01/23/17


၂၀၁၆ နိုဝင်ဘာလတုန်းက ဘင်္ဂလားဒေ့ရ်ှထဲ တရားမ၀င် ၀င်ရောက်လာသော မြန်မာနိုင်ငံသားများကို Cox’s Bazar အရပ်တွင် ဖမ်းမိစဉ်
၂၀၁၆ နိုဝင်ဘာလတုန်းက ဘင်္ဂလားဒေ့ရ်ှထဲ တရားမ၀င် ၀င်ရောက်လာသော မြန်မာနိုင်ငံသားများကို Cox’s Bazar အရပ်တွင် ဖမ်းမိစဉ်
ဘင်္ဂလားဒေ့ရ်ှနိုင်ငံထဲ တရားမ၀င် ၀င်ရောက်လာတဲ့ မြန်မာနိုင်ငံသား ၁၅၂ ဦးကို ဘင်္ဂလားဒေ့ရှ် ရဲတပ်ဖွဲ့က ဖမ်းဆီးလိုက်ကြောင်း ဘင်္ဂလားဒေ့ရ်ှနိုင်ငံထုတ် သတင်းတွေမှာ ဖော်ပြထားပါတယ်။ အဲဒီ လူတွေကို Gazipur ခရိုင်၊ Tongi ဒေသက Ijtema အရပ်မှာ ဖမ်းဆီးမိလိုက်တာလို့ ဆိုပါတယ်။

အဲဒီ မြန်မာနိုင်ငံသားတွေ ရောက်နေတဲ့အကြောင်း ဒေသခံတွေနဲ့ နိုင်ငံခြားသားတွေက သတင်းပေးတဲ့အတွက် ရဲတပ်ဖွဲ့က ဖမ်းဆီးလိုက်ခြင်း ဖြစ်တယ်လို့ ရဲတပ်ဖွဲ့ပြောတာကို ကိုးကားပြီး The Dhaka Tribune သတင်းမှာ ဖော်ပြထားပါတယ်။ သူတို့အားလုံးထံမှာ ခိုင်လုံတဲ့ အထောက်အထား ပါလာတာ မတွေ့ရဘူးလို့ ဆိုပါတယ်။

သူတို့အနေနဲ့ ဘင်္ဂလားဒေ့ရ်ှနိုင်ငံထဲကို တရားမ၀င် ၀င်ခဲ့ခြင်းဖြစ်ကြောင်း၊ သူတို့အထဲက ၁၂၆ ယောက်ဟာ Cox’s Bazar ကတဆင့် ခိုးဝင်လာခြင်း ဖြစ်ကြောင်း အဲဒီလူတွေက ထွက်ဆိုခဲ့တယ်လို့ ရဲတပ်ဖွဲ့က ပြောပါတယ်။ ခိုးဝင်လာသူတွေထဲက ၁၃ ယောက်ကတော့ ထွက်ပြေး လွတ်မြောက်သွားတယ်လို့ ဆိုပါတယ်။

သူတို့အနေနဲ့ ဘင်္ဂလားဒေ့ရ်ှကတဆင့် တခြားနိုင်ငံတခုခုကို ထွက်ပြေးဖို့ဆိုတဲ့ အစီအစဉ်နဲ့ အဲဒီလို ခိုးဝင်လာခြင်းဖြစ်တယ်လို့ ထွက်ဆိုခဲ့ကြောင်း ရဲမှူးကြီး Harun-ar-Rashid က ပြောတယ်လို့ ဆိုပါတယ်။

ဖမ်းဆီးမိသူတွေကို စစ်ဆေး မေးမြန်းပြီးတဲ့နောက် ဒါကာမြို့မှာရှိတဲ့ မြန်မာသံရုံးကို ပို့လိုက်တယ်လို့ ဆိုပါတယ်။
VOA Burmese News


အမေရိကန် ပြည်ထောင်စုထဲက သတင်းမီဒီယာ တချို့ဟာ သမ္မတ နေရာကို ဒေါ်နယ်ထရမ့် ရရှိမှု အပေါ် ဥပဒေနဲ့ အပြည့်အဝ မလျော်ညီတဲ့ သဖွယ် သေးသိမ်အောင် ပြုမူ နေကြတယ် ဆိုပြီး အိမ်ဖြူတော် ရုံး အဖွဲ့မှုး ရိုင့်စ် ဘရီးဘတ်စ်က စွပ်စွဲ ပြောဆို လိုက်ပါတယ်။

မစ္စတာ ထရမ့်က သူ ကျမ်းသစ္စာ ကျိန်ဆိုတဲ့ ပွဲကို လူ တစ်သန်းကျော် တက်ခဲ့ကြတယ် ဆိုပြီး ပြောဆို ခဲ့မှု အပါအဝင်၊ ထရမ့်ရဲ့ ပြန်ကြားရေး အရာရှိကလည်း အဲဒီ သောကြာနေ့ သမ္မတ နေရာ ဆက်ခံပွဲဟာ သမိုင်း တလျှောက် အကြီးကျယ်ဆုံး ပွဲပဲ ဆိုပြီး ပြောဆို ခဲ့တဲ့ အချက် တွေကို သတင်းဌာန တွေက လက်မခံ ခဲ့တဲ့နောက် အိမ်ဖြူတော်က တုံ့ပြန် လာတာ ဖြစ်ပါတယ်။

ကျမ်းသစ္စာ ကျိန်ဆိုပွဲ အခမ်းအနား ကျင်းပစဉ် ရိုက်ကူး ထားတဲ့ ရုပ်သံ မှတ်တမ်း တွေ၊ ဝေဟင် ဓာတ်ပုံ တွေ အရ ဒေါ်နယ်ထရမ့် ဘက်က ပြောဆိုတဲ့ အရေအတွက်မျိုး မရှိခဲ့ပါဘူး။

ဒါ့အပြင်၊ ဝါရှင်တန် ဒီစီ မြို့တော်ရဲ့ အများပြည်သူ ပို့ဆောင်ရေး စနစ် ကနေ ရရှိတဲ့ တရားဝင် ကိန်းဂဏန်းတွေ အရလည်း သမ္မတ အိုဘားမား ကျမ်းကျိန်ပွဲ တုန်းကထက် တက်ရောက်သူ အရေအတွက် နည်းပါးတာကို တွေ့ရပါတယ်။

#ဘီဘီစီမြန်မာပိုင်း
BBC Burmese


နိုင်ငံခြားရေးဝန်ကြီး Boris Johnson နေပြည်တော်ကိုရောက်ရှိစဉ် (British Embassy Rangoon)
နိုင်ငံခြားရေးဝန်ကြီး Boris Johnson နေပြည်တော်ကိုရောက်ရှိစဉ် (British Embassy Rangoon)
ပဋိပက္ခဖြစ်နေတဲ့ ရခိုင်ဒေသအတွက် ဗြိတိန်နိုင်ငံက အကူအညီပေးသွားဖို့ရှိပြီး၊ ရခိုင်ပြည်နယ် အရေး မြန်မာအစိုးရရဲ့ ကိုင်တွယ်ဆောင်ရွက် ချက်တွေကို အပြုသဘောဆောင် အားပေး သွားမယ့်အကြောင်း မြန်မာနိုင်ငံကို သုံးရက်ကြာ အလည်အပတ်ရောက်ခဲ့တဲ့ ဗြိတိန်နိုင်ငံခြားရေး ဝန်ကြီး မစ္စတာ ဘောရစ်ဂျွန်ဆင်က ရခိုင်အကြံပေးကော်မရှင် အဖွဲ့ဝင်တွေနဲ့ တွေ့ဆုံစဉ် ပြောဆိုလိုက်ပါတယ်။ ဆက်သွယ်မေးမြန်းထားတဲ့ ကိုဉာဏ်ဝင်းအောင်က တင်ပြပါမယ်။

ဇန်နဝါရီလ ၂၀ ရက်နေ့မှာ မြန်မာပြည်ခရီးစဉ်ကို စတင်ခဲ့တဲ့ ဗြိတိန် နိုင်ငံခြားရေး ဝန်ကြီး ဘောရစ်ဂျွန်ဆင်ဟာ ဇန်နဝါရီလ ၂၂ ရက် ဒီကနေ့ မှာတော့ သူ့ခရီးစဉ်ကို အဆုံးသတ် လိုက်ပြီဖြစ်ပါတယ်။ ဒီခရီးစဉ် အဆုံးမသတ်ခင်မှာ ရခိုင်အကြံပေးကော်မရှင် အဖွဲ့ဝင်တွေနဲ့ တွေ့ဆုံခဲ့ပြီး မြန်မာနိုင်ငံကို အထူးသဖြင့် ရခိုင်ဒေသအတွက် အကူအညီတွေပေးသွားဖို့ ရှိတယ်လို့ ပြောဆိုခဲ့ကြောင်း ရခိုင်အကြံပေးကော်မရှင်အဖွဲ့ဝင် တဦးဖြစ်တဲ့ ဦးအေးလွင်က VOA ကိုပြောပါတယ်။

“ဗြိတိန်နိုင်ငံ နိုင်ငံခြားရေးဝန်ကြီး Boris Johnson ကနေပြီးတော့ ကျနော်တို့နဲ့ တွေ့တဲ့ အခါမှာ ရခိုင်ဒေသအခြေအနေကို သူတို့ စိုးရိမ်တယ် စိတ်ဝင်စားတယ်။ တိုးတက် လာအောင်သူတို့ ကူညီချင်တယ်၊ အတိအကျ ဘယ်လို လုပ်ပေးမယ်၊ ဘာအစီအစဉ် တွေရှိတယ် ဆိုတာကတော့ မပြောပါဘူး။ မြန်မာနိုင်ငံရဲ့ မိတ်ဆွေ အနေနဲ့ မြန်မာနိုင်ငံ ဖွံ့ဖြိုးတိုးတက်ရေး အတွက်ကိုလည်း ကူညီတဲ့နေရာမှာ ရခိုင်ပြည်နယ်ကိုလည်း ကူညီချင်ပါတယ် ဆိုတဲ့ ဟာကိုတော့ သူပြောတယ်။”

ဗြိတိန်နိုင်ငံခြားရေးဝန်ကြီးဟာ မြန်မာနိုင်ငံကိုရောက်တဲ့နေ့မှာပဲ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နဲ့ သူမနေအိမ်မှာ နှစ်နာရီကြာ တွေ့ ဆုံဆွေးနွေးခဲ့ပြီး မြန်မာနိုင်ငံရဲ့ စီးပွားရေး ပြုပြင်ပြောင်းလဲရေး၊ ကျန်းမာရေးနဲ့ ပညာရေးကဏ္ဍတွေမှာ ဗြိတိန်က အကူအညီ ပေးသွားမယ့်အကြောင်း နဲ့ ရခိုင်အရေးနဲ့ အဲဒီဒေသက စစ်ဆင်ရေး ဆောင်ရွက်မှုတွေကို စိုးရိမ် ပူပန်ကြောင်း ပြောဆို ခဲ့တယ်လို့ ရန်ကုန် ဗြိတိသျှသံရုံးက ထုတ်ပြန်ချက် သတင်းမှာ ဖေါ်ပြထားပါတယ်။

ဒါပေမယ့် ဗြိတိန်အနေနဲ့ ရခိုင်ပြည်နယ်အရေး မြန်မာအစိုးရရဲ့ ကိုင်တွယ်ဆောင် ရွက် ချက်တွေကို အပြုသဘောဆောင် အားပေးသွားမှာဖြစ် တယ်လို့ ရခိုင်အကြံပေး ကော်မရှင်နဲ့တွေ့ဆုံစဉ် ဗြိတိန်နိုင်ငံခြားရေး ဝန်ကြီးက သူတို့ကို ရှင်းပြခဲ့ကြောင်း ဦးအေးလွင်က ပြောပါတယ်။

“သူက ဒီအစိုးရရဲ့ လုပ်ဆောင်ချက်တွေကို ဒီဟာက ဒီမိုကရေစီအပြောင်းအလဲ ကဏ္ဍဖြစ်နေတဲ့ အတွက်ကြောင့်မို့လို့ အပြုသဘောဆောင်ပြီးတော့ သူ့ကို အားပေးမယ် ဆိုတဲ့ကိစ္စ၊ ဒီမှာ ဒါကို ကျနော်တို့က မျှော်လင့်ချက်တွေက လိုတာထက် ပိုမထားသင့်ဘူးဆိုတာကို ပေါ့လေ လုပ်သင့်လုပ်ထိုက်တာတွေကတော့ လုပ်ဖို့ ကျန်သေးတယ်။ အဲဒါကြောင့်မို့လို့ ဒီ စက်ကူးမက်ကူးကာလကို နားလည်ပေးဖို့ လိုအပ်တယ်၊ သူတို့ကတော့ အပြည့်အ၀ထောက်ခံတယ် ဆိုတာလေး ပြောပါတယ်။”

ရခိုင် မောင်တောဒေသကို အကြမ်းဖက်သမားတွေ တိုက်ခိုက်ခဲ့ပြီးနောက် နယ်မြေရှင်းလင်းရေးစစ်ဆင်မှုတွေမှာ လူ့အခွင့်အရေးချိုးဖေါက် မှုတွေ ရှိတယ်ဆိုတဲ့ နိုင်ငံတကာရဲ့ဝေဖန်မှုတွေ ထွက်ပေါ်ခဲ့ပါတယ်။ ဒီလို ကိစ္စရပ်တွေမှာ ဗြိတိန်အနေနဲ့ စိုးရိမ်ကြောင်းကိုလည်း နိုင်ငံခြားရေးဝန်ကြီး ဘောရစ်ဂျွန်ဆင်က ပြောသွားတယ်လို့ ဦးအေးလွင်က ဆိုပါတယ်။

“ရခိုင်ကနေပြီးတော့ ဘင်္ဂလားဒေ့ခ်ျကို သောင်းနဲ့ချီပြီးတော့ လူတွေထွက်ပြေး လာရခြင်းသည် သူတို့ကို ဒီလို ထွက်ပြေးလာသော အကြောင်းတရား ရှိလိမ့် မယ်ပေါ့နော်။ အဲဒီ အကြောင်းတရားကတော့ စိုးရိမ်စရာပဲ ဖြစ်ရလိမ့်မယ် စသဖြင့် အဲဒီကိစ္စရပ်တွေ ပြောပါတယ်။ အဲဒီအပေါ်မှာ ကျနော်တို့ ပြောတာကတော့ ဒီဟာက စုံစမ်းစစ်ဆေးတဲ့ ကော်မရှင်ကို သီးသန့်ဖွဲ့ထားတယ်။ ကျနော်တို့က အကြံပေးရတဲ့ အဖွဲ့ပဲဖြစ်တယ်။ နောက်ပြီး ဖြစ်ရပ်တခုကို ကျနော်တို့က ဟုတ်၏ ၊ မဟုတ်၏ ဆိုတာ ကတော့ပြောဖို့အတွက်က ဆန်းစစ်ဖို့အတွက် လုပ်ထုံးလုပ်နည်းတွေရော ကရိယာ တန်ဆာပလာတွေရော အကုန်လုံးက လိုအပ်တယ်။ ဒါကို မှန်၏ မမှန်၏ ဆိုတာ ဆန်းစစ်ဖို့အတွက် ကျနော်တို့မှာ မရှိပါဘူး ဆိုတာတွေကို ကျနော်ပြောပြတယ်။ အဲဒီတော့ တချို့သတင်းတွေ လွဲမှားနေတဲ့ သတင်းတွေကိုတော့ အပြည်ပြည်ဆိုင်ရာ မီဒီယာတွေက ပြန်ပြောတာရှိတယ် ပေါ့နော်။”

ဗြိတိန်နိုင်ငံခြားရေးဝန်ကြီး ဘောရစ်ဂျွန်ဆင်ဟာ သူ့ရဲ့ ၃ ရက်ကြာ မြန်မာပြည် ခရီးစဉ်အတွင်း ပြည်ထဲရေးဝန်ကြီး ဒုတိယ ဗိုလ်ချုပ်ကြီး ကျော်ဆွေ၊ နိုင်ငံတော် လုံခြုံရေးအကြံပေး ဦးသောင်းထွန်း တို့နဲ့လည်း တွေ့ဆုံခဲ့ပြီး ရခိုင်ပြည်နယ်က လူ့အခွင့်အရေး ချိုးဖောက်မှုဆိုင်ရာ အစီရင်ခံစာတွေနဲ့ ပတ်သက်လို့ စိုးရိမ်ပူပန် မိကြောင်း၊ နိုင်ငံတကာ စံနှုန်းတွေနဲ့အညီ လုံခြုံရေးကိစ္စတွေကို ဆောင်ရွက်ဖို့ တိုက်တွန်း သွားပါတယ်။
VOA Burmese News

Author Name

Contact Form

Name

Email *

Message *

Powered by Blogger.