နယ်စပ်ဒုက္ခသည်တို့ ပြည်တော်ပြန်သောအခါ \\ သော်တာဇော် \\


လွန်ခဲ့သည့် ဆယ်နှစ်ကတည်းက ဒေါ်လှကြည်ထံတွင် ရှိခဲ့သည့် စိတ်ကူးယဉ်အိပ်မက်မှာ ယခုအခါ အမှန်တကယ် အကောင် အထည် ပေါ်လာပြီ ဖြစ်သည်။

တပ်မတော်နှင့် ကေအင်န်ယူ အဖွဲ့တို့အကြား ဖြစ်ပွားခဲ့သည့် တိုက်ပွဲ များကြောင့် ကရင်ပြည်နယ်၊ ကြာအင်းဆိပ်ကြီး မြို့နယ်မှ ဒေါ်လှကြည် တစ်ယောက် သားသမီးများကို လက်ဆွဲ ပြေးလွှားရင်း ထိုင်းနိုင်ငံ ဘက်ရှိ နို့ဖိုး ဒုက္ခသည် စခန်းတွင် ဆယ်စုနှစ်တစ်ခုကြာ ခိုလှုံခဲ့ရသည်။ နှစ်ပေါင်းများစွာ ပျော်ရာမှာမနေရ၊ တော်ရာမှာ နေရသည့် သူ့အဖို့ ကိုယ့်နိုင်ငံဘက် ပြန်ချင်စိတ်ကသာ ကြီးစိုးနေခဲ့သည်။

နှစ်နိုင်ငံ အစိုးရ သဘောတူညီချက်ဖြင့် ဒုက္ခသည်များ နေရပ်ပြန်ရေး အစီအစဉ်အရ ပထမဦးဆုံး ရှေ့ပြေး စီမံကိန်း အနေဖြင့် အောက် တိုဘာလတွင် ပြည်တော်ပြန်လာကြသော နို့ဖိုးစခန်းမှ ဒုက္ခသည် ၆၅ ဦးထဲတွင် အဘွားဒေါ်လှကြည်တို့ မိသားစုလည်း ပါဝင်သည်။

“ပြန်မယ့်ရက်ကျမှ နေမကောင်းဖြစ်နေလို့ နောက်တစ်သုတ်မှ အမိုးကိုပို့မယ် ဆိုတာကို ပြန်ချင်တယ်၊ အမိုးကိုပို့ပါဆိုလို့ သူတို့ကပို့တာ၊ အခု အမိုးစိတ်ချမ်းသာတယ်” ဟု နိုဝင်ဘာလကုန်ပိုင်း တွင် ဒေါ်လှကြည်က ပြောပြသည်။

ထိုင်းနိုင်ငံဘက်ခြမ်းတွင် ကုလသမဂ္ဂအဖွဲ့တစ်ခုက ပြည်တော်ပြန် ဒုက္ခသည် တစ်ဦးချင်းစီကို သုံးလစာ အသုံးစရိတ်အဖြစ် ကျပ်သုံးသိန်းကျော်နှင့် ညီမျှသည့် ဘတ် ၈,၃ဝဝ ထောက်ပံ့သည်။ ထို့ပြင် လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနက ကျပ်သုံးသိန်းစီ၊ မြန်မာနိုင်ငံ ကြက်ခြေနီအသင်းက ကျပ်တစ်သိန်းစီ ထောက်ပံ့သည်။ ထိုငွေပမာဏသည် ၎င်းတို့၏ စားရေးသောက်ရေးကို လအနည်းငယ်သာ ဖြေရှင်းပေးနိုင်မည် ဖြစ်သည်။

ဒေါ်လှကြည်က ဝင်ငွေရှိသူ သားဖြစ်သူကို မှီခိုနိုင်သော်လည်း သူနှင့်အတူ ပြန်လာသူ အိမ်နီးချင်း ဒေါ်ရှုမဝ အတွက်ကတော့ ရပ်တည်ရေးအတွက် စိတ်ပူနေရသည်။

“ရေရှည် ဘယ်လိုလုပ်ရမလဲ မသိသေးဘူး” ဟု ဒေါ်ရှုမဝက တွေးတွေး ဆဆ ဆိုသည်။

ထိုင်းနိင်ငံတွင် ဒေါ်လှကြည်၊ ဒေါ်ရှုမဝတို့ကဲ့သို့ မြန်မာ ဒုက္ခသည်ဦးရေ တစ်သိန်းနှင့် သုံးထောင်ခန့် ရှိနေသည်။ လွန်ခဲ့သည့် ၆ နှစ်က စတင်ပြီး မြန်မာနိုင်ငံတွင် ဒီမိုကရေစီ ဖော်ဆောင်နေပြီး ဒုက္ခသည်များ တတိယနိုင်ငံ တစ်ခုခုသို့ သွားရောက် အခြေချနိုင်သည့် အခွင့်အလမ်း နည်းပါးနေချိန်တွင် ရွေးချယ်စရာအဖြစ် ကျန်ရစ်သည်မှာ နေရပ် ရင်း ပြန်လည်အခြေချရေး ဖြစ်လာသည်။

သို့သော်လည်း ရှေ့ပြေး စီမံကိန်းရလဒ်ကို ကြည့်လျှင် ပမာဏ များပြားလှသော ဒုက္ခသည်များကို ကြိုဆိုနေရာချထားရေး၊ ဘဝ ပြန်လည် ထူထောင်ရေး လုပ်ငန်းစဉ်မှာ အစိုးရအတွက်ရော ကာယကံရှင်များ အတွက်ပါ ဆက်လက် လျှောက်လှမ်းရဦးမည့် ခရီးရှည်ကြီးတစ်ခု ဖြစ်နေကြောင်း တွေ့ရသည်။

**** ပြန်လည် နေရာချထားရေး

ဒေါ်လှကြည်သည် မြဝတီမြို့မှ သုံးမိုင်ခန့်အကွာတွင် တည် ရှိသော လေးကေကော်မြို့သစ်တွင် နေရာတစ်ခု ရထားသည်။ ထိုမြို့သစ်ကို စစ်ရှောင် ဒုက္ခသည်များ ပြန်လည်နေရာချထားရန်၊ ကေအင်န်ယူ အဖွဲ့ဝင် မိသားစုများ အခြေချရန် တည်ထောင်ထားခြင်း ဖြစ်သည်။

ဆန္ဒအလျောက် မြန်မာနိုင်ငံ ပြန်လိုသူများ၏ ပြန်လည်ထူထောင်ရေး၊ ကျန်းမာရေး၊ ပညာရေး၊ အလုပ်အကိုင် ရရှိရေးတို့အတွက် အစိုးရနှင့် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) တို့က ကူညီထောက်ပံ့မည်ဟု ဆိုထားသည်။

ပထမအကြိမ် ပြန်လည်ဝင်ရောက်လာသူ ၆၅ ဦးသည် နို့ဖိုးဒုက္ခသည်စခန်း မှဖြစ်ပြီး အမျိုးသမီး ၃၅ ဦး၊ အမျိုးသား ၃ဝ ပါဝင်ကြောင်း၊ သူတို့အတွက် စိတ်ပိုင်းဆိုင်ရာ အားပေးမြှင့်တင်ပေးသည့် ကဏ္ဍများတွင် အမျိုးသမီး များကို နှစ်သိမ့်ဆွေးနွေး နားထောင်ပေးခြင်းနှင့် ကလေးပျော် အစီအစဉ်များ ပါဝင်ကြောင်း မြဝတီခရိုင် လူမှုဝန်ထမ်းဦးစီးဌာန ဦးစီးမှူး ဦးမြင့်ဇော် က ပြောသည်။

အမျိုးသမီးအများစုက အိမ်နေရာ ပြန်လည်တည်ဆောက်ရေး၊ စားဝတ်နေရေးတို့အတွက် အဓိက စိုးရိမ်ပူပန်သည်ဟု ဖွင့်ဟကြကြောင်း၊ ၎င်းတို့ ဝင်ငွေရရှိရေး၊ ပြန်လည်ထူထောင်ရေး တို့အတွက် သီးခြား အစီအစဉ်များ ဖြစ်ပေါ် မလာသေးကြောင်း ဦးမြင့်ဇော်က ဆိုသည်။

“တကယ်တော့ အကူအညီပေးရေးတို့၊ လူမှုရေးလုပ်ငန်းတွေ တော်တော် များများမှာ နောက်ဆက်တွဲ စောင့်ရှောက်မှု ဆိုတာ ရှိရတယ်။ သူ့အကန့်အသတ်နဲ့သူ၊ သူ့ လုပ်ထုံးလုပ်နည်းလေးတွေ ရှိတယ်” ဟု ဦးမြင့်ဇော်က ရှင်းပြသည်။

မြဝတီခရိုင် ကယ်ဆယ်ရေးနှင့် ပြန်လည် နေရာချထားရေးဌာန ညွှန်ကြားရေးမှူး ဦးတင်မောင်ဝေက ဒုက္ခသည်တို့ နေရပ် ရင်းပြန်ရေး၊ နိုင်ငံသား စိစစ်ရေးကတ်ရရှိရေး အပါအဝင် ပညာရေး၊ ကျန်းမာရေးတို့အတွက် ဌာနဆိုင်ရာ အလိုက် လုပ်ဆောင်ပေးခဲ့ကြသည်ဟု ဆိုသည်။

ပြန်လည်ထူထောင်ရေး လုပ်ငန်းစဉ်အတွင်း နောက်ဆက် တွဲ စောင့်ကြည့်ရေးအတွက် မည်သည့်ဌာနက တာဝန်ယူမည်ဟူသော ညွှန်ကြားချက် မရရှိသေးကြောင်း လူမှုဝန်ထမ်းဦးစီးဌာနထံမှ သိရသည်။

တစ်ချိန်တည်းမှာပင် တနင်္သာရီတိုင်းဒေသကြီး အနီးရှိ ထမ့်ဟင်း ဒုက္ခသည်စခန်းမှလည်း ဆန္ဒအလျောက် နေရပ်ပြန်ကြသူ ၆ ဦး ရှိသည်ဟု UNHCR ၏ ထုတ်ပြန်ချက်တစ်ခုတွင် ဖော်ပြထားသည်။

ပြန်လည် ဝင်ရောက်လာသူ အားလုံးအတွက် နေရာထိုင်ခင်း အဆင်ပြေ ချောမွေ့နေသည်တော့ မဟုတ်ပါ။

အဆိုးဆုံး အခြေအနေနှင့် ရင်ဆိုင်ရသူတို့မှာ ရန်ကုန်မြို့တွင် ရောက် ရှိနေသည့် ဒုက္ခသည် ၁၅ ဦး ဖြစ်သည်။ အိမ်ထောင်စု အနေဖြင့် လေးစု ပါဝင်သည်။

လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၏ ဂိုဒေါင်တစ်ခုအတွင်း တန်းစီထားသည့် သစ်သား ခုတင်ငယ်လေးများတွင် သူတို့ နေထိုင်လျက်ရှိပြီး အိမ်နေရာ မချထားနိုင်သေးမီ ဌာနက တစ်ဦးကို ကျပ်သုံးထောင် နေ့စဉ်ထောက်ပံ့ပေးထားသည်။ ဂိုဒေါင်ထဲတွင် တစ်လကျော် ကြာပြီဖြစ်သော ဒေါ်ခင်စန်းရီက အနာဂတ်အတွက် စိုးရိမ်ပူပန်နေရသည်။ အရစ်ကျငွေသွင်းပြီး တန်ဖိုးနည်းအိမ်ရာ ဝယ်ယူရန် အစိုးရက စီစဉ်ပေးသော်လည်း ကနဦး ပေးသွင်းရမည့် သိန်းသုံးဆယ်ကို သူတို့မိသားစု မည်သို့မျှ လက်လှမ်းမမီနိုင်ချေ။

“ဘာမှ သေချာ စီစဉ်ထားတာ မရှိသေးဘူး။ ကိုယ့်နိုင်ငံခေါ်ပြီး တန်ဖိုးနည်း တိုက်ခန်း ရောင်းနေသလိုပဲ။ ကိုယ့်ဆီ ပြန်လာတော့မှ ဂိုဒေါင်ထဲနေ ရတော့တယ်” ဟု ဒေါ်ခင်စန်းရီက စိတ်ပျက်လက်ပျက် ဆိုသည်။

သုံးလေးကြိမ်လာရောက် တွေ့ဆုံသွားသော ရန်ကုန်ရှိ UNHCR ရုံး ကိုယ်စားလှယ်များက တစ်စုံတစ်ရာ စီစဉ်ပေးလေမည်လား ဟုလည်း သူတို့က မျှော်လင့်နေကြသည်။

ရန်ကုန်တွင် သောင်တင်နေသူများအနက် ကိုအေးလွင်၏ အိမ်ထောင်စုတွင် ကလေး ၄ ယောက် အပါအဝင် မိသားစု ၆ ဦး ရှိသည်။ ကိုအေးလွင်သည် နာဂစ်မုန်တိုင်းအပြီး ကယ်ဆယ်ရေး လုပ်ငန်းများတွင် တက်တက်ကြွကြွ ပါဝင်ခဲ့ပြီးနောက် ဖမ်းဆီးထိန်းသိမ်းခံရမည်ကို စိုးရိမ်သည့်အတွက် ထိုင်းနိုင်ငံသို့ ထွက်ပြေးခဲ့ရသူ ဖြစ်သည်။

ကိုအေးလွင်၏ အကြီးဆုံးကလေးက မြဝတီမြို့ရှိ အဘိုးအဘွားတို့အိမ်တွင် ရှိနေပြီး အထက်တန်းကျောင်း တက်ရောက်နေရသည်။ ရန်ကုန်ရှိ ဂိုဒေါင်ထဲတွင် ရောက်နေသော သူ၏ မောင်လေး၊ ညီမလေးတို့ ကတော့ ကျောင်း ဆက်မတက်နိုင်သေးပေ။

“ကလေးတွေ ပညာရေးကို မျှော်မှန်းပြီး ကိုယ့်နိုင်ငံကို ပြန်လာတာ။ ခုတော့ အငယ်လေးတွေက ကျောင်း တစ်နှစ်နားရမယ့် အခြေအနေဖြစ်နေပြီ” ဟု ကိုအေးလွင်က မျှော်လင့်ချက်မဲ့စွာဖြင့် ဆိုသည်။

**** ပြန်လည်ထူထောင်ရေး

ထိုင်းနိုင်ငံရောက် ဒုက္ခသည် အများအပြားသည် မိမိနိုင်ငံ ပြန်လာ လိုကြသည်။ ပထမအသုတ်၏ အခြေအနေ၊ အတွေ့အကြုံ အကြောင်း ကြားသိရသူများထဲမှ တချို့က နေရပ်ပြန်ရန် ချီတုံချတုံ ဖြစ်နေကြသည်။

ဆန္ဒအလျောက် နေရပ်ပြန်ရေးနှင့် ပတ်သက်ပြီး ဒုက္ခသည် အရေး ဆောင်ရွက်နေသည့် အရပ်ဘက် အဖွဲ့အစည်းများနှင့် တိုင်ပင်ဆွေးနွေးမှု မရှိကြောင်း ကရင် ဒုက္ခသည်များဆိုင်ရာ ကော်မတီက ဆိုသည်။ ထိုအဖွဲ့သည် ဒုက္ခသည်တို့ကို နှစ်ပေါင်း ၃ဝ ကျော်ကြာ ကူညီခဲ့သည့် အတွေ့အကြုံရှိသော အရပ်ဘက် အဖွဲ့အစည်း တစ်ခု ဖြစ်သည်။

လက်ရှိအခြေအနေတွင် ဒုက္ခသည်များ နေရပ်ပြန်လည် အခြေချရေး အစီအစဉ်တို့မှာ အဆင့်သင့် မဖြစ်သေးကြောင်း ကော်မတီဝင် နော်ဘလူး မင်းနိုက်ဇာက ဆိုသည်။

“မိမိဆန္ဒအလျောက် ပြန်တယ်ဆိုပေမယ့် သတင်းအချက်အလက်တွေ ကို သေချာမသိရသေးဘဲနဲ့ ထောက်ပံ့ငွေလေး ရကြပြီး ပြန်တယ်ဆိုတာနဲ့ မလုံလောက်ဘူး။ ဘယ်အပိုင်းတွေကို ဘယ်လိုတာဝန်ယူ ဆောင် ရွက်ပေးမယ်ဆိုတဲ့ သတင်းအချက်အလက်တွေ ရရှိမှ ပြန်ဖို့သင့်တယ်” ဟု သူက ဆိုသည်။

ပြည်တော်ပြန်တို့အတွက် အရေးကြီးသည့် အချက်တစ်ခုမှာ ပြန်လည် ထူထောင်ရေး ဖြစ်သည်။ ၎င်းတို့အတွက် သင့်တော်သည့် အလုပ်အကိုင် ရရှိရေးအတွက် ကူညီမည်ဟု လူမှုဝန်ထမ်း ကယ်ဆယ်ရေးနှင့် ပြန် လည်နေရာချထားရေး ဦးစီးဌာနက ဆိုသည်။ ဒုက္ခသည်တို့ကမူ အလုပ်အကိုင် ရရှိရေးအတွက် အစိုးရဘက်က ကမ်းလှမ်းမှု မရှိသေးကြောင်း ပြောပြကြသည်။

ထောက်ပံ့ငွေကလည်း စားသောက်ကုန်နှင့် လိုအပ်သည့် ပစ္စည်းပစ္စယများ ဝယ်ယူပြီးနောက် လျော့ပါးလာသည်။

ထောက်ပံ့ငွေ ကုန်သည့်အခါ စားဝတ်နေရေးအတွက် မြက်ရိတ်ပြီး ဝင်ငွေရှာဖို့ စဉ်းစားထားသည်ဟု နယ်စပ်ဒုက္ခသည် စခန်းတွင် နှစ်ပေါင်း များစွာ ခိုလှုံခဲ့သူ ဒေါ်ရှုမဝက အားမလျှော့တမ်းဆိုသည်။ ပြန်လည် ထူထောင်ရေးအတွက် ထောက်ပံ့ပေးမည် ဆိုပါက သူ့တွင်ဆန္ဒတစ်ခုရှိသည်။

“တစ်ပိုင်တစ်နိုင် မွေးမြူရေးလေး လုပ်ချင်တယ်။ နေပူထဲလည်း မထွက်ရဘူး၊ စားဖို့သောက်ဖို့တော့ ဖြစ်တယ်လေ” ဟု ဒေါ်ရှုမဝ က မျှော်လင့်တကြီး ပြောလိုက်သည်။

သော်တာဇော် / Myanmar Now
The Ladies News
Labels:

Post a Comment

မြန်မာ့ဒီမိုကရေစီရေးလှုပ်ရှားမှုကို အထောက်အကူဖြစ်စေမည့် ထောက်ပြ ဝေဖန် သုံးသပ်ချက်များကို လာရောက် ရေးသားရင်ဖွင့်နိုင်ပါသည်။ လွတ်လပ်စွာ ရေးသားခွင့်ကို အလွဲသုံးစားပြု၍ ရင့်သီးရိုင်းစိုင်း ရုန့်ရင်းကြမ်းတမ်းစွာ ရေးသားခြင်း၊ ညစ်ညမ်းစွာ ဆဲဆိုရေးသားခြင်း၊ ပုဂ္ဂိုလ်ရေး ထိခိုက်နစ်နာမှုရှိစေရန် တိုက်ခိုက်ရေးသားခြင်း၊ အများပြည်သူ ဖတ် ကြည့် နားဆင်ရန် မသင့်လျော်သည့် link များ လာထည့်ခြင်း၊ လူမျိုးရေး ဘာသာရေး အစွန်းရောက်စွာ လှုံ့ဆော်သည့် အရေးအသားများ ရေးသားခြင်း၊ လူမျိုးရေး ဘာသာရေး အစွန်းရောက်စွာ လှုံ့ဆော်သည့် link များ လာထည့်ခြင်းများကို လုံးဝ ခွင့်မပြုပါ။ ..Face book button လေးနှိ်ပ်ပြီးလည်း ရေးနိုင်ပါတယ်

[blogger][facebook]

Author Name

Contact Form

Name

Email *

Message *

Powered by Blogger.