11/21/16



 ဒေသခံစစ်ဘေးရှောင် ပြည်သူများ မူဆယ်မြို့ရှိ ယာယီကယ်ဆယ်ရေး စခန်းများသို့ ရောက်ရှိ
နိုဝင်ဘာ ၂၁၊ ၂၀၁၆

KIA၊ TNLA နှင့် MNDAA လက်နက်ကိုင်တပ်ဖွဲ့များ ပူးပေါင်း၍ မူဆယ်မြို့နယ်နှင့် ကွတ်ခိုင်မြို့နယ်အတွင်းရှိ တပ်စခန်းများ၊ ရဲတပ်ဖွဲ့ စခန်းများနှင့် ၁၀၅မိုင်ကုန်သွယ်ရေး စခန်းတို့အား တစ်ချိန်တည်း၊ တစ်ပြိုင်တည်း ၀င်ရောက်တိုက်ခိုက်ခဲ့သဖြင့် အပြစ်မဲ့ ပြည်သူများ ထိခိုက်သေဆုံး ဒဏ်ရာရရှိခဲ့ရသည်။


ဖြစ်စဉ်ကြောင့် စစ်ဘေးရှောင်ခဲ့ကြသည့် ဒေသခံပြည်သူ၂,၆၃၆ ဦးသည် ယာယီ ကယ်ဆယ်ရေးစခန်း (၅) ခုဖြစ်သည့် မူဆယ်မြို့ပေါ်ရှိနမ့်ခွန်ကျောင်း ၊ မဟာဝန် မြောက် ကျောင်း၊ ဇေတ၀န်ကမ္မဌာန်းကျောင်း ၊ ကချင်နှစ်ခြင်းခရစ်ယာန်ကျောင်းနှင့် အောင်မင်္ဂလာကျောင်းများသို့ ရောက်ရှိလာခဲ့ရာ ၄င်းတို့အား ရှမ်းပြည်နယ် အစိုးရ အဖွဲ့မှ ဆန်အိတ် ၃၀၀၊ ခေါက်ဆွဲခြောက်ဖာ ၁၀၀၀၊ သေဆုံးသူ တစ်ဦးလျှင် ကျပ် ငါးသိန်းမှဆယ်သိန်း၊ ဒဏ်ရာရသူတစ်ဦးလျှင် ကျပ်တစ်သိန်းမှ သုံးသိန်းနှုန်းနှင့် ကယ်ဆယ်ရေးပစ္စည်း ၄၇၅ စုံတို့အား ထောက်ပံ့ပေးအပ်ခဲ့ပြီးဖြစ်သည်။


ထို့ပြင် နိုဝင်ဘာ ၂၀ရက်မှ စတင်၍ ကယ်ဆယ်ရေးစခန်းရှိ စစ်ဘေးရှောင် ပြည်သူများအား နေ့စဉ် ထမင်းထုပ်များ၊ ရေသန့်ဘူးများ၊ အချိုရည်များ၊ အနွေးထည် နှင့် ခြုံစောင်များ ဝေငှပေးပြီး သေဆုံးသူ တစ်ဦးလျှင် ကျပ်တစ်သိန်းနှုန်းနှင့် ဒဏ်ရာရသူ တစ်ဦးလျှင် ကျပ်သုံးသောင်းနှုန်း ထောက်ပံ့ပေးထားခဲ့ပြီး ကျန်းမာရေးစောင့်ရှောက်မှု များအတွက် သက်ဆိုင်ရာ ကျန်းမာရေး၊ ကုသရေးဦးစီးဌာနများနှင့် ပူးပေါင်း၍ ယာယီဆေးခန်းများဖွင့်လှစ် ကုသပေးလျက်ရှိကြောင်း သိရသည်။

(နိုင်ငံတော်အတိုင်ပင်ခံရုံးသတင်းထုတ်ပြန်ရေးကော်မတီ)
State Counsellor Office Information Committee



Capital Hypermarket ဈေးဝယ်စင်တာ
ရန်ကုန်တိုင်း ဒေါပုံမြို့နယ် Capital Hypermarket ဈေးဝယ်စင်တာမှာ နိုဝင်ဘာ ၂၀ တနင်္ဂနွေ ညနေပိုင်းက ဖြစ်ပွားခဲ့တဲ့ ပေါက်ကွဲမှုတွေဟာ ဓါတုပစ္စည်းတွေနဲ့ ရောစပ်ထားတဲ့ လက်လုပ်ဖေါက်ခွဲရေးပစ္စည်းတွေဖြစ်ကြောင်း ဒေါပုံမြို့နယ်ရဲတပ်ဖွဲ့ တာဝန်မှူးရဲအရာရှိတဦးက VOA ကို ပြောပါတယ်။

“ အတိအကျတော့ မသိရသေးဘူးခင်ဗျ၊ လောလောဆယ်တော့ ဓါတုပစ္စည်းတွေနဲ့ စပ်ပြီးတော့ လုပ်ထားတဲ့- လက်လုပ် ပေါက်ကွဲစေတဲ့ ဟာမျိုးပေါ့။ ဗုံးတော့ မဟုတ်ဘူး။ ခုမှ ကျနော်တို့က လောလောဆယ် ကျန်ခဲ့တဲ့ ဘေးနားက သက်သေခံပစ္စည်းတွေကို Chemical ဓါတုဓါတ်ခွဲခန်းကို ပို့ထားတုန်းပဲ ”

Capital Hypermarket မှာ ၄ ကြိမ် ဖြစ်ပွားခဲ့ကြောင်း ရှော့ပင်စင်တာအပေါ်ထပ် လိုင်းနံပတ် ၂၄နဲ့ ၂၆ တွေမှာ ညနေ ၆နာရီ ထိုးခါနီးက နှစ်ကြိမ်၊ မြေညီထပ် လိုင်းနံပတ် ၁ နဲ့ ၄မှာ ၆ နာရီ ၁၅ လောက်က နှစ်ကြိမ် ပေါက်ကွဲမှု ဖြစ်ခဲ့ကြောင်း၊ ဒေါပုံမီးသတ်ဌာနက အစောပိုင်းမှာ VOA ကို ပြောဆိုခဲ့ပါတယ်။

ဒီပေါက်ကွဲမှုကြောင့် ဖြတ်သွားဖြတ်လာပြည်သူတွေနဲ့ ဒေသခံတွေက ဗုံးပေါက်ကွဲမှုလို့ ယူဆပြီး စိုးရိမ်းမှုရှိကြောင်း သိရပါတယ်။ ပေါက်ကွဲမှုကြောင့် လူတွေ ထိခိုက်ဒဏ်ရာရတာမျိုး မရှိပဲ၊ အနီးနား ပလစ်စတစ်အရောင်းဆိုင်က ပစ္စည်းတချို့နဲ့ အချိုရည်ပုလင်းတချို့ ပျက်စီးခဲ့ကြောင်း ပြန်ကြားရေး ဌာနက သတင်းထုတ်ပြန်ပါတယ်။ ပေါက်ကွဲမှုရဲ့ လက်သည်တရားခံကိုလည်း စုံစမ်းနေဆဲပဲဖြစ်ပါတယ်။

 ဗွီအိုအေ (မြန်မာပိုင်း)
http://burmese.voanews.com



ဂျာမနီဝန်ကြီးချုပ် Angela Merkel
ဂျာမနီဝန်ကြီးချုပ် Angela Merkel က သူဟာ စတုတ္ထသက်တမ်း ပြန်လည်အရွေးခံဖို့ လုပ်နေတယ်လို့ တနင်္ဂနွေနေ့မှာ ကြေညာလိုက်ပါတယ်။

အခုလို တရားဝင်မကြေညာခင်မှာ သူဟာ သူ့ရဲ့ ခရစ်ယာန်ဒီမိုကရက်တစ်ပါတီ CDU က အကြီးတန်း အဖွဲ့ဝင်တွေနဲ့ တွေ့ဆုံဆွေးနွေးခဲ့တယ်လို့ မစ္စက် Merkel က သတင်းထောက်တွေကို ပြောပါတယ်။

အခုလို ဆုံးဖြတ်ချက် အတွက် အချိန်ယူစဉ်းစားတာ ဖြစ်ခဲ့ပေမယ့် ဝန်ကြီးချုပ်အဖြစ် နောက်တကြိမ် တာဝန်ထပ်ယူဖို့ အသင့်ပါပဲ လို့လည်း ပြောပါတယ်။ ဒါဟာ ကျန်းမာရေး အခြေအနေပေးရင် နောက်ထပ် ၄ နှစ်သက်တမ်း တာဝန်ထမ်းဆောင်ဖို့ အတွက် ဆုံးဖြတ်ချက် ဖြစ်ကြောင်းလည်း ပြောပါတယ်။

အမေရိကန်ပြည်ထောင်စုမှာ သမ္မတသစ်အဖြစ် Donald Trump အရွေးချယ်ခံခဲ့ရပြီး ဗြိတိန်နိုင်ငံကလည်း EU ဥရောပသမဂ္ဂကနေ ခွဲထွက်သွားခဲ့တဲ့ နောက်ပိုင်း ဥရောပတည်ငြိမ်ရေး အတွက် ထိမ်းပေးနိုင်သူအဖြစ် ဂျာမဏီနိုင်ငံရဲ့ ပထမဆုံး အမျိုးသမီး ဝန်ကြီးချုပ် ဖြစ်တဲ့ Angela Merkel ကို အများက သတ်မှတ်ခဲ့ကြတာ ဖြစ်ပါတယ်။

အသက် ၆၂ နှစ် ရှိပြီဖြစ်တဲ့ Angela Merkel သာ ၂၀၁၇ ခုနှစ်မှာ အနိုင်ရခဲ့ပြီး နောက်ထပ် ၄ နှစ်သက်တမ်း ဆက်ပြီး တာဝန်ထမ်းဆောင် ခဲ့မယ် ဆိုရင် သူဟာ စစ်ပြီးခေတ်ကာလမှာ ဝန်ကြီးချုပ်တာဝန်ယူခဲ့တဲ့ Helmut Kohl လိုပဲ ၁၆ နှစ်ကြာ နိုင်ငံ့အကြီးအကဲ တယောက်အဖြစ် သတ်မှတ်နိုင်မှာ ဖြစ်ပါတယ်။

 ဗွီအိုအေ (မြန်မာပိုင်း)
http://burmese.voanews.com



လုံခြုံရေး တပ်ဖွဲ့ဝင်တွေ နဲ့ အရပ်သားတွေ ထိခိုက် သေဆုံး
ရှမ်းပြည်နယ် မြောက်ပိုင်း မူဆယ် နဲ့ ကွတ်ခိုင် မြို့နယ် တွေထဲက အစိုးရ စစ်တပ်နဲ့ ရဲ စခန်းတွေ အပါအဝင် ၁ဝ၅ မိုင် ကုန်သွယ်ရေး စခန်းတွေ အတိုက်အခိုက် ခံခဲ့ရတဲ့ အတွက် လုံခြုံရေး တပ်ဖွဲ့ဝင်တွေ နဲ့ အရပ်သားတွေ ထိခိုက် သေဆုံး ခဲ့ရတယ်လို့ အစိုးရက ထုတ်ပြန် ပါတယ်။

ကချင် လက်နက်ကိုင် ကေအိုင်အေ၊ ကိုးကန့်တပ် အမ်အန်ဒီအေအေ၊ တအာင်းပလောင် တပ် တီအန်အယ်လ်အေနဲ့ ရခိုင်တပ် အေအေ တို့ ပူးပေါင်း ထားတဲ့ မြောက်ပိုင်း မဟာမိတ် တပ်ပေါင်းစု က တိုက်ခိုက် ခဲ့ကြတာ ဖြစ်ပါတယ်။

အစိုးရ စစ်တပ်ရဲ့ စစ်ရေး အရ ဖိအား ပေးမှု တွေကြောင့် အခုလို တိုက်ခိုက် ရတာ ဖြစ်တယ်လို့ အဲဒီ မဟာမိတ် တပ်ပေါင်းစုက ကြေညာ ထားပြီး၊ တိုက်ပွဲဖြစ်ရာ ရှမ်းပြည် မြောက်ပိုင်း ဒေသတွေမှာ အရပ်သူ အရပ်သားတွေ ခရီးသွားလာတာ ဆိုင်းငံ့ ထားဖို့လည်း အဲဒီ့ အဖွဲ့က သတိ ပေး ထားပါတယ်။

တရုတ်-မြန်မာ နယ်စပ် ကုန်သွယ်ရေး အချက်အချာ ကျတဲ့ မူဆယ် ခရိုင်ထဲ နေရာ အနှံ့အပြား မှာ တပြိုင်နက်တည်း လိုလို တိုက်ပွဲ တွေ ပေါ်ပေါက် ခဲ့တာ ဟာ နောက်ပိုင်း ဆယ်စုနှစ် တွေ အတွင်း ပထမဆုံး အကြိမ် ဖြစ်တယ်လို့ တရုတ်နိုင်ငံ နယ်စပ်မှာ ရှိတဲ့ ဘီဘီစီ သတင်းထောက် က ပြောပါတယ်။

နိုဝင်ဘာ ၂ဝရက် တနင်္ဂနွေနေ့ တိုက်ပွဲတွေကြောင့် တရုတ် နယ်စပ် ဘက်က တိမ်းရှောင် လာရတဲ့ အရပ်သား စစ်ဘေး ဒုက္ခသည်တွေ မရှိသေး ပေမယ့်၊ နယ်စပ် ဒေသ တည်ငြိမ်ဖို့ လိုလားတဲ့ တရုတ် အစိုးရ အတွက် မူဆယ် ခရိုင် တိုက်ပွဲတွေ အပေါ် နှစ်မျို့မှာ မဟုတ်ဘူး လို့လည်း ဘီဘီစီ သတင်းထောက် က ဆိုပါတယ်။

ကချင် ပြည်နယ် မန်စီနဲ့ မိုးမောက် နယ်မြေတွေ ထဲမှာ အစိုးရ စစ်တပ်က နယ်မြေ စိုးမိုးရေး ခေါင်းစဉ်နဲ့ ထိုးစစ် တွေ ပြုလုပ် နေပြီး လက်နက်ကြီး တွေ အပြင်းအထန် အသုံးပြု နေတဲ့ အပေါ် ကေအိုင်အေ ဘက်က လက်တုံ့ပြန် တဲ့ အနေနဲ့ ကေအိုင်အေ တပ်မဟာ ၄ နယ်မြေ မူဆယ် ခရိုင် ထဲက အစိုးရ စစ်စခန်း ပစ်မှတ်တွေကို တိုက်ခိုက် လာတာ ဖြစ်နိုင်တယ် လို့ ယူဆ ရပါတယ်။

မြောက်ပိုင်း မဟာမိတ် ပူးပေါင်း အဖွဲ့ ထဲက လူမျိုးစု လက်နက်ကိုင် တပ်တွေဟာ တနိုင်ငံလုံး အပစ်ရပ် စာချုပ် NCA ထဲ အစိုးရ စစ်တပ်က အဝင် မခံတဲ့ အဖွဲ့ ၃ ဖွဲ့နဲ့ မြောက်ပိုင်း ဒေသတွေမှာ အင်အား အတောင့်တင့်ဆုံး တိုင်းရင်းသား လက်နက်ကိုင် အဖွဲ့ဖြစ်တဲ့ ကေအိုင်အေ တို့ ပူးပေါင်း ထားတာ ဖြစ်ပါတယ်။

အခုလို မြောက်ပိုင်း ဒေသတွေမှာ တိုက်ပွဲတွေ ပေါ်ပေါက် လာတဲ့ အတွက် တနိုင်ငံလုံးကို လွှမ်းခြုံ နိုင်တဲ့ အပစ်အခတ် ရပ်စဲရေး ဖြစ်လာ ဖို့နဲ့ အနှစ်သာရ ရှိတဲ့ နိုင်ငံရေး ဆွေးနွေးပွဲတွေ အထမြောက် လာဖို့ မျှော်လင့်ချက် အင်မတန် ထိခိုက် သွားရတယ်လို့ လေ့လာသူတွေက ဆိုပါတယ်။

BBC Burmese
http://www.bbc.com/burmese


နိရဉ္စရာ၊ နိုဝင်ဘာ ၂၀

မောင်တောမြို့နယ်နှင့် မျက်နှာချင်းဆိုင် တည်ရှိသော ဘင်္ဂလာဒေ့ရ်ှနိုင်ငံဘက်ခြမ်းတွင် ယနေ့နံနက်က ယာဘား စိတ်ကြွဆေးပြား ၆၉၁၁၀၄ ကိုဖမ်းဆီးမိခဲ့သည့် Cox’sbazar News တွင် သတင်းဖော်ပြသည်။

ယခုဖမ်းဆီးရရှိမှုသည် ဘင်္ဂလာဒေရှ့် တက်ကနက် နယ်စပ်တွင် အများဆုံး ပမာဏဟု အာဏာပိုင်များက ပြောသည်။

၎င်းဆေးပြားများကို နိုဝင်ဘာ ၂၀ နေ့ နံနက် ၄ နာရီခန့်တွင် တက်ကနက် မြို့နယ် တောင်ပိုင်း ဆားပြင်ရွာအနီး နတ်မြစ်အတွင်း လှေတစ်စီးပေါ်မှ ဖမ်းမိခြင်း ဖြစ်သည်ဟု ဆိုသည်။

ဆေးပြားမှောင်ခိုသမားများ နယ်ခြားစောင့်တပ် BGB အမှတ်(၂) တပ်ရင်းမှ တပ်ဖွဲ့ဝင်များလာသည်ကို မြင်ပြီးနောက် ထွက်ပြေးလွတ်မြောက်သွားခဲ့သည်ဟု ဆိုသည်။

မြန်မာနိုင်ငံ မောင်တောမြို့နယ်တွင် အကြမ်းဖက်မှုများ ပေါ်ပေါက်နေပြီး စစ်ဆင်ရေးများ ပြုလုပ်နေစဉ် မှောင်ခိုသမားများသည် လှေကလေးဖြင့် နတ်မြစ်ကို ဖြတ်ကျော်ကာ ဘင်္ဂလာဒေ့ရ်ှဘက်သို့ ယာဘားဆေးပြား အများအပြားကို တင်သွင်းခဲ့ခြင်း ဖြစ်ကြောင်း သိရှိရသည်။

Narinjara
https://www.facebook.com/Narinjara

Capital Hypermarket ဈေးဝယ်စင်တာ ပေါက်ကွဲမှုဖြစ်
Capital Hypermarket ဈေးဝယ်စင်တာ ပေါက်ကွဲမှုဖြစ်

ရန်ကုန်တိုင်း ၊ဒေါပုံ မြို့နယ်ထဲက Capital Hypermarket ဈေးဝယ်စင်တာမှာ ဒီကနေ့ တနင်္ဂနွေနေ့ ညနေ ၅ နာရီခွဲ ဈေးဝယ်သူတွေနဲ့ စည်ကားနေချိန်မှာ ပေါက်ကွဲမှု ၄ ကြိမ်ဖြစ်ခဲ့ပါတယ်။ ဘာတွေ ပေါက်ကွဲခဲ့သလဲ ဆိုတာကိုတော့ ရှင်းရှင်းလင်းလင်းလင်း မသိရသေးဘဲ စစ်တပ် မိုင်းရှင်းလင်းရေး အဖွဲ့က ပေါက်ကွဲခဲ့တဲ့ နေရာတွေကို အခု စစ်ဆေးနေတယ်လို့ သာကေတမြို့နယ် မီးသတ်ဌာန တာဝန်ကျ ၀န်ထမ်းက ပြောပါတယ်။

“သတင်းရလို့ အပေါ်မှာ ပေါက်ကွဲမူဖြစ်တော့ ကျနော်တို့ ဆိုင်တွေကတော့ ပိတ်ထားတယ်ခင်ဗျ၊ Capital Hypermarket တခုလုံးပိတ်ထားတာပါ။ ဖြစ်တာက အပေါ်ထပ်ရယ်၊ မြေညီထပ်ရယ်ဖြစ်တာ။ အခုတော့ စစ်တပ်က မိုင်းရှင်းလင်းရေးအဖွဲ့ရောက်နေပါပြီ။ထိခိုက်ဒဏ်ရာရတာကတော့ မရှိဘူး။

မေး။ ။ ဘယ်နေရာမှာဖြစ်တာပါလဲ။

ဖြေ။ ။ ဖြစ်တာကတော့ အခုကျတော်တို့ လက်ရှိ ၄ နေ၇ာ ဖြစ်တာပေါ့နော်။ မြေညီထပ် မှာ ၂ နေရာ ၊ Role 1 ရယ် Role 4 ရယ် ဖြစ်တာ ၊ အပေါ်ထပ်ကတော့ Role 24 ရယ် Role 26 ရယ် ဈေးရောင်း ဈေးဝယ်နေရာမှာ ဖြစ်တာပါ။ ပထမတခါ ဖြစ်ပြီးတော့ ကျနော်တို့ သတင်းရလို့သွားတယ်။ ဒုတိယတခါ ဖြစ်တော့ ကျနော်တို့ လူတွေကို အကုန် အပြင်ထွက်ခိုင်းလိုက်ပါပြီ။ အဲဒီလူတွေအကုန်အပြင်ထွက်ပြီးတဲ့အချိန်မှာ နောက်ထပ် ၂ လုံးထပ်ပေါက်တာပါ။ တလုံး နဲ့ တလုံးကတော့ ၁၀ မိနစ်လောက်ပဲခြားတယ်အမ။

မေး။ ။ ဆိုတော့ အပျက်အစီး ဘာတွေတွေ့ပါသလဲ ။

ဖြေ။ ။ အပျက်အစီးကတော့ Role 1 ဆိုရင် စင်ပေါ်က မုန့်ထုတ်တွေ ၁၀ ထုတ် - ၁၅ ထုတ်ပါပဲ ၊ ဟိုလို ကြီးကြီးမားမားတော့ မဟုတ်ပါဘူး။”

အခုအချိန်ထိတော့ Capital Hypermarket ဈေးဝယ်စင်တာမှာ ရဲတပ်ဖွဲ့၊ မီးသတ်တပ်ဖွဲ့နဲ့ စစ်တပ် မိုင်းရှင်းလင်းရေး အဖွဲ့ အပါအ၀င် တာဝန်ရှိသူတွေ စစ်ဆေးနေဆဲ ဖြစ်ပါတယ်။
VOA Burmese News


နိရဉ္စရာ၊ နိုဝင်ဘာ ၂၀

မြန်မာနိုင်ငံမှ ထွက်ပြေးလာသူများ ၀င်ရောက်မလာရန် စေရန်အတွက် နယ်စပ်တစ်လျှောက်ရှိ နယ်ခြားစောင့်တပ်ဖွဲ့နှင့် ကမ်းခြေစောင့်တပ်ဖွဲ့ကို တပ်လှန့်ထားကြောင်း ဘင်္ဂလာဒေ့ရှ် ပြည်ထဲရေး ၀န်ကြီး Asaduzzaman Khan က ယနေ့ ပြောကြားသည်။

“ မြန်မာနယ်စပ်တစ်လျှောက် အခြေအနေများကြောင့် စိုးရိမ်မှု ဖြစ်ပေါ်ခံစားနေကြောင်း ဘင်္ဂလာဒေ့ရှ် ပြည်ထဲရေးဝန်ကြီးမှ မှောင်ခိုတိုက်ဖျက်ရေး အမျိုးသားကော်မတီ အစည်းအဝေး အပြီးတွင် သတင်းထောက်များသို့ ပြောကြားလိုက်ခြင်း ဖြစ်သည်။

၎င်းအစည်းအဝေးကို ဘင်္ဂလာဒေ့ရှ် နိုင်ငံ နယ်စပ်တစ်လျှောက်တွင် မှောင်ခိုလုပ်ငန်းများကို စောင့်ကြပ်ကြည့်ရှုမှုကို မြင့်တင်ရန် အတွက် ပြုလုပ်ခဲ့သည်ဟု သတင်းတွင် ဖော်ပြသည်။

ယမန်နေ့က နတ်မြစ်ကို ဖြတ်ကျော်ပြီး ငါးဖမ်းဘုတ် ၇ စီးဖြင့် မြန်မာနိုင်ငံ မောင်တောဘက်က ၀င်ရောက်လာသူ ၁၂၅ ဦးအား ပြန်လည် နှင်ထုတ်ခဲ့ကြောင်း ကမ်းခြေစောင့်တပ်ဖွဲ့က နှင်ထုတ်ခဲ့ကြောင်း၊ ထိုအထဲတွင် အမျိုးသမီးနှင့် ကလေးငယ်များလည်း ပါဝင်သည်ဟု ဆိုသည်။

Ref: BGB, coast guards on alert: Minister
Narinjara
https://www.facebook.com/Narinjara



ကျူးလွန်ခံရသည့် ကလေးငယ်ကို ဒေသခံ ပရဟိတအဖွဲ့ဝင် အမျိုးသမီးတစ်ဦးနှင့် တွေ့ရစဉ် (ဓာတ်ပုံ − NAWE NAWE FB)

ကရင်ပြည်နယ် မြ၀တီ မြို့နယ် ပွင့်လင်းအေးမြိုင်ကျေး ရွာရှိ ပုညရှင်ကျောင်းတိုက်မှ ကျောင်းထိုင်ဆရာတော်က စစ်ဘေးရှောင် အသက်(၁၃)နှစ်အရွယ် ဆဋ္ဌမတန်းကျောင်းသူတစ်ဦးကို သားမယားပြုကျင့်ခဲ့ရာ အမှုဖွင့်ထားကြောင်း သတင်းရရှိ သည်။

သားမယားပြုကျင့်ခဲ့သည့် (၃၆)နှစ်အရွယ်ရှိ ပုညရှင်ကျောင်းထိုင်ဆရာတော် အရှင်ပုညတေဋ္ဌ (ခ) မိုးကျော်သူကို အောက်တိုဘာ ၄ ရက်တွင် သင်္ဃန်းညီနောင်ရဲစခန်းက ဖမ်းဆီးထားပြီး တရားရုံးတွင် အမှုရင်ဆိုင်စစ်ဆေးနေသည့် အမှုဖြစ်ကြောင်း တရားလိုရှေ့နေ ဦးမျိုးအောင်ကပြောသည်။

‘‘ကလေးမလေးက ပလောင်တိုင်းရင်းသူပါ။ ရှမ်းပြည်ကနေ စစ်ဘေးရှောင်ပြီး ဘုန်းကြီးကျောင်း ကိုရောက်လာတာပါ။ ရှစ်လပိုင်း ၂၇ ရက်မှာ ဘုန်းကြီးက ခေါ်နှိပ် ခိုင်းပြီး အခန်းထဲမှာသားမယားပြု ကျင့်တယ်။ ဆေးစစ်စာမှာလည်း သားမယားပြုကျင့်ခံရတာ ဟုတ် မှန်တယ်ဆိုတဲ့အကြောင်း ဆေး စာရပါတယ်’’ဟု ၎င်းကပြော သည်။

ဆေးစစ်စာရရှိခဲ့ပြီးနောက် ခလရ(၂၇၅) အမကကျောင်းမှ ဒေါ်သင်းသင်းစံက တရားလိုပြု လုပ်ကာ သင်္ဃန်းညီနောင်ရဲစခန်း တွင် အမှုဖွင့်တိုင်ကြားခဲ့ကြောင်း လိုက်ပါကူညီ ဆောင်ရွက်နေသူ မနွယ်နွယ်ကပြောသည်။

‘‘အမှုရင်ဆိုင်နေရတဲ့ တရား လိုပြသက်သေတွေကို ရပ်ကွက် က ခြိမ်းခြောက်သူတချို့ရှိတယ်။ ဘုန်းကြီးကျောင်းမှာ နေပြီး ကျောင်းတက်နေတဲ့ ကလေးခုနစ် ယောက်မှာ ငါးယောက်ကို ဒီနေ့ အထိ ကျောင်းပေးမတက်တော့ ဘူး။ ကလေးနဲ့ မျက်မြင်သက်သေ တစ်ဦးကတော့ ကျောင်းအုပ်ဆရာမကြီးက ခေါ်ထားပါတယ်’’ ဟု မနွယ်နွယ်ကပြောသည်။

သားမယားပြုကျင့်ခံရပြီး နောက် ယင်းမိန်းကလေးငယ်ကို ဘုန်းကြီးကျောင်းတွင် မထားတော့ဘဲ ခလရ(၂၇၅) အမက ကျောင်းသို့ပို့ဆောင်ခဲ့ပြီး ကျောင်းအုပ်ဆရာမကြီးနှင့် ရပ်ကွက်ပြည်သူများက မေးမြန်းရာမှ သားမယားပြုကျင့်ခံရမှု ပေါ်ပေါက် လာခြင်းဖြစ်သည်။
7Day News Journal


နိုဝင်ဘာ ၂၀၊ ၂၀၁၆

ရှမ်းပြည်နယ် မြောက်ပိုင်း၊ သိန္နီမြို့နယ် အတွင်းရှိ နမ္မတူ တံတားပေါ်၌ ယနေ့နံနက်ပိုင်းတွင် ပါဂျဲရိုး ယာဉ်တစ်စီး ပေါက်ကွဲမှု ဖြစ်ပွားခဲ့သည်။

ယနေ့နံနက် ၁၀ နာရီ ၂၅ မိနစ်အချိန်တွင် သိန္နီမြို့နယ် အတွင်းရှိ နမ္မတူ တံတားပေါ်သို့ အမျိုးသားတစ်ဦး ပါဂျဲရိုး အမျိုးအစားယာဉ်ဖြင့် ရောက်ရှိလာပြီး တံတားပေါ်တွင် ယာဉ်အား ရပ်တန့်ရာ တံတားလုံခြုံရေး တာဝန်ကျအဖွဲ့မှ ရပ်တန့်ခြင်း မပြုရန် ပြောဆိုစဉ် အဆိုပါအမျိုးသားက ကားပေါ်မှ အထုတ်တစ်ထုတ် ကျကျန် ခဲ့သည်ဟု ပြောဆိုပြီး တံတား၏အနောက်ဘက်ခြမ်းသို့ ထွက်ပြေးသွားခဲ့သည်။

ထိုသို့ ထွက်ပြေးသွားစဉ် တံတားပေါ်၌ ရပ်တန့်ထားခဲ့သည့် ပါဂျဲရိုးယာဉ်ပေါ်မှ ပေါက်ကွဲမှု ဖြစ်ပွားခဲ့ပြီး ယာဉ်မှာ ချောင်းအတွင်းသို့ ပြုတ်ကျသွားခဲ့သည်။

ပေါက်ကွဲမှုကြောင့် တံတားပေါ်တွင် ဖြတ်သန်းသွားလာလျက်ရှိသည့် သိန္နီမြို့နယ်၊ ကောင်းဟော်ကျေးရွာနေ ဦးထွန်းအေး ပြင်းထန်ဒဏ်ရာ (စိုးရိမ်ရ) ရရှိခဲ့ပြီး သိန်းနီးမြို့နေ မနန်းတင်မျိုးခိုင်၊ မောင်ဇွဲထက်ကို တို့နှစ်ဦးမှာ (မစိုးရိမ်ရ) ဒဏ်ရာများ ရရှိခဲ့သည်။

အဆိုပါ ပေါက်ကွဲမှု ဖြစ်ပွားရာနေရာအနီးတွင် သိန္နီမြို့နယ် ၊ မန်ချက်ကျေးရွာနေ အိုက်အော (ခ) အောင်ဇေယျ (ဘ) ဦးလအိုက်အား မသင်္ကာဖွယ် တွေ့ရှိ၍ စစ်ဆေး ဆောင်ရွက်လျက် ရှိသည်။

(နိုင်ငံတော်အတိုင်ပင်ခံရုံးသတင်းထုတ်ပြန်ရေးကော်မတီ)
State Counsellor Office Information Committee

Author Name

Contact Form

Name

Email *

Message *

Powered by Blogger.