02/11/17


(၂၀၁၇ခုနှစ်၊ ဖေဖေါ်ဝါရီ ၁၀ရက်)

“နိုင်ငံရေးအရ ဆွေးနွေးအဖြေရှာနိုင်မယ့် နိုင်ငံရေးယဉ်ကျေးမှုတစ်ရပ် ဖော်ဆောင်လျက်ရှိပါတယ်”လို့ အာဘောင်အာရင်းသန် သန်နဲ့ ပြောဆိုနေကြချိန်မှာ ရှေ့နေဦးကိုနီ သတ်ဖြတ်လုပ်ကြံခြင်း ခံလိုက်ရတာဖြစ်ပါတယ်။ ရက်သတ္တပတ် ၂ပတ်နီးပါး ရှိလာ တော့မယ့် အခုအချိန်အထိ ဒီချုပ်ပါတီအစိုးရဘက်က “သတင်းထုတ်ပြန်ချက်” နဲ့ “နောက်ဆက်တွဲ သတင်းထုတ်ပြန်ချက်” ထုတ်ပြန်ထားတာကလွဲပြီး ရေရေရာရာ ဘာမှ ထုတ်ဖော်ပြောဆိုခြင်း မရှိသေးပါဘူး။

ထင်ကြေးမျိုးစုံ ပလုံစီ ထနေဆဲဖြစ်ပါတယ်။ အဲဒီလို ပလုံစီထနေတဲ့ ထင်ကြေးမျိုးစုံရဲ့ နောက်မှာ လက်သည်တရားခံအစစ်ပေါ် မှာ မဟုတ်ပါဘူးဆိုတဲ့ သံသယကလည်း ခိုင်မာတဲ့ ခြေလှမ်းတွေနဲ့ ဖဝါးခြေထပ် ကပ်ပါလာနေပါတယ်။

ဦးကိုနီကို သတ်ဖြတ်တာဟာ နိုင်ငံရေးရည်ရွယ်ချက်နဲ့ လုပ်ကြံသတ်ဖြတ်တာ ဖြစ်တယ်ဆိုတဲ့အချက်အပေါ် ဘယ်သူ့မှ အငြင်းမ ပွားကြပါဘူး။ “နိုင်ငံရေးလုပ်ကြံသတ်ဖြတ်မှုဖြစ်တယ်” ဆိုတဲ့ ဒီအချက်အပေါ် အားလုံးက တညီတညွတ်တည်း သဘောတူကြ တာ တွေ့ရပါတယ်။ “ဘယ်သူ့လက်ချက်လဲ/ တရားခံအစစ်ဘယ်သူလဲ” ဆိုတဲ့အချက်မှာတော့ သူတမျိုး ငါတဖုံနဲ့ ထင်ကြေးမျိုးစုံ ပေးနေကြတာ တွေ့ရပါတယ်။ ထင်ကြေးမျိုးစုံထဲမှာ အဖြစ်မှန်နဲ့နီးစပ်တဲ့ ထင်ကြေးတွေပါသလို၊ မဖြစ်နိုင်တဲ့ထင်ကြေးတွေ၊ လမ်း လွှဲတဲ့၊ နှပ်ကြောင်းပေးတဲ့၊ တမင်ရှုပ်ထွေးအောင် လုပ်ကြံ၊ လီဆယ်၊ ဖန်တီးထားတဲ့ ဗရုတ်သုက္ခ ထင်ကြေးတွေလည်း အုံလိုက် ကျင်းလိုက် ပါရှိနေပါတယ်။

ဦးကိုနီဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပါတီဝင်တစ်ဦးဖြစ်ပါတယ်။ ၂၀၁၃ခုနှစ်၊ အောက်တိုဘာလ ၈ရက်မှာ ဒီချုပ်ပါ တီသို့ ဝင်ရောက်ခဲ့တာဖြစ်ပြီး ပါတီဝင်အမှတ်က (၁၂/၄/၀၀၅၈၁) ဖြစ်ပါတယ်။ ဒီချုပ်ပါတီ ဗဟိုဥပဒေအထောက်အကူပြုအဖွဲ့မှာ တာဝန်ထမ်းဆောင်နေတဲ့ အဖွဲ့ဝင်တစ်ဦးလည်းဖြစ်ပါတယ်။ မူဆလင်တစ်ဦးလည်းဖြစ်ပါတယ်။ “၂၀၀၈ အခြေခံဥပဒေ”ကို ပြင် ဆင်လို့ မရနိုင်၊ အခြေခံဥပဒေအသစ်တစ်ရပ် ရေးဆွဲပြီး အစားထိုးရမယ်ဆိုတဲ့ နိုင်ငံရေးအယူအဆကို ခိုင်ခိုင်မာမာ စွဲကိုင်ထား သူလည်းဖြစ်တယ်ဆိုတာ အခြေခံဥပဒေနဲ့ဆိုင်တဲ့ သူ့ဟောပြောချက်တွေကနေတဆင့် ရှင်းလင်းစွာ သိရှိနိုင်ပါတယ်။

ဒီအချက်တွေကို အခုလိုဖော်ပြနေတာဟာ ဦးကိုနီကို ဘာကြောင့် လုပ်ကြံသတ်ဖြတ်ခံရသလဲဆိုတဲ့ အကြောင်းရင်းနဲ့ ရည်ရွယ် ချက်ကို သိရှိနိုင်ဖို့ဖြစ်ပါတယ်။ ဘာကြောင့်သတ်သလဲ/ ဘယ်လိုရည်ရွယ်ချက်နဲ့ လုပ်ကြံသလဲဆိုတာကို ပထမသိဖို့ လိုပါတယ်။ ဒါဆိုရင် “တရားခံအစစ်ဘယ်သူလဲ” ဆိုတာ ဆက်လက်ဖော်ထုတ်ဖို့ မခက်တော့ပါဘူး။
ဒါ့အပြင် အနီးကပ်လုပ်ကြံသူ (ဝါ) သေနတ်သမား (ကြည်လင်း)နဲ့ ပူးပေါင်းပါဝင်သူ (အောင်ဝင်းဇော်)တို့ကို လက်ရဖမ်းဆီးမိ ထားပြီးပြီ မဟုတ်ပါလား။

အနီးကပ်လုပ်ကြံသူ (ဝါ) သေနတ်သမားနဲ့ ပူးပေါင်းပါဝင်သူကို လက်ရဖမ်းမိထားပြီဆိုတော့ ဆက်လက်ဖော်ထုတ်ရမယ့် အဓိက အပိုင်းက သူတို့နောက်ကွယ်မှာ ဘယ်သူ/ဘယ်အဖွဲ့အစည်း/ဘယ်အုပ်စုက ကြိုးကိုင်ညွန်ကြားခိုင်းစေသလဲဆိုတဲ့ အချက်ပဲ ဖြစ် ပါတယ်။ ဒီအချက်ကို တစ်တိုင်းတစ်ပြည်လုံးက တိတိကျကျ သိရှိလိုတာဖြစ်ပါတယ်။ လုပ်ကြံသတ်ဖြတ်တဲ့ နိုင်ငံရေးရည်ရွယ် ချက်အပေါ်ကနေ စဉ်းစားကြည့်တဲ့အခါမှာ ဘယ်သူတွေလက်ချက်ဖြစ်နိုင်တယ်ဆိုတဲ့ မှန်းဆချက်က လူတိုင်းလူတိုင်းမှာ ကိုယ်စီ ရှိနေကြပြီ ဖြစ်ပါတယ်။ ဒီချုပ်ပါတီအစိုးရက ထုတ်ပြန်လာမယ့်အချက်နဲ့ ပြည်သူတွေကိုယ်စီကိုယ်စီက တွက်ချက်မှန်းဆထားတဲ့ အချက် ဘယ်လောက် တူညီသလဲ/ မတူညီသလဲဆိုတာ သိချင်တာပါ။ တိုက်ကြည့်ချင်ကြတာပါ။

အဲဒီမှန်းဆချက်တွေထဲက ပထမဆုံးအချက်က “၂၀၀၈အခြေခံဥပဒေကို လုံးဝ အထိပါးမခံလိုသူတွေ ဖြစ်နိုင်တယ်” ဆိုတဲ့အ ချက်ဖြစ်ပါတယ်။ ဒုတိယအချက်က “ဘာသာရေး၊ လူမျိုးရေးသွေးထိုးလှုံ့ဆော်နေသူတွေ ဖြစ်နိုင်တယ်” ဆိုတဲ့အချက် ဖြစ်တယ်။ တတိယအချက်က “အမျိုးသားဒီမိုကရေစီအဖွဲ့ချုပ်ပါတီကို မနာလိုမရှုစိမ့်သူတွေ၊ မလိုမုန်းထားသူတွေ၊ အညှိုးအာဃာတကြီးမား ပြင်းထန်သူတွေ ဖြစ်နိုင်တယ်” ဆိုတဲ့အချက်ဖြစ်ပါတယ်။

ဒီအချက်တွေက ဘယ်ကိုညွန်ပြနေသလဲဆိုတော့ “အမျိုးသားရေးကို ဘယ်တော့မှသစ္စာမဖောက်”/ “အမျိုး၊ဘာသာ၊သာသနာ” စတဲ့၊ စတဲ့ ဆိုင်းဘုတ်တွေထောင်ပြီး အမျိုး၊ ဘာသာ၊ သာသနာကို ဗန်းပြပြီး ထကြွသောင်းကျန်းနေတဲ့အုပ်စုတွေကို “မပြေး သော်လည်း ကန်ရာရှိ” ဆိုတဲ့စကားလို အခိုင်အမာ ညွန်ပြနေပါတယ်။

ဒီလိုဆိုရင် တရားခံအစစ်ဟာ ဒီအကောင်ပါပဲလို့ ဂုတ်ဆွဲပြီး ဒီချုပ်ပါတီအစိုးရက ဖော်ထုတ်ပြသနိုင်မှာလား။ ဒီလိုဖော်ထုတ်ပြသ နိုင်ဖို့ မလွယ်ကူဘူး၊ မဖြစ်နိုင်ဘူးလို့ ယူဆကြပါတယ်။ ဘာကြောင့်လဲ။

အချက် ၄ချက်ကို မူတည်ပြီး ပြောရတာပါ။
ပထမအချက်က ဒီချုပ်ပါတီအစိုးရ ကိုင်စွဲထားတဲ့ ပြန်လည်သင့်မြတ်ရေးသဘောထားကြောင့် ဖြစ်ပါတယ်။
ဒုတိယအချက်က “လက်တို အရိုးမျက်” ဆိုတဲ့စကားလို ဒီချုပ်ပါတီအစိုးရအဖို့ လည်ချောင်းထဲမှာ မျက်နေတဲ့ အရိုးကို နှိုက်ကော် ထုတ်ယူဖို့ လက်တံ အင်မတန်မှ တိုလွန်းပါတယ်။ အဲဒီလိုလက်တံယန္တရားတွေ ဒီချုပ်ပါတီအစိုးရထက်ထဲမှာ မရှိပါဘူး။ ကိုင်မ ထားနိုင်ပါဘူး။

တတိယအချက်က ဒီလိုအမှုတွေကို ဖော်ထုတ်ဖို့ ဒီချုပ်ပါတီအစိုးရအဖို့ အစိမ်းသက်သက်ဖြစ်တယ်။ ဘာသာရပ်အသစ် ဖြစ်ပါ တယ်။ ဒီဘာသာရပ်ကို ကျွမ်းကျင်သူတွေ၊ လက်ယဉ်နေသူတွေဟာ “တပ် နဲ့ ရဲ” ပဲ ရှိတယ်။ (စရဖ)တို့၊ (ထလရ)တို့၊ (SB)တို့၊ (CID)တို့ရဲ့ အလုပ်တွေဖြစ်တယ်။ “တပ်နဲ့ ရဲ ပူးပေါင်းဖော်ထုတ်နေကြတယ်”လို့ ပြောနေတယ် မဟုတ်ပါလား။ “ကာကွယ်ရေးနဲ့ ပြည်ထဲရေး” ဆိုတာ အစကတည်းက တစ်သွေးထဲ တစ်သားထဲပါ။ တမိန့်ထဲအောက်မှာ လှုပ်ရှားနေကြသူတွေပါ။


စတုတ္တအချက်က ဒီလိုလုပ်ကြံသတ်ဖြတ်မှုတွေရဲ့ လက်သည်တရားခံအစစ်ကို ဘယ်တုန်းက ဖော်ထုတ်နိုင်ခဲ့တာ ရှိခဲ့ဖူးလို့လဲ ဆိုတဲ့ အနီးအဝေး သမိုင်းအချက်အလက်တွေရဲ့ အတွေ့အကြုံနဲ့သင်ခန်းစာတွေအရ ပြောတာပါ။

တခြားဝေးဝေးမပြောနဲ့ (နဝတ- နအဖ) စစ်ကောင်စီမှာ အတွင်းရေးမှူး ၂ လုပ်သွားခဲ့တဲ့။ ဗိုလ်တင်ဦးနဲ့ သူ့သမီးကြီး ချိုလဲ့ဦး လုပ်ကြံသတ်ဖြတ်ခံရမှုတွေကို ဘယ်မှာဖော်ထုတ်နိုင်ခဲ့လို့လဲ။ ဒါသူတို့ထိပ်ပိုင်းအကောင်ကြီးတွေ အတွင်းစည်းထဲမှာ ဖြစ်ခဲ့တာ ပါ။

“ဒီပဲယင်း လုပ်ကြံသတ်ဖြတ်မှု”ကိုရော တရားခံအစစ် ဖော်ထုတ်နိုင်ခဲ့သလား။ ၂၀၀၈ခုနှစ်၊ မတ်လ၊ ကမာရွတ် စိမ်းလဲ့ကန်သာ မှာ ဖြစ်ပွားခဲ့တဲ့ ၅လောင်းပြိုင်။ ၂၀၁၆ခုနှစ်၊ သြဂုတ်၊ မင်္ဂလာဒုံ၊ ပတ္တမြားမြို့သစ်မှာဖြစ်ပွားခဲ့တဲ့ ၄လောင်းပြိုင်။ ၂၀၁၆ခုနှစ်၊ နိုဝင် ဘာလမှာဖြစ်ပွားခဲ့တဲ့ (M150) ပုလင်းပေါက်ကွဲမှုတွေ။ ၂၀၁၆ ဒီဇင်ဘာမှာဖြစ်ခဲ့ စမ်းချောင်းနိုင်ငံခြားငွေလဲကောင်တာ ဓားပြ တိုက်မှု စတဲ့ ရာဇဝတ်မှုလို နှုတ်ပိတ်တဲ့ အမှုအခင်းတွေတောင် မဖော်နိုင်တာ၊ မပေါ်နိုင်တာ၊ ဦးကိုနီလို နိုင်ငံရေး၊ ဘာသာရေး ရေခံမြေခံရှိတဲ့ လူတစ်ယောက်နိုင်ငံရေးအရ လုပ်ကြံသတ်ဖြတ်ခံရတာနဲ့ပတ်သက်ပြီး တရားခံအစစ်ဖော်ထုတ်ဖို့ဆိုတာ သိထား တဲ့ အချက်အလက်တွေ ဘယ်လောက်ပဲ တိကျခိုင်လုံနေပါစေ။ ဒီအကောင်ပဲလို့ ဂုတ်ဆွဲပြီးဖော်ထုတ်ပြသဖို့ဆိုတာ တကယ် တမ်းကျတော့ မလွယ်ကူနိုင်ပါဘူး။

ပုံပမာ ခိုင်းနှိုင်းရရင် သူကြီးက သတ်မှန်း/ သူကြီးက သတ်ခိုင်းလို့သတ်တယ်ဆိုတာ တရွာလုံးသိပေမယ့် ဘယ်ရွာသားကမှ သူကြီးသတ်ပါတယ်/ သူကြီးကသတ်ခိုင်းပါတယ်လို့ ဘယ်လိုလုပ်ပြီး ဖော်ထုတ်ဝံ့မှာလဲ။ သူကြီးမှန်းသိပေမယ့် သူကြီးနဲ့ သူကြီး အသိုင်းအဝိုင်းကို ဘယ်ရွာသားက လက်ညှိုးထိုးဝံ့မှာလဲ။

“စည်းကမ်းပြည့်ဝတဲ့ ဒီမိုကရေစီ” ဆိုတာ သူကြီးက တရွာလုံးကို လွတ်လပ်စွာ မီးတင်ရှို့ခွင့်ရှိပြီး ရွာသူရွာသားတွေကတော့ ဆေးလိပ်မီးတောင် တို့ခွင့်မရှိတဲ့ ဒီမိုကရေစီမျိုးသာဖြစ်ပါတယ်။ ဒါပေမယ့် “လက်သည်တရားခံအစစ်” ဘယ်သူလဲဆိုတဲ့ အချက် နဲ့ အမှန်တရားဟာ ပြည်သူတွေအကြား တီးတိုးပြန့်နှံ့နေမှာ၊ ပြောဆိုနေကြမှာတော့ သိပ်ကို သေချာပါတယ်။ “အမှန်တရား” ဆို တာ ပြည်သူတွေအကြားမှာပဲ ရှိတာလေ။ “မုသား” ဆိုတာ အုပ်စိုးသူတွေရဲ့အရိုးမရှိတဲ့ လျှာဖျားပေါ်မှာ။

နိုင်ငံရေးလုပ်ကြံသတ်ဖြတ်မှုဆိုတာ လွတ်လပ်ရေးမရခင်ကလည်း ကြုံခဲ့ရပြီ (ဗိုလ်ချုပ်အောင်ဆန်းတို့ လုပ်ကြံခံရမှု – နယ်ချဲ့သ မား လက်ချက်မှန်း သိကြတယ်) လွတ်လပ်ရေးရပြီးတဲ့နောက် (ဖဆပလ) အစိုးရရဲ့ “ပါလီမန်ဒီမိုကရေစီ” စနစ်အောက်မှာ လည်း မင်းလှလေးလောင်းပြိုင်၊ ငါန်းဇွန်လူသတ်မှု၊ ပအိုဝ်းအမတ်ဦးအောင်သာသတ်မှု၊ မြိတ်မပို စတဲ့ သတ်ဖြတ်မှုတွေ ပုံစံမျိုးစုံ နဲ့ ကြုံခဲ့ရပြီးပါပြီ။ တော်လှန်ရေးကောင်စီခေတ်၊ (မဆလ)ခေတ်၊ (နဝတ-နအဖ) ခေတ်မှာလည်းကြုံခဲ့ကြရဖူးပြီ။ “ပြောင်းလဲနေ ပြီ” ပြောဆိုနေတဲ့ကြ “စည်းကမ်းပြည့်ဝတဲ့ ဒီမိုကရေစီခေတ်”၊ တရားဥပဒေစိုးမိုးရေး ဂါထာရွတ်သလို ရွတ်နေကြတဲ့ခေတ်မှာ လည်း လက်တွေ့ ကြုံနေကြရပြီ။

ဒါကြောင့် “စစ်မှန်တဲ့လုံခြုံရာ”၊ “စစ်မှန်တဲ့ ငြိမ်းချမ်းရာ” ဆိုတာဟာ အသက်ဇီဝ လုံးဝချုပ်ငြိမ်းသွားတာကို ကဗျာဆန်ဆန် ပြော တာပဲဖြစ်လိမ့်မယ်လို့ ယူဆမိပါတယ်။ အသက်ရှင်သန်လှုပ်ရှားနေတဲ့ လက်တွေ့ဘဝထဲမှာ စစ်မှန်တဲ့လုံခြုံမှုနဲ့ ငြိမ်းချမ်းမှုက ကမ္ဘာ့ ဘယ်နေရာမှာများ ရှိနေပါသလဲ။

သာမန်လူတွေဟာ အတိဒုက္ခနဲ့ ကြုံရတာမှာပဲဖြစ်ဖြစ်၊ ဘေးအန္တရာယ်တစ်ခုခုကို ရင်ဆိုင်ရတာမှာပဲဖြစ်ဖြစ် မိမိယုံကြည်ရာ အား ကိုးရာ အရှင်သခင်၊ ခေါင်းဆောင်၊ ဆရာသမားရဲ့ နွေးထွေးကြင်နာတဲ့ ဖေးမကူညီမှုကို မျှော်လင့်တတ်ပါတယ်။ တောင်းခံတတ် ပါတယ်။ ရယူလိုတတ်ကြပါတယ်။ ဒီလို တောင်းဆိုတာ၊ မျှော်လင့်တာဟာ သဘာဝကျပါတယ်။ တရားမျှတပါတယ်။

ကြီးကျယ်တဲ့ အရှင်သခင်တွေ၊ ခေါင်းဆောင်တွေ၊ ဆရာသမားတွေရဲ့ မြင့်မြတ်တဲ့ဉာဏ်ပညာနဲ့ ကြီးမားတဲ့ သည်းခံနိုင်စွမ်းတွေ ဟာ တခါတလေမှာ သာမန်လူတွေအတွက် ရက်စက်သော စိမ်းကားမှုတွေအဖြစ် ပြောင်းလဲသွားတတ်ပါသလား။

စစ်မှန်တဲ့ လုံခြုံမှုနဲ့ စစ်မှန်တဲ့ငြိမ်းချမ်းမှုဆိုတာ စစ်မှန်တဲ့ပြည်သူ့ခေတ်ကို တည်ဆောက်နိုင်တဲ့အခါမှသာ ပေါ်ထွန်းလာနိုင်မှာပါ။

(မောင်ကျော်စွာ) ကေအိုင်စီ
http://kicnews.org


ဖေဖော်ဝါရီလ ၁၀ ရက်နေ့တွင် ကျင်းပသော ပြည်သူ့လွှတ်တော် အစည်းအဝေး တွင် ရသေ့တောင် မဲဆန္ဒနယ်မှ ဒေါ်ခင်စောဝေက တစ်ဖက်နိုင်ငံမှ ထုတ်လုပ်သော တယ်လီဖုန်း (Sim Card) များ မောင်တော၊ ဘူးသီးတောင် မြို့နယ်များ၌ တွင်ကျယ်စွာသုံးစွဲနေခြင်းကို တားဆီးအရေးယူပေးရန် အစီအစဉ် ရှိ/မရှိ မေးမြန်းခဲ့သည်။

မေးခွန်းနှင့် စပ်လျဉ်း၍ ပြည်ထဲရေး ဒု-ဝန်ကြီး ဗိုလ်ချုပ်အောင်စိုးက တစ်ဖက်နိုင်ငံမှ တယ်လီဖုန်း(Sim Card)များ သုံးစွဲနေမှုအပေါ် တည်ဆဲဆက်သွယ်ရေး ဥပဒေများအရ အရေးယူနိုင်ခြင်း မရှိသေးကြောင်း၊ ရခိုင်ပြည်နယ်၊ မောင်တောဒေသသည် ဘင်္ဂလားဒေ့ရ်ှနိုင်ငံနှင့် နယ်နိမိတ်ထိစပ်လျက်ရှိရာ နေထိုင်သူအများစုသည် ဘင်္ဂါလီ လူမျိုးများဖြစ်ပြီး တစ်ဖက်နိုင်ငံရှိ နေထိုင်သူများနှင့် အလွယ်တကူ ဆက်သွယ် ပြောဆိုနိုင်ရန် တစ်ဖက်နိုင်ငံ၏ မိုဘိုင်းဖုန်း(Sim Card)များကို တရားမဝင် သုံးစွဲလျက်ရှိကြပါကြောင်း၊ ထိုသို့သုံးစွဲမှုများကြောင့် မြန်မာနိုင်ငံ လုံခြုံရေးနှင့် တရားဥပဒေ စိုးမိုးရေးကို ထိခိုက်နိုင်သည့်အတွက် မြန်မာနိုင်ငံ ရဲတပ်ဖွဲ့အနေဖြင့် ပို့ကုန်သွင်းကုန်ဥပဒေ ပုဒ်မ ၈ ဖြင့် အရေးယူဆောင်ရွက်ခဲ့ရာ မောင်တောခရိုင်အတွင်း ၂၀၁၄ ခုနှစ်တွင် ၈၁ မှု၊ ၂၀၁၅ ခုနှစ်တွင် ၈၄ မှု၊ ၂၀၁၆ ခုနှစ်တွင် ၂၂ မှု စုစုပေါင်း ၁၈၇ မှု တရားခံ ၁၈၇ ဦးကိုလည်း ဖမ်းဆီးအရေးယူခဲ့ပါကြောင်း ပြန်လည် ဖြေကြားခဲ့သည်။

မောင်တောခရိုင် နယ်မြေအတွင်း လုံခြုံရေးနှင့် တရားဥပဒေ စိုးမိုးရေးအတွက် တစ်ဖက်နိုင်ငံမှ ထုတ်လုပ်သော (Sim Card)များ တရားမဝင် အသုံးပြုနေမှုကို တားဆီးနိုင်ရန် မြန်မာနိုင်ငံ ရဲတပ်ဖွဲ့အနေဖြင့် ခရိုင်၊ မြို့နယ်၊ ရပ်ကွက်/ကျေးရွာ အုပ်ချုပ်ရေး အဖွဲ့အစည်းများ၊ ဌာနဆိုင်ရာများနှင့်ပေါင်းစပ်ပြီး သတင်းဖော်ထုတ် ဖမ်းဆီးခြင်းများကို အရှိန်အဟုန်မြှင့် ဆောင်ရွက်လျက်ရှိပါကြောင်းလည်း ဖြေကြားခဲ့ကြောင်း သိရသည်။

The Ladies News
https://www.facebook.com/News.TheLadies

  ၂ဝ၁၆ ဇန်နဝါရီလက ရန်ကုန်တွင် တွေ့ရသော ရှေ့နေ ဦးကိုနီ (ဓာတ်ပုံ - ဖြိုးသီဟချို/ Myanmar Now)
ခုတလောအတော်ကလေးသတင်းကြီးနေတဲ့ ဦးကိုနီလုပ်ကြံမှုမှာ လုပ်ကြံသူ ဦးကြည်လင်းရဲ့ နောက်ကွယ်က ကွင်းဆက်တစ်ခုအဖြစ် ပစ်မှတ်ထားနေကြတဲ့ ဦးအောင်ဝင်းဇော်ကို စတင်ဖော်ထုတ် ပေးခဲ့သူ ဦးအောင်စိုးဟာ တကယ့်ဟီးရိုးကြီးတစ်ယောက်လို ဖြစ်နေရာက တချို့သော သတင်းစာ၊ ဂျာနယ်၊ မီဒီယာများက “ဖော်ကောင်”ဆိုတဲ့ ဝိသေသနဲ့ ဂုဏ်တင်ချီးပလိုက်ကြတဲ့အတွက် သူဟာ နေရင်းထိုင်ရင်း လူသတ်တရားခံများနဲ့ အတူပူးပေါင်းပါဝင်သူ ရာဇဝတ်ကောင်တစ်ဦးဘဝကို ရောက်ရှိ သွားရပါတော့တယ်။ ဥပဒေနယ်ပယ်သားများလည်း ဘာမှန်းမသိဘဲ မျက်စိလည်သွားရပါတယ်။

ဖော်ကောင်အောင်စိုး. . . တဲ့။

ဟုတ်မှ ဟုတ်ရဲ့လား။ သေချာပြန်ဖတ်တော့မှ “ စာဖတ်သူများအားပိုမိုဆွဲဆောင်နိုင်ရန် ရည်ရွယ်ခြင်းသာ ဖြစ်ပါသည်” ဆိုကိုး။ ဖြစ်မှဖြစ်ရလေ။ နိုင်ငံကျော်လုပ်ကြံမှုကြီးနဲ့ ပတ်သက်ပြီးအရေး ကြီး သတင်းကိုဖော်ထုတ်ပေးခဲ့တဲ့ ဦးအောင်စိုးက ဦးကြည်လင်း၊ ဦးအောင်ဝင်းဇော်တို့နဲ့အတူ လုပ်ကြံမှု ကြီးကို အတူတကွ ပူးပေါင်းကျူးလွန်ခဲ့တဲ့ ရာဇဝတ်သားဖြစ်သွားရတာပါကလား။

အဓိကပြဿနာက ဒီသတင်းဆောင်းပါးကို ရေးသားသူ၊ တည်းဖြတ်သူများက “ဖော်ကောင်”ရဲ့ အဓိပ္ပာယ်နဲ့ ဥပဒေပြဋ္ဌာန်းချက်တွေကို မသိဘဲ ရမ်းကြိတ်လိုက်ကြတာပါပဲ။

“ဖော်ကောင်”ဆိုတဲ့ ဝေါဟာရကိုအင်္ဂလိပ်လို 'State's Evidence' လို့ သုံးနှုန်းပြီး “ဖော်ကောင် လုပ်” ဆိုတဲ့ဝေါဟာရကိုတော့ 'Turn State's Evidence' လို့ သုံးပါတယ်။ အစိုးရသက်သေ၊ ကြံရာပါ သက်သေအဖြစ် တရားဝင်ဥပဒေသုံးစကားနဲ့ သုံးနှုန်းကြပါတယ်။ သက်သေခံဥပဒေပုဒ်မ-၃၃ မှာ ကြံရာပါသက်သေနဲ့ ပတ်သက်ပြီးအသေးစိတ် ပြဋ္ဌာန်းထားပါတယ်။ အဓိကလိုရင်းအချက်ကတော့ ကြံရာပါသက်သေ(ဝါ)ဖော်ကောင်ဆိုတာ ပြစ်မှုကျူးလွန်ရာမှာအတူပါဝင်သူ၊ တရားခံနဲ့အတူ တရားစွဲ ဆိုခြင်းခံရနိုင်သူ၊ ကျူးလွန်တဲ့ပြစ်မှုမှာတနည်းနည်းနဲ့ ပါဝင်သူကိုသက်သေအဖြစ်စစ်တဲ့အခါ ထွက်ဆို ပေးသူကိုဆိုလိုတာပါ။ တရားခံကျူးလွန်သောပြစ်မှုနဲ့ ပတ်သက်ပြီးလုံးဝသက်ဆိုင်ခြင်းမရှိသူဟာ ကြံရာပါသက်သေ (ဝါ) ဖော်ကောင်မဟုတ်ပါ။

ကဲ… “ဖော်ကောင် အောင်စိုး” လို့ ပြူးတူးပြဲတဲ လုပ်ချလိုက်ပုံကြီးက အမှားမကြီး၊ တာဝန်မကြီး လွန်းပေဘူးလား။ မသိရင် သိအောင်မေးပြီးမှ ရေးသင့်တဲ့ ဝေါဟာရမျိုးကို လက်လွတ်စပယ် ရမ်းကြိတ် လိုက်တာကြောင့် အကုန်လွဲကုန်ရောဗျ။

“ဖော်ကောင်” ဘာလို့ လုပ်ကြသလဲ။ ပြစ်ဒဏ်လွတ်ငြိမ်းချမ်းသာခွင့်ရကြလို့ပါ။ ရာဇဝတ်ဆိုင် ရာ ကျင့်ထုံးဥပဒေပုဒ်မ ၃၃၇(ခ)မှာအတိအလင်း ပြဋ္ဌာန်းထားပါတယ်။ ကြံရာပါသက်သေ(ဝါ) အစိုးရ သက်သေ(ဝါ) ဖော်ကောင်တစ်ဦးက ပြစ်မှုနဲ့ပတ်သက်လို့၊ ပြစ်မှုကျူးလွန်ရာမှာအတူပါဝင်ကြသူများနဲ့ ပတ်သက်လို့၊ သူသိသမျှ အကြောင်းခြင်းရာအလုံးစုံကိုမချွင်းမချန် အမှန်အတိုင်းဖော်ထုတ်ပြောပြရ မယ်ဆိုတဲ့ စည်းကမ်းချက်နဲ့ အစစ်ခံထွက်ဆိုခဲ့ရင် သူ့ကို ပြစ်ဒဏ် လွတ်ငြိမ်းချမ်းသာခွင့် ပေးနိုင်ပါ တယ်။

အဲဒီတော့ ဦးအောင်စိုးက “ဖော်ကောင်အောင်စိုး” မဟုတ်ဘူးဆိုတာ ရှင်းနေတာပဲ မဟုတ်လား။ “ဖော်ကောင်အောင်စိုး”လို့ သတင်းစာ၊ ဂျာနယ်စာမျက်နှာပေါ်ကနေတလွဲကြီးတွေ ကြိတ်နေကြတဲ့ အတွက် ကိုအောင်စိုးအဖို့လည်းနစ်နာ၊ နောင်အလားတူပြစ်မှုကြီးတွေနဲ့ ပတ်သက်ပြီး သတင်းပေးချင်ပေမယ့် “ဖော်ကောင်” ဂုဏ်ပုဒ်ကြီးကြောက်လို့ သတင်းမပေးကြရင် အားလုံးနစ်နာကြ ရမှာပါ။

သတင်းမီဒီယာသမားကအသိကြီး၊ သတိကြီးရပါတယ်။ “မသိမေးမစင်ဆေး” လုပ်ဖို့ မရှက်မ ကြောက်ရပါဘူး။ ထင်ရာစွတ်မကြိတ်ကြဖို့ လက်တို့လိုက်ပါရစေခင်ဗျာ။

စာရေးသူဦးခင်မောင်မြင့် (ခေါ်) ဇေယျမင်းသျှင်သည် အကျဉ်းဦးစီးဌာန ထောင်မှုးကြီးဟောင်း ဖြစ်ပြီး၊ ယခုအခါ စာရေးဆရာ၊ ဥပဒေအကြံပေးအနေဖြင့် လုပ်ကိုင်လျက်ရှိသည်။ ၄င်းရေးသားသည့် ထောင်ဝတ္ထုတစ်ပုဒ်ဖြစ်သော “မျက်ရည်ပွင့်ပုံပြင်” စာအုပ်ကို လွန်ခဲ့သည့်လက ပုံနှိပ်ထုတ်ဝေခဲ့သည်။
Mizzima - News in Burmese

နိုင်ငံတော်အတိုင်ပင်ခံပုဂိုလ် ဒေါ်အောင်ဆန်းစုကြည်နဲ့ တိုင်းရင်းသားလူငယ်များရဲ့ ဖေဖော်ဝါရီ ၁၂ရက် ပင်လုံ ငြိမ်းချမ်းရေးစကားဝိုင်းကို မြန်မာ့ရုပ်မြင်သံကြားနဲ့ အတိုင်ပင်ခံရုံးဖေ့စ်ဘွတ်တို့ကနေ တိုက်ရိုက်ထုတ်လွှင့် ပြသမှာဖြစ်ပါတယ်။

မနက် ၉ နာရီ မိနစ် ၂၀ ကစလို့ တိုက်ရိုက်ထုတ်လွှင့်ပြသမှာဖြစ်ပြီး ပင်လုံစာချုပ်လက်မှတ်ထိုးတုန်းက ဗိုလ်ချုပ်အောင်ဆန်း စာထိုင်ဖတ်ခဲ့တဲ့ ညောင်ပင်အောက်မှာ ငြိမ်းချမ်းရေးစကားဝိုင်း လုပ်မှာ ဖြစ်ပါတယ်။

၂၀၁၇ ခုနှစ် နှစ်ဆန်းပိုင်းမှာ ဒေါ်အောင်ဆန်းစုကြည်နဲ့ တိုင်းရင်းသားလူငယ်များရဲ့ ငြိမ်းချမ်းရေးစကားဝိုင်းကို နေပြည်တော်မှာ ပထမအကြိမ်လုပ်ခဲ့ပြီး အခု ရှမ်းပြည်နယ်၊ ပင်လုံမှာ ပြည်ထောင်စုနေ့ ပြုလုပ်မှာ ဖြစ်ပါတယ်။
DVB TV News



ဂျပန် ဝန်ကြီးချုပ် (ဝဲ) နဲ့ ကန်သမ္မတ ( ယာ )
အမေရိကန် သမ္မတသစ် ဒေါ်နယ်ထရမ့် နဲ့ ဂျပန်ဝန်ကြီးချုပ် ရှင်ဇိုအာဘေး တို့ တွေ့ဆုံခဲ့ကြပြီးတော့ လုံခြုံရေး နဲ့ စီးပွားရေး ဆိုင်ရာ ကိစ္စရပ် ကိုအဓိက ထားပြီး ဆွေးနွေး ခဲ့ကြပါတယ်။

ထရမ့် သမ္မတ တာဝန်ယူပြီး နောက်ပိုင်း ပထမဆုံး နိုင်ငံခြား ခေါင်းဆောင်က ဗြိတိန် ဝန်ကြီးချုပ် ထရီဇာမေ ဖြစ်ပြီး အခု ဂျပန် ဝန်ကြီးချုပ် ဟာ ဒုတိယမြောက် နိုင်ငံခြား ဧည့်သည်တော် ဖြစ်ပါတယ်။

သမ္မတ ထရမ့်က ဂျပန်ရဲ့လုံခြုံရေးအတွက် သူတို့ကူညီဖို့ရာ စိတ်ပိုင်းဖြတ်ပြီးဖြစ်ကြောင်း အာမခံ ပြောကြားခဲ့ သလို နှစ်နိုင်ငံ မဟာမိတ်ဖြစ်မှုက ပိစိဖိတ်ဒေသအတွင်း လုံခြုံရေးအတွက် အခြေခံအုတ်မြစ်ပဲလို့လည်း ဆိုပါတယ်။

ဒါ့အပြင် အမြောက်ကိုရီးယား ရဲ့ နျူကလီယားခြိမ်းခြောက်မှု အရေး ကြီး ကိစ္စအဖြစ်ထားတယ်လို့ လည်း သူ က ပြောပါတယ်။

နှစ်နိုင်ငံကြား ကုန်သွယ်ရေး ကိစ္စတွေမှာတော့ မျှတမှုလိုတယ် လို့ သူကတောင်းဆိုထားပြီး ဂျပန်ဝန်ကြီးချုပ်ရှင်ဇို အာဘေးကလည်း နှစ်ဘက်ကြား ဆက်ဆံဆောင်ရွက်မှုတွေရဲ့ ခေတ်သစ် ကို ရှာဖွေနိုင်မယ်၊ နှစ်နိုင်ငံကြား စီးပွားဆက်ဆံရေးကို အားကောင်းအောင်လုပ်ဖို့ အလေးထားကြောင်း ပြောပါတယ်။

ဂျပန်အနေနဲ့ မနှစ်က အမေရိကန်မှာ ဒေါ်လာ ဘီလီယံ ၁၅၀ လောက် ရင်းနှီး မြုပ်နှံ ထားပြီး အဲဒီ ကနေ အမေရိကန်တို့ရဲ့ အလုပ်အကိုင်အများအပြားကို ဖန်တီးပေးထား ပါတယ်လို့ သူက ဆိုပါတယ်။

နှစ်ဖက်အကျိုးများစေရေး သူ က ပြောရင်း အမြန်ရထားစီမံကိန်းအပါအဝင် အခြေခံအဆောက်အအုံ စီမံကိန်းတွေ သမ္မတ ထရမ့် ကလုပ်မယ်လို့ သူယုံကြည်ထားကြောင်းလည်း ပြောပါတယ်။

အရင်တုန်းက မက္ကဆီကို ဖက်မှာ တိုယိုတာ ကားကုမ္ပဏီ တည်ထောင်မယ့် စီမံချက်ကို အဲဒီအချိန် က သမ္မတလောင်းအဖြစ် အရွေးခံဖို့ပြင်နေတဲ့ မစ္စတာ ထရမ့်က အဲလိုလုပ်လို့မရဘူး၊ အမေရိကန်မှာ လာထောင်ရင် ထောင်၊ မထောင်ရင်အမေရိကန် ဆီကို အဲဒီ မက္ကဆီကို က တိုယိုတာတွေသွင်းလာရင် အခွန်တွေ အများကြီးတိုးကောက်မယ် လို့ သတိပေးခဲ့တာ ဖြစ်ပါတယ်။

အမေရိကန်နဲ့ ဂျပန်မှာ အမေရိကန် က ကုန်သွယ်ရေးလိုငွေ ပြတဲ့အရေးနဲ့ ပတ်သက်လို့လည်း ဂျပန်ဟာ သူ့နိုင်ငံက ပြည်ပကို ထုတ်လုပ်တင်သွင်းသူတွေဟန်ကျ အသာရအောင် ယန်းငွေ ဈေးကို တမင်ချထားတာလို့ လည်း စွပ်စွဲ ခဲ့ဘူးတာ ဖြစ်ပါတယ်။

အခုတော့ အမေရိကန်နဲ့ ဂျပန်အကြား အရင်အတိုင်း လုံခြုံရေး ဆိုင်ရာ စီးပွားရေးဆိုင်ရာ မဟာမိတ် ပုံစံ နဲ့ ဆက်လက် လက်တွဲမယ့် လက္ခဏာတွေကို သေချာအောင် ပြသနေပါတယ်။

BBC Burmese
http://www.bbc.com/burmese



ရွှေ့ပြောင်းလာသူများ။
အရှေ့အလယ်ပိုင်းဒေသနဲ့ အာဖရိကဦးချိုဒေသအပါအဝင် မူဆလင် အများစုနေထိုင်တဲ့ နိုင်ငံ ၇ နိုင်ငံက နိုင်ငံသားတွေ အမေရိကန်နိုင်ငံတွင်း ဝင်ရောက်ခွင့် ယာယီပိတ်ပင်တဲ့ အငြင်းပွါးဖွယ် အမိန့်အတွက် သမ္မတ Trump လက်မှတ်ရေးထိုး မထုတ်ပြန်ခင်တုန်းက ဥရောပနိုင်ငံတွေမှာ ကောက်ယူခဲ့တဲ့ စစ်တမ်းတွေကို ကြည့်ရင် မူဆလင် အများစုနေထိုင်ရာ နိုင်ငံတွေက ရွှေ့ပြောင်းဝင်ရောက်လာမယ့် သူတွေနောက်ထပ် သူတို့နိုင်ငံထဲ ဝင်ရောက်လာမှာကို ဥရောပနိုင်ငံသား အများစုက လက်မခံကြောင်း တွေ့ရပါတယ်။

မူဆလင်အများစု နေထိုင်တဲ့ နိုင်ငံတွေကနေ လာရောက် ရွှေ့ပြောင်းအခြေချမှာကို လူတန်းစားမျိုးစုံက အတော်စိုးရိမ်ကြတယ် ဆိုတာကို စစ်တမ်း အချက်အလက်တွေက ပြနေတယ်လို့ Chatham House ဗြိတိသျှ သုတေသနအဖွဲ့က ဆန်းစစ်လေ့လာသူတွေက ပြောပါတယ်။ စစ်တမ်းကောက်ယူမှုကနေ ဥရောပ ဆယ်နိုင်ငံက လူအတော်များများက သူတို့နိုင်ငံတွေထဲ မူဆလင် အများစုနေထိုင်တဲ့ နိုင်ငံတွေက လူတွေ နောက်ထပ် ရွှေ့ပြောင်း ဝင်ရောက်မှုကို ရပ်ဆိုင်းစေချင်ကြောင်း တွေ့ရတာ ဖြစ်ပါတယ်။

အခုလို မူဆလင်တွေ နောက်ထပ် ရွှေ့ပြောင်းဝင်ရောက်မှုကို လက်မခံကြတဲ့ ပုံစံအမျိုးမျိုးတွေ့ရပြီး အသက်အရွယ်၊ ပညာအရည်အချင်း အလိုက် ကွာခြားတာ တွေ့ရတယ်လို့ Chatham House ကပြောပါတယ်။ ပင်စင်စားတွေနဲ့ အသက်ကြီးတဲ့ ဥရောပသားတွေက ပြင်းပြင်းထန်ထန် ကန့်ကွက်ချိန်မှာ အသက် ၃၀ အောက်တွေက သိပ်မဆန့်ကျင်ကြ သလို အထက်တန်းအောင်တွေထဲက ၅၉ % က ကန့်ကွက်ကြပေမယ့် ကောလိပ်ပညာတတ်တွေထဲက ထက်ဝက်လောက်ကပဲ ကန့်ကွက်ကြတာပါ။ ဒါ့အပြင် ကျေးလက်တွေမှာ နေသူတွေက မြို့ပြနေသူတွေထက် ဒီရွှေ့ပြောင်းအခြေချသူတွေကို လက်မခံချင်ကြတာ တွေ့ရပါတယ်။

အခုလို အသက်အရွယ်၊ နေရာဒေသနဲ့ ပညာရေးအလိုက် ကွဲပြားမှုတွေကို ကြည့်ရင် ပြီးခဲ့တဲ့နှစ်တုန်းက ဗြိတိန်နိုင်ငံ အီးယူ ဥရောပကနေ ခွဲထွက်ဖို့ ဆန္ဒရှိမရှိ ကောက်ယူတဲ့ စစ်တမ်းနဲ့ တူနေတာ တွေ့ရပါတယ်။ ဥရောပ ဆယ်နိုင်ငံမှာ ကောက်ခံတဲ့ စစ်တမ်းကို ခြုံကြည့်မယ်ဆိုရင် မူဆလင် ရွှေ့ပြောင်းအခြေချသူတွေကို နောက်ထပ် လက်မခံချင်သူက ၅၅ ရာခိုင်နှုန်း ရှိနေပါတယ်။

  ဗွီအိုအေ (မြန်မာပိုင်း)
http://burmese.voanews.com


မကြာသေးသောကာလက မြန်မာပြည်တပြည်လုံးလိုလို လှုပ်လှုပ်ခတ်ခတ်ဖြစ်ခဲ့ကြသည်။ လွတ်လပ်ရေး ခေါင်းဆောင် အမျိုးသားခေါင်းဆောင် ဗိုလ်ချုပ်အောင်ဆန်း အတ္ထုပ္ပတ္တိကို ရုပ်ရှင်ရိုက်မည်ဟုဆို၍ တပြည်လုံးဝမ်းသာအားရဖြစ်ခဲ့ကြသည်။ ငွေကြေးအကုန်အကျခံမည့်သူတွေပေါ်လာသည်။ ရုပ်ရှင် ကုမ္ပဏီကို အလကားပေးမည့်သူတွေ ပေါ်လာသည်။ မြန်မာနိုင်ငံမှာ ထိပ်တန်းဆိုသည့် ရုပ်ရှင်သမား၊ စာပေသမားများက ဇာတ်ညွှန်းတွေရေးကြ၊ သရုပ်ဆောင်တွေရွေးကြသည်။ လူတွေကလည်း ထိုသရုပ်ဆောင် မည့်သူတွေကို စိတ်ဝင်စားကြသည်။ ဗိုလ်ချုပ်အောင်ဆန်းအဖြစ် သရုပ်ဆောင်မည့်သူက အခရာအကျဆုံး။

ဤဇာတ်ကားတွင် အဓိကအကျဆုံး၊ အခရာအကျဆုံး ဗိုလ်ချုပ်အောင်ဆန်းအဖြစ် သရုပ်ဆောင်မည့်သူတွေ ထဲမှာ ''ကျော်ကျော်မျိုး''ဆိုသူကို ရွေးချယ်လိုက်သည့်အခါ အတော်ပင် ၀မ်းသာသွားကြသည်။ ကျော်ကျော်မျိုး ကိုယ်တိုင်ကလည်း ဗိုလ်ချုပ်အောင်ဆန်းအပေါ် အထူးလေးစားကြည်ညိုစိတ်ရှိသည်။ ပြီးတော့ သူ့ရုပ်ကလည်း ဗိုလ်ချုပ်အောင်ဆန်းနှင့် အလွန်နီးနီးကပ်ကပ်တူသည်။ ဒီတော့ သရုပ်ဆောင်ပညာကို သူကြိုးစားမည်။ လက်ရှိ ကမ္ဘောဇဘောလုံးအသင်းမှာ လက်ရွေးစင်။ ဘောလုံးသမားအဖြစ် ထိုက်တန်သည့် လစာလည်း ရထားသည်။

သို့သော် ဗိုလ်ချုပ်ရုပ်ရှင်အတွက် သရုပ်ဆောင်အရွေးချယ်ခံရသည်ဆိုကတည်းက သူ့ဝါသနာ၊ သူ့အားကစား ပညာများကို စွန့်လွှတ်လိုက်သည်။ ဆိုရလျှင်တော့ သူ့မှာ အတည်တကျဖြစ်နေသောဘ၀ တခုလုံးကို ဗိုလ်ချုပ်ရုပ်ရှင်အတွက် မြှုပ်နှံလိုက်သည်။

လူဆိုတာ မျှော်လင့်ချက်နှင့်အသက်ရှင်ရခြင်းပါ။ ယခု ဗိုလ်ချုပ်ရုပ်ရှင် ဘယ်ဆီရောက်နေပြီလဲ။ မေ့ပျောက်ခံနေရလေပြီ။ သို့သော် ကျော်ကျော်မျိုးကတော့ ယနေ့ထိတိုင်မျှော်လင့်နေဆဲ။
ကမ္ဘာမှာ အတ္ထုပ္ပတ္တိရုပ်ရှင်ကားတွေ ဟောလီဝုဒ်ကရိုက်ခဲ့တာတွေ အတော်လေးရှိပါသည်။ အိုင်ယာလန် သူပုန်ခေါင်းဆောင် မိုက်ကယ်ကောလင်း၊ တရုတ်နောက်ဆုံးဧကရာဇ်ပုယီ၏ ‘The Last Emperor’ အိန္ဒိယ လွတ်လပ်ရေးခေါင်းဆောင်၊ အကြမ်းမဖက်တိုက်ပွဲဝင်သူ'ဂန္ဒီ'စသည့် ကမ္ဘာကျော်ဇာတ်လမ်းများမှာ အထင်ကရရှိသည်။ ဗိုလ်ချုပ်အောင်ဆန်းအကြောင်းကိုလည်း အကယ်၍ ဟောလီဝုဒ်က ကမ္ဘာကျော် ဒါရိုက်တာ၊ ဇာတ်ညွှန်းဆရာ၊ သမိုင်းအချက် အလက်ရှာဖွေသူများနှင့်သာ ရိုက်မည်ဆိုလျှင် ကမ္ဘာကျော် ဇာတ်ကားတကား ဖြစ်လာပါလိမ့်မည်။ ကိုယ့်နိုင်ငံကလူတွေကို အထင်သေး၍ပြောခြင်းမဟုတ်၊ ကိုယ့်နိုင်ငံ မှာကျတော့ ချို့ယွင်းချက်၊ အားနည်းချက်တွေရှိသည်။ ပစ္စည်းကိရိယာမစုံမလင်တာတွေရှိမည်။ ပြီးတော့ ငွေကြေးအလုံးအရင်းသုံးရမည့်နေရာတွေရှိသည်။ ပြီးတော့ ရိုက်ကွင်းရိုက်ကွက်တွေ၊ ဒီတော့ ကိုယ့်တိုင်းပြည် မှာ မဖြစ်နိုင်လျှင် ပြည်ပကထိပ်တန်းရုပ်ရှင်သမားတွေကို အပ်လိုက်လျှင်တော့ . . .
ဟိုတလောကပဲ ကမ္ဘာကျော်မင်းသား ဂရေဂရီပက်နှင့် မြန်မာမင်းသမီး ၀င်းမင်းသန်းတို့ သရုပ်ဆောင်သော ‘Purple Plain’ ရုပ်ရှင်ကားကို ပြန်ကြည့်ရသည်။ ဒါကလည်း မြန်မာပြည်မှာ ရိုက်သည်မဟုတ်။ သီရိလင်္ကာမှာ ရိုက်သည်ဟု သိရသည်။ သို့သော် ရုပ်ရှင်အဖြစ် အဆင့်အတန်းမြင့်သည်။ မြန်မာ့ယဉ်ကျေးမှုနှင့်လည်း လုံးလုံးမဆန့်ကျင်သည့် သဘောသဘာဝများကို ရိုက်ကူးထား၍ အလွန်ကြည့်၍ အရသာရှိပါသည်။
ဒီတော့ ကံအကြောင်းတရားတိုက်ဆိုင်လာလျှင်တော့ ကျော်ကျော်မျိုးသည်လည်း ပြည်ပနိုင်ငံရုပ်ရှင်သမားများ နှင့် ထိပ်တန်းကားတကားဖြစ်သည့် ဗိုလ်ချုပ်အောင်ဆန်းဇာတ်ကားမရိုက်ရဘူးဟု မပြောနိုင်။ လူဆိုသည်မှာ မျှော်လင့်ချက်ဖြင့် အသက်ရှင်နေရခြင်းဖြစ်သည်။ မျှော်လင့်ချက်ရှိဆဲ ကျော်ကျော်မျိုးနှင့် ဗိုလ်ချုပ်ရုပ်ရှင်အကြောင်း၊ သရုပ်ဆောင် အရွေးခံရသည့်အကြောင်းများကို ပြန်ပြောင်းမေးမြန်းလိုက် သည့်အခါ-

မေး- ကိုကျော်ကျော်မျိုးရေ လက်ရှိ ဗိုလ်ချုပ်ရုပ်ရှင်လည်း အစအနပျောက်နေတော့ ဘာလုပ်နေလဲဗျ။

ဖြေ- ဘာမှမလုပ်ဘူးဗျ။ ကျွန်တော့်နေရပ်ဖြစ်တဲ့ မန္တလေးမြစ်ငယ်ကိုပြန်ရောက်နေပါပြီ။ ဗိုလ်ချုပ်ရုပ်ရှင်ဖြစ် မြောက်ရေးနဲ့တော့ တခါတလေ အဆက်အသွယ်ရှိပါတယ်။ ဗိုလ်ချုပ်က ၁၀၂ နှစ်ပြည့်တော့မယ်။ ဗိုလ်ချုပ် ရုပ်ရှင်ရိုက်ကူးရေးကတော့ ဘာမှမထူးသေးပါဘူး။ ထူးရင်ပြောပါမယ်ဗျ။

မေး- ကိုကျော်ကျော်မျိုးက ကမ္ဘောဇအသင်းက လက်ရွေးစင်ဖြစ်တယ်။ ဗိုလ်ချုပ်နေရာက ရွေးချယ်ခံရတော့ ဘောလုံးကစားခြင်းကိုလည်း စွန့်လွှတ်ထားရတယ်။ အခုရော ဘောလုံးကစားခြင်းနဲ့ ပတ်သက်ပြီး လေ့ကျင့်မှု တွေ ရှိသေးလား။

ဖြေ- လက်ရှိ ဘောလုံးကစားရမယ်ဆိုရင် Traning တော့ အမြဲမပြတ်ဘူး။ ကိုယ်တိုင်လုပ်တယ်။ ကျွန်တော်တို့ဘက်မှာ ဘောလုံးပွဲတွေရှိတယ်။ ကိုယ့်အနီးအနားမှာရှိတဲ့ ကလေးတွေကိုလည်း သင်ပေးတယ်။ လေ့ကျင့်မှုကတော့ မပြတ်ပါဘူး။

မေး- ရန်ကုန်ကိုရော မလာဖြစ်ဘူးလားဗျ။

ဖြေ- ရန်ကုန်ကို မလာဖြစ်တာ တော်တော်ကြာပြီဗျ။ ကိုယ့်ဒေသမှာ ကိုယ့်နိုင်တဲ့ ပရဟိတလေးတွေလည်း လုပ်ဖြစ်ပါတယ်။ ထူးထူးထွေထွေ မရှိပါဘူး။

မေး- ကိုကျော်ကျော်မျိုးအနေနဲ့ တကယ်လို့ ဘောလုံးကန်မယ်ဆိုရင်ရော အခုချိန်ကန်နိုင်သေးလားဗျ။

ဖြေ- ဘောလုံးကန်မယ်ဆိုကန်လို့ရတာပေါ့။ ကျွန်တော့်သူငယ်ချင်းတွေတောင် ကန်နေကြတာပဲလေ။ ကျွန်တော်နဲ့ သက်တူရွယ်တူ သူငယ်ချင်းတွေ အခုကန်နေတာပဲလေ။ ကန်လို့ရရင် ကန်ချင်တာပေါ့ဗျာ။ ဒါပေမဲ့ ဟိုအပေါ်မှာပဲ မူတည်တယ်လေ။ ဟိုအပေါ်မှာဆိုတာက ကျွန်တော့်ကို အသင်းကဇာတ် ကားအတွက် ပေးထားတာလေ။ ကျွန်တော့်ဘက်က စပြီး ကန်ချင်ပါတယ်လို့ ပြောလို့မှမရတာ။

မေး- ဗိုလ်ချုပ်ရုပ်ရှင်ကလည်း ခုထိ ဘာမှမသိရသေးဘူး။ ဘောလုံးကန်တာကိုလည်း စွန့်လွှတ်ထား ရတယ်ဆိုတော့ ကိုကျော်ကျော်မျိုးအတွက် ဘယ်လိုအခက်အခဲရှိလဲဗျ။

ဖြေ- ကလပ်အသင်းကတော့ ထောက်ပံ့တယ်။ ဇာတ်ကားကလည်း အဖြူအမည်း မသဲကွဲသေးဘူး။ ဘောလုံး ကန်တာကိုလည်း စွန့်လွှတ်ထားရတယ်ဆိုတော့ အများကြီးတော့ နစ်နာတာပေါ့။ ကျွန်တော်က တခုခုကို ပီပီပြင်ပြင်လုပ်ချင်တာပေါ့။ အားလုံးကတော့ လူကြီးတွေအပေါ်မှာ မူတည်တယ်။ လူကြီးတွေက အသင်းနဲ့ တိုက်ရိုက်ချိတ်ထားတာ သူတို့ဆုံးဖြတ်တဲ့အတိုင်း လက်ခံရမှာလေ။ ကိုယ်က လုပ်လို့မရဘူးလေ။

မေး- လူကြီးတွေက အသင်းနဲ့တိုက်ရိုက်ညှိနှိုင်းထားတာဆိုတော့ လက်ရှိရုပ်ရှင်လည်း မရိုက်ဖြစ်သေးချိန်မှာ ကိုကျော်ကျော်မျိုးကို ဘောလုံးကန်ခွင့်ရအောင် ညှိနှိုင်းပေးမယ်ဆိုရင်ရော ရနိုင်လားဗျ။

ဖြေ- ဘောလုံးပြန်ကစားနိုင်ဖို့ လူကြီးတွေက ညှိနှိုင်းပေးမယ်ဆိုရင်တော့ တော်တော်ကောင်းတာပေါ့။ သူငယ်ချင်းတွေရော၊ ဆရာတွေကပါ အဲလိုတော့ပြောကြပါတယ်။

မေး- ရိုက်ကူးရေးလုပ်ခဲ့တဲ့အချိန်တုန်းက ဘယ်လောက်ကြာကြာရိုက်ကူးခဲ့သေးလဲဗျ။

ဖြေ- ရိုက်ကူးရေးတုန်းက အစမ်းပြမယ့်ဟာလောက်ပဲ ရိုက်ခဲ့ရတာလေ။ ရိုက်တုန်းကတော့ ဘယ်လိုသုံးမလဲ ကျွန်တော်လည်း မသိပါဘူး။ တချို့ဟာတွေ ရိုက်တာရှိသလို ပြန်ရိုက်ရမယ့်ဟာတွေလည်း ရှိပါတယ်။ တခါတလေ ငါးရက်လောက်ရိုက်လိုက် နားလိုက် အဲဒီလိုပဲ သွားတာလေ။

မေး- ဗိုလ်ချုပ်ပုံစံတူရွေးတုန်းက ဘယ်နှခုနှစ်လောက်က ဖြစ်မလဲ။ ရွေးချယ်ရေးမှာ ဘယ်သူတွေပါလဲ။

ဖြေ- စ,စချင်းရွေးတာက ၂၀၁၁ နဲ့ ၂၀၁၂ ကြားလောက်မှာဗျ။ ရွေးချယ်ရေးအဖွဲ့ထဲမှာ ဦးဇာဂနာ၊ ဦးဇော် သက်ထွေး၊ ဦးလူမင်း၊ မကြည်ဖြူရှင်၊ မထွန်းအိန္ဒြာဗိုလ်၊ ဒေါ်အေးခိုင် အများကြီးဗျ။ နောက်ဆုံးအဆင့်မှ ဒေါ်အောင်ဆန်းစုကြည်ကိုယ်တိုင် ရွေးတာပါ။

မေး- ကိုကျော်ကျော်မျိုးနဲ့ သရုပ်ဆောင်မယ့် သူတွေနဲ့ရော ဆက်သွယ်ဖြစ်သေးလား။ သူတို့တွေရော ဘာလုပ်နေကြလဲ။

ဖြေ- ဘာလုပ်နေလဲဆိုတော့ ဖုန်းမဆက်ဖြစ်တာတောင် အတော်ကြာပြီဗျ။ အရင်တုန်းကတော့ ရှိပါတယ်။ ခုနောက်ပိုင်း အဆက်အသွယ်မလုပ်ဖြစ်ဘူး။

မေး- လက်ရှိမှာ နှစ်ခုလုံးစွန့်လွှတ်ထားရတဲ့ အနေအထားဆိုတော့ အနာဂတ်အတွက် ဘယ်လိုပြင်ဆင်ထား သလဲ။

ဖြေ- အနာဂတ်အတွက် ဘာတွေပြင်ဆင်ထားလဲဆိုတော့ ကျွန်တော်က ဘာမှလုပ်လို့ကိုင်လို့မရဘူးလေ။ လက်ရှိအချိန်မှာတော့ ဒီအတိုင်းပဲလေ။ အသင်းကလည်း ထောက်ပံ့ထားတယ်။ ဇာတ်ကားကလည်း မရိုက် ဖြစ်သေးဘူး။

မေး- ဗိုလ်ချုပ်ရုပ်ရှင်က လက်ရှိအချိန်အထိ ဘာကြောင့်မရိုက်နိုင်သေးတာလဲလို့ ထင်လဲ။

ဖြေ- ရုပ်ရှင်ဖြစ်မြောက်ရေးအဖွဲ့အစည်းပေါ်မှာ မူတည်မယ်လို့ ထင်ပါတယ်။ ဗိုလ်ချုပ်ရုပ်ရှင်ဖြစ်မြောက်ရေး ဘုတ်အဖွဲ့နဲ့ပဲ ဆိုင်မှာဗျ။ အခက်အခဲက လူကြီးပိုင်းကပဲ သိမှာ။

မေး- ဒီတော့ ဘုတ်အဖွဲ့ကို မီဒီယာကနေ တခုခုပြောမယ်ဆိုရင် ဘာပြောချင်လဲဗျ။

ဖြေ- မရှိပါဘူး။ ကျွန်တော့်စိတ်မှာ ကျွန်တော် အရင်ကတည်းက ကိုယ့်အပူကို သူများအပူမဖြစ်စေချင်ဘူး။ ကိုယ်လုပ်ခဲ့တဲ့ကိစ္စတခုအပေါ် နောင်တမရပါဘူး။ ကျွန်တော်က စိတ်ရှည်ပါတယ်။ စိတ်လည်း ရှင်းပါတယ်။
အခုလိုဖြေပေးတဲ့အတွက် ကျေးဇူးတင်ပါတယ်ဗျာ။

ကိုခက်
News Watch
https://www.facebook.com/NewsWatchJournal/



နယူးဇီလန်မှာ သောင်လာတင်နေတဲ့ ဝေလငါးတွေ။ (ဖေဖော်ဝါရီ ၁၀-၂၀၁၇)
New Zealand နိုင်ငံက ဝေးလံတဲ့ ပင်လယ်ကမ်းခြေတခုဆီကို အမြောက်အများသောင်တင် လာတဲ့ ဝေလငါးတွေရေထဲပြန်သွားနိုင်အောင် လုပ်အားပေးအများအပြားက သောကြာနေ့က ကူညီကယ်ဆယ်ပေးခဲ့ကြပါတယ်။ South ကျွန်းရဲ့ မြောက်ဖက်စွန်းက Farewell Spit ဆိုတဲ့ ကမ်းခြေပေါ်မှာ ဝေလငါး အကောင် ၄၀၀ ကျော် သောင်တင်နေ တာကို တွေ့ခဲ့ကြပါတယ်။

သောကြာနေ့မနက်ကျမှ တွေ့ကြချိန်မှာ Pilot အမျိုးအစား ဝေလငါး ၇၅% လောက် သေဆုံးနေကြပါပြီ။ ဝေလငါးအကြီးတွေ၊ သားပေါက်လေးတွေရဲ့ အလောင်းတွေကိုလည်းကိုက်ရာချီအဝေးမှာ တွေ့ခဲ့ကြပါတယ်။

အသက်ရှင်နေသေးတဲ့ ဝေလငါး ၁၄၀ လောက်ကို ကယ်ဆယ်နိုင်ဖို့ ဒေသခံတွေ၊ ကမ္ဘာလှည့်ခရီးသွားတွေပါတဲ့ လုပ်အားပေး ရာနဲ့ချီက သောကြာနေ့က ဝိုင်းဝန်းကြိုးစားခဲ့ကြတာပါ။

New Zealand ကမ်းခြေပေါ် ဝေလငါးအမြောက်အများ သောင်တင်တာ အခုတခါ အရေအတွက် အများဆုံးဖြစ်တယ်လို့ Auckland တက္ကသိုလ်က အဏ္ဏဝါ ဇီဝဗေဒပညာရှင်တွေက ပြောပါတယ်။

ဗွီအိုအေ (မြန်မာပိုင်း)
http://burmese.voanews.com

ရှမ်းစစ်ပြေးဒုက္ခသည်များ (၂၀၁၆-နိုဝင်ဘာ)
ရှမ်းစစ်ပြေးဒုက္ခသည်များ (၂၀၁၆-နိုဝင်ဘာ)

မြန်မာနိုင်ငံမှာ ၂၀၁၆ ခုနှစ်အတွင်း လူ့အခွင့်အရေးချိုးဖောက်မှုနှုန်းဟာ အရင်နှစ်ကထက် စာရင် နှစ်ဆနီးပါး မြင့်တက်သွားတယ်လို့ ပြီးခဲ့တဲ့ ရက်ပိုင်းအတွင်း ထုတ်ပြန်လိုက်တဲ့ လူ့အခွင့်အရေးမှတ်တမ်းကွန်ယက်-မြန်မာနိုင်ငံ (ND-Burma)ရဲ့အစီရင်ခံစာ မှာဖေါ်ပြထားပါတယ်။ လူမှုရေးနဲ့ မူးယစ်ဆေးဝါးပြဿနာတွေ၊ ပဋိပက္ခဖြစ်နေတဲ့ တိုင်းရင်းသားဒေသတွေမှာ ဆက်ပြီးဖြစ်နေတဲ့ တိုက်ပွဲတွေ စတဲ့ အကြောင်းအမျိုးမျိုးကြောင့် လူ့အခွင့်အရေးချိုးဖောက်မှုတွေ ပိုပြီးများလာတာဖြစ်တယ်လို့ မြန်မာနိုင်ငံ အမျိုးသား လူ့အခွင့်အရေး ကော်မရှင်ဘက်ကလည်း သုံးသပ်ပါတယ်။ အပြည့်အစုံကို မအင်ကြင်းနိုင်က ဆက်ပြီးပြောပြမှာပါ။

၂၀၁၅ ခုနှစ် မှတ်တမ်းအရ လူ့အခွင့်အရေးချိုးဖောက်မှု ၈၄ မှုရှိခဲ့ရာကနေ ၂၀၁၆ ခုနှစ်အတွင်း တိုင်းနဲ့ ပြည်နယ် ဆယ်ခုအတွင်း လူ့အခွင့်အရေး ချိုးဖောက်မှုပေါင်း ၁၅၄ မှုအထိရှိလာကြောင်း လူ့အခွင့်အရေးမှတ်တမ်း ကွန်ယက်-မြန်မာနိုင်ငံ ရဲ့ အစီရင်ခံစာက ဆိုပါတယ်။

တိုက်ပွဲတွေဖြစ်နေတဲ့ ရှမ်းပြည်နယ်မြောက်ပိုင်းနဲ့ ကချင်ပြည်နယ်မှာ မြန်မာ တပ်မတော်ဘက်က ကျူးလွန်မှုတွေ ပိုပြီးများပြားကြောင်း လူ့အခွင့်အရေး မှတ်တမ်းကွန်ယက်-မြန်မာနိုင်ငံ (ND-Burma)ရဲ့ စီမံအဖွဲ့ဝင် မမွန်းနေလီက ပြောပါတယ်။

" များသောအားဖြင့် စစ်တပ်ဘက်က ကျူးလွန်တာ အများဆုံးဖြစ်တယ်။ အဲ့ဒီ့အထဲမှာမှ ပြည်သူ့စစ်တွေ နောက် ရဲတွေပေါ့ ကျူးလွန်တာတွေရှိပါတယ်။ ပြီးလို့ရှိရင် လက်နက်ကိုင်အဖွဲ့တွေပေါ့နော် ရှမ်းပြည်ဘက်မှာ ဆိုရင်လည်း လက်နက်ကိုင်အဖွဲ့တွေက ချိုးဖောက်တဲ့ကိစ္စတွေလည်း အဲ့လိုမျိုးတွေ တွေ့ရပါတယ်။"

ဒေါ်အောင်ဆန်းစုကြည်ဦးဆောင်တဲ့ NLD အစိုးရဟာ သူတို့လိုချင်တဲ့ ဒီမိုကရေစီအစိုးရလို့ ပြောလို့ရပေမဲ့ အဟန့်အတားတွေ အများကြီးရှိနေတဲ့အပေါ်မှာ လူ့အခွင့်အရေး အခြေအနေ တိုးတက်လာ အောင် ဆောင်ရွက်နိုင်ခဲ့ခြင်း မရှိဘူးလို့ မမွန်းနေလီက ပြောပါတယ်။

ND- Burma ရဲ့ အစီရင်ခံစာပါ အချက်တွေကို အမျိုးသားလူ့အခွင့်အရေးကော်မရှင် ဘက်ကလည်း လေ့လာနေကြောင်း အတွင်းရေးမှူး ဦးစစ်မြိုင်က ပြောပါတယ်။ ဒါပေမယ့် လူ့အခွင့်အရေး ချိုးဖောက်မှု ပိုပြီးများလာတဲ့ အချက်ကိုတော့ သူတို့ လက်ခံကြောင်းနဲ့ လူမှုရေးနဲ့ မူးယစ်ဆေးဝါးပြဿနာတွေ၊ နှစ်ဘက်တိုက်ပွဲတွေဖြစ်နေတဲ့ ကိစ္စတွေဟာ အဓိကအကြောင်းအရာဖြစ်ကြောင်း သူက အခုလိုသုံးသပ်ပါတယ်။

" လူမှုရေးနဲ့ လူတွေရဲ့ နေထိုင်မှုပုံစံကလည်း တော်တော်လေးပြောင်းလာတဲ့အခါကျတော့ အဲ့ဒီ့မှာလည်း လူမှုရေးဆိုင်ရာပြသနာတွေက တော်တော်လေးများလာတာရှိတယ်။ နောက် မူးယစ်ဆေးဝါးပြသနာကလည်း များလာတဲ့အတွက် ဒီမှာလည်း လူ့အခွင့်အရေးနဲ့ပတ်သက်လို့ ထိခိုက်မှုတွေကလည်း များလာတယ်။ နောက် တိုင်းရင်းဒေသတွေမှာလည်း တချို့ဒေသတွေမှာ တိုက်ပွဲတွေက ဖြစ်ပွားနေဆဲ ဖြစ်တဲ့ အတွက် တိုက်ပွဲဖြစ်တဲ့နယ်မြေတွေ ပဋိပက္ခဖြစ်တဲ့ နယ်မြေတွေကတော့ သူ့ရဲ့သဘောသဘာဝအရကို လူ့အခွင့်အရေး ထိခိုက်မှုတွေ ဖြစ်တတ်တဲ့သဘောရှိပါတယ်။ ဆိုတော့ ခုနကပြောတဲ့ များလာတယ်ဆိုတဲ့အနေအထားကတော့ အကြောင်းအမျိုးမျိုးကြောင့်သာ သုံးသပ်ရင် ပိုပြီးတော့ သဘာဝကျတယ်လို့ ကျနော်ကမြင်ပါတယ်။ "

တဖက်မှာလည်း NLD အစိုးရလက်ထက် ပွင့်လင်းမြင်သာမှုရှိလာတဲ့အတွက် အာဏာပိုင်တွေဘက်က လူ့အခွင့်အရေးချိုးဖောက်မှုတွေ၊ လာဘ်စားမှုတွေကို လူမှုကွန်ယက်၊ သတင်းမီဒီယာတွေကနေတဆင့် ထုတ်ဖေါ် တင်ပြခွင့်ရခဲ့တယ်လို့ ကရင်လူ့အခွင့်အရေးအဖွဲ့ တာဝန်ရှိသူတဦးကပြောပါတယ်။

ND-Burma က ထုတ်ပြန်တဲ့ အစီရင်ခံစာထဲမှာ စစ်ဘေးဒုက္ခသည်တွေအပေါ် လူသားချင်းစာနာတဲ့ အကူအညီတွေတားဆီးခံရမှုတွေ၊ လူ့အခွင့်အရေးချိုးဖောက်သူတွေကို အပြစ်ပေးအရေးယူတာမျိုး မရှိတာ၊ ဖိနှိပ်တဲ့ ဥပဒေပုဒ်မတွေ ဆက်ပြီးရှိနေတာတွေကို အဓိကဝေဖန်ထောက်ပြထားပါတယ်။ ဒါအပြင် လူ့အခွင့် ချိုးဖောက်မှုတွေထဲမှာ ညှဉ်းပန်းနှိပ်စက်မှု ၆၇ ခုနဲ့ သတ်ဖြတ်မှု ၂၈ ခု ပါဝင်ပြီး ကချင်၊ ကရင်၊ မွန်၊ သျှမ်း(ရှမ်း)ပြည်နယ်၊ ဧရာဝတီ၊ ရန်ကုန်၊ ပဲခူး၊ မန္တလေး၊ မကွေး၊ တနင်္သာရီတိုင်းစတဲ့ တိုင်းဒေသကြီးအတွင်း ချိုးဖောက်မှုတွေကို မှတ်တမ်းတင်ထားတယ်လို့ ဖေဖေါ်ဝါရီလ(၈)ရက်နေ့စွဲနဲ့ ND-Burma ရဲ့ အစီရင်ခံစာမှာဖေါ်ပြထားပါတယ်။

ဒီအတောအတွင်းမှာပဲ ရခိုင်ပြည်နယ်မြောက်ပိုင်းမှာ မွတ်စလင် ရိုဟင်ဂျာ ကလေးတွေ၊ အမျိုးသမီးတွေနဲ့ အမျိုးသားတွေအပေါ် လုံခြုံရေးတပ်တွေဘက်က ညှမ်းပမ်းနှိပ်စက်မှုတွေ၊ သတ်ဖြတ်မှုတွေ စတဲ့ လူ့အခွင့်အရေးချိုးဖောက်မှုတွေ ကျူးလွန်ခဲ့တယ်ဆိုတဲ့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံးရဲ့ အစီရင်ခံစာတစောင်လည်း ပြီးခဲ့တဲ့ သတင်းပတ်အတွင်း ထုတ်ပြန်ခဲ့ပါတယ်။

မြန်မာအစိုးရဘက်ကတော့ အဲ့ဒီ့အစီရင်ခံစာမှာပါတဲ့ စွပ်စွဲချက်တွေကို ဒုသမ္မတ ဦးမြင့်ဆွေဦးဆောင်တဲ့ ရခိုင်စုံစမ်းရေးကော်မရှင်က တဆင့် စစ်ဆေးနေကြောင်းနဲ့ ကျူးလွန်ကြောင်း တွေ့ရှိပါက အရေးယူမှာဖြစ်တယ်လို့ ကုလသမဂ္ဂကို တုန့်ပြန်ပြောဆိုထားပါတယ်။
VOA Burmese News


ဆားလင်းကြီးမြို့နယ်အတွင်း သတ္တုတူးဖော်နေတဲ့ လက်ပံတောင်းတောင်ကြေးနီစီမံကိန်း။
ဆားလင်းကြီးမြို့နယ်အတွင်း သတ္တုတူးဖော်နေတဲ့ လက်ပံတောင်းတောင်ကြေးနီစီမံကိန်း။
လူ့အခွင့်ရေး ချိုးဖေါက်မှုတွေ အခုထိ ဆက်လက်ရှိနေဆဲဖြစ်တဲ့ လက်ပံတောင်းတောင် ကြေးနီသတ္တုတွင်း တူးဖေါ်ရေးလုပ်ငန်းကိုချက်ချင်း ရပ်ဆိုင်းပစ်ဖို့ Amnesty International လူ့အခွင့်ရေး အဖွဲ့ကြီးက မြန်မာအာဏာပိုင်တွေကို တောင်းဆိုလိုက်ပါတယ်။

လက်ပံတောင်းကြေးနီစီမံကိန်း ဝန်းကျင်မှာ နေထိုင်တဲ့ ထောင်နဲ့ချီတဲ့ မိသားစုတွေဟာ ဒီစီမံကိန်း တိုးချဲ့မှုနဲ့အတူ အိုးအိမ်ရွှေ့ပြောင်းရတာ၊ လယ်ယာဆုံးရှုံးရတာတွေ ရှိနေသလို သူတို့နေထိုင်ရာနေရာမှာ သဘာဝဝန်းကျင်ပျက်စီးမှုတွေကြုံတွေ့နေရပြီး ဒီစီမံကိန်းကို ဆန့်ကျင် ကန့်ကွက် သူတွေကိုလည်း အာဏာပိုင်တွေဘက်က ဆက်ပြီး ဖိနှိပ်ခြိမ်းခြောက်မှုတွေ ရှိနေတယ်လို့AI အဖွဲ့ရဲ့ ဖေဖေါ်ဝါရီ ၁၀ ရက်နေ့က ထုတ်ပြန်တဲ့ ဒုက္ခတောင်တန်းလို့ အမည်ပေးထားတဲ့ အစီရင်ခံစာမှာ ဖေါ်ပြထားပါတယ်။

လက်ပံတောင်းတောင် ကြေးနီစီမံကိန်းကို တရုတ်အစိုးရပိုင် လက်နက်နဲ့ သတ္တုတူးဖေါ်ရေးလုပ်တဲ့ NORINCO ကုမ္ပဏီကြီးရဲ့ လက်ခွဲဖြစ်တဲ့ မြန်မာဝမ်ပေါင် ကုမ္ပဏီက တူးဖေါ်နေတာဖြစ်ပြီး ၂၀၁၆ စက်တင်ဘာလမှာ ကြေးနီစတင် ထုတ်လုပ်ခဲ့တာပါ။ ဆယ်စုနှစ်နဲ့ချီ စီးပွါးရေး ဒဏ်ခတ်မှု ခံခဲ့ရတဲ့ မြန်မာနိုင်ငံမှာ ဒေါ်အောင်ဆန်းစုကြည် ဦးဆောင်တဲ့အစိုးရသစ် တက်လာခဲ့တဲ့နောက်ပိုင်း နိုင်ငံရပ်ခြား ရင်းနှီးမြှုပ်နှံမှုတွေ တိုးလာဖို့ လုပ်ဆောင်နေချိန်မှာ လက်ပံတောင်းလို့ စီမံကိန်းကြီးတွေဟာ လူ့အခွင့်ရေးချိုးဖေါက်မှုတွေ လုပ်နေပြီး တာဝန်ခံ တာဝန်ယူမှု မရှိဘူးလို့ AI အဖွဲ့ရဲ့ အစီရင်ခံစာက ထောက်ပြထားပါတယ်။

မြန်မာနိုင်ငံအတွက် စီးပွါးရေး တိုးတက်ဖွံ့ဖြိုးမှု ရှိစေဖို့ လက်ပံတောင်းတောင် စီမံကိန်းလို့ စီမံကိန်းကြီးတွေ နဲ့ လုပ်ဆောင်ဖို့ လိုနေတာ ထင်ရှားပေမယ့် ဒီလိုတိုးတက်ဖို့ ဒေသခံတွေကို စတေးရတာမျိုးတော့ မဖြစ်သင့်ဘူးလို့ AI အဖွဲ့ရဲ့ သုတေသနမှုး Mark Dummett ကပြောပါတယ်။ ဒါ့ကြောင့် အစိုးရသစ်အနေနဲ့ ဒီကိစ္စကို ကြားဝင်ဆောင်ရွက်ဖို့ လိုသလို ဒေသတွင်း လူ့အခွင့်ရေး ချိုးဖေါက်မှုတွေနဲ့ သဘာဝ ဝန်းကျင် ပျက်စီးမှုတွေနဲ့ ပါတ်သက်ပြီး စံနစ်တကျ စုံစမ်းစစ်ဆေးပြီး ဖေါ်ထုတ်ဖို့လည်း တိုက်တွန်းထားပါတယ်။

လက်ပံတောင်းစီမံကိန်းက ရတဲ့ အကျိုးအမြတ်ကို မြန်မာဝမ်ပေါင် ကုမ္ပဏီနဲ့ မြန်မာစစ်ဘက်က ဦးပိုင်လီမိတက် တို့ခွဲဝေယူကြတာ ဖြစ်ပါတယ်။ဦးပိုင်အဖွဲ့ရဲ့ အက်ဆစ်စက်ရုံ စွန့်ပစ်ပစ္စည်းတွေကနေ ဒေသတွင်း သောက်သုံးရေတွေမှာ အာဆင်းနစ်၊ ကြေးနီနဲ့ ခဲဓါတ်တွေ စိမ့်ဝင်မှုတွေနဲ့ သဘာဝ ဝန်းကျင်ပျက်စီးခဲ့ရသလို စီမံကိန်းကို ဆန့်ကျင်ဆန္ဒပြသူတွေကို ၂၀၁၂ ခုနှစ်နှိမ်နင်းမှုမှာ ဖေါ့စဖရပ်ပါတဲ့ ဗုံးနဲ့ပစ်ခတ်မှုကြောင့် မီးလောင်ဒဏ်သင့်စေတာနဲ့ ၂၀၁၄ ခုနှစ်က ဆန္ဒပြကျေးရွာသူ ဒေါ်ခင်ဝင်း သေနတ်ဒဏ်ရာနဲ့ သေဆုံးရတာတွေ အပါအဝင် ဖမ်းဆီး ခြိမ်းခြောက်မှုတွေ အခုထိ ရှိနေဆဲ ဖြစ်ကြောင်း အစီရင်ခံစာမှာ ဖေါ်ပြထားပါတယ်။

VOA Burmese News


မြောက်ဥက္ကလာဆေးရုံကြီးပရ၀ုန် အတွင်း ခွင့်ပြုချက်မရှိပဲ ဗီဒီယို ရိုက်ကူးပြီး လူမှုကွန်ယက်စာမျက်နှာပေါ်တင်ခဲ့ခြင်း ဆေးရုံသူနာပြု ဆရာမကြီးကို အော်ဟစ် ပြောဆိုခဲ့ခြင်းများအတွက် လူနာရှင် အမျိုးသားတစ်ဦးကို သက်ဆိုင်ရာဆေးရုံမှ ဖေဖော်ဝါရီလ ၉ရက်နေ့က မြောက်ဥက္ကလာ ရဲစခန်းတွင် တိုင်ချက်ဖွင့်ထားကြောင်း အဆိုပါဆေးရုံ၏ ဆရာဝန်အသိုင်းအ၀န်းမှ သိရသည်။

ပြီးခဲ့သည့် ဖေဖော်ဝါရီလ ၇ရက်နေ့က မြောက်ဥက္ကလာ ဆေးရုံတွင် လူနာရှင် အမျိုးသားတစ်ဦးက ဆေးရုံအတွင်းဗီဒီယို ရိုက်ကူးနေ သဖြင့် တာဝန်ကျ သူနာပြုဆရာကြီး ဒေါ်ဆိုင်းတောင်က တားမြစ်ရာတွင် အဆိုပါ လူနာရှင်က ပြန်လည်အော်ဟစ် ပြောဆိုခဲ့သည်ကို ၄င်း၏ ဖေ့ဘုတ်စာမျက်နှာတွင် တင်ထားသည့် ဗီဒီယိုဖိုင်တွင်တွေ့မြင်ရသည်ဟု ဆိုသည်။


အဆိုပါ ရုပ်သံဖိုင်တွင် လူနာရှင်အမျိုးသားနှင့် အစိမ်းဝတ်အဆင့် သူနာပြု ဆရာမကြီးတို့ အပြန်အလှန်ပြောဆိုထားသည့် ဗီဒီယိုဖိုင်ကို Minn Thaik အမည်ရှိ ဖေ့ဘုတ်စာမျက်နှာမှ တဆင့် ဖြန့်ဝေခဲ့သည်ဟု သိရသည်။
''တိုင်ချက်ဖွင့်ထားပါတယ်.၊တိုင်ချက်ကိုလည်း ကျွန်တော်တို့စီစစ်နေဆဲပါ'' ဟု
မြောက်ဥက္ကလာရဲစန်းမှ တာဝန်ကျသူက ဖေဖော်ဝါရီ ၉ ရက် နေ့ ည ၁၀ နာရီက ပြောသည်။

ယင်းဗီဒီဖိုင်နှင့် ပတ်သက်၍ ဖေ့ဘုတ်သုံးစွဲသူများနှင့် ဆရာဝန်များအကြား ဝေဖန်မှုများ မြင့်တက်ခဲ့ပြီးနောက် ယင်းကဲ့သို့ ရိုင်းပြစွာပြောဆိုမှု ၊ ဆေးရုံအတွင်း ဗီဒီယိုရိုက်ကူးမှု၊ လူမှုကွန်ယက်တွင် ဗီဒီယိုဖြန့်ဝေခဲ့မှုတို့ အတွက် ဆေးရုံအုပ် ဒေါက်တာ ဒေါ်အေးအေးသန့် ကိုယ်တိုင် တရားလိုပြုလုပ်ကာ တိုင်ကြားထားကြောင်းသိရသည်။

"ဒီိလို ရိုင်းစိုင်းစော်ကားသွားတာတွေအတွက် တရားလိုလုပ်တာတော့ ဆေးရုံအုပ်ပေါ့၊ လက်ထောက်ဆေးရုံအုပ် ဒေါက်တာ ၀င်းသန္တာဖြူ လည်း ပူးပေါင်းပြီးတိုင်တာပေါ့၊ အခုတော့ ရဲစခန်းမှာ ပနံပတ် လည်း ထွက်နေပါပြီ" ဟု အဆိုပါ ဆေးရုံတွင် တာဝန်ကျနေသည့် ဆရာဝန်တစ်ဦးက The Ladies သို့ ပြောကြားခဲ့သည်။

The Ladies News
https://www.facebook.com/News.TheLadies/

ဗိုလ်ချုပ်အောင်ဆန်းကြေးရုပ်တု စင်တင်သည့် အခမ်းအနားကို ဖေဖော်ဝါရီ ၁၀ ရက် နံနက် ၁၁ နာရီအချိန်တွင် နေပြည်တော် လယ်ဝေးမြို့နယ်၏ အချက်အခြာကျသည့် လယ်ဝေးဈေးရှေ့လမ်းဆုံတွင် ကျင်းပခဲ့ပါသည်။

စင်ပေါ်တွင် လယ်ဝေးမြို့နယ် ပြည်သူ့လွှတ်တော်ကိုယ်စားလှယ် ဦးမျိုးဇော်ဦး၊ အမျိုးသားလွှတ်တော်ကိုယ်စားလှယ် ဦးကျော်မြင့်ဦးတို့မှ မူလီအား အပြီးသတ်တပ်ဆင်ခဲ့ပြီး လယ်ဝေးမြို့နယ် ပြည်သူများ၊ ကျောင်းသူကျောင်းသားများမှ အလေးပြုဂါရ၀ပြုကြပါသည်။

“ဗိုလ်ချုပ်အောင်ဆန်းကြေးရုပ်၏ အလေးချိန်မှာ ကြေးပိဿာချိန် ၃၀၀ ကျော်ရှိပြီး အမြင့် ၉ ပေ တန်ဖိုးအားဖြင့် သိန်း ၁၃၀ အကုန်အကျခံ၍ သွန်းလုပ်ခဲ့ခြင်းဖြစ်ပါတယ်”ဟု လယ်ဝေးမြို့နယ် ပြည်သူ့လွှတ်တော်ကိုယ်စားလှယ် ဦးမျိုးဇော်ဦးက ပြောပါသည်။

“ရည်ရွယ်ချက်ကတော့ လယ်ဝေးမြို့နယ်မှာရှိတဲ့ ပြည်သူ ပြည်သားတွေက လွတ်လပ်ရေးဖခင်ကြီး ဗိုလ်ချုပ်အောင်ဆန်းကို အလေးအမြတ်ထားကျေးဇူးဆပ်ချင်ကြတဲ့အတွက် ဗိုလ်ချုပ်ကြေးရုပ်က မြို့လူထုရဲ့ မတည်ငွေအင်အားနဲ့ အကောင်အထည်ဖော်ဆောင်ခြင်း ဖြစ်ပါတယ်။ ဗိုလ်ချုပ်အောင်ဆန်းသည် အနှိုင်းမဲ့ပုဂ္ဂိုလ်ဖြစ်တဲ့အတွက် မြို့တိုင်းမှာ ရှိသင့်ပါတယ်။ နောင်လာနောင်သားတွေ မြန်မာနိုင်ငံ၏ လွတ်လပ်ရေးကို ဗိုလ်ချုပ်ဦးဆောင်ပြီးရယူခဲ့ကြောင်းကို အမှတ်ရစေချင်တဲ့အတွက် လယ်ဝေးမြို့နယ်မှာ အခုလို ဗိုလ်ချုပ်ကြေးရုပ်တု စိုက်ထူနိုင်ခြင်းအတွက် ပီတိဖြစ်မိပါတယ်” ဦးမျိုးဇော်ဦးက ပြောပါသည်။

ကြေးရုပ်တုကို ထုလုပ်ခဲ့သူမှာ ပန်းပုပညာရှင် ဦးအောင်ကျော်ထွန်းဖြစ်ပြီး ဖွင့်ပွဲအခမ်းအနားကို ဖေဖော်ဝါ၇ီ ၁၃ ရက် ဗိုလ်ချုပ်မွေးနေ့ နံနက် ၇း၃၀ နာရီမှာ စတင်မှာ ဖြစ်ပါကြောင်း။ ၁၀၂ ပြည့် မွေးနေ့အထိမ်းအမှတ်ဖွင့်ပွဲ အခမ်းအနား၌ လယ်ဝေးမြို့နယ် လမ်းမကြီးတလျှောက်တွင် နိဗာန်ဈေးပွဲတော်ကြီး ကျင်းပမည်ဖြစ်ပြီး ၁၃ ရက် တညလုံး မန္တလေးမြို့က စိန်ဒူးဝါး မင်္ဂလာဆိုင်းဝိုင်းနဲ့ ဖျော်ဖြေပါမယ်ဟု ဦးမျိုးဇော်ဦးက ပြောပါသည်။

ယခု ကြေးရုပ်တည်ရှိရာ ရပ်ကွက် ၄၊ ၅၊ ၆ ဆုံသည့် အလယ် လယ်ဝေးဈေးအနီး တော်လှန်ရေးကာလ ဗိုလ်ချုပ်မိန့်ခွန်းပြောခဲ့သည့်နေရာဖြစ်ကြောင်း ဒေသခံတဦးက ပြောပါသည်။

ထွန်း(နေပြည်တော်)
News Watch(စောင့်ကြည့်သတင်းဂျာနယ်)

ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းသည် မြန်မာ့ဒီမိုကရေစီခေါင်းဆောင်နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏နေရာကိုဆက်ခံမည့် ကိုယ်စားလှယ်လောင်းဖြစ်ကြောင်း Nikkei Asian Review က ရေးသားဖော်ပြသည်။ အဆိုပါသတင်းဌာနက “Yangon politician emerges as possible SuuKyi successor” ခေါင်းစဉ်ဖြင့်ရေးသားသောသတင်းဆောင်းပါး၌ ဒေါ်အောင်ဆန်းစုကြည်၏ အရိုက်အရာကို ဆက်ခံနိုင်မည့်သူအဖြစ် ဦးဖြိုးမင်းသိန်းအား တစ်ကြိုပေးခဲ့ခြင်းဖြစ်သည်။

အသက် ၄၇ နှစ်အရွယ် ဦးဖြိုးမင်းသိန်းသည် ရန်ကုန်တိုင်းဝန်ကြီးချုပ်ဖြစ်လာချိန် ၂၀၁၆ ဧပြီမှစ၍ ရန်ကုန်မြို့၏ ယာဉ်ကြောကျပ်တည်းမှုနှင့် မြို့ပြပြဿနာများကို သွက်လက်တက်ကြွစွာဖြေရှင်းနေပြီး ပြည်ပမှလုပ်ငန်းများ ရန်ကုန်သို့ ၀င်ရောက်လာရန် ကြိုးပမ်းလျက်ရှိကြောင်း၊ ယာဉ်ကြောကျပ်တည်းမှုနှင့် ဘတ်စ်ကားဟောင်းများကို လမ်းမများပေါ်မှ အပြီးသတ်ဖယ်ရှားရန် ဇန်န၀ါရီ ၁၆ မှစ၍ YBS အများပိုင်ဘတ်စ်ကားလိုင်းဖြင့် အစားထိုးပြေးဆွဲစေခဲ့ကြောင်း၊ ယင်းအပြောင်းအလဲကြောင့် ဘတ်စ်ကားစီးရေ ၂၀၀၀ ယခင်ထက် ထက်ဝက်ခန့် လျှော့ချနိုင်ခဲ့ကြောင်း၊ ဘတ်စ်ကားစီးရေးလျော့ချလိုက်ခြင်းကြောင့် အချို့နေရာများတွင် အခက်အခဲနှင့် ကြုံတွေ့ရသော်လည်း ၀န်ကြီးချုပ်အနေဖြင့် ရန်ကုန်မြို့ ပို့ဆောင်ရေးစနစ် ပြုပြင်ပြောင်းလဲမှုကိုဆက်လက်ဖော်ဆောင်လျက်ရှိပြီး မြို့တွင်းသို့ဝင်မည့်တက္ကစီစီးရေကိုလည်း ထိန်းချုပ်မည်ဟုပြောကြားထားကြောင်း အဆိုပါဆောင်းပါးတွင် ရေးသားထားသည်။

ဦးဖြိုးမင်းသိန်း၏ကြိုးပမ်းဆောင်ရွက်မှုများသည် သယ်ယူပို့ဆောင်ရေးကဏ္ဍတခုတည်းတွင်သာမဟုတ်ဘဲ ယခင်အစိုးရလက်ထက်ကဆောက်လုပ်ခွင့်ပြုခဲ့သောအထပ်မြင့်အဆောက်အဦ ၂၀၀ ခန့်ကိုလည်းဥပဒေနှင့်ညီညွတ်ခြင်းရှိ/မရှိစိစစ်ရန် ၆ လခန့် ဆိုင်းငံ့ခဲ့ကြောင်း၊ ဦးဖြိုးမင်းသိန်း၏ယင်းဆုံးဖြတ်ချက်ကြောင့် တရားဥပဒေနှင့်မညီဘဲ ဆောက်လုပ်နေသော အထပ်မြင့်အဆောက်အဦးများကို အရေးယူနိုင်ခဲ့ကြောင်း၊ နိုဝင်ဘာလအတွင်းကလည်း ရန်ကုန်မြို့အလှကို ပျက်စီးစေသည့်အပြင် ယာဉ်အန္တရာယ်ဖြစ်စေသည့် လမ်းဘေးဈေးသည်များကို ဖယ်ရှားနိုင်ခဲ့ကြောင်း ဆက်လက်ရေးသားထားသည်။ ယင်းအပြင်မြို့ ပြအခြေခံအဆောက်အဦဖွံ့ဖြိုးတိုးတက်ရေး မဟာစီမံကိန်းကို JICA ၏အကူအညီဖြင့် ၂၀၄၀ ခုနှစ်အထိ ဖော်ဆောင်ရန် ရန်ကုန်တိုင်းဒေသကြီးအစိုးရက စီစဉ်ထားကြောင်း၊ ရန်ကုန်တောင်ပိုင်းတွင် အထူးစီးပွားရေးဇုန်တခုဖော်ဆောင်ရန် ဗဟိုအစိုးရထံမှ ခွင့်ပြုချက်ရထားပြီးဖြစ်ကြောင်း ပါရှိသည်။

ဦးဖြိုးမင်းသိန်း၏ တောင်းဆိုမှုများသည် များပြားသည့်အပြင် အသေးစိတ်ကျကြောင်း၊ ၎င်း၏စဉ်းစားတွေးခေါ်နိုင်စွမ်းနှင့် ရန်ကုန်ကို မြို့ပြကြီးတခုအဖြစ်အကောင်အထည်ဖော်ရန် စိတ်အားထက်သန်မှုတွင် အခြားနိုင်ငံရေးသမားများထက်ထူးခြားသည်ဟု ရန်ကုန်အခြေစိုက် ဂျပန်သံတမန်တဦးက ပြောကြားသည်ဟုဆိုသည်။

“အသေးစားနဲ့ အလတ်စားလုပ်ငန်းတွေ စက်ရုံမြေနေရာငှားရမ်းနိုင်ဖို့အတွက်အသင့်ပြင်ထားသင့်တယ်လို့ ကျွန်တော်တို့ကပြောတော့ ချက်ချင်းဆိုသလိုပဲ တာဝန်ရှိသူတဦးကို ညွှန်ကြားခဲ့တယ်။ သူကမြန်ဆန်တဲ့နေရာမှာလေးစားလောက်တယ်”ဟုအိုဆာကာစက်မှုကုန်သည်ကြီးများအသင်း၏ ခေါင်းဆောင်တဦးကပြောကြားသည်ဟုဆိုသည်။

ဦးဖြိုးမင်းသိန်း၏ပြုပြင်ပြောင်းလဲမှုများသည် အချို့ကိစ္စရပ်များတွင် ကန့်ကွက်ဆန့်ကျင်မှုများနှင့် ကြုံတွေ့ရလင့်ကစား ယခင် တိုင်းအစိုးရများနှင့်မတူ သိသိသာသာ မြန်ဆန်သွက်လက်သည်ဟု ရေးသားထားသည်။

ဦးဖြိုးမင်းသိန်းသည် အသက် ၁၈ နှစ်အရွယ်တွင် ရန်ကုန်တက္ကသိုလ်၌ ရူပဗေဒဘာသာရပ်ကိုဆည်းပူးနေရာမှ ၈၈ အရေးအခင်းနှင့် ကြုံခဲ့ရပြီးအရေးတော်ပုံကြီးတွင် ပါဝင်ခဲ့သူဖြစ်သည်။ ၎င်းသည် ကျောင်းသားလှုပ်ရှားမှုဖြင့် နိုင်ငံရေးလောကထဲဝင်ရောက်ခဲ့ပြီး ၁၉၉၁ ခုနှစ်တွင် ဖမ်းဆီးခံရ၍ ထောင်ဒဏ် ၁၅ နှစ်ကျခံခဲ့ရသည်။ ထောင်မှလွတ်လာပြီး ၂၀၁၀ မြန်မာ့နိုင်ငံရေးပြုပြင်ပြောင်းလဲမှုစတင်ချိန်တွင် နိုင်ငံရေးပါတီတခု တည်ထောင်ခဲ့သည်။ ထို့နောက် ဒေါ်အောင်ဆန်းစုကြည်ဦးဆောင်သည့် NLD ပါတီသို့ ၀င်ရောက်၍ ၂၀၁၂ ကြားဖြတ်ရွေးကောက်ပွဲတွင် NLD မှ ၀င်ရောက်ယှဉ်ပြိုင်အနိုင်ရ၍ လွှတ်တော်ကိုယ်စားလှယ်ဖြစ်လာခဲ့သည်။ ၂၀၁၅ အထွေထွေရွေးကောက်ပွဲတွင် NLD ပါတီအပြတ်အသတ်အနိုင်ရရှိပြီးနောက် လက်ရှိရာထူးဖြစ်သည့် ရန်ကုန်တိုင်းဒေသကြီးဝန်ကြီးချုပ် ဖြစ်လာသည်။

ရန်ကုန်တိုင်းဝန်ကြီးချုပ်အဖြစ် ခန့်အပ်တာဝန်ပေးခံရခြင်းမှာ ထောင် ၁၅ နှစ်ကျခံရစဉ်အတွင်းပြသခဲ့သည့် ဦးဖြိုးမင်းသိန်း၏ စိတ်ဓါတ်ခိုင်မာမှုနှင့် ဒီမိုကရေစီစနစ်အပေါ် ယုံကြည်မှုအပြင် ဥာဏ်ရည်ထက်မြက်မှု၊ အခြားပါတီဝင်အချို့ကဲ့သို့ ဒေါ်အောင်ဆန်းစုကြည်၏ဦးဆောင်မှုနောက်တွင်သာ လိုက်ပါခြင်းမဟုတ်ဘဲ ၎င်း၏ကိုယ်ပိုင်တွေးခေါ်ယူဆချက်များအားလည်း ဒေါ်အောင်ဆန်းစုကြည်ထံ သိကြားစေခြင်းတို့ကြောင့်ဖြစ်သည်ဟု ဆိုသည်။

၂၀၁၆ အောက်တိုဘာလအတွင်းက NLD ဗဟိုအလုပ်အမှုဆောင်ကော်မတီကိုပြောင်းလဲဖွဲ့စည်းခဲ့ရာ ဦးဖြိုးမင်းသိန်းသည် ဗဟိုကော်မတီ၏ အသက်အငယ်ဆုံးအဖွဲ့ဝင်ဖြစ်လာခဲ့သည်။ ဒေါ်အောင်ဆန်းစုကြည်၏ညွှန်ကြားချက်ဖြင့် တရုတ်၊ ဂျပန်၊ စင်ကာပူနိုင်ငံများသို့ သွားရောက်ခဲ့ရာ နိုင်ငံတကာအသိုင်းအ၀ိုင်းက ဦးဖြိုးမင်းသိန်းအား ဒေါ်အောင်ဆန်းစုကြည်၏အရိုက်အရာကိုဆက်ခံမည့်သူအဖြစ် ထင်မြင်ယူဆလာကြကြောင်း၊ သို့ဖြစ်၍ ၁၉၈၈ NLD စတင်တည်ထောင်ချိန်မှ ယနေ့ချိန်ထိ ဒေါ်အောင်ဆန်းစုကြည်ပြီးလျှင် ပါတီတွင် နံပါတ် ၂ မရှိကြောင်း၊ အသက် ၇၁ နှစ်ရှိပြီဖြစ်သောဒေါ်အောင်ဆန်းစုကြည်အနေဖြင့် သူမကိုဆက်ခံမည့် ခေါင်းဆောင်သစ်တဦးကို ပျိုးထောင်ရန်အရေးကြီးကြောင်း ပြောဆိုမှုများရှိနေရာ ရန်ကုန်တိုင်းဒေသကြီးဝန်ကြီးချုပ်အဖြစ် ဦးဖြိုးမင်းသိန်း၏အောင်မြင်မှုများက ယင်းအတွက် အဆုံးအဖြတ်ပေးမည်ပင်ဖြစ်ကြောင်း ရေးသားထားသည်။

မော်ရိုး

News Watch(စောင့်ကြည့်သတင်းဂျာနယ်)

(၉-၂-၂၀၁၇ ရက်နေ့၊ နေပြည်တော်)

နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်သည် ပုပ်ရဟန်းမင်းကြီး၏ အထူးကိုယ်စားလှယ် His Grace Comboy Archbishop Paul Tschang in-Nam အား ၈-၂-၂၀၁၇ ရက်နေ့ ၁၄း၀၀ နာရီတွင် နိုင်ငံတော်၏ အတိုင်ပင်ခံပုဂ္ဂိုလ်၏ နေအိမ်တွင် လက်ခံတွေ့ဆုံသည်။

ယင်းသို့တွေ့ဆုံရာတွင် ဗာတီကန် နှင့် မြန်မာနိုင်ငံအကြား သံတမန်ဆက်သွယ်ရေးထူထောင်ရေးကိစ္စ၊ နှစ်နိုင်ငံအကြား ချစ်ကြည်ရေးပူးပေါင်းဆောင်ရွက်နိုင်သည့်အလားအလာများ နှင့် မြန်မာနိုင်ငံ၏ ငြိမ်းချမ်းရေး ဖော်ဆောင်မှုဖြစ်စဉ်တို့နှင့် ပတ်သက်ပြီး အမြင်ချင်းဖလှယ်ဆွေးနွေးခဲ့ကြသည်။

Myanmar State Counsellor Office



စစ်သား၊ စီးပွားရေးသမား၊ နိုင်ငံရေးသမားစသည့် မတူညီသော တည်ဆောက်မှုများဖြင့် ဖြတ်သန်းလာခဲ့သည့် ဦးဝင်းထိန်သည် သူ၏ကျင်လည်ရာ ပတ်ဝန်းကျင် ပြောင်းသွားသော် လည်း လူအများ၏ ချီးကျူးဂုဏ်ပြုမှု၊ လေးစားမှုတို့နှင့်အတူ ဝေဖန်ပြစ်တင်မှုတို့ကိုပါ ယှဉ်တွဲ ပိုင်ဆိုင် လျှက်ရှိသည့် သူ၏ စရိုက်လက္ခဏာတို့မှာမူ မပြောင်းလဲပေ။

ရုပ်မြင်သံကြား စက်က တစ်ဆင့် ပျံ့လွင့်နေသော အသံများအပေါ် “ဟား ဟား ဟား ဟား” ဆိုသော ရယ်သံကြီးတစ်ခုက လွှမ်းမိုးလျှက်။ နေရာကား အုပ်ချုပ်ရေးမြို့တော် နေပြည်တော် ရှိ စည်ပင်သာယာ ဧည့်ရိပ်သာဝန်းအတွင်းမှ အခန်းငယ်တစ်ခုတွင် ဖြစ်သည်။

သူ့ကို သရော်ထားသော ကာတွန်းများ၊ ရုပ်ပြောင်ပုံများကို ရောင်စုံပုံများထုတ်၍ ကပ်ထားသောနံရံကို လက်ညှိုးထိုးပြရင်း ရွှင်မြူးစွာ ပွင့်ပွင့်လင်းလင်းပြောဆိုနေသည့် အသက် ၇၆ နှစ် အရွယ် အမျိုးသားကြီး တစ်ဦး၏ အသံပင်။

“ကာတွန်းဆရာတွေက ကိုယ့်ကို ဂရုတစ်စိုက်နဲ့ ရေးတယ်ဆိုပြီး ဂုဏ်ပြုတဲ့အနေနဲ့ နံရံမှာကပ် ထားတာ”ဟု ပြောလာသူမှာ အမျိုးသား ဒီမိုကရေစီ အဖွဲ့ချုပ် (NLD) ပါတီ ဗဟိုအလုပ်အမှု ဆောင်အဖွဲ့၏ အတွင်းရေးမှူးအဖွဲ့တွင် အမှတ်စဉ် နံပါတ်တစ်နေရာတွင် ဖော်ပြခံရလျှက် ကြီးလေးသော တာဝန်များကို ထမ်းဆောင်နေသည့် ဦးဝင်းထိန် ဖြစ်သည်။

အကြောင်းအရာ သုံးမျိုးနှင့် စပ်လျဉ်း၍ ဝေဖန်ခံရသော ကာတွန်းလေးပုံ၊ ၂၀၁၅ ခုနှစ်အတွင်း Michael Peel ရေးသားပြီး Financial Times သတင်းစာတွင် ဖော်ပြခဲ့သည့် Lunch with the FT: U Win Htein ဟူသည့် ဆောင်းပါးနှင့်အတူ ဖော်ပြထားသည့် ကာတွန်း သရုပ်ဖော်ပုံ တစ်ပုံတို့ကို သူနေထိုင်သည့် အခန်း၏ ဘုရားစင်အောက်က နံရံပေါ်တွင် တခုတ်တရ ကပ်ထား ခြင်းဖြစ်သည်။

ဦးဝင်းထိန်သည် ၁၉၈၈ ခုနှစ်မှစ၍ ယနေ့တိုင်ဆင်နွှဲနေဆဲဖြစ်သည့် ဒီမိုကရေစီနိုင်ငံတော် တည်ဆောက်ရေးတွင် ဒေါ်အောင်ဆန်းစုကြည်၏ NLD နှင့် အတူ အမာခံ၊ အနာခံ ပါဝင်လှုပ်ရှားလာသူတစ်ဦးလည်း ဖြစ်၏။

တပ်မတော်အစိုးရက အာဏာလွှဲပြောင်းပေးခြင်းမရှိသော ၁၉၉၀ ပြည့်နှစ် အထွေထွေ ရွေးကောက်ပွဲတွင် မိတ္ထီလာမြို့နယ်၏ ပြည်သူ့လွှတ်တော် ကိုယ်စားလှယ်အဖြစ်ရွေးချယ်ခံရသော်လည်း လွှတ်တော်မရောက်ဘဲ အကျဉ်းထောင်အတွင်း၌သာ အချိန်ကုန်ခဲ့ရသူ၊ NLD တစ်ကျော့ပြန် ရွေးကောက်ပွဲ ဝင်ခဲ့သည့် ၂၀၁၂ ခုနှစ် ကြားဖြတ်ရွေးကောက်ပွဲတွင် အဆိုပါ မဲဆန္ဒနယ်၌ပင် အရွေးခံရပြီး ၂၀၁၆ ခုနှစ်အထိ ဥပဒေပြုရေး အမတ်တာဝန်ကို ထမ်းဆောင်ခဲ့ဖူးသူလည်း ဖြစ်သည်။

ထူးခြားသည်မှာ ဦးဝင်းထိန် ဝင်ရောက်မယှဉ်ပြိုင်တော့သည့် ၂၀၁၅ အထွေထွေရွေးကောက်ပွဲတွင် မိတ္ထီလာမဲဆန္ဒနယ်၌ သူ့ကိုယ်စား ပါဝင်ယှဉ်ပြိုင်သူ NLD အမတ်လောင်းမှာ ပြိုင်ဘက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ အမတ်လောင်းကို ရှုံးနိမ့်ခဲ့ခြင်းဖြစ်သည်။

ဦးဝင်းထိန်ကမူ အဆိုပါရွေးကောက်ပွဲတွင် ပါဝင်ယှဉ်ပြိုင်ခြင်း မပြုတော့သော်လည်း အာဏာရပါတီဖြစ်လာသည့် NLD အတွက် ယခင်အစိုးရထံမှ အာဏာလွှဲပြောင်းရေး လုပ်ငန်းစဉ်များ ချောချောမွေ့မွေ့ဖြစ်စေရန်နှင့် အစိုးရအဖွဲ့၏ ရာထူးတာဝန်များကို ထမ်းဆောင်တော့မည့် NLD ဥက္ကဋ္ဌ ဒေါ်အောင်ဆန်းစုကြည်ကိုယ်စား ပါတီကို ထိန်းကျောင်းရန် တာဝန်ရှိသည့် ဗဟိုအလုပ်အမှုဆောင်အဖွဲ့၏ အတွင်းရေးမှူး အဖွဲ့ဝင်တစ်ဦးဖြစ်လာသည်။

ထိုသို့ အများစု၏ ဆန္ဒကို အခြေခံသော ဒီမိုကရေစီစနစ်ကို နိုင်ငံတွင်းအမြစ်တွယ်ရန် အင်တိုက်အားတိုက် ကြိုးပမ်းလျက်ရှိသော ဦးဝင်းထိန်သည် တစ်သွေးတစ်သံတစ်မိန့်ဖြင့် ဖွဲ့စည်းအုပ်ချုပ်သည့် တပ်မတော်တွင်လည်း ထူးချွန်တပ်မတော်သားတစ်ဦးအဖြစ် တာဝန်ထမ်းဆောင် ဖူးသည်ဆိုသော မှတ်တမ်းလည်း ရှိနေပြန်သည်။

• ဗိုလ်ကြီးဝင်းထိန် ဘဝ

သူသည် တပ်မတော်၏ မှတ်တမ်း အတွင်း ထူးချွန်ဆု နှစ်ဆုကို တစ်ဦးတည်း ရဖူးသည့် ဗိုလ် ကြီးဟောင်း တစ်ဦးဖြစ်သည်။ ၁၉၆၃ ခုနှစ် အပတ်စဉ် (၅) ဗိုလ်သင်တန်း ဆင်းပွဲတွင် အောင် စစ်သည်နှင့် စာပေဆု နှစ်ခုလုံးကို ဆွတ်ခူး နိုင်ခဲ့ပြီး တပ်မတော်တွင် ၁၄ နှစ်ကြာ တာဝန် ထမ်းဆောင်ခဲ့သည်။

ထိုသို့ တပ်မတော်နှင့်အတူ ဂုဏ်ယူဖွယ် ကာလများကို ဖြတ်သန်းနေသည့် ဦးဝင်းထိန်သည် ၁၉၇၆ ခုနှစ်တွင် စစ်သားဘဝ တစ်ခန်းရပ်ရန် အကြောင်းကြုံခဲ့ ရ၏။ ဦးနေဝင်း၏ မြန်မာ့ ဆို ရှယ်လစ် လမ်းစဉ်ပါတီ ခေတ်တွင် ပေါ်ပေါက်သည့် ဗိုလ်ကြီးအုန်းကျော်မြင့် ဦးဆောင်သော နိုင်ငံတော်လုပ်ကြံမှုကြောင့်ပင်ဖြစ်သည်။

နာမည်ဆိုးနှင့် ကျော်ကြားသည့် ရေကြည်အိုင် ထောက်လှမ်းရေး စခန်းတွင် အဆိုပါအမှု အတွက် ခြောက်လနီးပါးကြာ အစစ်ဆေးခံခဲ့ရပြီး အစိုးရသက်သေအဖြစ် တရားခွင်တွင် ပါ ဝင်ခဲ့ရကာ နောက်ပိုင်းတွင် တပ်မတော် မှ ဖိအားပေး နှုတ်ထွက်ခိုင်းခြင်းကို ဦးဝင်းထိန် ကြုံ လိုက်ရသည်။

“တပ်က ထွက်ခိုင်းတာ ပင်စင်တော့ပေးတယ်။ ပင်စင်ငွေကို သတိရရင်ထုတ်လိုက်၊ မထုတ် လိုက်လုပ်ပြီး နေလာတာ။ နောက်တော့ တပ်မတော်က ဘယ်အဖွဲ့ဆိုလည်းမသိဘူး။ အဲဒါရဲ့ ဆုံးဖြတ်ချက်နဲ့ ပင်စင်မပေးတော့ဘူးလို့ အကြောင်းကြားတယ်။ မပေးတော့တဲ့အပြင် ထုတ်ထားတဲ့ပင်စင်ငွေတွေ ပြန်တောင်းတယ်။ ဒါနဲ့ မင်းတို့မပေးလည်း ဂရုမစိုက်ဘူး။ ထုတ်ပြီးတာတွေလည်း ပြန်မပေးနိုင်ဘူး ပြောလိုက်တယ်။ အဲဒါနဲ့ ဒီအတိုင်းပဲ။ ကိုယ်လည်းမထုတ်ဖူး။ သူတို့လည်း လာမတောင်းဘူး”ဟု သူ၏ ထုံးစံအတိုင်း ရယ်ပွဲဖွဲ့ရင်း ဦးဝင်းထိန်က ဆိုသည်။

ဦးဝင်းထိန်ကို ရယ်မောခြင်း၊ နောက်ပြောင်ခြင်း အမူအကျင့်တို့နှင့် ယှဉ်တွဲတွေ့ရသည်မှာ ယခုမှတော့ မဟုတ်ပေ။ သူ၏ လုပ်ဖော်ကိုင်ဖက်ဟောင်းအချို့ ထုတ်ဖော်ပြောဆိုသည့် စကားတို့ကလည်း အခက်အခဲကြုံချိန်၌ပင် အပြုံးအရယ်မပျက်၊ အရွှ့န်းဖောက်စကားများဖြင့် ရင်ဆိုင် တတ်သော ဦးဝင်းထိန်၏ အမူအကျင့်ကို ထင်ဟပ်စေ၏။

ထိုသို့ အမူအကျင့်နှင့် စပ်လျဉ်း၍ NLD ၏ နာယကဖြစ်သူ ဦးတင်ဦး၏ မှတ်ချက်မှာ အထင်အရှားပင်ဖြစ်သည်။ တပ်မတော် ကာကွယ်ရေး ဦးစီးချုပ် ဗိုလ်ချုပ်ကြီး သူရဦးတင်ဦးအဖြစ်မှ ထုတ်ပယ်ခံရပြီးနောက် ဗိုလ်ကြီးအုန်းကျော်မြင့်အမှုအတွက် တရားရုံးတွင်ထွက်ဆိုရာတွင် ဦးဝင်းထိန်ပါဝင်သော ရုံးချိန်းရက်သည် ပျော်ရွှင်စရာကောင်းသည့်နေ့များဖြစ်ကြောင်း လွတ်လပ်သောအာရှ အသံ (RFA)က ၂၀၁၀ ပြည့်နှစ်အတွင်း ထုတ်လွှင့်ခဲ့သည့် “ပြည်သူ့ဖက်က ဗိုလ်ချုပ်ကြီး” အမည်ရသော ရေဒီယို အစီအစဉ်တွင် ၎င်းက ထည့်သွင်းပြောကြား ခဲ့ဖူးသည်။

အဆိုပါအဖြစ်အပျက်နှင့် ပတ်သက်၍ ဦးတင်ဦးက “သူက ကျွန်တော်နဲ့လည်းရင်းနှီးတော့ သူ့ကိုလည်း ခေါ်စစ်တာပေ့ါ။ အဓိပ္ပာယ်ကတော့ ဒါနဲ့ ပတ်သက်တာ အားလုံးကို သိရမယ်ပေ့ါ။ အဲဒါနဲ့ ပတ်သက်ပြီးမေးတာ အမေးခံရတဲ့သူ (ဦးဝင်းထိန်) က သိမှမသိဘဲ။ ဟုတ်မှ မဟုတ်ဘဲဆိုပြီး ရယ်ရယ်မောမောနဲ့ ပြန်ပြန်ဖြေတာ။ သူက ပြန်မေးသလိုဖြစ်နေတော့ တဝါးဝါးနဲ့ပေ့ါဗျာ”ဟု ပြောကြားခဲ့သည်။

အဆိုပါ ရေဒီယို အစီအစဉ်ကို ပုံနှိပ်မှတ်တမ်း အဖြစ် ပြုစုထုတ်ဝေသည့် ဖိုးစိုင်း (ဂျာနယ် လစ်) ရေးသားသော “ပြည်သူချစ်သော ကာကွယ်ရေး ဦးစီးချုပ်ဟောင်း သူရ ဦးတင်ဦး” စာ အုပ်တွင် ထိုသို့ ဖော်ပြထားခြင်းဖြစ်ပါသည်။

ဦးဝင်းထိန် ကိုယ်တိုင်ကလည်း ထိုစဉ်က အမှုကို စစ်ဆေးသော တရားသူကြီး အပါအဝင် ပါ ဝင်ပတ်သက်သူ အားလုံးမှာ သူ၏ မိတ်ဆွေများ သာဖြစ်၍ အရွှန်းဖောက် နောက်ပြောင် မိ သည်ဟု ဝန်ခံခဲ့သည်။

“ဥပမာ တရားသူကြီးက ဦးဝင်းထိန် ဘယ်တပ်မှာ တာဝန်ထမ်းဆောင်နေသလဲ၊ ဘာရာထူးလဲ စသည်ဖြင့် မေးခွန်းတွေ မေးလာရင် “ဟာ ခင်ဗျား သိရဲ့သားနဲ့ ဘာတွေလာမေးနေတာလဲ”ဆိုပြီး ဟာသ လုပ်ပစ်တာဟု ဦးဝင်းထိန်က ပြန်ပြောင်း ပြောပြသည်။

တရားရုံးချိန်းအတွင်း ဦးဝင်းထိန်၏ ထိုသို့ပြုမူမှုများကြောင့် အမြင်မကြည်လင်ကြသူများလည်း ရှိခဲ့ကြသည်ကို သူကိုယ်တိုင်ရေး၍ ၂၀၁၆ ခုနှစ်၊ အောက်တိုဘာလအတွင်းက ထုတ်ဝေသည့် “ကျွန်တော် ရေးချင်တဲ့ အကြောင်း၊ ကျွန်တော်ပြောချင်တဲ့ အကြောင်း၊ ဗိုလ်ကြီး အုန်းကျော် မြင့်၊ နိုင်ငံတော် လုပ်ကြံမှု” စာအုပ်တွင် ထည့်သွင်း ဖော်ပြထားသည်။

တရားခွင်အတွင်း ဗိုလ်ကြီးအုန်းကျော်မြင့်ကို ဥပေစ္ဆေဒကံ ပါမပါ လက္ခဏာကြည့်ပေးသည်ကို အမြင်မကြည်သည့် ထောက်လှမ်းရေး တပ်ဖွဲ့ဝင်တို့က တရားခံအား ဂုဏ်ပြုသည်ဟုဆိုကာ အထက် အရာရှိတို့ထံ အစီရင်ခံမှုကို ဦးဝင်းထိန် ကြုံခဲ့ရခြင်းဖြစ်၏။

လွန်ခဲ့သော နှစ်ပေါင်း ၄၀ ကျော်က ထိုကိစ္စကို Frontier က မေးမြန်းရာတွင် သူ၏ အပြုအမူ ဝသီကြောင့် ချောက်တွန်းခံရဖူးသည့် ဒုက္ခဟု ထင်မှတ်ပုံမရဘဲ ရွှင်မြူးစွာတက်ကြွစွာဖြင့်ပင် ဦးဝင်းထိန်က တစ်ဟားဟား ရယ်မောခဲ့သည်။

ထို့နောက် သူ၏ ရှတတ အသံမှတစ်ဆင့် စကားလုံးပင် စီစရာမလိုဘဲ တရစပ် ထွက်ပေါ်လာ သော အမှတ်သညာတို့မှာ ..

“တရားခွင်တစ်ခုပြီးတဲ့အချိန်မှာ အုန်းကျော်မြင့်ရှေ့ကနေ ဖြတ်သွားတော့ ဟေ့ကောင် ပြစမ်း မင်းလက္ခဏာဆိုပြီး နောက်ပြောင်တဲ့သဘောနဲ့ ကြည့်ဖို့လုပ်တာ။ ထောက်လှမ်းရေးက တရားခံနဲ့ အဲဒီလို ရင်းရင်းနှီးနှီးမနေရဘူး ဆိုပြီး အော်လို့ မကြည့်ဖြစ်လိုက်ရပါဘူး။ အဲဒီ အုန်းကျော်မြင့်ကို လက္ခဏာကြည့်တဲ့ကိစ္စကို မကြည်တော့ အဲဒီထောက်လှမ်းရေးက သူရေးတဲ့ အစီရင်ခံစာမှာ ဦးဝင်းထိန်ဟာ အုန်းကျော်မြင့်ကို ဂုဏ်ပြု နှုတ်ဆက်တယ်ဆိုပြီး လီဆယ်ရေးတာ” ဟူ၍ပင်။

အဆိုပါအချိန်မှ စတင်ရေတွက်လျှင် နောင် ၁၂ နှစ်အကြာ၊ ၁၉၈၈ ပြည်သူ့အရေးတော်ပုံမှစ၍ ဒီမိုကရေစီအရေး ရွပ်ရွပ်ချွံချွံ တိုက်ပွဲဝင်သူဖြစ်လာမည့် ဗိုလ်ကြီးဝင်းထိန်သည် ထိုသို့ ဇက်ပေါ်ဓားမိုးထားခြင်းကြုံရသည့် ကာလ၌ပင် မတရားဘူးထင်ပါက အာခံရဲသည့် သူ၏ ဗီဇကို ပြသခဲ့ဖူးသည့်ကိစ္စကိုလည်း ပြုလုပ်ခဲ့သေး၏။

“ထောက်လှမ်းရေးစခန်းမှာ စစ်ဆေးခံရတုန်းက အစိုးရသက်သေထွက်တဲ့အခါ ထည့်ပြောရမယ့်ကိစ္စတွေကို သူတို့ သင်ပေးလိုက်တာ ရှိတယ်။ အဲဒါတွေတစ်ခုမှ တရားခွင်မှာ ကျွန်တော်က ထည့်မပြောဘူး။ ဒါနဲ့ ပတ်သက်ပြီး တရားခွင်ပြီးတဲ့အချိန်မှာ ထောက်လှမ်းရေးက ပြောတဲ့အခါကျတော့ “ဟာ….မေ့သွားတာဗျာ” ဆိုပြီး လုပ်ရရော”ဟု သူက ပြောရင်း ထုံးစံအတိုင်း တစ်ဟားဟား ရယ်ပြန်ပါသည်။

• စီးပွားရေး လုပ်ငန်းရှင်ဘဝ

သည်လိုနှင့် တပ်မတော်သားဘဝ တစ်ခန်းရပ်ခဲ့ရသည့် ဦးဝင်းထိန်သည် ဆိုရှယ်လစ်ခေတ် အတွင်း အောင်မြင်သော စီးပွားရေးသမား ဘဝကို အံ့သြဖွယ် ကောင်းလောက်အောင် တည် ဆောက်ပြခဲ့ပြန်၏။

မြန်မာနိုင်ငံသား ပုဂ္ဂလိက လုပ်ငန်းရှင်များ၏ ပိုင်ဆိုင်မှု လုပ်ငန်းများပင် ပြည်သူပိုင်သိမ်းခံ ရသည့်အချိန်တွင် သကြားနှင့် အရက်ထုတ်လုပ်သည့် ဥရောပကုမ္ပဏီများ မြန်မာနိုင်ငံတွင် လာရောက်ရင်းနှီးမြှပ်နှံနိုင်ရန် ကိုယ်စား ဆောင်ရွက်ပေးသူအဖြစ် ဦးဝင်းထိန်က လျှို့လျှို့ ဝှက်ဝှက်က် လုပ်ကိုင်ခဲ့ခြင်းပင်ဖြစ်သည်။

“မြန်မာ့ဆိုရှယ်လစ်ခေတ်မှာ ဆီလိုအပေါက်ရှာရင်းနဲ့ စီးပွားရေးလုပ်ရတာ။ ဆလွန်းကားတောင်း မစီးရဲဘူး။ ဦးနေဝင်းရဲ့ ထောက်လှမ်းရေးက ဆလွန်းကားစီးတယ်၊ တိုက်ဆောက်တယ်ဆို အဲဒီသူကို မသိအောင် ခေါ်သွားပြီး မေးတာမျိုး လုပ်တယ်။ တစ်ချို့သူတွေဆို အဲဒါမျိုးတွေ လုပ်လို့ အဖမ်းခံရတာ။ ပိုင်ဆိုင်မှု အသိမ်းခံရတာတောင် ရှိတယ်” ဟု သူက ပြန်ပြောင်း ပြော ပြသည်။

• နိုင်ငံရေး သမားကြီးဘဝ

၁၉၈၈ အရောက်တွင်မူ ဦးဝင်းထိန်သည် နိုင်ငံရေးလောကသို့ ခြေစုံပစ်ဝင်ရောက်လာခဲ့ပြီး ဦးနှောက် အလုပ် လုပ်သည့် အချိန် အထိ နိုင်ငံရေးသမား အဖြစ် ရပ်တည်တော့မည် ဟု ဆုံး ဖြတ်ထားသူ ဖြစ်လာပြန်၏။

ထူးခြားသည်မှာ စစ်သား၊ စီးပွားရေးသမား၊ နိုင်ငံရေး သမား စသည့် မတူညီသော တည် ဆောက် မှုများဖြင့် ဖြတ်သန်းလာခဲ့သည့် ထိုပုဂ္ဂိုလ်၏ ဘဝတွင် အထိုက်အလျှောက်ထက် ပို သော အောင်မြင်မှုများနှင့် အတူ သူ၏ ထူးခြားသော အပြောအဆို၊ အပြုအမူများကြောင့် အများသူငှာထံမှ အကောင်းအဆိုး ရှုမြင်ချက် အထွေထွေကို လက်ခံရရှိတတ်သူ တစ်ဦး လည်း ဖြစ်နေခြင်းပင်ဖြစ်သည်။

ကျင်လည်ရာပတ်ဝန်းကျင် ပြောင်းသွားသော်လည်း လူအများ၏ ချီးကျူးဂုဏ်ပြုမှု၊ လေးစားမှုတို့နှင့်အတူ ဝေဖန်ပြစ်တင်မှုတို့ကိုပါ ယှဉ်တွဲပိုင်ဆိုင်လျှက်ရှိသည့် သူ၏ စရိုက်လက္ခဏာတို့မှာမူ မပြောင်းလဲပေ။

ဗိုလ်ကြီးအုန်းကျော်မြင့်ကိစ္စတွင် ထောက်လှမ်းရေးအချို့၏ မလိုမုန်းထားမှုကို ကြုံခဲ့ရသလို၊ တရားမဝင် စီးပွားရေးသမားဘဝတွင်လည်း မနာလိုသူတို့၏ ရန်ရှာခြင်းမခံရအောင် သိုသို သိပ်သိပ် နေထိုင်ခဲ့ရဖူးသည်။ ထို့အတူ စစ်အစိုးရကို အတိုက်အခံလုပ်သည့် နိုင်ငံရေးသမားဘဝမှစ၍ အာဏာရပါတီကို ဦးဆောင်သူ ဖြစ်လာချိန်တွင်လည်း ထိုသို့ ကြုံနေရဆဲပင်ဖြစ် သည်။

အနီးစပ်ဆုံးနှင့် လူသိထင်ရှားသော အကြောင်းအရင်းများကတော့ သူဦးစီးဆောင်ရွက်လိုက်သည့် အမျိုးသား ဒီမိုကရေစီအဖွဲ့ချုပ်ပါတီ၏ ကိစ္စရပ်အချို့၊ မီဒီယာအပေါ် တုန့်ပြန်မှုအချို့၊ အစိုးရအဖွဲ့နှင့် လွှတ်တော်ကိစ္စရပ် များအပေါ် ပါဝင်ပတ်သက်မှုအချို့နှင့် သူအားဝေဖန်သူအချို့ပေါ် တုန့်ပြန်မှုတို့ကြောင့် ဖြစ်ပေါ်လာသည့် ဂယက်များ ဖြစ်သည်။

၂၀၁၆ ခုနှစ်၊ နိုဝင်ဘာ ၁၈ ရက်နေ့တွင် သမ္မတအမိန့်ဖြင့် တာဝန်မှ ရပ်စဲခံလိုက်ရသည့် စိုက် ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ဒုတိယ ဝန်ကြီး ဒေါက်တာထွန်းဝင်း ကိစ္စ အပြင် ရှမ်းပြည်နယ် NLD ပါတီ ဥက္ကဋ္ဌနှင့်အဖွဲ့ ထုတ်ပယ်ခံရသည့်ကိစ္စတို့နှင့် အမျိုးဘာသာသာသနာစောင့်ရှောက်ရေးအဖွဲ့ (မဘသ) တရားဝင် ရပ်တည်ခွင့် ရှိမရှိကိစ္စအဆုံး ဦးဝင်းထိန် ၏ ပါဝင်ပတ်သက်မှု၊ ပြောဆိုမှုများအပေါ် ဝေဖန်မှုများရှိနေခြင်းဖြစ်သည်။

ဒေါက်တာထွန်းဝင်းကဆိုလျှင် သူဒုတိယဝန်ကြီးအဖြစ် တာဝန်ယူနေစဉ်အတွင်း ရှမ်းပြည်နယ်၊ ဟဲဟိုးမြို့ရှိ နိုင်ငံပိုင်မြေဧက ၂၀၀ ကျော် ငှားရမ်းသုံးစွဲနေသော အမေရိကန်နိုင်ငံသားပိုင် Prime Limited ထံမှ မြေပြန်လည်ရယူရေး ဆောင်ရွက်မှုကြောင့် ဦးဝင်းထိန်၏ အမျက်ရှမှုကိုခံခဲ့ရပြီး ထုတ်ပယ်ခံခဲ့ရခြင်ဖြစ်ကြောင်း ယုံကြည်ထားသူ ဖြစ်သည်။

အစိုးရအဖွဲ့ ရာထူးခန့်၊ ပြောင်းရွှေ့၊ ထုတ်ပယ်ကိစ္စများတွင် ပါတီပိုင်းက ဝင်ရောက်စွက်ဖက်မှုကို ဝေဖန်သူတို့က ထောက်ပြကြသော်လည်း ဦးဝင်းထိန်ကတော့ မည်သို့မျှ မှတ်ချက်မပြုပေ။

ထို့အတူNLD ပါတီမှ ခန့်အပ်ထားသော ဝန်ကြီးများကို ပညာပြနေသည့် ယခင်အစိုးရခန့်ခဲ့ သည့် အမြဲတမ်းအတွင်းဝန်များကို နေရာ ပြောင်းပစ်မည်ဟု အောက်တိုဘာလ အစောပိုင်းအတွင်း မဇ္စျိမသတင်းဌာနကို ပြောဆိုဖူးသည့် စကား၊ စက်တင်ဘာလဆန်းပိုင်းအတွင်း ၎င်း၏ လက်မှတ်ဖြင့် ထုတ်ပယ်ခဲ့သော ရှမ်းပြည်နယ် NLD ဥက္ကဋ္ဌ ဒေါ်ခင်မိုးမိုးအပါအဝင် စုစုပေါင်း ခြောက်ဦးကိစ္စတွင် နိုင်ငံတော်၏ အတိုင်ပင်ခံပုဂ္ဂိုလ်အပြင် သမ္မတရုံးဝန်ကြီးနှင့် နိုင်ငံခြား ရေးဝန်ကြီးအဖြစ် တာဝန်ယူနေသည့် ဒေါ်အောင်ဆန်းစုကြည်ထံမှ ခွင့်ပြုချက်ရပြီးသားဟူ သည့်သဘော ပြောဆိုမှုတို့ကြောင့် ဖြစ်ပေါ်လာသော ဝေဖန်မှုတို့ကို ဦးဝင်းထိန်တစ်ယောက် ပြင်ပြင်းထန်ထန် ခံခဲ့ရသည်။

အခြေခံ ဥပဒေ အရ အစိုးရ အဖွဲ့ဝင်များနှင့် ပါတီ၏ ပတ်သက်မှုအပေါ် ကန့်သတ်မှုများကို ဖောက်ဖျက် ကျူးလွန်ရာ ရောက်နေသည်ဆိုသည့် စွပ်စွဲချက်များကို လက်ခံရရှိခြင်းပင်ဖြစ် သည်။

ဦးဝင်းထိန်ကမူ ပါတီနှင့် အစိုးရအဖွဲ့ပတ်သက်မှု အပေါ် ဝေဖန်သူများအား နိုင်ငံရေး လေနှင့်ဝမ်းနှင့်မကွဲခြင်းဟု တုန့်ပြန်ခဲ့သည်။ ရွေးကောက်ပွဲ ဝင်ခြင်းမှ အစ၊ အစိုးရဖွဲ့ခြင်းအဆုံး ပါတီကသာ ရွေးချယ်ခန့်အပ်ခြင်းဖြစ်၍ ဝင်စွက်ဖက်ရုံမက ဦးဆောင်ရသည့် သဘောရှိသည်ဟု နိုဝင် ဘာ ၃၀ ရက်ထုတ် The Voice သတင်းစာတွင် “နိုင်ငံရေး လေနဲ့ ဝမ်းနဲ့ ကွဲစေလို” ခေါင်းစဉ် ဖြင့် ဆောင်းပါးတစ်ပုဒ်အား ဦးဝင်းထိန်က ရေးသား ဖြေရှင်းထားသည်။

ဦးဝင်းထိန်၏ ပွဲဆူစေမှုများမှာ ထိုမျှမကသေးပေ။ ၂၀၁၆ ခုနှစ်ဆန်းပိုင်းတွင် အစိုးရဖွဲ့ရန် ပြင်ဆင်နေချိန်အတွင်း RFA သတင်းထောက်အား မေးခွန်းတွေ စဉ်းစဉ်းစားစား မေးကြဟု ဘုတောသည် မှစ၍ အစိုးရဖွဲ့ပြီးချိန် သြဂုတ်လအတွင်းတွင် ဝန်ကြီး အပြောင်းအလဲ ဖြစ်မည် လားဟု မေးမြန်းလာသည့် လူထုပုံရိပ်ဂျာနယ် သတင်းထောက်တစ်ဦးကို “စောက်ရူး၊ စောက် ရူး” ဟု ပြန်လည် တုန့်ပြန်မှု တို့ကလည်း အထင်အရှားပင် ဖြစ်သည်။

ထိုစဉ်က လူထု ပုံရိပ်ဂျာနယ်တွင် သတင်းထောက် အဖြစ် တာဝန်ထမ်းဆောင်နေရင်း ဦးဝင်းထိန် ၏ တုန့်ပြန်မှုကို ကိုယ်တိုင်ကြုံလိုက်ရသည့် ကိုစိုင်းဝဏ္ဏက နိုင်ငံရေးတန်ခိုးထွားသည့် ဦးဝင်းထိန်အနေဖြင့် သတင်းမီဒီယာများအပေါ် ဆဲရေးတိုင်းထွာမှုမျိုးကို ရှောင်သင့်ကြောင်း ပြောကြားသည်။

“သူ့အနေနဲ့ သတင်း မီဒီယာကို ဆက်ဆံတာ၊ ထာဝရ အာဏာတည်နေမယ့်သူ တစ်ဦးလို ဆက်ဆံ ခဲ့တယ်လို့ ကျွန်တော် ခံစားရတယ်” ဟု ကိုစိုင်းဝဏ္ဏက ဆိုသည်။

ဦးဝင်းထိန်ကမူ ထုံးစံအတိုင်း ဖြစ်စဉ်အလိုက် သီးခြား မှတ်ချက်မပြုခဲ့ဘဲ သူ၏ လုပ်ဆောင် ချက်များ၊ ပြောဆိုမှုများအပေါ် ဝေဖန်မှု၊ ပြစ်တင် ရှုံ့ချမှုများကြောင့် ပြဿနာတစ်စုံတစ်ရာ မရှိကြောင်းသာ ပြောကြားသည်။

ရှမ်းပြည်နယ် NLD ဥက္ကဋ္ဌ အဖြစ်မှ ထုတ်ပယ်ခံလိုက်ရသည့် ဒေါ်ခင်မိုးမိုးက “အခုနောက်ပိုင်း ဦးဝင်းထိန်ရဲ့ လုပ်ရပ်တွေဟာ အာဏာရှင် ဆန်လာတယ်” ဟု ပြောသော်လည်း ဦးဥာဏ်ဝင်းကဲ့သို့သော ပါတီခေါင်းဆောင်နှင့် အခြားသော ပါတီဝင် ရှစ်ဦး၊ ဒေါက်တာ ရန်မျိုးသိန်းကဲ့သို့သော နိုင်ငံရေး လေ့လာသုံးသပ်သူနှင့် ၈၈ မျိုးဆက် ငြိမ်းချမ်းရေးနှင့် ပွင့်လင်း လူ့အဖွဲ့အစည်းမှ ဦးဂျင်မီကဲ့သို့သော နိုင်ငံရေးခေါင်းဆောင်များကမူ တစ်စုံတစ်ရာ ပြောကြားရန် ငြင်းဆိုခဲ့သည်။

၎င်း၏ အမည်နှင့် မဲဆန္ဒနယ်ကို ထုတ်ဖော် မပြောလိုသည့် ပြည်သူ့လွှတ်တော် အမတ်တစ်ဦးကမူ ရှမ်းပြည်နယ် ပါတီတာဝန်ရှိ သူအချို့ကို ထုတ်ပယ်သည့် ကိစ္စတွင် ဦးဝင်းထိန်၏ ကိုင် တွယ်ပုံကို မကျေနပ်ကြောင်း ပြောသည်။

“နောက်ပိုင်းမှသာ ပါတီအနေနဲ့ ထုတ်တာဖြစ်ပေမယ့် အရင်ဦးဆုံးကတော့ သူ့တစ်ယောက်ထဲ သဘောမျိုးဖြစ်နေတယ်။ ပါတီပိုင်းမှာကျန်ခဲ့တဲ့ တာဝန်အရှိဆုံးသူတွေထဲမှာ သူတစ်ယောက်ပဲ နေပြည်တော်မှာနေပြီး စီမံလုပ်ကိုင်ရတဲ့သဘောမျိုးရှိတော့ သူ့သြဇာက ထက်နေတဲ့ သဘောပေ့ါ” ဟု အဆိုပါ အမတ်က မှတ်ချက်ပြုသည်။

NLD ပါတီ၏ နေပြည်တော်ခရိုင်ဥက္ကဋ္ဌ ဖြစ်သူ ဦးမင်းသူကမူ ဦးဝင်းထိန်သည် အတိတ်နှင့် ပစ္စုပ္ပန်နိုင်ငံရေးဆိုင်ရာ ကိစ္စများနှင့် စပ်လျဉ်း၍ ပါတီတွင်းနှင့် ပါတီပြင်ပ အကြောင်းအရာများကို အစအဆုံး အတွင်းကျကျသိသော တစ်ဦးတည်းသော ပုဂ္ဂိုလ်ဖြစ်သည်ဟု ညွှန်းဆိုသည်။

ထို့အတူ အစိုးရအဖွဲ့တွင် အုပ်ချုပ်ရေးအာဏာရယူထားသဖြင့် ပါတီကိစ္စ တိုက်ရိုက် မဆောင် ရွက်နိုင်သည့် ဒေါ်အောင်ဆန်းစုကြည် ချမှတ်ထားသော လမ်းကြောင်းပေါ်တွင် တည့်တည့် မတ်မတ် လျှောက်လှမ်းနိုင်အောင် ပါတီကို ဦးဆောင်နေခြင်းသာဖြစ်သည်ဟု သုံးသပ်သည်။

“အာဏာရပါတီမှာ သူက ခေါင်းကိုင်ဖခင် သဘောမျိုးပဲ။ လက်ရှိ ပါတီပိုင်းရော၊ အစိုးရပိုင်း ရော၊ လွှတ်တော်ပိုင်းရော အားလုံးချိတ်ပြီး လုပ်နိုင်တာက သူတစ်ယောက်ပဲရှိတယ်။ အသက်အရွယ်ရရော၊ ကျန်းမာရေး အရရော ဒီလောက် လုပ်နိုင်တယ်ဆိုတာ သူ့အတွက် မ ဟုတ်ဘဲ တိုင်းပြည်အတွက်၊ ဒီမိုကရေစီ ထူထောင်နိုင်ဖို့အတွက်၊ ပါတီမှာ စည်းမျဉ်းစည်းကမ်းနဲ့ အညီဆောင်ရွက်နိုင်ဖို့ လုပ်နေတာပါပဲ” ဟု ဦးမင်းသူက ပြောသည်။

ကျွန်းစုမြို့နယ်၊ NLD ၏ ပြည်သူ့လွှတ်တော်ကိုယ်စားလှယ် ဒေါ်တင်တင်ရီကမူ တစ်ဟားဟားရယ်ခြင်း၊ ပက်ကနဲ နစ်နစ်နာနာ တုန့်ပြန်ခြင်း၊ အရွှန်းဖောက်ခြင်းစသည်တို့မှာ ဦးဝင်းထိန်၏ အမူအကျင့် ဖြစ်သော်လည်း ၁၉၈၈ ခုနှစ်မှစ၍ လက်တွဲ အလုပ်လုပ်လာသည့် အတွေ့အကြုံရ အဆိုပါ အပြုအမူတို့မှာ ရိုင်းစိုင်းသော စိတ်မျိုးဖြင့် လုပ်သည်ဟု သတ်မှတ်၍ မရဟု ပြော သည်။

“ပတ်ဝန်းကျင် အမြင်နဲ့ ကျွန်မနဲ့တော့ တူမှာမဟုတ်ဘူး။ ဦးဝင်းထိန်က ဟောဟောဒိုင်းဒိုင်း ပြောတတ်ပေမယ့် စိတ်ရင်းက ကောင်းတယ်။ အသုံးအနှုန်း ကြမ်းတမ်းတယ်ဆိုပေမယ့် မရိုင်းစိုင်းပါဘူး။ တစိမ်းတွေကတော့ စကားအပြောအဆို စည်းမစောင့်ဘူးလို့ ထင်နိုင်ပေမယ့် ကျွန်မတို့က အကြောင်းသိဆိုတော့ သူ့ရင်ထဲက စေတနာကို သိတယ်” ဟု ဒေါ်တင်တင်ရီက ဆိုသည်။

အင်းစိန်ထောင် အတွင်း ဦးဝင်းထိန်နှင့် လေးနှစ်ခန့် အတူ နေထိုင်ဖူးသည့် နာမည်ကျော် လူ ရွှင်တော်၊ ဒါရိုက်တာ ဇာဂနာ (အမည်ရင်း ကိုသူရ) ကမူ အဆိုပါ အမူအကျင့် များမှာ ဦးဝင်းထိန်၏ ၀သီသာဖြစ်ပြီး မည်သည့် အကြောင်း ကိစ္စကိုမျှ အညှိုးအတေး ထားသူ မဟုတ်သလို အဝေဖန် မခံနိုင် ဆိုသော သုံးသပ်ချက် များမှာလည်း မှားယွင်းနေကြောင်း ပြောကြားသည်။

“တစ်ချက်က ထောင်ထဲမှာ ကြမ်းပြင်ပေါ်အိပ်နေရတဲ့ နိမ့်ပါးတဲ့ဘဝတုန်းကလည်း ရာထူးကြီးတဲ့သူတွေ၊ ဝန်ကြီးတွေ၊ ညွှန်ချုပ်တွေလာရင် သူပြန်ပြောတာပဲ။ အခုလို အချိန်မျိုး အပြောင်းအလဲမှာ ပါတီတစ်ခုကို ဦးဆောင်သူတစ်ယောက်အနေနဲ့ ကျွန်တော်သိသလောက်တော့ သူများကို နှိမ်ပြီးပြောမယ့် သူမျိုးလည်း မဟုတ်ပါဘူး” ဟု ဇာဂနာက ဆိုသည်။

မည်သို့ပင်ဆိုစေ ဗိုလ်ကြီး အုန်းကျော်မြင့် ကိစ္စမှစ၍ ဒီမိုကရေစီလှုပ်ရှားမှုအဆုံး ၁၉၇၆ ခုနှစ်မှ ၂၀၁၀ ပြည့်နှစ်အထိ နိုင်ငံရေး ဆိုင်ရာပုဒ်မအမျိုးမျိုးဖြင့် အကျဉ်းထောင်များအတွင်း အနှစ် ၂၀ ကျော်နေထိုင်ဖူးပြီး အသက်အရွယ်အရ အဖိုးအိုဟု သတ်မှတ်နိုင်သော ဦးဝင်းထိန်သည် ဇရာကြောင့် နှလုံး၊ သွေးတိုး ရောဂါများရှိနေပြီး တုတ်ကောက် အသုံးပြု၍ လမ်းလျှောက်ရ သည်မှအပ မာမာချာ ရှိနေဆဲပင်ဖြစ်သည်။

မတူညီသော နယ်ပယ် သုံးခုတွင် အောင်မြင်သူအဖြစ် ရပ်တည်နိုင်ခြင်းမှာ ရည်ရွယ်လုပ် ဆောင် ခြင်းမဟုတ်ဘဲ ကံကြမ္မာ အလှည့်အပြောင်းအတိုင်း၊ အလိုလိုဖြစ် လာခြင်းသာ ဖြစ် သည်ဟု ခံယူထားသူ ဦးဝင်းထိန်သည် ယနေ့အထိ သူ၏ မှတ်ဥာဏ်၊ စွမ်းဆောင်ရည်နှင့် သြဇာပြည့်ဝနေသေးကြောင်း၊ ဟာဒယ ဥာဏ်ရွှင်သူ တစ်ဦးဖြစ်ကြောင်းကို သူ၏ နှုတ်မှ ထွက်ပေါ်လာသော ပွင့်ပွင့်လင်းလင်း တုတ်ထိုးအိုးပေါက် စကားလုံးများဖြင့် သက်သေပြလျှက်ရှိနေ ဆဲပင်ဖြစ်သည်။

တစ်ဟားဟား ရယ်ရင်း “ဖြစ်ခဲ့သမျှ ကိစ္စတွေဟာ တမင် အောင်မြင်အောင်၊ ပွဲဆူအောင်လုပ် တာမဟုတ်ဘူး။ သူ့ဖာသာသူ ဖြစ်သွားတာ မတတ်နိုင်ဘူး” ဟုပင် ဦးဝင်းထိန်က ပြောလိုက် သေးသည်။

ထို့ပြင် သူအပေါ် ဝေဖန်မှုများနှင့် ပတ်သက်၍ အကျဉ်းထောင်တွင်း နေထိုင်ရစဉ် အတွင်း ဆုံတွေ့ဖူးသည့် ကွယ်လွန်သူ နာမည်ကျော် စာရေးဆရာ ဗေဒင်ဆရာ မင်းသိင်္ခထံမှ သူ မှတ်သားဖူးသော စကားတစ်ခွန်းဖြင့် ဦးဝင်းထိန်က တုန့်ပြန်ခဲ့သည်။

အဆိုပါ စကား၏ အနက်မှာ လူတို့သည် အလကားရသော ထင်မြင်ယူဆချက်တို့ကို မည်သူမျှ မတောင်းလျှင်တောင်မှ ဖောချင်းသောချင်း ပေးလေ့ရှိသည်ဟူသော အဓိပ္ပာယ်ပင်။

“အခုလည်း အဲဒါပဲပေ့ါ အလကားရတာတွေ ဖောချင်းသောချင်း လုပ်နေကြတာပေ့ါ။ အေး ဆေးပါ။ ကြာရင် မောသွားမှာပဲ၊ မောသွားရင် တိတ်သွားမှာဘဲ”ဟု ပြောရင်း ဦးဝင်းထိန်က ရယ်လိုက်ပြန်သည်။

Credit,
ဉာဏ်လှိုင်လင်း
06 Feb: 2017

Frontier မှကူးယူဖော်ပြပါသည်။#BurmaDemocracy



( ဓါတ်ပုံ - ရန်ကုန်လေဆိပ်မှာ ဇန်နဝါရီလလ ၂၉ ရက်နေ့ ညနေက လုပ်ကြံခံရပြီး ကွယ်လွန်ခဲ့တဲ့ တရားလွှတ်တော်ရှေ့နေ ဦးကိုနီ ကို တွေ့ရစဉ် )
အန်အယ်လ်ဒီ ဥပဒေရေးရာ အကြံပေး၊ တရားလွှတ်တော်ရှေ့နေ ဦးကိုနီ လုပ်ကြံခံရတဲ့အမှုနဲ့ ပတ်သက်ပြီး သတင်းထုတ်ပြန်တဲ့အခါ ပြည်ထဲရေးဝန်ကြီးဌာနက ထုတ်ပြန်မှာမဟုတ်ဘဲ နိုင်ငံတော်သမ္မတ ရုံးကသာ ထုတ်ပြန်သွားမယ်လို့ သမ္မတရုံး ပြောခွင့်ရှိသူ ဦးဇော်ဌေး က ပြောပါတယ်။

ရှေ့နေဦးကိုနီ လုပ်ကြံခံရတာနဲ့ ပတ်သက်ပြီး ပြီးခဲ့တဲ့ဇန်နဝါရီလ ၃၀ နဲ့ ဖေဖော်ဝါရီလ ၃ ရက်နေ့တွေက သမ္မတရုံးကနေ နှစ်ကြိမ်တိုင်တိုင် သတင်းထုတ်ပြန်ခဲ့ပြီး နောက်ထပ်လည်း ထုတ်ပြန်သွားမယ်လို့ သမ္မတရုံး ပြောခွင့်ရှိသူ ဦးဇော်ဌေး က ပြောပါတယ်။

"ကျွန်တော်တို့ နောက်ဆုံးထုတ်ထားတယ်၊ နောက်ဆက်တွဲသတင်းပေါ့၊ နောက်ထပ်လည်း ထုတ်ဖို့ရရင် ထုတ်ပေးမယ်၊ ပြည်ထဲရေးကမဟုတ်ဘူး၊ ကျွန်တော်တို့ ထုတ်နေတယ်၊ သမ္မတရုံးက ထုတ်နေတယ်"

အဲဒီအမှုဖြစ်စဉ်နဲ့ ပတ်သက်လို့ တပ်မတော်နဲ့ မြန်မာနိုင်ငံရဲတပ်ဖွဲ့ ပူးပေါင်းအဖွဲ့က သတင်းကွင်းဆက်ရရှိရေးအတွက် ဆောင်ရွက်နေပြီး ဘာသာရေးနဲ့ လူမျိုးရေး သွေးထိုးလှုံ့ဆော်တာတွေကို သတိပြုကြဖို့အတွက်လည်း ထုတ်ပြန်ချက်မှာ ပါရှိပါတယ်။

ပြီးခဲ့တဲ့ ဇန်နဝါရီလ ၂၉ ရက်နေ့က ရှေ့နေဦးကိုနီဟာ အင်ဒိုနီးရှားနိုင်ငံခရီးစဉ်ကအပြန် ရန်ကုန်လေဆိပ်မှာ သေနတ်နဲ့ လုပ်ကြံခံခဲ့ရတာဖြစ်ပါတယ်။

RFA Burmese
https://www.facebook.com/rfaburmese



မောင်တောမြို့အ၀င် ဆိုင်းဘုတ်အားတွေ့ရစဉ်(ဓာတ်ပုံ-အင်တာနက်)
    ရန်ကုန်၊ ဖေဖော်ဝါရီ ၁၀ ရက် (ဆင်ဟွာ)

    မောင်တောခရိုင်အတွင်း ယခင်က ထုတ်ပြန်ခဲ့သည့် ည ၇ နာရီမှ နောက်တစ်နေ့ နံနက် ၆ နာရီကာလအတွင်း ညမထွက်ရအမိန့်အစား ယခုအခါ ည ၉ နာရီမှ နံနက် ၅ နာရီထိ ကာလအတွင်း ညမထွက်ရအမိန့်ကို ထပ်မံ ပြင်ဆင်ထုတ်ပြန်လိုက်ကြောင်း ရခိုင်ပြည်နယ်အစိုးရထံမှ သိရသည်။

ပြည်သူများ သွားလာရာ လမ်းမကြီး၊ လမ်းသွယ်၊ လမ်းကြား၊ ဥယျာဉ်(သို့မဟုတ်) အများပြည်သူနှင့် သက်ဆိုင်သည့်နေရာများတွင် ၅ ဦး(သို့မဟုတ်) ၅ ဦးထက်ပိုသော လူများစုဝေးခြင်း မပြုလုပ်ရန်နှင့် အချိန်ပြောင်းလဲ သတ်မှတ် ထုတ်ပြန်သည့်အမိန့်သည် ယနေ့မှစ၍ ၂ လပြည့်မြောက်သည်အထိ အတည်ဖြစ် ကြောင်း ထုတ်ပြန်ချက်တွင် ဖော်ပြထားသည်။

ရခိုင်ပြည်နယ် မောင်တောမြို့နယ်နှင့် ဘူးသီးတောင်မြို့နယ်အတွင်းရှိ အမှတ်(၁) နယ်ခြား စောင့်ရဲတပ်ဖွဲ့ (ကျီးကန်းပြင်)၊ ငါးခူရနယ်မြေရုံး၊ ကိုးတန်ကောက်ရဲကင်းစခန်းတို့အား အကြမ်းဖက်တိုက်ခိုက်မှု ဖြစ်ပွားပြီးနောက် မောင်တောခရိုင်အတွင်း ၂၀၁၆ ခုနှစ် ဒီဇင်ဘာလ ၉ ရက် တွင် ရာဇဝတ်ကျင့်ထုံးဥပဒေပုဒ်မ - ၁၄၄ အရ ထုတ်ပြန်ခဲ့သည့် ညမထွက်ရအမိန့် ပြစ်မှုဆိုင်ရာအထွေထွေအမှု အမှတ် (၂/၂၀၁၆) ကို မောင်တော ခရိုင် အထွေထွေအုပ်ချုပ်ရေးဦးစီးဌာနက ရာဇ၀တ်ကျင့်ထုံးဥပဒေပုဒ်မ -၁၄၄ ၊ ပြစ်မှု ဆိုင်ရာ အထွေထွေအမှုအမှတ်(၁/၂၀၁၇)ဖြင့် ဇန်န၀ါရီ ၉ရက် တွင် ပြင်ဆင်ထုတ်ပြန်လိုက်သည်။

ယင်းညမထွက်ရ အမိန့်ကို ဖောက်ဖျက် ကျူးလွန်ပါက မြို့နယ်တရားရုံးသို့ တရားစွဲဆို တင်ပို့ပြီး ရာဇသတ်ကြီးပုဒ်မ ၁၈၈ အရတစ်ဦးလျှင် ငွေကျပ် ၂ဝဝဝဝ စီဒဏ်ငွေ ကျခံရနိုင်ကြောင်း သိရသည်။

(Xinhua)
http://www.xinhuamyanmar.com



( ဓါတ်ပုံ - ရခိုင်ပြည်နယ် စစ်တွေလေဆိပ်ကို ဖေဖော်ဝါရီလ ၁ဝ ရက်နေ့က ရခိုင်ပြည်နယ် စုံစမ်းစစ်ဆေးရေးကော်မရှင်အဖွဲ့ဝင်တွေ ရောက်ရှိလာစဉ် )
ဒု-သမ္မတ ဦးမြင့်ဆွေ ဦးဆောင်တဲ့ ရခိုင်ပြည်နယ် စုံစမ်းစစ်ဆေးရေးအဖွဲ့ဝင်တွေဟာ ကုလသမဂ္ဂက ထုတ်ပြန်တဲ့ အစီရင်ခံစာအပေါ် စုံစမ်းစစ်ဆေးဖို့ ဒီကနေ့ မောင်တောမြို့ကို ထွက်ခွာသွားကြပါတယ်။

ဒီတစ်ကြိမ်ခရီးစဉ်ဟာ ၆ ရက်ကြာမြင့်မှာဖြစ်တယ်လို့ ကော်မရှင်အဖွဲ့ဝင်တစ်ဦးဖြစ်တဲ့ ပြည်သူ့လွှတ်တော် ကိုယ်စားလှယ် ဦးစောသလေးစောက ပြောပါတယ်။

"UN ရီပို့ထွက်လာတယ်၊ ကျန်တဲ့ကိစ္စတွေလည်းရှိတယ်၊ အဲဒီအပေါ်မှာ ကျနော်တို့ အစည်းအဝေး လုပ်တယ်၊ အစည်းအဝေး ဆုံးဖြတ်ချက်အရ ကျနော်တို့သွားတာပါ၊ ၁၆ ရက်နေ့အထိတော့ ကျနော်တို့ အစီအစဉ် ဆွဲထားပါတယ်၊ တောက်လျှောက်နေပါမယ်ခင်ဗျ၊ ပြည်ထောင်စုနေ့ပွဲက ဒုသမ္မတ ဦးဆောင် ပြီး ပွဲကိုတာဝန်ခံလုပ်ဆောင်ရမှာမို့ ပြည်ထောင်စုနေ့ပြီးမှပဲ ၁၄ ရက်နေ့လောက်မှ ပြန်ဆင်းလာနိုင် မယ်"

ဖေဖေါ်ဝါရီလ ၃ ရက်နေ့က ကုလသမဂ္ဂ လူ့အခွင့်အရေးရုံး OHCHR က ဘင်္ဂလာဒေ့ရ်ှဘက်ကို ထွက်ပြေးလာကြတဲ့ ရိုဟင်ဂျာ မွတ်ဆလင်တွေနဲ့ တွေ့ဆုံမေးမြန်းထားတာတွေကို Interview with Rohingyas fleeing from Myanmar since 9 October 2016 ဆိုတဲ့ ခေါင်းစဉ်နဲ့ ထုတ်ပြန်ခဲ့ပါတယ်။ အဲဒီအစီရင်ခံစာမှာ ထွက်ပြေးလာ သူတွေထဲက လူပေါင်း ၂၀၀ ကျော်ကို မေးမြန်းပြီး ထွက်ဆိုချက်တွေကို စုစည်းတင်ပြထားပြီး ကျူးလွန်မှုတွေထဲမှာ အမျိုးသမီးတွေကို လုံခြုံရေးတပ်ဖွဲ့တွေက အဓမ္မပြုကျင့်မှုတွေ၊ လိင်ပိုင်းဆိုင်ရာ အကြမ်းဖက်မှုတွေ၊ သတ်ဖြတ် မှုတွေ၊ မီးရှို့သတ်ဖြတ်တာတွေအထိ ရှိတယ်လို့ ဖေါ်ပြထားပါတယ်။

အဲဒီ အစီရင်ခံစာအပေါ် ကော်မရှင်အဖွဲ့ဝင်တွေက သွားရောက်စစ်ဆေးမှာဖြစ်ပါတယ်။

ကော်မရှင်ဥက္ကဌဖြစ်တဲ့ ဒု-သမ္မတ ဦးမြင့်ဆွေဟာ ပြည်ထောင်စုနေ့ အခမ်းအနား ကျင်းပရေးအတွက် တာဝန်ယူ ကြီးကြပ်နေရတာကြောင့် ဒီနေ့ ခရီးစဉ်မှာ မလိုက်ပါနိုင်ခဲ့တာလို့ ပြောပါတယ်။

အဲဒီကော်မရှင်ကို ပြီးခဲ့တဲ့ ဒီဇင်ဘာလ ၁ ရက်နေ့က သမ္မတဦးထင်ကျော်က ဖွဲ့စည်းပေးခဲ့ပြီး ဒုသမ္မတ ဦးမြင့်ဆွေက ဦးဆောင်ကာ လွှတ်တော်ကိုယ်စားလှယ်တွေ၊ အမျိုးသားလူ့အခွင့်အရေး ကော်မရှင်အဖွဲ့ဝင်တွေနဲ့ ဘာသာရေးခေါင်းဆောင်တချို့ ပါဝင်ကြပါတယ်။

ကော်မရှင်ရဲ့အစီရင်ခံစာကို ဇန်နဝါရီလ ၃၁ ရက်နေ့ နောက်ဆုံးထား အစီရင်ခံတင်ပြဖို့ သတ်မှတ်ခဲ့ပေမယ့် အဲဒီနေ့မှာပဲ သမ္မတ ဦးထင်ကျော်အမိန့်နဲ့ နောက်ထပ်ရက်တိုးမြှင့်ပေးခဲ့ပါတယ်။

RFA Burmese
https://www.facebook.com/rfaburmese



( ဓါတ်ပုံ - ပြည်ထဲရေး ဒုတိယဝန်ကြီး ဗိုလ်ချုပ်အောင်စိုး က ပြည်သူ့လွှတ်တော်မှာ မေးခွန်းများကို ပြန်လည်ဖြေကြားနေစဉ် )
ပြီးခဲ့တဲ့ ၂၀၁၆ ခုနှစ်အတွင်း မြန်မာနိုင်ငံမှာ ဖြစ်ပွားခဲ့တဲ့ အမှုကြီးဆယ်မျိုးထဲမှာ လူသတ်မှုက အများဆုံးဖြစ်ပြီး အမှုပေါင်း ၁၃၀၀ ကျော်ရှိတယ်လို့ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်စိုးက ပြောပါတယ်။

လှိုင်းဘွဲ့မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးခင်ချို မေးမြန်းတဲ့ ပြီးပြတ်မှုမရှိဘဲ ကျန်ရှိနေတဲ့အမှုများရဲ့ အဓိကအခက်အခဲနဲ့ မှုခင်းကျဆင်းရေး အထူးစီမံချက်များ ရေးဆွဲရန် အစီအစီအစဉ်ရှိ မရှိ မေးခွန်းကို ပြည်ထဲရေး ဒုတိယဝန်ကြီး ဗိုလ်ချုပ်အောင်စိုးက ဖြေကြားခဲ့တာဖြစ်ပါတယ်။

ဒါ့အပြင် နိုင်ငံတကာစံနှုန်းတွေအရ ရဲနဲ့ပြည်သူအချိုးမှာ ရဲတပ်ဖွဲ့ဝင်တစ်ဦးဟာ ပြည်သူ ၄၀၀ နဲ့ ညီမျှတဲ့ အင်အားရှိရမှာ ဖြစ်ပေမယ့် မြန်မာနိုင်ငံမှာ ရဲနဲ့ပြည်သူအချိုးဟာ ရဲတပ်ဖွဲ့ဝင်တစ်ဦးကို ပြည်သူ ၆၀၀ လောက်အထိ တာဝန်ယူနေရကြောင်း ဒါ့ကြောင့် လူဦးရေ ၅၁ သန်းနဲ့ တွက်မယ်ဆိုရင် ရဲတပ်ဖွဲ့ဝင် အင်အား တစ်သိန်းနှစ်သောင်းခုနှစ်ထောင်ကျော် ရှိရမှာဖြစ်လို့ ရဲတပ်ဖွဲ့ဝင်အင်အား ထပ်မံတိုးမြှင့်ရေးအတွက် လုပ်ဆောင်သွားမယ်လို့လည်း ဗိုလ်ချုပ်အောင်စိုးက ဖြေကြားသွားပါတယ်။

RFA Burmese
https://www.facebook.com/rfaburmese



( အစိုးရကထုတ်လွှင့်နေတဲ့ မေယု FM အသံလွှင့်အစီအစဉ်ကို ရပ်တန့်ပေးဖို့ ဖေဖော်ဝါရီလ ၁ဝ ရက်နေ့က မောင်တောမြို့မှာ ဆန္ဒပြတောင်းဆိုစဉ် )Photo: Aung Kyaw Min FB
ရခိုင်ပြည်နယ် မြို့နယ် ၃ ခုမှာ အစိုးရကထုတ်လွှင့်နေတဲ့ မေယု FM အသံလွှင့်အစီအစဉ်ကို ရပ်တန့်ပေးဖို့ အနည်းဆုံးမြို့နယ် ၄ခုမှာ ဒီကနေ့ ဆန္ဒပြတောင်းဆိုကြပါတယ်။

နိုင်ငံသားမဖြစ်သေးသူတွေအတွက် အခုလို အစိုးရကလုပ်ပေးတာကို ကန့်ကွက်တာဖြစ်တယ်လို့ ဘူးသီးတောင်မြို့က ဆန္ဒပြပွဲကို ဦးဆောင်သူတစ်ဦးဖြစ်တဲ့ ကိုမောင်ဝင်းနိုင် က အခုလို ပြောပါတယ်။

ဘူးသီးတောင်၊ မောင်တောနဲ့ ရသေ့တောင်မြို့နယ်တွေမှာ အစိုးရက မေယု FM အစီအစဉ်ကို ဖေဖေါ်ဝါရီလ ၁ရက်နေ့က စတင်ထုတ်လွှင့်နေတာဖြစ်ပြီး နယ်မြေအကန့်အသတ်နဲ့ လိုအပ်ချက်တွေရ ရခိုင်၊ ဗမာ၊ ဘင်္ဂါလီ ဘာသာစကား ၃ မျိုးနဲ့ ထုတ်လွှင့်နေတာဖြစ်ကြောင်း ပြန်ကြားရေးဝန်ကြီးဌာနက သတင်းထုတ်ပြန်ထားပါတယ်။

မေယု FM အစီအစဉ်ကို မြန်မာဘာသာ တမျိုးတည်းနဲ့ထုတ်လွှင့်မှသာ လက်ခံနိုင်မှာဖြစ်တယ်လို့လည်း ကိုမောင်ဝင်းနိုင် က ပြောပါတယ်။

မေယု FM ကို ရပ်ပေးဖို့ ဘူးသီးတောင်၊ တောင်ကုတ်၊ မြောက်ဦးနဲ့ ကျောက်တော်မြို့နယ် အပါအဝင် မြို့နယ်တချို့မှာ ဆန္ဒပြကြတာဖြစ်ပါတယ်။

RFA Burmese
https://www.facebook.com/rfaburmese



ထရမ့်က အရင်က တရုတ်တစ်ပြည်ထောင်မူကို မေးခွန်းထုတ်ခဲ့ဖူး
အမေရိကန် သမ္မတသစ် ဒေါ်နယ်ထရမ့်က တရုတ်သမ္မတ ရှီဂျင်ပင်းနဲ့ တယ်လီဖုန်းက တဆင့် ပထမဆုံး အကြိမ် ဆက်သွယ် စကားပြောခဲ့ရာမှာ အမေရိကန်ရဲ့ တရုတ်နိုင်ငံ တစ်နိုင်ငံတည်းသာ ရှိတယ် ဆိုတဲ့ မူဝါဒကို ထောက်ခံကြောင်း ပြောခဲ့တယ်လို့ အိမ်ဖြူတော်က သတင်းထုတ်ပြန်လိုက်ပါတယ်။

တရုတ်ပြည် တစ်ပြည်သာ ရှိတယ် ဆိုတဲ့ မူဝါဒဟာ တရုတ်ပြည်မ အစိုးရ တစ်ခုတည်းကိုပဲ သံတမန်ရေးရာ အရ အသိအမှတ်ပြု ဆက်သွယ်မယ် ဆိုတဲ့ မူ ဖြစ်ပါတယ်။

အမေရိကန်အနေနဲ့ ကာလကြာရှည် ကျင့်သုံးလာခဲ့တဲ့ ဒီမူဝါဒဟာ ထရမ့်က ရွေးကောက်ပွဲ အနိုင်ရပြီးတဲ့ အချိန်မှာ ထိုင်ဝမ်သမ္မတ နဲ့ ဖုန်းဆက်သွယ်ပြောဆိုခဲ့မှု အပြီးမှာ အငြင်းပွားဖွယ်ရာ ဖြစ်လာခဲ့ပါတယ်။

အရင် အမေရိကန် ခေါင်းဆောင် အဆက်ဆက်ဟာလည်း တရုတ်ပြည်မကြီးရဲ့ မူ အတိုင်း ထိုင်ဝမ်ကို လွတ်လပ်တဲ့ နိုင်ငံတစ်နိုင်ငံ အဖြစ် အသိအမှတ် ပြုခြင်း မရှိပါဘူး။

တရုတ်အစိုးရဟာ ထိုင်ဝမ်ကျွန်းဟာ သူတို့ဆီက ခွဲထွက်ထားတဲ့ ပြည်နယ် အဖြစ်သာ ရှုမြင်ပြီး တနေ့နေ့မှာ ပြည်မကြီးနဲ့ ပြန်လည် ပေါင်းစည်းရမယ်လို့ ယူဆပါတယ်။

အိမ်ဖြူတော် ထုတ်ပြန်ချက်မှာ ဖေဖေါ်ဝါရီလ ၉ ရက် ကြာသပတေးနေ့ညက ပြုလုပ်ခဲ့တဲ့ နိုင်ငံ ခေါင်းဆောင်တွေ ဖုန်းခေါ်ဆိုမှုဟာ အချိန်ကြာမြင့်ခဲ့ပြီး အကြောင်းအရာ မျိုးစုံ ဆွေးနွေးခဲ့တယ်လို့ ဆိုပါတယ်။ ဖုန်းကတဆင့် စကားပြောဆိုခဲ့မှုဟာ အလွန်အမင်း နွေးထွေးခဲ့တယ်လို့ ကြေညာချက်မှာ ဖော်ပြထားပြီး နှစ်နိုင်ငံ တရားဝင် အလည်အပတ် ပြုလုပ်ဖို့လည်း ခေါင်းဆောင်တွေဟာ အပြန်အလှန် ဖိတ်ကြားခဲ့ကြတယ်လို့ သိရပါတယ်။

အမေရိကန် သမ္မတသစ် ထရမ့်ဟာ သူ့ရဲ့ ရွေးကောက်ပွဲ မဲဆွယ်ကာလတလျှောက်လုံးမှာ တရုတ်နိုင်ငံဟာ မျှတမှု မရှိတဲ့ ကုန်သွယ်ရေး တွေ ပြုလုပ်နေတယ်ဆိုပြီး စွပ်စွဲခဲ့ပြီး တရုတ်ရဲ့ တောင်တရုတ်ပင်လယ်က စစ်ရေးချဲ့ထွင်နေမှုတွေကိုလည်း တုံ့ပြန်မယ်လို့ ခြိမ်းခြောက်ဖူးခဲ့ပါတယ်။

အဲဒီအချိန်တုန်းက ဘေဂျင်း အစိုးရဘက်ကတော့ သမ္မတ ထရမ့်ရဲ့ သဘောထားတွေ အပေါ် စိုးရိမ်ပူပင်မိကြောင်း ထုတ်ပြန်ခဲ့ပြီး အမေရိကန်ကို တရုတ်နဲ့ ပိုမိုနီးနီးကပ်ကပ် ကူးလူးဆက်ဆံဖို့ တောင်းဆိုခဲ့ပါတယ်။

BBC Burmese
http://www.bbc.com/burmese

အမျိုးသားဒီမိုက​ရေစီအဖွဲ့ချုပ် ​(NLD)၏ ရှမ်းပြည်​နယ်​ အလုပ်​အမှု​ဆောင်​အဖွဲ့၊ ရှမ်းပြည်​နယ်​အ​ရှေ့ပိုင်း အလုပ်​အမှု​ဆောင်​အဖွဲ့၊ ရှမ်းပြည်​နယ်​​တောင်​ပိုင်း အလုပ်​အမှု​ဆောင်​အဖွဲ့၊ ရှမ်းပြည်​နယ်​​မြောက်​ပိုင်း အလုပ်​အမှု​ဆောင်​အဖွဲ့များကို ​ဖေ​ဖော်​ဝါ​ရီလ ၉ ရက်​​နေ့တွင်​ ​ကြေညာချက်အမှတ်​ - ၂ / ၀၂ / ၂၀၁၇ ဖြင့် NLDပါတီ၏ ဗဟိုအလုပ်​အမှု​ဆောင်​အဖွဲ့မှ ဖွဲ့စည်းတာဝန်​ ​ပေးအပ်​ခဲ့​ကြောင်း သိရသည်​။





( ကချင်ပြည်နယ် ဝိုင်းမော်မြို့နယ် မိုင်းနားကျေးရွာက ကချင်နှစ်ခြင်းအသင်းတော် KBC ကယ်ဆယ်ရေးစခန်းမှာ ခိုလှုံနေတဲ့ စစ်ပြေးဒုက္ခသည်တွေကို ၂ဝ၁၆ ခုနှစ်က တွေ့ရစဉ် )Photo: Kyaw Myo Min/RFA
ကချင်ပြည်နယ် ဝိုင်းမော်မြို့နယ်မှာရှိတဲ့ စစ်ဘေးဒုက္ခစခန်း ၁၀ ခုကျော်မှာ အခုရက်ပိုင်းအတွင်း ဒုက္ခသည် အရေအတွက် တစ်ထောင်ကျော်လောက် ထပ်တိုးလာနေပါတယ်။

တရုတ်-မြန်မာနယ်စပ် စစ်ဘေးဒုက္ခသည်စခန်းတွေ ကယ်ဆယ်ရေးစခန်းတွေကို ထပ်မံ ရောက်ရှိလာတဲ့ ဒုက္ခသည် အိမ်ထောာင်စုပေါင်း ၃၀၀ ၀န်းကျင်ရှိပြီး အမျိုးသမီးဦးရေ ပိုများတယ်လို့ ဦးကျော်ဝင်းစိန် က RFA ကို ဒီကနေ့ ပြောပြပါတယ်။

ပြီးခဲ့တဲ့ ၂၀၁၁ ခုနှစ် တိုက်ပွဲတွေစတင်ဖြစ်လို့ ထွက်ပြေးခိုလှုံနေတဲ့ စစ်ဘေးဒုက္ခသည် အရေအတွက် ဟာ ခြောက်ထောင်ကျော်ရှိပြီး အခုအသစ်ထပ်မံရောက်ရှိလာသူတွေနဲ့ဆို ဝိုင်းမော်မြို့နယ်က ကယ်ဆယ်ရေးစခန်း ၁၀ ခုကျော်မှာ လာရောက်ခိုလှုံသူ ရှစ်ထောင်ဝန်းကျင်ရှိပြီဖြစ်ပါတယ်။

အသစ်ရောက်ရှိလာသူတွေ အများစုဟာ ကေအိုင်အို ထိန်းချုပ်နယ်မြေအတွင်းက ရောက်ရှိလာသူတွေဖြစ်ပါတယ်။

ထပ်မံရောက်လာသူတွေကို ပြည်နယ်အစိုးရအဖွဲ့၊ လူမှုဝန်ထမ်းကယ်ဆယ်ရေးနဲ့ ပြန်လည်နေရာချထားရေး ဝန်ကြီးဋ္ဌာန အပါအဝင် ပြည်တွင်းပြည်ပ အဖွဲ့အစည်းတချို့က ကူညီပေးနေတယ်လို့သိရပါတယ်။

အစိုးရရဲ့ အုပ်ချုပ်ရေးနယ်မြေနဲ့ ကေအိုင်အို ထိန်းချုပ်နယ်မြေအတွင်းက ကယ်ဆယ်ရေးစခန်းတွေမှာ ထွက်ပြေးခိုလှုံနေကြတဲ့ စစ်ဘေးဒုက္ခသည်လူဦးရေ တစ်သိန်းဝန်းကျင်ရှိပါတယ်။

RFA Burmese
https://www.facebook.com/rfaburmese


ရန်ကုန် ဖေဖော်ဝါရီ ၁ဝ

နိုင်ငံခြားသားများနှင့်လိင်ပျော် ပါးရန်အတွက် အသက်မပြည့်သေး သောမိန်းကလေးငယ်တချို့ကို စေ ခိုင်းခဲ့သည့်အမျိုးသမီးကို ဖေဖော်ဝါရီ (၉)ရက်နေ့ တွင် ရန်ကုန်အရှေ့ပိုင်းခရိုင် တရား ရုံးက လူကုန်ကူးမှုဥပဒေပုဒ်မ ၂၄အရအလုပ်နှင့်ထောင်ဒဏ် ၁၅ နှစ်ချမှတ်လိုက်ကြောင်းသိရသည်။

အဆိုပါ အသက်မပြည့်သော မိန်းကလေးငယ်များမှာ အသက် ၁၃နှစ်သာရှိသေးသည့်မိန်းကလေး တစ်ဦးအပါအဝင်မိန်းကလေးငါးဦး ကို ရန်ကုန်မြို့ရှိ ညကလပ်များကို လာရောက်လည်ပတ်သောတရုတ်၊ ဂျပန်၊ကိုရီးယားစသည့်နိုင်ငံခြားသား များထံပြည့်တန်ဆာအဖြစ် ခိုင်း စေခဲ့သည့်အသက်(၅၂နှစ်) အရွယ် ရှိ မဝေ(ခ)ဝေဝေဦးကို လူကုန်ကူး မှုဖြင့် တောင်ဥက္ကလာပရဲစခန်းမှ တရားလိုဒုရဲမှူး ဦးဝင်းနိုင်ဦးက ပြီးခဲ့သည့်နှစ် ဇန်နဝါရီလက အမှု ဖွင့် အရေးယူခဲ့ခြင်းဖြစ်ကြောင်း သိရသည်။

ရန်ကုန်မြို့ တောင်ဥက္ကလာပ မြို့နယ် အမှတ်(၅)ရပ်ကွက်နေ မဝေ (ခ)မဝေဝေဦးကအသက် ၁၃ နှစ်အရွယ် မိန်းကလေးတစ်ဦးအပါ အဝင် မိန်းကလေးငါးဦးကို ၄င်း ၏နေအိမ်တွင်ထားရှိပြီး ညဘက် တွင် သိမ်ကြီးဈေးရှိ အင်ပါယာ နိုက်ကလပ်သို့ပို့ဆောင်ကာကလပ် ကိုလာရောက်သည့်နိုင်ငံခြားသား များက ပျော်ပါးလိုကြောင်းပြော လျှင် ဟိုတယ်၊ မိုတယ်များသို့ ပို့ ကာ တစ်ဦးကိုငွေကျပ်၈ဝဝဝဝ ယူ ကာ မိန်းကလေးများကို ပြည့်တန် ဆာအဖြစ်စေခိုင်းခဲ့ခြင်းဖြစ်ကြောင်း သိရသည်။

အမည်မဖော်လိုသူနိုင်ငံခြားသား တစ်ဦးက SAVE THE CHILDREN ကို သတင်းပေးသောကြောင့် စုံစမ်းစစ်ဆေးရာ တရားခံနှင့် ခိုင်း စေခံရသူမိန်းကလေးများကိုတရားခံ ၏နေအိမ်တွင် ဖမ်းဆီးရမိခဲ့ခြင်း ဖြစ်သည်။

တောင်ဥက္ကလာပမြို့မရဲတပ်ဖွဲ့ ၏ ပြောကြားမှုအရ ပြည့်တန်ဆာ အဖြစ်ခိုင်းစေခံရသည့် မိန်းကလေး များက လှိုင်သာယာ၊ တောင်ဒဂုံ၊ ဒလ၊ ကွမ်းခြံကုန်းစသည့် မြို့နယ် များမှဖြစ်ကြောင်း သိရသည်။

မြင့်မြတ်အောင်မြင်
The Union Daily
https://www.facebook.com/uniondaily.net


ဖေဖော်ဝါရီ ၁၀

မြစ်ကြီးနားမြို့၊ ကြက်ပေါင်ခြံရပ်ကွက်တွင် နေအိမ်ဆိုင်အတွင်းသို့ဝင်၍ အမျိူးသမီးတစ်ဦးအား ဓါးဖြင့် အချက်ပေါင်းများစွာ ထိုးသတ်သွားမှုတစ်ခုဖြစ်ပွားခဲ့ကြောင်း သိရှိရသည်။


ဖြစ်စဉ်မှာ မြစ်ကြီးနားမြို့၊ ကြက်ပေါင်ခြံရပ်ကွက်၊ နယ်မြေ ၆ ၊ မြို့ပတ်လမ်းရှိ နေအိမ် အမှတ် (---)တွင်နေထိုင်သော ဦးဒဗလျူခေါင်လတ်သည် ဖေဖော်ဝါရီလ ၉ ရက်နေ့ နံနက် ၈ နာရီခန့်က ညီနှစ်ဦးနှင့်အတူ မြစ်ကြီးနားမြို့ ၊မြေမြင့်ရပ်ကွက်၌ ဦးလေးဖြစ်သူဖွင့်လှစ်ထားသော၊ ရွှေပန်းတိမ်ဆိုင်သို့ အလုပ်ဆင်းရန် နေအိမ်နှင့်ဈေးဆိုင်ခန်းတို့ကိုသော့ခတ်၍ သွားခဲ့ကြောင်းသိရသည်။


ရွှေပန်းတိမ်ဆိုင်သို့ရောက်ရှိချိန်တွင် ပန်းတိမ်ဆိုင်နေအိမ်တွင်နေထိုင်သည့် ညီမဝမ်းကွဲ မလိဆန်ပန်သည် ဦးဒဗလျူခေါင်လတ်ထံမှ အိမ်သော့ယူ၍ နေအိမ်ဈေးဆိုင်အား ဖွင့်လှစ်ရောင်းချရန် သွားခဲ့သည်ဟု မြစ်ကြီးနားမြို့နယ်ရဲစခန်းမှ ရရှိသောအချက်အလက်များအရ သိရသည်။

ညနေ ၅ နာရီခန့်တွင် ဦးဒဗလျူခေါင်လတ်၏ ညီနှစ်ဦးမှာ နေအိမ်သို့ အရင်ပြန်သွားရာ နေအိမ်သို့ပြန်လည်ရောက်ရှိချိန်တွင် မလိဆန်ပန်မှာ နေအိမ်ရှိဈေးဆိုင်အတွင်းတွင် ဓါးဒဏ်ရာများဖြင့် လဲကျသေဆုံးနေကြောင်း တွေ့ရှိရသဖြင့် ဦးဒလျူခေါင်လတ်ထံ ဖုန်းဆက်အကြောင်းကြားခဲ့ရာ ဦးဒဗလျူခေါင်လတ်မှ နယ်မြေရဲစခန်းထံသို့ ဖုန်းဆက်တိုင်ကြားခဲ့ကြောင်း၊မလိဆန်ပန်မှာ ခန္ဓာကိုယ်အနှံ့အပြားတွင် ဓါးဒဏ်ရာစုစုပေါင်း ၁၉ ချက်ဖြင့် သေဆုံးနေခြင်းဖြစ်ကြောင်း သိရသည်။


အဆိုပါအမှုအား မြစ်ကြီးနားနယ်မြေရဲစခန်းမှ အမှုကြီးအမှတ်စဉ် ၁/၂၀၁၇၊(ပ)၂၅/၂၀၁၇၊ရာဇသတ်ကြီးပုဒ်မ ၃၀၂ ဖြင့် အမှုဖွင့်အရေးယူထားပြီး အမှုမှန်ပေါ်ပေါက်ရေးအတွက် ကြိုးပမ်းဆောင်ရွက်နေကြောင်း မြစ်ကြီးနားမြို့နယ်ရဲစခန်းမှ သတင်းရရှိသည်။

သေဆုံးသူ မလိဆန်ပန်သည် ဗန်မော် သူနာပြု ကျောင်းဆင်းဖြစ်သည်။ယခင်က သူနာပြုတာဝန်ထမ်းဆောင်ခဲ့ဖူးသူတစ်ဦးဖြစ်ကြောင်း သိရပြီး ယခုအခါတွင် အဆိုပါအလုပ်ကို ဆက်လက်လုပ်ကိုင်ခြင်းမရှိတော့ကြောင်းလည်း သေဆုံးသူနှင့် နီးစပ်သူအချို့ထံမှ သိရှိရသည်။

ဝေဖြိုးအောင်
Myitkyina News Journal
https://www.facebook.com/myitkyinanewsjournal.mm