10/19/16



ရခိုင်ပြည်နယ် မောင်တောဒေသကို အစားအစာနဲ့ ဆေးဝါးအကူအညီတွေပေးဖို့ သွားရောက်တဲ့ ကယ်ဆယ်ရေး အဖွဲ့အစည်းတွေကို မြန်မာအာဏာပိုင်တွေက ဟန့်တားပိတ်ပင်နေတယ်လို့ ကုလသမဂ္ဂ အရာရှိတဦးက ပြောကြားလိုက်ပါတယ်။

အဲဒီဒေသကို တိုက်ပွဲဖြစ်ပွားရာဒေသအဖြစ် ကြေညာထားပြီး ကုလသမဂ္ဂ လူသားချင်းစာနာမှုအကူအညီတွေ ပို့ဆောင်နိုင်ခြင်းမရှိဘူးလို့ ကုလသမဂ္ဂလူသားချင်း စာနာမှုဆိုင်ရာ ညှိနိုင်းဆောင်ရွက်ရေးရုံးအရာရှိ Pierre Peron ကပြောပါတယ်။

ဒေသခံ ရိုဟင်ဂျာခေါင်းဆောင်တဦးက ကျေးရွာ ၂၁ ရွာက ရွာသူရွာသား ၉ဝဝဝ ခန့် အိုးအိမ်တွေကို စွန့်ခွာထွက်ပြေးနေရတယ်လို့ ပြောဆိုကြောင်းနဲ့ မောင်တောကနေ စစ်တွေကို ကလေးငယ်လေးဦးနဲ့ ထွက်ပြေးလာတဲ့ ဒုက္ခသည်အမျိုးသမီးတဦးကလည်း သူ့ဒေသကို မပြန်ရဲတော့ဘူး အခြေအနေတွေက အရင်ကဖြစ်ပွားခဲ့တဲ့ ဆူပူမှုတွေနဲ့ မတူတော့ဘူး၊ မွတ်စလင်တွေ လက်ထဲမှာ အခု လက်နက်တွေရှိနေပြီလို့ ပြောကြောင်း ရိုက်တာသတင်းမှာ ဖေါ်ပြထားပါတယ်။

RFA Burmese
https://www.facebook.com/rfaburmese



( ရိုးမမြန်မာ ဖန်ချိုခါး လက်ဖက်ထုပ်ကို တွေ့ရစဉ် )Photo: teasalad.com
အမေရိကန်ပြည်ထောင်စု မက်ဆီချူးဆက်ပြည်နယ် အော်စတွန်မြို့မှာရှိတဲ့ Yoma Myanmar Tea ကုမ္ပဏီက ရောင်းချတဲ့ ချဉ်စပ်လက်ဖက်ဘူးတံဆိပ်မှာ မြေပဲပါတယ်လို့ မဖော်ပြထားမိတဲ့အတွက် ဒီလက်ဖက်ဘူးတွေကို ကုမ္ပဏီက သူ့အလိုအလျှောက် ပြန်သိမ်းယူနေတယ်လို့ အမေရိကန် ပြည်ထောင်စု FDA စားသောက်ကုန်နဲ့ ဆေးဝါးအဖွဲ့က မနေ့က ကြေညာပါတယ်။

မြေပဲနဲ့ ဓာတ်မတည့်သူတွေ စားမိရင် အသက်အန္တရာယ် ထိခိုက်နိုင်တဲ့အတွက် ပြန်သိမ်းယူတာဖြစ်ပြီး ၂၀၁၈ ဇွန် ၁၅ ရက်မှာ သက်တမ်းကုန်မယ်လို့ ၇ အောင်စ၀င် ရိုးမချဉ်စပ် လက်ဖက်ဘူးမှာ တံဆိပ်ရိုက်ထားတယ်လို့ ဆိုပါတယ်။ ခုထိတော့ ဒီလက်ဖက်စားလို့ နာမကျန်းဖြစ်ရတယ်ဆိုတဲ့ သတင်းတော့ မရရှိသေးပါဘူး။

ရိုးမကုမ္ပဏီဟာ နိုင်ငံတဝန်းက လက်လီဆိုင်တွေကို လက်ဖက်ဘူးတွေ ဖြန့်နေပြီး အမှာလာရင် စာတိုက်ကပေးပို့ ရောင်းချနေပါတယ်။

နယူးယောက်မြို့ အစားအစာ အန္တရာယ် ကင်း-မကင်း စုံစမ်းရေးအဖွဲ့က အစားအစာနမူနာကို ပုံမှန်စစ်ဆေးချိန်မှာ မြေပဲပါတာ မဖော်ပြတာကို တွေ့ရှိရတာပါ။

RFA Burmese
https://www.facebook.com/rfaburmese




အိန္ဒိယနိုင်ငံကို နိုင်ငံတော်ဧည့်သည်အဖြစ် ရောက်ရှိနေတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ အောက်တိုဘာလ ၁၈ ရက်နေ့က အိန္ဒိယသမ္မတ၊ နိုင်ငံခြားရေးဝန်ကြီးတို့နဲ့ နယူးဒေလီမြို့မှာ တွေ့ဆုံ ခဲ့ပါတယ်။ ဒေါ်အောင်ဆန်းစုကြည်ဟာ အိန္ဒိယနိုင်ငံက သတင်း ဌာနတွေနဲ့ တွေ့ဆုံပြီးတော့လည်း အကြမ်းဖက်မှု တိုက်ဖျက်ရေးနဲ့ဆိုင်တဲ့ ကိစ္စရပ်တွေကို ဖြေကြားခဲ့ပါတယ်။ အပြည့်အစုံကိုတော့ ကိုဇော်ဝင်းလှိုင်က တင်ပြပေးပါမယ်။

အောက်တိုဘာလ ၁၆ ရက်နေ့က အိန္ဒိယနိုင်ငံ Goa ပြည်နယ်မှာကျင်းပတဲ့ BRICS နဲ့ BIMSTEC ထိပ်သီး ညီလာခံတွေကို တက်ပြီး နယူးဒေလီမြို့ကို အောက်တိုဘာလ ၁၈ ရက်နေ့ မနက်ပိုင်းမှာ ရောက်ရှိလာတဲ့ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို နယူးဒေလီမြို့မှာရှိတဲ့ Rashtrapati Bhavan သမ္မတအိမ်တော်ဝင်းအတွင်းမှာ ၀န်ကြီးချုပ် Narendra Modi က ဂုဏ်ပြုတပ်ဖွဲ့နဲ့ ကြိုဆိုခဲ့တာပါ။

ဒေါ်အောင်ဆန်းစုကြည်ဟာ သမ္မတအိမ်တော်ကနေ အိန္ဒိယနိုင်ငံရဲ့ လွှတ်လပ်ရေး ဖခင်ကြီး မဟတ္တမဂန္ဓီရဲ့ ဗိမ္မာန်ကိုသွားရောက်ပြီး ပန်းခွေချ ဂါရ၀ပြုခဲ့ပါတယ်။

အဲဒီနောက်မှာတော့ ဒေါ်အောင်ဆန်းစုကြည်ဟာ အိန္ဒိယ နိုင်ငံခြားရေးဝန်ကြီး Sushma Swaraj နဲ့ တွေ့ဆုံပြီး နှစ်နိုင်ငံ ကိစ္စရပ်တွေကိုိ ဆွေးခဲ့ပါတယ်။

နေ့လည်ပိုင်းမှာတော့ ဒေါ်အောင်ဆန်းစုကြည်ဟာ အိန္ဒိယသမ္မတ Pranab Mukherjee နဲ့ သမ္မတအိမ်တော်မှာတွေ့ဆုံပြီး သမ္မတနဲ့အတူ နေ့လည်စာ အတူ စားသုံးခဲ့ပါတယ်။

တချိန်ထဲမှာပဲ နှစ်နိုင်ငံအကြားက ကုန်သွယ်ရေးလုပ်ငန်းတွေ တိုးတက်ကောင်းမွန်ရေး အတွက် ရည်ရွယ်ပြီး အိန္ဒိယ စီးပွားရေး လုပ်ငန်းရှင်တွေနဲ့လည်း ဒေါ်အောင်ဆန်းစုကြည် တွေ့ဆုံခဲ့တယ်လို့ အိန္ဒိယနိုင်ငံ အခြေစိုက် သတင်းမီဒီယာတွေမှာ ရေးသား ဖော်ပြကြပါတယ်။

ဒေါ်အောင်ဆန်းစုကြည်ဟာ အိန္ဒိယသမ္မတနဲ့ မတွေ့ဆုံခင် မနက်ပိုင်းမှာ အိန္ဒိယနဲ့ အမေရိကန် သတင်းမီဒီယာတွေနဲ့ တွေ့ဆုံပါတယ်။

အိန္ဒိယနိုင်ငံအခြေစိုက် Times Now ရုပ်သံ သတင်းဌာနက အကြမ်းဖက်မှုနဲ့ဆိုင်တဲ့ ကိစ္စရပ်တွေကို မေးတာမှာ - အကြမ်းမဖက်တဲ့နည်းကို လက်ခံယုံကြည်ထားတဲ့ NLD ပါတီအနေနဲ့ အကြမ်းဖက်လုပ်ငန်းတွေကို လက်မခံကြောင်း အခုလို ဖြေကြားခဲ့ပါတယ်။

“အကြမ်းဖက်မှု လုပ်ငန်းမှန်သမျှဟာ လက်ခံနိုင်စရာ မရှိပါဘူး။ ဘာဖြစ်လို့လဲ ဆိုတော့ အကြမ်းဖက်တဲ့နည်းကို အသုံးပြုပြီး ကမ္ဘာကြီးကို ပြောင်းလဲလို့ မရနိုင်ပါဘူး။ အပြုသဘောဆောင်တဲ့ အင်အားစုတွေ အားကောင်းလာအောင် လုပ်ဆောင်ပေးတဲ့ နည်းနဲ့သာ ကမ္ဘကြီးကို ပြောင်းလဲနိုင်မှာ ဖြစ်ပါတယ်။ အကြမ်းဖက်မှု လုပ်ငန်းဟာ လုံးဝ ဆန့်ကျင်ဘက် လုပ်ရပ် ဖြစ်ပါတယ်။ ကျမတို့ရဲ့ ရည်မှန်းချက်တွေ ရရှိအောင် အကြမ်းမဖက်တဲ့နည်းကို အသုံးပြုရမယ်လို့ ယုံကြည်ထားတဲ့ ပါတီကလာတဲ့သူ တဦးဖြစ်တဲ့အတွက် အကြမ်းဖက် လုပ်ငန်းကို လက်ခံလို့ မရနိုင်သလို၊ ရှင်သန်ကြီးထွားခွင့်ဖို့လည်း ခွင့်မပြုနိုင်ပါဘူး။”

အကြမ်းဖက်မှုတွေကို အားပေးအားမြောက်ပြုပြီး အစိုးရရဲ့ ပေါ်လစီတခုလို ကျင့်သုံးနေတဲ့ ပါကစ္စတန်လိုနိုင်ငံမျိုးကို မြန်မာနဲ့ အိန္ဒိယလို အိမ်နီးနားချင်း တိုင်းပြည်တွေအပြင် နိုင်ငံတကာ အသိုင်းဝိုင်းက အထီးကျန်သွားအောင် ဘယ်လို လုပ်ဆောင်နိုင်မလဲလို့ မေးတာမှာတော့ -

“အကြမ်းဖက်မှုကြောင့်ဆိုပြီး နိုင်ငံတခုကို အထီးကျန်သွားအောင် လုပ်ဖို့ မလိုပါဘူး။ ဒါပေမယ့် အကြမ်းဖက်လုပ်ငန်းအပေါ် ယုံကြည်မှု၊ အဲဒီယုံကြည်မှုကနေ သူတို့ သွားလိုတဲ့ ဦးတည်ချက်ကို သွားကြမှာ ဖြစ်ပါတယ်။ ဒါကြောင့် အဲဒီ ယုံကြည်မှုကို ကျမတို့အနေနဲ့ အထီးကျန်ဖြစ်သွားအောင် လုပ်ရမှာ ဖြစ်ပါတယ်။ ကမ္ဘာတ၀ှမ်းမှာ ရှိတဲ့ လူသားအားလုံးဟာ ငြိမ်းချမ်းရေးနဲ့ လုံခြုံရေးကို လိုချင်ကြတယ်လို့ ကျမ ယုံကြည်ပါတယ်။ ဒါကြောင့် အကြမ်းဖက်မှုကိုသုံးပြီး သူတို့ရဲ့ ရည်မှန်းချက် အောင်မြင်အောင် လုပ်နိုင်မယ်လို့ ဘာကြောင့် သူတို့ ယူဆကြသလဲ။ အဲဒီ ယူဆချက်ကို ကျမတို့က ၀ိုင်းဆန့်ကျင်ကြရမှာ ဖြစ်ပါတယ်။”

ရခိုင်ပြည်နယ်၊ မောင်တောဒေသမှာ အကြမ်းဖက်တိုက်ခိုက်မှုဖြစ်စဉ်ဟာ RSO လို့ခေါ်တဲ့ ရိုဟင်ဂျာ သွေးစည်းညီညွတ်ရေးအဖွဲ့နဲ့ဆက်နွယ်တဲ့ မောင်တောဒေသမှာ လှုပ်ရှားတဲ့ Aqa Mul Mujahidin အဖွဲ့ရဲ့ ဆောင်ရွက်ချက်ဖြစ်တယ်လို့ စစ်ဆေးဖော်ထုတ် ရရှိတဲ့အကြောင်း မြန်မာ သမ္မတရုံးက အောက်တိုဘာလ ၁၃ ရက်နေ့က သတင်းထုတ်ပြန်ထားပြီး ဖြစ်ပါတယ်။

အဲဒီအဖွဲ့ရဲ့ခေါင်းဆောင်ဟာ ပါကစ္စတန်နိုင်ငံမှာ အကြမ်းဖက်သင်တန်း ၆ လ တက်ဖူးသူဖြစ်ပြီး တခြား မွတ်ဆလင်နိုင်ငံတွေကလည်း ငွေကြေး အထောက်အပံ့တွေ ရရှိနေတယ်ဆိုတဲ့ သတင်းတွေ ရထားပေမယ့် အဲဒါကို တရားသေ ယုံကြည်လို့ မရနိုင်သေးကြောင်း Hindustan Times သတင်းစာနဲ့ ပြုလုပ်တဲ့ မေးမြန်းခန်းမှာ ဒေါ်အောင်ဆန်းစုကြည်က ဖြေကြား ခဲ့ပါတယ်။

တရုတ်နိုင်ငံဟာ အကြမ်းဖက်သမားတွေကို ထောက်ခံအားပေးနေတယ်၊ သို့တည်းမဟုတ် အကြမ်းဖက်သမားတွေကို အရေးယူမှုတွေ လုပ်ဆောင်မယ့် အစီအစဉ်တွေ နှောင့်နှေး ကြန့်ကြာအောင် လုပ်ဆောင်နေတာတွေ ရှိနေတဲ့ အတွက် နိုင်ငံတကာ အသိုင်းဝိုင်းအနေနဲ့ ဘယ်လို လက်တွဲ ဆောင်ရွက်နိုင်မလဲလို့ Times Now ရုပ်သံ သတင်းဌာနက မေးတဲ့ အခါမှာတော့ -

“ကျမ အစောပိုင်းက ပြောခဲ့သလိုပါပဲ ကျမတို့အနေနဲ့ မျှဝေ လုပ်ဆောင်ကြဖို့ စဉ်းစားကြစေချင်ပါတယ်။ တဦးကို တဦး ကြောက်ရွံ့၊ စိုးရိမ်နေကြမယ့်အစား အထူးအခွင့်အရေး အသစ်တွေ၊ လုပ်နိုင်စွမ်း အသစ်တွေကို မျှဝေကြရင်ရော? ဒါဟာ အလွယ်တကူ ရနိုင်တဲ့ကိစ္စတော့ မဟုတ်ပါဘူး။ ဘာဖြစ်လို့လဲဆိုတော့ လူတဦးချင်းစီက ကိုယ့်ရဲ့ပိုင်ဆိုင်မှုကို ခုခံ ကာကွယ်လိုကြတဲ့အတွက်ပဲ ဖြစ်ပါတယ်။ ဒါဟာ လူမှုအသိုင်းဝိုင်းတွေ၊ တိုင်းပြည်တွေအထိ ကျယ်ပြန့်တဲ့ကိစ္စရပ် ဖြစ်ပါတယ်။ ကျမအနေနဲ့ လူသားတွေရဲ့ အခြေခံ ယုံကြည်ချက် ရှိတာကို လက်ခံပါတယ်။ အဲဒါက ဘာလဲဆိုတော့ အကောင်းနဲ့ အဆိုးဆိုပြီး ၂ ခု ဒွန်တွဲနေတာပါ။ ဒါပေမယ့် အဆုံးသတ်မှာတော့ အကောင်းဘက်က အနိုင်ရသွားပါလိမ့်မယ်။ အဲဒီလိုသာ မဟုတ်ဘူးဆိုရင် ကျမတို့တွေအားလုံးဟာ ဂူတွေထဲမှာပဲ ရှိနေကြဦးမှာ ဖြစ်ပါတယ်။”

ဒေါ်အောင်ဆန်းစုကြည်ဟာ အောက်တိုဘာလ ၁၈ ရက်နေ့ ညနေပိုင်းမှာ နယူးဒေလီမြို့မှာရှိတဲ့ မြန်မာသံအမတ်ကြီးနဲ့ သံရုံးဝန်ထမ်းတွေက တည်ခင်း ဧည့်ခံတဲ့ ညစာစားပွဲကို တက်ရောက်ခဲ့ပါတယ်။

ဒီကနေ့ ဗုဒ္ဓဟူးနေ့မှာတော့ ဒေါ်အောင်ဆန်းစုကြည်ဟာ အိန္ဒိယ၀န်ကြီးချုပ် Narendra Modi နဲ့ နှစ်နိုင်ငံအကျိုးတူကိစ္စရပ်တွေကို ဆွေးနွေးကြမှာ ဖြစ်ပါတယ်။

ကိုဇော်ဝင်းလှိုင်/ ဗွီအိုအေ (မြန်မာပိုင်း)

http://burmese.voanews.com




အမေရိကန်သမ္မတရွေးကောက်ပွဲ မတိုင်ခင်သမ္မတလောင်းတွေကြား စကားစစ်ထိုးကြတဲ့ တတိယမြောက်နဲ့ နောက်ဆုံးဖြစ်တဲ့ စကားစစ်ထိုးပွဲကို Nevada ပြည်နယ် Las Vegas မြို့မှာ ဗုဒ္ဓဟူးနေ့ညကျရင်ပြုလုပ်မှာဖြစ်ပါတယ်။ အမေရိကန်ရဲ့ လောင်းကစားမြို့တော်ဖြစ်တဲ့ Las Vegas မြို့က မြန်မာလူမျိုးတွေကလည်း ဒီစကားစစ်ထိုးပွဲကို စိတ်ဝင်စားနေကြပါတယ်။

ရွေးကောက်ပွဲမှာ မဲပေးကြမယ့်သူတွေအနေနဲ့ သမ္မတလောင်း ၂ ယောက်ပြောကြမယ့်ထဲက ဘယ်လိုကိစ္စမျိူးအပေါ် အလေးထားနေကြသလဲဆိုတာကို မစုမြတ်မွန်က စုစည်းတင်ပြပါမယ်။

Casino လောင်းကစားဟိုတယ်ကြီးတွေ လက်ညိုးထိုးမလွဲမြင်ရတဲ့ Las Vegas မြို့မှာ ဒီမိုကရက်သမ္မတလောင်း Hillary Clinton နဲ့ Republican သမ္မတလောင်း Donald Trump တို့ကြား နောက်ဆုံးစကားစစ်ထိုးပွဲကို ဗုဒ္ဓဟူးနေ့ ဝါရှင်တန်စံတော်ချိန် ည ၉ နာရီမှာ ပြုလုပ်မှာဖြစ်ပါတယ်။ Las Vegas မြို့မှာ မြန်မာလူမျိုး ၃၀၀ နီးပါးနေထိုင်နေကြတာမို့ သမ္မတလောင်း စကားစစ်ထိုးပွဲကို မြန်မာတွေလည်း စောင့်ကြည့်နေကြမှာ ဖြစ်ပါတယ်။ Sonny Sushi ကုမ္ပဏီပိုင်ရှင် ဦးဆန်းထွန်းနီကလည်း နောက်ဆုံးသမ္မတလောင်းစကားစစ်ထိုးပွဲကို ကြည့်ဖို့ စိတ်အားသန်နေပါတယ်။

“စိတ်အားသန်တာကတော့ ကျနော့်အနေနဲ့ ၉၀%ကျော် စိတ်အားသန်ပါတယ်။ ဒီမှာရှိတဲ့ ဗမာအားလုံးက လူ ၂၅၀ နဲ့ ၃၀၀ ကြားပဲ ရှိပါတယ်။ ဗမာအားလုံးလေ။ ကျနော်ထင်တယ် လူ ၁၀၀ ပတ်ဝန်းကျင်လောက်ကတော့ တချို့လည်း ခွင့်တွေဘာတွေယူပြီးတော့ကို ကြည့်ကြမယ်လို့ မျှော်လင့်ထားပါတယ်။”

မေး - သမ္မတလောင်းနှစ်ယောက် ဘယ်လိုကိစ္စမျိုးတွေကို အဓိထားပြီး နောက်ဆုံး Debate မှာ မဲဆန္ဒရှင်တွေ ဆုံးဖြတ်ချက်ချနိုင်အောင်လို့ ပြောသင့်တယ်၊ မဲဆွယ်သင့်တယ်လို့ ထင်ပါလဲ။

ဖြေ - “အရင် မဲဆွယ်ပွဲတွေတုန်းက လုပ်ခဲ့တဲ့အချက်တွေကိုပဲ အဲဒါကိုပဲ repeat လုပ်ပြီးတော့ အခုဟာကတော့ နောက်ပိုင်း ဒုတိယ debate မှာဆိုရင် တယောက်နဲ့တယောက်က personal attack လေးတွေ တော်တော်လေး ပါလာတယ်ပေါ့လေ။ Donald Trump က ပြောတာပေါ့။ Hillary ကတော့ ကျနော့်အမြင် ပြောရရင်တော့ လွန်ခဲ့တဲ့ ၅ နှစ်က အိုဘားမားနဲ့ စကားစစ်ထိုးပွဲတုန်းကလို သူက ကြိုပြီး မြင်တာတွေရှိတော့ သူက ကတိကို အရမ်းမပေးဘူး။ သူက hesitant ဖြစ်တယ်။ လုပ်တဲ့ကိုင်တဲ့နေရာမှာလည်း သူက hesitant တော့ ရှိမှာပါပဲ။”

မေး - ဦးဆန်းထွန်းနီက Las Vegas မှာ ဆူရှီလုပ်ငန်းကိုလည်း လုပ်နေတဲ့ စီးပွားရေး လုပ်ငန်းရှင်တယောက် ဖြစ်တဲ့အခါကျတော့ သူတို့နှစ်ယောက်ပြောမယ့် စကားတွေထဲမှာ ကိုယ့်စီးပွားရေး ပိုပြီးတော့ တိုးတက်လာစေအောင် နောက်တခါ စီးပွားရေးလုပ်ငန်းရှင်တွေ အားလုံးအတွက်ကို ပိုပြီးတော့ အကျိုးရှိစေမယ့် ဘယ်လိုအကြောင်းအရာမျိုး သူတို့တွေ ပြောတာကို ကြားချင်ပါလဲရှင့်။

ဖြေ - “ကျနော်တို့က တကယ်တမ်းပြောရင် လုပ်ငန်းအကြီးကြီးလို့ ပြောလို့မရပါဘူး။ လုပ်ငန်းငယ်လေးပါ။ လုပ်ငန်းငယ်လေးတွေကို ဦးစားပေးမယ်ဆိုတဲ့ ပြောတဲ့စကားမျိုးကို ကျနော်တို့က ကြားချင်ပါတယ်။ ဒါကို စီးပွားရေးသမားတယောက်အနေနဲ့ပေါ့။ နောက်တချက်က အခွန်နဲ့ ပတ်သက်လို့လည်း ကျနော်တို့အပေါ်မှာ သက်သက်ညှာညှာ ကောက်မယ်ဆိုတဲ့စကားမျိုး အဲ့လိုမျိုးကြားရလို့ရှိရင် ကျနော်တို့က ပိုပြီးတော့ စိတ်ချမ်းသာတယ်ပေါ့လေ။ အခုအတိုင်း ကျနော့်အမြင်ကို ပြောရရင်တော့ ကျနော်က ပုဂ္ဂိုလ်ရေးအရတော့ ကျနော်က Donald Trump ကို ကြိုက်ချင်မှကြိုက်မှာပေါ့။ ဒါပေမဲ့ ကျနော်တို့ရဲ့ မူအရ စီးပွားရေးသမားဖြစ်တဲ့အတွက် Donald Trump ကို မဲပေးမယ်လို့ ဆုံးဖြတ်ထားပြီးပါပြီ။”

Las Vegas မြို့မှာနေထိုင်တဲ့ ဦးဆန်းထွန်းနီ ဖြစ်ပါတယ်။ Las Vegas မြို့ဟာ အမေရိကန် စီးပွားရေး ကျဆင်းချိန်တုန်းက အထိအနာဆုံး မြို့တခုဖြစ်ခဲ့တာပါ။ အခုတော့ Las Vegas မြို့ဆီကို ကမ္ဘာလှည့်ခရီးသည်တွေ ပြန်လာနေကြပါပြီ။ ဒါပေမဲ့ မြို့ထဲက ဆောက်လုပ်ရေးလုပ်ငန်းတွေကတော့ ခုချိန်ထိ နလန်မထူသေးဘူးလို့ Nevada တက္ကသိုလ်က အများပြည်သူ မူဝါဒရေးရာ ပါမောက္ခ Robert Lang ကပြောပါတယ်။

“ခရီးသွားဧည့်သည်တွေပေါ်မှာ အားထားရတဲ့ စီးပွားရေးဖြစ်တော့ ပြီးခဲ့တဲ့ ၁၀ နှစ်မှာ လောင်းကစားလုပ် အပျော်ရှာကြသူတွေလည်း လျော့သွားရော ဒီကလူတွေက မသုံးကြမစွဲကြတော့ဘူး၊ အဲဒီမှာ စီးပွားရေးကျသွားတော့တာပဲ၊ ဒီမှာ တော်တော်လေး ထိခိုက်ပါတယ်။ အဆိုးဆုံးက ဆောက်လုပ်ရေးလုပ်ငန်းမှာပါ၊ အခုအချိန်ထိလည်း သေသေချာချာ နလန်မထူသေးပါဘူး။”

ခရီးသွားလုပ်ငန်းကတော့ ပြန်ပြီးတိုးတက်လာတယ်လို့ ပါမောက္ခ Lang က ပြောပါတယ်။ Nevada ပြည်နယ်ရဲ့ အိမ်ခြံမြေ ရောင်းဝယ်ရေးဈေးကွက်ကလည်း ပြန်လည်တိုးတက်လာနေပါတယ်။ ခုလို စီးပွားရေးကျဆင်းခဲ့ရာကနေ ပြန်လည်တိုးတက်လာတဲ့ ပြည်နယ်ထဲမှာ မဲဆန္ဒရှင်အများစုက ဘယ်သူ့ကို သမ္မတရွေးချယ်မလဲဆိုတဲ့ နေရာမှာ စီးပွားရေးကိစ္စကို အဓိကထား စဉ်းစားကြပါတယ်။

“သမ္မတလောင်း ၂ ယောက်လုံး ဘယ်သူ့ကိုမှ ကျမသိပ်မကြိုက်ပါဘူး၊ ဒါပေမဲ့ နိုင်ငံတည်ငြိမ်ရေးနဲ့ စီးပွားရေးတည်ငြိမ်ရေးကို ဦးစားပေးလုပ်သွားမယ့်သူမျိုးကို ကျမရွေးချယ်ချင်ပါတယ်။”

“ကျတော်ကတော့ Trump ကိုပိုရွေးသင့်တယ်လို့ထင်ပါတယ်။ စီးပွားရေးလုပ်ငန်းရှင်ဆိုတာ ပိုလောဘတက်လေ၊ ငွေပိုမက်လေ နောက်ထပ် စီးပွားရေးအခွင့်အလမ်းတွေ ပိုရှာလေဆိုတော့ ကျတော့်စိတ်ထဲမှာတော့ အဲလိုဖြစ်အောင် သူလုပ်လိမ့်မယ်လို့ ထင်တယ်။ သူစီးပွားရေးလုပ်ငန်းတွေ ပိုများများဖွင့်လေ လူတွေ အလုပ်ပိုရလေဖြစ်မှာပါ။”

Nevada ပြည်နယ်ထဲမှာ ဘယ်သူ့ကို မဲပေးရမယ်ဆိုတာ မဆုံးဖြတ်နိုင်သေးသူမဲဆန္ဒရှင် ၁၀% လောက်ရှိတယ်လို့ Nevada တက္ကသိုလ်က ပါမောက္ခ Robert Lang က ပြောပါတယ်။ နိုင်ငံတဝန်း လတ်တလောလုပ်ထားတဲ့ လူထု သဘောထားစစ်တမ်းတွေမှာ Hillary Clinton က Donald Trump ထက် ၆% လောက် အသာရနေပါတယ်။ ဒါကြောင့် Donald Trump အတွက် ဗုဒ္ဓဟူးနေ့ စကားစစ်ထိုးပွဲဟာ မဲဆန္ဒရှင်တွေရဲ့ ထောက်ခံမှုတိုးလာအောင်လုပ်ဖို့ နောက်ဆုံး အရေးကြီးတဲ့ အခွင့်အလမ်းတခု ဖြစ်ပါတယ်ရှင်။

 စုမြတ်မွန်/ ဗွီအိုအေ (မြန်မာပိုင်း)
http://burmese.voanews.com/


Mosul မြို့နားမှာ ရောက်နေတဲ့ အမေရိကန် စစ်သား (Credit: Reuters) 
အီရတ်နိုင်ငံရဲ့ ​ဒုတိယအကြီးမားဆုံးမြို့ဖြစ်တဲ့ ​Mosul ​မြို့ကို ​IS ​အစ္စလာမ်မစ် ​အဖွဲ့ရဲ့ ​လက်ထဲကနေ ​ပြန်လည် ​ရယူဖို့ ​အီရတ်အစိုးရက ​ကြိုးစားနေပေမယ့် ​IS ​အဖွဲ့က ​ပြည်သူတွေကို ​လူသားဒိုင်း ​အကာအကွယ်လို ​အသုံးပြုနေတယ်လို့ ​Mosul ​မြို့ ​ဒေသခံတွေက ​ပြောပြပါတယ်။

Mosul ​မြို့ကို ​ပြန်လည် ​ရယူဖို့အတွက် ​အီရတ်စစ်သားက ​Kurdish ​တပ်နဲ့ ​ပူးပေါင်းပြီး ​IS ​ကို ​ထိုးစစ်ဆင်နေတာ ​ဖြစ်ပါတယ်။

Mosul ​မြို့ပြင်က ​ကျေးရွာတချို့ကို ​သိမ်းပိုက်နိုင်ပြီး ​Mosul ​မြို့နားကို ​ချဉ်းကပ်နေပေမယ့် ​IS ​က ​ပြည်သူတွေကို ​အကာအကွယ်လို ​အသုံးပြုနေတယ်လို့ ​ဒေသခံတွေက ​ရိုက်တာ ​သတင်းကို ​ပြောပြတာ ​ဖြစ်ပါတယ်။ ​

မြို့ထဲမှာ ​IS ​ခေါင်းဆောင် ​Abu ​Bakr ​al-Baghdadi ​လည်း ​ရှိနေတယ်လို့ ​ယူဆရပါတယ်။

လူတွေကို ​မြို့ပြင် ​မထွက်နိုင်အောင် ​IS ​က ​လုပ်ဆောင်နေပြီး ​IS ​အဖွဲ့ဝင်တွေ ​နေထိုင်ခဲ့တဲ့ ​နေရာတွေကို ​သွားဖို့ ​ပြည်သူတွေကို ​ပြောဆိုတာမျိုး ​ရှိတယ်လို့လည်း ​ဆိုပါတယ်။

Mosul ​မြို့မှာ ​လူပေါင်း ​တစ်သန်းခွဲလောက် ​ရှိနေသေးတဲ့အတွက် ​စိုးရိမ်မကင်းမှုတွေ ​ဖြစ်နေပါတယ်။

အမေရိကန် ​စစ်အရာရှိ ​တစ်ဦးကတော့ ​Mosul ​ထိုးစစ်ဆင်မှုဟာ ​ရုပ်ဆိုးအကျဉ်းတန်ပေမယ့် ​တိုးတက်မှုတွေ ​ရှိတဲ့ ​ထိုးစစ်ဆင်မှု ​ဖြစ်တယ်လို့ ​ပြောလိုက်ပါတယ်။

နိုင်ငံတကာ ​ရွှေ့ပြောင်းသွားလာရေး ​IOM ​အဖွဲ့ကတော့ ​IS ​အနေနဲ့ ​ဓာတုလက်နက်တွေကို ​အသုံးပြုနိုင်တာကြောင့် ​သတိထားဖို့ ​တိုက်တွန်းလိုက်ပါတယ်။

အရင်တုန်းက ​Kurdish ​တပ်တွေနဲ့ ​တိုက်တုန်းက ​IS ​က ​ဓာတုလက်နက်တွေကို ​အသုံးပြုခဲ့တာ ​ရှိပါတယ်။

အီရတ် ​စစ်သားတွေကို ​အမေရိကန် ​ဦးဆောင်တဲ့ ​မဟာမိတ် ​အဖွဲ့က ​အကူအညီပေးနေပြီး ​IS ​အကြမ်းဖက် ​သမားတွေ ​မလွတ်မြောက်အောင် ​လုပ်ဆောင်နေပါတယ်။

အဲဒီလို ​အခြေအနေအတွင်း ​ဆီးရီးယား ​စစ်သားက ​မဟာမိတ်တပ်တွေဟာ ​အီရတ်နိုင်ငံက ​IS ​တွေကို ​ဆီးရီးယားနိုင်ငံထဲ ​ဝင်ရောက်အောင် ​လုပ်ဆောင်နေတယ်လို့ ​စွပ်စွဲလိုက်ပါတယ်။

Mosul ​မြို့ကို ​ပြန်လည် ​သိမ်းပိုက်နိုင်ရင် ​ကြီးမားတဲ့ ​အောင်မြင်မှု ​ဖြစ်ပေမယ့် ​လွယ်ကူ၊ ​မြန်ဆန်မှာ ​မဟုတ်ဘူးလို့ ​အမေရိကန် ​သမ္မတ ​ဘာရက် ​အိုဘားမားက ​ပြောလိုက်ပါတယ်။

ABC Radio Australia
http://www.radioaustralia.net.au/burmese



ဆော်ဒီ တော်ဝင်မိသားစုဝင်တွေ ကွပ်မျက်ခံရလေ့ မရှိပါဘူး။ (Credit: Reuters) 
ဆော်ဒီအာရေးဗျနိုင်ငံ ​အစိုးရက ​လူသတ်မှု ​ကျူးလွန်တဲ့ ​တော်ဝင်မင်းသား ​Tuki ​bin ​Saud ​al-Kabir ​ကို ​ကွပ်မျက်လိုက်ပါတယ်။

အဲဒီ ဆော်ဒီ တော်ဝင်မင်းသားဟာ ​၂၀၁၂ ​ခုနှစ်တုန်းက ​Adel ​al-Mohaimeed ​ဆိုတဲ့ ​သူငယ်ချင်းတစ်ယောက်နဲ့ ​စကားများရာက သေနတ်နဲ့ ​ပစ်သတ်လိုက်တာလို့ ဆော်ဒီ ပြည်ထဲရေး ​ဝန်ကြီးဌာနက ပြောတဲ့အကြောင်း ​SPA ​သတင်းမှာ ဖော်ပြထားပါတယ်။

မင်းသားကို ​ဘယ်လိုနည်းနဲ့ ​ကွပ်မျက်လိုက်သလဲ ​ဆိုတာကိုတော့ ပြည်ထဲရေး ​ဝန်ကြီးဌာနက ​မပြောထားပေမယ့် ​အများအားဖြင့် ဆော်ဒီအာရေးဗျနိုင်ငံမှာ ခေါင်းဖြတ်ပြီး ​ကွပ်မျက်လေ့ရှိပါတယ်။

ဆော်ဒီနိုင်ငံကို ဆော်ဒီတော်ဝင် ​မိသားစုဝင်တွေက ​အုပ်ချုပ်တဲ့အတွက် ​အုပ်ချုပ်သူ ​လူတန်းစားကို ​အပြစ်ပေး ​ကွပ်မျက်တာက ​ထူးဆန်းနေပြီး ​၁၉၇၅ ​ခုနှစ်တုန်းကတော့ ​Faisal ​bin ​Musaid ​al ​Saud ​ဆိုတဲ့ ​လူက ​ဦးလေးတော်စပ်သူ ​King ​Faisal ​ကို ​လုပ်ကြံသတ်ဖြတ်လို့ ​ကွပ်မျက်ခံခဲ့ရဖူးပါတယ်။

အစိုးရအနေနဲ့ ​နိုင်ငံအတွင်းမှာ ​Allah ​အရှင်မြတ်ရဲ့ ​နည်းလမ်းအတိုင်း ​တည်ငြိမ်အေးချမ်းမှု၊ ​လုံခြုံရေးတွေနဲ့ ​တရားဥပဒေ ​စိုးမိုးရေးရှိဖို့အတွက် ​အခုလို ​လုပ်ဆောင်တာလို့လည်း ပြည်ထဲရေး ​ဝန်ကြီးက ပြောဆိုတဲ့အကြောင်း ​ရိုက်တာ ​သတင်းမှာ ​ပါရှိပါတယ်။

ဆော်ဒီနိုင်ငံမှာ တော်ဝင် ​မိသားစုဝင် ​အယောက်ပေါင်း ထောင်နဲ့ချီ ​ရှိတယ်လို့လည်း ​သိရပါတယ်။

ABC Radio Australia
http://www.radioaustralia.net.au/burmese

ဒီနှစ်ပိုင်းအတွင်း စင်္ကာပူမှာ သွားရောက်အလုပ်လုပ်နေတဲ့ မြန်မာတွေ အလုံးအရင်းနဲ့ မြန်မာနိုင်ငံကို ပြန်လာနေကြပါတယ်။ သူတို့ ဘာကြောင့် အိမ်ပြန်ကြသလဲ၊ သူတို့ အိမ်ပြန်တဲ့အတွက် ဘယ်လိုအကျိုးတွေရှိမလဲဆိုတာ RFA အဖွဲ့သူ မခက်မာ တင်ပြထားပါတယ်။



တပ်မတော်နဲ့ ရဲတွေက လုံခြုံရေး ယူထား
မောင်တော ဒေသ အခြေအနေ တည်ငြိမ်လာနေပြီလို့ ရခိုင်ပြည်နယ် အစိုးရက ပြောပါတယ်။

တပ်မတော်နဲ့ ရဲတပ်ဖွဲ့က နယ်မြေ ရှင်းလင်းရေးတွေ ဆက်လက် လုပ်ဆောင်နေပြီး ကျေးရွာ တွေမှာ အပြည့်အဝ လုံခြုံရေး ယူထားတယ်လို့ ရခိုင်ပြည်နယ် အစိုးရ အဖွဲ့ အတွင်းရေးမှူး ဦးတင်မောင်ဆွေက ပြောပါတယ်။

နယ်ခြားစောင့် တပ်စခန်းတွေကို တိုက်ခိုက်ပြီး ယူသွားကြတဲ့ လက်နက်တွေ ကတော့ ပြန်မရ သေးဘူးလို့ သူက ပြောပါတယ်။

အပြန်အလှန် တိုက်ခိုက်မှု တွေ မရှိပေမဲ့ နယ်မြေ ရှင်းလင်းရေး လုပ်ဆောင်ရင်းနဲ့ ပစ်ခတ်တာမျိုးတော့ ရှိနိုင်တယ်လို့ ဦးတင်မောင်ဆွေက ဘီဘီစီကို ပြောပါတယ်။

ဒါ့အပြင် သူက စစ်ဆင်ရေးတွေလုပ်နေလို့ သွားလာခွင့် ပိတ်ဆို့ တားမြစ်ထားတဲ့ ကျေးရွာတွေမှာ စားနပ်ရိက္ခာ ပြတ်လပ်မှု ရှိတာ ဟုတ်မှန်ကြောင်းနဲ့ လိုအပ်တယ်လို့ သတင်းရတဲ့ နေရာတွေကို သိရင် တပ်မတော် စစ်ကြောင်းက ကားတွေနဲ့ ဒေသခံ ရခိုင်တိုင်းရင်းသား ကျေးရွာတွေကိုရော မွတ်ဆလင် ကျေးရွာတွေကိုပါ ရိက္ခာတွေ သွားရောက် ပို့ဆောင်ပေးနေတယ်လို့ ပြောပါတယ်။

စားနပ်ရိက္ခာနဲ့ အခက်အခဲ တွေ့နေတဲ့ ရွာ ၅ဝ လောက် ရှိတယ်လို့ သူက ဆိုပါတယ်။

ပဋိပက္ခ စီမံခန့်ခွဲရေးဆိုင်ရာ စာအုပ်တွေ ရေးသားခဲ့သူ၊ ဒေါ်အောင်ဆန်း စုကြည်အကျယ်ချုပ် ခံထားရချိန်က သူနဲ့ စစ်အစိုးရကြား စေ့စပ် ညှိနှိုင်းရေး တာဝန်ယူခဲ့သူ ဝန်ကြီးဟောင်း ဦးအောင်ကြည်ကတော့ ရခိုင်ပြည်နယ် ပြဿနာဟာ လူမှု အသိုက်အဝန်း နှစ်ခုကြား အဆင်မပြေမှု လို့ မြင်ရကြောင်း ပြောပါတယ်။

ဒီလို အခြေ အနေမျိုးက ရခိုင်ပြည်နယ် အပြင် တခြား နေရာတွေမှာလည်း ရှိနိုင်တယ်၊ ပြဿနာဖြေရှင်းတဲ့ နေရာမှာ ဖြစ်ရတဲ့ အကြောင်းရင်းကို သမိုင်းကြောင်း အထောက်အထားနဲ့ တကွ မှန်မှန်ကန်ကန် စူးစမ်း လေ့လာဖို့ လိုအပ်တယ်လို့ လို့ သူက ပြောပါတယ်။

လက်ရှိ အနေအထားအရေ တရားဥပဒေစိုးမိုးရေးကို တဘက်က လုပ်နေချိန်မှာ ပြစ်မှု ကျူးလွန်သူတွေကိုလည်း ထိထိရောက်ရောက် ရှာဖွေ ဖော်ထုတ်ဖို့ သင့်ပြီး အင်အား သုံးစွဲမှုကိုတော့ ချင့်ချိန် သင့်တယ်လို့လည်း သူက ဆိုပါတယ်။

ရေရှည်မှာ ဒေသလုံခြုံရေး၊ မူလ တိုင်းရင်းသားတွေ အတွက် ကာကွယ်ရေးနဲ့ သူတို့ စီးပွားရေး အတွက် အချိန်ယူ လုပ်ဆောင်သွားရမယ်လို့ လည်း ဦးအောင်ကြည်က ပြောပါတယ်။

BBC Burmese
http://www.bbc.com/burmese


အောက်တိုဘာ ၁၈ရက်၊ ၂၀၁၆ခုနှစ်။ ကဆောဝါး

ထိုင်းနိုင်ငံအတွင်းရှိ ဒုက္ခသည်စခန်း အပါအ၀င် အကြောင်းအမျိုးမျိုးကြောင့် ခိုလှုံနေရသည့် မြန်မာနိုင်ငံသား ဒုက္ခသည်မိသားစု ၁၉စုမှ လူဦးရေ ၉၆ဦးကို ယခုအောက်တိုဘာလ၂၅ရက်နေ့တွင် မြန်မာနိုင်ငံသို့ ပြန်လည်ဝင်ရောက်နေထိုင်ရန် စီစဉ်မှုများပြုလုပ် ပေးနေကြောင်း ကရင်ပြည်နယ် အစိုးရအဖွဲ့ထံမှ သိရသည်။

ကရင်ပြည်နယ်၊ မြဝတီမြို့ကျောက်လုံးကြီးဘုရားလမ်းရှိ အဆိုပါ ပြန်လည်အခြေချနေထိုင်မည့်သူများ ယာယီနေထိုင်မည့်စခန်း အတွက် ပြင်ဆင်ဆောင်ရွက်ထားမှု အခြေအနေများအား အောက်တိုဘာလ ၁၅ရက်နေ့က သွားရောက်ကြည့်ရှူစဉ် ကရင်ပြည် နယ်၊ ၀န်ကြီးချုပ် နန်းခင်ထွေးမြင့်က ယခုလို ပြောကြားခဲ့သည်။

ဝန်ကြီးချုပ်က “သူတို့တွေ ၂၅ရက်နေ့ ပြန်လာကြမယ်။ အခုသူတို့နေဖို့၊ ထိုင်ဖို့ စီစဉ်ထားတာတွေ လာကြည့်တာဖြစ်ပြီး စားရေး၊ နေရေး၊ ပညာရေး၊ ကျန်းမာရေး၊ ပြန်လည်ထူထောင်ရေးတွေ ပြည်စုံအောင်ဆောင်ရွက်ပေးမှာပါ။ တစ်ဖက်နိုင်ငံထဲ ခိုလှုံနေကြ တဲ့ သိန်းနဲ့ချီတဲ့ဒုက္ခသည်အရေးကိစ္စတွေကို ကျမတို့အစိုးရအဖွဲ့တွေအနေနဲ့ အဆင်ပြေအောင် တစ်ဆင့်ချင်း လုပ်ဆောင်ပေး သွားမှာပါ”ဟု ပြောသည်။

ထိုင်း-မြန်မာနယ်စပ် ဒုက္ခသည်စခန်းတစ်ခုဖြစ်သည့် နို့ဖိုးဒုက္ခသည်စခန်း အပါအ၀င် ထိုင်းနိုင်ငံအတွင်း အကြောင်းအမျိုးမျိုးဖြင့် ခိုလှုံနေရသူအချို့မှာ မြန်မာနိုင်ငံတွင်း ပြန်လည်အခြေချနေထိုင်လိုသည့် သဘောထားများ တင်ပြလာမှုကြောင့် ထိုင်း-မြန်မာ နှစ်နိုင်ငံတာဝန်ရှိ ဋ္ဌာနဆိုင်ရာများ ပူးပေါင်းကာ လုပ်ဆောင်ပေးခြင်းဖြစ်ကြောင်း သိရသည်။

ထိုင်း-မြန်မာနယ်စပ်ရှိ ကရင်ဒုက္ခသည်စခန်း ၇ခုတွင် လက်ရှိ ခိုလှုံနေထိုင်ဆဲ ဒုက္ခသည်ပေါင်း ၉၃,၀၀၀ကျော် ကျန်ရှိနေဆဲဖြစ် ပြီး ပြန်လည်နေရာချထားရေးကိစ္စနှင့်ပတ်သက်၍ ကရင်ဒုက္ခကော်မတီ KRC တွင် သဘောထား မူဝါဒများရှိထားသော်လည်း ယခု ပြန်လည်အခြေချမည့်သူများမှာ ၎င်းတို့၏ ဆန္ဒသဘောအရသာဖြစ်ကြောင်း KRC က ပြောဆိုသည်။

KRC ၏ ပြောခွင့်ရသူ နော်ဘလူးမင်းနိုက်ဇန်က “ဒီကိစ္စက ကျမတို့ KRC နဲ့ ဆွေးနွေးပြောဆိုပြီးလုပ်တာတော့ မဟုတ်ဘူး။ စခန်း ထဲက ပြန်ချင်တဲ့သူတွေက UNHCR ဆီမှာစာရင်းပေးပြီး သူတို့ဆန္ဒအရ ပြန်သွားကြတာဖြစ်ပါတယ်။ ကျမတို့အနေနဲ့ ဒုက္ခသည် တွေကို အတင်းပြန်ပို့မှာ မဟုတ်သလို သူတို့ဆန္ဒအရ ပြန်ချင်တယ်ဆိုရင်လည်း မတားဘူးဆိုတဲ့မူတွေ ရှိထားပြီးသား ဖြစ်ပါ တယ်”ဟု ပြောသည်။

အောက်တိုဘာလ ၂၅ရက်နေ့တွင် မြန်မာပြည်တွင်း ပြန်လည်ဝင်ရောက်လာမည့် မိသားစု ၁၉စုထဲမှ ၁၇စုမှာ မြ၀တီယာယီစခန်း ၌ ခေတ္တခိုလှုံနေထိုင်ကြရမည်ဖြစ်ပြီး ကျန်ရှိသည့် ချင်းပြည်နယ်ရှိ မိသားစုတစ်စုနှင့် မကွေးတိုင်းရှိ မိသားစုတစ်စုကို သက်ဆိုင် ရာ တိုင်းနှင့်ပြည်နယ်များမှ တာဝန်ရှိသူများက နေရာချထားရေးအတွက် စီစဉ်ပေးမည်ဖြစ်ကြောင်း သိရသည်။

ပြည်နယ်လူမှုဝန်ထမ်းဦးစီးဋ္ဌာန ပြည်နယ်ညွှန်ကြားရေးမှူး ဦးဇော်မင်းက “လောလောဆယ်က မြဝတီမှာ မိသားစု ၁၇စုက ယာယီနေပြီး အဲဒီလေးကေကော်မြို့သစ်မှာ သူတို့နေဖို့အိမ်တွေ ပြည့်စုံပြီးဆိုမှ ပေးနေမှာဖြစ်ပါတယ်။ ကျန်နှစ်စုဖြစ်တဲ့ ချင်း ပြည်နယ်တစ်စုနဲ့ မကွေးတိုင်းတစ်စုကိုတော့ သူတို့ပြည်နယ်နဲ့ တိုင်းက တာဝန်ရှိသူတွေ လာပြန်ခေါ်မယ်”ဟု ပြောသည်။

၎င်းအပြင် မြ၀တီ၌ ယာယီနေထိုင်ရမည့်သူများအတွက် ကျန်းမာရေး၊ ပညာရေး၊ လူမှုရေးအပြင် စိတ်ပိုင်းဆိုင်ရာနှင့် ရုပ်ပိုင်းဆိုင် ရာများအတွက် နိုင်ငံတကာအဖွဲ့အစည်းများဖြစ်သည့် UNICEF ၊ Save The Children အဖွဲ့များ၏ ကူညီထောက်ပံ့မှုများနှင့် ပူး ပေါင်းပြီး ကူညီဆောင်ရွက်သွားရန် ပြင်ဆင်ထားကြောင်း လူမှုဝန်ထမ်းဦးစီးဋ္ဌာနက ပြောသည်။

ယခု နယ်စပ်ဒေသရှိ ဒုက္ခသည်များအား ပြန်လည်နေရာချထားရေးလုပ်ငန်းစဉ်ကို ထိုင်းနှင့်မြန်မာ နှစ်နိုင်ငံအစိုးရများ ပထမဆုံး အကောင်အထည်ဖော်ဆောင်သည့် အစီအစဉ်ဖြစ်ကြောင်း သိရသည်။

ကေအိုင်စီ
http://kicnews.org


မွန်ပြည်နယ်၊ ကျိုက်ထိုမြို့နယ်ရှိ ကျိုက်ထီးရိုးတောင်ခြေ၊ ကင်မွန်းစခန်းမှ ရင်ပြင်တော်စခန်းအထိ တောင် တက်ကားခ နောက်ခန်းဈေးနှုန်းအား မူလဈေးနှုန်းကျပ် ၂၅၀၀မှ ၂၀၀၀ကျပ်သို့ အောက်တိုဘာ ၁၆ ရက် ရက်မှစတင်ကာ ပြောင်းလဲသတ်မှတ်လိုက်ကြောင်းကျိုက်ထီးရိုးတောင်တက်မော်တော်ယာဉ်အသင်းထံမှသိရှိရသည်။

ဘုရားဖူးပြည်သူများ တောင်တက်မော်တော်ယာဉ်ခနှင့်ပတ်သက်၍ ဝန်ထုပ်ဝန်းပိုးမဖြစ်စေရန် ကျိုက်ထီးရိုး တောင်ပေါ်ရှိ လုပ်ငန်းများအားလုံးပြောင်းလဲနေချိန်တွင် တောင်တက်ကားအသင်းအနေဖြင့် ဝန်ဆောင်မှု တစ်ခုအနေဖြင့် လျော့ပေးရခြင်းဖြစ်ကြောင်း ကျိုက်ထီးရိုးတောင်တက် မော်တော်ယာဉ်အသင်းဥက္ကဌ ဦးဝိတင် ကပြောသည်။
“တောင်ပေါ်မှာက အားလုံးအခြေနေပြောင်းနေတဲ့အချိန်မှာ ကိုယ်တွေလည်းဝန်ဆောင်မှုပေးတာပါ။ကားခက နောက်ခန်းအတွက်ဘဲ လျော့ပေးတာပါ။ ခေါင်းခန်းကအရင်ဈေးနှုန်းအတိုင်းပါဘဲ၊မပြောင်းလဲပါဘူး။ နောက်ဝန် ဆောင်မှုတစ်ခုအနေနဲ့က ကားတွေအားလုံးအမိုးတပ်ထားပေးပါတယ်။ ဘုရားဖူးပြည်သူအားလုံးစိတ်ချမ်းသာကိုယ်ချမ်းသာဘုရားဖူးနိုင်ရေးကအဓိကပါ။”ဟု ဦးဝိတင်ကပြောသည်။

 ဘုရားဖူးပြည်သူများအား ဝန်ဆောင်မှုအသစ်အနေဖြင့် ကျိုက်ထီးရိုးတောင်တက် မော်တော်ယာဉ်အသင်းမှ ယာဉ်မောင်း၊ ယာဉ်နောက်လိုက်များအနေဖြင့် ဘုရားဖူးပြည်သူများနှင့်ဆက်ဆံပြောဆိုရာတွင် အဆင်ပြေစေရန် စည်းကမ်းပိုင်းအား ကြပ်မတ်ကိုင်တွယ်သွားမည်ဖြစ်ပြီး ကားမောင်းသူနှင့်ယာဉ်နောက်လိုက်များအားသတ်မှတ်ဝတ်စုံများဝတ်ဆင်စေမည်ဖြစ်ကြောင်းသိရသည်။

ထို့အပြင် တောင်တက်ကားများ၏ ရှေ့သက်ကယ်ဘောင်များတွင်ယာဉ်နံပါတ်၊ယာဉ်မောင်းအမည်၊ယာဉ် နောက်လိုက်အမည်များကို ရေးထားမည်ဖြစ်ပြီး ကားသမားများနှင့် ပြောဆိုဆက်ဆံသည့်အခါများတွင် အဆင် မပြေခြင်းများရှိပါက ဆက်သွယ်တိုင်ကြားရန်ဖုန်းနံပါတ်များအား တစ်ပါတည်းရေးထားမည်ဖြစ်ကြောင်း သိရသည်။

 ကျိုက်ထီးရိုးတောင်ခြေ ကင်မွန်းစခန်းမှရင်ပြင်တော်စခန်းအထိ တောင်တက်ကားခ နောက်ခန်းဈေးနှုန်းကို၂၅၀၀ကျပ်၊ ရှေ့ခန်းဈေးနှုန်း၃၀၀၀ကျပ်သတ်မှတ်ထားရာမှ နောက်ခန်းဈေးနှုန်းအား လျော့ချပေးခဲ့ခြင်း ဖြစ်သည်။
 “ဒီတစ်ခေါက်ဘုရားဖူးလာရတာ စိတ်ချမ်းသာတယ်လို့ပြောရမယ်။ ဘာလို့ဆို အရင်တုန်းကလို အတင်းအလှူခံ တာတွေမတွေ့ရဘူး။ ကားစီးရတာလဲ အမိုးနဲ့ဆိုတော့ အဆင်ပြေတယ်။ ဈေးဆိုင်တန်းတွေဆိုရင် အရင်လိုရိုက် စားလုပ်တာတွေမတွေ့ရသေးဘူး။ တချို့နေရာလေးတွေတော့ မပြောင်းလဲသေးတာရှိသေးတယ်။”ဟုဘုရားဖူးပြည်သူတစ်ဦးကပြောသည်။

ကျိုက်ထီးရိုးတောင်တက်မော်တော်ယာဉ်အသင်းအား ၁၉၉၃ ခုနှစ်တွင် စတင်တည်ထောင်ခဲ့ပြီး လက်ရှိအချိန် အထိ တောင်တက်မော်တော်ယာဉ် ၁၅၀ စီးဖြင့် ဘုရားဖူးများအား ပို့ဆောင်ပေးလျှက်ရှိကြောင်း သိရသည်။

ရတနာပုံ သတင်းစာ
https://www.facebook.com/yadanabonnewspaper


မောင်တောဒေသခံတွေ ထွက်ပြေးလာစဉ်
ရခိုင်ပြည်နယ် မောင်တောမြို့နယ်တွင်းက လူနည်းစု ရခိုင်တိုင်းရင်းသားတွေ လုံခြုံရေး စိုးရိမ်ချက်ကြောင့် ဒေသတွေကို စွန့်ခွာ ထွက်ပြေးနေကြဆဲ ဖြစ်ပါတယ်။ ထွက်ပြေးလာတဲ့ မောင်တော ဒေသခံ ၁ ထောင်ကျော်ကို အနီးအနား ဘူးသီးတောင်မြို့နယ်မှာ ကယ်ဆယ်ရေး စခန်းဖွင့်လှစ် စောင့်ရှောက်နေပြီး စားနပ်ရိက္ခာ လိုအပ်ချက်တွေလည်း ရှိနေပါတယ်။ အခြေအနေ အသေးစိတ်ကို မသိင်္ဂီထိုက် ဆက်သွယ် မေးမြန်းထားပါတယ်။

ရခိုင်ပြည်နယ် မောင်တောမြို့နယ် အတွင်းက နယ်ခြားစောင့် ရဲတပ်စခန်းတွေ တိုက်ခိုက်ခံရပြီးနောက် ဒေသတွင်းမှာ လုံခြုံရေး တပ်ဖွဲ့တွေနဲ့ အကြမ်းဖက် တိုက်ခိုက်သူတွေကြား ထိပ်တိုက်တွေ့မှုတွေ ရှိနေဆဲ ဖြစ်သလို လူနည်းစု ဒေသခံတွေလည်း ထွက်ပြေးနေကြရပါတယ်။ ဒီကနေ့ အင်္ဂါနေ့မှာလည်း မောင်တောမြို့နယ်တွင်းက ဝေးလံခေါင်သီတဲ့ ဒေသတွေကနေ နယ်ခြင်းနီးတဲ့ ဘူးသီးတောင်မြို့ပေါ်ကို ထွက်ပြေးလာသူတွေ ရှိနေဆဲပါ။ ဘူးသီးတောင်မြို့ပေါ်က အမှတ် ၁ အထက်တန်းကျောင်းခွဲမှာ ထွက်ပြေးလာသူတွေကို ကူညီပေးနေတဲ့ သောက်သုံးရေ လှုဒါန်းရေး အဖွဲ့ ဘူးသီးတောင်မြို့က ဦးအောင်ထူးက အခုလို ပြောပါတယ်။

“စခန်းမှာ ဒုက္ခသည်က ၁၂၆၀ လောက်ရှိပါတယ်။ ဒီနေ့တော့ ၁၀-၁၅ ယောက်လောက်ပဲ ထပ်ရောက်ပါတယ်။ ကလေးကတော့ ၅၀၀ လောက်ပါ ၊ အမျိုးသမီးနဲ့ ကလေးတွေကတော့ ဒီဘက်ကိုလာတာပါ ကျန်တဲ့ အိမ်ထောင်ဦးစီး ၁ ယောက်ကတော့ အဲဒီမှာ ကျန်ခဲ့တယ်ပေါ့နော်။ အများဆုံးထွက်ပြေးလာတာကတော့ ကျီးကန်းပြင်နားမှာရှိတဲ့ကျိန်ချောင်းတို့၊ အလယ်သံကျော်ဘက်က မောရ၀တီတို့ ၊ ဆားဝဲချောင်း၊ ပြီးတော့လေ ကျိန်ချောင်းနားမှာရှိတဲ့ရွာတွေကျီးကန်းပြင်အနီးအနားမှာ ရှိတဲ့ရွာတွေက အကုန်လုံး ထွက်ပြေးလာကြတာ။ လမ်းပန်းဆက်သွယ်ရေးကတော့ တနေကုန်နေမှ ကား ၂ စီးလောက်လာတယ်၊ ၃ စီးလာတယ်။ အဲဒီလိုလာတဲ့ ကားတွေကိုသူတို့ အကူအညီတောင်းပြီး ထွက်ပြေးလာတာပါ။ ဟုတ်ကဲ့ ခရီးတင်တဲ့ကားတွေ ကျီးကန်းပြင်ဘက်မှာ ရောက်နေတဲ့ကားတွေ ၊ ခရီးသည်တင်နေတဲ့ကားတွေရယ်၊ နောက်ပြီး ကျီးကန်းပြင်ကိုလာတဲ့ express ကားတွေနဲ့ လာကြတာပါ။”

မူဆလင် အများစု နေထိုင်ရာ မောင်တောမြို့နယ်တွင်းမှာ လူနည်းစု ဖြစ်နေတဲ့ ရခိုင်တိုင်းရင်းသားတွေ လုံခြုံရေး စိုးရိမ်ချက်နဲ့ ထွက်ပြေး တိမ်းရှောင်နေကြတာ ဖြစ်ပေမယ့် အိမ်ထောင်ဦးစီး အမျိုးသား အများစုကတော့ အိုးအိမ် အသက်မွေးဝမ်းကျောင်း လုပ်ငန်းတွေကို စောင့်ရှောင်ဖို့ နေရပ်ရင်းမှာ ကျန်နေခဲ့ကြတယ်လို့လည်း ကူညီကယ်ဆယ်ရေး ဆောင်ရွက်နေတဲ့ ဦးအောင်ထူးက ပြောပါတယ်။ ငွေကြေးတတ်နိုင်သူ အများစုကတော့ ဘူးသီးတောင်မြို့နယ်ကနေ တဆင့် စစ်တွေမြို့ကို တဆင့် သွားရောက်ကြတယ်လို့လည်း သူက ပြောပါတယ်။ ဘူးသီးတောင် ကယ်ဆယ်ရေး စခန်းမှာ ကူညီပေးနေသူ တဦးဖြစ်တဲ့ ကိုအောင်သူရထွန်းကလည်း ထွက်ပြေးလာသူတွေ နေရပ်ရင်း ပြန်နိုင်မယ့် အခြေအနေနဲ့ ပတ်သက်ပြီး အခုလို ပြောပါတယ်။

“ဌာနေပြန်နိုင်မယ့်မျှော်လင့်ချက်ကတော့ တော်တော်လေးဝေးနေသေးပါတယ်။ အခုလက်ရှိအခြေအနေကတော့ ဟိုဘက်ကလည်း ဒေသအခြေအနေကလည်းတော်တော်လေးကို အချိန်ယူပြီးဖြေရှင်းရမယ့်အခြေအနေရှိပါတယ်ခင်ဗျ။ ဒီချက်ချင်းကြီးဆိုသလိုမျိုး ပြန်နိုင်မယ့်အခြေအနေမျိုးတော့ မမြင်ရသေးပါဘူး။ အဲလိုမျိုးပါ ဒီမှာပဲ အခြေစိုက်ဖို့ ဒုက္ခသည်တွေက ဒီမှာပဲ အခြေချနိုင်ဖို့ကိုတောင် လူမှုအဖွဲ့အစည်းတွေက တော်တော်လေးကိုဆွေးနွေး နေတာတွေ့ရပါတယ် ခင်ဗျ။ ဘူးသီးတောင်ဘက် မြို့ပေါ်မှာတော့ တော်တော်လေး စိုးရိမ်ရတဲ့အခြေအနေမရှိပါ။ ဒီ ဘူးသီးတောင်မြို့နဲ့ မလှမ်းမကမ်းမှာရှိတဲ့ ဘင်္ဂါလီရွာတွေ တခြား ရွာကြီးတွေ အဲဒါမျိုးနဲ့ နီးတဲ့ ဒီရခိုင်ရွာတွေ ၊ တိုင်းရင်းသားရွာတွေတော့ နည်းနည်းလေးစိုးရိမ်ရတဲ့အခြေအနေတော့ရှိပါတယ်ခင်ဗျ။”

လတ်တလောမှာတော့ ဘူးသီးတောင်မြို့မှာ ကျောင်းတွေ ပိတ်ထားတာကြောင့် ထွက်ပြေးလာသူတွေကို အထက ကျောင်းမှာ ထားရှိထားနိုင်ပေမယ့် ကျောင်းတွေ ပြန်ဖွင့်လာရင်တော့ နေရာ ရွှေ့ပြောင်းရဖို့လည်း ဆွေးနွေးနေကြတယ်လို့လည်း ကိုအောင်သူရထွန်းက ပြောပါတယ်။ ကလေးငယ် ၅၀၀ နီးပါး ရှိနေတဲ့ ဘူးသီးတောင် ကယ်ဆယ်ရေး စခန်းရဲ့ ကျန်းမာရေး စောင့်ရှောက်မှုကိုတော့ မြို့နယ် ကျန်းမာရေး ဆရာဝန်ကြီးက ဆောင်ရွက်နေပြီး ဒေသခံ စည်ပင်ဌာနက စားနပ်ရိက္ခာ ထောက်ပံ့မှု တချို့ ရှိပေမယ့် တရက်စာ စားနပ်ရိက္ခာ ကုန်ကျစာရိတ် ၁၆ သိန်းလောက် ကျသင့်နေပြီး အများစုကိုတော့ ပြည်တွင်း ပြည်ပ အလှုရှင်တွေကို အားထားနေရတယ်လို့လည်း ကူညီဆောင်ရွက်နေသူတွေက ပြောပါတယ်။

 မသိင်္ဂီထိုက်  / ဗွီအိုအေ (မြန်မာပိုင်း)
http://burmese.voanews.com


NLD အစိုးရလက်ထက် ပထမအကြိမ်အဖြစ် အိန္ဒိယနိုင်ငံသို့ သွားရောက်နေ ခဲ့သည့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ရခိုင်ပြည်နယ်၌ ဖြစ်ပေါ်နေသော အခြေအနေများ၏ ရှုပ်ထွေးမှုနှင့် အထိခိုက် မခံမှုတို့ကို နားလည်ပေးရန် “အိမ်နီးချင်းနှင့် မိတ်ဆွေနိုင်ငံများကို တောင်းဆို လိုက်ပြီး ဆယ်စုနှစ်များစွာ ဖြစ်ပေါ်လာသည့် တင်းမာမှုများအား ဒီမိုကရေစီ အလွန်နုနယ်သည့် နိုင်ငံတွင် နေ့ချင်းညချင်း ဖြေရှင်းနိုင်မည် မဟုတ် ဟု ပြောကြားခဲ့သည်။

အိန္ဒိယနိုင်ငံ၊ ဂိုအာမြို့၌ ပြုလုပ်သည့် BRICS - BIMSTEC ထိပ်သီး အစည်းအဝေးသို့ တက်ရောက်ခဲ့သည့် ဒေါ်အောင်ဆန်းစုကြည်က တနင်္ဂနွေနေ့ နံနက်ပိုင်း တွင် ထိုသို့ ပြောကြားခဲ့သည်။ အိန္ဒိယ၀န်ကြီးချုပ် နာရန်ဒရာမိုဒီက ဥက္ကဋ္ဌအဖြစ် ဆောင်ရွက်ခဲ့သည့် စားပွဲဝိုင်း ဆွေးနွေးပွဲ တွင် ဒေါ်အောင်ဆန်းစုကြည် က “ကျွန်မတို့ ဒေသတစ်ခုလုံးဟာ အကြမ်းဖက်ဝါဒ၊ အစွန်းရောက်ဝါဒ၊ ရာသီဥတု ပြောင်းလဲမှု၊ သဘာဝနဲ့ လူလုပ် ဘေးအန္တရာယ်များနဲ့ နျူကလီးယား လက်နက် အန္တရယ် အပါအ၀င် စိန်ခေါ်မှုများစွာနဲ့ ရင်ဆိုင်နေရပါတယ်” ဟု ပြောကြားခဲ့သည်။

အကြမ်းဖက်ဝါဒ မြင့်တက်လာခြင်းနှင့် ပတ်သက်၍ နိုင်ငံတကာ အသိုင်းအ၀ိုင်း အနေဖြင့် ဘာသာရေး၊ ယဉ်ကျေးမှုနှင့် လူမှုရေးအရ သည်းခံမှုများ နားလည် မှုများ မရှိခြင်းကြောင့် ဖြစ်ပေါ်လာသည့် အစွန်းရောက် အကြမ်းဖက်မှု ပုံစံမျိုးစုံ ကို ညီညွတ်စွာ အခိုင်အမာ ဆန့်ကျင်ရမည်ဟု ဒေါ်အောင်ဆန်းစုကြည် က ပြောကြားခဲ့သည်။

ထို့အပြင် စက်တင်ဘာ ၁၈ မှ အိန္ဒိယနိုင်ငံ၊ အူရီမြို့ရှိ စစ်အခြေစိုက်စခန်း တစ်ခု တိုက်ခိုက်ခံရခြင်းကို ရည်ညွှန်း၍ “အိန္ဒိယနိုင်ငံ၌ မကြာမီက ဖြစ်ပွားခဲ့သည့် အကြမ်းဖက် တိုက်ခိုက်မှုများအတွက် ကရုဏာသက်မိကြောင်း” ပြောကြား ခဲ့သည်။

ထို့နောက် ဒေါ်အောင်ဆန်းစုကြည်သည် ယခုလ အစောပိုင်းက ရခိုင်ပြည်နယ် ရှိ နယ်ခြားစောင့် ရဲစခန်းများအား ပါကစ္စတန်နိုင်ငံ၌ လေ့ကျင့်ခဲ့သူ အစွန်းရောက် တစ်ဦး ဦးဆောင်သည့် အကြမ်းဖက်သမားများက တိုက်ခိုက် ခဲ့မှုနှင့် ပတ်သက်၍ ရှင်းလင်းပြောကြားခဲ့သည်။

ဝန်ကြီးချုပ်မိုဒီက ပါကစ္စတန်နိုင်ငံသည် အာရှတွင် အကြမ်းဖက် ၀ါဒ ဖြန့်ဝေရာ ဖြစ်သည်ဆိုသည့် ပြောကြားချက်သည် မောင်းတောဒေသမှ တိုက်ခိုက်မှုဖြစ်စဉ် သက်သေထူလျက်ရှိသည်။

ဒေါ်အောင်ဆန်းစုကြည်က ရခိုင်ပြည်နယ် အခြေအနေအပေါ် နားလည်မှုပေး ရန် BIMSTEC ညီလာခံတွင် တောင်းဆိုခဲ့ပြီး“ကျွန်မတို့ ရင်ဆိုင်နေ ရတဲ့ ပြသ၁နာတွေက ခက်ခဲတယ်ဆိုတာ ၀န်ခံပါတယ်။ ဒီပြသ၁နာရဲ့ ရှုပ်ထွေးမှုနဲ့ ဒါဟာ ကျွန်မတို့ နိုင်ငံအတွက်သာမက ဒေသတွင်း ငြိမ်းချမ်းရေးနဲ့ တည်ငြိမ်ရေး အတွက် ကြီးမားတဲ့ စိန်ခေါ်မှု ဖြစ်တယ်ဆိုတာ ကမ္ဘာတစ်ဝန်းက မိတ်ဆွေတွေနဲ့ အိမ်နီးချင်းနိုင်ငံတွေ နားလည်အသိအမှတ် ပြုစေချင်ပါတယ်” ဟု ပြောကြားခဲ့သည်။

ဒေါ်အောင်ဆန်းစုကြည်က အကြမ်းဖက်ဝါဒ၏ အခြေခံဖြစ်သော အစွန်းရောက် ၀ါဒ ဖြစ်ပေါ်လာစေသည့် အကြောင်းရင်းများကို ရှာဖွေရန် လိုအပ်ပြီး အခြေအနေ အား စိတ်ခံစားချက်ထက် အချက်အလက်များပေါ် မူတည် သုံးသပ်ရန် အလွန်အရေးကြီးသည်ဟု ပြောကြားသည်။

“လူမှုအဖွဲ့အစည်းတွေကြားမှာ ဆယ်စုနှစ်များစွာ ရှိလာတဲ့ တင်းမာမှုတွေကို တစ်ရက် အတွင်း ဖြေရှင်းလို့ မရနိုင်ပါဘူး။ ဒီမိုကရေစီရေးနဲ့အတူ အမျိုးသား ရင်ကြားစေ့ရေး၊ ငြိမ်းချမ်းရေးတွေကိုလည်း ဆောင်ရွက်ရမှာ ဖြစ်ပြီး ဦးတည်ချက် မျိုးစုံအတွက် အလုပ်လုပ်ရမှာပါ” ဟု ဒေါ်အောင်ဆန်းစုကြည်က ဆိုသည်။

နိုင်ငံအတွင်း လူမှုအသိုင်းအ၀ိုင်းများ အကြားတွင် ငြိမ်းချမ်းမှုရရှိစေရန် NLD အစိုးရက အမှန်တကယ် ကြိုးစား ဆောင်ရွက်နေသည် ဟု ဒေါ်အောင်ဆန်းစုကြည် က ပြောကြားသည်။

ယင်းက “ကျွန်မတို့ ပြည်သူတွေဟာ တာဝန်ယူမှုနဲ့ လူ့အခွင့်အရေးကို အသိအမှတ်ပြုမှုတွေ ပါဝင်တဲ့ ဒီမိုကရေစီလုပ်ငန်းစဉ်တွေနဲ့ ရင်းနှီးမှု မရှိသေးတဲ့ အတွက် တစ်ဆင့်ပြီးတစ်ဆင့် ဆောင်ရွက်ရပါမယ်။ ဒီမိုကရေစီဟု တာဝန်ယူမှုနဲ့ လူ့အခွင့်အရေး လေးစားမှု ပေါင်းစပ်ထားတယ်ဆိုတာ အာရုံစိုက်ဖို့ လိုပါတယ်” ဟု ပြောကြားခဲ့သည်။

KHTun
The Ladies News

နိုင်ငံတော်၏ အတိုင်ပင်ခံပုဂ္ဂိုလ်သည် ယနေ့ နယူးဒေလီမြို့တွင် မဟတ္တမဂန္ဒီ၏ အထိမ်းအမှတ်ဂူဗိမ္မာန်သို့ သွားရောက်ပြီး ပန်းခွေချ ဂါရ၀ပြုခဲ့
The Ladies News

မိုဆူးလ်မြို့ အရှေ့ဘက် ၁၈ မိုင်လောက် အကွာကို ကာဒစ်ရ်ှတပ်တွေ ရောက်လာပြီ။

အီရတ် နိုင်ငံထဲက IS အစ္စလာမ္မစ် နိုင်ငံအဖွဲ့ ခြေကုပ်ယူထားတဲ့ မိုဆူးလ်မြို့ကို ပြန်သိမ်းပြီးရင် အဲဒီ မြို့ကနေ ထွက်ပြေးလာနိုင်တဲ့ ဂျီဟတ်ဝါဒီတွေကို ရင်ဆိုင်ဖို့ ဥရောပ သမဂ္ဂ အီးယူ အနေနဲ့ ကြိုတင် ပြင်ဆင် ထားသင့်တယ်လို့ အီးယူ လုံခြုံရေး ဆိုင်ရာ ကော်မရှင်နာက ပြောပါတယ်။

ထွက်ပြေးလာမယ့် ဂျီဟတ် ဝါဒီ စစ်သွေးကြွ အနည်းငယ်ပဲ ဖြစ်ပါစေ၊ အန္တရာယ်က အရမ်း ကြီးလွန်းတယ်လို့ အီးယူ ကော်မရှင်နာ Julian King က ဂျာမန် သတင်းစာ တစ်စောင်ကို ပြောလိုက်တာပါ။

IS တွေ ခြေကုပ်ယူထားတဲ့ မိုဆူးလ်မြို့ကို ပြန်သိမ်းနိုင်ရေး စစ်ဆင် တိုက်ခိုက်မှုတွေကို အီရတ် တပ်ပေါင်းစုက တနင်္လာနေ့က စတင်ခဲ့တာ ဖြစ်ပါတယ်။

အီရတ် အစိုးရ တပ်တွေက မိုဆူးမြို့ တောင်ဘက် ၂၄ မိုင် အကွာလောက်ကို ရောက်နေပြီး ကာဒစ်ရှ် တပ်တွေကတော့ မြို့အရှေ့ဘက် ၁၈ မိုင်လောက် အကွာကို ရောက်နေပါပြီ။

IS တွေက မြို့ခံ အရပ်သားတွေကို လူသား ဒိုင်းအဖြစ် အသုံးချလာမှာကိုလည်း အကူအညီ အဖွဲ့အစည်းတွေက စိုးရိမ် နေကြပါတယ်။

BBC Burmese

နယူးဒေလီ အောက်တိုဘာ ၁၈
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် အိန္ဒိယသမ္မတနိုင်ငံဆိုင်ရာ မြန်မာ သံရုံး၌ ယနေ့ ဒေသစံတော်ချိန် ညနေ ၃ နာရီ ၄၅ မိနစ်တွင် Times Now သတင်းဌာနမှ အယ်ဒီတာ Mr.Srinjoy Chowdhury နှင့်လည်းကောင်း၊ ညနေ ၄ နာရီခွဲ တွင် Hindustan Times သတင်းဌာနမှ Associate editor , Mr. Zezaul Laskar နှင့်လည်းကောင်း၊ ညနေ ၄ နာရီ ၄၅ မိနစ်တွင် Washington Post သတင်းဌာနမှ Bureau Chief, Ms. Annie Gowanနှင့် လည်းကောင်း သီးခြားစီလက်ခံတွေ့ဆုံသည်။

ညပိုင်းတွင် နိုင်ငံတော်၏အတိုင်ပင်ခံပုဂ္ဂိုလ်သည် အိန္ဒိယသမ္မတနိုင်ငံဆိုင်ရာ မြန်မာသံ အမတ်ကြီး က တည်ခင်းဧည့်ခံသည့် ညစာစားပွဲသို့တက်ရောက်ပြီး သံရုံးနှင့် စစ်သံရုံးဝန်ထမ်းများနှင့် မိသားစုဝင် များအား ရင်းရင်းနှီးနှီးတွေ့ဆုံသည်။
Myanmar State Counsellor Office

မောင်တောဒေသခံတွေ ထွက်ပြေးလာစဉ်
မောင်တောဒေသခံတွေ ထွက်ပြေးလာ
ရခိုင်ပြည်နယ် မောင်တောမြို့နယ်တွင်းက လူနည်းစု ရခိုင်တိုင်းရင်းသားတွေ လုံခြုံရေး စိုးရိမ်ချက်ကြောင့် ဒေသတွေကို စွန့်ခွာ ထွက်ပြေးနေကြဆဲ ဖြစ်ပါတယ်။ ထွက်ပြေးလာတဲ့ မောင်တော ဒေသခံ ၁ ထောင်ကျော်ကို အနီးအနား ဘူးသီးတောင်မြို့နယ်မှာ ကယ်ဆယ်ရေး စခန်းဖွင့်လှစ် စောင့်ရှောက်နေပြီး စားနပ်ရိက္ခာ လိုအပ်ချက်တွေလည်း ရှိနေပါတယ်။ အခြေအနေ အသေးစိတ်ကို မသိင်္ဂီထိုက် ဆက်သွယ် မေးမြန်းထားပါတယ်။

ရခိုင်ပြည်နယ် မောင်တောမြို့နယ် အတွင်းက နယ်ခြားစောင့် ရဲတပ်စခန်းတွေ တိုက်ခိုက်ခံရပြီးနောက် ဒေသတွင်းမှာ လုံခြုံရေး တပ်ဖွဲ့တွေနဲ့ အကြမ်းဖက် တိုက်ခိုက်သူတွေကြား ထိပ်တိုက်တွေ့မှုတွေ ရှိနေဆဲ ဖြစ်သလို လူနည်းစု ဒေသခံတွေလည်း ထွက်ပြေးနေကြရပါတယ်။ ဒီကနေ့ အင်္ဂါနေ့မှာလည်း မောင်တောမြို့နယ်တွင်းက ဝေးလံခေါင်သီတဲ့ ဒေသတွေကနေ နယ်ခြင်းနီးတဲ့ ဘူးသီးတောင်မြို့ပေါ်ကို ထွက်ပြေးလာသူတွေ ရှိနေဆဲပါ။ ဘူးသီးတောင်မြို့ပေါ်က အမှတ် ၁ အထက်တန်းကျောင်းခွဲမှာ ထွက်ပြေးလာသူတွေကို ကူညီပေးနေတဲ့ သောက်သုံးရေ လှုဒါန်းရေး အဖွဲ့ ဘူးသီးတောင်မြို့က ဦးအောင်ထူးက အခုလို ပြောပါတယ်။

“စခန်းမှာ ဒုက္ခသည်က ၁၂၆၀ လောက်ရှိပါတယ်။ ဒီနေ့တော့ ၁၀-၁၅ ယောက်လောက်ပဲ ထပ်ရောက်ပါတယ်။ ကလေးကတော့ ၅၀၀ လောက်ပါ ၊ အမျိုးသမီးနဲ့ ကလေးတွေကတော့ ဒီဘက်ကိုလာတာပါ ကျန်တဲ့ အိမ်ထောင်ဦးစီး ၁ ယောက်ကတော့ အဲဒီမှာ ကျန်ခဲ့တယ်ပေါ့နော်။ အများဆုံးထွက်ပြေးလာတာကတော့ ကျီးကန်းပြင်နားမှာရှိတဲ့ကျိန်ချောင်းတို့၊ အလယ်သံကျော်ဘက်က မောရ၀တီတို့ ၊ ဆားဝဲချောင်း၊ ပြီးတော့လေ ကျိန်ချောင်းနားမှာရှိတဲ့ရွာတွေကျီးကန်းပြင်အနီးအနားမှာ ရှိတဲ့ရွာတွေက အကုန်လုံး ထွက်ပြေးလာကြတာ။ လမ်းပန်းဆက်သွယ်ရေးကတော့ တနေကုန်နေမှ ကား ၂ စီးလောက်လာတယ်၊ ၃ စီးလာတယ်။ အဲဒီလိုလာတဲ့ ကားတွေကိုသူတို့ အကူအညီတောင်းပြီး ထွက်ပြေးလာတာပါ။ ဟုတ်ကဲ့ ခရီးတင်တဲ့ကားတွေ ကျီးကန်းပြင်ဘက်မှာ ရောက်နေတဲ့ကားတွေ ၊ ခရီးသည်တင်နေတဲ့ကားတွေရယ်၊ နောက်ပြီး ကျီးကန်းပြင်ကိုလာတဲ့ express ကားတွေနဲ့ လာကြတာပါ။”

မူဆလင် အများစု နေထိုင်ရာ မောင်တောမြို့နယ်တွင်းမှာ လူနည်းစု ဖြစ်နေတဲ့ ရခိုင်တိုင်းရင်းသားတွေ လုံခြုံရေး စိုးရိမ်ချက်နဲ့ ထွက်ပြေး တိမ်းရှောင်နေကြတာ ဖြစ်ပေမယ့် အိမ်ထောင်ဦးစီး အမျိုးသား အများစုကတော့ အိုးအိမ် အသက်မွေးဝမ်းကျောင်း လုပ်ငန်းတွေကို စောင့်ရှောင်ဖို့ နေရပ်ရင်းမှာ ကျန်နေခဲ့ကြတယ်လို့လည်း ကူညီကယ်ဆယ်ရေး ဆောင်ရွက်နေတဲ့ ဦးအောင်ထူးက ပြောပါတယ်။ ငွေကြေးတတ်နိုင်သူ အများစုကတော့ ဘူးသီးတောင်မြို့နယ်ကနေ တဆင့် စစ်တွေမြို့ကို တဆင့် သွားရောက်ကြတယ်လို့လည်း သူက ပြောပါတယ်။ ဘူးသီးတောင် ကယ်ဆယ်ရေး စခန်းမှာ ကူညီပေးနေသူ တဦးဖြစ်တဲ့ ကိုအောင်သူရထွန်းကလည်း ထွက်ပြေးလာသူတွေ နေရပ်ရင်း ပြန်နိုင်မယ့် အခြေအနေနဲ့ ပတ်သက်ပြီး အခုလို ပြောပါတယ်။

“ဌာနေပြန်နိုင်မယ့်မျှော်လင့်ချက်ကတော့ တော်တော်လေးဝေးနေသေးပါတယ်။ အခုလက်ရှိအခြေအနေကတော့ ဟိုဘက်ကလည်း ဒေသအခြေအနေကလည်းတော်တော်လေးကို အချိန်ယူပြီးဖြေရှင်းရမယ့်အခြေအနေရှိပါတယ်ခင်ဗျ။ ဒီချက်ချင်းကြီးဆိုသလိုမျိုး ပြန်နိုင်မယ့်အခြေအနေမျိုးတော့ မမြင်ရသေးပါဘူး။ အဲလိုမျိုးပါ ဒီမှာပဲ အခြေစိုက်ဖို့ ဒုက္ခသည်တွေက ဒီမှာပဲ အခြေချနိုင်ဖို့ကိုတောင် လူမှုအဖွဲ့အစည်းတွေက တော်တော်လေးကိုဆွေးနွေး နေတာတွေ့ရပါတယ် ခင်ဗျ။ ဘူးသီးတောင်ဘက် မြို့ပေါ်မှာတော့ တော်တော်လေး စိုးရိမ်ရတဲ့အခြေအနေမရှိပါ။ ဒီ ဘူးသီးတောင်မြို့နဲ့ မလှမ်းမကမ်းမှာရှိတဲ့ ဘင်္ဂါလီရွာတွေ တခြား ရွာကြီးတွေ အဲဒါမျိုးနဲ့ နီးတဲ့ ဒီရခိုင်ရွာတွေ ၊ တိုင်းရင်းသားရွာတွေတော့ နည်းနည်းလေးစိုးရိမ်ရတဲ့အခြေအနေတော့ရှိပါတယ်ခင်ဗျ။”

လတ်တလောမှာတော့ ဘူးသီးတောင်မြို့မှာ ကျောင်းတွေ ပိတ်ထားတာကြောင့် ထွက်ပြေးလာသူတွေကို အထက ကျောင်းမှာ ထားရှိထားနိုင်ပေမယ့် ကျောင်းတွေ ပြန်ဖွင့်လာရင်တော့ နေရာ ရွှေ့ပြောင်းရဖို့လည်း ဆွေးနွေးနေကြတယ်လို့လည်း ကိုအောင်သူရထွန်းက ပြောပါတယ်။ ကလေးငယ် ၅၀၀ နီးပါး ရှိနေတဲ့ ဘူးသီးတောင် ကယ်ဆယ်ရေး စခန်းရဲ့ ကျန်းမာရေး စောင့်ရှောက်မှုကိုတော့ မြို့နယ် ကျန်းမာရေး ဆရာဝန်ကြီးက ဆောင်ရွက်နေပြီး ဒေသခံ စည်ပင်ဌာနက စားနပ်ရိက္ခာ ထောက်ပံ့မှု တချို့ ရှိပေမယ့် တရက်စာ စားနပ်ရိက္ခာ ကုန်ကျစာရိတ် ၁၆ သိန်းလောက် ကျသင့်နေပြီး အများစုကိုတော့ ပြည်တွင်း ပြည်ပ အလှုရှင်တွေကို အားထားနေရတယ်လို့လည်း ကူညီဆောင်ရွက်နေသူတွေက ပြောပါတယ်။

မသိင်္ဂီထိုက်VOA Burmese News


နိုင်ငံတော်အတိုင်ပင်ခံပုဂ္ဂိုလ် နိုင်ငံခြားရေးဝန်ကြီး ဒေါ်အောင်ဆန်းစုကြည်နှင့် ၀န်ကြီးချုပ် နေရိန်ဒရာ မိုဒီ
နိုင်ငံတော်အတိုင်ပင်ခံပုဂ္ဂိုလ် နိုင်ငံခြားရေးဝန်ကြီး ဒေါ်အောင်ဆန်းစုကြည်နှင့် ၀န်ကြီးချုပ် နေရိန်ဒရာ မိုဒီ

နိုင်ငံတော်အတိုင်ပင်ခံပုဂ္ဂိုလ် နိုင်ငံခြားရေးဝန်ကြီး ဒေါ်အောင်ဆန်းစုကြည်ကို အိန္ဒိယနိုင်ငံ၊ နယူးဒေလီမြို့တော်မှာ ၀န်ကြီးချုပ် နေရိန်ဒရာ မိုဒီနဲ့ တာဝန်ရှိသူတွေက တနင်္လာနေ့မှာ နိုင်ငံတော်အခမ်းအနားနဲ့ ဂုဏ်ပြုကြိုဆိုပြီး နှစ်နိုင်ငံကြား ဆက်ဆံရေးနဲ့ ပတ်သက်လို့ ဒေါ်အောင်ဆန်းစုကြည်က သတင်းထောက်တွေကို အခုလိုပြောပါတယ်။
“ကျမတို့နှစ်နိုင်ငံကြား ပိုပြီးကောင်းမွန်တဲ့ ဆက်ဆံရေးကိုတည်ဆောက်ဖို့ ကျမမျှော်လင့်ပါတယ်။ အိန္ဒိယနိုင်ငံကို ကျမ ရောက်လာတဲ့အချိန်တိုင်းမှာ ကျမတို့ နှစ်နိုင်ငံကြား ဆက်ဆံရေး ဘယ်လောက်နီးစပ်တယ်၊ ကျမတို့ရဲ့ ချစ်ကြည်ရင်းနှီးမှုဟာ အချိန်ကာလနဲ့ အခြေအနေတွေရဲ့ စမ်းသပ်မှုကို ကြံ့ကြံ့ခံရပ်တည်နိ်ုင်မယ်ဆိုတဲ့အပေါ် ဘယ်လောက်တောင် ကျမယုံကြည်တယ် ဆိုတာ ကျမ နားလည်လာလို့ပါပဲ။” လို့ ဒေါ်အောင်ဆန်းစုကြည်က ပြောပါတယ်။

ဒေါ်အောင်ဆန်းစုကြည်ဟာ နယူးဒေလီမြို့တော်မှာ အိန္ဒိယသမ္မတ Pranab Mukherjee နဲ့ တွေ့ဆုံသလို အတိုက်အခံ ကွန်ဂရက်စ်ပါတီခေါင်းဆောင် ဆိုနီယာ ဂန္ဒီနဲ့လည်း တွေ့ဆုံပါတယ်။ ဗုဒ္ဓဟူးနေ့မှာတော့ ၀န်ကြီးချုပ် မစ္စတာမိုဒီနဲ့ ဒေါ်အောင်ဆန်း စုကြည် တွေ့ဆုံပြီး နှစ်နိုင်ငံဆက်ဆံရေးနဲ့ ကုန်သွယ်ရေးနဲ့ ရင်းနှီး မြှုပ်နှံမှုဆိုင်ရာကိစ္စတွေကို ဆွေးနွေးဖို့ရှိပါတယ်။

မြန်မာနဲ့ အိန္ဒိယ နှစ်နိုင်ငံအကြား ပြန်ပြည့်မြဲစွမ်းအင်ကဏ္ဍ၊ လမ်းနဲ့တံတား ဆောက်လုပ်ရေးကဏ္ဍတွေမှာ ပူးပေါင်းဆောင်ရွက်နေ သလို မိုင်ပေါင်း ၉၉၀ ကျော်ရှည်လျားတဲ့ နှစ်နိုင်ငံနယ်စပ်ကို ပိုပြီး စနစ်တကျ စီမံခန့်ခွဲနိုင်ဖို့လည်း မျှော်လင့်ထားကြပါတယ်။

ဂိုအာမြို့မှာကျင်းပတဲ့ BRICS နဲ့ BIMSTEC ထိပ်သီးအစည်းအဝေးတွေကို တက်ပြီးတဲ့နောက် ဒေါ်အောင်ဆန်းစုကြည်ဟာ နိုင်ငံ တော်ခရီးစဉ်အနေနဲ့ နယူးဒေလီမြို့တော်မှာ ရောက်နေတာဖြစ်ပါတယ်။
VOA Burmese News



ပြည်ထောင်စုဝန်ကြီးဟောင်း ဦးအုန်းမြင့် ကို တွေ့ရစဉ်။ Photo: RFA
ရန်ကုန်တိုင်းဒေသကြီး ကျောက်တန်းမြို့နယ် ပြည်သူ့လွှတ်တော် ကိုယ်စားလှယ် ဒေါ်အေးမြမြမျိုးကို ကြံ့ခိုင်ဖံွ့ဖြိုးရေး ပါတီ ကိုယ်စားလှယ်လောင်း ဦးအုန်းမြင့် က ပြည်ထောင်စုရွေးကောက်ပွဲကော်မရှင်မှာ ကန့်ကွက်ထားတဲ့အမှု ရှုံးနိမ့်သွားပါတယ်။

ဒီနေ့ နေပြည်တော် ရွေးကောက်ပွဲကော်မရှင်ရုံးမှာ ခုံအဖွဲ့ ၃က ပြည်ထောင်စုဝန်ကြီးဟောင်း ဦးအုန်းမြင့် ကန့်ကွက်တာဟာ လုံလောက်တဲ့ သက်သေအထောက်အထား မရှိတာကြောင့် ပလပ်ဖို့ ဆုံးဖြတ်ပေးလိုက် တာဖြစ်တယ်လို့ ကိုယ်စားလှယ် ဒေါ်အေးမြမြမျိုးရဲ့ ရှေ့နေ ဦးအောင်သိန်းက ပြောပါတယ်။

"ဒေါ်အေးမြမြမျိုးရရှိတဲ့ ရွေးကောက်ပွဲ မဲအမှတ်တွေဟာ တရားသဖြင့်ရရှိတဲ့မဲ မဟုတ်ဘူးလို့ စွပ်စွဲပြစ်တင်တာကို ဒါတွေဟာ ပြစ်မှုမမြောက်ဘူး လုံလောက်တဲ့ သက်သေအထောက်အထား မတင်ပြနိုင်ဘူးဆိုပြီး ပလပ်လိုက်တယ်။ မတရားတားဆီးပိတ်ပင်မှုရယ် ရွေးကောက်ပွဲမှာ မတရားပြုကျင်ခံရတဲ့ ဆိုတဲ့ဟာရယ်ပေါ့။" လို့ ရှေ့နေ ဦးအောင်သိန်း က ပြောပါတယ်။

ကော်မရှင်ရဲ့ ဆုံးဖြတ်ချက်အရ တရားရုံးစရိတ်အဖြစ် ငွေကျပ် ၂သိန်းကို ဦးအုန်းမြင့်က ဒေါ်အေးမြမြမျိုး ကို ပေးလျော်ခဲ့ပါတယ်။

ပြီးခဲ့တဲ့ရွေးကောက်ပွဲ မဲဆွယ်စည်းရုံးရေးကာလတုန်းက မဲဆွယ်ဟောပြောတဲ့နေရာမှာ ဒေါ်အေးမြမြမျိုးက တားဆီးပိတ်ပင်တာတွေ မဲရုံတွေမှာ မဲမသမာမှုတွေ ပြုလုပ်ခဲ့တယ်ဆိုပြီး ကြံ့ခိုင်ဖွံ့ဖြိုးရေးကိုယ်စားလှယ်  ဦးအုန်းမြင့်က ကန့်ကွက်လွှာ တင်သွင်းတာဖြစ်ပါတယ်။

ဒါ့အပြင် ဦးအုန်းမြင့် က ဒေါ်အေးမြမြမျိုးကို ကျောက်တန်းမြို့နယ်တရားရုံးမှာလည်း မတရားတားဆီးကန့်ကွက်မှု ပုဒ်မ ၃၄၁ နဲ့ တရားစွဲဆိုခဲ့ပါတယ်။

RFA Burmese
http://www.rfa.org/burmese



မွန်နဲ့ကရင်ပြည်နယ်တွင်း တရားမဝင် ဝင်လာသူများ (ဓါတ်ပုံ- Ko Ko Zaw)
ရခိုင်ပြည်နယ်အတွင်း အကြမ်းဖက်တိုက်ခိုက်မှုဖြစ်ပွါးခဲ့အပြီး ခရီးသွားလာရေးမှာစစ်ဆေးမှုတွေရှိနေသလို မွန်ပြည် နယ်နဲ့ကရင်ပြည်နယ်အတွင်းမှာ တရားမ၀င်ခိုးဝင်လာတဲ့သူ(၃၈)ဦးကို သက်ဆိုင်ရာရဲတပ်ဖွဲ့တွေကနေ ဖမ်းဆီးအရေး ယူခဲ့တယ်လို့ ရဲတပ်ဖွဲ့တာဝန်ရှိသူတွေကပြောပါတယ်။ ဗွီအိုအေထိုင်းအခြေစိုက်သတင်းထောက် နိုင်ကွန်းအိန်ကနေ အခုလို သတင်းပေးပို့ထားပါတယ်။

မွန်ပြည်နယ်အတွင်းကို တရားမ၀င်ဝင်ရောက်လာတဲ့ ရခိုင်ပြည်နယ်ဘက်ကလို့ယူဆရတဲ့ မူဆလင် (၁၂)ဦးကို မွန်ပြည်နယ်ရဲတပ်ဖွဲ့ကနေ ဖမ်းဆီးရရှိခဲ့ပြီး လူဝင်မှုကြီးကြပ်ရေးအက်ဥပဒေနဲ့ အမှုဖွင့်အရေးယူထားတယ်လို့ မော်လ မြိုင်မြို့ရဲတပ်ဖွဲ့မှူးရုံးက ရဲမှူးအောင်မြင့်ကပြောပါတယ်။

“သူတို့ဝင်လာတဲ့ပုံစံကတော့ ရခိုင်ကနေပြီးတော့ ကျောက်တော်က ၅ ယောက်တဖွဲ့ပါတယ်၊ နောက်ပြီးတော့ မြောက်ဦးက ၅ ယောက်တဖွဲ့ပါတယ်၊ မင်းပြား က ၂ ယောက်တဖွဲ့ပါတယ်။ အဲဒီ ၃ ဖွဲ့က သူတို့လမ်းကြောင်းတွေမှ တချို့က ကုန်းလမ်းကြောင်းနဲ့ထွက်လာတယ်၊ တချို့က ရေလမ်းကြောင်းနဲ့ ၂ ဖွဲ့က ထွက်လာတယ်။ ရန်ကုန်ကို စုရောက်ကြတယ် ၊ ရန်ကုန်ကနေပြီးတော့မှ မော်လမြိုင်ကို တခါ ကားနဲ့ ခေါ်လာခဲ့တယ်။ မလေးထိပို့မယ်ဆိုတဲ့ သတင်းသိရတယ်။ သူတို့ကို လ၀က အက်ဥပဒေနဲ့ အရေးယူဖို့စီစဉ်ထားတယ်။”

တရားမ၀င်ဝင်ရောက်လာသူ(၁၂)ဦးကို အောက်တိုဘာလ(၁၆)ရက်နေ့မှာ မော်လမြိုင်အဝေးပြေးယာဉ်မှာ ဖမ်းဆီးရမိ တာဖြစ်ပါတယ်။

ဖမ်းဆီးခံရသူ(၁၂)ဦးဟာ မြန်မာစကားပြောဆိုတတ်တာမရှိသလို သူတို့ရဲ့မူရင်းဇာတိကို စီစစ်နေဆဲလို့ ရဲမှူးအောင် မြင့်က ဆက်ပြောပါတယ်။

“သူတို့ကို ဘာသာပြန်နဲ့မေးရတာပေါ့နော် ။ မြန်မာစကားကလည်း မပေါက်တာများတယ် တချိုကလေ။ စီစစ်နေတုန်းပဲခင်ဗျ တချို့ကလေ သက်ဆိုင်ရာ ကျောက်တော်တို့ ၊ မင်းပြားတို့ ကိုလှမ်းပြီးတော့ စီစစ်အတည်ပြုနေတုန်းပဲခင်ဗျ။”

အလားတူ ကရင်ပြည်နယ် မြ၀တီမြို့နယ်မြို့နယ်အတွင်းမှာ ထိုင်းနိုင်ငံကနေတဆင့် တရားမ၀င်ခိုးဝင်လာတဲ့ ဘင်္ဂါလီ (၂၆)ဦးကို အောက်တိုဘာ(၁၃) (၁၄)ရက်နေ့တွေမှာဖမ်းဆီးရရှိခဲ့တယ်လို့ မြ၀တီမြို့မရဲစခမ်းတာဝန်ရှိသူတဦးက အခု လိုအတည်ပြုပြောဆိုပါတယ်။

“ ၁၃ ရက်နေ့တုန်းက ထွန်းလင်း (ခေါ်) လတီးမနားက ၂၀ ယောက် အဲဒီ ၂၀ ယောက်ကို လ၀က အက် ၁၃ (၁ )နဲ့ အရေးယူထားတယ်။ ၁၄ ရက်နေ့က မနိုချက်ကူးမား က ၆ ယောက် သူတို့ကလိုလည်း လ၀က အက် ၁၃ (၁ )နဲ့ အရေးယူထားတယ်။ ဒီလိုပဲ တဖက်နိုင်ငံကနေပြီးတော့ တရားမ၀င် ၀င်ရောက်လာတာဗျ။”

လက်ရှိတရားမ၀င်ခိုးဝင်လာတဲ့အဖမ်းဆီးခံရသူတွေကို လူဝင်​မှုကြီးကြပ်ရေး အက်​ဥပ​ဒေပုဒ်​မ ၁၃(၁)အရ အ​ရေးယူထားတယ်လို့ဆိုပါတယ်။

မြန်မာနိုင်ငံမှာ ပြီးခဲ့တဲ့ရက်သတ္တပါတ်တုန်းက ရခိုင်ပြည်နယ်အတွင်းဆူပူအကြမ်းဖက်မှုတွေဖြစ်ပွါးခဲ့ သလို တပ်မတော် ကနေ နယ်မြေစိုးမိုးရေးနဲ့လုံခြုံရေးယူနေရတဲ့အခြေအနေမှာရှိနေပါတယ်။

ရခိုင်ပြည်နယ်အရေးအခင်းဖြစ်လာတဲ့နောက်ပိုင်း ခရီးသွားလာရေးမှာစစ်ဆေးမှုတွေရှိလာခဲ့သလို အထူးသဖြင့် မူဆလင်နွယ်ဖွါးတွေခရီးသွားလာမှုအပေါ် စစ်ဆေးမှုများလာတယ်လို့ ခရီးသည်တဦးကပြောပါတယ်။

“စိစစ်တာကတော့ မနေ့ညကနေ ရန်ကုန်က မော်လမြိုင်ကိုလာတာလေ ၂ ခါလောက် ကားပေါ်မှာ တက်စစ်တယ်။ သူတို့ စစ်တဲ့နေရာက မြို့အထွက် တိုးဂိတ်တွေမှာ ။ တိုးဂိတ်ကျော်တာနဲ့ ရဲကားချထားတယ်။ ရဲကားက စပယ်ယာ ဆီကနေပြီးတော့ မှတ်ပုံတင်ဇယားကို တောင်းကြည့်တယ်။ တောင်းပြီးတော့ ကားပေါ်တက်လာပြီးတော့ အထူးသဖြင့် ကုလားတွေကိုမေးတယ်။ တချို့က ထောက်ခံစာနဲ့သွားတယ်လေ။ တချို့က မှတ်ပုံတင် ၃ ခေါက်ချိုးနဲ့ သွားတယ်။ သူတို့ကိုပဲမေးတယ် ကုလားတွေကိုမေးတာများတယ်။ ကျန်တဲ့လူတွေ ကိုတော့ မမေးပါဘူး။ ရခိုင်ဘက်က ပယောဂပဲလို့ ထင်တယ်လေ။”

အောက်တိုဘာလ(၉)ရက်နေ့က ရခိုင်ပြည်နယ်မောင်တောမြို့နယ်က နယ်ခြားစောင့်ရဲတပ်ဖွဲ့စခန်း တွေကို အကြမ်း ဖက် တိုက်ခိုက်ခံရအပြီး တပ်မတော်အနေနဲ့နယ်မြေရှင်းလင်းရေးတွေလုပ်ဆောင်နေသလို ဒေသခံတွေကလဲ နေရပ် ကနေတိမ်းရှောင်လာမှုတွေရှိနေပါတယ်။

အကြမ်းဖက်တိုက်ခိုက်သူတွေကို လိုက်လံရှင်းလင်းမှုတွေနဲ့ပတ်သက်ပြီး လူ့အခွင့်အရေးလှုပ်ရှားသူတွေက စိုးရိမ် မကင်းသဘောထားတွေ ပြောဆိုနေချိန်မှာ တရားဥပဒေနဲ့အညီ မျှမျှတတဆောင်ရွက်သွားမယ်လို့ မနေ့က နေပြည်တော်သတင်းစာရှင်းလင်းပွဲတရပ်ကျင်းပရာမှာ အစိုးရတာဝန်ရှိသူတွေက ပြောဆိုခဲ့ပါတယ်။

အခုလိုအကြမ်းဖက်တိုက်ခိုက်ခံရအပြီး ဒေသတွင်းလုံခြုံရေးအရ ခရီးသွားလာရေးမှာ စစ်ဆေးမှုတွေတင်းကြပ် လာတဲ့အခြေအနေမှာရှိနေပါတယ်။

 နိုင်ကွန်းအိန်  / ဗွီအိုအေ (မြန်မာပိုင်း)
http://burmese.voanews.com


နယူးဒေလီ အောက်တိုဘာ ၁၈

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား အိန္ဒိယသမ္မတ နိုင်ငံသမ္မတ ပရာနာ့ဗ် မူခါဂျီးက ယနေ့နံနက် ၉ နာရီတွင် နယူးဒေလီမြို့ရှိ နိုင်ငံတော်သမ္မတအိမ်တော်ဝင်း Rashtrapati Bhavan ၌ ဂုဏ်ပြုအခမ်းအနားဖြင့် ကြိုဆိုသည်။

ရှေးဦးစွာ နိုင်ငံတော်၏အတိုင်ပင်ခံပုဂ္ဂိုလ်သည် ဂုဏ်ပြုကြိုဆိုပွဲ အခမ်းအနား သို့ ရောက်ရှိလာရာ အိန္ဒိယ၀န်ကြီးချုပ် မစ္စတာ နာရန်ဒရာမိုဒီက ကြိုဆိုနှုတ်ဆက်သည်။


ထို့နောက် နိုင်ငံတော်၏ အတိုင်ပင်ခံပုဂ္ဂိုလ်သည် ဂုဏ်ပြုတပ်ဖွဲ့၏ အလေးပြု ခြင်းကို ခံယူပြီး ဂုဏ်ပြုတပ်ဖွဲ့ကို စစ်ဆေးသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်အား အိန္ဒိယနိုင်ငံသမ္မတ မစ္စတာ ပရာနာ့ဗ်မူခါဂျီးက ၄င်းနှင့်အတူ ကြိုဆိုကြသူများနှင့် မိတ်ဆက်ပေးပြီး နိုင်ငံတော်၏ အတိုင်ပင်ခံပုဂ္ဂိုလ်ကလည်း အတူလိုက်ပါလာသည့် အဖွဲ့ဝင်များနှင့် ပြန်လည် မိတ်ဆက်ပေးသည်။


ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် သတင်းမီဒီယာများအား တွေ့ဆုံနှုတ်ဆက်သည်။

ဆက်လက်၍ နိုင်ငံတော်၏ အတိုင်ပင်ခံပုဂ္ဂိုလ်သည် အိန္ဒိယနိုင်ငံသမ္မတ အိမ်တော်မှ မဟတ္တမဂန္ဒီ ဗိမာန်သို့ရောက်ရှိပြီး ပန်းခွေချအလေးပြုကာ ဧည့်သည် တော် မှတ်တမ်းတွင် လက်မှတ်ရေးထိုးသည်။

ထို့နောက် Raj Ghat Samadhi Committee Secretary, Dr. Rajnish Kuma က နိုင်ငံတော်၏ အတိုင်ပင်ခံပုဂ္ဂိုလ်အား အမှတ်တရစာအုပ်များနှင့် ဂန္ဒီ၏ ပုံတူရုပ်တုကို ပေးအပ်သည်။


နိုင်ငံတော်၏အတိုင်ပင်ခံပုဂ္ဂိုလ်နှင့် အိန္ဒိယသမ္မတနိုင်ငံ ပြည်ပရေးရာဝန်ကြီး မစ္စဆူရှမာဆွာရာ့ရ်တို့သည် ဒေသစံတော်ချိန် နံနက် ၁၀ နာရီတွင် အိန္ဒိယနိုင်ငံ သမ္မတအိမ်တော် South Drawing Room ၌ တွေ့ဆုံပြီး ခရီးစဉ် အတွင်း ဆွေးနွေးမည့် ဘာသာရပ်ဆိုင်ရာကိစ္စရပ်များနှင့် စပ်လျဉ်း၍ ဆွေးနွေးကြသည်။

ဆက်လက်၍ နိုင်ငံတော်၏ အတိုင်ပင်ခံပုဂ္ဂိုလ်နှင့် အိန္ဒိယသမ္မတနိုင်ငံ သမ္မတ မစ္စတာ ပရာနာ့ဗ်မူခါဂျီးတို့သည် ဒေသစံတော်ချိန် မွန်းတည့် ၁၂ နာရီတွင် အိန္ဒိယနိုင်ငံ သမ္မတ အိမ်တော်ဝင်း Rashtrapati Bhavan ၊ Morning Room ၌ တွေ့ဆုံကြသည်။


တွေ့ဆုံစဉ် အိန္ဒိယသမ္မတနိုင်ငံ လွတ်လပ်ရေး ရပြီးနောက်ပိုင်း နိုင်ငံ ထူထောင် ခဲ့သည့် အတွေ့အကြုံများနှင့် မြန်မာနိုင်ငံတွင် ဒီမိုကရေစီ ထူထောင်လျှက်ရှိ သည့် အခြေအနေများနှင့် စပ်လျဉ်း၍ အမြင်ခြင်းဖလှယ် ဆွေးနွေးခဲ့ကြသည်။
ယင်းနောက် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် အိန္ဒိယသမ္မတနိုင်ငံသမ္မတ မစ္စတာ ပရာနာ့ဗ် မူခါဂျီးက တည်ခင်းဧည့်ခံသည့် ဂုဏ်ပြုနေ့လယ်စာ စားပွဲသို့တက်ရောက်သည်။

MOI Webportal Myanmar
https://www.facebook.com/MOIWebportalMyanmar



စစ်ကိုင်းတိုင်းဒေသကြီး ကနီမြို့နယ် မိချောင်းတွင်းရွာအနီးမှာ မြုပ်သွားတဲ့ အောင်စိုးမိုးကျော်ရေယာဉ် ပြန်လည်ဆယ်ယူနေတာကို အောက်တိုဘာလ ၁၈ ရက်နေ့က တွေ့ရစဉ်။ Photo: Myanmar Fire Services Department Facebook
စစ်ကိုင်းတိုင်းဒေသကြီး ကနီမြို့နယ် မိချောင်းတွင်းကျေးရွာအနီးမှာ အောင်စိုးမိုးကျော် ရေယာဉ်နစ်မြုပ်မှုကြောင့် ဒီနေ့အထိ သေဆုံးသူ ၃၈ ဦးရှိနေပြီလို့ ကနီမြို့နယ် တိုင်းဒေသကြီး လွှတ်တော်ကိုယ်စားလှယ် ဦးထွန်းထွန်းဝင်း က ပြောပါတယ်။

ရေယာဉ်မြုပ်တဲ့နေ့ကစပြီး ဒီနေ့အထိ ရှာဖွေတွေ့ရှိထားတဲ့ ရုပ်အလောင်းတွေကို ဒီကနေ့ သဂြိုဟ်လိုက်ပြီလို့ လွှတ်တော်ကိုယ်စားလှယ် ဦးထွန်းထွန်းဝင်း က ပြောပါတယ်။

" ဒီနေ့ နေ့လယ် ၁၂ နာရီအချိန်မှာ အကုန်လုံး မီးသဂြိုဟ်တာပေါ့နော်။ ကြေညာထားပြီးတော့။ အချို့တွေကိုတော့မှတ်တမ်းတွေ၊  Record တွေလုပ်ထားတယ်။ အကျီအ၀တ်အစား အရောင်ကအစ။ ပြီးတော့ ကနီမြို့နယ် မီးသတ်တပ်ဖွဲ့ရုံးမှာလည်း ဓာတ်ပုံတွေနဲ့ ပိုင်ရှင်မဲ့အလောင်းတွေရော၊ ပိုင်ရှင်ရှိတဲ့ အလောင်းတွေရော ချိတ်ထားတယ်။ ကင်းအုပ်စု မိချောင်းတွင်းရွာမှာလည်း အဲ့လို ဓာတ်ပုံတွေနဲ့ ချိတ် ထားတယ်။ ကိုင်တွယ်ဖို့ခက်တဲ့ အလောင်းတွေကို ဒီနေ့နေ့လယ် ၁၂ နာရီအချိန်မှာ အကုန်လုံး မြေမြုပ် တာတို့ မီးသဂြိုဟ်တာတို့ ၄ နေရာခွဲလုပ်တာပေါ့နော်။" လို့ ပြောတာဖြစ်ပါတယ်။

နစ်မြုပ်နေတဲ့ ရေယာဉ်ကို ကရိန်းစက် ၃ လုံးနဲ့ ဆယ်ယူနေပေမယ့် ရေယာဉ်ရဲ့အလေးချိန်နဲ့ မမျှတဲ့အတွက် ကြိုးတွေပြတ်ကျတာကြောင့် ဒီနေ့ညနေအထိ ရေယာဉ်ရဲ့ နောက်မြီးပိုင်းကိုသာဆယ်လို့ရပြီး တစ်စီးလုံးဆယ်ဖို့ ကြိုးစားနေကြပါတယ်။

သေဆုံးသူတွေအတွက် ရည်စူးပြီး ရက်လည်ဆွမ်းသွတ် ပရိတ်တရားနာယူပွဲလုပ်မှာဖြစ်ပြီး ချင်းတွင်းမြစ်ကြောင်း မှာလည်း သံဃာတော်တွေက ပရိတ်ရွတ်ဖတ်မယ်လို့ သိရပါတယ်။

ပြီးခဲ့တဲ့ အောက်တိုဘာ ၁၅ ရက်နေ့မနက် ၅နာရီခန့်က ဟုမ္မလင်းမြို့ကနေ မုံရွာမြို့ကို ပြေးဆွဲတဲ့ အောင်စိုး မိုးကျော်ရေယာဉ်နစ်မြုပ်ခဲ့ပြီး အသက်ရှင်ကျန်ရစ်သူ ၁၅၀ ကျော်ကို ကယ်ဆယ်ထားပြီး ပျောက်ဆုံးနေသူ ၁၅၀ ကျော်ရှိမယ်လို့ ခန့်မှန်းထားတာဖြစ်ပါတယ်။

RFA Burmese
http://www.rfa.org/burmese



မန္တလေးတိုင်း မြင်းခြံအကျဉ်းထောင် အဝင်ဂိတ်ကို တွေ့ရစဉ်။ Photo: မင်းစစ်နိုင် ကိုကိုနိုင်
မန္တလေးတိုင်းဒေသကြီး မြင်းခြံအကျဉ်းထောင်က ထောင်ပိုင်နဲ့ ထောင်မှူးကြီးကို မန္တလေးအကျဉ်းဦးစီးဌာနရုံးမှာ စာရင်းပိုင်းဆိုင်ရာ တာဝန်ထမ်းဆောင်ဖို့ ပြည်ထဲရေးဝန်ကြီးဌာန အကျဉ်းဦးစီးဌာနက ညွှန်ကြားလိုက်ပါတယ်။

ထောင်သားတွေနဲ့ ပတ်သက်ရတာမျိုးမဟုတ်ဘဲ စာရင်းပိုင်းဆိုင်ရာပဲလုပ်ဖို့ တာဝန်ပြောင်းလိုက်တယ် လို့ ပြည်ထဲရေးဝန်ကြီးဌာန အကျဉ်းဦးစီးဌာန ညွှန်ကြားရေးမှူး ဦးမင်းထွန်းစိုးက ပြောပါတယ်။

"ထောင်ပိုင်ကြီးနဲ့ ထောင်မှူးကြီးကိုတော့ ကျနော်တို့ ဖယ်လိုက်ပါပြီ၊ အစားထိုးဖို့လုပ်နေပါပြီ ၊ နှစ်ယောက်စလုံးကို ရုံးကိုရွှေ့လိုက်ပါတယ်၊ မန္တလေးညွန်မှူးရုံးကိုပါ၊ ရုံးလုပ်ငန်းလုပ်ရတဲ့နေရာပဲ အကျဉ်းသားတွေနဲ့ မပတ်သက်ဘူးပေါ့" လို့ ဦးမင်းထွန်းစိုး က ပြောပါတယ်။

ပြီးခဲ့တဲ့ အောက်တိုဘာလ ၁၁ ရက်နေ့က မြင်းခြံထောင်မှာ ထောင်ပိုင်နဲ့ ထောင်မှူးကို ပြောင်းရွှေ့ပေးဖို့၊ အကျဉ်းသားတစ်ဦးကို စောင် ၃ ထည်ထက် ပိုယူခွင့်ပေးဖို့၊ အကျဉ်းထောင်တွင်း အလုပ်မခိုင်းဖို့၊ အကျဉ်းဆောင် တစ်ဆောင်နဲ့ တစ်ဆောင် ကူးလူးခွင့်ပြုဖို့တို့ကို အကျဉ်းသားတွေက တောင်းဆိုခဲ့ကြပါတယ်။

အကျဉ်းသားတွေရဲ့ တောင်းဆိုချက်တွေထဲက စောင် ၃ ထည်ထက် ပိုယူခွင့်ပေးဖို့နဲ့ အကျဉ်းဆောင် တစ်ဆောင်နဲ့ တစ်ဆောင် ကူးလူးခွင့်ပြုဖို့ အချက်တွေဟာ အကျဉ်းထောင်လက်စွဲ ဥပဒေနဲ့ ကိုက်ညီမှုမရှိတဲ့အတွက် ခွင့်မပြုဘဲ ကျန် ၂ ချက်ကို လိုက်လျောပေးခဲ့တာလို့ ဦးမင်းထွန်းစိုး က ပြောပါတယ်။

RFA Burmese
http://www.rfa.org/burmese


ဘရာဇီး၊ အောက်တိုဘာ ၁၈ ရက် (ဆင်ဟွာ)

ဘရာဇီးနိုင်ငံ မြောက်ပိုင်း ရှိ အကျဉ်းထောင်နှစ်ခု၌ လူဆိုးဂိုဏ်းအချင်းချင်း ခိုက်ရန်ဖြစ်ပွားရာ အကျဉ်းသား ၁၈ဦးထက်မနည်းသေဆုံးကြောင်း ပြည်တွင်းသတင်းဋ္ဌာနက အောက်တိုဘာ ၁၇ ရက်တွင်ဖော်ပြခဲ့သည်။

Rondonia ပြည်နယ် မြို့တော် Porto Velhoမြို့ရှိ ပြည်နယ်အကျဉ်းထောင်တစ်ခု တွင် အောက်တိုဘာ ၁၇ ရက် နံနက်ပိုင်းက အကျဉ်းသားတချို့သည် အကျဉ်းထောင် အခန်းငယ်များ အပြင်ဘက်၌ မွေ့ယာများအား မီးရှို့မှုကြောင့် အခန်းအတွင်းရှိ အကျဉ်းသား ၈ဦး မီးခိုးမွှန်သေဆုံးခဲ့ကြောင်း ဘရာဇီး သတင်းကွန်ရက် Globo ကပြောပြခဲ့သည်။

အဆိုပါဖြစ်ရပ်သည် Roraima ပြည်နယ် မြို့တော် Boa Vistaမြို့ရှိ Agricola de Monte Cristo အကျဉ်းထောင်အတွင်း အောက်တိုဘာ ၁၆ က အကျဉ်းသား ၁၀ဦးသေဆုံးခဲ့သည့် ခိုက်ရန်ဖြစ်ပွားမှု၏ နောက်ဆက်တွဲ ပြဿနာတစ်ခုဖြစ်ကြောင်း သိရသည်။

ဘရာဇီးနိုင်ငံအတွင်း လူဆိုးဂိုဏ်းအချင်းချင်း ပြိုင်ဆိုင်မှုများ ပိုမိုပြင်းထန်လာကြောင်း သိရသည်။
ခိုက်ရန်ဖြစ်ပွားမှုသည် အောက်တိုဘာ ၁၆ရက် အကျဉ်းသားများ ဧည့်တွေ့ချိန်ဖြစ်သည့် ညနေ ၄နာရီတွင် စတင်ဖြစ်ပွားခဲ့ခြင်းဖြစ်ပြီး ဧည့်လာတွေ့သည့် အကျဉ်းသားများ၏ ဆွေမျိုးများနှင့် မိသားစုဝင်များကို ဆူပူမှုပြုလုပ်သူ အကျဉ်းသားများက ဓါးစားခံအဖြစ် ဖမ်းဆီးထားခဲ့ပြီး ဘရာဇီးစစ်တပ်က အကျဉ်းထောင်အား ကြားဝင်ထိန်းသိမ်းပေးခဲ့ပြီးနောက် လေးနာရီအကြာတွင် ၄င်းတို့ပြန်လည်လွတ်မြောက်လာခဲ့ကြောင်း EBC သတင်းဋ္ဌာနက ဖော်ပြခဲ့သည်။

China Xinhua News



ရန်ကုန်ဆိပ်ကမ်းတွင်ရောက်ရှိနေသည့်မော်တော်ယာဉ်များအားတွေ့ရစဉ် (ဓာတ်ပုံ-- မြဝတီ)
   ရန်ကုန်၊ အောက်တိုဘာ ၁၈ ရက် (ဆင်ဟွာ)

    ရန်ကုန်ဆိပ်ကမ်း များသို့ ရောက်ရှိပြီး တစ်နှစ်ကျော် ကြာသည်အထိ လာရောက် ထုတ်ယူခြင်း မရှိသည့် မော်တော်ယာဉ် အစီးရေ ၁၃ဝဝ နီးပါးရှိပြီး လာရောက် ထုတ်ယူခြင်း မရှိသည့် ယာဉ်များကို ဒဏ်ကြေးဖြင့် ပြန်လည် ထုတ်ယူခွင့် ပေးမည် မဟုတ်ဘဲ နိုင်ငံတော် ဘဏ္ဍာအဖြစ် သိမ်းဆည်း သွားမည် ဖြစ်ကြောင်း မြန်မာ့ဆိပ်ကမ်း အာဏာပိုင် အဖွဲ့မှ တာဝန်ရှိသူတစ်ဦးကပြောသည်။

ရန်ကုန်မြို့၌ မော်တော်ယာဉ်တင် သင်္ဘောများ ဆိုက်ကပ်ခွင့် ရသည့် ဆိပ်ကမ်းများ အနေဖြင့် မြန်မာ အပြည်ပြည် ဆိုင်ရာ သီလဝါဆိပ်ကမ်း၊ အမှတ် (၄) သီလဝါဆိပ်ကမ်း၊ မြန်မာ့စက်မှု ဆိပ်ကမ်း၊ ဆူးလေဆိပ်ကမ်း၊ ဗိုလ်အောင်ကျော် ဆိပ်ကမ်း၊ အေးရှားဝေါ ကုန်သေတ္တာ စစ်ဆေးရေး စခန်းနှင့် ထီးတန်း ဆိပ်ကမ်းဟူ၍ ဆိပ်ကမ်း ၇ ခုရှိပြီး အပြည်ပြည်ဆိုင်ရာ သီလဝါဆိပ်ကမ်း နှင့် အမှတ်(၄) သီလ၀ါ ဆိပ်ကမ်းတို့မှာ မော်တော်ယာဉ်တင် သင်္ဘော ဝင်ရောက်မှု အများဆုံးဖြစ်သည်။

လက်ရှိတွင် ထီးတန်းဆိပ်ကမ်း ၊ အေးရှားဝေါ ကုန်သေတ္တာ စစ်ဆေးရေး စခန်း ၊ မြန်မာ့ စက်မှုဆိပ်ကမ်း၊ ဆူးလေဆိပ်ကမ်း နှင့် ဗိုလ်တထောင် ဆိပ်ကမ်းတို့၌ ရောက်ရှိပြီး တစ်နှစ်ကျော်ကြာ သည်အထိ လာရောက် ထုတ်ယူခြင်း မရှိသည့် မော်တော်ယာဉ် အစီးရေ ၁၂၇၀ ကျော်ရှိပြီး ယင်း မော်တော်ယာဉ် များကို လေလံတင် ရောင်းချရန် စီစဉ်လျက် ရှိကြောင်း သိရသည်။

ရန်ကုန်ဆိပ်ကမ်း များသို့ ရောက်ရှိပြီး မော်တော်ယာဉ် များကို ရက်ပေါင်း ၆ဝ ထားခွင့်ရှိကာ ရက်ပေါင်း ၆ဝ ကျော်ပါက လေလံတင် ရောင်းချမည့် စာရင်းအတွင်း ထည့်သွင်း သတ်မှတ် သွားမည်ဖြစ်သည်။ ထို့ပြင် တစ်နှစ် ကျော်လွန်သည် အထိ လာရောက် ထုတ်ယူခြင်း မရှိဘဲ ဆိပ်ကမ်း၌ ထိန်းသိမ်း ထားရသော မော်တော်ယာဉ် များကို ပိုင်ရှင် ဖြစ်သူက စွန့်လွှတ်ပြီး ဖြစ်သည်ဟု ယူဆကာ နိုင်ငံတော်ဘဏ္ဍာ အဖြစ် သိမ်းဆည်းသွားမည် ဖြစ်ကြောင်း ၎င်းတာဝန်ရှိသူကဆိုသည်။

(Xinhua)
http://www.xinhuamyanmar.com


စစ်ကိုင်းတိုင်းဒေသကြီး၊ ကသာခရိုင်၊ ထီးချိုင့်မြို့နယ်၊ မောင်းကုန်းကျေးရွာ၊ ဂရိတ်ဝေါ (လ်) သကြားစက်ရုံအတွင်း ပေါက်ကွဲမှု တစ်ခု ဖြစ်ပွားခဲ့ရာ လူတဦး ဒဏ်ရာရရှိပြီး တစ်ဦးမှာ ပွဲချင်းပြီး သေဆုံးသွားခဲ့ကြောင်း သိရသည်။

၁၇.၁၀.၂၀၁၆ ရက်နေ့ နံနက် (၉း၃၀)နာရီအချိန်က မောင်းကုန်း ဂရိတ်ဝေါ(လ်) စက်ရုံ ကြိတ်စင်ဌာနအတွင်း အရှည် (၅) ပေ လုံးပါတ် (၂) ပေခွဲခန့်ရှိ နိုက်ထရိုဂျင် အိုးထဲမှ အရှည် (၂) ပေ လုံးပါတ် (၂) ပေခွဲခန့်ရှိ နိုက်ထရိုဂျင် အိုးထဲသို့ ထက်နိုင်ဝင်း (ဘ) ဦးထွန်းရှင် အသက် (၂၀) နှစ်မှ နိုက်ထရိုဂျင်များအား ပေါင်းကူး ဖြည့်နေစဉ် အရှည်(၂) ပေခန့်ရှိအိုးမှာ ပေါက်ကွဲသွားသဖြင့် ထက်နိုင်ဝင်း၏ ဝမ်းဗိုက်အားထိမှန်ပြီး ဝမ်းဗိုက်ပွင့်ထွက် သေဆုံးသွားခဲ့သည်။


ထို့အပြင် ပေါက်ကွဲနေရာနှင့် (၁၂) ပေခန့် အကွာတွင်ရှိသော ကျော်ထင် အသက် (၃၁) နှစ် (ဘ) ဦးဟန်ညွှန့် မှာ ဂက်(စ်) အိုး ပေါက်ကွဲမှုကြောင့် အဆောက်အဦးရှိ မှန်ကွဲများ ပြုတ်ကျကာ ကျော်ထင်၏ ညာဘက်လက်မောင်း ပြတ်ရှဒဏ်ရာနှင့် နားအူ ဒဏ်ရာများ ရရှိခဲ့သည်။

" ပေါက်ကွဲတဲ့ အသံကတော့ မောင်းကုန်းတစ်ရွာလုံး သိမ့်သိမ့်တုန် သွားတယ်။ ဖြစ်ဖြစ်ခြင်းမှာမီးခိုးလုံးကြီးလို မှောင်မဲသွားခဲ့တာပါ။ပေါက်ကွဲတဲ့ အသံရဲ့ ရိုက်ခတ်မှုကြောင့် စက်ရုံအပေါ်ဘက်က မှန်တွေဟာ ကွဲပြီးကျလာတယ်။ လောလောဆယ်တော့ အနီးကပ်ကြုံခဲ့တဲ့ ကျော်ထင်က နား မကြားတော့ဘူး။ လက်ဟန်ပြပြီး စကားပြောနေရ ပါတယ်" ဟု အခင်းဖြစ်စဉ်အား တွေ့ကြုံခဲ့သူ တစ်ဦးက ပြောပြသည်။


၎င်းဖြစ်စဉ်နှင်ပတ်သက်၍ သေဆုံးသူ ထက်နိုင်ဝင်းနှင့် ဒဏ်ရာ ရရှိခဲ့သူ ကျော်ထင်တို့ နှစ်ဦးအား မြတောင်ဆေးရုံ သို့ ဆေးစာဖြင့် ပို့ဆောင်ပေးခဲ့ပြီး သေမှု သေခင်း အမှတ်စဉ် (၁၂/၂၀၁၆) ဖြင့် အမှုဖွင့် အရေးယူ ဆောင်ရွက်လျက် ရှိကြောင်း ထီးချိုင့်မြို့မ ရဲစခန်းမှ သိရသည်။

သီဟဆွေ (ကသာ)
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal



ထိုးစစ်မစမီ အီရတ် တပ်ဖွဲ့ဝင်တွေ ပြင်ဆင်နေစဉ်။
အီရတ်နိုင်ငံမှာ IS အစ္စလာမ္မစ် နိုင်ငံအဖွဲ့ လက်အောက်က မိုဆူးလ်မြို့ကို ပြန်သိမ်းနိုင်ဖို့ အီရတ် တပ်ဖွဲ့တွေ ဒုတိယမြောက် နေ့အဖြစ် ဆက်လက် ထိုးစစ် ဆင်နေရာမှာ စီစဉ်ထားတာထက် ရှေ့ရောက်နေတယ်လို့ ပင်တဂွန် စစ်ဌာနချုပ်က ပြောပါတယ်။

တနင်္လာနေ့ ည တစ်ညလုံး တိုက်ပွဲတွေ ဖြစ်ပွားခဲ့ပါတယ်။ အီရတ် သံချပ်ကာ ယာဉ်တွေကို IS တွေက တိုက်ခိုက် နေခဲ့ပါတယ်။

အီရတ် တပ်တွေဟာ မိုဆူးလ်မြို့နဲ့ မိုင် ၃၀ လောက် ဝေးနေသေးတယ်လို့ ဘီဘီစီ သတင်းထောက်က ပြောပါတယ်။

တပ်ဖွဲ့ဝင် သုံးသောင်းလောက် ရှိတဲ့ အီရတ် တပ်ဖွဲ့ထဲမှာ အစိုးရ တပ်ဖွဲ့ဝင်တွေ၊ ကာဒစ်ရှ် တပ်သားတွေ၊ ဆွန်နီ အာရပ် လူမျိုးစုတွေ၊ ရှီးယား ပြည်သူ့စစ် အဖွဲ့ဝင်တွေ ပေါင်းစည်း ပါဝင် နေပါတယ်။

IS တွေ ခြေကုပ်ယူထားတဲ့ မိုဆူးလ်မြို့ကို ပြန်သိမ်းနိုင်ရေး စစ်ဆင် တိုက်ခိုက်မှုတွေကို အီရတ် တပ်ပေါင်းစုက တနင်္လာနေ့က စတင်ခဲ့တာ ဖြစ်ပါတယ်။

IS တွေက မြို့ခံ အရပ်သားတွေကို လူသား ဒိုင်းအဖြစ် အသုံးချလာမှာကိုလည်း အကူအညီ အဖွဲ့အစည်းတွေက စိုးရိမ် နေကြပါတယ်။

BBC Burmese
http://www.bbc.com/burmese/world-37693535


အီရတ်နိုင်ငံမြောက်ပိုင်း Mosul မြို့ကို IS စစ်သွေးကြွတွေလက်ကနေ ပြန်လည်သိမ်းယူနိုင်ဖို့ အီရတ်တပ်တွေ မြေပြင်ကနေ ထိုးစစ်ဆင်နေတာနဲ့အတူ တချို့နေရာတွေကို ပြန်လည်သိမ်းယူနိုင်ပြီလို့ အီရတ်တပ်တွေနဲ့အတူ ကူညီတိုက်နေတဲ့ Kurd တပ်ဖွဲ့ခေါင်းဆောင်တွေက ပြောပါတယ်။

မြို့ရဲ့နယ်နမိတ် စတုရန်းကီလိုမီတာ ၂၀၀ လောက်ကို တရက်ထဲမှာ သိမ်းယူနိုင်ခဲ့တယ်လို့ Kurd ဒေသအကြီးအကဲ Masoud Barzani က တနင်္လာနေ့ကလုပ်တဲ့ သတင်းစာရှင်းပွဲမှာ ပြောကြားသွားပါတယ်။ Mosul တမြို့လုံး IS တွေလက်ကနေ လွတ်မြောက်ရမယ်လို့လည်း သူက ပြောခဲ့ပါတယ်။ အခုစစ်ဆင်ရေးဟာ အီရတ်နိုင်ငံထဲကနေ အမေရိကန်တိုက်ခိုက်ရေးတပ်တွေ ဆုတ်ခွာခဲ့ပြီး ၅ နှစ်အကြာမှာ အကြီးကျယ်ဆုံးပြုလုပ်တဲ့ စစ်ဆင်ရေးဖြစ်ပါတယ်။ ဒေသထဲကမှာရှိနေကြတဲ့ ထောင်နဲ့ချီတဲ့ အရပ်သားတွေရဲ့ လုံခြုံရေးနဲ့ပါတ်သက်လို့လည်း စိုးရိမ်မှုတွေ ရှိနေပါတယ်။

Mosul မြို့ လွတ်မြောက်ရေး စစ်ဆင်ရေးမှာ အီရတ်တပ်တွေနဲ့အတူ၊ ပြည်ထောင်စုရဲတပ်ဖွဲ့၊ Kurd တပ်ဖွဲ့၊ ဆူနီတိုက်ခိုက်ရေးသမားတွေနဲ့ ရှီရာပြည်သူ့စစ်တပ်ဖွဲ့တွေ အတူတွဲ တိုက်ခိုက်နေကြပါတယ်။ အီရတ်နဲ့ ဆီးရီးယားနိုင်ငံတွေက IS ပြစ်မှတ်တွေအပေါ် လေကြောင်းတိုက်ခိုက်မှုတွေလုပ်နေကြတဲ့ အမေရိကန်ဦးဆောင်တဲ့ ညွန့်ပေါင်းတပ်တွေကလည်း Mosul မြို့က IS တွေအပေါ် လေကြောင်းကနေ တိုက်ခိုက်ပေးနေပါတယ်။

အီရတ်နဲ့ Kurd တပ်ဖွဲ့ဝင်တွေဟာ စီစဉ်ထားတာထက်ကို ရှေ့တိုးတိုက်ခိုက်နိုင်ကြတယ်လို့ Pentagon ပြောခွင့်ရသူ Peter Cook ကတနင်္လာနေ့က ပြောပါတယ်။ အမေရိကန်တပ်တွေဟာလဲ စစ်ကူပေးဖို့ Mosul မြို့အပြင်မှာ အသင့်ရှိနေကြပေမဲ့ အီရတ်တပ်တွေကသာ ဦးဆောင်တိုက်နေတာဖြစ်တယ်လို့ သူကပြောပါတယ်။

ဗွီအိုအေ (မြန်မာပိုင်း)
http://burmese.voanews.com