ်တပ်မှကိုယ်စားလှယ်များသည် ပြည်သူလူထုမှတင်မြှောက်ထားသည့် အရပ်သားကိုယ်စားလှယ်များ၏ လွှမ်းမိုးမှုကို လက်မခံလိုသည့်တင်းမာသောသဘောထားကိုပြနေသည်။ အဆိုးဆုံးက အခြေခံဥပဒေနှင့်မညီဟု ထောက်ပြနေကြသည့် တပ်မတော်သားများသည် သူတို့ဆန္ဒနှင့်ဆန့်ကျင်လျှင် လွှတ်တော်လုပ်ထုံးလုပ်နည်းများကိုတောင် မလိုက်နာချင်ကြသူများဖြစ်သည်။ သူတို့ပြင်ချင်သည့်အတိုင်း ပြင်မပေးရင် မဲမပေးဟုအကြပ်ကိုင်သည်။ လွှတ်တော်ဥက္ကဌနှင့် ပြည်သူ့လွှတ်တော်ကို လေသံတင်းတင်းနှင့် ဆက်ဆံသည်။

လွှတ်တော်အပြီးတွင် ဗိုလ်မှုးချုပ်မောင်မောင်က " သူတို့ဟာ ဒီမိုကရေစီ အနိုင်ကျင့်ခံရတာပါ" မီဒီယာများသို့ပြောကြားခဲ့သည်။ ဒီမိုကရေစီ၏ သဘောတရားသည် အများစု၏ဆန္ဒကိုလိုက်လျောရခြင်းဖြစ်သည်။ လူနည်းစု၏ဆန္ဒကိုလည်း လေးစားရမည်ဆိုသော်လည်း လူနည်းစုသည် သူတို့လိုသလိုမလုပ်ရင်ကန့်လန့်တိုက်မည်ဟု လုပ်ခွင့်မရှိ။ လူများစုကတလေးတစား နားထောင်လာအောင်ပြုလုပ်ရမည်။ ပြည်သူ့လွှတ်တော်သည် စစ်တပ်မဟုတ်။ တိုက်ပွဲမြေပြင်မဟုတ်။ လွှတ်တော်လုပ်ထုံးလုပ်နည်း ဥပဒေများအတိုင်းလုပ်ဆောင်ရသည်။ ပြည်သူလူထု၏ ဆန္ဒ၊ လွှတ်တော်အတွင်းရှိ ရွေးကောက်ခံကိုယ်စားလှယ်အများစု၏ ဆန္ဒကိုလက်မခံချင်လျှင် ဘယ်သူကမှရွေးကောက်မထားသည့်တပ်မတော်ကိုယ်စားလှယ်များအားလုံး လွှတ်တော်အသီးသီးမှ ထွက်ခွာသွားကြဖို့ပဲရှိသည်။

အရေးအသား ‪#‎HaveASay‬

Have A Say - ဆိုရေးဆိုရာ

ဧပြီ ၅ ပြည်သူ့လွှတ်တော်အစည်းအဝေးသည် စစ်တပ်ကိုယ်စားလှယ်များ
၏ လူထုဆန္ဒနှင့်သွေဖီသောမယဉ်ကျေးသော အပြုအမူများကို မဲဆန္ဒရှင်ပြည်သူများအားတနိုင်ငံလုံးအတိုင်းအတာနဲ့ တိုက်ရိုက်ထုတ်ဖော် ပြသပွဲဖြစ်ခဲ့သည်။

တပ်မတော်သားကိုယ်စားလှယ်များသည်လူထုခေါင်းဆောင်
ဒေါ်အောင်ဆန်းစုကြည်က၎င်းတို့အပေါ်လွှမ်းမိုးချုပ်ကိုင်လာမည်ကို ကြောက်ရွံ့မှုများ ရှိနေကြောင်းကိုထင်ထင်ရှားရှား ပြသလိုက်ခြင်းလည်း ဖြစ်သည်။

နိုင်ငံတော်၏အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်းကို လွန်ခဲ့သည့် သီတင်းပတ်ကအမျိုးသားလွှတ်တော်တွင် စတင် တင်သွင်းကတည်းက စစ်တပ်ကိုယ်စားလှယ်များမှလက်မခံကြောင်းနှင့်
ကန့်ကွက်ကြောင်းကို အတိအလင်းပြဆိုခဲ့ပြီးဖြစ်သည်။

ဤတွင် လွှတ်တော်အကြောင်းကို ကောင်းစွာ သိရှိထားရန် လိုအပ်သည်။
လွှတ်တော်သည် စစ်တပ် မဟုတ်၊ လွှတ်တော်သည် အင်အားပြရာ မဟုတ်၊ လွှတ်တော်သည်ဥပဒေပြုရေးနှင့်အစိုးရကိုထိန်းကျောင်းရေးရာများကို
ဆွေးနွေးငြင်းခုံရာနေရာဖြစ်သည်။ မဲခွဲရန် လိုအပ်ပါက မဲခွဲပြီး အဆုံးအဖြတ်ပြုသည်။

မဲခွဲ၍ရှုံးသော် လူမိုက်ညာဉ်နှင့် ချမလားဟု စ်ိန်ခေါ်၍ မရသောနေရာမှာ
လွှတ်တော်ဖြစ်သည်။ လွှတ်တော်သည် ပြည်သူကို ကိုယ်စားပြုသော ပညာဥာဏ်ကြီးသောနှလုံးလှသူတို့၏ နေရာဖြစ်သည်။

မကြာမီကပင် လူထုတခဲနက်ထောက်ခံမှုဖြင့် တက်လာသော ``အင်န်အယ်လ်ဒီအစိုးရသစ်၏ပထမရက် ၁၀၀ အတွင်းမည်သည်တို့ကို ဆောင်ရွက်နိုင်မည်လဲ`` ခေါင်းစဉ်ဖြင့်
DVB ဒီဘိတ်တခုကို နေပြည်တော်တွင် ကျင်းပခဲ့သည်။

ဒီဘိတ်၌အရပ်ဖက်-စစ်ဖက်ဆက်ဆံရေးအကြောင်းကို အချေအတင်ပြောကြသည်။နိုင်ငံရေးဝေဖန်သုံးသပ်သူ ဒေါက်တာရန်မျိုးသိမ်းက လွှတ်တော်တွင်းပြောဆိုနေသော စစ်တပ်ကိုယ်စားလှယ်များ၏ စကားတို့သည်စစ်တပ်ကိုမည်၍မည်မျှကိုယ်စားပြုသနည်းဟု မေးခွန်းထုတ်သည်။ ၈၈ မျိုးဆက်ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦးမြအေးကလည်း ၎င်း၏အတွေ့အကြုံအရ အလွန်အမင်း ဆင်းရဲနုံချာသော စစ်တပ်မိသားစုများ၊ရဲတပ်ရင်းမိသားစုများ ရှိနေကြောင်းကို ထောက်ပြပြောဆိုသည်။

စစ်တပ်သည် အမှန်တော့ ပြည်သူများကြားမှ ပေါက်ဖွား၍ ပြည်သူကို
မျက်နှာမူဖို့ ကောင်းသည်။ ပြည်သူ့ဆန္ဒသည် စစ်တပ်၏ဆန္ဒဖြစ်ရန်လိုသည်။
ပြည်သူများ၏ လိုအင်မည်သို့ရှိစေ ဒို့ကိုဖိနှိပ်ချုပ်ကိုင်ရန်
ကြိုးပမ်းဆောင်ရွက်လိုပုံရသည့် မည်သည့်ကိစ္စရပ်များမဆို
ကန့်ကွက်ဆန့်ကျင်ပစ်ရမည်ဟု တရားသေဆုံးဖြတ်ချက်မျိုးဖြင့်
လုပ်ကိုင်ဆောင်ရွက်ခြင်းသည် အင်မတန်ကြောက်ဖို့ကောင်းသော မယဉ်ကျေးသောရူးမိုက်သော လုပ်ရပ်မျိုးဖြစ်သည်။

လွှတ်တော်နှစ်ရပ်လုံး၏ ဆုံးဖြတ်ချက်ဖြင့် အတည်ပြုလိုက်သော နိုင်ငံတော်၏
အတိုင်ပင်ခံပုဂ္ဂိုလ်ဆိုင်ရာ ဥပဒေ၏လာရာကို ပြန်ကြည့်သင့်သည်။
ပြည်သူလူထုလိုလားလက်ခံမှု မရှိဘဲနှင့် ပြည်သူ့ဆန္ဒကို ဆန့်ကျင်ပြီး
ယခုစစ်တပ်၏ အကြီးအမှူးဟောင်းများဖြစ်သော စစ်အာဏာရှင်တစုသည်
စိတ်တိုင်းကျအချိန်ယူ ရေးဆွဲပြီး အဓမ္မအနိုင်ကျင့် အတည်ပြုပြဋ္ဌာန်းခဲ့သော
၂၀၀၈ ဖွဲ့စည်းပုံအခြေခံဥပဒေပါ ပုဒ်မ ၅၉ (စ) သည် လူထုခေါင်းဆောင်
ဒေါ်အောင်ဆန်းစုကြည်ကို သမ္မတဖြစ်ခွင့် မပေးခဲ့ပါ။

ဒေါ်အောင်ဆန်းစုကြည်သည်ရွေးကောက်ပွဲကျင်းပလိုက်တိုင်း တခဲနက်နိုင်တတ်သည်ကို စစ်အာဏာရှင်များက
ကောင်းစွာသဘောပေါက်ထားပြီးဖြစ်သည်။ သို့တိုင် သူ့ကို
သမ္မတဖြစ်ခွင့်မရစေရန် ဆိုးယုတ်သောအကြံဖြင့် ပုဒ်မ ၅၉ (စ) ကို
ထည့်ထားခဲ့သည်။

မြန်မာ့လွတ်လပ်ရေးဗိသုကာ၊ အမျိုးသားခေါင်းဆောင်ကြီးနှင့် တပ်မတော်ဖခင်ဗိုလ်ချုပ်အောင်ဆန်း၏ သမီးဖြစ်သူ လူထုခေါင်းဆောင်နှင့် ၂၀၁၅အထွေထွေရွေးကောက်ပွဲတွင် တောင်ပြိုကမ်းပြို အနိုင်ရထားသည့်
အင်န်အယ်လ်ဒီပါတီ၏ ဥက္ကဋ္ဌ ဒေါ်အောင်ဆန်းစုကြသည် သမ္မတဖြစ်ခွင့်မရအောင်တားဆီးပိတ်ပင်ထားခြင်းခံရသဖြင့် သမ္မတနီးနီးအဆင့်ကြီးအောင် နိုင်ငံတော်၏
အတိုင်ပင်ခံပုဂ္ဂိုလ်ရာထူးတခုကို ဖန်တီးယူလိုက်ခြင်းဖြစ်သည်။

ထိုရာထူးယူနိုင်အောင်လည်း စစ်အာဏာရှင်များ စိတ်ကြိုက်ရေးထားသော ၂၀၀၈ဖွဲ့စည်းပုံအခြေခံဥပေဒပါ ပုဒ်မ ၂၁၇ က ခွင့်ပြုပေးထားသည်။ ယင်းမှာကိုယ့်လည်ပင်းကိုယ် ကြိုးကွင်းစွပ်တတ်ကြသည်။ မည်သူမပြု မိမိမှုပဲဖြစ်သည်။သူတော်ကောင်းနတ်ကောင်းမသည်ဟုလည်း ပြောဆို၍ရသည်။

အမှန်စင်စစ် စစ်အာဏာရှင်များသာမယုတ်ပတ်ထားပါက ရွေးကောက်ပွဲတွင်
တောင်ပြိုကမ်းပြိုအနိုင်ရထားသော အင်န်အယ်လ်ဒီပါတီ ဥက္ကဋ္ဌ
လူထုခေါင်းဆောင်သည် ကျိန်းသေပေါက် လူထုသမ္မတဖြစ်လာပေလိမ့်မည်။
ဒေါ်အောင်ဆန်းစုကြည်သည် ကျေနပ်ဖွယ်မရှိသော ပိတ်ဆို့မှုကို ဘာမှပြောမနေဘဲ
ဘောင်အတွင်းမှ အကောင်းဆုံးဆောင်ရွက်ပြခဲ့သည်။ လူထုခေါင်းဆောင်
ပြည်သူ့ကိုယ်စားလှယ် ဥာဏ်ပညာကြီးမားသူ နှလုံးလှသူဆိုသည်မှာ ထိုကဲ့သို့သောအရည်အချင်းမျိုးကို ခေါ်သည်။ စစ်အာဏာရှင်များက အသက်ပေးကာကွယ်ရန်
နှိုးဆော်ထားသော ၂၀၀၈ ဖွဲ့စည်းပုံအခြေခံဥပဒေဖြင့်ပင် ကစားပြခဲ့သည်။

တပ်မတော်သားကိုယ်စားလှယ်များ လွှတ်တော်တွင်း လာထိုင်နေသည်ကို
ပြည်သူလူထုမှာ လုံးဝမကြိုက်ပါ။ လွှတ်တော်ကို
ပြည်သူ့ကိုယ်စားလှယ်များဖြင့်သာ ဖွဲ့စည်းစေချင်သည်။ လွှတ်တော်သည်
စစ်အာဏာရှင်များ မြတ်နိုးချစ်ခင် ခေါင်းပေါ်တင်ထားသော်လည်း လူထုအတွက်မူစက္ကူစုတ်မျှသာ တန်ဖိုးရှိသော (၀ါ) မနှစ်မြို့ဖွယ် တရားမျှတမှုမရှိသောပြင်ဆင်ရန် အလျှင်အမြန် လိုအပ်သော အခြေခံဥပဒေပါ ဖွင့်ဆိုချက်အတိုင်းပြောရမည်ဆိုလျှင် နိုင်ငံတော်ဖြစ်သည်။

လွှတ်တော်သည် စစ်တပ် မဟုတ်ပါ၊
စစ်တပ်တွင်းမှာကဲ့သို့ ဟန်ပန်၊ မာန်ဋ္ဌာန်များဖြင့် ဆောင်ရွက်ခွင့်လည်း
မရှိပါ။ လွှတ်တော်နှင့် လွှတ်တော်ဥက္ကဋ္ဌကို မထီမဲ့မြင်ပြုမိမည်ဆိုလျှင်
လွှတ်တော်ဥပဒေ၊ နည်းဥပဒေများဖြင့် အရေးယူခံရနိုင်ဖွယ်ရှိသည်။

ဧပြီ ၅ ပြည်သူ့လွှတ်တော်အစည်းအဝေးတွင် တပ်မတော်သား ကိုယ်စားလှယ်များ၏တုံ့ပြန်ပြုမူပုံသည် လွှတ်တော်ကို အရုပ်ဆိုး အကျည်းတန်စေပြီးလွှတ်တော်ဥက္ကဋ္ဌကိုလည်း ကြီးစွာသော စိတ်အနှောင့်အယှက်ကို ဖြစ်စေကြောင်း
ရုပ်သံမှတဆင့် တိုက်ရိုက်ကြည့်နေသူ မဲဆန္ဒရှင်ပြည်သူတိုင်း သိသာမြင်သာသည်။

မဲဆန္ဒရှင်ပြည်သူများသည်၎င်းတို့ကိုယ်တိုင် ရွေးချယ်ထားသော ပြည်သူ့လွှတ်တော်ဥက္ကဋ္ဌနှင့် ပြည်သူ့လွှတ်တော်ကိုယ်စားလှယ်များကို သူတို့လည်း မရွေးကောက်၊သူတို့ဆန္ဒနှင့်လည်း အမြဲလိုလို ဆန့်ကျင်ဖက်ပြုပြီး ကဖျက်ယဖျက် လုပ်နေသည့်စစ်တပ်ကိုယ်စားလှယ်များက အနှောင့်အယှက်ပေးနေသည်ကို ပြုံးပြုံးကြီး
ထိုင်ကြည့်နိုင်ကြမည် မဟုတ်ပါ။

အနိမ့်ဆုံးမေတ္တာပို့သ၊မြည်တွန်တောက်တီးကြပြီး နောက်ပိုင်းတွင် ယင်းသို့ထပ်မံ ပြုလုပ်လာပါကလူထုနှင့် စစ်တပ်သည် ပို၍သာဝေးဖြစ်ပါလိမ့်မည်။

အရပ်ဖက်-စစ်ဖက်ဆက်ဆံရေးဆိုသည်မှာ စစ်တပ်ပြုသမျှကို အရပ်ဖက်က နုရမည်မဟုတ်ပါ။ ပြည်သူ့ဆန္ဒကို စစ်တပ်က လိုက်ရမည်သာဖြစ်ပါသည်။

စစ်တပ်သည် ပြည်သူကပေါက်ဖွားသည် မှန်လျှင် ပြည်သူကို မစော်ကားရပါ။ အထူးအားဖြင့်ပြည်သူ့ကိုယ်စားလှယ်များဖြင့် ဖွဲ့စည်းထားအပ်သော လွှတ်တော်များကိုမစော်ကားရပါ၊ မထီမဲ့မြင် မလုပ်ရပါ။ လွှတ်တော်၏ အကြီးအမှူးဖြစ်သောလွှတ်တော်ဥက္ကဋ္ဌကို သာ၍ပင် အရိုအသေပေးရပါသည်။

လွှတ်တော်၏မဲခွဲဆုံးဖြတ်ပြီးဖြစ်သော ကိစ္စရပ်များကို မကျေနပ်၍ဆိုကာ
ရမ်းကား၍ မရပါ၊ သို့ဆိုလျှင် လွှတ်တော် ဥပဒေ၊နည်းဥပဒေများဖြင့် အရေးယူခံရမည်ဖြစ်သကဲ့သို့ ပြည်သူလူထုတရပ်လုံး၏
ဒဏ်ခတ်ခြင်းကိုလည်း မလွဲမသွေခံရလိမ့်မည်။

မျိုးသာထက်
News Watch(စောင့်ကြည့်သတင်းဂျာနယ်)

 rakhine-parliament-620.jpg ရခိုင်ပြည်နယ် လွှတ်တော်အစည်းအဝေး ကျင်းပနေစဉ်
Photo: Min Thein Aung/RFA

ရခိုင်ပြည်နယ် အစိုးရအဖွဲ့မှာ ရခိုင်အမျိုးသားပါတီ ANP ကိုယ်စားလှယ်တစ်ဦး၊ NLD ကိုယ်စားလှယ် ၁ ဦး၊ ပညာရှင် ၃ ဦးနဲ့ ဖွဲ့စည်းမှာဖြစ်ကြောင်း ပြည်နယ် ဝန်ကြီးချုပ် ဦးညီပု က လွှတ်တော်ဥက္ကဌ ထံ တင်သွင်းထားကြောင်း ဒီနေ့ ကြေညာလိုက်ပါတယ်။

ပြည်နယ်လွှတ်တော် ဥက္ကဌ ဦးစံကျော်လှ က ၀န်ကြီးချုပ် တင်သွင်းထားတဲ့ ၀န်ကြီး အမည်စာရင်းကို လွှတ်တော်မှာ ကြေညာခဲ့ပါတယ်။

"ပြည်နယ်ဝန်ကြီးချုပ်က ပြည်နယ်ဝန်ကြီးများကို ခန့်အပ်တာဝန်ပေးနိုင်ရေးအတွက် ၂၀၁၆ ခုနှစ် ဧပြီလ ၄ ရက် ရက်စွဲပါစာဖြင့် အဆိုပြုတင်သွင်းလာပါတယ်၊ နံပါတ် ၁ ဦးကျော်လွင် စိုက်ပျိုးရေး မွေးမြူရေး သစ်တောနဲ့သတ္တုတွင်းဝန်ကြီး ရမ်းဗြဲမဲဆန္ဒနယ်မှ ဖြစ်ပါတယ်"

ANP အနေနဲ့ ပြည်နယ်အစိုးရကို ဦးဆောင်ဖွဲ့စည်းခွင့် မရရှိခဲ့တာကြောင့် ပြည်နယ် အစိုးရအဖွဲ့မှာ ပါဝင်မှာမဟုတ်ကြောင်း ထုတ်ပြန်ပြောဆိုထားပေမယ့် လာမယ့် အစိုးရအဖွဲ့မှာ ၁ ဦးပါဝင်လာတာဖြစ်ပါတယ်။

စိုက်ပျိုးရေး မွေးမြူရေး သစ်တောနဲ့သတ္တုတွင်းဝန်ကြီးအဖြစ် အဆိုပြုခံထားရတဲ့ ANP ပါတီ ပြည်နယ် လွှတ်တော်ကိုယ်စားလှယ် ဦးကျော်လွင်က လူမျိုးအကျိုး အတွက် ဆောင်ရွက်သွားမှာဖြစ်တယ်လို့ ပြောပါတယ်။

"လူထုက ကျနော်တို့ကိုစောင့်ကြည့်နေပါတယ်၊ ကျနော်တို့ လုပ်တာ၊ ကိုင်တာ၊ ကျနော်တို့ရဲ့စွမ်းအင်သတ္တိကိုလည်း သည်းခံပြီးတော့ လူကြီးတွေစောင့်ကြည့်ပေးပါ၊ ကျနော်တို့သည် လူမျိုးအကျိုးတွက်လုပ်မလား၊ ပါတီအကျိုးတွက်လုပ်မလား၊ နိုင်ငံအကျိုးတွက်လုပ်မလား၊ ကိုယ့်အတ္တတွက် လုပ်မလား၊ ဒါကိုလည်း ကျနော်တို့ကိုထောက်ပြပါ၊ အမြဲတမ်းသတ္တိရှိရှိနဲ့ ရင်ဆိုင်မှာဖြစ်ပါတယ်၊ ကျနော်ကတော့ ဒီလောကကိုဝင်တည်းက ကျနော်စီးပွားရေးနဲ့ အတ္တကိုဘေးဖယ်ပြီးတော့ လူမျိုးတွက်လုပ်မလို့ ဝင်လာတာဖြစ်တဲ့အတွက်ကြောင့် ကျနော့်ကိုပါတီက လူကြီးတွေကတော့ အမျိုးသားအကျိုးစီးပွားဘောင် အတွင်းက စဉ်းစားပေးမယ်လို့ ကျနော်မျှော်လင့်ပါတယ်"

အလားတူ ကချင်ပြည်နယ် အစိုးရအဖွဲ့မှာ ပြင်ပပညာရှင် ၁ဦး၊ အန်အယ်လ်ဒီ ကိုယ်စားလှယ် ၅ဦး နဲ့ ဖွဲ့စည်းမှာဖြစ်ကြောင်း ပြည်နယ်လွှတ်တော်မှာ တင်သွင်းတာ ကို ကန့်ကွက်သူမရှိ အတည်ပြုခဲ့ပါတယ်။

ဒါ့အပြင် ကယားပြည်နယ်လွှတ်တော်မှာ ကယန်းအမျိုးသားပါတီ ကိုယ်စားလှယ် ၁ဦး၊ NLD ကိုယ်စားလှယ် ၃ ဦး၊ ပညာရှင် ၁ ဦးကို ပြည်နယ်ဝန်ကြီးတွေအဖြစ် တာဝန်ပေးအပ်မယ့်အပေါ် အတည်ပြုခဲ့ပါတယ်။

ကရင်ပြည်နယ်အစိုးရအဖွဲ့ကို NLD ကိုယ်စားလှယ် ၂ ဦး၊ ကြံ့ခိုင်ဖံွ့ဖြိုးရေး ကိုယ်စားလှယ် ၂ ဦး၊ ပညာရှင် ၂ ဦး တို့နဲ့ ဖွဲ့စည်းမှာဖြစ်ကြောင်း တင်သွင်းခဲ့ပါတယ်။

RFA


snld-conference-april-5-620.jpg
SNLD ပါတီဗဟိုအလုပ်အမှုဆောင်အစည်းအဝေးကို ဧပြီလ ၅ ရက်နေ့က ရှမ်းပြည်မြောက်ပိုင်း ကျောက်မဲမြို့မှာ ကျင်းပနေစဉ်
Photo: Kan Thar/ RFA

ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ပါတီရဲ့ ၃ ရက်ကြာ ညီလာခံကနေ ဦးခွန်ထွန်းဦးကို ဥက္ကဌအဖြစ် နဲ့ ဦးစိုင်းညွန့်လွင်ကို အထွေထွေအတွင်းရေးမှူး အဖြစ် ပြန်လည်ရွေးချယ်လိုက်ပါတယ်။

ရှမ်းပြည်မြောက်ပိုင်း ကျောက်မဲမြို့ ကျားငါးကောင်တိုင်းရင်းဆေးတိုက်မှာ ဧပြီလ ၃ ရက်ကနေ ၅ ရက် နေ့ ဒီနေ့အထိ ပါတီဗဟိုအလုပ်အမှုဆောင်အစည်းအဝေး ကျင်းပခဲ့တဲ့အခမ်းအနားမှာ ရွေးချယ်လိုက်တာဖြစ်တယ်လို့ ပါတီရဲ့ တွဲဖက်အထွေထွေ အတွင်းရေးမှူး ၁ ဦးစိုင်းလိတ်က ပြောပါတယ်။

"ပါတီဥက္ကဌကနေစပြီးတော့မှ နောက်ဆုံးဗဟိုကော်မတီဝင်ထိပေါ့နော်၊ ပါတီဥက္ကဌ ကနေ ဗဟိုအလုပ် မှုဆောင်ထိဆိုရင် ၂၅ ယောက်ရှိပါတယ်၊ ဗဟိုကော်မတီ မှာက ၇၅ ပေါ့နော်၊ ၇၅ ယောက်ကနေမှ ဗဟိုအလုပ်အမှုဆောင်အဖွဲ့ ၂၅ ကိုပြန်ရွေးတာပါ၊ အဲ့မှာပြန်ရွေးတော့ ဥက္ကဌ ဦးခွန်ထွန်းဦး၊ ဒုဥက္ကဌ ၁ ကတော့ ဦးစိုင်းစောအောင်၊ ဒုဥက္ကဌ ၂ ကတော့ အရင်တောင်ကြီးဥက္ကဌ ဦးစိုင်းခမ်းဟုမ်ဖ ခေါ် ဦးစိုင်းခင်မောင်ညွန့်ပေါ့နော်၊ အထွေထွေအတွင်းရေးမှူးကတော့ အရင်လူ ပါပဲ ဦးစိုင်းညွန့်လွင်ပါ"

SNLD ပါတီရဲ့မူဝါဒပိုင်းဆိုင်ရာပြောင်းလဲမှုမရှိပဲ လက်ရှိစိုးရသစ်နဲ့လည်း လက်တွဲဆောင်ရွက်သွားမယ် လို့ ပြောပါတယ်။

ပါတီဥက္ကဌကနေ ဗဟိုအလုပ်အမှုဆောင်အဖွဲ့ ၂၅ ဦးရှိပြီး ဗဟိုကော်မတီဝင် ၇၅ ဦးရှိတယ်လို့ ပြောပါတယ်။

အဲဒီပါတီဗဟိုကော်မတီဝင် ၇၅ ဦးထဲကမှ ဗဟိုအလုပ်အမှုဆောင်ကော်မတီဝင်တွေကို ရွေးချယ်တာ ဖြစ်တယ် လို့ ပြောပါတယ်။
RFA

[youtube src="dODzcTfCNCs"/]
ဒီမိုကရေစီ အနိုင်ကျင့်ဟု တပ်မတော်သား ကိုယ်စားလှယ်ပြော

"အများစုနဲ့ ဒီမိုကရေစီအနိုင်ကျင့်တဲ့သဘောဖြစ်နေလို့ ကျွန်တော်တို့ တပ်မတော်သားများ အနေနဲ့ မဲမပေးဘူး။"
(ရိုက်ကူး- နေသာ)

နိုင်ငံတော်အတိုင်ပင်ခံပုဂ္ဂိုလ်ဆိုင်ရာဥပဒေကြမ်းနှင့် ပတ်သက်၍ မဲခွဲဆုံးဖြတ်မှုများတွင် မဲမပေးခဲ့ခြင်းမှာ ဒီမိုကရေစီအနိုင်ကျင့် မှုကြောင့် ဖြစ်သည်ဟု တပ်မတော်သားလွှတ်တော်ကိုယ်စားလှယ် ဗိုလ်မှူးချုပ်မောင်မောင် ယနေ့(ဧပြီ ၅ရက်)လွှတ်တော်အစည်းအဝေး အပြီးတွင် သတင်းထောက်များကို ပြောကြားခဲ့သည်ဟု သတင်းစာ မျက်နှာများတွင် ဖော်ပြခဲ့သည်။

ဒီမိုကရေစီသည် ပြည်သူ့ဆန္ဒနှင့်အညီအုပ်ချုပ်ရေးပင်ဖြစ်သည်။ ပြည်သူကိုကိုယ်စားပြုသော၊ ပြည်သူကိုမျက်နှာမူသောအုပ်ချုပ်ရေး သည် ဒီမိုကရေစီအုပ်ချုပ်ရေးပင်ဖြစ်သည်။ ဒီမိုကရေစီနည်းကျမဲခွဲ ဆုံးဖြတ်ရာတွင် အများစု၏အဆုံးအဖြတ်သည် အပြီးသတ်ပင်ဖြစ် သည်။ အများစုသည် အနည်းစု၏သဘောထားကို အသိအမှတ်ပြု မည်ဖြစ်ပြီး၊ အနည်းစုသည် အများစု၏အဆုံးအဖြတ်အတိုင်းလိုက် ပါဆောင်ရွက်ရမည်ဖြစ်သည်။ ထို့ကြောင့် ဒီမိုကရေစီအနိုင်ကျင့်မှု ဟုမှတ်ချက်ပြုသုံးနှုန်းခြင်းကို ပြင်းပြင်းထန်ထန် ကန့်ကွက်ပါသည်။ ရွေးကောက်ခံလွှတ်တော်ကိုယ်စားလှယ်များမဟုတ်သော တပ်မ တော်သားလွှတ်တော်ကိုယ်စားလှယ်များသည် ဒီမိုကရေစီနည်းကျ လွှတ်တော်ထဲရောက်လာသူများမဟုတ်သည်ကို သတိချပ်သင့် သည်။

မဲဆန္ဒရှင်ပြည်သူလူထုက မဲပေးရွေးချယ်ခဲ့ခြင်းမရှိသူများ က လွှတ်တော်များတွင် ၀င်ထိုင်နေခြင်းကသာ အကယ်စင်စစ် ဒီမိုကရေစီအနိုင်ကျင့်မှုပင်ဖြစ်သည်။ ၂၀၀၈ ခုနှစ်တွင် ဖွဲ့စည်းပုံအခြေခံဥပဒေကို ပြည်လုံးကျွတ်ဆန္ဒ ခံယူပွဲကျင်းပပြီး၊ အတည်ပြုခဲ့ခြင်းသည်သာ ဒီမိုကရေစီအနိုင်ကျင့် မှုဖြစ်သည်။ တပ်မတော်အစိုးရလက်ထက်၊ နိုင်ငံသားအခွင့်အရေး များပိတ်ပင်ခံထားရပြီး၊ သတင်းမီဒီယာများလွတ်လပ်မှုမရှိ၊ လွတ် လပ်သောစောင့်ကြည့်လေ့လာမှုမရှိသည့်အခြေအနေတွင် ပြည် လုံးကျွတ်ဆန္ဒခံယူပွဲကျင်းပကာ ပြည်သူလူထုအများစုကြီးလုံးလုံး မသိသည့် ဖွဲ့စည်းပုံအခြေခံဥပဒေတစ်ခုကို အတည်ပြုခဲ့ခြင်းက မြန်မာ့သမိုင်းတွင် ကြီးမားသော ဒီမိုကရေစီအနိုင်ကျင့်မှုကြီးဖြစ် ပါကြောင်း သုံးသပ်တင်ပြအပ်ပါသည်။

လေးစားလျက်- ဒေါက်တာရန်မျိုးသိမ်း

ပြည်သူလူထုက ရွှေးချယ်တင်မြောက် ထားခြင်းမရှိတဲ့
တပ်မတော်သားလွှတ်တော် ကိုယ်စားလှယ်တွေ ကန့်ကွက်ခဲ့တဲ့ အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်းကို ပြည်သူလွှတ်တော်က မဲခွဲဆုံးဖြတ်ပြီး အတည်ပြုလိုက်တဲ့အပေါ်မှာ လွှတ်တော်ပြီးလို့ မီဒီယာတွေ က တပ်မတော်သား လွှတ်တော်ကိုယ်စားလှယ်တွေကို
မေးတော့ ဗိုလ်မှူးချုပ်မောင်မောင်က ဒီမိုကရေစီအနိုင်ကျင့်မှုကြောင့် ဆိုပြီး 7 day
မီဒီယာကို ဖြေကြားသွားပါတယ် ( မှတ်တောင်ထားရအုံးမယ် )


=၅..၄..၁၆-ပြည်သူလူထုက ရွှေးချယ်တင်မြောက် ထားခြင်းမရှိတဲ့တပ်မတော်သားလွှတ်တော် ကိုယ်စားလှယ်တွေ ကန့်ကွက်ခဲ့တဲ့ အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်းကို ပြည်သူလွှတ်တော်က မဲခွဲဆုံးဖြတ်ပြီး အတည်ပြုလိုက်တဲ့အပေါ်မှာ လွှတ်တော်ပြီးလို့ မီဒီယာတွေ က တပ်မတော်သား လွှတ်တော်ကိုယ်စားလှယ်တွေကို မေးတော့ ဗိုလ်မှူးချုပ်မောင်မောင်က ဒီမိုကရေစီအနိုင်ကျင့်မှုကြောင့် ဆိုပြီး 7 dayမီဒီယာကို ဖြေကြားသွားပါတယ် ( မှတ်တောင်ထားရအုံးမယ် )-ပြီးခဲ့တဲ့ လွှတ်တော်သက်တမ်း ၅ နှစ်တုန်းက အောက်ခြေသိမ်း အလုပ်သမားတွေအတွက် ငွေသုံးထောင်ပိုပေးဖို့ အဆိုတွေ ပညာရေး ဥပဒေ မူကြမ်းအဆိုတွေ ပြည်သူတွေအတွက် အကျိုးပြုတဲ့အဆိုမှန်သမျ လွှတ်တော်မှာ မဲခွဲဆုံးဖြတ်တိုင်း ရှုံးခဲ့တာရော့ မှတ်မိအုံးမယ် ထင်ပါတယ်-၅၉ ( စ ) ပြင်ဆင်ရေး လွှတ်တော်မှာ မဲခွဲဆုံးဖြတ် တုန်းက ရှုံးခဲ့တုန်းက လွှတ်တော်ကြီး ကွဲထွက်မတတ် လက်ခုပ်တီးလိုက်တဲ့ တပ်မတော်သား ကိုယ်စားလှယ်တွေ ကိုဒေါ်အောင်ဆန်းစုကြည်တောင် လှည့်ကြည့်ခဲ့ရတာရော့ မှတ်မိသေးပါတယ် ( နော် )-ပြည်သူတွေ ရွှေးချယ်တင်မြောက်ခြင်းမရှိဘဲ့ လွှတ်တော်ထဲ အရှက်မရှိ ၀င်ထိုင်နေတဲ့ တပ်မတော်သား လွှတ်တော်ကိုယ်စားလှယ်တွေက ပြည်သူတွေ ရွှေးချယ်တင်မြောက်လို့ လွှတ်တော်ထဲရောက်နေတဲ့ လွှတ်တော်အမတ်တွေ ရဲ့ အဆိုကို ဘုကတ်လန့်ထတိုက်တဲ့ အပြင် လွှတ်တော်ရဲ့ ဥပဒေ စည်းမျည်း စည်းကမ်းအတိုင်း မဲခွဲဆုံးဖြတ် အတည်ပြု တာကို ဒီမိုကရေစီအနိုင်ကျင့် ခံရပါတယ်တဲ့ - ( အို- အရပ်ကတို)================ဧပရယ်မောင်မောင်
Posted by April Maung Maung on Tuesday, April 5, 2016
-
ပြီးခဲ့တဲ့ လွှတ်တော်သက်တမ်း ၅ နှစ်တုန်းက အောက်ခြေသိမ်း အလုပ်သမားတွေ
အတွက် ငွေသုံးထောင်ပိုပေးဖို့ အဆိုတွေ ပညာရေး ဥပဒေ မူကြမ်းအဆိုတွေ
ပြည်သူတွေအတွက် အကျိုးပြုတဲ့အဆိုမှန်သမျ လွှတ်တော်မှာ မဲခွဲဆုံးဖြတ်တိုင်း
ရှုံးခဲ့တာရော့ မှတ်မိအုံးမယ် ထင်ပါတယ်
-
၅၉ ( စ ) ပြင်ဆင်ရေး လွှတ်တော်မှာ မဲခွဲဆုံးဖြတ် တုန်းက ရှုံးခဲ့တုန်းက လွှတ်တော်ကြီး ကွဲထွက်မတတ် လက်ခုပ်တီးလိုက်တဲ့ တပ်မတော်သား ကိုယ်စားလှယ်တွေ ကို
ဒေါ်အောင်ဆန်းစုကြည်တောင် လှည့်ကြည့်ခဲ့ရတာရော့ မှတ်မိသေးပါတယ် ( နော် )
-
ပြည်သူတွေ ရွှေးချယ်တင်မြောက်ခြင်းမရှိဘဲ့ လွှတ်တော်ထဲ အရှက်မရှိ ၀င်ထိုင်နေတဲ့ တပ်မတော်သား လွှတ်တော်ကိုယ်စားလှယ်တွေက ပြည်သူတွေ ရွှေးချယ်တင်မြောက်လို့ လွှတ်တော်ထဲရောက်နေတဲ့ လွှတ်တော်အမတ်တွေ ရဲ့ အဆိုကို ဘုကတ်လန့်ထတိုက်တဲ့ အပြင် လွှတ်တော်ရဲ့ ဥပဒေ စည်းမျည်း စည်းကမ်းအတိုင်း မဲခွဲဆုံးဖြတ် အတည်ပြု တာကို ဒီမိုကရေစီအနိုင်ကျင့် ခံရပါတယ်တဲ့ - ( အို- အရပ်ကတို)
================
ဧပရယ်မောင်မောင်
https://www.facebook.com/aprilmaungmaung.2?fref=ts

ဒီမိုကရေစီမဲ့မဲ့ အနိုင်ကျင့်ခဲ့တဲ့သူတွေခမျာ ခုတော့ ဒီမိုကရေစီပြည့်ပြည့် အနိုင်ကျင့်ခံရရှာပါရောလား။
အနိုင်ကျင့်ခံရပါများလို့ စိတ်ပျက်ပျက်နဲ့ စွန့်လွှတ် ထွက်ခွါသွားမယ့် ရက်တွေကို ပြည်သူတွေက စောင့်မျှော်နေမိပါကြောင်း ရယ်ရွှင်ဘွယ်သဘောနဲ့ သတင်းပေးပါရစေ။

တကယ်ဆိုရင်..
အကြံဉာဏ်ကလဲ မယှဉ်နိုင်ကြရှာ
စေတနာပိုင်းကလဲ ဟန်ဆောင်ရုံဘဲလုပ်တတ်နေကြတာကိုတော့ သူတို့တွေ ကိုယ့်ဖါသာကိုယ် ရိပ်မိနေပါလ်ိမ့်မယ်။

ဒါ့အပြင် ဆန့်ကျင်တာမှန်သမျှကို အမိန့်အာဏာနဲ့ဘဲ နှိမ်နင်းတတ်လေ့ရှိခဲ့တာအပြင် အခု ပြည်သူကို ကိုယ်စားပြုရမယ့် နေရာမျိုး အချိန်မျိုးမှာ ပြည်သူအကြိုက်ပေါ် စေတနာထားပါဝင်ချင်စိတ် မဲ့နေတဲ့ သဘောထားတွေကိုသာ ရှေ့တန်းတင်ပြီး နေရာယူထားကြပြန်ပါတယ်။

ဒီမိုကရေစီနိုင်ငံမှာ လွှတ်တော်ဟာ ပြည်သူ့ကိုယ်စားလှယ်တွေအတွက်ပါဘဲ။ အခုလို မိမိနဲ့ မဝင်ဆန့်တဲ့နေရာမှာ အတင်းမလွတ်တမ်း ဝင်လုထိုင်ပြီးမှ မလုပ်တတ်မကိုင်တတ်နဲ့ ဒီထိုင်ခုံကိုဘဲ လက်နက်တခုပမာ အသုံးချနေတယ်လို့ ပြည်သူက အမြင်မတိမ်းအောင် ထိန်းသိမ်း ဂရုစိုက်သင့်ပါပြီ။

တကယ်တော့ တိုင်းပြည်ရဲ့ အဖျက်အန္တရာယ်ဆိုတာဟာ တောထဲတောင်ထဲမှာ တောခိုပုန်းအောင်းနေတာမျိုးမဟုတ်ဘဲ ဒီလူတွေရဲ့ စိတ်ထဲ အစွဲထဲမှာသာ အတ္တနဲ့တောခိုပြီး ဖုံးကာပုန်းအောင်နေကြတာပါ။ ပြည်သူကိုဇွတ်အတင်း အနိုင်ကျင့်ချုပ်ကိုင် နေချင်တဲ့ ညာဉ်တွေကို အမြန်ဆုံး ဖျောက်ဖျက်ချေမှုန်းနိုင်လျှင် တိုင်းပြည်ရဲ့ အဖျက်အန္တရာယ် တွေကို နှိမ်နင်းရာ ချေမှုန်းရာ တကယ် ရောက်ပါတယ်ဆိုတဲ့ ခေတ်စနစ်သစ်ကို ရောက်နေပြီ မဟုတ်ပါလား။

-ကိုရန်-

News Watch(စောင့်ကြည့်သတင်းဂျာနယ်)

မြန်မာနိုင်ငံခြားရေးဝန်ကြီးဌာန ၀န်ကြီး ဒေါ်အောင်ဆန်းစုကြည်နှင့် တရုတ်နိုင်ငံခြားရေးဝန်ကြီး မစ္စတာဝမ်ယီတို့ ယနေ့ ၄ နာရီခန့်က တွေ့ဆုံခဲ့ရာ ဒေါ်အောင်ဆန်းစုကြည် မြစ်ဆုံစီမံကိန်းစာချုပ်ပင် မဖတ်ရသေး၍ ပြည်သူများ အား ချပြရန် အခက်အခဲရှိဟု သတင်းမီဒီယာများသို့ ပြောကြားခဲ့သည်။

ဒေါ်အောင်ဆန်းစုကြည်က “စာချုပ်ကို ကျွန်မတောင် မဖတ်ရသေးပါဘူး။ ဒါကြောင့် ပြည်သူကို မြစ်ဆုံကိစ္စ ချပြဖို့ ခက်ပါတယ်။ ဒီနေ့ တွေ့ဆုံမှုက မြန်မာနိုင်ငံမှာ ဆောင်ရွက်နေတဲ့ တရုတ်နိုင်ငံရဲ့ စီမံကိန်းနဲ့ပတ်သက်လို့ ထူးထူးထွေထွေ ဆွေးနွေးတာ မရှိပါဘူး။ အခုတွေ့ဆုံမှုက အစိုးရသစ်ကို ရင်းနှီးမှုတည်ဆောက်ဖို့လာခြင်းဖြစ်ပါ တယ်”ဟု သတင်းမီဒီယာများကို ပြောသည်။

တရုတ်နိုင်ငံခြားရေးဝန်ကြီး မစ္စတာဝမ်ယီက
“အစိုးရသစ်ကို ကြိုဆိုနှုတ်ဆက်ဖို့ လာတာဖြစ်ပါတယ်။ မြန်မာ နိုင်ငံ စီးပွားဖွံ့ဖြိုးတိုးတက်ဖို့ ပြည်သူတွေရဲ့ နေထိုင်မှုဘ၀ မြှင့်တင်ဖို့ ကျွန်တော်တို့မှာ အစီအမံတွေရှိပါတယ်။

တရုတ်နိုင်ငံဟာ မြန်မာနိုင်ငံရဲ့ ပြည်တွင်းရေးကို ၀င်ရောက်စွက်ဖက်မှာ မဟုတ်ပါဘူး။အစိုးရသစ်ပြောင်းပေမယ့် မြန်မာနိုင်ငံအပေါ်ထားတဲ့ ပေါ်လစီပြောင်းမှာ မဟုတ်ဘူး”ဟု ပြောကြားခဲ့သည်။

ယင်းအပြင် မြန်မာနိုင်ငံ သည် တရုတ်နိုင်ငံ၏ မိတ်ဖက်ဖြစ်၍ မြန်မာနိုင်ငံအတွင်း စီးပွားရေးလုပ်နေသည့် တရုတ်နိုင်ငံသားများအား မြန်မာနိုင်ငံ၏ဥပဒေများအား လေးစားလိုက်နာပြီး ယဉ်ကျေးမှုဓလေ့ထုံးတမ်းများအား လိုက်နာရန်မှာကြားထား ကြောင်း တရုတ်နိုင်ငံခြားရေးဝန်ကြီး မစ္စတာဝမ်ယီက ပြောကြားခဲ့သည်။

ထွန်း(နေပြည်တော်)
News Watch(စောင့်ကြည့်သတင်းဂျာနယ်)

[youtube src="DimiIiJtSu8"/]
ဒီနေ့ ညနေ နေပြည်တော်ရှိ နိုင်ငံခြားရေးဝန်ကြီးဌာနမှာပြုလုပ်တဲ့ တရုတ်နိုင်ငံခြားရေးဝန်ကြီးနဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည်တို့ ပူးတွဲသတင်းစာရှင်းလင်းပွဲမှာ “မြစ်ဆုံ စီမံကိန်းစာချုပ်ကို ကျမတောင် မဖတ်ရသေးဘူး။ ပြည်သူလူထုကို ချပြဖို့ ခဲယဉ်းပါလိမ့်မယ်”လို့ နိုင်ငံခြားရေးဝန်ကြီး ဒေါ်အောင်ဆန်းစုကြည်က ပြောဆိုခဲ့ပါတယ်
DVB TV News


တရုတ်နိုင်ငံခြားရေးဝန်ကြီး Wang Yi နဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည် တွေ့ဆုံ (ဧပြီ ၅၊ ၂၀၁၆)
တရုတ်နိုင်ငံခြားရေးဝန်ကြီး Wang Yi နဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည် တွေ့ဆုံ (ဧပြီ ၅၊ ၂၀၁၆)

မြန်မာအစိုးရသစ်လက်ထက် နှစ်နိုင်ငံ ချစ်ကြည်ရေးခရီးစဉ်အဖြစ် ရောက်ရှိလာတဲ့ တရုတ်နိုင်ငံခြားရေးဝန်ကြီး Wang Yi ဟာ မြန်မာနိုင်ငံခြားရေး ၀န်ကြီး ဒေါ်အောင်ဆန်းစုကြည်နဲ့ ဒီကနေ့တွေ့ဆုံပြီးတော့ စီးပွားရေးနဲ့ ရင်းနှီးမြုပ်နှံမှုဆိုင်ရာ အကူအညီပေးရေးကိစ္စတွေကို ဆွေးနွေးခဲ့တယ်လို့ သိရပါတယ်။ ဒါပေမယ့် မြန်မာနဲ့တရုတ်အကြား အငြင်းပွားဖွယ်ဖြစ်နေတဲ့ မြစ်ဆုံလို တရုတ်စီမံကိန်းတွေ ပြန်စနိုင်ဖို့ ကိစ္စကိုတော့ ဆွေးနွေးခြင်း မရှိသေးဘူးလို့ ဒေါ်အောင်ဆန်းစုကြည်က ပြောခဲ့ပါတယ်။ အပြည့်အစုံကိုတော့ ဗွီအိုအေ သတင်းထောက် ကိုမိုးဇော်က သတင်းပေးပို့ထားပါတယ်။
တရုတ်နိုင်ငံ နိုင်ငံခြားရေးဝန်ကြီးဟာ ဒီနေ့ နေ့ခင်းပိုင်းက နေပြည်တော် အပြည်ပြည်ဆိုင်ရာ လေဆိပ်ကို ရောက်ရှိခဲ့ပါတယ်။

ဒါဟာအမျိုးသားဒီမိုကရေစီအဖွဲ့ချုပ်ပါတီ ဦးဆောင်တဲ့ အစိုးရသစ်ပြောင်းလဲပြီး ၅ ရက်အကြာမှာ ပထမဆုံးမြန်မာနိုင်ငံ ကို ရောက်ရှိလာတဲ့ နိုင်ငံခြား သံတမန်ဖြစ်သလို နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်ရဲ့ ဖိတ်ကြားချက်အရ တရားဝင်ချစ်ကြည်ရေးခရီးစဉ်အဖြစ် ၂ ရက်ကြာ လာရောက်တာလည်း ဖြစ်ပါတယ်။

နှစ်နိုင်ငံ ဒေါ်အောင်ဆန်းစုကြည်နဲ့ တရုတ် နိုင်ငံ နိုင်ငံခြားရေး ဝန်ကြီး Wang Yi တို့ တွေ့ဆုံဆွေးနွေးပြီးနောက် ဒီကနေ့ ညနေ ၄နာရီခွဲအချိန်လောက် သတင်းစာရှင်းလင်းပွဲကျင်းပရာမှာ ဒေါ်အောင်ဆန်းစုကြည်က အစိုးရသစ်သက်တမ်း တပတ်ကာလအတွင်းမှာ အခုလိုလာရောက်တာဟာ နှစ်နိုင်ငံချစ်ကြည်ရေးကို ဖော်ဆောင်တာဖြစ်ကြောင်း ပြောဆိုပြီး မြန်မာနိုင်ငံဘက်က သဘောထားကို အခုလို ထုတ်ဖော် ပြောဆိုပါတယ်။

“ကျမတို့က အိမ်နီးချင်းနိုင်ငံဖြစ်တာနှင့်အမျှ ကျမတို့ရဲ့ဆက်ဆံရေးဟာ အင်မတန်မှ အရေးကြီးပါတယ်။ ကျမတို့ နိုင်ငံရေးအရပဲမဟုတ်ဘူး ၊ လူမှုရေးအရ စီးပွားရေးအရလည်း အများကြီးအရေးကြီးပါတယ်။ ဒီအရေးကြီးမှုကိုလည်း တရုတ်နိုင်ငံအနေနဲ့ အသိအမှတ်ပြုတယ်လို့ပဲ ကျမတို့ ဒီလိုပဲမြင်ပါတယ်။ ကျမတို့အစိုးရဟာ နိုင်ငံခြားရေးမူဝါဒဆိုလို့ရှိရင် တကမ္ဘာလုံးနဲ့ ခင်မင်ရင်းနှီးစွာ ကျမတို့ ပူးပေါင်းဆောင်ရွက်ချင်ပါတယ်။ ဒီလို ကျမတို့ တကမ္ဘာလုံးနဲ့ ပိုမိုခင်မင်ရင်းနှီးစွာ ငြိမ်းချမ်းရေးအတွက် လူသားများရဲ့ တိုးတက်ဖွံ့ဖြိုးရေးအတွက် ဆောင်ရွက်တဲ့နေရာမှာ ကျမတို့ရဲ့ အိမ်နီးချင်းနိုင်ငံတွေကလည်းပါဝင်ပြီးတော့ အတူလက်တွဲပြီးဆောင်ရွက်မယ်လို့လည်း ကျမ ယုံကြည်ပါတယ်။”

တရုတ်နိုင်ငံခြားရေးဝန်ကြီးကလည်း တရုတ်-မြန်မာဆက်ဆံရေးကို အလေးထားကြောင်း၊ မြန်မာနိုင်ငံရဲ့စီးပွားရေးဖွံ့ဖြိုးတိုးတက်မှုနဲ့ ပြည်သူလူထု ဘ၀မြှင့်တင်ရေးအတွက်လည်း ပူးပေါင်းဆောင်ရွက်မှာ ဖြစ်ကြောင်း အပြင် နှစ်နိုင်ငံချစ်ကြည်ရင်းနှီးမှုကိုလည်း မြှင့်တင်ဆောင်ရွက်မှာဖြစ်ကြောင်းထည့်သွင်း ပြောကြားပါတယ်။

တရုတ်နိုင်ငံက မြန်မာပြည်မှာ အကြီးစား စီမံကိန်းတွေ ဆက်လက်ဖော်ဆောင် တာနဲ့ပတ်သက်တဲ့ မေးခွန်းအပေါ်မှာတော့ တရုတ်နိုင်ငံခြားရေးဝန်ကြီး Wang Yi က ဖြေဆိုတာကို ဘာသာပြန်သူက အခုလို ပြန်ကြားပါတယ်။

“အဲဒီပူးပေါင်းဆောင်ရွက်မှု ဆောင်ရွက်ရာမှာ တချို့စီမံကိန်းမှာ တချို့ကိစ္စ ပေါ်ပေါက်လာတာလည်း သဘာဝကျတဲ့ ကိစ္စဖြစ်ပါတယ်။ ဒါပေမယ့် ခုနက ကျနော်နဲ့ မြန်မာဝန်ကြီး ကျနော်တို့ ကြုံတွေ့နေတဲ့ကိစ္စကို ဒီချစ်ကြည်ရင်းနှီးတဲ့နည်းလမ်းမှတဆင့် အားလုံးဖြေရှင်းနိုင်ပါတယ်လို့ သဘောတူခဲ့ပါတယ်။”

တရုတ်နိုင်ငံဟာ မြန်မာနိုင်ငံရဲ့အိမ်နီးချင်းကောင်းအဖြစ်နဲ့ စီးပွားရေးနဲ့ ရင်းနှီးမြုပ်နှံတာတွေ မြှင့်တင်ဖို့ ရှိသလို အခြေခံအဆောက်အဦတည်ဆောက်ရေး၊ စက်မှုကဏ္ဍ၊ လယ်ယာနဲ့ ဆည်မြောင်းကဏ္ဍတွေမှာ ကူညီဖို့ ရှိကြောင်းလည်း တရုတ်နိုင်ငံခြားရေးဝန်ကြီးက ထည့်သွင်းပြောဆိုပါတယ်။

မြစ်ဆုံစီမံကိန်း၊ တရုတ်မြန်မာအကြားချုပ်ဆိုတဲ့ စာချုပ်တွေနဲ့ပတ်သက် တဲ့ မေးမြန်းတာတွေကိုတော့ ဒေါ်အောင်ဆန်းစုကြည်က အခုလို ဖြေဆိုပါတယ်။

“စာချုပ်က ကျမတောင်မှမဖတ်ရသေးဘူး။ အဲတော့ ပြည်သူလူထုကို ချပြဖို့ဆိုတာ ခက်ပါလိမ့်မယ်။ ထူးထူးထွေထွေ ကျမတို့ ဒီကိစ္စကို ၀န်ကြီးကတော့ ပြောခဲ့တာရှိပါတယ်။ ဘာမှတော့ ထူးထူးထွေထွေမဆွေးနွေးခဲ့ပါဘူး။ အခုဝန်ကြီးကလာတယ်ဆိုတာ ကျမတို့အစိုးရအဖွဲ့သစ်ကို ဂုဏ်ပြုဖို့ နောက် ကျမတို့ နိုင်ငံ ၂ နိုင်ငံကြားမှာ ရင်းနှီးမှုကို ဆောက်တည်ဖို့ ဒါတွေကို အလေးထား ပြီးတော့ ပြောခဲ့တဲ့ ကိစ္စဖြစ်ပါတယ်။ အဲဒါအတွက်လာတာပါ။ ဒီလို တခြားကိစ္စတွေကို ဘာမှ အသေးစိတ်မဆွေးနွေးခဲ့ပါဘူး။”

ဒီကနေ့ သတင်းစာရှင်းလင်းပွဲမှာ နယ်စပ်ဒေသတည်ငြိမ်အေးချမ်းရေးနဲ့ ငြိမ်းချမ်းရေးလုပ်ငန်းစဉ်တွေမှာ တရုတ်အစိုးရ ပါဝင်ဆောင်ရွက်မယ့် အခြေအနေတွေကိုတော့ ဒီနေ့ သတင်းစာရှင်းလင်းပွဲမှာ ထုတ်ဖော်ပြောဆို တာမရှိသလို အချိန်အကန့်အသတ်ကြောင့် သတင်းထောက်တွေ ဘက်က မေးမြန်းခဲ့တာလည်း မရှိခဲ့ပါဘူး။

သတင်းစာရှင်းလင်းပွဲကို ညနေ ၅နာရီမှာ ပြီးဆုံးခဲ့ပါတယ်။

ဒေါ်အောင်ဆန်းစုကြည်ဟာ လွန်ခဲ့တဲ့နှစ် ဇွန်လအတွင်းက တရုတ်ကွန်မြူနစ်ပါတီရဲ့ တရားဝင်ဖ်ိတ်ကြားချက် အရ တရုတ်နိုင်ငံကို၅ရက်ကြာ သွားရောက်ခဲ့ပြီး တရုတ်နိုင်ငံသမ္မတ၊ ၀န်ကြီးချုပ် အပါအ၀င် ထိပ်ပိုင်းခေါင်းဆောင်တွေနဲ့ တွေ့ဆုံဆွေးနွေးခဲ့ပါတယ်။

ကိုမိုးဇော်
VOA

ကျွန်တော်တို့ သမ္မတနှင့် ၀န်ကြီးချုပ်များ၏ အသက်နှင့်ပတ်သက်ပြီး ဆွေးနွေးနေကြသည်။ ကက်ဘိနက်တွင် လူငယ် လူရွယ်များ ဘာကြောင့် မရွေးချယ်နိုင်ရတာလဲ။ အဓိကကတော့ နှစ် ၅၀ ကျော် နိုင်ငံရေး လေ့ကျင့်ကွင်း ပျောက်ဆုံးနေလို့ပါပဲ။ ဒီလေ့ကျင့်ကွင်းသည်ကား ကျောင်းသားသမဂ္ဂသာ ဖြစ်သည်။ သမဂ္ဂနှင့် ပတ်သက်၍ ဆွေးနွေးတင်ပြလိုသည်။

( ၁ )
“ကျောင်းတွေနဲ့ တက္ကသိုလ်တွေမှာ ကျောင်းသားသမဂ္ဂ လုပ်ဖို့ အချိန်တန်ပြီနဲ့ တူတယ်”
ကိုဘသစ်က အစမရှိ အဆုံးမရှိ တုံးတိတိ ပြောချလိုက်သည်။ ဒါက သူ့ဝါသနာပါပဲ။ သူ ဆက်ပြောသည်။
“ကျွန်တော် ကျောင်းသားသမဂ္ဂခေတ်ကို မီခဲ့ပါတယ်”
“အဲဒီတုန်းက ကိုဘသစ် ဘယ်အရွယ်လောက်ကလဲ”
“ကျွန်တော် အလယ်တန်း ကျောင်းသားဘ၀မှာပေါ့။ တက္ကသိုလ် ကျောင်းသားတွေ လာပြီးဟောပြောတယ်။ ဆွေးနွေးတာတွေကို နားထောင်ရတယ်။ အတော်ကောင်းတယ်”
“ဟုတ်ကဲ့ ပြောပါဦး၊ ကျောင်းသားသမဂ္ဂက ဘယ်လို အကျိုးပြုလဲ”
“ကျောင်းသားသမဂ္ဂမှာ မြန်မာ့အရေးတွေ ၊ ကမ္ဘာ့ အရေးတွေ ဆွေးနွေးတယ်။ နောက် ဆရာက ကမ္ဘာ့ရာဇ၀င်သင်တော့ ဆက်စပ် နားလည် သဘောပေါက်တယ်။ ဒါပေမဲ့ ကျွန်တော်တို့က မှားယွင်းတဲ့ အယူအဆတွေ အများကြီး ယူဆမိတယ်”
“ဘာကိုလဲ”
“အဲဒီအချိန်က ဂျာမနီခေါင်းဆောင် ဟစ်တလာက အင်္ဂလိပ်ကို ရဲရဲကြီးတော်လှန်တယ်။ ဒါကို အားကျလို့ စကြာတံဆိပ်တွေကိုတောင် လက်မောင်းမှာပတ်ကြတယ်”
“ဟစ်တလာဟာ ဖက်ဆစ်အာဏာရှင်ဆိုတာ နောက် ဘယ်တော့လောက်မှ သိလဲ”
“အထက်တန်းလောက်မှာပါ။ ဒါလည်း အတော်ခက်တယ်။ အဲဒီခေတ်က အင်္ဂလိပ်၊ ပြင်သစ်၊ အမေရိကန်တို့ဟာ တစ်ကမ္ဘာလုံးကို ကိုလိုနီစနစ်တွေနဲ့ တိုက်ခိုက်သိမ်းပိုက်ထားတယ်”
“ကျွန်ပြုတာပဲ”
“ဒီစနစ်ကို တွန်းလှန်တဲ့ ဂျာမနီ၊ ဂျပန်နဲ့ အီတလီတို့ကို ကျွန်တော်တို့ အားကျတယ်”
“ဒါလည်း ဟုတ်တာပဲ။ ဗိုလ်ချုပ်အောင်ဆန်းတောင် ဂျပန်ကိုသွားပြီး အကူအညီတောင်းခဲ့သေးတာပဲ”
“ရဲဘော်သုံးကျိပ် ဂျပန်ကိုသွားတာ သမိုင်းတွင်တဲ့ကိစ္စပါ။ နောက်ဆုံး ဂျပန်ကို ပြန်တိုက်ထုတ်တာပဲ”
“ဒါနိုင်ငံရေးပေါ့”
“ဟုတ်တယ်။ ကျွန်တော် ဆွေးနွေးချင်တာက ကျောင်းနေတာဟာ စာသင်တာတစ်ခုတည်း မဟုတ်ဘူး။ လူမှုဆက်ဆံရေးတွေ နိုင်ငံရေးတွေကို နားလည်အောင် ကြိုးစားရတာတွေ ပါတယ်”

( ၂ )
၁၉၂၀ ခုနှစ်က ရန်ကုန်တက္ကသိုလ် တည်ထောင်သည်။ ထိုကာလ ကတည်းက University Act ကို ကျောင်းသားများ ကန့်ကွက်ကြသည်။
“ဆန္ဒပြတာလား”
“မဟုတ်ဘူး။ အဲဒီခေတ်က ဆန္ဒပြတယ်လို့ မခေါ်ဘူး။ သပိတ်မှောက်တယ်လို့ ခေါ်တယ်။ သဘောမတူ လက်မခံတာကို Boycott လုပ်တယ်လို့ သုံးနှုန်းတယ်။ ကျွန်ပညာရေးကို လက်မခံဘူး။ အမျိုးသားကျောင်းတွေ ပေါ်လာတယ်။ အဲဒီ အမျိုးသားကျောင်းတွေက ဦးသန့်၊ ဦးနု၊ ဗိုလ်ချုပ်အောင်ဆန်း စတဲ့ ခေါင်းဆောင်တွေကို မွေးထုတ်ပေးလိုက်တယ်”
“ဒါကြောင့် ခင်ဗျား သမဂ္ဂရှိသင့်တယ် ပြောတာလား”
“ဟုတ်ပါတယ်။ ဦးသန့်ဆိုရင် ကုလသမဂ္ဂအဖွဲ့ချုပ်ကြီးရဲ့ အထွေထွေ အတွင်းရေးမှူးချုပ် ဖြစ်ခဲ့တယ်။ ဗိုလ်ချုပ်အောင်ဆန်းဆိုလည်း အမျိုးသား ခေါင်းဆောင်၊ ဦးနုဆိုရင်လည်း ဗိုလ်ချုပ်အောင်ဆန်း ကျဆုံးတာနဲ့ ချက်ချင်း အစားထိုးနိုင်တဲ့ ပုဂ္ဂိုလ်ပါပဲ။ သူတို့တစ်တွေဟာ ရန်ကုန်တက္ကသိုလ်မှာပဲ ပညာသင်ကြတယ် မဟုတ်လား။ သူတို့ရတဲ့ပညာဟာ ကျွန်ပညာရေးပဲ မဟုတ်လား”
“ဟုတ်ပါတယ်။ ကျွန်ပညာရေးလို့ ပြောရင်ရပါတယ်။ အင်္ဂလိပ်ဟာ သူခိုင်းစားလို့ရတဲ့ ပညာကိုသာ သင်ပေးတာကိုး”
“ဒါပေမဲ့ ကျွန်တော်မြင်တာက တက္ကသိုလ်ရဲ့ ပညာရေးအခြေခံမှုကြောင့်ပဲ ဒီလိုခေါင်းဆောင်တွေ ထွက်ပေါ်လာတာပဲ”
“ဆိုပါဦး”
“အချက်နှစ်ချက်ကို ထုတ်ပြချင်တယ်။ ပထမချက်က လွတ်လပ်တယ်။ တက္ကသိုလ်များမှာ လွတ်လပ်စွာ ရွေးချယ်ပိုင်ခွင့်ရှိတယ်။ မိမိနှစ်သက်ရာ ဘာသာရပ်ကို ရွေးချယ်ခွင့်ရှိတယ်။ အမှတ်များမှာ ဆေးသွား၊ စက်မှုသွားဆိုတာမျိုး မရှိဘူး။ ဒုတိယအချက်ကတော့ လွတ်လပ်တဲ့ ကျောင်းသားအဖွဲ့အစည်း ရှိတယ်။ အဓိကက ကျောင်းသားသမဂ္ဂ (Student Union) ပေါ့။ ကျောင်းသားတိုင်းဟာ သမဂ္ဂအဖွဲ့ဝင်တွေ ဖြစ်ကြတယ်။ ဒါ့အပြင် အဆောင်တွေမှာလည်း သဟာယနဲ့ စာဖတ်အသင်း (S & R ) လို့ခေါ်တဲ့ ( Social and Reading Club) တွေရှိတယ်”
“ကျောင်းသားသမဂ္ဂက ဘာလုပ်လဲ”
“လုပ်တာတွေတော့ အများကြီးပဲ။ ဘာသာ စာပေ၊ ယဉ်ကျေးမှု အနုပညာ၊ အသင်းတွေအများကြီးပဲ”
“နိုင်ငံရေးကော မလုပ်ဘူးလား”
“ကျောင်းသားသမဂ္ဂမှာ အလုပ်အမှုဆောင်တွေရဲ့ ရည်ရွယ်ချက်တွေကတော့ နိုင်ငံရေးလုပ်ဖို့ပါပဲ။ ဗိုလ်ချုပ်အောင်ဆန်းတို့ကို ကြည့်ပေါ့။ သမဂ္ဂမှာ ရွေးကောက်ပွဲတွေရှိတယ်။ ဒါဟာ နိုင်ငံရေး လေ့ကျင့်ကွင်းကြီး ဖြစ်နေတယ်”
“ဒီလိုဖြစ်တာ ကောင်းကောကောင်းရဲ့လား”
“မိဘတွေကတော့ သဘောမကျကြဘူး။ သူတို့ သားသမီးတွေကို နိုင်ငံရေးနဲ့ မဆက်နွှယ်စေချင်ဘူး။ နောက်လာမယ့် ပညာရေးဥပဒေမှာ သမဂ္ဂမဖွဲ့စည်းရတာမျိုးတွေ၊ နိုင်ငံရေး မလုပ်ရ ဆိုတာမျိုးနဲ့ ပတ်သက်ပြီး ဆွေးနွေးဖို့လိုတယ်”
“ကျွန်တော်ကတော့ သမဂ္ဂစတဲ့ ကျောင်းသားအဖွဲ့အစည်းတွေ ဖွဲ့စည်းခွင့်မရရင် ဒီဥပဒေကို လက်ခံမှာ မဟုတ်ဘူးလို့ ယူဆတယ်”
“ဟုတ်ပါတယ်။ ကျောင်းသားသမဂ္ဂဟာ ဒီမိုကရေစီပညာရေးမှာ အင်မတန် အရေးကြီးပါတယ်။ သမဂ္ဂကနေ ရွေးချယ်တဲ့ ကျောင်းသားကိုယ်စားလှယ် တစ်ယောက်သို့မဟုတ် နှစ်ယောက်ဟာ တက္ကသိုလ်ရဲ့ အုပ်ချုပ်ရေးအဖွဲ့မှာ ပါဝင်ရပါမယ်။ Senate အဖွဲ့ပေါ့။ Senate ထဲမှာ ဆရာကိုယ်စားလှယ်တွေနဲ့ ဂုဏ်သရေရှိ လူကြီးတွေလည်း ပါရတယ်”
“အင်မတန်ကောင်းတာပဲ။ Senate ကနေ ကျောင်းသားအရေးကို ကျောင်းသားကိုယ်စားလှယ်နဲ့ တိုင်ပင်တာ အင်မတန်သင့်တော်ပါတယ်။ သမဂ္ဂဟာ နောက် ဘာလုပ်သေးလဲ”
“ကျွန်တော် စောစောကပြောသလို လူမှုရေးကိစ္စတွေကို ဆောင်ရွက်ကြတယ်။ အဓိကကျတာကတော့ နိုင်ငံရေးဆွေးနွေးပွဲတွေ လုပ်တာပဲ”
“နိုင်ငံရေး ဆွေးနွေးပွဲတွေလုပ်လို့ ဖြစ်ပါ့မလား။ ဒါက ပါတီနိုင်ငံရေး မဟုတ်လား”

( ၃ )
ကျွန်တော်တို့ တစ်ခေတ်က ပါတီနိုင်ငံရေးသည် အတော်ရှုပ်ထွေးခဲ့သည်။ ကျောင်းသားများ တောခိုကာ တောထဲမှာ အသတ်ခံကြရသည်။ သမဂ္ဂသည် နိုင်ငံရေးဝါဒများ မှိုင်းတိုက်ရာနေရာ ဖြစ်ခဲ့သည်။
“ခင်ဗျားတို့က ပါတီနိုင်ငံရေးကို မြင်နေကြတာကိုး။ သမဂ္ဂအ၀န်းအ၀ိုင်းထဲမှာ နိုင်ငံရေးပါတီတွေအတွက် မဲဆွယ်စည်းရုံးမှုတွေ မလုပ်ရဘူး။ အဲဒီ နိုင်ငံရေးတွေ မလုပ်ရတာပါ။ နိုင်ငံရေးပညာကို သင်ကြားခွင့်ရှိတယ်။ ဆွေးနွေးတာတွေ လုပ်လို့ရတယ်။ ကျွန်တော်တို့ တက္ကသိုလ်တက်တုန်းက Debate တွေ အများကြီးလုပ်တာကို တွေ့ရတယ်။ ကျွန်တော် အင်္ဂလန်မှာ ကျောင်းတက်စဉ်က ကျောင်းသားသမဂ္ဂအဖွဲ့ဝင် ဖြစ်တယ်။ ဘာသာရပ်ဆိုင်ရာ အသင်းမှာ အတွင်းရေးမှူးလုပ်တယ်။ ဒါနဲ့ ဆက်နွှယ်ပြီးတော့ သမဂ္ဂမှာ ဆွေးနွေးပွဲတွေ တက်လေ့ရှိတယ်။ အပတ်စဉ် ဆွေးနွေးပွဲတွေ ရှိတယ်။ သူတို့က ပါတီအတွက် မဲဆွယ်စည်းရုံးတာ မဟုတ်ဘူး။ ဥပမာ တောင်အာဖရိကမှာ လူဖြူ၊ လူမည်း ခွဲခြား ဆက်ဆံတဲ့ဥပဒေကို Debate လုပ်တာမျိုး၊ ဆင်းရဲတဲ့ နိုင်ငံတွေကို အကြွေးတွေပေးရင် ပိုပြီး ၀န်ပိမပိ Debate လုပ်တာမျိုးတွေကို တွေ့ရတယ်”
“အင်း အတော်ကောင်းတာပဲ”
“ကျောင်းသားတွေအတွက် လေ့ကျင့်ကွင်းကြီးပေါ့။ ဗြိတိသျှ ၀န်ကြီးချုပ် ဖြစ်လာတဲ့ မာဂရက်သက်ချာဆိုရင် ဒီလို ကျောင်းသမဂ္ဂကနေ Conservative Party ပါတီထဲ ၀င်ရောက်သွားပြီး သက်တမ်း သုံးဆက် ၀န်ကြီးချုပ် ဖြစ်ခဲ့တယ်”
“ဟုတ်တယ်။ အချို့ကတော့ တက္ကသိုလ်မှာ နိုင်ငံရေး မလုပ်ရဘူးဆိုတာကို အဓိကထား ပြောနေကြတယ်”
“မဟုတ်ဘူး။ နိုင်ငံရေး ဘာသာသင်ယူခွင့်ရသလို နိုင်ငံရေး လေ့ကျင့်ပြီး မိမိရဲ့ဘ၀ကို ပြင်ဆင်နိုင်တယ်။ ကျောင်းသားတွေအကြား စိတ်ဝမ်းကွဲစေမယ့် ပါတီမဲဆွယ်တာမျိုးတွေ ပါဝင်တဲ့ နိုင်ငံရေးမျိုးတွေကို မလုပ်ရတာဘဲလို့ ကျွန်တော်ယူဆတယ်”
“အင်း၊ ခင်ဗျားပြောသလို သမဂ္ဂဖွဲ့လို့ရမယ်၊ နိုင်ငံရေး Practice လုပ်လို့ရမယ်ဆိုတာမျိုးကို မယုံကြဘူး”
“မှန်ပါတယ်။ နှစ်ပေါင်းများစွာ ဖိနှိပ်ခံထားရတဲ့ လူတွေဟာ ဘာကိုမဆို အလွယ်တကူ မယုံကြဘူး။ တကယ်လည်း ယုံကြည်လောက်အောင် လုပ်ပေးဖို့လည်း လိုတယ်လို့ ထင်တယ်။ ခုလည်း တက္ကသိုလ်များမှာ Coordination လုပ်နိုင်တဲ့ အဖွဲ့တစ်ခုကို ဖွဲ့စည်းမယ်တဲ့။ အားလုံးက အရင်တက္ကသိုလ်များ ဗဟိုကောင်စီနဲ့ အတူတူပဲ။ အဆင့်မြင့် ပညာ ဦးစီးဌာန(အဆည)လို အဖွဲ့ပဲလို့ ယူဆနေကြတယ်။ တကယ်တော့ တက္ကသိုလ်တွေကို ကိုယ်ပိုင်လွတ်လပ်ခွင့်ပေးလိုက်ရင် ဒီအဖွဲ့ဟာ မှတ်ပုံတင်အဖွဲ့လောက်ပဲ ဖြစ်ပါတော့မယ်”
“ဘယ်လို မှတ်ပုံတင်တာလဲ”
“ကျောင်းအလိုက် သင်ရိုးတွေကို တင်ပြခြင်း မိမိပေးမယ့် ဘွဲ့တွေကို တင်ပြခြင်းတို့ပါပဲ”
“ဆရာ အပြောင်းအရွှေ့တွေကော”
“ဆရာတွေကို လွတ်လပ်စွာ ခန့်ထားနိုင်တယ်။ ဖြုတ်လည်းဖြုတ်လို့ ရတယ်။ ဆရာတွေဟာ တက္ကသိုလ်တွေမှာ လစ်လပ်တဲ့နေရာ အတွက်ကို မိမိသဘောနဲ့ လျှောက်ထားနိုင်တယ်။ အပြောင်းအရွှေ့လည်း မရှိဘူး”
“စာအုပ်တွေကော”
“သင်ရိုးကအစ လွတ်လပ်စွာ ပြဋ္ဌာန်းနိုင်တယ်။ မိမိတို့ တက္ကသိုလ်မှာ ဘာတွေ သင်နေတယ်ဆိုတာမျိုးကိုတော့ ဗဟိုအဖွဲ့မှာ မှတ်ပုံတင်ထားလို့ရတယ်”

( ၄ )
“တကယ်ဖြစ်မယ်ဆိုရင် ကောင်းတာပေါ့။ ဒါနဲ့ ပတ်သက်ပြီး တက္ကသိုလ် ကျောင်းသားတွေနဲ့ ဆရာတွေ ဆန္ဒပြခဲ့ကြတယ်”
“ဟုတ်ပါတယ်။ ကျောင်းသားတွေကို ဖမ်းဆီးတာမျိုးတွေ ဖြစ်တယ်။ ဒီနေရာမှာ ယုံကြည်မှု တည်ဆောက်ဖို့လိုတယ်”
“တကယ် လုပ်ပေးမယ်ဆိုတာ မယုံကြည်လို့ပေါ့ ဟုတ်လား”
“ဟုတ်တယ်လေ။ အရင်က စံနမူနာတွေ ရှိတယ်လေ”
“ဒါတွေက mind - set ပေါ့ဗျာ။ အားလုံး နားလည် သဘောပေါက်ကြပြီး တာဝန်ရှိသူတွေကလည်း စိတ်ကောင်းစေတနာကောင်းနဲ့ မှန်မှန်ကန်ကန် အကောင်အထည်ဖော်ဖို့ လိုတယ်”
“ကျောင်းသားသမဂ္ဂ ဖွဲ့ခွင့်ပြုရမှာပေါ့ ဟုတ်လား”
“မျှော်လင့်ရတာပေါ့ဗျာ”
ကျွန်တော်တို့အားလုံး မျှော်လင့်နေကြပါသည်။

ဒေါက်တာခင်မောင်ညို
The Ladies News Journal


တရုတ်နိုင်ငံခြားရေးဝန်ကြီး Wang Yi နဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည် တွေ့ဆုံ (ဧပြီ ၅၊ ၂၀၁၆)
တရုတ်နိုင်ငံခြားရေးဝန်ကြီး Wang Yi နဲ့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည် တွေ့ဆုံ (ဧပြီ ၅၊ ၂၀၁၆)
အစိုးရသစ်သက်တမ်း ရက်သတ္တတစ်ပတ်ခန့်သာ ရှိသေးချိန်တွင် တရုတ်နိုင်ငံ နိုင်ငံခြားရေးဝန်ကြီး မစ္စတာဝမ်ရိ မြန်မာနိုင်ငံသို့ လာရောက်လည်ပတ်ခြင်းသည် နှစ်နိုင်ငံချစ်ကြည်ရေးကို ဖော်ဆောင်သည်ဟု နိုင်ငံခြားရေးဝန် ကြီး ဌာန ပြည်ထောင်စုဝန်ကြီး ဒေါ်အောင်ဆန်းစုကြည်က ပြောသည်။

“ကျွန်မတို့ဟာ အိမ်နီးချင်းနိုင်ငံတွေဖြစ်တာနဲ့အမျှ ကျွန်မတို့ဆက်ဆံရေးဟာ အင်မတန်မှအရေးကြီးပါတယ်၊ နိုင်ငံရေးအရတင်မဟုတ်ဘူး၊ လူမှုရေး၊ စီးပွားရေးအရ အများကြီး အရေးကြီးပါတယ်၊ တရုတ်နိုင်ငံအနေနဲ့ အသိ အမှတ်ပြုတယ်လို့ ကျွန်မတို့ဒီလိုပဲ မြင်ပါတယ်” ဟု တရုတ်နိုင်ငံခြားရေးဝန်ကြီးနှင့် တွေ့ဆုံအပြီး မီဒီယာများကို ၄င်းကပြောသည်။

ဒေါ်အောင်ဆန်းစုကြည်၏ ဖိတ်ကြားချက်အရ လာရောက်ခွင့်ရသည့်အတွက် ဝမ်းမြောက်ကြောင်းနှင့် တရုတ် နိုင်ငံအနေဖြင့် မြန်မာပြည်သူလူထုအပေါ် ရပ်တည်နိုင်ကြောင်း ပြသလိုသည်ဟု မစ္စတာဝမ်ရိ ကဆိုသည်။

“တရုတ်နိုင်ငံဟာ မြန်မာနိုင်ငံရဲ့ အိမ်နီးချင်းကောင်းနိုင်ငံလည်း ဖြစ်ပါတယ်၊ နှစ်နိုင်ငံဆက်သွယ်ရေး မြင့်တင်နိုင် ရန် ဆန္ဒလည်းရှိပါတယ်၊ ကျွန်တော်တို့ မြန်မာနိုင်ငံခြားရေးဝန်ကြီးကို တွေ့ဆုံရာမှာ တရုတ်နိုင်ငံဟာ မြန်မာနိုင်ငံ ကိုထားတဲ့ နိုင်ငံဆက်ဆံရေး ပေါ်လစီကို အလေးထားပါတယ်” ဟု ၄င်းက ထပ်လောင်းပြောသည်။

ယင်းနောက် “တရုတ်နိုင်ငံဟာ မြန်မာနိုင်ငံမှာ အကြီးစားစီမံကိန်း တွေကို ပူးပေါင်းဆောင်ရွက်နေတာ ရှိပါတယ်၊ ဒီလိုပူးပေါင်းဆောင်ရွက်တာကလည်း တရုတ်မြန်မာ ချစ်ကြည် ရေးကို ပြတာပဲဖြစ်ပါတယ်၊ တရုတ်ကုပ္မဏီ လုပ် ဆောင်နေတဲ့ စီမံကိန်းတွေကလည်း ဒေသခံပြည်သူလူထုကို အကျိုးအမြတ်ရရှိအောင် ကြိုးပမ်းဆောင်ရွက်နေ တာဖြစ်ပါတယ်” ဟု တရုတ်နိုင်ငံခြားရေးဝန်ကြီးက ဆိုသည်။

မြစ်ဆုံစီမံကိန်းစာချုပ်နှင့် ပတ်သက်၍ သတင်းဌာနတစ်ခုက မေးမြန်းရာတွင် “စာချုပ်က ကျွန်မတောင်မဖတ်ရ သေးဘူး၊ ပြည်သူကိုချပြဖို့ခက်ပါလိမ့်မယ်၊ ဝန်ကြီးလာတယ်ဆိုတာ ကျွန်မတို့အစိုးရအဖွဲ့သစ်ကို ဂုဏ်ပြုဖို့၊ ကျွန် မတို့ရဲ့ နှစ်နိုင်ငံ ရင်းနှီးမှုဆောက်တည်ဖို့ ဒါတွေအလေးထားပြီး ပြောခဲ့တဲ့ကိစ္စဖြစ်ပါတယ်၊ အဲ့ဒီအတွက်လာတာ ပါ၊ ဒီလိုအခြားကိစ္စတွေကို အသေးစိပ်ဘာမှ မဆွေးနွေးခဲ့ပါဘူး” ဟု ဒေါ်အောင်ဆန်းစုကြည်က ရှင်းပြသည်။

ကိုပေါက်
The Ladies News Journal

ရီပတ်ဘလီကန်ပါတီ သမ္မတကိုယ်စားလှယ်လောင်း Donald Trump.
ရီပတ်ဘလီကန်ပါတီ သမ္မတကိုယ်စားလှယ်လောင်း Donald Trump.

Wisconsin ပြည်နယ်မှာ အင်္ဂါနေ့ ကျင်းပမယ့် အမေရိကန် သမ္မတ ကိုယ်စားလှယ်လောင်း ရွေးကောက်ပွဲဟာ ရီပတ်ဘလီကန်ပါတီက အမည် တင်သွင်းနိုင်တဲ့ပုဂ္ဂိုလ် ဖြစ်လာရေးအတွက် အရေးပါတာ ဖြစ်ပါတယ်။ ကုဋေကြွယ်သူဌေးကြီး Donald Trump ရီပတ်ဘလီကင်ပါတီရဲ့ အမည်တင်သွင်းခံရသူ ဖြစ်မလာအောင် ဟန့်တားဖို့ ကြိုးပမ်းနေတဲ့ ရီပတ်ဘလီကန် ပါတီဝင်တွေအတွက် ဒီပြည်နယ်ဟာ အဓိက စမ်းသပ်ခံ ပြည်နယ်ဖြစ်ပြီး Cleveland မြို့မှာဂျူလိုင်လမှာ ကျင်းပမယ့် ရီပတ်ဘလီကန် ပါတီညီလာခံ မတိုင်ခင် သူ့ကို ထောက်ခံတဲ့ ကိုယ်စားလှယ်ပေါင်း ၁,၂၃၇ ရရှိနိုင်ဖို့ Trump ရဲ့မျှော်လင့်ချက်ကိုလည်း အရှိန် လျော့စေနိုင်မှာ ဖြစ်ပါတယ်။

Trump အနေနဲ့ ပါတီရဲ့ သမ္မတ ကိုယ်စားလှယ်လောင်း ဖြစ်လာဖို့အတွက် ဇူလိုင်လမတိုင်မီ သူ့ကိုထောက်ခံတဲ့ ကိုယ်စားလှယ် အရေအတွက် အလုံအလောက် မရခဲ့ရင် Cleveland မှာ ကျင်းပမယ့် ရီပတ်ဘလီကန် ပါတီညီလာခံမှာ ကိုယ်စားလှယ်လောင်းတွေ ပြန်ယှဉ်ပြိုင်ကြရမယ့် အခြေအနေ ဆိုက်နိုင်ပါတယ်။ Trump ကို ထောက်ခံသူတွေကတော ဒီလိုအခြေဆိုက်ခြင်းက ရှောင်ရှားလိုကြပါတယ်။ Wisconsin မှာ ကောက်ခံတဲ့ နောက်ဆုံး စစ်တမ်းတွေအရ Trump ရဲ့ ပြိုင်ဘက် Ted Cruz က အသာစီးရနေပြီး Ohio ပြည်နယ်အုပ်ချုပ်ရေးမှူး John Kasich ကတော့ နောက်မှာ အများကြီး ပြတ်ကျန်နေပါတယ်။

ဒီမိုကရက် ပါတီဘက်မှာလည်း Wisconsin ပြည်နယ်ဟာ စမ်းသပ်ခံရမယ့် ပြည်နယ်တစ်ခု ဖြစ်နေပြီး နောက်ဆုံးကောက်ခံတဲ့ လူထုစစ်တမ်းတွေအရ လက်ရှိထိပ်ကပြေးနေတဲ့ Hillary Clinton ဟာ ပြိုင်ဘက် Bernie Sanders ရဲ့နောက်က လိုက်နေတာဖြစ်ပါတယ်။

မကြာခင်ရက်ပိုင်းတွေအတွင်း မစ္စက် Clinton အနေနဲ့ သူ့ရဲ့ ဦးစားပေးမှုကို Senders နဲ့ ရီပတ်ဘလီကန်ဘက်က Donald Trump တို့ကို ပိုပြီး အလေးပေးလာခဲ့တာ တွေ့ရပါတယ်။

ဧပြီလ ၁၉ ရက်မှာ ကျင်းပမယ့် နယူးယောက် အကြိုရွေးကောက်ပွဲတွေ မတိုင်ခင် မဲဆွယ်လှုပ်ရှားမှုမှာမစ္စက် Clinton က သူ့အနေနဲ့ Donald Trump ထက် မဲ တစ်သန်း ပိုရနေပြီး Bernie Sanders ထက် မဲ နှစ်သန်းခွဲကျော် ပိုရနေတယ်လို့ ပြောခဲ့ပါတယ်။ Sanders ကတော့ ဇွဲမလျှော့ဘဲ Wisconsin မှာ အနိုင်ရခဲ့ရင် နယူးယောက်မှာ Clinton နဲ့ မဲကွာဟမှု ပို နည်းလာလိမ့်မယ်လို့ ပြောခဲ့ပါတယ်။
VOA


မြန်မာနိုင်ငံမှာ လွန်ခဲ့တဲ့နှစ် (၅၀) ကျော်ကနေစလို့  ပြီးခဲ့တဲ့ရက်ပိုင်းကမှ နိုင်ငံရေးအကြွေးတွေတင်ရှိနေဆဲမှာ ဒုလ္လဘရဟန်းခံသွားခဲ့တဲ့ ဦးဇင်းကြီးဦးသိန်းစိန်တို့ စစ်ဘောင်းဘီချွတ်အစိုးရလက်ထက်တိုင်အောင် တိုင်းရင်းသား ရဟန်းရှင်လူ ကျောင်းသားပြည်သူတွေဟာ မတရားအနိုင်ကျင့်ခံရယုံသာမက အနိုင်ကျင့်သူတွေ က လက်နက်နဲ့ အာဏာကို အလွဲသုံးစားပြုလို့ ဖမ်းဆီးထောင်ချမှု့ကို ထပ်ဖန်တလဲလဲခံခဲ့ကြရတာပါ။

ပြောင်းလဲချိန်တန်ပြီဆိုတဲ့ ဆောင်ပုဒ်နဲ့ ပြည်သူတွေယုံကြည်ကိုးစားတဲ့ လူထုခေါင်းဆောင် ဒေါ်အောင်ဆန်း စုကြည် ဦးဆောင်တဲ့ အမျိုးသားဒီမိုကရေစီအဖွဲ့ ချုပ် ရွေးကောက်ပွဲမှာ အနိုင်ရပြီးလို့ အစိုးရဖွဲ့ ခဲ့တာ ရက်ပိုင်း လေးသာရှိသေးပေမဲ့ ဦးဇင်းကြီးဦးသိန်းစိန်ထားရစ်ခဲ့တဲ့ လတ်တလောအရေးတကြီးဖြေရှင်းရမဲ့ မတရား အဖမ်းဆီးခံကျောင်းသားတွေနဲ့ နိုင်ငံရေးအကျဉ်းသားကိစ္စတွေအပါအ၀င် ပြဿနာပေါင်းသောင်းခြောက်ထောင် ဟာ ပူလောင်ပြင်းပြစွာလောင်ကျွမ်းနေဆဲပါ။

တချိန်ထဲမှာဘဲ နှစ်ရှည်လများအနိုင်ကျင့်ခံမိဘပြည်သူတွေကလည်း သူတို့ ချစ်တဲ့ခေါင်းဆောင်အပေါ် ယုံကြည်ချက်တွေနဲ့ အတူ ကြီးမားတဲ့မျှော်လင့်ချက်တွေထွေးပိုက်ရင်း လေးလံတဲ့နှလုံးသားဆန္ဒတွေကို မျိုသိပ်အောင့်အီးစောင့်ဆိုင်းလို့ နေပါပြီ။

လူငယ်လူရွယ်၊ ကျောင်းသူကျောင်းသားဆိုတာ တိုင်းပြည်ရဲ့အနာဂါတ်ခေါင်းဆောင်တွေဖြစ်တာမို့  အဖိုးတန် ရတနာတွေလို့ တင်စားခိုင်နိုင်းရမှာပါ။ ရတနာဆိုတာ ရတနာနဲ့ ထိုက်တန်တဲ့နေရာ မြင့်မြတ်စွာထားအပ်၊ ထိန်းသိမ်းစောင့်ရှောက်အပ်ပေမဲ့ စစ်အာဏာရှင်အဆက်ဆက်ကတော့ ကျောက်မျက်ရတနာနဲ့ တူတဲ့ ကျောင်းသားလူငယ် တွေကို သူခိုးဂျပိုးလက်အပ် ရိုက်နှက်ဖမ်းဆီးလို့ အမှိုက်ပုံး၊ မစင်ပုံးနဲ့ တူတဲ့ ထောင်ဆိုတဲ့အရပ်မှာ ထည့်သွင်းချုပ်နှောင်ပြီး ရက်ရက်စက်စက်ဖိနှိပ်အနိုင်ကျင့်ခဲ့ကြတာမဟုတ်လား။

တကယ်တော့ ပညာရေးဥပဒေအတွက်ဆန္ဒပြခဲ့လို့ သားရေကွင်းလို ပုဒ်မအမျိုးမျိုးနဲ့ စွဲချက်တင်ပြီး ထိန်းသိမ်း ချုပ်နှောင်ခံနေရတဲ့ကျောင်းသူကျောင်းသားတွေဘဲဖြစ်ဖြစ်၊ ယုံကြည်ချက်ကြောင့်အကျဉ်းကျနေရတဲ့ နိုင်ငံရေး အကျဉ်းသားအားလုံးဟာ ထောင်ဆိုတဲ့အရပ်မှာ တနေ့ တရက် မပြောနဲ့ တမိနစ်၊ တစက္ကန့် တောင်မထားသင့် မထားအပ်ပါဘူး ဘာကြောင့်လို့ လည်းဆိုတော့ သူတို့ အားလုံးဟာ ရာဇ၀ါတ်မှု့တခုမှ မကျူးလွန်ခဲ့တဲ့အပြင် တိုင်းပြည်ကို လမ်းမှန်ပေါ်ရောက်ရှိအောင် ကိုယ်ကျိုးစွန့် အနစ်နာခံ ဆောင်ရွက်နေတဲ့ လူ့ အဖိုးတန် ရတနာတွေဖြစ်လို့ ပါဘဲ။

စစ်မှန်တဲ့ဒီမိုကရေစီစနစ်မှာတော့ တာဝန်ခံမှု့တာဝန်ယူမှု့တွေနဲ့ အတူ ပြည်သူအများကိုအန္တရာယ်မပြု၊ မထိခိုက် စေဘဲ မိမိယုံကြည်ရာဆန္ဒကို လွတ်လပ်စွာဖေါ်ထုတ်တယ်ဆိုတာ နိုင်ငံသားတိုင်းအတွက် မွေးရာပါအခြေခံ ရပိုင်ခွင့်တရပ်ဖြစ်လို့ တန်ဘိုးထားစောင့်ရှောက်အပ်သလို ၊ တိုင်းပြည်အတွက်၊ နိုင်ငံအတွက် အကျိုးရှိစွာ အသုံးချတတ်ဖို့ လိုအပ်ပါတယ်။

ဒါပေမဲ့ဒီနေရာမှာ သတိချပ်ရပ်မဲ့အချက်တချက်ကတော့ ပြည်သူလူထုက ရွေးချယ်တင်မြှောက်ခဲ့တဲ့ အမျိုးသား ဒီမိုကရေစီအဖွဲ့ ချုပ်ဖွဲ့ ခွင့်ရခဲ့တဲ့ အစိုးရဟာ (၁၀၀) ရာနှုန်းပြည့် ဒီမိုကရေစီအစိုးရတရပ် မဟုတ်သေးဘူးဆိုတာ ပါဘဲ။ အုပ်ချုပ်ရေးအာဏာ၊ ဥပဒေပြုရေးအာဏာ၊ တရားစီရင်ရေးအာဏာ ဘာကိုဘဲကြည့်ကြည့် အာဏာသုံးရပ်လုံးကိုပိုင်ဆိုင်ထားတာမဟုတ်ပါဘူး။ စစ်ဗိုလ်ချုပ်တွေ ၂၅% နဲ့ ပြည်သူ့ အစိုးရ ၇၅% ပေါင်းထားတဲ့ သုံးမတ်သားဒီမိုကရေစီအစိုးရလို့ ဘဲပြောရမှာပါ။

အယင်အခြေအနေထက်စာရင် တိုးတက်လာပြီပြောရမှာဖြစ်ပေမဲ့ သုံးမတ်သားဒီမိုကရေစီအစိုးရအနေနဲ့ နိုင်ငံ ပြုပြင်ပြောင်းလဲရေးကိစ္စတွေကို ပြည်သူတွေစိတ်တိုင်းကျမြန်မြန်ဆန်ဆန်ဖြစ်လာနိုင်ဖို့ ဆိုတာ အထူးဂရုတစိုက် နိုင်ငံရေးပရိယာယ်ကြွယ်ကြွယ်နဲ့ အပေးအယူလုပ်ညှိနှိုင်းအဖြေရှာရမှာပါ။

ဖမ်းဆီးခံသပိတ်မှောက်ကျောင်းသား တွေနဲ့ နိုင်ငံရေးအကျဉ်းသားတွေကို ခြွင်းချက်မရှိလွှတ်ပေးရေးကိစ္စ အကြောင်းပြောလာရင် ပြည်ထဲရေးဝန်ကြီး ဌာန၀န်ကြီးဆိုသူဟာ ကာကွယ်ရေးဦးစီးချုပ်ရဲ့ အမိန့် ကိုနာခံနေတဲ့ စစ်ဗိုလ်ချုပ်တဦးဆိုတာ မေ့ထားလို့ မရသလို၊ တမတ်သားစစ်ဗိုလ်တွေဖက်ကလည်း ဒီကိစ္စဟာ မိဘပြည်သူ အများစုရဲ့ပြင်းပြတဲ့ဆန္ဒဆိုတာသာမက၊ တိုင်းပြည်အနာဂါတ်အရေးဆိုတာ ရှင်းရှင်းလင်းလင်း သဘောပေါက် ကြဖို့ လိုပါတယ်။

နောက်အရေးကြီးတဲ့အချက်က လက်ရှိကာချုပ်အပါအ၀င် ရွေးကောက်ခံမဟုတ်တဲ့ တပ်မတော်သားလွှတ်တော် ကိုယ်စားလှယ်တွေ၊ မျိုးဆက်သစ်စစ်ဗိုလ်စစ်သားတွေဟာ အယင်စစ်အာဏာရှင်ဟောင်းတွေလို ကြီးမားတဲ့ အပြစ်ကျူးလွန်မထားခဲ့သေးဘူးဆိုတာရယ်၊ အခုချိန်ဟာ အမျိုးသားဒီမိုကရေစီအစိုးရနဲ့ ပူးပေါင်းလက်တွဲလို့  ပြည်သူတွေလိုလားတောင့်တနေတဲ့ အပြောင်းအလဲကိုဖေါ်ဆောင်ပြီး သမိုင်းကောင်းကိုရေးထိုးကမ္ဗည်းတင် နိုင်မဲ့အခွင့်ကောင်းအချိန်အခါဆိုတာ ခေါင်းအေးအေးထားစဉ်းစားရမဲ့အချက်ဖြစ်တယ်။
သမိုင်းဆိုးရေးထိုးလို့ လူ့ ဂျပိုးစစ်ဂျပိုးဘ၀ခံယူမလား၊ သမိုင်းကောင်းရေးထိုးလို့ ပြည်သူ့ သားကောင်း သူရဲကောင်းဘ၀ ခံယူမလားဆိုတာကို ပြတ်ပြတ်သားသားရွေးချယ်ရမဲ့အချိန်လည်းဖြစ်ပါတယ်။

ဒေါ်အောင်ဆန်းစုကြည်နဲ့ အမျိုးသားဒီမိုကရေစီအဖွဲ့ ချုပ်အစိုးရအနေနဲ့ကတော့ အခုချက်ခြင်းလွှတ်ခွင့်ရရင် ကျောင်းသားတွေနဲ့ နိုင်ငံရေးအကျဉ်းသားတွေကို အခုချက်ခြင်း လွှတ်ပေးဖို့ ဆန္ဒရှိကြမယ်ဆိုတာ သံသယ၀င်စရာ အကြောင်းမရှိပါဘူး။ ဘာလို့ လည်းဆိုတော့ သူတို့ ကိုယ်တိုင် သိပ်မကြာသေးခင်အချိန်က နိုင်ငံရေးအကျဉ်းသားဘ၀နဲ့ ထောင်ကျခဲ့ရ ဒုက္ခဆင်းရဲကြီးစွာ ခံစားခဲ့ရတာကြောင့်ပါဘဲ။

ဒီဆောင်းပါးကို နိဂုံးချုပ်ရရင် တိုင်းပြည်ရဲ့အဖိုးတန်ရတနာတွေနဲ့တူတဲ့ ကျောင်းသူကျောင်းသားတွေ၊ နိုင်ငံရေးအကျဉ်းသားတွေကို ထောင်သွင်းအကျဉ်းချထားခြင်းဟာ မလုပ်သင့်မလုပ်အပ်ပါဘူး။ အခုချိန်ခါ သမယဟာ နှစ်ဟောင်းကုန်လို့ နှစ်သစ်ကိုကူးပြောင်းတော့မဲ့ မင်္ဂလာရှိတဲ့အခါသမယလည်းဖြစ်ပါတယ်။ မြန်မာလူမျိုးတွေအထွဋ်အမြတ်ထားကျင်းပကြတဲ့ နှစ်ဟောင်းကအညစ်အကြေးတွေ ဆေးကြောလို့  နှစ်သစ်ကိုကြိုဆိုကြတဲ့ မဟာသင်္ကြန်ပွဲတော်ကလည်းနီးကပ်လို့ လာနေပါပြီ။

မြန်မာလူမျိုးတွေဟာ “အတာ” လို့ ခေါ်တဲ့ နှစ်တနှစ်ရဲ့ နောက်ဆုံးကာလမှ “ကူးပြောင်းခြင်း”, “ပြောင်းရွှေ့ခြင်း” လို့  အဓိပ္ပာယ်ရတဲ့ ပါဠိဘာသာ “သင်္ကန္တ” ၊သက္ကတဘာသာနဲ့  “သင်္ကြန္တ” သင်္ကြန်ကို စောင့်ကြိုတဲ့ အနေနဲ့  သင်္ကြန်အကြိုနေ့ မှာ (၇)ရက်သားသမီးတွေအတွက် ရည်ရွယ်ပြီး ပန်း ၇-မျိုးဖြစ်စေ၊ အညွန့်၇-မျိုးဖြစ်စေ သင်္ကြန်အိုးမှာ ထိုးလေ့ရှိကြပါတယ်။

ဒီနှစ်မှာတော့ တိုင်းပြည်မှာ စစ်မှန်တဲ့ပြောင်းလဲမှု့၊ ကောင်းမွန်တဲ့ပြောင်းလဲမှု့တွေဖြစ်တည်နေတယ်ဆိုတာ ပြသနိုင်ဖို့ ကျောင်းသူကျောင်းသားလူငယ်တွေ၊ နိုင်ငံရေးအကျဉ်းသားဆိုတဲ့ (၇)ရက်သားသမီး ပန်းပွင့် ပန်းညွှန့် တွေကို အကျဉ်းချထားရာက သင်္ကြန်ရက်မရောက်ခင် အချိန်မှီလွှတ်ပေးခြင်းဆိုတဲ့ အတာအိုးနဲ့  မဟာသင်္ကြန်ကိုကြိုဆိုကြဖို့ အလေးအနက် တိုက်တွန်းလိုက်ပါတယ်။ အဲ့ဒီလို မင်္ဂလာရှိရှိ၊ အဓိပ္ပါယ်ရှိရှိ ဒီနှစ်သင်္ကြန်ကိုကြိုနိုင်မယ်ဆိုရင်တော့ မိုးပေါ်ကသိကြားမင်းကြီး ပင်နီတိုက်ပုံဝတ်လို့  ဒီမိုကရေစီမြင်းစီးပြီး ဆင်းလာလို့ အားလုံးပျော်ရွှင်စွာ နှစ်သစ်ကိုပွေ့ ဖက်နိုင်ပါလိမ့်မယ်။

လေးစားစွာဖြင့်
(မင်းကောင်းချစ်)
ဧပြီလ (၅) ရက် ၂၀၁၆ ခုနှစ်[full-post]

တရုတ်နိုင်ငံရှိ မြောက်ကိုရီးယားသံရုံးရှေ့ လုံခြုံရေးထားရှိပုံ (ဖေဖ၀ါရီ ၇၊ ၂၀၁၆)
တရုတ်နိုင်ငံရှိ မြောက်ကိုရီးယားသံရုံးရှေ့ လုံခြုံရေးထားရှိပုံ (ဖေဖ၀ါရီ ၇၊ ၂၀၁၆)

မြောက်ကိုရီးယားနိုင်ငံရဲ့ နျူကလီးယားနဲ့ ပဲ့ထိန်းတပ်ဒုံးကျည် အစီအစဉ်တွေကြောင့် ကုလသမဂ္ဂက နောက်ဆုံးချမှတ်လိုက်တဲ့ ပိုမိုပြင်းထန်တဲ့ ပိတ်ဆို့ဒဏ်ခတ် အရေးယူမှုသစ်တွေနဲ့အညီ တရုတ်နိုင်ငံက မြောက်ကိုရီးယားအပေါ် စီးပွားရေးအရ ကန့်သတ်မှုတချို့ ချမှတ်လိုက်ပါတယ်။

မဟာမိတ် မြောက်ကိုရီးယားကို လေယာဉ် ဆီ တင်ပို့တာ ရပ်မယ့်အပြင် ကျောက်မီးသွေး၊ ရွှေ၊ titanium နဲ့ တခြား ရှားပါး ဓာတ်သတ္ထု တင်ပို့တာတွေကိုပါ ရပ်မယ်လို့ တရုတ်အစိုးရက ဒီကနေ့ ကြေညာလိုက်တာပါ။ မြောက်ကိုရီးယားရဲ့ နျူကလီးယား ဒါမှမဟုတ် မစ်ဇိုင်းဒုံးလက်နက် အစီအစဉ်တွေနဲ့ မဆက်စပ်တဲ့ အရပ်ဘက်သုံးဖို့ရည်ရွယ်တဲ့ ကုန်ပစ္စည်းတွေကိုတော့ ကန့်သတ်မှုတွေကနေ ချွင်းချက်ထား ခွင့်ပြုမယ်လို့ ဆိုပါတယ်။

ကုလသမဂ္ဂ လုံခြုံရေးကောင်စီဟာ မြောက်ကိုရီးယားအပေါ် ပိုပိုပြင်းထန်တဲ့ ဒဏ်ခတ်မှုတွေကို ပြီးခဲ့တဲ့ လကပဲ အတည်ပြု ချမှတ်ခဲ့တာပါ။

ဒီအထဲမှာ မြောက်ကိုရီးယားနဲ့ အ၀င်အထွက်လုပ်တဲ့ ကုန်တင်ယာဉ်အားလုံးကို မဖြစ်မနေ စစ်ဆေးတာနဲ့ မြောက်ကိုရီးယားရဲ့ နျူကလီးယား အစီအစဉ်တွေ အတွက် ၀င်ငွေရှာပေးနေတဲ့ တွင်းထွက်ပစ္စည်း ပို့ကုန်အများစုကို ပိတ်ပင်တာတွေ ပါပါတယ်။ ပြီးခဲ့တဲ့ ဇန်န၀ါရီလထဲ မြောက်ကိုရီးယားက နျူကလီးယား စမ်းသပ်မှုတခု လုပ်ခဲ့ပြီး ဖေဖော်ဝါရီလထဲမှာလည်း တာဝေးပစ်ရော့ကတ်ဒုံးကျည် ပစ်လွှတ်တာတွေ လုပ်ခဲ့ပြီးတဲ့နောက် ကုလသမဂ္ဂ ခုလို ဒဏ်ခတ်ပိတ်ဆို့မှုတွေ တိုးမြင့်ချမှတ်လိုက်တာဖြစ်ပါတယ်။
VOA

 ခြင်ကနေတဆင့် ကူးစက်တဲ့ ဇီကာ-ဗိုင်းရပ်စ်ပိုး
ခြင်ကနေတဆင့် ကူးစက်တဲ့ ဇီကာ-ဗိုင်းရပ်စ်ပိုး

ဗီယက်နမ်နိုင်ငံမှာ ခြင်ကနေတဆင့် ကူးစက်တဲ့ ဇီကာ-ဗိုင်းရပ်စ်ပိုး ကူးစက်ခံရသူ လူနာ ၂ ဦးရှိနေပြီလို့ ဗီယက်နမ်အစိုးရ ကြေညာလိုက်ပါတယ်။

တဦးကတော့ Nha Trang ပင်လယ်ကမ်းခြေက အသက် ၆၄ နှစ်အရွယ်အမျိုးသမီးဖြစ်ပြီး၊ နောက်တဦးကတော့ ဟိုချီမင်းမြို့က အသက် ၃၃နှစ်အရွယ် အမျိုးသမီး တဦးဖြစ်ကြောင်း ဗီယက်နမ် ကျန်းမာရေးဝန်ကြီးဌာနက ဒီနေ့မှာ ပြောပါတယ်။ နှစ်ဦးစလုံး မျက်လုံးဖူးယောင်၊ ယားယံတာတွေနဲ့ အဖျားတက်ပြီးတော့ မတ်လကုန်ပိုင်း ဆေးရုံတင်လာချိန်တုန်းက စမ်းသပ်မှုအရ ဇီကာ-ဗိုင်းရပ်စ်ပိုး လက္ခဏာတွေ့ခဲ့ရတယ်လို့ ဆိုပါတယ်။ အသက်၃၃ အရွယ် အမျိုးသမီးဟာ ကိုယ်ဝန်သည်ဖြစ်တယ်လို့ အစိုးရသတင်းဌာက ပြောပါတယ်။ အမျိုးသမီးနှစ်ဦးစလုံး ခုတော့ သက်သာလာပြီဖြစ်ပါတယ်။

ဇီကာ-ဗိုင်းရပ်စ်ပိုး ကူးစက်ခံရသူအများစုဟာ ရောဂါလက္ခဏာ သိသိသာသာ ပြလေ့မရှိပေမယ့် ဇီကာ-ပိုးစွဲကပ်ထားတဲ့ ကိုယ်ဝန်ဆောင်တွေ ကလေးမွေးလာတဲ့အခါ ဦးနောက်သေးတဲ့ရောဂါနဲ့ ကလေးမျိုး မွေးလာတတ်ပါတယ်။ ပြီးခဲ့တဲ့ အောက်တိုဘာလကစလို့ ဘရာဇီးနိုင်ငံမှာ ဇီကာ-ဗိုင်းရပ်စ်ပိုး အများဆုံး ဖြစ်ပွားခဲ့ပြီး လူနာ ၄ ထောင်ကျော်ရှိခဲ့ပါတယ်။ ဇီကာ-ဗိုင်းရပ်စ်ပိုးကို အရေးပေါ် အခြေအနေအဖြစ် ကမ္ဘာ့ကျန်းမာရေးအဖွဲ့ WHO အဖွဲ့က ကြေညာထားပါတယ်။

VOA

 ပြည်ထောင်စုလွှတ်တော် (ဓါတ်ပုံ-MOI)
ပြည်ထောင်စုလွှတ်တော် (ဓါတ်ပုံ-MOI)

ဒေါ်အောင်ဆန်းစုကြည် တာဝန်ယူထားတဲ့ ဝန်ကြီးဌာန ၄ ခုထဲက ၂ ခုဖြစ်တဲ့ ပညာရေးနဲ့ လျှပ်စစ်နဲ့စွမ်းအင် ဝန်ကြီးတွေအတွက် ဝန်ကြီးတွေကို ဒီကနေ့ ပြည်ထောင်စုလွှတ်တော်က အတည်ပြုလိုက်ပါပြီ။

ပညာရေးဝန်ကြီးဌာနအတွက် ဒေါက်တာမျိုးသိမ်းကြီးနဲ့ လျှပ်စစ်နဲ့ စွမ်းအင်ဝန်ကြီးဌာနအတွက် ဦးဖေဇင်ထွန်းတို့ကို ခန့်အပ်ဖို့ ကန့်ကွက်သူမရှိတာကြောင့် ပြည်ထောင်စုလွှတ်တော်မှာ အတည်ပြုခဲ့တာဖြစ်ပါတယ်၊ ဒါ့အပြင် ပြည်ထောင်စုရှေ့နေချုပ်အဖြစ် ဗိုလ်ချုပ်ဟောင်းတစ်ဦးဖြစ်သူ ဒုတိယရှေ့နေချုပ်ဟောင်း ဦးထွန်းထွန်းဦးနဲ့ စာရင်းစစ်ချုပ်အဖြစ် စီးပွားရေးတက္ကသိုလ်ပါမ္ခောချုပ်ဟောင်း ဦးမော်သန်းတို့ကို ခန့်အပ်ဖို့လဲ ပြည်ထောင်စုလွှတ်တော်မှာ ဒီနေ့ အတည်ပြုလိုက်ပါတယ်။

ပညာရေးဝန်ကြီးဖြစ်လာတဲ့ ဒေါက်တာမျိုးသိမ်းကြီးဟာ ပညာရေးလောကသားတွေအကြားမှာရော အမျိုးသားပညာရေးဥပဒေကို ကန့်ကွက်ခဲ့ကြတဲ့ ကျောင်းသားတွေအကြားမှာပါ အငြင်းပွားစရာ ပုဂ္ဂိုလ်တဦးဖြစ်ပါတယ်။ အထူးသဖြင့်တော့ သမ္မတဦးသိန်းအစိုးရလက်ထက် အမျိုသားပညာရေးဥပဒေပေါ်ပေါက်ရေးနဲ့ ပညာရေးပြုပြင်ပြောင်းလဲရေးလုပ်ငန်းစဉ်တွေမှာ ဦးဆောင်ခဲ့သူဖြစ်တာတာမို့၊ ပညာရေးလေးပွင့်ဆိုင်ဆွေးနွေးပွဲတွေမှာ ကျောင်းသားတွေနဲ့ ထိပ်တိုက်တွေ့ခဲ့သူတဦးဖြစ်ပါတယ်။

ဒါကြောင့် အမျိုးသားပညာရေးပြုပြင်ပြောင်းလဲရေးမှာ ကျောင်းသားတွေ အခြားပညာရှင်တွေနဲ့ အဆင်ပြေပြေ ဆောင်ရွက်နိုင်ပါ့မလား စိုးရိမ်မှုတွေရှိပါတယ်။ ပြည်ထောင်စုရှ့နေချုပ်ဖြစ်လာတဲ့ ဦးထွန်းထွန်းဦးဟာဆိုရင်လည်း ပြီးခဲ့တဲ့ ဦးသိန်းစိန်အစိုးရလက်ထက်မှာ ဒုတိယ ရှေ့နေချုပ်အဖြစ်တာဝန်ထမ်းခဲ့သူဖြစ်ပါတယ်။ သူဟာ စစ်တပ်မှာ ဗိုလ်ချုပ်ရာထူးအထိ တာဝန်ထမ်းခဲ့သလို၊ စစ်ဥပဒေချုပ်အဖြစ်လည်း တာဝန်ယူခဲ့သူဖြစ်ပါတယ်။

VOA

[youtube src="wAbK1qFj65g"/]
မြန်မာအစိုးရသစ်ကို ပထမဆုံးလာရောက်တွေ့ဆုံတဲ့ တရုတ်နိုင်ငံခြားရေးဝန်ကြီးနဲ့ အငြင်းပွားစရာ စီမံကိန်းတွေကိစ္စကို တိတိကျကျ မဆွေးနွေးဖြစ်ဘူးလို့ မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည်က ပြောကြားခဲ့ပါတယ်၊

ဒေါ်အောင်ဆန်းစုကြည်ကို နိုင်ငံတော်အတိုင်ပင်ခံပုဂ္ဂိုလ်အဖြစ်ထားရှိမယ့် ဥပဒေကြမ်းကို တပ်မတော်သား ကိုယ်စားလှယ်တွေ ကန့်ကွက်နေတဲ့ကြားကနေ ပြည်သူ့လွှတ်တော်မှာ ဒီကနေ့ မဲခွဲအတည်ပြုခဲ့ပါတယ်။
VOA

နိုင်ငံတော် အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်း မဲရလဒ်နိုင်ငံတော် အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်း မဲရလဒ်
ဒေါ်အောင်ဆန်းစုကြည်ကို နိုင်ငံတော်အတိုင်ပင်ခံထားမယ့် ဥပဒေကြမ်းကို အမျိုးသားလွှတ်တော်မှာ အတည်ပြုပြီးတဲ့နောက်၊ ဒီကနေ့ ပြည်သူ့လွှတ်တော်မှာလည်း အတည်ပြုလိုက်ပါပြီ။ ပြည်သူ့လွှတ်တော်အတွင်း အတည်ပြုရေးဆွေးနွေးကြရာမှာတော့ ဥပဒေကြမ်းပါ အချက်အတော်များများကို တပ်မတော်သားကိုယ်စားလှယ်တွေရော စစ်ဗိုလ်ချုပ်ဟောင်းတွေဦးဆောင်တဲ့ ကြံခိုင်ရေးပါတီကပါ ကန့်ကွက်ဆွေးနွေးခဲ့ကြပါတယ်။ ဒီသတင်းအပြည့်အစုံကိုတော့ ဗွီအိုအေ သတင်းထောက် မမေခသတင်းပေးပို့ထားပါတယ်။

NLD ပါတီကနေတင်လာတဲ့ ဒီ ဥပဒေပါ အခန်း ၈ ခန်းမှာ ၇ ခန်းစလုံးကို ပြင်ဆင်ပေးဖို့ တပ်မတော်သားကိုယ်စားလှယ်တွေဘက်က ဒီကနေ့ ပြည်သူ့လွှတ်တော်မှာတင်ပြဆွေးနွေးခဲ့ပြီး၊ မဲခွဲဆုံးဖြတ်ရာမှာတော့ လွှတ်တော်တွင်း ရွေးကောက်ခံတွေနဲ့ ခန့်အပ်ခံ ကိုယ်စားလှယ်တွေအကြား အကြီးမားဆုံး ပွတ်တိုက်မှုတရပ်ဖြစ်လာပါတယ်။ မဲခွဲဆုံးဖြတ်ရာမှာ စစ်တပ်ကိုယ်စားလှယ်တွေဖက်က မဲပေးခြင်းမရှိသလို၊ မဲရလဒ်အရ အတည်ပြုဖို့ လွှတ်တော်ဥက္ကဌက ဆုံးဖြတ်ချက်ချရာမှာလည်း စစ်တပ်ဖက်က ကန့်ကွက်ခဲ့ပြန်ပါတယ်။ နိုင်ငံတော်ရဲ့ အတိုင်ပင်ခံပုဂ္ဂိုလ်ဆိုင်ရာဥပဒေကြမ်းကို နိုင်ငံတော်သမ္မတရဲ့ အတိုင်ပင်ခံပုဂ္ဂိုလ်ဆိုင်ရာ ဥပဒေကြမ်းလို့ ခေါင်းစဉ်ကအစ ပြင်ဆင်ဖို့အပါအ၀င်၊ အချက်အတော်များများကို အချိန်ယူဆွေးနွေးလိုတယ်လို့ စစ်တပ်ကိုယ်စားလှယ်တွေဘက်က တင်ပြခဲ့ပါတယ်။ ဥပဒေကြမ်းကော်မတီဝင်တဦးလည်းဖြစ်တဲ့ ဗိုလ်မှုးချုပ်မောင်မောင်ကတော့ ဒီ ဥပဒေဟာ တည်ဆဲဖွဲ့စည်းပုံကို ကျော်လွန်လုပ်ဆောင်မှုရှိတယ်လို့ သတိပေး ပြောသွားပါတယ်။

“တည်ဆဲဖွဲ့စည်းပုံအခြေခံဥပဒေ ပြဌာန်းချက်တွေကို လေးစားလိုက်နာမှုမရှိခြင်း၊ ဖွဲ့စည်းပုံအခြေခံဥပဒေပါ ပြဌာန်းချက်တွေကို ကျော်လွန်ဆောင်ရွက်ခြင်း၊ ဖွဲ့စည်းပုံအခြေခံဥပဒေ ပြဌာန်းချက်တွေကိုအားနည်းအောင် ဆောင်ရွက်ခြင်းတွေဟာ မိမိတို့ နိုင်ငံတော်နှင့် နိုင်ငံသားအားလုံးအတွက် မလိုလားအပ်တဲ့ ကိစ္စတွေဖြစ်ပေါ်စေနိုင်ပါကြောင်း တင်ပြလိုပါတယ်။ တင်သွင်းတဲ့ ဥပဒေကြမ်းနဲ့ ပတ်သက်လို့လည်း ဖွဲ့စည်းပုံအခြေခံဥပဒေနဲ့ ဆန့်ကျင်ကျော်လွန်တာရှိနေကြောင်း ကျနော်တို့ တပ်မတော်သားကိုယ်စားလှယ်တွေက ထောက်ပြဆွေးနွေးမှုများပြုလုပ်ကြပါတယ်။ ဒီလိုသုံးသပ်ပြင်ဆင်ဆောင်ရွက်ခြင်းများမပြုဘဲ ဥပဒေပြင်ဆင်ချက် ပုဒ်မတွေကို မဲခွဲဆုံးဖြတ်ခြင်းများပြုလုပ်ပြီးတော့မှ အတည်ပြုမှုများဆက်လက်ဆောင်ရွက်မယ်ဆိုရင်တော့ ကျနော်တို့ တပ်မတော်သားကိုယ်စားလှယ်တွေအနေနဲ့တော့ မဲပေးခြင်းများ ဆောင်ရွက်မည်မဟုတ်ပါကြောင်း တင်ပြအပ်ပါတယ်ခင်ဗျာ။”


ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက ပြည်သူ့လွှတ်တော်ကိုယ်စားလှယ် ဦးသိန်းထွန်းကတော့လက်ရှိတင်ပြထားတဲ့ ဥပဒေဟာ တခါသုံးဥပဒေဖြစ်နေ တယ်လို့ လွှတ်တော်မှာ ဝေဖန်ခဲ့ပါတယ်။ပြီးခဲ့တဲ့ လွှတ်တော်တုန်းကတောင် ဥပဒေတခုရေးဆွဲ မယ်ဆိုရင် လွှတ်တော်တွင်း ဥပဒေကော်မတီဝင်များ၊ ပြင်ပ လွှတ်တော်ပညာရှင်များ လွှတ်တော်ကိုယ်စားလှယ်များတွေ့ဆုံကာ အကြေအလည်ဆွေးနွေးပြီးမှ လွှတ်တော်တွင်းဆွေးနွေးကြတဲ့ အစဉ်အလာရှိပေမယ့်၊ အခု ဒီဥပဒေကြမ်းကိစ္စမှာတော့ ဒီလို လုပ်ဆောင်မှုမရှိတဲ့အတွက် အားနည်းချက်တွေရှိကြောင်း ထောက်ပြပါတယ်။

“ကျနော်တို့ ဒီနေ့ဆွေးနွေးပွဲက ကျနော်တို့ တင်ပြတဲ့ ပုဂ္ဂိုလ်တွေနဲ့ ဥပဒေကြမ်းကော်မတီနဲ့ ၂ ဦး ကျနော်တို့ မဲခွဲဆုံးဖြတ်ပြီးတော့မှ ဆောင်ရွက်တဲ့အနေအထားမှာ ယနေ့တွေ့ရှိရမှာဖြစ်ပါတယ်။”

ဒီလိုတင်ပြခဲ့ပေမယ့် လွှတ်တော်ဥပဒေကြမ်းကော်မတီကတော့ ဒီဥပဒေကြမ်းဟာ ပြင်ဆင်ရမှာတွေမရှိတာကြောင့် အမျိုးသားလွှတ်တော်က တင်ပြခဲ့တဲ့ အတိုင်း အတည်ပြုဖို့သာ တင်ပြခဲ့ပြီး၊ လွှတ်တော်ဥက္ကဌက ဥပဒေပါ ပုဒ်မတခုချင်းဆီအလိုက် မဲခွဲကာ အတည်ပြုခဲ့ပါတယ်။ ဒီလိုမဲခွဲတာမှာ ပြည်သူ့လွှတ်တော်တွင်းရှိ ဘယ်တပ်မတော်သားကိုယ်စားလှယ်မှ မဲမပေးခဲ့ပါဘူး။

ဒီပြင် ဥပဒေကို ပြည်သူ့လွှတ်တော်မှာ အတည်ပြုလိုက်တယ်လို့ လွှတ်တော်ဥက္ကဌကကြေငြာလိုက်စဉ်မှာလဲ တပ်မတော်သားကိုယ်စားလှယ်တွေကော ကြံ့ခိုင် ရေးကိုယ်စားလှယ်တွေ ဘက်ကကော မတ်တပ်ရပ်ကာ ထပ်မံကန့်ကွက်ခဲ့ပါတယ်။

ဒီလို ရွေးကောက်ခံ နဲ့ ခန့်အပ်ခံ များ အကြား က အကြီးမားဆုံး ပွတ်တိုက်မှုတခုဖြစ်လာခဲ့တဲ့အပေါ် ရွေးကောက်ပွဲစောင့်ကြည့်လေ့လာနေတဲ့ လွှတ်တော် ကိုယ်စားလှယ်ဟောင်း ဦးခိုင်မောင်ရည်ကတော့ ခုလို သုံးသပ်လိုက်ပါတယ်။

“လက်ရှိ ဒီဥပဒေကို ပြဌာန်းဖို့ အမြန်လုပ်နေတဲ့သဘောကိုလည်း တွေ့ရတယ်ပေါ့နော်။ ဒီအပေါ်မှာ ဒါနိုင်ငံရေးစိန်ခေါ်မှုတရပ်အနေနဲ့ စိန်ခေါ်ချက် သဘောမျိုးသက်ရောက်တယ်လို့ ဆုံးဖြတ်ရမှာဖြစ်တယ်။ တပ်မတော်နဲ့ အနိုင်ရပါတီရဲ့ ဆက်ဆံရေးဟာ အလားအလာမကောင်းဘူးလို့ ကျနော်တို့ မြင်ရမှာဖြစ်တယ်။”

တပ်မတော်နဲ့ NLD ကြားက ထိပ်တိုက်တွေ့ဆုံမှုဟာ NLD ဦးဆောင်တဲ့ လွှတ်တော်စတင်ချိန်ထဲက စတင်ခဲ့တာဖြစ်တယ်လို့ ပြောရမှာပါ။ NLD ပါတီကနေ ရွေးချယ်လိုက်တဲ့ ဒုသမ္မတနဲ့ အခြားသောအစိုးရအဖွဲ့ဝင်တွေအဖြစ်ရွေးလိုက်သူတွေကို ကန့်ကွက်တာတွေလည်း လွှတ်တော်စတင်ထဲက တပ်မတော်ဘက်က လုပ်ဆောင်ခဲ့ဖူးပါတယ်။ ဒီ တကြိမ်ကတော့ NLD ပါတီ ကပထမဆုံးတင်တဲ့ ဥပဒေမှာ ထပ်မံထိပ်တိုက်တွေ့တာပါ။

ဒီဥပဒေကြမ်းကို ပြည်သူ့လွှတ်တော်ကပါအတည်ပြုလိုက်တာကြောင့် သမ္မတထံ ဆက်လက်ပေးပို့မှာ ဖြစ်ပြီး သမ္မတဦးထင်ကျော်က လက်မှတ်ထိုးပြီးရင် ဥပဒေအတည်ဖြစ်ပါပြီ။ အာဏာရ NLD ပါတီ က ဒေါ်အောင်ဆန်း စုကြည်ကို သမ္မတတင်မြောက်နိုင်ဖို့ စီစဉ်ထားပေမယ့် ကန့်သတ်ခံထားရတဲ့ အခြေအနေကြောင့် ပုံစံတမျိုးနဲ့ ဥပဒေနဲ့အညီ ဦးဆောင်နိုင်ရန် ဒီကိစ္စကို စီစဉ်ရခြင်း ဖြစ်တယ် လို့ ပြောဆိုနေ တာတွေ ရှိနေပါတယ်။ဒေါ်အောင်ဆန်းစုကြည် ကလည်း သမ္မတ ဖြစ်ဖို့ တားဆီးထားတဲ့ ဖွဲ့စည်းပုံအခြေခံဥပဒေကို မပြင်နိုင်ခဲ့ပါက သမ္မတအထက်မှ နေမယ်လို့ ရွေးကောက်ပွဲ မတိုင်ခင် ကတည်းက ပြတ်ပြတ်သားသားပြောဆိုထား ပြီး ဖြစ်ပါတယ်။

မေခ / ဗွီအိုအေ (မြန်မာပိုင်း)
http://burmese.voanews.com

ပင်မကျောင်းသားသပိတ် အကြမ်းဖက်နှိမ်နင်းခံရစဉ် (မတ်လ ၁၀ ရက် ၂၀၁၅)
အစိုးရသစ် လက်ထက် သမ္မတသစ်အနေနဲ့ နိုင်ငံတော်ကာကွယ်ရေးနဲ့ လုံခြုံရေးကောင်စီ ကာလုံနဲ့ညှိနှိုင်းပြီး အဖမ်းဆီးခံ သပိတ်မှောက် ကျောင်းသူကျောင်းသားတွေကို သမ္မတသစ်ရဲ့ လုပ်ပိုင်ခွင့်အာဏာ နဲ့ အမြန်ဆုံး လွှတ်ပေးစေလိုပါတယ် လို့ ကျောင်းသားမိဘတွေနဲ့ ကျောင်းသားအရေး တက်ကြွလှုပ်ရှားသူတွေက တောင်းဆိုလိုက်ပါတယ်။ သပိတ်မှောက်ကျောင်းသားတွေနဲ့ ဝန်းရံပြည်သူတွေကို ထောင်သွင်း အကျဉ်းချခံထားရတာ တစ်နှစ်ကျော်သွားပြီဖြစ်လို့ အမြန်ဆုံးလွှတ်ပေးဖို့ အစိုးရသစ်ကို အခုလို တောင်းဆိုနေတာလည်းဖြစ်ပါတယ်။ အပြည့်အစုံ မဆုမွန် စုစည်းတင်ပြပေးထားပါတယ်။

သာယာဝတီ အကျဉ်းထောင်မှာ အထိန်းသိမ်းခံ ထား ရတဲ့ ကျောင်းသားခေါင်းဆောင်တွေ သပိတ်မှောက် ကျောင်းသား၊ ကျောင်းသူတွေ ဒီနေ့ဧပြီလ ၅ရက်နေ့ အင်္ဂါနေ့ သာယာဝတီခရိုင်တရားရုံးမှာ ရုံးထုတ်စစ်ဆေးပြီး ဧပြီလ ၈ရက်နေ့ ရုံးချိန်းပြန်ချိ်န်းထားပါတယ်။

ဒီမိုကရေစီ ပညာရေးစနစ် ဖြစ်ပေါ်လာရေး မန္တလေးကနေ ရန်ကုန်အထိ သပိတ်မှောက် ခရီးရှည် ချီတက်လမ်းလျှောက်ဆန္ဒပြရင်း လက်ပံတန်းမြို့မှာ အကြမ်းဖက်ဖြိုခွင်းခံရလို့ ပြီးခဲ့တဲ့နှစ် မတ်လ ၁၀ရက်နေ့ကစလို့ ဖမ်းဆီးထားပြီး သာယာဝတီတရားရုံးအပြင် ရန်ကုန်မြို့က တရားရုံးတွေမှာ တရားရင်ဆိုင်လာခဲ့ရတာ တစ်နှစ်ကျော်လာပြီဖြစ်ပါတယ်။

အစိုးရဟောင်းအာဏာမလွှဲခင် ကျောင်းသားတွေကို လွှတ်ပေးခဲ့ဖို့ တောင်းဆိုခဲ့သလို အာဏာလွှဲပြောင်းပြီးနောက်ပိုင်း အခုအစိုးရသစ် လက်ထက်မှာလည်း အဖမ်းဆီးခံ ကျောင်းသားတွေကို အမြန်ဆုံးပြန်လွှတ်ပေးဖို့ ကျောင်းသားမိဘတွေကတော့ မျှော်လင့်နေကြတာပါ။

ချက်ခြင်းပြန်လွှတ်ပေးမယ်လို့ ယုံကြည်မှု မရှိပေမဲ့ အစိုးရသစ်လက်ထက်မှာတော့ တရားဥပဒေနဲ့အညီ သမာသမတ် ကျကျ ဆုံးဖြတ်ပြီး လွှတ်ပေးလိုက်မယ်လို့ ထင်ကြောင်း ကျောင်းသားသပိတ်ဦးဆောင်သူ ကျောင်းသားခေါင်းဆောင် မင်းသွေးသစ်ရဲ့မိခင် ဒေါ်ခင်ယုကပြောပါတယ်။

“မိဘတွေအနေနဲ့ကတော့ နှစ်သစ်ကူး မတိုင်ခင် လွှတ်လိမ့်မယ်လို့တော့ အားလုံးက မျှော်လင့်တာပေါ့နော်။ တမင်သက်သက်လေ သက်သက် ယုတ်မာပြီးတော့ လေးပွင့်ဆိုင် ကတိတွေလည်း သူတို့ချိုးဖျက်တယ်။ ကျောင်းသားတွေက အေးအေးဆေးဆေးအဖမ်းခံပါ့မယ်လို့ ပြောထားတာကိုလည်းပဲ မတရားရိုက်နှက် ဖမ်းဆီးပြီးတော့ သားဆိုလို့ရှိရင်လည်း သေပြီ လို့တောင် သတင်းထွက်တာလေ ကံကောင်းလို့ အသက်မသေပဲနဲ့ အခုအချိန်မှာဆို သူတို့ ရိုက်နှက်ထားတဲ့ ဒဏ်ရာတွေနဲ့ အတွင်းကြေ ဒဏ်ရာတွေရပြီး အတွင်းကြေဒဏ်ရာတွေရှိတယ်။ ရောဂါတွေက သူတို့မှာ ရှိနေကြတယ်လေ။ တစ်နှစ်လည်း ကျော်လာပြီ။ မိဘတွေမှာလည်း တော်တော်လေးကို ခံစားရတာပေါ့နော်။

အန်တီတို့မိဘတွေအနေနဲ့ကတော့ မျှော်လင့်ချက်တွေကတော့ ထားပါတယ်။ ဒါပေမဲ့ မျှော်လင့်ချက်ထားသလိုဖြစ်မလာလို့ရှိရင် ပိုပြီးတော့ ခံစားရမှာမို့လို့ အန်တီအနေနဲ့ကတော့ ယုံကြည်ချက် မျှော်လင့်ချက်တွေ တအားတော့ မထားဘူးပေါ့။ ဒါပေမဲ့ ဖြစ်စေချင်တာပေါ့။ ဒီမိုကရေစီအစိုးရ သမာသမတ် မျှတတဲ့ သမ္မတတွေ အစိုးရတွေ တက်နေပြီ။ နိုင်ငံ့ခေါင်းဆောင်တွေ တက်နေပြီဆိုတော့ အန်တီတို့အနေနဲ့ကတော့ ပထမအစိုးရထက် ပိုပြီးတော့ အားကိုးတယ်။ အားထားတယ်ပေါ့နော်။”

အထိန်းသိမ်းခံ ဗကသ ကျောင်းသားခေါင်းဆောင် မဟန်နီဦးရဲ့ ဖခင် နိုင်ငံရေး အကျဉ်းသားဟောင်းတဦးလည်းဖြစ်တဲ့ ဦးထွန်းဦးကတော့ အစိုးရသစ်ရဲ့ ရင်ဆိုင်နေရတဲ့ စိန်ခေါ်မှုတွေအပေါ် နားလည်ပေမဲ့လို့ ကျောင်းသားတွေ အမြန်ဆုံးလွတ်မြောက်ရေး ဆောင်ရွက်ပေးစေလိုပါတယ်လို့ အခုလိုပြောပါတယ်။

“အစိုးရသစ်ကတော့ဗျာ နှစ်ငါးဆယ်လုံးလုံး အုပ်စိုးခဲ့တဲ့ စစ်အစိုးရ အုပ်ချုပ်မှုအောက်က လွတ်မြောက်စပဲရှိသေးတယ်လေ။ ပြည်သူအစိုးရ အနေနဲ့ အခုမှ စကာစ ဆိုတာတောင်မှ မွေးကာစ ကလေးလေးလို့တောင် ပြောလို့မရသေးတဲ့ အခြေအနေမျိုးမှာရှိတော့ သူ့ကို ကျနော်တို့ အများကြီးပြုစုပြီးတော့ အရွယ်ရောက်အောင် လုပ်ရဦးမယ့် သဘောမှာ ရှိပါတယ်။ တချို့ကိစ္စလေးတွေက အားနည်းချက် ရှိကောင်းရှိနိုင်တယ်လေ။ အဲ့ဒီ့အတွက်တော့ ကျနော်တို့က နားလည်မှု ပေးရမှာပေါ့ဗျာ။

ဒါပေမဲ့ ပြည်သူလူထု အစိုးရတရပ်ဖြစ်လာပြီးတော့ ပထမဆုံး လုပ်သင့်တာကတော့ ကျောင်းသားတွေရဲ့ အခန်းကဏ္ဍ အလွန်အရေးကြီး ပါတယ်။ ကျောင်းသားတွေကို ဦးစားပေး ပထမဦးဆုံး ဆောင်ရွက်ပေးနိုင်ခြင်းကာသာလျှင် ကောင်းမွန်တဲ့ မြန်မာပြည်ရဲ့ သမိုင်းကို စမယ်လို့ ကောင်းမွန်တဲ့ အစိုးရတရပ်ကို ပိုပြီး အားပြုနိုင်မယ်လို့ ကျနော်ကတော့ ထင်ပါတယ်ခင်ဗျာ။”

အမျိုးသားဒီမိုကရေစီအဖွဲ့ချုပ် NLD ဦးဆောင်တဲ့ အစိုးရသစ်လက်ထက် သမ္မတသစ်အနေနဲ့ နိုင်ငံတော်ကာကွယ်ရေးနဲ့ လုံခြုံရေးကောင်စီ ကာလုံနဲ့ညှိနှိုင်းပြီး အဖမ်းဆီးခံ သပိတ်မှောက် ကျောင်းသူကျောင်းသားတွေကို သမ္မတသစ်ရဲ့ လုပ်ပိုင်ခွင့်အာဏာနဲ့ လွတ်အောင် လုပ်ပေးစေလိုပါတယ်လို့လည်း ဒီမိုကရေစီပညာရေးသပိတ် ကျောင်းသားအထောက်အကူပြုကော်မတီက ဦးဇော်ရမ်းကလည်း ပြောပါတယ်။

“ကျနော်တို့ ဆန္ဒအရတော့ ချက်ခြင်း လွှတ်ပေးစေချင်ပါတယ်။ ဘာဖြစ်လို့လဲဆိုတော့ သူ့ ဖွဲ့စည်းပုံအခြေခံဥပဒေ ပုဒ်မတွေအရလည်း သမ္မတ က လွှတ်ခွင့်ရှိတယ်ပေါ့။ နောက်တခုက ကာလုံပေါ့။ ကာလုံနဲ့ တိုင်ပင်ပြီးလည်း လွှတ်လို့ရတယ်ပေါ့။ အဲ့တာက လွှတ်လို့ရတဲ့ အခင်းအကျင်း တခုပေါ့၊ နောက်တခုက မြန်မာနိုင်ငံရဲ့ အထွေထွေနိမ့်ကျနေတဲ့ ပညာရေးကို ပြုပြင်ပြောင်းလဲဖို့ တောင်းတဲ့ ကျောင်းသားတွေကို ဘယ်လိုအကြောင်းကြောင်းနဲ့မှ ဒီအချိန်မှာ ထိန်းသိမ်းထားတာ၊ ဖမ်းထားခြင်းအားဖြင့် ကျနော်တို့ ဘယ်လိုမှ အကျိုးမရှိပါဘူး။ ဒီကျောင်းသားတွေကို တစ်မိနစ် ဖမ်းထားတာကို တစ်မိနစ် တိုင်းပြည်အတွက် အကျိုး မရှိပါဘူး။ လွှတ်စေချင်ပါတယ်ခင်ဗျာ။”

သပိတ်မှောက်ကျောင်းသားကိုယ်စားလှယ်တွေ၊ အစိုးရနဲ့ လွှတ်တော်၊ ပညာရေးဝန်ကြီးဌာနတာဝန်ရှိသူတွေ ၊ NNER တာဝန်ရှိသူတွေ သဘောတူထားတဲ့ လေးပွင့်ဆိုင်ဆွေးနွေးပွဲရလဒ်တွေ အစိုးရသစ်လက်ထက် ဆက်အကောင်အထည်ဖော်နိုင်ရေး အပါအဝင် ကျောင်းသားတွေရဲ့ တောင်းဆိုချက်(၁၁) ချက်တွေ ရရှိရေးကိုလည်း ကျောင်းသားတွေက ဆက်လက်ကိုင်စွဲထားကြဆဲဖြစ်ပါတယ်။

ဒီကနေ့လွှတ်တော်မှာ ပညာရေးဝန်ကြီးအဖြစ် ဒေါက်တာမျိုးသိမ်းကြီးကို အတည်ပြုခန့်အပ်လိုက်တဲ့အပေါ် ပေညာရေးလောကသားတွေအကြားမှာရော အမျိုးသားပညာရေးဥပဒေကို ကန့်ကွက်ခဲ့ကြတဲ့ ကျောင်းသားတွေ အကြားမှာပါ မေးခွန်းထုတ်ခဲ့ကြပါတယ်။ အထူးသဖြင့်တော့ သူဟာ သမ္မတဦးသိန်းစိန် အစိုးရလက်ထက် အမျိုသားပညာရေး ဥပဒေပေါ်ပေါက်ရေးနဲ့ ပညာရေးပြုပြင်ပြောင်းလဲရေးလုပ်ငန်းစဉ်တွေမှာ ဦးဆောင်ခဲ့သူဖြစ်တာတာမို့၊ ပညာရေးလေးပွင့်ဆိုင်ဆွေးနွေးပွဲတွေမှာ ကျောင်းသားတွေနဲ့ ထိပ်တိုက်တွေ့ခဲ့သူတဦးဖြစ်ပါတယ်။

မဆုမွန် / ဗွီအိုအေ (မြန်မာပိုင်း)
http://burmese.voanews.com


နေပြည်တော် ဧပြီ ၅

နိုင်ငံတော်သမ္မတ ဦးထင်ကျော်ထံ ကုလသမဂ္ဂအတွင်းရေးမှူးချုပ် မစ္စတာ ဘန်ကီမွန်းက ယနေ့ ညနေ ၄ နာရီခွဲတွင် တယ်လီဖုန်းဆက်၍ နိုင်ငံတော်သမ္မတ တာဝန်ဝတ္တရားများကို စတင်ထမ်းဆောင်ခြင်းအတွက် ၀မ်းမြောက်ဂုဏ်ယူကြောင်းနှင့် ကုလသမဂ္ဂအနေဖြင့် မြန်မာနိုင်ငံကို ဆက်လက်ကူညီ ပံ့ပိုးပေးသွားမည်ဖြစ်ကြောင်း ပြောကြားခဲ့သည်။

မစ္စတာ ဘန်ကီမွန်းက နှစ်ပေါင်း(၅၀)ကျော်အကြာ ဒီမိုကရေစီနည်းလမ်းဖြင့် အရပ်သားအစိုးရတစ်ရပ် ရွေးကောက်တင်မြှောက်ခံရခြင်းကို ကြိုဆိုပါကြောင်း၊ မြန်မာ ပြည်သူလူထုအနေဖြင့် နိုင်ငံတော်သမ္မတကြီး၊ အမျိုးသားဒီမိုကရေစီအဖွဲ့ချုပ်၊ ဒေါ်အောင်ဆန်းစုကြည်နှင့် လုပ်ဖော်ကိုင်ဖက်များအား ယုံကြည်မှုရှိသည်ကို ပြသခြင်း လည်းဖြစ်ပါကြောင်း၊ လူထု၏မျှော်မှန်းချက်လည်း များပြားပါကြောင်း၊ နိုင်ငံရေးတွင် အားလုံးပါဝင်သည့် နိုင်ငံရေး၊ ကောင်းမွန်သည့်အဖွဲ့အစည်းများ၊ ဖြစ်ထွန်း ပေါ်ပေါက်စေရန် အားပေးလိုပါကြောင်း၊ အမျိုးသားပြန်လည် ပေါင်းစည်း ရေး မူဝါဒများ အကောင်အထည်ဖော်ခြင်း၊ ပြည်သူလူထု၏ လူနေမှု အဆင့်အတန်း မြှင့်တင်ခြင်း တို့ကိုလည်း ဆောင်ရွက်ပေးနိုင်မည်ဟု မျှော်လင့်ပါကြောင်း၊ မိမိနှင့် ကုလသမဂ္ဂအနေဖြင့် မြန်မာအစိုးရအား ပံ့ပိုးကူညီမှုပေးအပ်သွားမည်ဟု အတည်ပြု ပြောကြားလိုပါကြောင်း ပြောကြားခဲ့သည်။
ထို့ပြင် မိမိအနေဖြင့် မြန်မာနိုင်ငံသို့ ကြိမ်ဖန်များစွာ ရောက်ဖူးသော်လည်း မကြာတော့သောအချိန်တွင် ထပ်မံ၍ အလည်အပတ်လာရောက်ခွင့် ရရှိမည်ဟု မျှော်လင့်ပါကြောင်း၊ နိုင်ငံတော်သမ္မတကြီးနှင့် လာမည့် အာဆီယံအစည်းအဝေးများ တွင်ဖြစ်စေ၊ မြန်မာနိုင်ငံသို့ အလည်အပတ်ခရီးလာရောက်၍ဖြစ်စေ ဆောလျင်စွာ တွေ့ဆုံခွင့်ရရှိရန် မျှော်လင့်ပါကြောင်းနှင့် နိုင်ငံတော်သမ္မတကြီး တာဝန်ထမ်းဆောင် ရာတွင် အောင်မြင်မှုများရရှိစေရန် ဆုမွန်ကောင်းများ ပို့သပါကြောင်း ပြောကြားခဲ့သည်။


နိုင်ငံတော်သမ္မတ ဦးထင်ကျော်ကလည်း မိမိအား ယခုကဲ့သို့ နွေးထွေးစွာ ဂုဏ်ယူဝမ်းမြောက်ကြောင်း ဆက်သွယ်ပြောကြားသည့်အတွက် အထူးကျေးဇူးတင်ရှိပါ ကြောင်း၊ မြန်မာနိုင်ငံ၏ စိန်ခေါ်မှုများအပေါ် နားလည်သဘောပေါက်ပြီး မြန်မာနိုင်ငံ အပေါ် ကူညီပံ့ပိုးမှုများ ဆက်လက်ပြုလုပ်သွားရန် ထပ်လောင်းပြောကြားခဲ့သည့်အတွက် ကျေးဇူးတင်ရှိပါကြောင်း၊ မြန်မာနိုင်ငံအနေဖြင့် ကုလသမဂ္ဂ၏ ပံ့ပိုးကူညီမှုကို များစွာ တန်ဖိုးထားပါကြောင်း၊ ကုလသမဂ္ဂနှင့် နီးကပ်စွာ ဆက်လက်ပူးပေါင်းဆောင်ရွက် သွားမည် ဖြစ်ပါကြောင်း၊ နိုင်ငံအတွင်း တည်ငြိမ်အေးချမ်းရေး၊ လူမှုစီးပွားဖွံ့ဖြိုးတိုး တက်ရေး၊ လူ့အခွင့်အရေးတိုးမြှင့်ကာကွယ်ရေးတို့ကို ကြိုးပမ်းဆောင်ရွက်သွား မည်ဖြစ်ပါကြောင်း၊ နိုင်ငံတကာမျက်နှာစာတွင် နိုင်ငံတကာ ငြိမ်းချမ်းရေးနှင့် လုံခြုံရေးကို ထိန်းသိမ်းရေး၊ စဉ်ဆက်မပြတ် ဖွံ့ဖြိုးတိုးတက်ရေး၊ ပတ်ဝန်းကျင်ထိန်းသိမ်းရေး စသည့် ကိစ္စရပ်များတွင် ဆက်လက်ပူးပေါင်း ဆောင်ရွက်သွားမည်ဖြစ်ပါကြောင်း ပြောကြားခဲ့သည်ဟု သတင်းရရှိသည်။

Myanmar President Office
https://www.facebook.com/myanmarpresidentoffice.gov.mm/


နေပြည်တော်၊ ဧပြီ-၅။

 ပြည်ထောင်စု လွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင် တွင်လစ်လပ်(၄)နေရာဖြည့်စွက်မှုတွင် NLDဗဟိုကော်မတီ ဦးဝင်းထိန် အား ထည့်သွင်းဖွဲ့စည်းခဲ့ ကြောင်း သိရသည်။

ယနေ့ပြုလုပ်သော ဒုတိယအကြိမ် ပြည်ထောင်စုလွှတ်တော် ပထမပုံမှန်အစည်းအဝေး(၁၇)ရက်မြောက် အစီအစဉ်တွင် ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များလေ့လာ ဆန်းစစ် သုံးသပ်ရေးကော်မရှင်တွင်အဖွဲ့ဝင်(၄)ဦး နုတ်ထွက်ခွင့်ပြုခြင်းကို လွှတ်တော်သို့ တင်ပြခြင်းနှင့် အဖွဲ့ဝင်အသစ်(၄) ဦးထည့်သွင်းဖွဲ့စည်းခြင်းအတွက် လွှတ်တော်၏ သဘောတူညီချက် ရယူခြင်း အစီအစဉ်တွင် ပြည်ထောင်စုလွှတ်တော်နာယကမှ ကော်မရှင်တွင် လစ်လပ်သွားသူများ၏ အမည်စာရင်းဖတ်ကြား ခဲ့ပြီး ယင်း လစ်လပ်သွားသောနေရာများ အစားထိုး အမည်စာရင်းအား ဖတ်ကြားရာတွင်NLDဗဟိုကော်မ တီဦးဝင်းထိန်ပါဝင်လာခဲ့သည်။

 ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင်အဖွဲ့ဝင်များအနက်မှ အဖွဲ့ဝင် (၄)ဦးမှာ ၂၀၁၆ခုနှစ် မတ်လ(၃၁)ရက်မှစ၍ ပြည်ထောင်စုအဆင့်အဖွဲ့ အစည်းဝင်များအဖြစ် သတ်မှတ်ခံရသဖြင့် ၎င်းတို့ဆန္ဒအရ နုတ်ထွက်ခွင့်ပြုခဲ့ပါကြောင်း ၊ ၎င်းတို့မှာဒေါက်တာဝင်းမြတ်အေး၊ (ဒုတိယဥက္ကဋ္ဌ-(၂)၊ဒေါက်တာမြင့်ထွေးအဖွဲ့ဝင်၊ ဦးစိုးရယ်အဖွဲ့ဝင်နှင့်ဦးအောင်မြင့်အဖွဲ့ဝင်တို့ဖြစ်ကြ ကြောင်း၊ ယင်းသို့နုတ်ထွက်ခဲ့သောကော်မရှင်အဖွဲ့ဝင်နေရာများတွင်အဖွဲ့ဝင် အသစ်အဖြစ် ဒေါက်တာသန်းဝင်း အမျိုးသားလွှတ်တော်ကိုယ်စားလှယ်၊ မန္တလေးတိုင်း မဲဆန္ဒနယ်အမှတ်(၁)မှ ဒုဥက္ကဋ္ဌအဖြစ်လည်းကောင်း၊ အဖွဲ့ဝင်များအဖြစ်ဦးဝင်းထိန် (လွှတ်တော်ကိုယ်စားလှယ်ဟောင်း)၊ ဦးညီထွန်းအဖွဲ့ဝင်(၀န်ထမ်းရွေးချယ် လေ့ကျင့်ရေးညွန်ကြားရေးမှူးချုပ်-ငြိမ်း)၊ ဦးဘိုဝင်း (ညွန်ကြား ရေးမှူး-ငြိမ်း၊ပညာရေးစီမံကိန်းနှင့် လေ့ကျင့်ရေးဦးစီးဌာန၊ ပညာရေးဝန်ကြီးဌာနတို့အားလည်းကောင်း ခန့်အပ်တာဝန်ပေးခဲ့ပြီး လွှတ်တော်မှ သဘောထား တောင်းခံရာ သဘောတူသဖြင့် အတည်ပြုခဲ့သည်။

ဖိုးသားကြီး
china.com Myanmar
https://www.facebook.com/china.com.mm


ရန်ကုန် ဧပြီ ၅

ကျူးကျော်နေထိုင်သူများကို ယခင်အစိုးရက ဖြေရှင်းခဲ့သည့် အကြမ်းဖက် ဖြေရှင်းသည့်နည်း လမ်းများသည် နှစ်ဦးနှစ်ဖက်ထိခိုက်စေ သည့် နည်းလမ်းများဖြစ်သည့်အတွက် အရပ်သားအစိုးရ သစ် အနေဖြင့် ညှိနှိုင်းသည့် နည်းလမ်းကို အသုံးပြုစေချင်သည် ဟု လှိုင်သာယာ ရွှေသံလွင်ဝန်းတွင်နေထိုင်သည့် ကျူးကျော်ဟု သတ်မှတ်ခြင်းခံရသူများက က ဧပြီလ၅ရက်က လှိုင်သာယာတွင် ပြုလုပ်သည့် သတင်းစာ ရှင်းလင်းပွဲ တွင် တောင်းဆိုခဲ့သည်။

ယခင်အစိုးရလက်ထက်က အကြမ်းဖက် နှင်ထုတ်ခြင်း၊ လူမိုက်များ ငှါးရမ်းကာ ဖြေရှင်းခြင်း စသည့် နည်းလမ်းများသည် နှစ်ဦးနှစ်ဖက်ကို ဂုဏ်သိက္ခာမဲ့စေပြီး ကျူးကျော်နေထိုင်သူများ လည်း နေစဉ်နှင့်အမျှစိုးရိမ်စိတ်များဝင်နေရကြောင်း၊သို့သော် ယခုအာဏာရလာသည့် NLD အစိုးရသည် ကျူးကျော်ပြသနာများကို အကောင်း ဆုံး ဖြေရှင်းနိုင်မည်ဟု မျှော်လင့်ထားကြောင်း ဧရာဝတီတိုင်းမှပြောင်းရွေ့လာသူ ဒေါ်အေးမိုးခိုင်က ဆိုသည်။

လှိုင်သာယာမြိုနယ် ရွေသံလွင်ဝင်းနေ ကျူးကျော်ဟု သတ်မှတ်ခံထားရသည့် ရပ်ကွက်သူ ရပ်ကွက်သားများက ၄င်းတို့ကို ကျူးကျော်ဟု ထင်မြင်နေသည့် အမြင်များကို ပြောင်းလဲစေရေး အတွက် သန့်ရှင်းသပ်ရပ်စွာနေထိုင်ရေးအတွက် အမှိုက်များကို ရှင်းလင်းနေပြီး အမှိုက်ပစ်ရန် နေရာသတ်မှတ်ပေးရန် နှင့် အမှိုက်သိမ်းဝန် ဆောင်မှုများကို ဖြည့်ဆည်းပေးရန် တောင်းဆိုခဲ့သည်။အဆိုပါ ရပ်ကွက်ရှိ ကျူးကျော်အများစုသည် ဧရာဝတီတိုင်း မှ လာရောက် အခြေချနေထိုင်သူများ ဖြစ်ပြီး အိမ်ခြေပေါင်း ၁၁၀၀ ကျော် ရှိပြီး လူဦးရေ ၅၀၀၀ကျော်လက်ရှိ နေထိုင်နေကြောင်း သိရသည်။

အောင်သော်ဖြိုး
photo credit: Tike zin
china.com Myanmar
https://www.facebook.com/china.com.mm


The Moscow TimesApr. 05 2016 12:08

ရုရှေ တာင်ပိုင်း Dagestan တာကစ္စတန် နိုင်ငံ မှ နဘန်း သမား ဂိုရိုဒိုဗီကိုဘာ နဲ့ အဖွဲ့ က ကယ်မိုင်ကီရား ဗုဒ္ဓကျောင်းတော်ကို အလည်အပါတ်သွား ခဲ့စဉ်မှာ ရုပ်ပွားတော် တဆူ ရဲ့ မျက်နှာတော် ကိုခြေထောက်နဲ့ ကန်နေသည့်ပုံကို သူ့ ရဲ့  ကိုယ်ပိုင် ဖေ့ဘုတ် စာမျက်နှာမှာ တင်ခဲ့ကြောင်း ရုရှ ပြည်တွင်းမီဒီယာတွေ မှာဖေါ်ပြနေပါတယ်။

ယခုလုပ်ရပ်ကြောင် ရုရှမှာရှိတဲ့ ဗုဒ္ဓဘာသာဝင်တွေဟာ စုရုံးခဲ့ကြပြီး သူတည်း ခိုနေ တဲ့ နေရာကိုင်း ၀ိုင်းပိတ် ပြီး ဆန္ဒပြခဲ့ကြပါတယ်။

လူအုပ်ကြီးက အဆိုပါ နဘန်း သမားGorodovikova ဂိုရိုဒိုဗီကိုဘာ ကို ဟော် တည်အပြင်ဘက် တရွတ်တိုက် ဆွဲထုတ်လာကြပြီး ထူးထောက် တောင်းပန် ခိုင်းခဲ့ကြပါတယ် နောက်ပိုင်း မှာ ရဲတပ်ဖွဲ့ ဝင်တွေက အခြေအနေ ကိုဝင်ရောက် ထိမ်းသိမ်းခဲ့ရတယ်လို့  ဖေါ်ပြထားပါတယ်။

ခုလိုဘာသာရေးကို စော်ကားတဲ့လုပ်ရပ်အတွက် နဘန်းပြိုင်ပွဲ အတွင်း ၀င်ရောက် ယျဉ်ပြိုင်မယ့် ပွဲစဉ်တွေကို ပိတ်ပင်လိုက်ပြီး ဆက်လက်စုံ စမ်းစစ်ဆေးနေရာမှာ အဆိုပါ နဘန်းအုပ်စုဟာ ဆီးရီးယား နိုင်ငံတွင်းက ISIS အကြမ်းဖက်အဖွဲ့ နဲ့ အဆက်အသွယ်ရှိနေတယ် လို့ လည်း မော်စကိုတိုင်းသတင်းမှာဖေါ်ပြ ထားပါတယ်။

hemoscowtimes
Social Action for Women - SAW
https://www.facebook.com/Social-Action-for-Women-SAW


NLD အစိုးရသစ်ဟာ တာဝန်ယူတာ တစ်ပတ်ကြာမြင့်တဲ့အချိန်မှာ တရုတ်နိုင်ငံခြားရေးဝန်ကြီးအနေနဲ့ လာရောက်ဂုဏ်ပြုတဲ့အတွက် ကျေးဇူးတင်ရှိကြောင်း မြန်မာနိုင်ငံခြားရေးဝန်ကြီး ဒေါ်အောင်ဆန်းစုကြည် က ပြောပါတယ်။

ဒီကနေ့ နေပြည်တော် နိုင်ငံခြားရေးဝန်ကြီးဌာနမှာ ကျင်းပတဲ့ တရုတ်နိုင်ငံခြားရေးဝန်ကြီး မစ္စတာ ၀မ်ယီ Wang Yi နဲ့ ပူးတွဲသတင်းစာရှင်းလင်းပွဲမှာ ဒေါ်အောင်ဆန်းစုကြည် က ဂုဏ်ယူကြောင်း ပြောကြားတာဖြစ်ပါတယ်။

မြန်မာနိုင်ငံရဲ့ နိုင်ငံခြားရေးမူဝါဒဟာ တကမ္ဘာလုံးနဲ့ ခင်မင်ရင်းနှီးစွာဆက်ဆံရေး၊ လူသားအားလုံး တိုးတက်ရေး ဆိုတဲ့ ယုံကြည်ချက်အရ ချမှတ်ထားတာဖြစ်ကြောင်းလည်း ဒေါ်အောင်ဆန်းစုကြည် က ပြောပါတယ်။

တရုတ်နိုင်ငံခြားရေးဝန်ကြီး က မြန်မာနဲ့ တရုတ် နှစ်နိုင်ငံဆက်ဆံရေးဟာ ချစ်ကြည်ရေးပေါ်လစီအဖြစ် ဆက်လက်ထားရှိသွားမှာဖြစ်ပြီး တည်ငြိမ်မှုရှိတဲ့ ချစ်ကြည်ရေးအဖြစ် စကားပြန်ကတဆင့် ပြောကြားပါတယ်။

ဒါ့အပြင် မြန်မာနိုင်ငံရဲ့ စီးပွားရေးကဏ္ဍ ဖံွ့ဖြိုးတိုးတက်ရေးနဲ့ မြန်မာပြည်သူတွေရဲ့ဘ၀မြှင့်တင်ရေးတွေမှာ တရုတ်အစိုးရက ပူးပေါင်းဆောင်ရွက်သွားမယ်လို့ ပြောကြားပါတယ်။

RFA Burmese
https://www.facebook.com/RFA-Burmese

ပြည်ထောင်စုသမ္မတမြန်မာနိုင်ငံတော်
နိုင်ငံတော်သမ္မတရုံး
အမိန့်အမှတ်၊ ၁၃/၂၀၁၆
၁၃၇၇ ခုနှစ်၊ တပေါင်းလပြည့်ကျော် ၁၃ ရက်
(၂၀၁၆ ခုနှစ်၊ ဧပြီလ ၅ ရက် )
 ဒုတိယဝန်ကြီး ခန့်အပ်တာဝန်ပေးခြင်း 


 တရုတ်နိုင်ငံခြားရေးဝန်ကြီး မြန်မာနိုင်ငံကို လာရောက်ခဲ့တာက အစိုးရသစ်ကို ဂုဏ်ပြုဖို့ အဓိကထားတာဖြစ်တယ်လို့ ဒေါ်အောင်ဆန်းစုကြည် က မီဒီယာတွေကိုပြော ပါတယ်။
သူမက"ကျွန်မတို့ အစိုးရအဖွဲ့ကို ဂုဏ်ပြုဖို့လာတာပါ၊ တခြားထူးထူးထွေထွေ အသေးစိတ်ဆွေးနွေးတာ ဘာမှမရှိပါဘူး၊" မြန်မာနိုင်ငံ နိုင်ငံခြားရေး ဝန်ကြီး လူထုခေါင်းဆောင် ဒေါ်အောင်ဆန်းစုကြည်က ပြောပါတယ်။

မြစ်ဆုံစီမံကိန်းနဲ့ပတ်သက်ပြီးလည်း စာချုပ်ကို သူမကိုယ်တိုင်မဖတ် ရသေးတာကြောင့် ပြည်သူလူထုထံ ချပြဖို့ ခက်ခဲတယ်လို့ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်က သတင်းစာရှင်းလင်းပွဲမှာ မီဒီယာတွေကို ပြောပါတယ်။

“စာချုပ်က ကျွန်မတောင်မှ မဖတ်ရသေးဘူး အဲဒီတော့ ပြည်သူလူထုကို ချပြဖို့ဆိုတာ ခက်ပါလိမ့်မယ်။ နိုင်ငံခြားရေးဝန်ကြီး မြန်မာနိုင်ငံကိုလာတာက အစိုးရအဖွဲ့သစ်ကို ဂုဏ်ပြုဖို့၊ ဒါတွေကို အလေးထားပြီးပြောဖို့ဖြစ်ပါတယ်။ တစ်ခြားကိစ္စတွေကို အလေးထားပြီး ဆွေးနွေးတာမရှိပါဘူး။ တစ်ချို့ကိစ္စတွေကို ထည့်ပြောသွားတာပဲရှိပါတယ်၊ ဆွေးနွေးတာမရှိပါဘူး"လို့ သူက ပြောပါတယ်။

နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်နဲ့ တရုတ်နိုင်ငံခြားရေးဝန်ကြီး ၀မ်ယီ တို့ သည်နေ့ညနေ ၃နာရီခန့်က တွေ့ဆုံခဲ့ပြီးနောက်မီဒီယာများနှင့်တွေ့ဆုံရာမှာအခုလိုတွေပြောကြားခဲ့တာပါ။

Author/photo -ဖေသက်ထက်ခင်
Kumudra
https://www.facebook.com/newsKumudra


ဧပြီ ၄ ရက်

ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း နှင့် ဒဂုံတက္ကသိုလ် ကျောင်းသားများ သမဂ္ဂတို့ သည် ဧပြီ ၄ရက်က ရန်ကုန်တိုင်းဒေသကြီး အစိုးရ ဝန်ကြီးချုပ် ရုံးခန်းတွင် တွေ့ ဆုံခဲ့ကြောင်း သတင်းရရှိသည်။

ထိုသို့တွေ့ ဆုံရာတွင် ဒဂုံတက္ကသိုလ် ကျောင်းသားသမဂ္ဂ မှ ဥက္ကဋ္ဌ ကိုမင်းသုခ ၊ ဘဏ္ဍာရေးတာဝန်ခံ ကိုပြည့်ဖြိုးမောင်တို့ ပါဝင်ခဲ့ပြီး ဒဂုံတက္ကသိုလ်ရှိ ကန်တင်းစားသောက်ကုန်များ ဈေးမြင့်မားနေမူအပေါ် ဆွေးနွေးခဲ့သည် ။

ဝန်ကြီးချုပ် က ပြန်လည်ဆွေးနွေးရာတွင် ကျောင်းသား၊သူများ စားသောက်ကုန်ဈေးနူန်း မြင့်မားနေမူကို ဖြေရှင်းပေးမည်ဖြစ်ကြောင်း ယခုနှစ်အတွက် တက္ကသိုလ်ရှိ စားသောက်ဆိုင် ခန်း ငှါးရမ်းမူစနစ်ကို ကျောင်းသား၊ သူများ ၊ ကန်တင်းပိုင်ရှင်များ၏ ဆန္ဒ အတိုင်း အမြန်ဆုံးပြုပြင်ပေးမည် ဖြစ်ကြောင်း ပြောဆိုခဲ့သည်။

 လေလံစနစ်နှင့်ပက်သက်ပြီး ဖြေရှင်းချက်ပေးရန် ဒဂုံတက္ကသိုလ် ပါမောက္ခချုပ် ဒေါက်တာလှဌေး နှင့် အဆည တာဝန်ရှိသူများကို ခေါ်ယူထားသည်ဟု ၄င်းကထပ်မံပြောဆိုကြောင်း သတင်းရရှိသည်။

Photo- ဦးဖြိုးမင်းသိန်း
The Street View
https://www.facebook.com/The-Street-View

ပြည်ထောင်စုသမ္မတမြန်မာနိုင်ငံတော်
နိုင်ငံတော်သမ္မတရုံး
အမိန့်အမှတ်၊ ၂၂/၂၀၁၆
၁၃၇၇ ခုနှစ်၊ တပေါင်းလပြည့်ကျော် ၁၃ ရက်
(၂၀၁၆ ခုနှစ်၊ ဧပြီလ ၅ ရက် )

 မြို့တော်ဝန်များအဖြစ် ခန့်အပ်တာဝန်ပေးခြင်း



ပခုက္ကူမြို့ မြို့မဈေးကြီး အနောက်ဘက်တန်းရှိ ရွှေဆိုင် တစ်ဆိုင်မှ ရွှေဆွဲကြိုးများအား ဗိုလ်ကြီးတစ်ဦးမှ လုယူထွက်ပြေးခဲ့မှု ဧပြီ ၄ ရက်နေ့က ဖြစ်ပွားခဲ့ကြောင်း ပခုက္ကူမြို့မ ရဲစခန်းမှ သိရှိရသည်။

ဖြစ်စဉ်မှာ ဧပြီ ၄ ရက်နေ့ မွန်းလွဲ ၁း၃၀ က ဆိုင်ပိုင်ရှင် ဦးအောင်ကျော်မျိုး၊ အသက်(၄၀)နှစ်၊ အမှတ် ၉ ရပ်ကွက်၊ ပခုက္ကူမြို့နေသည် ၎င်းပိုင် ပခုက္ကူမြို့၊ မြို့မဈေးကြီး အနောက် ဘက်တန်း ရုံ ၅ ၊ ဆိုင်ခန်းအမှတ် ၁ ရှိ မြင့်သစ္စာ ရွှေဆိုင်တွင် ဆိုင်ဝန်ထမ်း ၃ ဦးနှင့်အတူ ရွှေရောင်းဝယ်ရေး ပြုလုပ်နေစဉ် အမည်မသိ အမျိုးသားတစ်ဦးမှ ရွှေဆွဲကြိုး ၀ယ်ယူလိုကြောင်း လာရောက် ပြောကြားသဖြင့် ကောင်တာအတွင်း ဆွဲကြိုး ၅ ကုံး၊ စုစုပေါင်းအလေးချိန် ၅ ကျပ် ၁ ပဲ ၁၀ ရွေးတစ်ခြမ်း၊ စုစုပေါင်းတန်ဖိုး ၄၁၄၃၂၀၀ ခန့်အား ထုတ်ယူပြ သနေစဉ် အမည်မသိ အမျိုးသားတစ်ဦးမှ ပိုင်ရှင်အလစ်တွင် ခိုးယူထွက်ပြေးခြင်း ဖြစ်သည်။

ဦးအောင်ကျော်မျိုးမှ ဆွဲကြိုးများ ခိုးယူထွက်ပြေးသွားကြောင်း အနီးပတ်ဝန်းကျင်သို့ အော်ဟစ် အကူအညီ တောင်းခဲ့ရာ ဈေးလုံခြုံ ရေးတာဝန်ကျ ရဲဒုတပ်ကြပ် နေဇာမင်း၊ ရဲတပ်သားတင့်လွင်ဦးတို့မှ ပြည်သူ ၂၀ ဦးခန့်ဖြင့် လိုက်လံဖမ်းဆီးရာ ဈေးတောင်ဘက် ဖောင်တော်ဦးလမ်းမှ ကြယ်စိန်စတိုးဆိုင် အနီးတွင် ရွှေဆွဲကြိုး ၅ ကုံးနှင့်အတူ ဖမ်းဆီးရမိခဲ့ကြောင်း သိရသည်။

ခိုးယူထွက်ပြေးသူအား ပခုက္ကူမြို့မ ရဲစခန်းသို့ ဖမ်းဆီးခေါ်ဆောင်ခဲ့ပြီး ပခုက္ကူမြို့မ ရဲစခန်းမှူး ဒုရဲမှူးကျော်စိုးမှ စစ်ဆေးမေးမြန်းခဲ့ရာ ၎င်းသည် ပခုက္ကူမြို့၊ ခလရ (၂၅၂)မှ ကြည်း ၆၀၈၃၅ ဗိုလ်ကြီးစိုးကျော်ကျော်၊ အသက်(၃၃)နှစ်၊ တပ်ထောက် တာဝန်ခံဖြစ်ပြီး ပခုက္ကူမြို့နေသူ ဖြစ်ကြောင်း စစ်ဆေးသိရှိခဲ့ကြောင်း သိရသည်။

“ဖမ်းဆီးရမိတရားခံက ဗိုလ်ကြီးတစ်ဦး ဖြစ်ပါတယ်။ အကြွေးတွေများ နေလို့ လုပ်မိတာပါလို့ ပြောပါတယ်“ ဟု ပခုက္ကူမြို့မရဲစခန်းမှ ဒုရဲမှူးကျော်စိုးက ပြောကြားသည်။

ဖြစ်စဉ်နှင့်ပက်သက်၍ ရွှေဆွဲကြိုးအား ခိုးယူ ထွက်ပြေးသူ ဗိုလ်ကြီးစိုးကျော်ကျော်အား အရေးယူပေးပါရန် ဦးအောင်ကျော်မျိုးမှ တရားလိုပြုလုပ် တိုင်ကြားခဲ့သောကြောင့် ပခုက္ကူမြို့နယ်၊ မြို့မရဲစခန်းမှ (ပ) ၁၁၅/၂၀၁၆ ၊ ပုဒ်မ-၃၈၀ အရကနဦး အမှုဖွင့်ကာ အမှုစစ်ရဲအုပ်သိန်းဌေးမှ စစ်ဆေးလျက်ရှိကြောင်း သိရသည်။

MMK
The Ladies News
https://www.facebook.com/News.TheLadies

 မန္တလေးတိုင်းဒေသကြီး အစိုးရအဖွဲ့ဝန်ကြီးဌာန ၇-ခုနှင့် ၀န်ကြီးများ တာဝန်ပေး အပ်

ဧပြီ ၅ ။

မန္တလေးတိုင်းဒေသကြီးအစိုးရအဖွဲ့ ၀န်ကြီးဌာန(၆)ခုအတွက် တာဝန်ပေး ဖွဲ့စည်းခြင်းကိုယနေ့ နံနက် ၉-နာရီကပြုလုပ်သည့် တိုင်းဒေသကြီးလွှတ်ေ တာ် ပထမပုံမှန်အစည်းအဝေး(ဒဿ မနေ့) တွင် ဖွဲ့စည်းတာဝန် ပေးအပ်ခဲ့ပြီး စုစုပေါင်းဝန်ကြီးဌာန ၇-ခုရှိကြောင်းသိရသည်။

တိုင်းဒေသကြီးအစိုးရအဖွဲ့တွင် တိုင်းရင်းသားရေးရာဝန်ကြီးဌာနအပါအ၀င် ၀န်ကြီးဌာနပေါင်း၇-ခုဖြင့်ဖွဲ့စည်း ခဲ့ခြင်းဖြစ်ပြီး ၀န်ကြီးဌာန(၆)ခုတွင်တာဝန် ယူမည့် ၀န်ကြီးများက ကျမ်းသစ္စာပြုခဲ့ကြသည်။

ဖွဲ့စည်းခဲ့သည့် ၀န်ကြီးဌာနများမှာ လုံခြုံရေးနှင့် နယ်စပ်ရေးရာဝန်ကြီးဌာန (ဗိုလ်မှူးကြီး မျိုးမင်းအောင်)၊ စည်ပင် သာယာရေးဝန်ကြီးဌာန (ဒေါက်တာ ရဲလွင်)၊ စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီး ဌာန(ဒေါက်တာ စိုးသန်း)၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန (ဦးမျိုးသစ်)၊ လျပ်စစ်၊ စွမ်းအင်နှင့်ဆာက်လုပ်ရေးဝန်ကြီးဌာန(ဦးဇာနည်အောင်)၊ စီမံကိန်းနှင့်ဘဏ္ဍာရေးဝန်ကြီးဌာန(ဦးမြတ်သူ)နှင့် တိုင်းရင်းသားရေးရာ ၀န်ကြီးဌာန(ဦးစိုင်းကျော်ဇော) တို့ဖြစ်သည်။

Mandalay News


 ကချင်ပြည်နယ်ဝန်ကြီးချုပ် ဒေါက်တာခက်အောင် အဆိုပြုတဲ့ ပြည်နယ်ဝန်ကြီး၊ စာရင်းစစ်ချုပ်၊ တရားလွှတ်တော်ချုပ်နဲ့ ဥပဒေချုပ် တို့ကို ကချင်ပြည်နယ်လွှတ်တော်မှာ ဒီကနေ့ ကန့်ကွက်သူမရှိ အတည်ပြုလိုက်ပါတယ်။

အမျိုးသားဒီမိုကရေစီအဖွဲ့ချုပ်ပါတီရဲ့ ပြည်နယ်လွှတ်တော်ကိုယ်စားလှယ်တွေဖြစ်တဲ့ ဦးဝေလင်း၊ ဦးနေဝင်း၊ ဦးမြသိန်း၊ ဦးဝင်းညွန့်၊ ဦး H လအောင် နဲ့ ပြင်ပက ဒေါက်တာ သင်းလွင် တို့ကို ဝန်ကြီးတွေအဖြစ် အတည်ပြုခဲ့တာပါ။ နောက်ပြီး ပြည်နယ် တရားသူကြီးချုပ်အဖြစ် အရင်အစိုးရလက်ထက်က တာဝန်ထမ်းဆောင်ခဲ့သူဖြစ်တဲ့ ဦးတူးဂျာကိုပဲ တာဝန်ပေးခဲ့တာပါ။

ပြည်နယ်ဥပဒေချုပ်ကိုတော့ ဦးဒီဆင်ရမ်နဲ့ ပြည်နယ်စာရင်းစစ်ချုပ်အဖြစ် ဦးတင်လှိုင် တို့ကို အတည်ပြုခဲ့တာဖြစ်ပါတယ်။

ပြည်နယ်ဝန်ကြီးတွေရဲ့ တာဝန်ထမ်းဆောင်ရမယ့် ဋ္ဌာနတွေကို လွှတ်တော်မှာ ဒီကနေ့ ကြေညာခြင်းမရှိပေမဲ့ ဦးဝေလင်းကို စီမံကိန်းနဲ့ ဘဏ္ဍာဝန်ကြီး၊ ဦးနေဝင်းကို စည်ပင် သာယာရေးဝန်ကြီး၊ ဦးဝင်းညွန့်ကို စက်မှုလက်မှု၊ လျှပ်စစ်နဲ့ လမ်းပန်းဆက်သွယ်ရေး ဝန်ကြီး၊ ဦးမြသိန်းကို စိုက်ပျိုးရေး၊ မွေးမြူရေး နဲ့ ဆည်မြောင်းဝန်ကြီး၊ ဦးHလအောင် ကို သယံဇာတနဲ့ သဘာဝပတ်ဝန်ကျင်ထိန်းသိမ်းရေးဝန်ကြီး၊ ပညာရှင်ဖြစ်တဲ့ ဒေါက်တာသင်းလွင် ကို လူမှုရေးရာဝန်ကြီးအဖြစ် လျာထားတယ်လို့ သတင်းတွေ ထွက်နေပါတယ်။

အဲ့ဒီပုဂ္ဂိုလ်တွေဟာ လာမယ့် မတ်လ ၈ ရက်နေ့ ပြည်နယ်လွှတ်တော်အစည်းအဝေးမှာ ကတိသစ္စာပြုမှာဖြစ်ပါတယ်။

RFA Burmese
https://www.facebook.com/RFA-Burmese


ဧပြီ ၅ (စစ်တွေ)

ရခိုင်အမျိုးသားပါတီ မှထုတ်ပြန်ထားသည့် ၁/ ၂၀၁၆ နှင့် ၂/၂၀၁၆ တို့အား လိုက်နာမှုမရှိဘဲ ကမ်းလှမ်းထားသည့် ဝန်ကြီးနေရာအား လက်ခံပါက ပါတီ၏စည်းမျဉ်းစည်းကမ်းအတိုင်း ဖြေရှင်းရမည့် ကိစ္စများရှိလာနိုင်ကြောင်း ရခိုင်အမျိုးသားပါတီ အထွေထွေအတွင်းရေးမှူး ဦးထွန်းအောင်ကျော်ကပြောသည်။

ဧပြီလ ၄ ရက်နေ့ကျင်းပခဲ့သည့် ဒုတိယအကြိမ်ရခိုင်ပြည်နယ်လွှတ်တော်အစည်းအဝေး နဝမနေ့တွင် ရခိုင်ပြည်နယ် အစိုးရအဖွဲ့ ဖွဲ့စည်းနိုင်ရန်အတွက် ဝန်ကြီးများအမည်စာရင်းအား နိုင်ငံတော်သမ္မတ၏ သဘောတူညီချက်နှင့် ပြည်နယ်ဝန်ကြီးချုပ်က အဆိုပြုတင်သွင်းခဲ့ရာ၌ ရခိုင်အမျိုးသားပါတီမှ ရမ်းဗြဲမြို့နယ် အမှတ်(၁) မဲဆန္ဒနယ်၊ ကိုယ်စားလှယ် ဦးကျော်လွင်အား ဘဏ္ဍာ၊အခွန် ဝန်ကြီးအဖြစ်အမည်စာရင်း တင်သွင်းခြင်းခံခဲ့ရကြောင်းလည်းသိရသည်။

“ဝန်ကြီးစာရင်းမှာ ပါရင်လဲ၊ ဦးကျော်လွင်ရဲ့ သဘောထားကို ကျွန်တော်တို့မသိရသေးပါဘူး။ တကယ်လို့ သူက ငြင်းဆိုခဲ့ရင် ဘာမှမဖြစ်သော်လည်း တကယ်လို့ ဦးကျော်လွင်ဟာ ပါတီစည်းမျဉ်းစည်းကမ်းအရ ထုတ်ပြန်ထား တဲ့ ကြေငြာချက်တွေကိုထုတ်ပြန်ထားပြီးဖြစ်တယ်။ တကယ်လို့ ကျွန်တော်တို့ပါတီရဲ့ထုတ်ပြန်ချက်တွေကို ကျော်လွန်ပြီး ဝန်ကြီးနေရာလက်ခံခဲ့ရင်တော့ ပါတီနဲ့ ဖြေရှင်းရမဲ့ကိစ္စတွေပေါ်ပေါက်လာမယ်လို့ယူဆတယ်။” ဟု ဦးထွန်းအောင်ကျော်ကပြောသည်။

လက်ရှိအချိန်တွင် ရခိုင်ပြည်နယ်အစိုးရအဖွဲ့ဝင် ဝန်ကြီးနေရာများအား စိုက်ပျိုးမွေးမြူရေး၊ သစ်တောနှင့်သတ္တုဝန်ကြီးအဖြစ် ဦးကျော်လွင်၊ ဘဏ္ဍာအခွန်၊စီမံကိန်းနှင့် စီးပွားရေးဝန်ကြီးအဖြစ် ဦးကျော်အေးသိန်း၊ စည်ပင်သာယာရေးဝန်ကြီး ဦးမင်းအောင်၊ လျှပ်စစ်၊စက်မှုနှင့်လမ်းပန်းဆက်သွယ်ရေးဝန်ကြီးအဖြစ် ဦးအောင်ကျော်ဇံ၊ လူမှုရေးဝန်ကြီး ဒေါက်တာချမ်းသာနှင့် ပြည်နယ်ဥပဒေချုပ်အဖြစ် ဦးကျော်လှထွန်းအားလည်းကောင်း၊ပြည်နယ်စာရင်းစစ်ချုပ် ဒေါ်ယဉ်ယဉ်လှတို့အား အဆိုပြုတင်သွင်းခဲ့ပြီး ယင်းအဆိုအား ဧပြီလ ၆ ရက်နေ့နောက်ဆုံးထား ကန့်ကွက်နိုင်မည်ဖြစ်ပြီး ရခိုင်အမျိုးသားပါတီမှ ဝန်ကြီးအဖြစ် အဆိုပြုခြင်းခံရသူ ဦးကျော်လွင်အား ဖုန်းဆက်သွယ်မေးမြန်းခဲ့သော်လည်း ဆက်သွယ်၍မရှိခဲ့ပါ။

Development Media Group
https://www.facebook.com/DevelopmentNJ


နိရဉ္စရာ၊ ဧပြီ ၅

ယနေ့ ဧပြီလ ၅ ရက်နေ့တွင် ရခိုင်ပြည်နယ် ၀န်ကြီးချုပ် ဦးညီပု လက်မှတ်ရေး ထိုးပေးပို့သော ရခိုင်ပြည်နယ် အစိုးရအဖွဲ့ဝင် ဝန်ကြီးလောင်းများ စာရင်းထဲတွင် ရခိုင်အမျိုးသားပါတီ ANP မှ လွှတ်တော်ကိုယ်စားလှယ် တစ်ဦး ပါဝင်နေကြောင်း သတင်းရရှိသည်။

၎င်းလွှတ်တော်ကိုယ်စားလှယ်မှာ ရမ်းဗြဲမြို့နယ် ပြည်နယ် ကိုယ်စားလှယ် ဦးကျော်လွင် ဖြစ်ပြီး သူ့အား စိုက်ပျိုးရေး၊ မွေးမြူးရေး၊ သစ်တောနှင့် သတ္တုတွင်းဝန်ကြီး အဖြစ် အဆိုပြု တင်သွင်းထားသည်ဟု သိရသည်။

ရမ်းဗြဲမြို့နယ် ရခိုင်အမျိုးသားပါတီမှ ပြည်နယ်လွှတ်တော်ကိုယ်စားလှယ် ဦးကျော်လွင် အပါအ၀င် ပြည်နယ် အစိုးရ အဖွဲ့ဝင် (၇) ဦး အား ပြည်နယ်ဝန်ကြီးချုပ် ဦးညီပု လက်မှတ် ထိုး၍ ယနေ့(ဧပြီလ ၅ ရက်နေ့) ကျင်းပသည့်ဒုတိယအကြိမ် ရခိုင်ပြည်နယ်လွှတ်တော် ပထမပုံမှန်အစည်းအဝေး နဝမနေ့တွင် ပေးပို့ လိုက်ခြင်း ဖြစ်သည်။

တစ်ခြား အမည်စာရင်းပေးပို့ခြင်းခံရသည့် ပြည်နယ်ဝန်ကြီးလောင်းများမှာ ဘဏ္ဍာရေး၊ အခွန်၊ စီမံကိန်းနှင့် စီးပွားရေးဝန်ကြီးအဖြစ် ဦးကျော်အေးသိန်း၊ စည်ပင်သာယာရေး ဝန်ကြီးအဖြစ် NLD ပါတီမှ ဦးမင်းအောင်၊ လျှပ်စစ်၊ စက်မှုနှင့် လမ်းပန်း ဆက်သွယ်ရေး ဝန်ကြီး ဦးအောင်ကျော်ဇံ၊ လူမှုရေးဝန်ကြီးအဖြစ် ဒေါက်တာ ချမ်းသာ၊ ပြည်နယ် ဥပဒေချုပ်အဖြစ် ဦးကျော်လှထွန်းနှင့် ပြည်နယ် စာရင်းစစ်ချုပ် အဖြစ် ဒေါ်ယဉ်ယဉ်လှ တို့ ဖြစ်ကြသည်။

ရခိုင်ပြည်နယ်အစိုးရအဖွဲ့ကို ရခိုင်အမျိုးသားပါတီမှ ဦးဆောင်ခွင့် မရပါက ပြည်နယ် အစိုးရ အဖွဲ့တွင်မပါဝင်ဘဲ အတိုက်အခံ အဖြစ်ရပ်တည်သွားမည်ဟု ရခိုင်အမျိုးသားပါတီ(ANP)က ထုတ်ပြန်ထားသဖြင့် ယခု စိုက်ပျိုးရေး၊ မွေးမြူးရေး၊ သစ်တောနှင့် သတ္တုတွင်းဝန်ကြီးအဖြစ် အမည်စာရင်းပေးပို့ခြင်းခံရသည့် ဦးကျော်လွင်မှာ ANP ပါတီမှဖြစ်နေ၍ ပါတီက မည်သို့ သဘောထားပါသလဲဟု ရခိုင်အမျိုးသားပါတီ၏ အထွေထွေအတွင်းရေးမှူး ဦးထွန်းအောင်ကျော် အား မေးမြန်းရာ သူက “ပြည်နယ်ဝန်ကြီးလောင်း အဖြစ်အမည် စာရင်း ပေးပို့ခံရတဲ့ ဦးကျော်လွင်ရဲ့ သဘောဆန္ဒကို ကျနော်တို့ မသိရသေးဘူး။ ပါတီ စည်းမျဉ်းအရ ၁/၂ဝ၁၆ ကြေညာ ချက်ကို ကျော်လွန်ပြီးတော့ ပါတီရဲ့ သဘောထားနဲ့ ဆန့်ကျင်ပြီးတော့ လက်ခံရင်တော့ ပါတီအနေနဲ့ ဖြေရှင်းရမယ့် အနေ အထားတွေ ဖြစ်လာမှာပါ” ဟု ပြောကြားသည်။

ယခုကိစ္စနှင့်ပတ်သက်ပြီး ဦးကျော်လွင်အား နိရဉ္စရာက ဆက်သွယ်ခဲ့သော်လည်း ဆက်သွယ် မရခဲ့ပါ။

ယခုစာရင်းတွင် စည်ပင်သာယာရေးဝန်ကြီး ဦးမင်းအောင်နှင့် စိုက်ပျိုးရေး၊ မွေးမြူးရေး၊ သစ်တောနှင့် သတ္တုတွင်းဝန်ကြီး ဦးကျော်လွင်တို့မှာ နိုင်ငံရေးပါတီများမှဖြစ်ကြပြီး ကျန်ဝန်ကြီးများမှာ ပြင်ပမှ ပညာရှင်များ ဖြစ်ကြသည်။

အဆိုပါဝန်ကြီးလောင်းများအား ပြည်နယ် လွှတ်တော်ကိုယ်စားလှယ်များ အနေဖြင့် ကန့်ကွက်ရန် ရှိပါက ဧပြီလ ၆ ရက်နေ့ ညနေ ၄ နာရီနောက်ဆုံးကန့်ကွက်နိုင်သည်ဟု ဆိုသည်။

လက်ရှိ ရခိုင်ပြည်နယ်အစိုးရအဖွဲ့တွင် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး ထိန်လင်းနှင့် ချင်းတိုင်းရင်းသားရေးရာဝန်ကြီးအဖြစ် ဦးပုန်ဘွေတို့ကို အတည်ပြု ခန့်အပ်ထားပြီးဖြစ်သည်။

မာန်ယုကျော် (ရွှေဝမြေ)
Arakan State
https://www.facebook.com/NarinjaraNews