04/07/17


NCAလက်မှတ်ရေးထိုးပြီးသား တောင်ပိုင်းရှမ်းပြည် တပ်မတော်(RCSS/SSA)ရဲ့ ပင်လုံမြို့နယ်ကတပ်စခန်းတစ်ခုကို မြန် မာ့တပ်မတော်ကနေ၀င်ရောက်ဝင်ရောက်တိုက်ခိုက်တဲ့ဖြစ်စဉ်အပေါ်ပြည်နယ်အဆင့်ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့် ကြည့်ရေးကော်မတီ (JMC-S) ကနေ အမြန်ဆုံးဖြေရှင်းပေးဖို့ RCSSဘက်ကတိုင်ကြားခဲ့ပါတယ်။ ဒီတိုင်ကြား ချက်ကို JMC-S ကော်မီတီဥက္ကဌထံတင်ပြထားဆဲလို့လဲ JMC-Sကော်မတီဝင်တဦးကပြောပါတယ်။ တောင်ပိုင်းရှမ်းပြည် တပ်မတော်ဟာ အစိုးရနဲ့NCAအပစ်ရပ်လက်မှတ်ရေးထိုးထားတဲ့အဖွဲ့အစည်းတခုဖြစ်ပြီး အခုလိုတိုက်ပွဲဖြစ်ပွါးရတာကလဲ မဖြစ်သင့်တဲ့ကိစ္စလို့NCAလက်မှတ်ထိုးအဖွဲ့ဝင်တွေကပြောဆိုမှုတွေရှိနေပါတယ်။ ထိုင်းအခြေစိုက်ဗွီအိုအေသတင်း ထောက် နိုင်ကွန်းအိန်ကနေအခုလိုသတင်းပေးပို့ထားပါတယ်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားတဲ့ တောင်ပိုင်းရှမ်းပြည် တပ်မတော်(RCSS/SSA)ရဲ့ ပင်လုံမြို့နယ်ကတပ်စခန်းတစ်ခုကို မြန်မာ့တပ်မတော်က၀င်ရောက်လာပြီး တိုက်ပွဲဖြစ်ပွါးခဲ့ တဲ့ အပေါ်မှာ ပြည်နယ်အဆင့်ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့် ကြည့်ရေးကော်မတီ (JMC-S) ကနေ အမြန်ဆုံးဖြေရှင်းပေးဖို့ တိုင်ကြားစာပို့ထားတယ်လို့ (RCSS/SSA)ရဲ့ပြောခွင့်ရဒုဗိုလ်မှူးကြီးစိုင်းငိန်းကပြောပါတယ်။

“မနေ့က ဖြစ်ဖြစ်ချင်း ကျနော်တို့ JMC-S ပေါ့နော် ပြည်နယ်အဆင့် ပစ်ခတ်တိုက် ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ ကို ကျနော်တို့ အဖွဲ့အစည်းကနေပြီးတော့ စာရေးအကြောင်းကြားထားတာရှိပါတယ်။ ဘာကြောင့်ဒီလိုဖြစ်သလဲပေါ့နော် ဒီလိုလုပ်တာဟာ NCA အရရော ကျနော်တို့ bilateral agreement ကိုရော ချိုးဖောက်ရာရောက်တယ်ဆိုတဲ့ အဲဒီ၁ ချက်ကိုရော ကျနော်တို့ ပြောထားတယ်။ အဲဒါကြောင့် ဒီကိစ္စကို အမြန်ဆုံး ဖြေရှင်းပေးဖို့ တောင်းဆိုထားတာရှိတယ်။”

တိုက်ပွဲဖြစ်ပွါးမှုနဲ့ပက်သက်ပြီး တောင်ပိုင်းရှမ်းပြည်တပ်မတော်ဘက်က တိုင်ကြားစာပေးပို့ခဲ့တဲ့အပေါ် ပြည်နယ်အဆင့် ပစ်ခတ်တိုက် ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-S) အရပ်ဖက်ကော်မီတီဝင်တဦးဖြစ်သူ မနန်းရွှေ နွယ်ဝင်းကနေအခုလိုပြောပါတယ်။

“ကျမတို့လည်း ဥက္ကဋ္ဌကြီးဆီကို တင်ပြထားတုန်းပဲရှိသေးတယ်ရှင့် ကျမတို့လည်း ပြီးခဲ့တဲ့ ၃ ရက်နေ့ကပဲ လပတ်အစည်းအဝေးလုပ်တယ်ဆိုတော့။ မတ်လတုန်းက တိုက်ပွဲလည်း သူတို့က ပြောမယ်ဆိုရင်တော့ တပ်မတော်ဘက်က အမြဲတမ်းပဲ ဆက်ဆံရေးရုံးတွေကို အကြောင်းမကြားပဲနဲ့ အမြဲတမ်းဝင်လာပြီးတော့ နယ်မြေရှင်းလင်းရေးတွေလုပ်တယ်ပေါ့နော်။ အဲဒါကြောင့်မို့လို့ပဲ တဖက်ကလည်း ရှိနေတဲ့ EAO အဖွဲ့ ကလည်း ကြိုတင်အကြောင်းမကြားထားတာကြောင့်မို့ ရှောင်ပေးလို့မရဘူး အဲလိုပုံစံဖြစ်နေတယ်ရှင့်။”

ရှမ်းပြည်နယ်အဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-S)ရဲ့တပ်မတော် စစ်ဖက်ဆိုင်ရာတာဝန်ရှိသူတွေကိုဆက်သွယ်မေးမြန်းခဲ့ပေမဲ့လဲ ပြန်လည်ဖြေဆိုခြင်းမရှိခဲ့ပါဘူး။

မနေ့ကမွန်းလွှဲပိုင်းမှာ ရှမ်းပြည်နယ်တောင်ပိုင်း ပင်လုံမြို့နဲ့(၁၀)မိုင်အကွာ (RCSS/SSA)တပ်စခမ်းချရာနမ့်ဆိုင်းရွာ ဘက်ကိုမြန်မာ့တပ်မတော်စစ်ကြောင်းကနေ ၀င်ရောက်လာခဲ့လို့တိုက်ပွဲဖြစ်ပွါးခဲ့တာပါ။ ဒီအခြေအနေကို(RCSS/SSA) ရဲ့ ပြောခွင့်ရဒုဗိုလ်မှူးကြီးစိုင်းငိန်းကအခုလိုဆက်ပြောပါတယ်။

“ဖြစ်တဲ့နေရာက ပင်လုံမြို့မြောက်ဖက် ၁၀ မိုင် အကွာမှာ နမ့်ဆိုင်းရွာနားမှာ တိုက်ပွဲဖြစ်တာဖြစ်ပါတယ်။ ဖြစ်တာကတော့ အစိုးရတပ်မတော်ကနေပြီးတော့ ကျနော်တို့ ထိန်းချုပ်တဲ့နယ်မြေထဲကို အကြောင်းမကြားပဲ ၀င်လာတာလေ၊ အဲဒါဆိုတော့ ထိပ်တိုက်တွေ့တဲ့သဘောပါ။အမှန်ဆို NCA အရကော ကျနော်တို့ bilateral agreement အရရော ကျနော်တို့နယ်မြေထဲကို လက်နက်ကိုင်ဆောင်ပြီးလာမယ်ဆိုရင် ကြိုတင်ညှိနှိုင်းအကြောင်းကြားပြီးမှ လာရတာကို ။ မနေ့ကအဲဒီလိုမဟုတ်ဘူး ဗြုန်းတိုင်းကြီးရောက်လာပြီးတော့ သိတဲ့အတိုင်း စစ်သဘောအရဆိုရင် ထိတွေ့မှုလေးတွေဖြစ်သွားတာဖြစ်ပါတယ်။ ကျနော်တို့ဘက်ကတော့ အထိအခိုက်မရှိပါဘူး။ ဒါပေမယ့် အစိုးရတပ်မတော်ဘက်ကတော့ နည်းနည်းပါးပါးထိတယ်လို့တော့ ကြားတယ်ခင်ဗျ။ဒါပေမယ့် ကျနော်တို့ဘက်ကလည်း အတည်ပြုလို့မရဘူးပေါ့နော်။”

လက်ရှိမှာ တိုက်ပွဲရပ်တန့်နေတယ်ဆိုပေမဲ့ စစ်ရေးအသင့်အနေအထား မှာ ရှိနေတယ်လို့လဲသူကဆိုပါတယ်။

တောင်ပိုင်းရှမ်းပြည်တပ်မတော်ဟာ မြန်မာအစိုးရ နဲ့NCAအပစ်ရပ်လက်မှတ်ရေးထိုးထားတဲ့ အဖွဲ့အစည်းတခုဖြစ်ပြီး အခုလိုတိုက်ပွဲဖြစ်ပွါးရတာကလဲ မဖြစ်သင့်တဲ့ကိစ္စလို့ NCAအပစ်ရပ်လက်မှတ်ရေးထိုးထားတဲ့ ပအိုဝ့်အမျိုးသားလွတ်မြောက်ရေးအဖွဲ့ချုပ် ခေါင်းဆောင်တဦး ဖြစ်သူ ခွန်မင်းသိန်းကပြောပါတယ်။

“ကျနော်ထင်တာကတော့ ဒီ NCA စာချုပ်အပေါ်မှာ လေးစားလိုက်နာမှု အားနည်းနေကြသေးတယ်လို့ပြောရမှာပေါ့နော်။ အမှန်တကယ်ဆိုရင်တော့ ဒီ NCA စာချုပ်လက်မှတ်ရေးထိုးပြီးပြီဆိုရင်တော့ ဒါကတော့ မဖြစ်သင့်တဲ့ ကိစ္စလို့ ကျနေ်ာကတော့ မြင်ပါတယ်။”

ပြီးခဲ့တဲ့မတ်လအတွင်း တောင်ပိုင်းရှမ်းပြည်တပ်မတော်နဲ့မြန်မာ့တပ်မတော်တို့အကြား မိုင်းပြင်းမြို့နယ်နဲ့သီပေါမြို့နယ် တွေမှာတိုက်ပွဲနှစ်ကြိမ်ဖြစ်ပွါးခဲ့ပါသေးတယ်။

ဒီလိုဖြစ်ပွါးတဲ့တိုက်ပွဲတွေကို JMC-Sအနေနဲ့တိတိကျကျအရေးယူဖြေရှင်းမှုမျိုးမရှိခဲ့ဘူးလို့ RCSSဘက်ကပြောပါတယ်။

တောင်ပိုင်းရှမ်းပြည်တပ်မတော်ဟာ မြန်မာအစိုးရနဲ့ပြည်နယ်အဆင့် ပြည်ထောင်စုအဆင့် အပစ်ရပ်စဲရေး ဆွေးနွေး တုန်းက တပ်တည်နေရာကိုတိတိကျကျဆွေးနွေးသတ်မှတ်ခဲ့တာမရှိတဲ့အတွက် အခုလိုနယ်မြေပြဿနာအတွက် ပဋိပက္ခတွေဖြစ်ပွါးနေခဲ့တယ်လို့ RCSSဘက်ကပြောပါတယ်။

တောင်ပိုင်းရှမ်းပြည်တပ်မတော်ဟာ မြန်မာအစိုးရနဲ့ပစ်ခတ်တိုက်ခိုက်မှုရပ်စဲရေး သဘောတူစာချုပ်NCA လက်မှတ် ရေးထိုးထားတဲ့အဖွဲ့ဖြစ်သလို လက်မှတ် ရေးထိုးပြီး မြန်မာ့တပ်မတော်နဲ့အကြိမ်(၂၀)လောက်တိုက်ပွဲဖြစ်ပွါးခဲ့ပါတယ်။

လက်ရှိတိုင်းရင်းသားတပ်ပေါင်းစုဖြစ်တဲ့UNFCအနေနဲ့NCAလမ်းကြောင်းအတိုင်းဆက်လက်ညှိနှိုင်းသွားဖို့ မနေ့က ဗဟိုအလုပ်အမှုဆောင်အစည်းအဝေးကနေ သဘောတူညီမှုတွေရရှိခဲ့ပါတယ်။

NCAလက်မှတ်ရေးထိုးထားတဲ့အဖွဲ့တွေနဲ့တိုက်ပွဲဆက်လက်ဖြစ်ပွါးနေတာဟာ လက်ရှိအစိုးရကနေလုပ်ဆောင်နေတဲ့ ငြိမ်းချမ်းရေးလုပ်ငန်းစဉ်ပုံရိပ်ကိုထိခိုက်စေနိုင်တယ်လို့လဲ တိုင်းရင်းသားအရေးလေ့လာသူတွေက သုံးသပ်ပြောဆို မှုတွေကလဲရှိနေပါတယ်။
VOA Burmese News

တပ်မတော်နေ့ စစ်ရေးပြအခမ်းအနား ကို တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်။ (၃-၂၇-၁၄)

 နိုင်ငံတော်အတိုင်ပင်ခံပု၈္ဂိုလ်က တိုင်းပြည်ကောင်းအောင် သူတို့ထက်ပိုလုပ်နိုင်မဲ့သူရှိရင် နေရာဖယ်ပေးမယ်လို့ "နိုင်ငံတော်အခြေပြမိန့်ခွန်း" ထဲမှာ ပြောကြားသွားတာကို နိုင်ငံတကာမီဒီယာတွေက အလေးအနက်ထား ဖော်ပြကြပါတယ်။ တပ်မတော်ကာကွယ်ရေးဦးစီးချုပ် ကတော့ ပါတီနိုင်ငံရေးထက် တပ်မတော်သည်သာလျင် တိုင်းပြည်အတွက် တကယ်အကျိုးရှိအောင်ဆောင်ရွက်တဲ့ အင်အားစုဖြစ်တယ်လို့ ဆိုပါတယ်။ ဒီပြောကြားချက်တွေရဲ့အတိမ်အနက် ဘယ်လောက်ရှိသလဲ၊ ဘယ်လိုအဓိပ္ပါယ်ကောက်ယူကြမလဲဆိုတာ မြန်မာနိုင်ငံရေးသုံးသပ်သူတွေ ဖြစ်ကြတဲ့ ဒေါက်တာရန်မျိုးသိမ်း၊ ဦးဝင်းမင်းတို့နဲ့ ဦးကျော်ဇံသာတို့ ဆွေးနွေးသုံးသပ်ထားပါတယ်။ ဒေါ်အောင်ဆန်းစုကြည် အနေနဲ့ နေရာဖယ်ပေးဖို့ဆိုတာ မဖြစ်နိုင်ဘူးလို့ ဒေါက်တာရန်မျိုးသိမ်းက အခုလိုစတင်သုံးသပ်ပါတယ်။

ဒေါက်တာရန်မျိုးသိမ်း ။ ။ ကျနော်တို့နိုင်ငံရဲ့  ဒီမိုကရေစီ အပြောင်းအလဲမှာ ဒေါ်အောင်ဆန်းစုကြည်ဟာ အင်မတန်မှ အရေးကြီးတယ်။ အဲဒီအတွက်ကြောင့်လို့ပဲ ပြည်သူလူထုတရပ်လုံးက ၂၀၁၅ ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ်ကို ရွေးချယ်ခဲ့တာလို့ ကျနော်က သုံးသပ်ပါတယ်။ အဲဒီအခါကြတော့ ဒေါ်အောင်ဆန်းစုကြည်ရဲ့  နိုင်ငံတော်အခြေပြမိန့်ခွန်းထဲမှာပါတဲ့ ပြောဆိုချက်ဟာ လက်တွေ့ကျကျ ဖော်ဆောင်ဖို့ ခက်ခဲတဲ့ အနေအထားမှာ ရှိပါတယ်။ ကျနော်ဆိုလိုချင်တဲ့သဘောက ဒေါ်အောင်ဆန်းစုကြည်ကလွှဲရင် မြန်မာနိုင်ငံကို မြန်မာပြည်သူလူထုရဲ့  ဆန္ဒနဲ့အညီ ဒီမိုကရေစီ အပြောင်းအလဲကို ဖော်ဆောင်နိုင်တဲ့ ခေါင်းဆောင်၊ အစုအဖွဲ့ ပုံစံမျိုးက မရှိတဲ့အနေအထားမျိုး ဖြစ်နေတဲ့အတွက်ကြောင့်လို့မို့ တကယ်တမ်း လက်တွေ့အကောင်အထည်ဖော်ဖို့ဆိုတာ ခဲယဉ်းတယ်လို့ပဲ ကျနော်က သုံးသပ်ပါတယ်။

ဦးကျော်ဇံသာ ။ ။ ကိုဝင်းမင်း က ဘယ်လို သဘောရပါလဲ။ ဒေါ်အောင်ဆန်းစုကြည်က လုပ်ပေးနိုင်တဲ့လူရှိရင် သူထွက်ပေးဖို့ အဆင်သင့်ပဲလို့ ပြောတာနဲ့ ပတ်သက်ပြီး…

ဦးဝင်းမင်း ။ ။ နောက်လာမယ့် ရွေးကောက်ပွဲအတွက် NLD ပါတီကို ဆက်ပြီးတော့ လူတွေကို ထောက်ခံပေးဖို့၊ ကျနော်ထင်တယ် အဲဒါကို အဓိကပြောပုံရတယ်။ တကယ်တမ်း ထွက်ပေးတာထက် ဒါကို မမက်မောဘူးဆိုတဲ့ပုံစံ၊ အကောင်းဆုံးလုပ်ဖို့ပဲ စဉ်းစားထားတယ်ဆိုတဲ့ ပုံစံမျိုးနဲ့ ပြောခဲ့တယ်လို့ ကျနော် ယူဆပါတယ်။

ဦးကျော်ဇံသာ ။ ။ အဲဒီတော့ သူကို ၂၀၁၅ မှာ စုပြုံမဲပေးခဲ့ကြတဲ့ ပြည်သူတွေအတွက်ကော ဆရာတို့နှစ်ယောက် တွေးသလို မတွေးကြရင် ဒီစကားဟာ သူတို့အတွက်ကော စိတ်ဓါတ်ကျစရာ၊ စိတ်ပျက်စရာ မဖြစ်နိုင်ဘူးလား။

ဒေါက်တာရန်မျိုးသိမ်း ။ ။ လက်ရှိ ဒေါ်အောင်ဆန်းစုကြည် ဦးဆောင်နေတဲ့ အမျိုးသားဒီမိုကရေစီအဖွဲ့ချုပ် အစိုးရရဲ့  ဆောင်ရွက်ချက်တွေအပေါ် ပြည်သူတွေကြားထဲ အားမလိုအားမရ ဖြစ်တာတွေ၊ စိတ်တိုင်းမကျ ဖြစ်တာတွေကို တွေ့နေရပါတယ်။ အဲဒါကြောင့်မို့လဲ ပြည်သူတွေအနေနဲ့ အတိုင်းအတာတခုအထိ နိုင်ငံရေးအပေါ်မှာ စိတ်ဝင်စားမှု ကျဆင်းလာခဲ့တဲ့ အနေအထားကို ဒီတနှစ်အတွင်းမှာ တွေ့နေရတယ်လို့တော့ ကျနော်က သုံးသပ်ပါတယ်။

ဦးကျော်ဇံသာ ။ ။ အဲဒီမိန့်ခွန်းရဲ့  အကျိုးဆက်က - အဲဒီစကား၊ အသုံးအနှုန်း အကျိုးဆက်က ပြည်သူတွေအပေါ် ဘယ်လိုရိုက်ခတ်မယ် ထင်ပါလဲ။

ဒေါက်တာရန်မျိုးသိမ်း ။ ။ ပြည်သူလူထုအများစုအနေနဲ့ ဒေါ်အောင်ဆန်းစုကြည်အပေါ်မှာ ယုံကြည်နေဆဲ၊ အားကိုးနေဆဲ။ ဒါပေမဲ့ တဘက်က ဒေါ်အောင်ဆန်းစုကြည်က ပြောတာကတော့ ဒီလို အားစိုက်မှုမျိုးကို သူက အားမပေးဘူးလို့ ပြောတယ်။ တခြားတဘက်မှာလဲ ပြည်သူလူထုအနေနဲ့ ရွေးချယ်စရာမရှိတဲ့ အကျပ်အတည်းတခုကိုလဲ ကြုံတွေ့နေရတယ်လို့ သုံးသပ်ပါတယ်။ အဲဒီအတွက်ကြောင့်မို့ ဒေါ်အောင်ဆန်းစုကြည် မိန့်ခွန်းမှာပါတဲ့ အကြောင်းအရာဟာ ပြည်သူလူထုကြားမှာတော့ သိသိသာသာ သက်ရောက်မှု မရှိနိုင်ဘူးလို့ သုံးသပ်ပါတယ်။

ဦးကျော်ဇံသာ ။ ။ ကိုဝင်းမင်းက ဘယ်လို သုံးသပ်ပါလဲ။ ခေါင်းဆောင်တယောက်က အဲဒီလို ပြောလိုက်တဲ့အခါမှာ သူကို မဲပေးခဲ့ကြတဲ့ ပြည်သူတွေ ဘယ်လို ခံစားကြရမလဲ။ သူတို့စိတ်ထဲမှာ ညှိုငယ်စိတ် ဖြစ်မယ်ထင်ပါလား။

ဦးဝင်းမင်း ။ ။ အဓိကတော့ နှစ်မျိုးဖြစ်နိုင်ပါတယ်။ တမျိုးကတော့ ဒေါ်အောင်ဆန်းစုကြည်အပေါ် ပုဂ္ဂိုလ်ရေးအရလဲ ယုံကြည်မှု များတဲ့အခါကြတော့ ဒေါ်အောင်ဆန်းစုကြည်အပေါ် ခွင့်လွှတ်နိုင်တဲ့ အနေအထားမျိုးလဲ ရှိနိုင်ပါတယ်။ လောလောဆယ်မှာ ကြုံနေရတဲ့ အခက်အခဲတွေကြောင့် ဒီအပြောင်းအလဲတွေကို ချက်ချင်းမြန်မြန် မလုပ်နိုင်တာမျိုး။ အကောင်းဆုံးတော့ ကြိုးစားခဲ့တယ် ဆိုတာမျိုး။ ဒါပေမဲ့ နောက်တမျိုးကလဲ လုပ်ဆောင်နိုင်မှု စွမ်းအားတွေ အားနည်းခဲ့တဲ့အပေါ်မှာ။ အထူးသဖြင့် တိုင်းရင်းသားတွေအနေနဲ့ အစိုးရအနေနဲ့ ပိုပြီးတော့ ကောင်းကောင်းမွန်မွန် လုပ်ရင်လုပ်၊ မလုပ်လို့ရှိရင် နောက်ပိုင်း ရွေးကောက်ပွဲတွေမှာ မဲရတာ နည်းသွားနည်းသွားတယ် ဆိုတဲ့သဘောပါ။ သူတို့ သင်ခန်းစာ ပေးချင်တဲ့သဘောရှိတာကို တွေ့ရပါတယ်။

ဦးကျော်ဇံသာ ။ ။ အခု ကာချုပ်ရဲ့  မိန့်ခွန်းကို ကြည့်ကြပါစို့။ ဗိုလ်ချုပ်မှူးကြီးမင်းအောင်လှိုင် ပြောတဲ့မိန့်ခွန်းမှာ ပထမပိုင်းကတော့ မြန်မာနိုင်ငံရဲ့  သမိုင်းဖြစ်စဉ်ကို စစ်တပ်က အဓိပ္ပါယ်ဖွင့်ဆိုချက်အတိုင်းပဲ တစုံတရာမပြောင်းလဲဘဲ ပြောသွားတာကို တွေ့ရပါတယ်။ ဥပမာအားဖြင့် ၁၉၆၂ မှာ စစ်တပ်အာဏာသိမ်းရတာ ဖယ်ဒရယ် ခွဲထွက်မှာမို့လို့ တိုင်းပြည်လွတ်လပ်ရေး ဆုံးရှုံးမယ်။ အချုပ်အခြာအာဏာ ဆုံးရှုံးမယ့် အခြေအနေ ဖြစ်နေလို့ဆိုပြီးတော့ စွပ်စွဲပါတယ်။ တကယ်တော့ Historically အထောက်အထား မခိုင်လုံပါဘူး။ ဟုတ်လဲမဟုတ်ပါဘူး။ အဲဒီတုန်းက ဖယ်ဒရယ်မူကို တင်ကြတာလည်း ဝန်ကြီးချုပ်ရဲ့  Blessing နဲ့ တိုင်းရင်းသားတွေ တရားဝင်ပြောဆို ဆွေးနွေးကြပြီးမှ ဖြစ်ပါတယ်။ အဲဒါကို စစ်တပ်က ရမယ်ရှာပြီးတော့ အာဏာသိမ်းသွားတယ်လို့ နောက်ပိုင်းမှာ သုံးသပ်ပြီးတော့ အဖြေထွက်လာကြပါပြီ။ နောက်တခုက ၁၉၈၈ လူထုအုံကြွမှုကိစ္စမှာလဲ သူတို့ မဆလ အစိုးရရဲ့  အားနည်းချက်ကို လူတွေက အခွင့်ကောင်းယူပြီး လှုံဆော်လိုက်တဲ့အတွက် လွတ်လပ်ရေးနဲ့ အချုပ်အခြာအာဏာ ဆုံးရှုံးမယ့်အခြေအနေ ရောက်လာတယ်ဆိုတဲ့ သဘောမျိုးနဲ့ ပြောပါတယ်။ ဒီသမိုင်းသုံးသပ်ချက် နှစ်ခုကို ကျနော် ပထမဦးဆုံး စောကြောသိချင်ပါတယ်။ ဒေါက်တာရန်မျိုးသိမ်း ပြောပေးပါ။ ဘယ်လို သဘောရပါလဲ။

ဒေါက်တာရန်မျိုးသိမ်း ။ ။ ကျနော်ကတော့ ဦးကျော်ဇံသာ ဆွေးနွေးသလိုပါပဲ တပ်မတော်ကာကွယ်ရေး ဦးစီးချုပ်ရဲ့  ၁၉၆၂ ခုနှစ် အာဏာသိမ်းမှု နဲ့ ၁၉၈၈ အာဏာသိမ်းမှုပေါ်မှာ သုံးသပ်ချက်ဟာ မြေပြင်မှာ ဖြစ်နေတဲ့ သမိုင်းဆိုင်ရာ အချက်အလက်တွေနဲ့ ကွဲပြားနေတယ်လို့ ကျနော်က သုံးသပ်ပါတယ်။ ဥပမာ ကျနော်တို့ နိုင်ငံဟာ ၁၉၆၂ မတိုင်ခင်မှာ ဒေသတွင်းမှာ ထိပ်တန်းအဆင့်ဝင် နိုင်ငံတနိုင်ငံ ဖြစ်ခဲ့ပါတယ်။ အဲဒီတော့ ၁၉၆၂ ခုနှစ် အာဏာသိမ်းပြီးနောက်ပိုင်းမှာ တဖြည်းဖြည်းနဲ့ နိုင်ငံရေး၊ စီးပွားရေး၊ လူမှုရေးအဘက်ဘက်က ချွတ်ခြုံကျလာပြီးတော့ ၁၉၈၀ အလွန်မှာ ဖွံ့ဖြိုးတိုးတက်မှု နောက်အကျဆုံး နိုင်ငံအဆင့်ကို ရောက်ခဲ့ပါတယ်။ အဲဒီကနေ ၁၉၈၈ ခုနှစ်မှာ ထပ်ပြီးတော့ စစ်တပ်က အာဏာသိမ်းပြီးနောက်မှာ အခု ၂၀၁၅-၁၆ -၁၇ ကာလာကို ကြည့်မယ်ဆိုရင် ကျနော်တို့ နိုင်ငံဟာ အရှေ့ တောင်အာရှမှာ အဆင်းရဲဆုံးနိုင်ငံ အနေအထားကို ရောက်နေပါတယ်။ အဲဒီလို ဖြစ်နေရတဲ့ အခြေအနေကို တပ်မတော်အနေနဲ့ မှန်မှန်ကန်ကန် သုံးသပ်စမ်းစစ်နိုင်ဖို့ လိုအပ်တယ်လို့ မြင်ပါတယ်။ အဲဒါမှသာလျှင် ကျနော်တို့နိုင်ငံရဲ့  ဒီမိုကရေစီ အပြောင်းအလဲဟာ ပြည်သူလူထုကို တကယ် မျက်နှာမူပြီးတော့၊ ပြည်သူလူထု အကျိုးစီးပွားကို ရှေ့ ရှုတဲ့ အပြောင်းအလဲ ဖြစ်လာမယ်လို့ သုံးသပ်ပါတယ်။

ဦးကျော်ဇံသာ ။ ။ ကျနော် အဓိက ပြောချင်တာလဲ အဲဒါပါပဲ။ နောက်ကဖြစ်ခဲ့တဲ့ သမိုင်းဟောင်းကို မှန်မှန်ကန်ကန် မသုံးသပ်ဘဲနဲ့ ရှေ့ ခရီး ဘယ်လိုဆက်နိုင်မလဲဆိုတာ မေးမြန်းစရာကိစ္စတခု ဖြစ်ပါတယ်။ တချိန်တည်းမှာပဲ အခု ရှမ်းမြောက်မှာ ဖြစ်နေတဲ့ကိစ္စဟာလဲ အချုပ်အခြာအာဏာကို ထိပါးစော်ကားတဲ့ကိစ္စဆိုပြီးတော့ သူက သုံးသပ်သွားပါတယ်။ ကိုဝင်းမင်း ခြုံငုံပြီး သုံးသပ်ပါအုံး။

ဦးဝင်းမင်း ။ ။ ကျနော့်အမြင်ကတော့ သမိုင်းကြောင်းမှာလဲ တပ်မတော် စဉ်းစားခဲ့တဲ့ပုံတွေက တသွေးတသံတမိန့် စည်းကမ်းအတိုင်း သွားရမယ်။ အားလုံးအယူအဆတခုတည်းနဲ့ လုပ်ရမယ်။ အဲဒီလိုမျိုး စဉ်းစားပြီးတော့ နိုင်ငံရေးအဖွဲ့အစည်းတွေ သဘာဝကြတော့ တပ်မတော်နဲ့ မတူဘူး။ နိုင်ငံရေးအဖွဲ့တွေမှာတော့ မတူတဲ့ စဉ်းစားချက်တွေ၊ အတွေးအခေါ်တွေ မျိုးစုံရှိနိုင်တယ်။ ဒီအပေါ်မှာညှိပြီးတော့ လုပ်ကြတယ်။ အခုန ၁၉၆၂ ခုနှစ်မှာ ဖယ်ဒရယ်နိုင်ငံတော် ထူထောင်ရေးအတွက်ဖြစ်ဖြစ် တိုင်းရင်းသားအခွင့်အရေး တောင်းဆိုတယ်ဆိုတာ မတူတဲ့ စဉ်းစားချက်တွေ ညှိနှိုင်းကြ ဆွေးနွေးကြတုန်းမှာပဲ တပ်မတော်အနေနဲ့က တကယ်လို့ ဆွေးနွေးပွဲတွေမှာ မပြေလည်လိုရှိရင် တိုင်းရင်းသားတွေက ခွဲထွက်နိုင်တယ်။ အစိုးရပါတီက ကွဲမယ့်အလားအလာရှိတယ်။ ကွဲလည်းကွဲခဲ့တယ်။ အဲဒါကြောင့်မို့ သူတို့က တပ်မတော်ကို စည်းရုံးလို့ရှိရင် တပ်မတော်လည်း ကွဲသွားနိုင်တယ်ဆိုတဲ့ အလွန်အကျွံ စိုးရိမ်မှုအောက်မှာ ဖြစ်သွားတယ်လို့ ကျနော်ထင်တယ်။ ၁၉၆၂ ခုနှစ် အနေအထားက။ နောက် ၁၉၈၈ အနေအထားမှာတော့ တပ်မတော် ယူဆတာက ပြည်ပ ပရောဂ ပါတယ်။ အဲဒါကြောင့်မို့ တိုင်းပြည်ရဲ့  အချုပ်အခြာအာဏာ ဆုံးရှုံးနိုင်တယ်။ ဒီမိုကရေစီနိုင်ငံတွေရဲ့  လှုံဆော်မှုပါတယ်။ ဒါပေမဲ့ တကယ်တမ်းက ပြည်သူတွေက အစိုးရစနစ်တခုပြောင်းဖို့ တောင်းဆိုခဲ့တာ ဖြစ်ပါတယ်။ ညှင်သာစွာနဲ့ ဖြေရှင်းလို့ရတဲ့ အနေအထားလည်း ရှိပါတယ်။ အာဏာသိမ်းရမယ့် အဆင့်အထိတော့ မလိုအပ်ပါဘူး။ အဲဒီတော့ အခုလို အာဏာသိမ်းလိုက်တော့ ဘာဖြစ်လဲဆိုတော့ ကိုရန်မျိုးသိမ်း ပြောသလို တိုင်းပြည်က တိုးတက်မလာဘဲ၊ စစ်အုပ်ချုပ်ရေးအောက်မှာ တိုင်းပြည်ကို ကောင်းအောင်လုပ်ရတာ အရမ်းခက်ပါတယ်။ နောက်တခုက အချုပ်အခြာ အာဏာပိုင်းမှာ အခု ရှမ်းပြည်မြောက်ပိုင်းကို အချုပ်အခြာအာဏာဆိုပြီး သုံးခဲ့ပါတယ်။ ဒီနေရာမှာတော့ တရုတ်နိုင်ငံဘက်က ဝင်ရောက်စွက်ဖက်မှု ရှိတယ်ဆိုတဲ့ ပုံစံမျိုး။ အလားတူပဲ ရခိုင် မူစလင်ကိစ္စမှာလဲ အနောက်နိုင်ငံတွေက ဝင်စွက်ဖက်တယ်ဆိုတဲ့ ပုံစံမျိုး အချုပ်အခြာအာဏာကို သုံးသွားပုံရပါတယ်။ ဒီနေရာမှာတော့ ပြည်တွင်းပြဿနာ ရှိနေသရွေ့ တော့ နိုင်ငံတကာက ပြောတာဆိုတာကတော့ ဒီခေတ်ကြီးမှာ ရှိနေတဲ့အတွက် ပြည်တွင်းပြဿနာကို နိုင်ငံတကာ ထိပါးတယ်ဆိုတဲ့သဘောနဲ့ စစ်ရေးအရ ဖြေရှင်းတဲ့အခါမှာ အလွန်အကျွံတွေ ဖြစ်ပြီးတော့ ကိုယ့်အချင်းချင်းပဲ ပြန်တိုက်ရ၊ ကိုယ့်အချင်းချင်းပဲ နစ်နာရ။ တိုင်းပြည်နောက်ဆုံးတော့ နစ်နာရတာ ဖြစ်ပါတယ်။

ဦးကျော်ဇံသာ ။ ။ ကျနော် နောက်ဆုံးမေးချင်တာကတော့ အမျိုးသားနိုင်ငံရေး နဲ့ ပါတီနိုင်ငံရေးဆိုတဲ့ ကိစ္စ ဖြစ်ပါတယ်။ သူက ပါတီနိုင်ငံရေးဆိုတာ မိမိပါတီ အင်အားတောင့်တင်းရေး၊ ပါတီ နိုင်ငံရေးအာဏာ ရရှိရေးဖြစ်တယ်။ အာဏာတည်မြဲရေးကို အစဉ်တစိုက် ဦးစားပေးနေရတယ်။ အမျိုးသားနိုင်ငံရေး လမ်းကြောင်းက သွေးဖီမှုမျိုး ဖြစ်တယ်။ အမျိုးသားရေး အကျိုးစီးပွားကို လစ်လျူရှုနိုင်တယ် စသဖြင့် အဲဒါတွေကို ထောက်ပြပြီးတော့ သူတို့ တပ်မတော်သည်သာလျှင် အမျိုးသားအကျိုးစီးပွားကို စိုက်လိုက်မတ်တပ် အမျိုးသားနိုင်ငံရေးလမ်းကြောင်းအတိုင်း ဆောင်ရွက်နိုင်တဲ့ အဖွဲ့အစည်းဆိုပြီး ပြောသွားပါတယ်။ တကယ်တော့ နိုင်ငံရေးသိပ္ပံ ဝေါဟာရထဲမှာ အမျိုးသားနိုင်ငံရေးဆိုတဲ့ စကားလုံးဟာ ပါတီနိုင်ငံရေးနဲ့ သီးခြားကွဲလွဲတယ်ဆိုပြီး အဓိပ္ပါယ်ဖွင့်ဆိုထားတာ မတွေ့ရပါဘူး။ ပါတီထောင်တယ်ဆိုတာကိုက အမျိုးသားရေး အကျိုးစီးပွားရေးကို လုပ်ဖို့ဆိုတဲ့ ရည်ရွယ်ချက်နဲ့ ထောင်ကြတာပဲ။ ဆိုတော့ မြန်မာနိုင်ငံ စစ်အစိုးရကတော့ သူတို့ တက်လာကတည်းက နဝတ၊ နအဖ တက်လာကတည်းက အမျိုးသားနိုင်ငံရေး ဘာညာဆိုပြီး စိုက်လိုက်မတ်တပ် ပြောလာပါတယ်။ ဆိုတော့ ဒီဟာက မြန်မာနိုင်ငံမှာ ပါတီစုံ နိုင်ငံရေး ဖြစ်ထွန်းရေး သွားနေတာကို ထိပါးစေတယ်။ Undermine လုပ်တယ်လို့ သုံးသပ်လို့ မဖြစ်နိုင်ဘူးလား။

ဒေါက်တာရန်မျိုးသိမ်း ။ ။ ပါတီနိုင်ငံရေးကတော့ အဆင့်နိမ့်တဲ့ ပုံစံမျိုး၊ အမျိုးသားနိုင်ငံရေးကမှ မြင့်မြတ်တဲ့ ပုံစံမျိုး။ အဲဒီလို စဉ်းစားတာဟာ ကျနော်တို့နိုင်ငံရဲ့  လက်ရှိ နိုင်ငံရေးအပြောင်းအလဲနဲ့ ငြိမ်းချမ်းရေး၊ အမျိုးသားပြန်လည်သင့်မြတ်ရေး၊ ယုံကြည်မှုတည်ဆောက်ရေး လမ်းကြောင်းအတွက် ထိရောက်အလုပ်ဖြစ်နိုင်တယ်လို့ မထင်ပါဘူး။ တကယ်တမ်းအားဖြင့်တော့ နိုင်ငံတနိုင်ငံရဲ့  ဒီမိုကရေစီ အပြောင်းအလဲကိုသွားတဲ့ လူတွေဟာ နိုင်ငံရေးပါတီတွေပဲ ဖြစ်ပါတယ်။ အဲဒီလိုပဲ နိုင်ငံရေးပါတီတွေကလည်း အခုန ဦးကျော်ဇံသာ ပြောသလို နိုင်ငံရဲ့  အမျိုးသားအကျိုးစီးပွားကို ရှေ့ တန်းတင်ပြီးတော့ လုပ်ရမယ်ဆိုတာက တခါတည်းပါပြီသာ ဖြစ်ပါတယ်။ အာဏာရပါတီ ဖြစ်လာတဲ့ ပါတီကလဲ ဖွဲ့စည်းပုံ အခြေခံဥပဒေနဲ့အညီ တိုင်းပြည်ကို အာဏာသိမ်းမှုကို ထိန်းညှိပြီးတော့ ဆောင်ရွက်ရတာ ဖြစ်တဲ့အတွက်ကြောင့်မို့ ပါတီနိုင်ငံရေးဟာ ကိုယ့်ပါတီ အင်အားတောင့်တင်းဖို့၊ ကိုယ့်ပါတီ အာဏာရဖို့၊ အဲဒီ အာဏာဆက်ပြီး တည်မြဲဖို့ ဦးစားပေးလုပ်ရတဲ့ နိုင်ငံရေးမျိုး မဟုတ်ဘဲနဲ့ ပြည်သူလူထုတရပ်လုံးရဲ့  အကျိုးစီးပွားကို ရှေ့ ရှုပြီးတော့ လုပ်ရတဲ့ နိုင်ငံရေးမျိုးဖြစ်တယ်လို့ ကျနော်ကတော့ မြင်ပါတယ်။

ဦးကျော်ဇံသာ ။ ။ ကိုဝင်းမင်းရဲ့  သဘောထားကို ပြောပါအုံး။ အမျိုးသားနိုင်ငံရေးကို သူတို့ တပ်မတော်ပဲလုပ်တယ်။ ပါတီနိုင်ငံရေးဟာ တိုင်းပြည်အတွက် တကယ်မလုပ်နိုင်ဘူးဆိုတဲ့ သူ့ရဲ့  ပြောကြားချက်။

ဦးဝင်းမင်း ။ ။ အဓိကအချက်ကတော့ စစ်အစိုးရ အုပ်ချုပ်စဉ်ကာလတွေမှာ တပ်မတော်အစိုးရ အားကောင်းရေးအတွက် ဆရာ အခုနပြောခဲ့သလိုပဲ ပါတီနိုင်ငံရေးအပေါ်မှာ အဖျက်သဘော ပြောခဲ့တဲ့ စဉ်းစားချက်မျိုး ဖြစ်ပါတယ်။ ဒါပေမဲ့လဲ တပ်မတော်ထဲမှာတော့ အခုအချိန်အထိ စဉ်းစားချက်က ပါတီနိုင်ငံရေးနဲ့ နီးစပ်မှုမရှိတဲ့အတွက်၊ ဒီမိုကရေစီနိုင်ငံရေးနဲ့ ရင်ပါးမှုမရှိတဲ့အတွက် ဆက်လက်ပြီးတော့ ရှိနေတဲ့သဘောမျိုးတော့ တွေ့ရပါတယ်။ တကယ်တော့ အမျိုးသားနိုင်ငံရေးဆိုတာက နိုင်ငံရေးဝေါဟာရမှာ မရှိပါဘူး။ အမျိုးသားရေးဝါဒီဆိုလဲ အမျိုးသားရေးဝါဒီပေါ့။ တိုင်းပြည်အရေးအတွက်ဆိုလဲ တိုင်းပြည်အရေးအတွက်ပေါ့။ အဲဒီလိုပဲ ရှိပါတယ်။ ပါတီနိုင်ငံရေးဆိုတာ ဆရာ အခုနပြောသလိုပါပဲ တနိုင်ငံလုံးအတွက်၊ ပြည်သူတွေအားလုံးအတွက် ပြည်သူတွေက ရွေးချယ်ထားတဲ့ အစိုးရက လုပ်တာဖြစ်ပါတယ်။ ဒီနေရာမှာတော့ တပ်မတော်ရဲ့  စွဲနေတဲ့ အစွဲက ပါတီနိုင်ငံရေးက အာဏာနိုင်ငံရေး၊ အကွဲအပြဲ နိုင်ငံရေး ဖြစ်တဲ့အတွက် တပ်မတော်ကနေ ထိန်းကြောင်းပေးသွားရမယ်ဆိုတဲ့ စဉ်းစားချက်မျိုးက အခုအချိန်အထိ ရှိနေသေးတယ်။ ကျနော်တို့ သမိုင်းထဲမှာတော့ ပါတီတွေ ကွဲခဲ့တာ ရှိတယ်။ ဒါပေမဲ့ တချိန်တည်းမှာ တပ်မတော် နားလည်ထားဖို့က နိုင်ငံရေးရဲ့  သဘောသဘာဝအရ ပါတီတွေဆိုတာ ကွဲနိုင်ပါတယ်။ ကွဲတဲ့အခါမှာလဲ ဘယ်ပါတီက တိုင်းပြည်ကောင်းကျိုးကို ဆောင်ရွက်မလဲ။ အဲဒီအပေါ် မူတည်ပြီးတော့ ပြည်သူတွေက မဲပေးဆုံးဖြတ်မှာ ဖြစ်ပါတယ်။ တပ်မတော်အနေနဲ့ ဝင်ရောက်ဖြေရှင်းတဲ့အခါကြတော့ တပ်မတော်မှာက ပြည်သူတွေ ရွေးချယ်တင်မြှောက်ထားတဲ့ Mandate ပေးအပ်ထားတဲ့ အာဏာမရှိပါဘူး။ အဲဒီအခါကြတော့ တပ်မတော်အနေနဲ့ ပြည်သူရဲ့  ငြိုငြင်မှုကို ခံရပြီးတော့ တပ်မတော်လည်း သိက္ခာကျ၊ တိုင်းပြည်လည်း စီးပွားရေးကျ နစ်နာရတဲ့ အနေအထားတွေ ဖြစ်တဲ့အတွက် ပါတီနိုင်ငံရေး နဲ့ ဒီမိုကရေစီ နိုင်ငံရေး သဘောသဘာဝကို ပိုမိုနားလည်ပြီးတော့ ပူးပေါင်းဆောင်ရွက်မှုတွေ ပိုလုပ်လာဖို့တော့ မျှော်လင့်ပါတယ်။

ဦးကျော်ဇံသာ

VOA Burmese News


KNU ဥက္ကဌ ဗိုလ်ချုပ်ကြီး မူတူးစေးဖိုးအား တွေ့ရစဉ်။


ချင်းမိုင်၊ဧပြီလ ၆ ။ ။ ကရင်အမျိုးသားအစည်းအရုံး (KNU)၏ ခေါင်းဆောင်သစ်များ ရွေးချယ်ရန်အတွက် ကိုယ်စားလှယ်လောင်း ၆၀ ဦးကို ပထမဆုံးရွေးချယ်မှုကို မတ်လ ၆ ရက်နေ့တွင် လျို့ဝှက်မဲများဖြင့် ရွေးချယ်ခဲ့ပြီး ဖြစ်ကြောင်း သိရသည်။

ညီလာခံသို့ တက်ရောက်နေသော KNU ကိုယ်စားလှယ် ၂၁၇ ဦးထဲမှ ကိုယ်စားလှယ်လောင်း ၆၀ ရွေးချယ်ခဲ့ခြင်း ဖြစ်ပြီး မနက်ဖြန် ဧပြီလ ၇ ရက်နေ့တွင် KNU ၏ ဥက္ကဋ္ဌ၊ ဒုဥက္ကဋ္ဌ နှင့် အထွေထွေအတွင်းရေးမှူး၊ တွဲဘက် အထွေထွေအတွင်းရေးမှူး (၁)နှင့် တွဲဘက် အထွေထွေအတွင်းရေးမှူး (၂) တို့ ၅ ဦး အပါအဝင် ဗဟိုကော်မတီဝင် ၅၅ ဦးကို လျို့ဝှက်မဲများဖြင့် ရွေးချယ်သွားမည် ဖြစ်ကြောင်း သိရသည်။

“ဒီနေ့က ကိုယ်စားလှယ်လောင်း ၆၀ ကို လျို့ဝှက်မဲနဲ့ ရွေးပြီးတော့ မနက်ဖြန်က အဲဒီထဲက ဗဟိုကော်မတီဝင် ၅၅ ဦးနဲ့ ထိပ်ပိုင်းခေါင်းဆောင် ၅ ဦးကို ရွေးချယ်မယ်”ဟု KNU ဗဟိုဌာနချုပ်ရုံးမှ အရာရှိ တစ်ဦးက ပြောသည်။

၁၆ ကြိမ်မြောက် ညီလာခံမှ တိုးချဲ့ဖွဲ့လိုက်သော ဗဟိုကော်မတီဝင် ၅၅ ဦးကို ဆန်ခါတင်ရွေးချယ်ခဲ့ပြီး ဖြစ်ကြောင်း သိရသည်။

အဆိုပါ ထိပ်သီးခေါင်းဆောင် ၅ ဦးက နောက်ထပ် ကိုယ်စားလှယ်လောင်း ၆ ဦးကို ထပ်မံ ရွေးချယ်တင်မြှောက်လိုက်သဖြင့် KNU ၏ အလုပ်အမှုဆောင်ကော်မတီ ၁၁ ဦး ဖြစ်သွားမည် ဖြစ်သည်။ ယင်းနောက်ပိုင်းတွင် KNU ၏ ဌာန ၁၄ ခုအတွက် ဌာနမှူးများကို ဆက်လက် ရွေးချယ်သွားမည် ဖြစ်ကြောင်း KNU ၏ တွဲဘက်အထွေထွေအတွင်းရေးမှူး (၁) ပဒိုစောသောသီဘွဲ့က ဧပြီလ ၅ ရက်နေ့က မဇ္စျိမကို ပြောဆိုထားသည်။

“အဲဒီ ၅၅ ဦးထဲမှာက ကျွန်တော်တို့ ခရိုင်နဲ့ တပ်မဟာ ၇ ခုအတွင်းမှာရှိတဲ့ KNU ရဲ့ ဥက္ကဋ္ဌ၊ ဒုဥက္ကဋ္ဌ လူတွေက သူတို့ခရိုင်အတွင်းမှာ ရွေးချယ် တင်မြောက်ထားပြီး ဖြစ်တဲ့အတွက် သူတို့မှာ အမြဲတမ်း ဗဟိုအလုပ်အမှုဆောင်ကော်မတီဝင်တွေ ဖြစ်သွားတယ်။ ဆိုလိုတာကတော့ ၁၄ ဦးက ရွေးချယ်စရာမလိုတော့ဘဲနဲ့ သူတို့ဟာ အလိုအလောက်ဖြစ်သွားပြီ”ဟု သူက ပြောသည်။

ယမန်နေ့က ရွေးကောက်ပွဲ ကော်မရှင် ဥက္ကဌအဖြစ် ပြည်တွင်းမှ ဖလုံ-စဝေါ်ဒီမို ကရက်တစ်ပါတီမှ ဒုဥက္ကဌ မန်းအောင်ပြည်စိုးနှင့် အတွင်းရေးမှူးအဖြစ် ကရင်သတင်းစဉ်၏ အယ်ဒီတာ နန်းဖောဂေ အပါအဝင် ၇ ဦးဖြင့် ဖွဲ့စည်းထားပြီး လျို့ဝှက်မဲပေးစနစ်ဖြင့် ရွေးချယ်ခဲ့ခြင်း ဖြစ်သည်။

ရွေးကောက်ပွဲ ပြီးသွားပါက ရွေးချယ်တင်မြောက်ခြင်း ခံရသည့် ခေါင်းဆောင်များမှ ရှေ့ဆက် အကောင်အထည်ဖော်ရမည့် ရှေ့လုပ်ငန်းစဉ်များကို ပြန်လည် တာဝန်ခွဲဝေ သွားမည် ဖြစ်ပြီး မည်သည့် ခေါင်းဆောင်တက်လာတက်လာ KNU ၏ ဖွဲ့စည်းပုံ အခြေခံ ဥပဒေအတိုင်း ဆက်လက် လုပ်ဆောင်သွားရမည် ဖြစ်သည်ဟု သူက ဆက် ပြောသည်။

“ကျွန်တော်တို့က ဘယ်ခေါင်းဆောင်ပဲ တက်လာတက်လာ။ ကျွန်တော်တို့ ကွန်ကရပ်အပေါ်မှာ ချမှတ်ထားတဲ့ လုပ်ငန်းစဉ် အပေါ်မှာပဲ အခြေခံပါလိမ့်မယ်။ ငြိမ်းချမ်းရေးဆောင်ရွက်တဲ့နေရာမှာ ခေါင်းဆောင်အသီးသီးက ငြိမ်းချမ်းရေးကို တော်တော်လိုလားတဲ့ ပုဂ္ဂိုလ်တွေ အားလုံးပါပါတယ်” ပဒိုစောသောသီဘွဲ့က ပြောသည်

KNU ၏ ၁၆ ကြိမ်မြောက် ညီလာခံကို မတ်လ ၁၄ ရက်နေ့မှစတင်ကျင်းပခဲ့ပြီး ၄ နှစ်ကာလအတွင်း လုပ်ဆောင်ခဲ့သော လုပ်ငန်း အစီရင်ခံစာများ သုံးသပ်ခြင်း၊ အဖွဲ့၏ ဖွဲ့စည်းပုံ အခြေခံ ဥပဒေ၊ နည်းဥပဒေများ ပြင်ဆင်ဖြည့်စွက်ခြင်း၊ နိုင်ငံရေး အစီရင်ခံစာများကို သုံးသပ်ဆွေးနွေးခဲ့ကြသည်။

၁၉၄၇ ခုနှစ်တွင် KNU ကို စတင်ဖွဲ့စည်းခဲ့ပြီး အမျုိးသားတန်းတူရေး၊ ကိုယ်ပိုင်ပြဌာန်းခွင့် ရရှိရေးအတွက် နှစ်ပေါင်း ၆၀ ကျော် လက်နက်ကိုင် တော်လှန်ခဲ့ပြီးနောက် ၂၀၁၅ ခုနှစ် အောက်တိုဘာလက တစ်နိုင်ငံလုံး အပစ်အခတ် ရပ်စဲရေးသဘောတူစာချုပ် (NCA)ကို လက်မှတ်ရေးထိုးခဲ့သည့် အဖွဲ့ဖြစ်သည်။
Mizzima - News in Burmese


St. Petersburg မြို့က မြေအောက်ရထား ဘူတာရုံတွေမှာ လုံခြုံရေးတင်ကျပ်
ရုရှားနိုင်ငံ St. Petersburg မြို့က မြေအောက်ရထား ဘူတာရုံမှာ ပြီးခဲ့တဲ့ သီတင်းပတ်ထဲ ဖြစ်ပွားခဲ့တဲ့ အသေခံ ဗုံးခွဲတိုက်ခိုက်မှုနဲ့ ဆက်နွယ်ပြီး လူ ၃ ဦးကို ရဲတပ်ဖွဲ့က ဒီကနေ့ပဲ ဖမ်းဆီးလိုက်ပါတယ်။

သံသယရှိသူတွေအဖြစ် ဖမ်းဆီးလိုက်သူ ၃ ဦးဟာ အသေခံ ဗုံးခွဲသမား Akbarzhon Dzhalilov လိုပဲ အာရှတိုက် အလယ်ပိုင်းဒေသက ဖြစ်ကြောင်းလည်း ရဲတပ်ဖွဲ့က ပြောဆိုခဲ့တာပါ။ St. Petersburg မြို့စွန်က သံသယရှိသူ ၃ ဦး နေထိုင်ရာ တိုက်ခန်းတွဲမှာ ဗုံးတလုံးတွေ့ရှိခဲ့ပြီး၊ ရဲတပ်ဖွဲ့က ရှင်းလင်းခဲ့ရပါတယ်။

သံသယရှိသူ ၃ ဦးနဲ့ ပတ်သက်တဲ့ အမှုမှာ အထောက်အကူ ဖြစ်စေမယ့် အထောက်အထားတွေကိုလည်း တိုက်ခန်းထဲမှာ တွေ့ရှိခဲ့ကြောင်း ရုရှားစုံစမ်းစစ်ဆေးရေး ကော်မတီက ပြောဆိုခဲ့တာပါ။ သံသယရှိသူတွေ တိုက်ခန်းမှာ ရှာဖွေတွေ့ရှိခဲ့တဲ့ဗုံးဟာ၊ တနင်္လာနေ့တုန်းက မြေအောက်ရထားဘူတာမှာ တွေ့ခဲ့ရတဲ့ မပေါက်ကွဲသေးတဲ့ ဗုံးနဲ့ ဆင်တူတယ်လို့လည်း Reuters သတင်းက ဖော်ပြပါတယ်။

IS အစ္စလာမ်အစွန်းရောက် အဖွဲ့နဲ့ တခြားစစ်သွေးကြွ အဖွဲ့တွေအတွက် လူစုဆောင်းပေးနေတယ်လို့ဆိုတဲ့ စွပ်စွဲချက်နဲ့ အာရှတိုက် အလယ်ပိုင်းဒေသက လူ ၈ ဦးကို ဖမ်းဆီးခဲ့ပြီး နောက်တရက်မှာပဲ လူ ၃ ဦးကို ထပ်မံဖမ်းဆီးလိုက်တာလည်း ဖြစ်ပါတယ်။ အသေခံဗုံးခွဲသူ အပါအ၀င် လူ ၁၄ ဦး သေဆုံးပြီး၊ ၅၀ ကျော် ဒဏ်ရာရခဲ့တဲ့ တနင်္လာနေ့က St. Petersburg မြို့ ဘူတာရုံတိုက်ခိုက်မှုအတွက် ဘယ်သူကမှ သူတို့လက်ချက်ဆိုပြီး ကြေညာတာမျိုးတော့ မရှိသေးပါဘူး။
VOA Burmese News


magway division Hluttaw (MOI)
မကွေးတိုင်းဒေသကြီး ဝန်ကြီးချုပ်ဟောင်း ဦးဘုန်းမော်ရွှေ အစိုးရလက်ထက် မကွေးတိုင်းထဲက ရေနံ လက်ယက်တွင်း လုပ်ငန်းရှင်တွေဆီကနေ ဒေသဖွံ့ဖြိုးရေးအတွက် ကောက်ယူထားခဲ့တဲ့ ကျပ်ငွေ သန်း ၇ ထောင်ကျော် ပျောက်ဆုံးမှုမှာ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီအနေနဲ့ ပါဝင်ပတ်သက်မှု လုံးဝမရှိဘူးလို့ ပါတီရဲ့ ပြောခွင့်ရပုဂ္ဂိုလ်က ပြောဆိုလိုက်ပါတယ်။ ဦးဘုန်းမော်ရွှေ ဦးဆောင်တဲ့ မကွေး တိုင်း အစိုးရဟောင်းအနေနဲ့ ရန်ပုံငွေ ကျပ်သန်း ၇ ထောင်ကျော်ထဲကနေ ကျပ်သန်း ၁၇၀၀ ကျော်ကို ပြည်ခိုင်ဖြိုးပါတီအတွက် သုံးစွဲခဲ့တာ စစ်ဆေးတွေ့ရှိတယ်လို့ လက်ရှိ မကွေးတိုင်းဒေသကြီး အစိုးရအဖွဲ့ က ပြောဆိုထားတာပါ။ ဒီအခြေအနေတွေနဲ့ ပတ်သက်လို့ ဗွီအိုအေ မြန်မာပိုင်း သတင်းထောက် မမြင့်မြင့်ခိုင်က တင်ပြပေးပါမယ်။

မကွေးတိုင်း ဒေသကြီး ဝန်ကြီးချုပ်ဟောင်း ဦးဘုန်းမော်ရွှေလက်ထက် ဖွံ့ဖြိုးရေးရန်ပုံငွေတွေထဲ ကျပ် သန်း ၁၀၀၀ ကျော်ကို ပြည်ထောင်စုကြံ့ခိုင်ရေးနဲ့ ဖွံ့ဖြိုးရေး ပါတီအတွက် သုံးစွဲခဲ့တယ်ဆိုတာ လုံးဝမဟုတ်ဘဲ ဒီကိစ္စမှာ ပြည်ခိုင်ဖြိုးပါတီ အနေနဲ့ ပါဝင်ပတ်သက်မှု လုံးဝမရှိဘူးလို့ ပါတီရဲ့ ပြောရေးဆိုခွင့်ရှိသူ ဒေါက်တာ နန္ဒာလှမြင့်က ဗွီအိုအေ ကိုပြောပါတယ်။

“ကျနော်တို့အနေနဲ့ကတော့ ကျနော်တို့နဲ့ ဘာမှ မပတ်သက်ဘူး ။ လုံးဝမသက်ဆိုင်ဘူးလို့ ပြတ်ပြတ်သားသားပြောရမှာပဲ။ ဘာဖြစ်လို့လဲဆိုတော့ ဒါဟာက ကျနော်တို့ သတင်းတွေထွက်လာမှ ပါတီအနေနဲ့ သိရတာလေ။ ကျနေ်ာတို့ ဌာနချုပ်အနေနဲ့က ပြည်ခိုင်ဖြိုးပါတီအနေနဲ့ ဦးဘုန်းမော်ရွှေက ငွေသွင်းသွားပါတယ်။ ဘယ်လောက် ပေးသွားပါတယ်ဆိုတာက ကျနော်တို့ ပါတီမှာ စာရင်းဇယားလည်း လုံးဝမရှိဘူး ။ ကျနော်တို့လည်း မသိခဲ့ဘူး အခုသတင်းတွေ မီဒီယာတွေမှာ ပါမှ ကျနော်တို့ သိရတယ် ကျနော်တို့ လုံးဝမသိတဲ့ကိစ္စ ၊ ကျနော်တို့ကို ဒီလိုစွပ်စွဲတာမျိုးကို လုံးစလက်မခံဘူး ငြင်းပယ်တယ်။ တကယ်လို့ ပြည်ခိုင်ဖြိုးပါတီအတွက်သုံးတယ်ဆိုရင်၊ အဲဒီ တိုင်းဝန်ကြီးချုပ်လုပ်ခဲ့တဲ့ သူက တိုင်းတာဝန်ယူခဲ့တဲ့ ပုဂ္ဂိုလ်က ပြည်ခိုင်ဖြိုးပါတီအတွက် ဘာတွေလုပ်ခဲ့သလဲ ဥပဒေနဲ့ ညီမညီဆိုတာကိုလည်း သက်ဆိုင်ရာ ပုဂ္ဂိုလ်နဲ့ လုပ်ငန်းဆောင်ရွက်တဲ့သူကို စစ်ဆေးဖို့လိုတယ်လေ။ သေချာတာကတော့ ပါတီ ဌာနချုပ်နဲ့ လုံးဝမပတ်သက်ဘူး ပြည်ခိုင်ဖြိုးပါတီအတွက် ငွေ receipt လည်း မပေးခဲ့ဘူး။”

ပြီးခဲ့တဲ့ အစိုးရလက်ထက် ရေနံ လက်ယက်တွင်း လုပ်ငန်းရှင်တွေဆီက ကောက်ယူထားတဲ့ ပြည်သူ့ ဘဏ္ဍာငွေ ကျပ်သန်းထောင်ချီကို ဒေသဖွံ့ဖြိုးရေးအတွက် သုံးစွဲခဲ့တာမရှိတဲ့အပေါ် ပြန်လည်စိစစ်ဖို့ ရှိ၊ မရှိဆိုတာနဲ့ ပတ်သက်လို့ မကွေးတိုင်း ပွင့်ဖြူမြို့နယ်ပြည်သူ့လွှတ်တော်အမတ်က လွှတ်တော်မှာ မေးမြန်းခဲ့ရာကနေ အခုလို စုံစမ်းစစ်ဆေးမှုတွေ ပေါ်ပေါက်လာတာပါ။

တိုင်းအစိုးရဘက်ဂျက် ကျပ်သန်း နှစ်ထောင့်ရှစ်ရာ ပျောက်ဆုံးနေတာကို အခုနှစ် ဇန်နဝါရီလက စတင်ပြီး ပြည်ထောင်စု အဆင့် စုံစမ်းမှုအနေနဲ့ အထူးစုံစမ်းစစ်ဆေးရေးအဖွဲ့ စသုံးလုံးကနေ စစ်ဆေးခဲ့ချိန်မှာ ကျပ်သန်း ခုနှစ်ထောင်ကျော်အထိ ပျောက်ဆုံးနေကြောင်း စစ်ဆေးတွေ့ရှိခဲ့တာလဲ ဖြစ်ပါတယ်။

စသုံးလုံးရဲ့ အစီရင်ခံစာထဲမှာတော့ ဦးဘုန်းမော်ရွှေဦးဆောင်တဲ့ ပြီးခဲ့တဲ့ မကွေးတိုင်း အစိုးရဟောင်းဟာ ရန်ပုံငွေ ကျပ်သန်း ၇ထောင်ကျော်ထဲက ဒေသဖွံ့ဖြိုးရေးအတွက် ကျပ်သန်း ၄ထောင်ကျော်၊ ရွှေသုခ အသေးစား ချေးငွေလုပ်ငန်းအတွက် သန်း၁ထောင်ကျော်၊ ပြည်ခိုင်ဖြိုးပါတီ အတွက် ကျပ် သန်း ၁၇၀၀ အသီးသီး သုံးစွဲခဲ့တယ်လို့ ဖော်ပြထားပါတယ်။

ဒီကိစ္စအပေါ် မကွေးတိုင်း ဒေသကြီး အစိုးရသစ်အနေနဲ့ ဥပဒေကြောင်းအရ မှန်မှန်ကန်ကန် ဆောင်ရွက် ပေးဖို့လိုပြီး မကွေးတိုင်း ဝန်ကြီးချုပ်ဟောင်း ဦးဘုန်းမော်ရွှေဟာ အမှန်တကယ် ဥပဒေ ချိုးဖောက်ခဲ့ရင် အရေး ယူခံရမှာဖြစ်သလို အဂတိတရားလိုက်စားခဲ့ကြောင်း စစ်ဆေးပေါ်ပေါက်ရင် ပြည်ခိုင်ဖြိုးပါတီရဲ့ စည်းမျဉ်းအရ အရေးယူမှုတွေ လုပ်ဆောင်သွားမှာဖြစ်တယ်လို့ ဒေါက်တာနန္ဒာလှမြင့်က ဆိုပါတယ်။

“ပြည်ခိုင်ဖြိုးပါတီဝင်ဖြစ်ဖြစ် ၊ NLD ပါတီဝင်ဖြစ်ဖြစ် နိုင်ငံသားတိုင်းဟာ ဥပဒေနဲ့ မညီညွတ်ဘူး၊ ဥပဒေအရ အရေးယူဆောင်ရွက်ဖို့ ကိစ္စပေါ်လာရင် အရေးယူရမှာပဲ ဖြစ်ပါတယ်။ ဦးဘုန်းမော်ရွှေဟာ သူတာဝန်ထမ်းဆောင်တဲ့အချိန်မှာ အဂတိတရားလိုက်စားခဲ့တယ်လို့ ၊ ဒါမှမဟုတ် အလွဲသုံးစားလုပ်တယ်လို့ စစ်ဆေးပေါ်ပေါက်လို့ ဥပဒေအရ အရေးယူခံရရင်လည်း ပါတီက အရေးယူမှုတွေရှိမှာပါ။ ဦးဘုန်းမော်ရွှေမှ မဟုတ် ကျနော်တို့ပါတီက ဘယ်သူပဲဖြစ်ဖြစ် ဥပဒေနဲ့ မညီဘူး အလွဲသုံးစားမှုပုံစံမျိုး လုပ်တယ်ဆိုရင် ကျနော်တို့ မည်သူကိုမဆို အရေးယူသွားမှာပါ။”

ပြီးခဲ့တဲ့ ဦးသိန်းစိန် အစိုးရလက်ထက် မကွေးတိုင်း ဝန်ကြီးချုပ်အဖြစ် တာဝန်ယူခဲ့တဲ့ ဦးဘုန်းမော်ရွှေဟာ သဘောထားတင်းမာသူဖြစ်တယ်လို့ သတ်မှတ်ခံခဲ့ရသူတဦးဖြစ်ပြီး စစ်အစိုးရလက်ထက်တုန်းက မကွေးတိုင်းအေးချမ်းသာယာရေးနဲ့ ဖွံ့ဖြိုးရေးကောင်စီမှာ ပါဝင်ခဲ့သူပါ။ သူဟာ မကွေးတိုင်းဝန်ကြီးချုပ်ဖြစ်ချိန်တုန်းကပြည်ခိုင်ဖြိုးပါတီရဲ့ မကွေးတိုင်းဒေသကြီး ဥက္ကဌအဖြစ် တာဝန်ယူခဲ့သူလဲ ဖြစ်ပါတယ်။

မမြင့်မြင့်ခိုင်
VOA Burmese News


အငြင်းပွားဖွယ်ဖြစ်နေပြီး ကန့်ကွက်တာတွေနဲ့ ရင်ဆိုင်ထားရတဲ့ ကချင်ပြည်နယ်၊ မြစ်ဆုံဆည်စီမံကိန်းကို တရုတ်ဘက်က ဖျက်သိမ်းမယ်ဆိုရင် အပြန်အလှန်အနေနဲ့ ရေနက်ဆိပ်ကမ်းနဲ့ စီးပွားရေးစင်္ကြန်တခု အစားထိုး တောင်းလာနိုင်ခြေရှိတယ်လို့ တရုတ်-မြန်မာဆက်ဆံရေး လေ့လာစောင့်ကြည့်သူတွေက သုံးသပ်ပါတယ်။ သမ္မတဦးထင်ကျော်ရဲ့ တရုတ်နိုင်ငံခရီးစဉ်အတွင်း မြစ်ဆုံဆည်စီမံကိန်းကိစ္စ ဆွေးနွေးဖွယ်ရှိပြီးတော့ ဖျက်သိမ်းပစ်ဖို့ တရုတ်ဘက်ကပြောထားတဲ့အကြောင်း သတင်းတွေ ထွက်နေ ချိန်မှာ အခုလို သုံးသပ်ကြတာပါ။ အပြည့်အစုံကို ဗွီအိုအေမြန်မာပိုင်းရဲ့သတင်းထောက် ကိုမိုးဇော်က တင်ပြထားပါတယ်။

တရုတ်သမ္မတ ရှီကျင့်ဖျင်ရဲ့ ဖိတ်ကြားချက်နဲ့ သွားရောက်တဲ့ သမ္မတ ဦးထင်ကျော်ရဲ့ တရုတ်နိုင်ငံချစ်ကြည်ရေး ပထမဆုံးအကြိမ် ခရီးစဉ်ကို ဒီနေ့ စတင်တာဖြစ်ပါတယ်။ အငြင်းပွားဖွယ်ဖြစ်နေတဲ့ မြစ်ဆုံရေကာတာစီမံကိန်း နှစ်နိုင်ငံ အပြန်အလှန်အကျိုးရှိစေ မယ့် ပူးပေါင်းဆောင်ရွက်မှုနဲ့ မှန်မှန်ကန်ကန်ဖြေရှင်းမှာဖြစ်တယ်လို့ ဒီခရီးစဉ်မစတင်မီမှာ တရုတ်နိုင်ငံခြားရေးဝန်ကြီးဌာန ပြောခွင့်ရသူက ပြောဆိုခဲ့တာပါ။

ဒီအပေါ်မှာ မြစ်ဆုံစီမံကိန်းကို ဖျက်သိမ်းဖွယ်ရှိကြောင်း တရုတ်မြန်မာဆက်ဆံရေးအပေါ် လေ့လာစောင့်ကြည့်နေတဲ့ ဒေါက်တာခင်ဇော်ဝင်းက သုံးသပ်ပါတယ်။

“ဒီကိစ္စကို ကျနော်တို့က လုပ်သင့်တယ်လို့ တိုက်တွန်းနေတာ ကြာပြီလေ။ ဆိုတော့ ဒီဘက်က လုပ်ရမယ့်အစား တရုတ်ပြည်ဘက်ကပဲ unilaterally ပေါ့လေ ။ သူ့အနေနဲ့ နောက်ဆုတ်ပေးပုံ ပုံစံမျိုးပေါ်နေတယ်လေ။ ဆိုတော့ ဖယ်ရှားပေးလိုက် သလိုဖြစ်သွားတာပေါ့။ ဒီဟာနဲ့ ပတ်သက်ပြီးတော့လည်း ၂ နိုင်ငံဆက်ဆံရေးက အတော့်ကို တုံ့နှေးနေတယ်လေ။ ပြီးတော့ ဒါစဖို့ကလည်း အများကြီးအခက်အခဲ ရှိနေတယ်ဆိုတော့ တရုတ်ပြည်က ဒီဟာကို သူ့အနေနဲ့ ရပ်ဆိုင်းပြီးတော့ တခြားရင်းနှီးမြုပ်နှံမှုလုပ်ငန်းတွေပေါ့လေ။ အကြီးစားဆောက်လုပ်ရေးလုပ်ငန်းတွေကို သူ့အနေနဲ့ ထပ်ပြီးတော့ ကမ်းလှမ်းလိမ့်မယ်လို့ ထင်ရတယ်။”

ဒီလို တောင်းဆိုလာနိုင်ဖွယ်ရှိနိုင် တာတွေကို ဒေါက်တာခင်ဇော်ဝင်းက အခုလို ဆက်ပြောပါတယ်။

“ကြားနေတာကတော့ တရုတ်ပြည်က ဆိပ်ကမ်းတခု ကြည့်နေတယ်။ သူတို့ဆီက ကြားရတာက ကျောက်ဖြူကတော့ အင်မတန်ကောင်းပါတယ် infrastructure အရပေါ့လေ။ ဒါပေမယ့် ရခိုင်ပြည်နယ်ဟာ မတည်ငြိမ်ဘူးတဲ့ ဓါတ်ငွေ့နဲ့ ရေနံကိုတော့ ပို့လို့ရတာပေါ့ ဒါပေမယ့် အဲဒီမှာသွားပြီးတော့ ရင်နှီးမြုပ်နှံမယ့် ကုမ္ပဏီက အင်မတန်နည်းနေတယ်။ ဆိုတော့ သူတို့အနေနဲ့က ဒီကျောက်ဖြူကို ဒီအတိုင်းပဲ ထားလိုက်၊ ဒါပေမယ့် ဒီထက်ပိုပြီးတော့ အကျိုးရှိမယ့် ဆိပ်ကမ်းတခုသူတို့ကြည့်နေတယ်။ နောက်တခုက စီးပွားရေးစင်္ကြံBCN လို့ခေါ်တဲ့ ဘင်္ဂလားဒေ့်ရယ်၊ တရုတ်ရယ် ၊ အိန္ဒိယ ရယ်၊ မြန်မာရယ် ၄ နိုင်ငံပေါ့ အဲဒါကိုလည်း တရုတ်က လုပ်ဖို့စိုင်းပြင်းနေပြီ။”

ဒေါက်တာခင်ဇော်ဝင်းဟာ တရုတ်နိုင်ငံရဲ့ ဖိတ်ကြားချက်အရ ၂ကြိမ်သွားရောက်ခဲ့ပြီး မြစ်ဆုံအရေးအပါအ၀င် တရုတ်မြန်မာဆက်ဆံရေးအနာဂတ်ကို ဆွေးနွေးပြောဆိုခဲ့သူလည်း ဖြစ်ပါတယ်။

ပြီးခဲ့တဲ့နှစ်ကတော့ မြစ်ဆုံစီမံကိန်းအစား အခြား အသေးစားရေအားလျှပ်စစ်စီမံကိန်းတခု တည်ဆောက်ရေးကို ဆွေးနွေးခဲ့တာရှိခဲ့ဖူးကြောင်းနဲ့ ဒီလို စီမံကိန်းတွေ တည်ဆောက်မယ်ဆိုရင် လူထုကို ဦးဆုံးချပြသင့်သလို တရုတ်-မြန်မာနယ်စပ်ဒေသက လက်နက်ကိုင်ပဋိပက္ခတွေကိုလည်း ထည့်သွင်း စဉ်းစားဖို့ လိုအပ်ကြောင်းလည်း ထောက်ပြပါတယ်။

အမျိုးသားဒီမိုကရေစီအင်အားစုပါတီဥက္ကဌ ဦးခင်မောင်ဆွေကတော့ မြစ်ဆုံအရေးနဲ့ပတ်သက်ပြီး နှစ်နိုင်ငံဆက်ဆံရေးကောင်းအောင် အလေးထားဆောင်ရွက်ဖို့လိုသလို နိုင်ငံအကျိုးစီးပွားအတွက်လည်း ချင့်ချိန်ဆောင်ရွက်ဖို့လိုကြောင်း သုံးသပ်ပါတယ်။

“တရုတ်နိုင်ငံနဲ့ ပတ်သက်ရင် ကျနော်တို့က သတိနည်းနည်းထားပြီးတော့ ပြောရတဲ့အပိုင်းတွေရှိတယ်။ ဘာဖြစ်လို့လဲဆိုတော့ တရုတ်နိုင်ငံနဲ့ အခုအမေရိကန်နိုင်ငံနဲ့ကလည်း အခုလောလောဆယ်မှာ Tension တွေဖြစ်နေတယ်လေ။ ကျနော်တို့နိုင်ငံကလည်း နိုင်ငံတကာနဲ့ သင့်တင့်မျှတအောင်ပေါင်းရမယ့်အနေအထား ၊ နိုင်ငံတကာ ဇတ်ခုံပေါ်ကို တတ်လာတာ မကြာသေးတဲ့အခါကျတော့ သံတမန်ရေးအရ မျက်နှာပျက်စရာတွေကိုတော့ အထူးသတိထားရှောင်ရှားဖို့လိုတာပေါ့။ နိုင်ငံအကျိုးစီးပွား၊ အမျိုးသားအကျိုးစီးပွားနဲ့ ပတ်သက်လို့ရှိရင်တော့ ချင့်ချိန်ပြောဖို့တော့ လိုပါလိမ့်မယ်။”

မြစ်ဆုံစီမံကိန်းကို ဆက်ပြီး တည်ဆောက်မယ် မဆောက်ဘူးဆိုတာကိုတော့ ကောင်းကျိုးဆိုးပြစ်တွေကို နိုင်ငံတကာပညာရှင်တွေရဲ့ လေ့လာသုံးသပ်ချက်ရယူပြီးမှ ဆုံးဖြတ်သင့်ကြောင်း ပြောပါတယ်။

ကချင်ပြည်နယ်အတွင်း ဆောင်ရွက်မည့် ဧရာဝတီ-မြစ်ဆုံ မြစ်ညာ မြစ်ဝှမ်း ရေအားလျှပ်စစ် စီမံကိန်းများကို ဆက်လက် ဆောင်ရွက်ရန် သင့်-မသင့် နဲ့ ပတ်သက်ပြီး “ဧရာဝတီ-မြစ်ဆုံ မြစ်ညာ မြစ်ဝှမ်းရေအားလျှပ်စစ်စီမံကိန်းများ လေ့လာစိစစ် သုံးသပ်ရေး ကော်မရှင်“ ကို ၂၀၁၆ခုနှစ် သြဂုတ်လမှာ သမ္မတဦးထင်ကျော်က ဖွဲ့စည်းခဲ့ပါတယ်။ ဒီကော်မရှင်က စီမံကိန်းတွေကို အမျိုးသားအကျိုးစီးပွားတိုးတက်ရေးကို အခြေခံပြီး နိုင်ငံတော်နဲ့ ပြည်ပရင်းနှီးမြှုပ်နှံ သူတို့ နှစ်ဦးနှစ်ဖက် အကျိုးဖြစ်ထွန်းစေမယ့် နည်းလမ်းများ ရရှိစေမယ့်အချက်တွေ လေ့လာ သုံးသပ် အကြံပြုဖို့လည်း ညွှန်ကြားခဲ့ပါတယ်။

ကိုမိုးဇော်  / ဗွီအိုအေ (မြန်မာပိုင်း)
http://burmese.voanews.com



နယ်မြေ သတ်မှတ် မှု နဲ့ ပတ်သက်လို့ နှစ်ဘက် အဖွဲ့ အကြားမှာ တိတိကျကျ သဘောတူညီမှုတွေ မရှိသေး
အပစ်အခတ် ရပ်စဲရေး NCA လက်မှတ် ရေးထိုး ထားတဲ့ ရှမ်းပြည် တပ်မတော် တောင်ပိုင်း RCSS SSA နဲ့ အစိုးရ တပ်မတော် တို့ အကြား မှာ တိုက်ပွဲတွေဖြစ်ပွား ခဲ့ပါတယ်။

ဒါပါနဲ့ ဆို တစ်ပတ် အတွင်းမှာ တိုက်ပွဲ ၂ ကြိမ် ဖြစ်ပွား ခဲ့တာပါ။ အထိအခိုက် အကျအဆုံး စာရင်း ကိုတော့ နှစ်ဘက် စလုံး က ထုတ်ပြန်ခြင်း မရှီပါဘူး။

ဧပြီလ ၅ ရက်နေ့ တုန်း က ပင်လုံ မြို့ ဆယ်မိုင်အကွာမှာ တပ်မတော် နဲ့ နာရီဝက် ကျော်ခန့် ထိပ်တိုက် ရင်ဆိုင် တိုက်ပွဲ ဖြစ်ပွား ခဲ့ကြောင်း RCSS/SSA ပြောခွင့် ရ ဒုတိယ ဗိုလ်မှူးကြီး စိုင်းငင်း က ဘီဘီစီ ကို ပြောပါတယ်။

RCSS ထိန်းချုပ်နယ်မြေထဲကို တပ်မတော် ဘက်က အကြောင်းမကြားဘဲ ဝင်ရောက် လာတဲ့ အတွက် အခုလို တိုက်ပွဲတွေ ဖြစ်ပွား ခဲ့ရတာ ဖြစ်ကြောင်း RCSS ဘက် က ပြောပါတယ်။

အပစ်ရပ် လက်မှတ် ရေးထိုး ထားပြီး ဖြစ်ပေမယ့် နယ်မြေ သတ်မှတ် မှု နဲ့ ပတ်သက်လို့ နှစ်ဘက် အဖွဲ့ အကြားမှာ တိတိကျကျ သဘောတူညီမှုတွေ မရှိသေးတဲ့ အတွက် အခုလို တိုက်ပွဲတွေ ဖြစ်ပွားနေတာလို့ RCSS ဘက်က သုံးသပ်ပါတယ်။

ပစ်ခတ် တိုက်ခိုက်မှု စောင့်ကြည့်ရေး လုပ်ငန်း ပိုင်မှာ အားနည်းမှုတွေ ရှိနေ သလား ဆိုပြီးတော့လည်း RCSS ဘက်က သံသယ ရှိနေတယ်လို့ ဆိုပါတယ်။

NCA ထိုးပြီးသား အဖွဲ့ နဲ့ အခုလို ပစ်ခတ် တိုက်ခိုက်မှု ဖြစ်ပွား ခဲ့တဲ့ အပေါ်မှာ ငြိမ်းချမ်းရေး လုပ်ငန်း တွေကို ထိခိုက်မှု ရှိလာမှာ ကိုလည်း စိုးရိမ် ပူပန် မိကြောင်း ဒုတိယ ဗိုလ်မှူးကြီး စိုင်းငင်း က ပြောပါတယ်။

အခု တိုက်ပွဲ တွေ ကြောင် NCA မထိုး ရသေးတဲ့ အဖွဲ့တွေဆီမှာလည်း စိုးရိမ် ပူပန် မှုတွေ ဖြစ်ပေါ် လာနိုင်ကြောင်း RCSS/SSA အဖွဲ့က သုံးသပ် ထားပါတယ်။

BBC Burmese
http://www.bbc.com/burmese



ထိုင်းဘုရင် Maha Vajiralongkorn
ထိုင်းနိုင်ငံမှာ ဖွဲ့စည်းအုပ်ချုပ်ပုံ အခြေခံဥပဒေ သစ်ကို ထိုင်းဘုရင် မဟာဝဇီရာလောင်ကွန်းက ဒီကနေ့ အခမ်းအနားနဲ့ လက်မှတ် ရေးထိုး အတည်ပြုပေးလိုက်ပါတယ်။

အရင်တုံးက ရွေးကောက်ပွဲလုပ်မဲ့နေ့ရက်တွေကို ဆက်တိုက် ရွှေ.ဆိုင်းလာခဲ့တဲ့ ထိုင်းစစ်အစိုးရက ဒီဖွဲ့စည်းပုံသစ်ပြဌာန်းနိုင်တာကြောင့် ရှေ.နှစ် ၂၀၁၈ နိုဝင်ဘာလမှာ ရွေးကောက်ပွဲကျင်းပဖို့ လမ်းပွင့်သွားပြီလို့ ဆိုပါတယ်။

၂၀၁၄ ခုနှစ် စစ်အာဏာသိမ်းပြီးတဲ့နောက်ပိုင်း ဒီမိုကရေစီစနစ် ပြန်လည်ဖော်ဆောင်ဖို့ ပထမခြေလှမ်းဖြစ်တယ်လို့သုံးသပ်မှုတချို.ရှိနေပေမဲ့ အတိုက်အခံတွေကတော့ ဒီဖွဲ့စည်းပုံသစ်ထဲမှာ ဒီမိုကရေစီမကျတာတွေပါနေတယ်၊ ဗျူရိုကရေစီ ယန္တယားနဲ့ စစ်တပ်ကို အာဏာအများကြီးပေးထားတယ်လို့ ဝေဖန်လိုက်ပါတယ်။

လွန်ခဲ့တဲ့ ၈ နှစ်အတွင်း ဒုတိယအကြိမ် အာဏာသိမ်းခဲ့တဲ့ ထိုင်းစစ်တပ် အိုပ်ချုပ်မှုအောက်မှာ ရေးခဲ့တဲ့ ဒီဖွဲ့စည်းပုံသစ်ဟာ ထိုင်းနိုင်ငံမှာ သက်ဦးစံပိုင် ဘုရင်စနစ် အဆုံးသတ်ခဲ့တဲ့ ၁၉၃၂ ခုနှစ်ကစလို့ အကြိမ် ၂၀ မြောက် ဖွဲ့စည်းပုံ ဖြစ်ပါတယ်။

စစ်အုပ်ချုပ်ရေးကို ဝေဖန်သူတွေကတော့ ဒီဖွဲ့စည်းပုံဟာ ထိုင်းနိုင်ငံရေးမှာ စစ်တပ်ရဲ့အာဏာကို ဆယ်စုနှစ်တွေနဲ့ချီ မဟုတ်ရင်တောင် နှစ်တွေနဲ့ချီ ထိန်းချုပ်ထားနိုင်အောင် လုပ်ပေးလိမ့်မယ်လို့ ဝေဖန်ကြပါတယ်။

ဗွီအိုအေ (မြန်မာပိုင်း)
http://burmese.voanews.com



MyPlay ထုတ်ခဲ့တဲ့ ဂိမ်းတစ်ခု
မြန်မာနိုင်ငံက မိုဘိုင်းဂိမ်း ကုမ္ပဏီ MyPlay ကို သြစတြေးလျ နိုင်ငံ အခြေစိုက် iSentric ကုမ္ပဏီက ကျပ်ငွေ သန်း ခြောက်ထောင်နဲ့ ဝယ်ယူလိုက်ပါတယ်။

ဒါဟာ မြန်မာ ဂိမ်း ကုမ္ပဏီကို ပြည်ပက ပထမဆုံး အကြိမ် ငွေအမြောက်အမြား နဲ့ ဝယ်ယူလိုက်တာ ဖြစ်ပါတယ်။

MyPlay ဂိမ်းဟာ မြန်မာ နိုင်ငံမှာ ကစားသူပေါင်း တစ်သန်းလောက်ရှိပြီး လူအတော်များများ သိကြတဲ့ အမြတ်ငွေ ရနေတဲ့ ကုမ္ပဏီ တစ်ခု ဖြစ်တယ်လို့ MyPlay ကုမ္ပဏီ အကြီး အကဲနဲ့ နည်းပညာ ဆိုင်ရာ အရာရှိ ဦးမြင့်ကျော်သူက ပြော ပါတယ်။

iSentric ကုမ္ပဏီက မြန်မာ နိုင်ငံနဲ့ အရှေ့တောင် အာရှမှာ ဈေးကွက် ချဲ့ထွင် လိုတဲ့ အတွက် အခုလို ဝယ်ယူတာ ဖြစ်သလို ပြည်ပ နိုင်ငံက ဝယ်ယူ လိုက်တဲ့ အတွက် MyPlay အနေနဲ့ လည်း ငွေကြေးနဲ့ နည်းပညာ အထောက်အကူတွေ ပိုရလာနိုင်ပြီး ဈေးကွက် ပိုကျယ်လာနိုင်တယ်လို့ သူက ပြောပါတယ်။

MyPlay ကုမ္ပဏီ တစ်ခုလုံးကို iSentric ကုမ္ပဏီက ဝယ်ယူရာမှာ လက်ရှိ ချုပ်ဆို ထားတဲ့ စာချုပ်ပါ စည်းကမ်းတွေ အရ MyPlay အနေနဲ့ သုံးနှစ် အတွင်း သူတို့နဲ့ ယှဉ်ပြိုင်တဲ့ စီးပွားရေး လုပ်ငန်းတွေ လုပ်ဆောင်လို့ မရသလို ငွေကြေး ထည့်ဝင် လို့လည်း မရဘူးလို့ ဦးမြင့်ကျော်သူက ပြော ပါတယ်။

MyPlay ကုမ္ပဏီက ရှမ်းကိုးမီး ကမ္ဘာ နဲ့ အိုးဘုတ် ပုံပြင် ဆိုတဲ့ ဂိမ်း နှစ်ခု ထုတ်ထားခဲ့ပြီး ဖြစ်ပြီး Rage of Rama ဆိုတဲ့ ဂိမ်းကိုတော့ သင်္ကြန်ပြီးရင် ထုတ်ဖို့ ရှိတယ်လို့ သူက ပြောပါတယ်။

BBC Burmese
http://www.bbc.com/burmese


တောင်တရုတ် ပင်လယ်တွင်းက လူမနေတဲ့ ကျွန်းတွေကို သိမ်းပိုက်ဖို့ ဖိလစ်ပိုင်သမ္မတ Rodrigo Duterte က စစ်တပ်ကို အမိန့်ပေးလိုက်တဲ့ အတွက် ပိုင်ဆိုင်မှုအတွက် ကာလကြာရှည် အငြင်းပွားနေတဲ့ တရုတ်နိုင်ငံအတွက် ဒေါသထွက်စရာ လုပ်ရပ်တခု ဖြစ်လာနိုင်ပါတယ်။

ဖိလစ်ပိုင်နိုင်ငံ အနောက်ပိုင်း Palawan ဒေသက စစ်စခန်းတခုကို ဒီကနေ့ သွားရောက် လည်ပတ်စဉ်မှာ သူပိုင်ကိုယ်ပိုင် အငြင်းပွားနေတဲ့ Spratly ကျွန်းစုတွေထဲက ကျွန်း ၉ ခု ၁၀ ခု လောက်မှာ ဖိလစ်ပိုင်အလံ လွှင့်ထူသွားမယ့် အစီအစဉ်နဲ့ ပတ်သက်လို့ သမ္မတ Duterte က သတင်းထောက်တွေကို ပြောဆိုခဲ့တာပါ။

တရုတ်နိုင်ငံကတော့ ဖိလစ်ပိုင်၊ ဗီယက်နမ်၊ မလေးရှားနဲ့ ထိုင်ဝမ် တို့က ပိုင်ဆိုင်ကြောင်း ပြောဆိုနေပေမဲ့ သဘာဝအရင်းအမြစ်တွေ ကြွယ်ဝပြီး၊ စတုရန်းကီလိုမီတာ ၃ သန်းခွဲလောက်ရှိတဲ့ တောင်တရုတ်ပင်လယ် တခုလုံးကို ပိုင်ဆိုင်ကြောင်း ကြေညာထားပြီး၊ စစ်အခြေစိုက် စခန်းတွေအဖြစ် ပြောင်းလဲအသုံးပြုနိုင်မယ့် လူလုပ်ကျွန်း တည်ဆောက်မှုတွေကိုလည်း အရှိန်မြှင့် လုပ်ဆောင်နေတာ ဖြစ်ပါတယ်။

ကျွန်းတွေကို သိမ်းပိုက်ဖို့ အစီအစဉ်တွေနဲ့ ပတ်သက်လို့ ပြောကြားခဲ့တဲ့ ဖိလစ်ပိုင် သမ္မတကတော့ အားလုံးနဲ့ မိတ်ဆွေဖြစ်အောင် ကြိုးပမ်းခဲ့တာတွေ ရှိပေမဲ့လည်း၊ အချုပ်အခြာပိုင်မှုကိုတော့ ထိန်းသိမ်းဖို့ လိုအပ်ကြောင်းနဲ့ ကိုယ့်ရဲ့ပိုင်ဆိုင်မှုကို ပြသဖို့နဲ့ ခိုင်မာအောင်လုပ်ဖို့ လိုတယ်လို့လည်း သတင်းထောက်တွေကို ပြောဆိုခဲ့တာပါ။

ဖိလစ်ပိုင်နိုင်ငံရဲ့ လွတ်လပ်ရေးနေ့ဖြစ်တဲ့ ဇွန်လ ၁၂ ရက်နေ့မှာ သိမ်းပိုက်ဖို့ ရည်ရွယ်ထားတဲ့ ကျွန်းတွေထဲက တခုဖြစ်တဲ့ Pag-asa ပေါ်မှာ ဖိလစ်ပိုင်အလံလွှင့်ထူဖို့ သူကိုယ်တိုင် သွားကောင်း သွားရောက်မယ်လို့လည်း သမ္မတ Duterte က ပြောဆိုခဲ့ပါတယ်။ ဖိလစ်ပိုင်သမ္မတ Duterte ဟာ သမ္မတဟောင်း Benigno Aquino လက်ထက်မှာ မပြေမလည်ဖြစ်ခဲ့တဲ့ တရုတ်နိုင်ငံနဲ့ ဆက်ဆံရေးကို တိုးတက်အောင်လုပ်ဖို့ ပြီးခဲ့တဲ့နှစ်ထဲ သမ္မတ တာဝန်ယူချိန်ကတည်းက ကြိုးပမ်းနေတာ ဖြစ်ပါတယ်။

ဗွီအိုအေ (မြန်မာပိုင်း)
http://burmese.voanews.com




ခင်စန္ဒာမြင့်

အမျိုးသမီးလို့ဆိုလိုက်တာနဲ့ အားနွဲ့သူ၊ ယောကျာ်းတွေလုပ်တဲ့ အလုပ်တွေနဲ့ဘယ်လိုမှ မအပ်စပ် နိုင်သူတွေရယ်လို့ လူမှုဝန်းကျင်က ပုံစံတကျသတ်မှတ်ထားတတ်ကြပါတယ်။ ဒီလိုသတ်မှတ် ယူဆထား ခြင်းဟာ လူ့စွမ်းအားအရင်းအမြစ်တွေထဲက တစ်ခုဖြစ်တဲ့ အမျိုးသမီးတွေရဲ့ စွမ်းအားကို ဆုံးရှုံးစေတဲ့ အကြောင်းတွေထဲက တစ်ခုပဲဖြစ် ပါတယ်။ ဒီလိုအမျိုးသမီးတွေကို အားနွဲ့သူတွေရယ်လို့ ထင်မြင်ယူဆ ချက်တွေဟာ လက်တွေ့မှာ အမှန် တကယ်မှားယွင်းနေတယ်ဆိုတာကို သက်သေပြနေသူ တစ်ယောက်ရှိပါ တယ်။ သူကတော့ အငှားယာဉ် မောင်းသူ အမျိုးသမီးငယ်လေး မမိုးမိုးလွင်ပဲဖြစ်ပါတယ်။

မမိုးမိုးလွင်ဟာ လူနေထူထပ် လွန်းလှတဲ့ ရန်ကုန်မြို့ကြီးကို မော် လမြိုင်ဆိုတဲ့ နယ်မြို့လေးကနေ ၂၀ဝ၄ခုနှစ်က ရွှေ့ပြောင်းနေထိုင်ခဲ့ သူတစ်ယောက်ပါ။ သူဟာ ရန်ကုန် မြို့ကြီးကို စရောက်တဲ့အချိန်မှာတော့ ဘာလုပ်လို့ လုပ်ရမှန်းမသိသေးဘဲ ဖြစ်နေခဲ့ပါတယ်။ နယ်ကနေ ရန်ကုန်ကို လာကြတဲ့ အခြားသူတွေလိုပဲ သူဟာလည်း ရန်ကုန်မြို့မှာရှိတဲ့ သင်တန်းတွေကိုသာ တစ်ခုပြီးတစ်ခု တက်ရင်း တစ်ဖက်မှာလည်း အလုပ် တစ်ခုခုရနိုင်ဖို့ ရှာဖွေနေခဲ့ပါတယ်။ အဲ့ဒီထဲမှာမှ သူဟာ သူများနဲ့မတူ ထူးခြားစွာပဲ တက်ခဲ့တဲ့သင်တန်း တစ်ခုကတော့ ကားမောင်းသင်တန်းပဲ ဖြစ်ပါတယ်။ သူဟာ ကားမောင်း သင်တန်းကို တက်ပြီးတဲ့နောက်မှာ တော့ ကုမ္ပဏီတစ်ခုမှာ ယဉ်မောင်း သူ တစ်ယောက်အဖြစ်ဝင်ရောက် လုပ်ကိုင်ရာကနေ အဆင့်ဆင့်ကြိုး စားမှုကြောင့် Marketing Manager အဆင့် အထိ အောင်မြင်ခဲ့ပါတယ်။ ဒါ့အပြင်သူဟာ နိုင်ငံခြားသားတွေ အတွက် ခရီးသွားကုမ္ပဏီတွေရဲ့ ကားတွေကိုပါ မောင်းနှင်တဲ့အလုပ်ကို ပြောင်းလဲ လုပ်ကိုင်ခဲ့ပါတယ်။ အား လပ်ချိန်ဆိုတာ မရှိသလောက်နည်း ပါးလှတဲ့ အလုပ်တွေကို ညည်းငွေ့ လာတဲ့ မမိုးမိုးလွင်ဟာ ၂၀၁၂ခုနှစ် ရောက်တဲ့အခါမှာတော့ အငှားယာဉ် မောင်း တစ်ယောက်အဖြစ် လုပ် ကိုင်ဖို့ကို ဆုံးဖြတ်ချက်ချခဲ့ပါတော့တယ်။

အငှားယာဉ်မောင်းသမားအနေ နဲ့ လုပ်ကိုင်ဖို့ မမိုးမိုးလွင်ဆုံးဖြတ်ချက်ချလိုက်တဲ့အချိန်ဟာ လွန်ခဲ့တဲ့ ၅နှစ်ကြာကာလကဖြစ်တာကြောင့် အငှားယာဉ်လောကမှာ အမျိုးသမီးယာဉ်မောင်းဆိုတာ မရှိ သေးတဲ့ကာလလို့ပြောရမှာပါ။ ဒီလိုကာလမှာ ဒီလိုဆုံးဖြတ်ချက်ချ လိုက်တာဟာ သူ့အတွက်တော့ စွန့်စားမှုတစ်ခုလည်းဖြစ်ပါတယ်။ ဒါ့အပြင် သူမရဲ့လက်ထဲမှာ ကိုယ်ပိုင်အငှားယာဉ်ရယ်လို့ မရှိခဲ့သေးပါဘူး။ ဒါကြောင့် သူမဟာ သူငယ်ချင်းဖြစ်သူရဲ့ အငှားယာဉ်ကို ငှားရမ်းပြီး မောင်းနှင်ဖို့ ဆုံးဖြတ်ခဲ့ပါတယ်။
ငယ်ရွယ်နုနယ်တဲ့ သူမအဖို့ ယောကျာ်းတွေကြီးစိုးရာ အငှားယာဉ် မောင်းနယ်ပယ်မှာ အခြေချလုပ် ကိုင်ဖို့ဆိုတာဟာ စိန်ခေါ်မှုတွေ အပြည့်နဲ့ပါ။ ပထမဆုံးစိန်ခေါ်မှု ကတော့ လူမှုဝန်းကျင်ပါပဲ။အမျိုး သမီးယာဉ်မောင်းတစ်ယောက် မောင်းနှင်တဲ့ အငှားကားကို စီးကြတဲ့ အငှားယာဉ်စီးသူတွေမှာ ပုံစံပေါင်းစုံ စရိုက်ပေါင်းစုံတွေရှိနေကြပါတယ်။ အထူးသဖြင့် မိန်းကလေးဖြစ်နေတဲ့ အတွက် အထင်အမြင်သေးမှုတွေပဲ ဖြစ်ပါတယ်။


သူမောင်းတဲ့ကားကိုတားပြီး မစီးတာဟာ များသောအားဖြင့် ယောကျာ်းလေးတွေဖြစ်ကြောင်း၊ သူတို့က သူ့ကိုပြန်ကြောက်နေကြတဲ့ပုံစံမျိုးတွေပြကြကြောင်း မမိုးမိုးလွင်က သူ့ရဲ့အငှားယာဉ်မောင်း သမားဘဝ အစက တွေ့ကြုံခဲ့ရတဲ့ အတွေ့အကြုံတွေကို ပြောပြပါတယ်။

တချို့အမျိုးသားတွေဆိုရင် ကားကို တားပြီး မစီးတဲ့အပြင် ခါးခါးသီးသီး မောင်းထုတ်တာကိုပင် သူဟာခံခဲ့ ရပါသေးတယ်။ "ဒီအလုပ် လုပ် တယ်ဆိုတာ ကိုယ့်ကိုယ်ကို အများကြီး စတေးပြီးလုပ်ရတာ။ ဒါကြောင့် ကိုယ့်ကိုယ်ကို ယုံကြည်တယ်။ ဒါပေမဲ့ ခွေးမောင်း နွားမောင်းသလို မောင်းထုတ်ခံရတော့ စိတ်ထဲ မကောင်းဖြစ်မိတယ်" လို့ မမိုးမိုးလွင်က ဆိုပါတယ်။

ဒါပေမဲ့ မမိုးမိုးလွင်ဟာ စိတ်ဓာတ် မကျခဲ့သလို သူ့ကိုယ်သူ ယုံကြည်မှုရှိရှိ နဲ့ သူမောင်းတဲ့အငှားယာဉ်ကို မစီး ရဲကြတဲ့ ခရီးသည်တွေကို သူ့ကို စိတ်ချယုံကြည်စွာနဲ့ စီးချင်လာအောင် စိတ်ရှည်လက်ရှည် ပြောပြခဲ့ပါသတဲ့။

မမိုးမိုးလွင်ဟာ သူ့ရဲ့အငှားယာဉ် မောင်းသမားဘဝမှာ ခရီးသည်တွေရဲ့ စိုးရိမ်စိတ်နဲ့ မယုံကြည်မှုတွေကို ခံစားခဲ့ရရုံသာမကပါဘူး၊ ဘဝတူ အငှားယာဉ်မောင်း အမျိုးသားတချို့ ရဲ့ အထင်မြင်သေးမှု၊ သွေးတိုးစမ်း နှိမ့်ချလိုမှုတွေကိုလည်း ကြုံခဲ့ရပါတယ်။ တက္ကစီကိုမောင်းလာတာ မိန်းကလေးမှန်းသိလို့ ဘဝတူ အမျိုး သားအငှားယာဉ်မောင်းသူတွေက ဆရာလုပ်ကာ ကြောကြောမောမောနဲ့ ဆက်ဆံချင်သူတွေရှိသလို၊ မိန်းကလေးက မိန်းကလေးလိုမနေသူ အနေအထိုင်မတတ်သူလို့ထင်မြင်ကာ နှိမ့်ချတဲ့အကြည့်နဲ့ကြည့်တဲ့ သူတွေနဲ့လည်း သူဟာကြုံတွေ့ခဲ့ရ ပါတယ်။ ကားမောင်းနေစဉ်မှာတောင် မိန်းကလေးဖြစ်နေတဲ့ အတွက် အနိုင်ကျင့်ချင်လိုသူတွေ၊ ဆဲဆိုရန်စချင်သူတွေကို ကိုယ်မောင်းနေတဲ့လမ်းကြောင်းကို မှန်မှန်ကန်ကန် မောင်းပြပြီးတည်ငြိမ် စွာနဲ့တုံ့ပြန်မှုတွေကိုသာ သူဟာ ပြုလုပ်ခဲ့ပါတယ်။

အမျိုးသားအငှားယာဉ်မောင်း တွေကိုတောင် အငှားယာဉ်စီးသူတွေ လိုဟန်ဆောင်ပြီး ငွေလုယူ၊ လူသတ် စတာတွေလုပ်တာကို ခံနေရချိန်မှာ မိန်းကလေးအငှားယာဉ်မောင်းတစ် ယောက်ဖြစ်တဲ့ မမိုးမိုးလွင်အတွက် တော့ ဘယ်လိုခရီးသည်မျိုးကို ကား ပေါ်တင်မယ်ဆိုတာကို စက္ကန့်ပိုင်း အတွင်းမှန်ကန်စွာ ဆုံးဖြတ်ချက် ချနိုင်ဖို့ဆိုတာဟာလည်း သူမလုပ် ကိုင်နေတဲ့ အသက်မွေးဝမ်းကျောင်း လုပ်ငန်းအတွက် သူမကြုံနေရတဲ့ စိန်ခေါ်မှုတွေထဲကတစ်ခုဖြစ်ပါတယ်။

"ညီမကားထဲမှာ ဘာမှမဆောင်ထား ဘူး။ ကိုယ့်ကိုရန်ပြုလာမယ့်သူတွေ ကို တုံ့ပြန်ဖို့ ညီမမှာဘာမှမရှိဘူး။ တစ်ခုပဲ ညီမကားကိုငှားစီးတဲ့လူတွေကို စေတနာထားပြီး မောင်းပို့ပေးမယ်" လို့ သူ့အတွက် လုပ်ငန်းခွင်က ပေးတဲ့စိန်ခေါ်မှုအပေါ်ထားတဲ့ သူ့ သဘောထားကို ပြောပြပါတယ်။

အမျိုးသမီးအငှားယာဉ်မောင်း တစ်ယောက်ဖြစ်တဲ့ သူ့အတွက် ဒီလိုစိန်ခေါ်မှုတွေလည်းရှိသလို၊ သာမန်အမျိုးသမီးတွေမလုပ်နိုင်တဲ့အလုပ်ကို လုပ်ကိုင်နေတဲ့သူ တစ်ယောက်အဖြစ် လေးစားအားကျတဲ့ သူတွေလည်းရှိတယ်လို့ သူကပြောပါတယ်။ သူဟာ ဘဝမှာအငှား ယာဉ်မောင်းသမားအဖြစ် ဖြတ် သန်းရမယ်လို့ တွေးထားတာမျိုးမရှိ ခဲ့ပေမယ့်လည်း သူရွေးချယ်ခဲ့တဲ့ အသက်မွေးဝမ်းကျောင်းအလုပ်ကို အောင်မြင်အောင် လုပ်မယ်ဆိုတဲ့ ဆုံးဖြတ်ချက်ကိုတော့ ချထားခဲ့သူ လည်းဖြစ်ပါတယ်။

ဒါကြောင့်လည်း သူဟာ သူ ငယ်ချင်းဖြစ်သူရဲ့ အငှားကားကို မောင်းနေရတဲ့သူတစ်ယောက်အဖြစ် ကနေ ကိုယ်ပိုင်အငှားကားတစ်စီး ကို ပိုင်ဆိုင်နိုင်ဖို့အတွက် ဆုံးဖြတ်ချက် ချကာကြိုးစားခဲ့ပါတယ်။ ကိုယ်ပိုင် အငှားယာဉ်တစ်စီးကို ပိုင်ဆိုင်နိုင် ဖို့အတွက် နေ့စဉ်ကားမောင်းလို့ရတဲ့ ဝင်ငွေထဲက ဖြည်းဖြည်းချင်း ဖဲ့ပြီး စုတာဟာလည်း သူ့ရဲ့အသက်မွေး ဝမ်းကျောင်းမှုအပေါ်ထားတဲ့ ယုံကြည်ချက် ပြင်းပြမှုတွေကို ဖော်ပြနေတာပဲ ဖြစ်ပါတယ်။


အမျိုးသားအငှားယာဉ်မောင်းတွေအတွက်တောင် နေပူမရှောင်၊ မိုးရွာမရှောင် ကားမောင်းရတဲ့အလုပ် ဟာ စားဝတ်နေရေးအတွက်လောက်ငတယ် ဆိုရုံသာရှိတယ်လို့ ညည်းတွားနေကြတဲ့အချိန်မှာ မမိုးမိုးလွင်ကတော့ သူနေ့စဉ်ကားမောင်းလို့ရတဲ့ ဝင်ငွေထဲကနေ စားဝတ်နေရေးအတွက် သာမက၊ ကိုယ်ပိုင်အငှားကားတစ် စီးပိုင်ဆိုင်နိုင်ရေးအတွက် လိုအပ်တဲ့ပိုက်ဆံရအောင် ကြိုးစားရှားဖွေရ တာဟာလည်း လွယ်ကူတဲ့ကိစ္စတော့ မဟုတ်ပါဘူး။

"အငှားယာဉ်မောင်း တော် တော်များများက အဆင်မပြေဘူး ညည်းကြတယ်။ တကယ်တော့ သူ တို့ကိုသွားကြည့် သူတို့အချိန်ဖြုန်း တာ တော်တော်များတယ်။ ညီမကတော့ စဉ်းစားတယ် ငါမောင်းရင် ဒီလောက် Target ရမှပြန်မယ်၊ ရ အောင်ငါ မောင်းမယ်ဆိုပြီးမောင်းတယ်။ အဲ့လိုမောင်းတော့ တစ်နေ့ကို လေးသောင်းဆိုလည်းရတယ်။ ငါးသောင်း၊ ခြောက်သောင်းဆိုလည်း ရတယ်။ ညီမ အချိန်မဖြုန်းဘဲ တကယ်မောင်းတယ်" လို့ သူရဲ့ ရည်မှန်းချက်အတွက် သူကြိုးစား လုပ်ဆောင်ခဲ့ပုံကို ပြောပြပါတယ်။

သူများကားကို ငှားမောင်းရ တဲ့အတွက် အခြားအမျိုးသမီးတွေ လို လှလှပပလေးနဲ့ နေချင်တဲ့ သူ့ ရဲ့ကိုယ်ပိုင်အချိန်တွေ ဆုံးရှုံးခဲ့ရုံ သာမက ကားငှားခအဖြစ် ပိုင်ရှင်ကို နေ့စဉ်ပေးနိုင်ဖို့နဲ့ ကားပြင်ဆင်စရိတ် တွေဟာလည်း သူမရဲ့အိပ်မက်ဖြစ်တဲ့ ကိုယ်ပိုင်းအငှားယာဉ်တစ်စီး ဝယ် နိုင်ရေးဆိုတာကို အကောင်အထည် ဖော်နိုင်ဖို့အတွက် စိန်ခေါ်မှုတွေပါပဲ။

"ညီမကအရင်က Gas ကားမောင်း တယ်။ တစ်လကို ၅သိန်း၊ တစ်ရက်ကို ၁၇,ဝ၀ဝ ပေးရတယ်။ ဒီတော့ ညီမ စုဖို့အတွက်ရယ် Owner ကြေးရယ် အတွက် ၁၇,ဝ၀ဝ အပေါင်း ၁၀,ဝ၀ဝ ရှာရတယ်။ သုံးစွဲတာက အဲ့ဒီထဲက ပိုတာကိုပဲ ညီမသုံးတယ်" လို့ သူ့ရဲ့ အိပ်မက်တစ်ခုကို အကောင်အထည် ဖော်နိုင်ဖို့အတွက် သူ့ရဲ့ လုပ်ဆောင် ချက်တွေကို ပကတိရိုးသားတဲ့အင်အားတွေနဲ့ ပြောပြပါတယ်။

ဒီလိုရိုးရိုးသားသားနဲ့ ကြိုးစား ရှာဖွေနေတဲ့ မမိုးမိုးလွင်အတွက် စိတ်ဓာတ်ကျရတဲ့ အချိန်တွေလည်း ရှိခဲ့ပါတယ်။ ဒါကတော့ ခရီးသည် အရနည်းတဲ့ရက်တွေပါပဲ။ဒါပေမဲ့ လည်း သူဟာဇွဲမလျှော့ဘဲ သူရည် မှန်းထားတဲ့အရာကို ရဖို့ကြိုးစားခဲ့ပါ တယ်။

၃နှစ်တာကာလကြာအောင် နေ့စဉ်ရက်ဆက်စုဆောင်းခဲ့ပြီးတဲ့အချိန်မှာတော့ မမိုးမိုးလွင်ဟာ သူ ရွေးချယ်ခဲ့တဲ့ အသက်မွေးဝမ်း ကျောင်းမှုမှာ သူမက်ခဲ့တဲ့ အိပ်မက် ဖြစ်တဲ့ ကိုယ်ပိုင် အငှားယာဉ်တစ်စီး ကို ပိုင်ဆိုင်နိုင်ခဲ့ပါတော့တယ်။

အခုအချိန်မှာတော့ တက္ကစီ မောင်းတယ်ဆိုတာ ယောကျာ်းတွေ သာ လုပ်နိုင်တာပါဆိုတဲ့ လူမှုပုံစံ သတ်မှတ်ချက်တွေကိုကျော်လွန်ပြီး၊ သူများကားကို အငှားမောင်းရတဲ့သူ ဘဝကနေ ကိုယ်ပိုင်ယာဉ်ကို မောင်း နိုင်တဲ့ အငှားကားမောင်းသူ တစ်ယောက်ဖြစ်အောင် လက်တွေ့ကြိုးစားလုပ်ဆောင်ခဲ့တဲ့ မမိုးမိုးလွင်ရဲ့ ပြောတဲ့စကားကတော့ "မကြောက်ပါနဲ့။ အားမငယ်ပါနဲ့။ လုပ်ရင်ဖြစ်တယ်" ဆိုတာပါပဲ။

#Education_Digest_Journal_Vol_6_No_14
(Education Digest ဂျာနယ်၏ အတွဲ(၆) အမှတ်စဉ်(၁၄)တွင် ပုံနှိပ်ဖော်ပြထားသော ဆောင်းပါးဖြစ်ပါသည်။)

 နေပြည်တော်သမ္မတ အိမ်တော်ဝင်း အစည်းအဝေးခန်းမမှာ ၂ဝ၁၅ ခုနှစ် အောက်တိုဘာ ၃၁ ရက်နေ့ကကျင်းပတဲ့ နိုင်ငံရေး ထိပ်သီးအစည်း အဝေးပွဲကို တက်ရောက်လာတဲ့  ဒေါ်အောင်ဆန်းစုကြည်နဲ့ ဗိုလ်ချုပ်မှူးကြီး မင်းအောင်လှိုင် တို့ တွေ့ဆုံကြစဉ် နေပြည်တော်သမ္မတ အိမ်တော်ဝင်း အစည်းအဝေးခန်းမမှာ ၂ဝ၁၅ ခုနှစ် အောက်တိုဘာ ၃၁ ရက်နေ့ကကျင်းပတဲ့ နိုင်ငံရေး ထိပ်သီးအစည်း အဝေးပွဲကို တက်ရောက်လာတဲ့ ဒေါ်အောင်ဆန်းစုကြည်နဲ့ ဗိုလ်ချုပ်မှူးကြီး မင်းအောင်လှိုင် တို့ တွေ့ဆုံကြစဉ်
Photo: RFA
နိုင်ငံတော်သမ္မတဦးထင်ကျော်ရဲ့ တရုတ်နိုင်ငံခရီးစဉ်စတင်ချိန်မှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့ ပါဝင်တဲ့ လုံခြုံရေး၊ တည်ငြိမ်ရေးနဲ့ တရားဥပဒေစိုးမိုးရေးကော်မတီ အစည်းအဝေးကို ဒီကနေ့ သမ္မတအိမ်တော်မှာ ကျင်းပခဲ့တယ်လို့ သိရပါတယ်။

နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးကျော်ဇေယျက အဲဒီ အစည်းအဝေးဟာ နိုင်ငံအတွက် အရေးကြီးတဲ့ကိစ္စတွေ ဆွေးနွေးတဲ့အစည်းအဝေးလို့ ပြောပါတယ်။

ပြီးခဲ့တဲ့ ၂၀၁၆ ခုနှစ်၊ အောက်တိုဘာဆန်းက ရခိုင်ပြည်နယ်က ရဲစခန်းတွေကို တိုက်ခိုက်ခံရအပြီး အဲဒီကော်မတီ အစည်းအဝေးကို နိုင်ငံတော် သမ္မတ၊ နိုင်ငံတော်၏အတိုင်ပင်ခံ ပုဂ္ဂိုလ်၊ တပ်မတော်ကာကွယ်ရေး ဦးစီးချုပ်၊ ဒုတိယ တပ်မတော်ကာ ကွယ်ရေးဦးစီးချုပ်၊ ပြည်ထဲရေး ဝန်ကြီး၊ ကာကွယ်ရေးဝန်ကြီး၊ နိုင်ငံတော်အတိုင်ပင်ခံရုံးဝန်ကြီး တို့နဲ့ ကျင်းပခဲ့ပါသေးတယ်။

ကြံ့ခိုင်ဖွံ့ဖြိုးရေးပါတီအပါအ၀င် ပါတီ ၁၃ ပါတီကလည်း ပြီးခဲ့တဲ့ ၂၀၁၆ ခုနှစ်၊ နိုဝင်ဘာလကုန်ပိုင်းက အဖွဲ့ဝင် ၁၁ ဦးပါ ကာကွယ်ရေးနဲ့ လုံခြုံရေးကောင်စီ(ကာလုံ) အစည်းအဝေးခေါ်ယူဖို့ တိုက်တွန်းခဲ့ပါသေးတယ်။

ဖွဲ့စည်းပုံအခြေခံဥပဒေအရ ကာလုံကို သမ္မတ၊ ဒုတိယသမ္မတ ၂ ဦး၊ ပြည်သူနဲ့ အမျိုးသားလွှတ်တော် ဥက္ကဌ နှစ်ဦး၊ တပ်မတော်ကာကွယ်ရေးဦးစီးချုပ်၊ ဒုတိယတပ်မတော်ကာကွယ်ရေးဦးစီးချုပ်၊ နိုင်ငံခြားရေး၊ ပြည်ထဲရေး၊ ကာကွယ်ရေး၊ နယ်စပ်ရေးရ၀န်ကြီး ၁၁ ဦးနဲ့ ဖွဲ့စည်းထားတာပါ။
RFA

မြေမြှုပ်မိုင်းတစ်လုံးကို တွေ့ရစဉ် မြေမြှုပ်မိုင်းတစ်လုံးကို တွေ့ရစဉ်
မြန်မာနဲ့ ဘင်္ဂလားဒေ့ရ်ှနယ်စပ်မှာ ချထားတဲ့ မြေမြှုပ်မိုင်းတွေနဲ့ လက်လုပ်ဗုံးတွေကို ရှင်းလင်းရေး အပါအ၀င်၊ နယ်စပ်တလျောက် လုံခြုံငြိမ်းချမ်းရေးအတွက် လိုအပ်တာတွေဆောင်ရွက်ကြဖို့ နှစ်နိုင်ငံ သဘောတူခဲ့ကြပါတယ်။

မြန်မာနိုင်ငံရဲတပ်ဖွဲ့ ရဲဦးစီးချုပ် ဗိုလ်မှူးချုပ်မျိုးဆွေဝင်း ဦးဆောင်တဲ့ ကိုယ်စားလှယ် ၆ ဦးပါအဖွဲ့နဲ့ ဘင်္ဂလားဒေ့ရှ် နယ်ခြားစောင့်တပ်ဖွဲ့ တွဲဘက်ညွှန်ကြားရေးမှူးချုပ် ဗိုလ်မှူးချုပ် ရာမန် ဦးဆောင်တဲ့ ၁၆ ဦးပါ အဖွဲ့တို့ ၅ ရက်ကြာ နယ်စပ်ကိစ္စ ဆွေးနွေးပွဲအပြီးမှာ သဘောတူကြေညာချက် ဒီနေ့ ထုတ်ပြန်ခဲ့ပါတယ်။

မြန်မာနဲ့ ဘင်္ဂလားဒေ့ရှ် နှစ်နိုင်ငံနယ်စပ်ဟာ မိုင် ၁၇၀ နီးပါးရှည်လျားပြီး၊ မိုင် ၉၀ လောက်က တောတွေ၊ တောင်တွေနဲ့ ဝေးလံခေါင်ဖျားတဲ့ ဒေသတွေ ဖြစ်ပါတယ်။ အဲဒီဒေသတွေမှာ ရာဇ၀တ်သားတွေ၊ မူးယစ်ဆေးနဲ့ လက်နက်မှောင်ခိုသမားတွေ၊ မြန်မာဘက်က ခွဲထွက်ရေးသူပုန်အဖွဲ့တွေ လှုပ်ရှားနေကြပါတယ်။

နစ်နိုင်ငံနယ်စပ်အနီးမှာ ယာဘမူးယစ်ဆေးထုတ်လုပ်တဲ့ စက်ရုံပေါင်း ၄၉ ခုရှိတယ်လို့ ဘင်္ဂလားဒေ့ရှ် နယ်ခြားစောင့်တပ်က မြန်မာနိုင်ငံရဲတပ်ဖွဲ့ကို သတင်းပေးခဲ့တယ်လို့ ဗိုလ်မှူးချုပ် ရာမန်က ပြောပါတယ်။

မြန်မာဘက်ကလည်း ရခိုင်ပြည်နယ် မောင်တောဒေသမှာ အခြေအနေတွေ တည်ငြိမ်အေးဆေးသွားပြီဖြစ်ကြောင်း ပြောဆိုခဲ့ပြီး တရားမ၀င် နယ်စပ်ဖြတ်ကျော်မှုတွေကို တားဆီးဖို့ နှစ်နိုင်ငံပူးပေါင်းဆောင်ရွက်ရေးတွေ ဆွေးနွေးခဲ့ကြကြောင်း သိရပါတယ်။
RFA

နိုင်ငံတော်သမ္မတ ဦးထင်ကျော်နှင့်ဇနီး တရုတ်ပြည်သူ့သမ္မတနိုင်ငံကို ဧပြီလ ၇ ရက်နေ့က ချစ်ကြည်ရေးခရီး ထွက်ခွာစဉ် နိုင်ငံတော်သမ္မတ ဦးထင်ကျော်နှင့်ဇနီး တရုတ်ပြည်သူ့သမ္မတနိုင်ငံကို ဧပြီလ ၇ ရက်နေ့က ချစ်ကြည်ရေးခရီး ထွက်ခွာစဉ်
Photo: Myanmar President Office
နိုင်ငံတော်သမ္မတဦးထင်ကျော်ရဲ့ တရုတ်နိုင်ငံခရီးစဉ်အတွင်း စာချုပ် ၆ ခုလောက် လက်မှတ်ရေးထိုး ဖို့ ပြင်ဆင်သွားတယ်လို့ နိုင်ငံခြားရေးဝန်ကြီးဌာန၊အမြဲတမ်းအတွင်းဝန် ဦးကျော်ဇေယျက ပြောပါတယ်။

အဲဒီစာချုပ်တွေဟာ ပညာရေး၊ ကျန်းမာရေးနဲ့ အားကစားဆိုင်ရာ စာချုပ်တွေဖြစ်တယ်လို့ ဦးကျော်ဇေယျက ဒီကနေ့ နေပြည်တော်မှာ ပြုလုပ်ခဲ့တဲ့ အစိုးရသက်တမ်း ၁ နှစ်အတွင်း လုပ်ဆောင်ချက်တွေနဲ့ပတ်သက်တဲ့ သတင်းစာရှင်းလင်းပွဲ အပြီးမှာ သတင်းထောက်တွေကို ပြောပါတယ်။

မြစ်ဆုံစီမံကိန်းကိစ္စနဲ့ ပတ်သက်ရင်တော့ လက်ရှိဖွဲ့စည်းထားတဲ့ ကော်မရှင်ရဲ့ရလဒ်ကို စောင့်တာပိုကောင်း တယ်လို့လည်း ဦးကျော်ဇေယျက ပြောပါတယ်။

နိုင်ငံတော် သမ္မတ ဦးထင်ကျော်ဟာ ဒီကနေ့ မှာ တရုတ်ပြည်သူ့သမ္မတ နိုင်ငံကို ချစ်ကြည်ရေး ခရီးစဉ် သွားရောက်နေပြီ ဖြစ်ပါတယ်။

အဲဒီခရီးစဉ်ကို နိုင်ငံတော် အတိုင်ပင်ခံရုံးဝန်ကြီး ဦးကျော်တင့်ဆွေ၊ စီးပွားကူးသန်းဝန်ကြီး ဦးသန်းမြင့် ၊ ဆောက်လုပ်ရေးဝန်ကြီးဦးဝင်းခိုင်နဲ့ နိုင်ငံခြားရေး ဒုဝန်ကြီး ဦးကျော်တင်တို့လည်း လိုက်ပါသွားတယ်လို့ သိရပါတယ်။
RFA


ဧပြီ ၆၊ ၂၀၁၇

ရှော်ဘီဟူလ္လာနှင့်ဇနီး အောယေရှားခါတူတို့က ဆဲဆိုနေသော အိမ်နီးချင်းအား ကျေးရွာအုပ်ချုပ် ရေးမှူးထံတိုင်ကြားသဖြင့် အိမ်နီးချင်းက မကျေနပ်သဖြင့် တုတ်ဖြင့်ဝိုင်းရိုက်၍ လူတစ်ဦး သေဆုံးမှု ဖြစ်ပွားသည်။
-
ဧပြီ ၄ ရက် ညနေ ၅နာရီကျော်တွင် ကလေးချင်းစကားများရန်ဖြစ်သည်ကို မကျေနပ်၍ ဆဲဆိုနေသော အိမ်နီချင်း ဇော်နာလိုပိုဒိန် (ခ)ဟာဘီအား ဘူးသီးတောင်မြို့နယ် ခဲဝါကျေးရွာနေ ရှော်ဘီဟူလ္လာနှင့်ဇနီး အောယေရှားခါတူတို့ နှစ်ဦးသည် ကျေးရွာအုပ်ချုပ်ရေးမှူးထံ တိုင်ကြားပြီး နေအိမ်သို့ပြန်လာရာ ဦးလှဖေကြီးရွာနှင့် ခဲဝါရွာအကြား လယ်ကွင်းပြင်တွင် ဇော်နာလိုပိုဒိန် (ခ) ဟာဘီပါ ၅ ဦးက ကျေးရွာ အုပ်ချုပ်ရေးမှူးထံ တိုင်ကြားသည့်ကိစ္စအားမကျေနပ်၍ သံတူရွင်း၊ တုတ်များဖြင့် ၀ိုင်းဝန်းရိုက်နှက်ကြသည်။
-
ဝိုင်းဝန်းရိုက်နှက်ခဲ့မှုကြောင့် အောယေရှားခါတူသည် လက်ယာဘက် တံတောင်ဆစ်၊ လက်ဝဲ လက်ယာ ခြေဖမိုးဖူးရောင်ဒဏ်ရာများ(မစိုးရိမ်ရ)ရရှိပြီး ရှော်ဘီဟူလ္လာသည် နှာခေါင်း၊ လက်ယာပခုံး၊ လက်သူကြွယ် သွေးထွက်ဖူးရောင်ပေါက်ပြဲဒဏ်ရာ တို့ရရှိခဲ့သဖြင့် ဧပြီ ၅ ရက် နံနက်ပိုင်းတွင် သေဆုံးခဲ့သည်။
-
ဖြစ်စဉ်နှင့်ပတ်သက်၍ ဥပဒေ၊ လုပ်ထုံးလုပ်နည်းများနှင့်အညီ အမှုဖွင့် အရေးယူနိုင်ရေး ဆောင်ရွက် လျက်ရှိကြောင်း သိရသည်။

(နိုင်ငံတော်အတိုင်ပင်ခံရုံးသတင်းထုတ်ပြန်ရေးကော်မတီ)
https://www.facebook.com/MyanmarSCOInfoCom/



Good Morning ပေါင်မုန့် စက်ရုံအလုပ်သမားတွေ ရန်ကုန်မြို့ မဟာဗန္ဓုလပန်းခြံနားမှာ ဧပြီလ ၆ ရက်နေ့က ဆန္ဒထုတ်ဖော်စဉ်။ photo: Aung Thain kha/RFA
Good Morning အမှတ်တံဆိပ် ပေါင်မုန့်နဲ့ ကိတ်မုန့် ထုတ်လုပ်တဲ့ Myanmar Mayson စက်ရုံကနေ အလုပ်ထုတ် ခံလိုက်ရတဲ့ အလုပ်သမားတွေကို အလုပ်ပြန်ခန့်ဖို့နဲ့ အခြားအလုပ်သမား အခွင့်အရေးတွေ ပြန်လည် ရရှိဖို့အတွက် အလုပ်သမား ၁၀၀ နီးပါးလောက်ဟာ ဒီကနေ့ ရန်ကုန်မြို့ မဟာဗန္ဓုလပန်းခြံနားမှာ ဆန္ဒထုတ်ဖော်ခဲ့ကြပါတယ်။

ဆန္ဒပြအလုပ်သမားတွေဟာ အလုပ်သမား သမဂ္ဂအဖွဲ့အစည်းတွေကို ကန့်ကွက်ခြင်းမပြုဖို့၊ အလုပ်သမားအချင်း ချင်းအကြား ခွဲခြားဆက်ဆံခြင်းမပြုဖို့နဲ့ အလုပ်ရှင်တွေအနေနဲ့ ရန်ကုန်တိုင်း အလုပ်သမား ခုံသမာဓိရဲ့ ဆုံးဖြတ် ချက်တွေ၊ ဥပဒေတွေကို လေးစားလိုက်နာဖို့ စတဲ့အချက်တွေကို တောင်းဆိုခဲ့ကြပါတယ်။

ဒါ့အပြင် နှစ်စဉ် ပေးနေကျ အပိုဆုကြေးတွေ လျှော့ချတာကိုလည်း ဆန္ဒပြအလုပ်သမားတွေက ကန့်ကွက်ခဲ့ကြ ပါတယ်။

Good Morning ပေါင်မုန်စက်ရုံမှာ ကုန်ပစ္စည်းထုတ်လုပ်ဖို့အတွက် အလိုအလျောက်လုပ်ကိုင်တဲ့ စက်ပစ္စည်းတွေ အသုံးပြုတော့မှာ ဖြစ်တာကြောင့် အလုပ်သမား ၁၈၀ ကျော်ကို ပြီးခဲ့တဲ့ မတ်လ ၈ ရက်နေ့မှာ စက်ရုံပိုင်ရှင်က အလုပ် ထုတ်လိုက်တာ ဖြစ်ပါတယ်။

အလုပ်ထုတ်ခံလိုက်ရတဲ့ အလုပ်သမားတွေထဲမှာ အဲဒီစက်ရုံရဲ့ အလုပ်သမားသမဂ္ဂအဖွဲ့အစည်းက ခေါင်းဆောင် ၄ ဦးပါဝင်ပြီး လုပ်သက် ၁ နှစ်ကနေ ၁၉ နှစ်အထိရှိတဲ့ အလုပ်သမားတွေလည်း ပါဝင်ပါတယ်။ ဒီကိစ္စနဲ့ပတ်သက်ပြီး ပြီးခဲ့တဲ့ မတ်လက အလုပ်ရှင်ကိုယ်စားလှယ်တွေ နဲ့ အလုပ်သမား ကိုယ်စားလှယ်တွေ တွေ့ဆုံညှိနှိုင်းခဲ့ပေမယ့် အခုအချိန်အထိ အဆင်မပြေသေးတာ ဖြစ်ပါတယ်။

RFA Burmese
http://www.rfa.org/burmese



ရေနံလက်ယက်တွင်း လုပ်ကိုင်နေသူ တစ်ဦးကို တွေ့ရစဉ်။ Photo:Min Thein Aung/RFA
မကွေးတိုင်းဒေသကြီး အစိုးရအဖွဲ့ဟောင်းက ကောက်ယူထားပြီး အစိုးရသစ်ကို လွှဲပြောင်းမပေးဘဲ ပျောက်ဆုံးနေ တဲ့ ရေနံလက်ယက်တွင်း ရန်ပုံငွေ ၇ ဘီလီယံကျော်ထဲက ၁.၇ ဘီလီယံကို ပြည်ထာင်စု ကြံ့ခိုင်ရေးနှင့် ဖွံ့ဖြိုးရေး ပါတီအတွက် အသုံးပြုခဲ့ကြောင်း စစ်ဆေးတွေ့ရှိရတယ်လို့  ပွင့်ဖြူမြို့နယ်၊ ပြည်သူ့လွှတ်တော် ကိုယ်စားလှယ် ဦးထွန်းထွန်းက ပြောပါတယ်။

ပြည်ထဲရေးဝန်ကြီးဌာနရဲ့ စစ်ဆေးတွေ့ရှိချက်ထဲမှာ အဲဒီ ၇ ဘီလီယံကျော်ကို ဒေသဖွံ့ဖြိုးရေး၊ အသေးစားချေးငွေ လုပ်ငန်းနဲ့ ကြံ့ခိုင်ဖွံ့ဖြိုးရေးပါတီအတွက် အသုံးပြုထားကြောင်း တွေ့ရှိရတယ်လို့ ဦးထွန်းထွန်းက ပြောပါတယ်။

"၇.၄၅၉ ဘီလီယံမှာ ၄.၁၈ ဘီလီယံကျော်ကတော့ မကွေးတိုင်းဒေသကြီးဖွံ့ဖြိုးရေးအတွက် သုံးစွဲခဲ့တယ် လို့ပဲ ဖြေကြားထားပါတယ်၊ နောက်တစ်ခုက ရွှေသုခအသေးစားချေးငွေအတွက် ၁.၅၇၅ ဘီလီယံကျော် ပေး ထား တယ်လို့လည်း ပြောထားပါတယ်၊ ၁.၇ ဘီလီယံကျော်ကတော့ သူတို့ ကြံခိုင်ရေးနဲ့ဖွံ့ဖြိုးရေးအသင်းမှာ သူတို့ သုံးစွဲထားတယ်လို့လည်း ဖြေထားတာပါဗျ။ "

မကွေးတိုင်းအတွင်းက ရေနံလက်ယက်တွင်းရန်ပုံငွေ ၂.၈ ဘီလီယံ ပျောက်ဆုံးနေတဲ့ကိစ္စနဲ့ ပတ်သက်ပြီး ပြီးခဲ့ တဲ့နှစ် မေလက ပွင့်ဖြူမြို့နယ် လွှတ်တော်ကိုယ်စားလှယ် ဦးထွန်းထွန်း က ပြည်သူ့လွှတ်တော်မှာ မေးခွန်းမေးမြန်း ခဲ့ပြီးနောက် စုံစမ်းစစ်ဆေးမှုတွေ ပြုလုပ်ခဲ့တာ ဖြစ်ပါတယ်။

အဲလိုစစ်ဆေးမှုတွေပြုလုပ်တဲ့အခါမှာ ပျောက်ဆုံးနေတာက ၂.၈ ဘီလီယံ မဟုတ်ဘဲ ၇ ဘီလီယံကျော်အထိ  စာရင်းပျောက်နေတာကို တွေ့ရှိခဲ့တာဖြစ်ပါတယ်။

အဲဒီ ၇ ဘီလီယံကျော်ဟာ ရေနံလက်ယက်တွင်းတွေက ထွက်ရှိတဲ့ ခန့်မှန်းရေနံစည်ပေါင်း သိန်း ၂၀ ကျော်အတွက် သယ်ယူခတွေ၊ ၀န်ဆောင်ခတွေအဖြစ် လုပ်ငန်းရှင်တွေက ပေးသွင်းထားတာ ဖြစ်တယ်လို့လည်း သိရပါတယ်။

RFA Burmese
http://www.rfa.org/burmese


မြစိမ်းရောင်ကျေးရွာ ရန်ပုံငွေ သိန်း(၃၀၀)ကျော် မီးလောင်ဆုံးရှုံး
ပဲခူးတိုင်းဒေသကြီး တောင်ငူခရိုင် ဖြူးမြို့နယ် ငါးမြစ်ချင်းကျေးရွာမှာ နေအိမ်မီးလောင်ရာက အစိုးရပိုင်မြစိမ်းရောင် ကျေးရွာရံပုံငွေ(၃၂၄)သိန်း မီးလောင်သွားခဲ့တယ်လို့ ပြောဆိုခဲ့တာနဲ့ပတ်သက်ပြီး အမှုဖွင့်ခံထားရတယ် လို့ သိရပါတယ်။ မနေ့က ညပိုင်းက ငါးမြစ်ချင်းရွာနေသူ မြစိမ်းရောင်ကော် မတီဘဏ္ဍာရေးမှူး ဦးကျော်လွင်ဦးရဲ့နေအိမ်မှာ မီးဖိုခန်း မီးကြွင်းမီးကျန်က တဆင့် မီးလောင်ကျွမ်းခဲ့ရာမှာ ရံပုံငွေတွေပါသွားတယ်လို့ ပြောဆိုခဲ့တာဖြစ် ပါတယ်။


 မီးလောင်ရာကို တာဝန်ရှိသူတွေ သွားရောက်စစ်ဆေးခဲ့ရာ မီးလောင်ပြင်အတွင်းမှာရှိတဲ့ သံသေတ္တာထဲမှာ မီးလောင်ထားတဲ့ စာရွက် စာတမ်းတွေနဲ့ ငွေစက္ကူတွေ စုစုပေါင်းကျပ်(၇)သိန်းကျော်ကိုသာ တွေ့ရှိခဲ့တယ်လို့ ဆိုပါတယ်။


 ဒီဖြစ်စဉ်နဲ့ ပတ်သက်ပြီး မြစိမ်းရောင်ချေးငွေ ကော်မတီဘဏ္ဏာရေးမှူးဟာ နိုင်ငံတော်ပိုင်ငွေကြေးကိုအလွဲသုံးစားပြုပြီး နေအိမ်အားမီးလောင်ကျွမ်းအောင်ပြုလုပ်တယ်လို့ ဆိုကာ မြို့နယ်ကျေးလက်ဦးစီးဌာနဦးစီးမှူးက တရားလိုပြုလုပ် တိုင်ကြားခဲ့တာကြောင့် ကညွတ်ကွင်းနယ်မြေရဲစခန်းက ဦကျော်လွင်ဦးကို ဖမ်းဆီးအမှုဖွင့်ထားတယ်လို့သိရပါတယ်။

သတင်းထောက် - ဖြိုးကိုလင်း (ညောင်ဝိုင်း) (5 Plus News)
https://www.facebook.com/5plusnews/



ရခိုင်ပြည်နယ် တည်ငြိမ်အေးချမ်းမှုနှင့် ဖွံ့ဖြိုးမှုတိုးတက်ရေး အကောင်အထည်ဖော်ရေးဗဟိုကော်မတီ လုပ်ငန်းညှိနှိုင်းအစည်းအဝေး (ဓါတ်ပုံ- Myanmar State Counsellor office)
ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်တဲ့ ရခိုင်ပြည်နယ်ဆိုင်ရာ အကြံပေးကော်မရှင်ရဲ့ ကြားဖြတ် အစီရင်ခံစာပါအကြံပြုချက်တွေကို အစိုးရအနေနဲ့ အမြန်ဆုံး ထိထိရောက်ရောက် အကောင်အထည်ဖော် ဆောင်သွားရေးကို ဒီကနေ့ (ဗုဒ္ဓဟူးနေ့)ကျင်းပတဲ့ ရခိုင်ပြည်နယ် တည်ငြိမ် အေးချမ်းမှုနဲ့ ဖွံ့ဖြိုးမှုတိုးတက်မှု အကောင်အထည်ဖော်ရေး ဗဟိုကော်မတီ လုပ်ငန်းညှိနှိုင်းအစည်းအဝေးမှာ အဓိက ဆွေးနွေးခဲ့တဲ့အကြောင်း အစည်းအဝေး တက်ရောက်သူတချို့က ပြောပါတယ်။ ရခိုင်ပြည်နယ်တွင်း လုံခြုံရေး၊ တရားဥပဒေစိုးမိုးမှုရှိရေးနဲ့ ဖွံ့ဖြိုးရေးဆိုင်ရာကိစ္စတွေကို ဆွေးနွေးတင်ပြခဲ့ကြတဲ့ ဒီ အစည်းအဝေးအကြောင်း မခင်ဖြူထွေးက မေးမြန်း တင်ပြထားပါတယ်။

ရခိုင်ပြည်နယ် တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးဆိုင်ရာ လုပ်ငန်းညှိနှိုင်းအစည်းအဝေးကို ဗုဒ္ဓဟူးနေ့ မနက်ပိုင်းက နေပြည်တော်မှာ ရှိတဲ့ နိုင်ငံတော်သမ္မတအိမ်တော် အစည်းအဝေးခမ်းမမှာ ကျင်းပခဲ့တာဖြစ်ပြီး ရခိုင်ပြည်နယ် တည်ငြိမ်းအေးချမ်းရေးနဲ့ ဖွံ့ဖြိုးတိုးတက်ရေး အကောင် အထည်ဖော်မှု ဗဟိုကော်မတီ ဥက္ကဋ္ဌ ဖြစ်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင် တက်ရောက်တာ ဖြစ်ပါတယ်။ ရခိုင်ပြည်နယ် လုံခြုံရေး၊ တည်ငြိမ်ရေးနဲ့ ဖွံ့ဖြိုတိုးတက်ရေးဆိုင်ရာ လုပ်ငန်း အခြေအနေတွေကို ပုံမှန် ဆွေးနွေး ညှိနှိုင်းကြတဲ့ ဗဟိုကော်မတီ အစည်းအဝေးဖြစ်ပြီး ဒီအစည်းအဝေး မှာတော့ ရခိုင်ပြည်နယ်ဆိုင်ရာ အကြံပေးကော်မရှင်ရဲ့ အကြံပြုချက်တွေကို အစိုးရဘက်က အမြန်ဆုံး ထိထိရောက်ရောက် အကောင်အထည် ဖော်သွားဖို့ကိစ္စတွေကို အဓိက ဆွေးနွေးခဲ့ကြတဲ့အကြောင်း ဒီကနေ့ အစည်းအဝေးကို တက်ရောက်ခဲ့ တဲ့ လူမှုဝန်ထမ်းကယ်ဆယ်ရေးနဲ့ ပြန်လည်နေရာချထားရေး ဝန်ကြီး ဒေါက်တာ ၀င်းမြတ်အေး က ပြောပါတယ်။

“အဓိကအချက်ကတော့ ကိုဖီအာနန်ရဲ့ အကြံပြုချက်တွေ ထွက်လာတယ်လေ။ ဒါနဲ့ ပတ်သက်ပြီး ဆောင်ရွက်ရမယ့် ကိစ္စတွေ ဆွေးနွေးတာပေါ့နော်။ အစီရင်ခံစာကတော့ fair (မျှတ)တယ်ပေါ့နော်။ အကောင်အထည်ဖေါ်ရမယ်။ ဒါတွေကို ပြောတာပါ။ တချို့ကလည်း လုပ်နေတယ်ဆိုပေမယ့် ဆက်ပြီး အကောင်အထည်ဖေါ်မယ့် လုပ်ငန်းတွေကို ခပ်သွက်သွက်နဲ့ ခပ်မြန်မြန်လုပ်ဖို့ဟာတွေ လုပ်နေပါတယ်။ ကျနော်တို့ဆို camp နဲ့ ပတ်သက်ပြီးတော့ ပြီးခဲ့တဲ့ နောက်ဆုံးပတ်က ရခိုင်ကို သွားတယ်။ လက်ရှိ ရှိနေတဲ့ camp တွေရဲ့ အခြေအနေကိုကြည့်တယ်။ ဒါတွေလေ့လာတယ်။ တချို့နေရာတွေက ပြန်ပြီး နေရာချထားလို့ ရတယ်အခြေအနေရှိတယ်။ တချို့နေရာက မရသေးဘူး။ အဲတော့ ရတဲ့နေရာက စလုပ်မယ်။”

ရခိုင်ပြည်နယ်အတွင်း လူမှုစီးပွား ဖွံ့ဖြိုး တိုးတက်ရေး ဆောင်ရွက်ရာမှာ လူသားချင်းစာနာမှု အကူအညီတွေကနေ ရေရှည် ဖွံ့ဖြိုး တိုးတက်မှုတွေ ဖြစ်ပေါ်လာအောင် ဆောင်ရွက်သွားဖို့ နဲ့ ဒီအတွက် ကုလသမဂ္ဂ၊ နိုင်ငံတကာ အဖွဲ့အစည်းတွေနဲ့ ပူးပေါင်းဆောင်ရွက်သွားဖို့ ကိစ္စတွေကိုလည်း ဆွေးနွေးခဲ့တဲ့အကြောင်း ဒေါက်တာ ၀င်းမြတ်အေးက ပြောပါတယ်။

“ ရခိုင်ပြည်နယ် လူမှုစီးပွား ဖွံဖြိုးတိုးတက်ရေးဆိုတဲ့ စီမံချက်ကြီးကတော့ ရှိတာပေါ့။ အဲဒါကိုလည်း ကျနော်တို့က အကောင်အထည်ဖေါ်တယ်။ နောက် UN အဖွဲ့အစည်းတချို့နဲ့ ကျနော်တို့ ပူးပေါင်းပြီးတော့ လူသားချင်းစာနာထောက်ထားမှုကနေ ရေရှည်ဖွံဖြိုးတိုးတက်ရေးဆီ ပြောင်းလဲသွားမယ့် ကိစ္စတွေနဲ့ ပတ်သက်ပြီးတော့ ပူးပေါင်းဆောင်ရွက်မယ်ပေါ့။”

ရခိုင်ပြည်နယ်တွင်း လက်ရှိအခြေအနေနဲ့ ပတ်သက်လို့လည်း ဒေါက်တာ ၀င်းမြတ်အေးက အခုလို ပြောပါတယ်။

“အရင်ဖြစ်ခဲ့တဲ့ ပဋိပက္ခနဲ့ ဆက်စပ်ပြီးကြည့်ရင် တည်ငြိမ်တဲ့သဘောတော့ ရှိပါပြီ။ အခုတော့ ပြန်ပြီးတည်ငြိမ်လာပြီ။ ကျနော်တို့လည်း လုပ်သင့်လုပ်ထိုက်တာတွေ အကုန်လုပ်နေတယ်။ ကျနော်တို့ အခုလုပ်မယ့် လုပ်ငန်းစဉ်တွေကို ဆက်လုပ်သွားရင်တော့ ပိုကောင်းလာမှာပေါ့။ တဖြေးဖြေးနဲ့။ ဒါပေမဲ့ အဲဒီနေရာတွေက အမြန်တမ်းတော့ သတိထားရမယ့် နေရာတော့ ဖြစ်နေတယ်။”

ဒီကနေ့ အစည်းအဝေးကတော့ ရခိုင်ပြည်နယ် တည်ငြိမ်ရေးနဲ့ ဖွံဖြိုးရေးကိစ္စတွေကို ဆောင်ရွက်နေကြတဲ့ လုပ်ငန်းညှိနှိုင်းအဖွဲ့တွေရဲ့ ပုံမှန် အစည်းအဝေး ဖြစ်ပြီး ရခိုင်ပြည်နယ် လုံခြုံရေး၊ တည်ငြိမ်အေးချမ်းရေးနဲ့ တရားဥပဒေစိုးမိုးရေးလုပ်ငန်း ကော်မတီ၊ လူဝင်မှု ကြီးကြပ်ရေးနဲ့ နိုင်ငံသားစိစစ်ရေးလုပ်ငန်းကော်မတီ၊ ဒေသတွင်း ပြန်လည်နေရာချထားရေးနဲ့ လူမှုစီးပွားဘ၀ ဖွံ့ဖြိုးတိုးတက်ရေး လုပ်ငန်းကော်မတီနဲ့ ကုလသမဂ္ဂ အဖွဲ့အစည်းများ၊ နိုင်ငံတကာ အဖွဲ့အစည်းများနဲ့ ပူးပေါင်းဆောင်ရွက်ရေး လုပ်ငန်းကော်မတီတွေက တာဝန်ရှိသူတွေ တက်ရောက်ကြတဲ့ အကြောင်း နိုင်ငံတော်အတိုင်ပင်ခံပုဂ္ဂိုလ်ရုံးကလည်း သတင်းထုတ်ပြန်ထားပါတယ်။

ခင်ဖြူထွေး  / ဗွီအိုအေ (မြန်မာပိုင်း)
http://burmese.voanews.com



( ၇၂ ကြိမ်မြောက်တပ်မတော်နေ့ အခမ်းအနားတွင် စစ်ရေးပြနေသော တပ်မတော် စစ်သည်များကို တွေ့ရစဉ် ) Photo: Win Ko Ko Latt
တိုင်းရင်းသား လက်နက်ကိုင် တပ်ဖွဲ့တွေနဲ့ ထိပ်တိုက်ရင်ဆိုင်နေရတဲ့ မြန်မာ့တပ်မတော်ဟာ တရုတ်နိုင်ငံအပေါ် စစ်လက်နက်ပစ္စည်းတွေနဲ့ ပတ်သက်ပြီး မှီခိုနေရတာကို လျှော့ချနိုင်ရေးအတွက် ရုရှားနိုင်ငံထုတ် လေယဉ်နဲ့ လက်နက်တွေကို ပိုမိုဝယ်ယူနေကြောင်း ဧပြီလ ၅ ရက် မနေ့ကထုတ်ဝေတဲ့ Asia Times သတင်းစာက ဖေါ်ပြလိုက်ပါတယ်။

ရုရှားလုပ် (Yakovlev ယာကိုလဗ်) Yak-130 အမျိုးအစား လေ့ကျင့်ရေးတိုက်လေယဉ် ၃စင်းကို မကြာခင်က ရယူခဲ့တဲ့ မြန်မာလေတပ်ဟာ ၂ဝ၁၈ ခုနှစ် မကုန်ခင်နောက်ထပ် တိုက်လေယဉ်တွေ ဝယ်ယူမှာဖြစ်ကြောင်း၊ လက်ရှိမှာ တိုင်းရင်းသားလက်နက်ကိုင်တွေက တရုတ်နိုင်ငံထုတ် လက်နက်တွေကို အဓိကကိုင်ဆောင်နေတာ ဖြစ်သလို မြန်မာ့တပ်မတော်ကလည်း တရုတ်ထုတ် စစ်လေယဉ်နဲ့ လက်နက်တွေကို အားကိုးနေရကြောင်း ဖေါ်ပြထားပါတယ်။

တဆက်တည်းမှာပဲ ကိုးကန့်ဒေသမှာ ပြီးခဲ့တဲ့ ဇန်နဝါရီလ ၁၉ ရက်ကနေ မတ်လ ၂၆ရက်နေ့အတွင်း ဖြစ်ပွားခဲ့တဲ့ တိုက်ပွဲတွေမှာ မြန်မာစစ်တပ်က အရာရှိ ၃၂ဦးအပါအဝင် စစ်သည်အင်အား ၄၁၂ ဦးကျဆုံးပြီး ၅၈၂ ဦး ဒဏ်ရာရခဲ့ကြောင်း၊ ၂ဝ၁၅ခုနှစ်ကဖြစ်ပွားတဲ့ နယ်ခြားဒေသစစ်ပွဲမှာဆိုရင် မြန်မာတပ်မ ၆၆ က ကျဆုံးတဲ့ ဦးရေဟာ အခုထက်ပိုများခဲ့ကြောင်း၊ ဒီအချက်တွေကြောင့် မြန်မာ့တပ်မတော်ဟာ မြေပြင်တပ်ဖွဲ့တွေ အစား လေကြောင်းတိုက်ခိုက်မှုတွေကို ပိုမိုအသုံးပြုလာခဲ့ကြောင်း၊ လက်ရှိမှာ မြန်မာ့တပ်မတော်ဟာ ရုရှားနိုင်ငံလုပ်  MIG-29 တိုက်လေယဉ်တွေ၊ Mi-35 တိုက်ခိုက်ရေးရဟတ်ယဉ်တွေနဲ့ Mi-17 သယ်ယူပို့ဆောင်ရေး ရဟတ်ယဉ်တွေကို သုံးစွဲနေကြောင်းနဲ့ ထပ်မံဝယ်ယူမှာဖြစ်ကြောင်း စသဖြင့် ဆောင်းပါးရှင် Bertil Litner ဘာတီးလ်လစ်တနာ က Asia Times သတင်းစာမှာ မနေ့က ရေးသားလိုက်ပါတယ်။

RFA Burmese
https://www.facebook.com/rfaburmese/


ကားတစ်စီးအား စစ်ဆေးနေသည့် ရုရှား ယာဉ်ထိန်းရဲ တစ်ဦးအား တွေ့ရစဉ် (ဓာတ်ပုံ-အင်တာနက်)
    မော်စကို၊ ဧပြီ ၆ ရက် (ဆင်ဟွာ)

    ရုရှားနိုင်ငံ တောင်ပိုင်း Astrakhan မြို့တွင် ရဲတပ်ဖွဲ့ဝင် နှစ်ဦးအား ပစ်သတ်သူဟု စွပ်စွဲခံထားရသူ လေးဦးကို အသေ ဖမ်းဆီးမိခဲ့ကြောင်း ရုရှား လုံခြုံရေး ပြောခွင့်ရပုဂ္ဂိုလ် တစ်ဦး၏ ပြောကြားချက်အား ကိုးကား၍ ဧပြီလ ၆ ရက်တွင် TASS သတင်းက ဖော်ပြထားသည်။

“သံသယရှိသူ လေးဦးကို ဧပြီလ ၄ ရက်က ပြုလုပ်ခဲ့တဲ့ အထူး စစ်ဆင်ရေးမှာ အသေပစ်ခတ် ဖမ်းဆီးမိခဲ့တာပါ” ဟု အထက်ပါ ပြောခွင့်ရပုဂ္ဂိုလ်က ပြောသည်။

ဧပြီလ ၄ ရက်က Astrakhan မြို့တွင် လမ်း မတော်တဆမှု တစ်ခုအတွင်း လက်နက်ကိုင် အမျိုးသား လေးဦးက တိုက်ခိုက်မှုကြောင့် ယာဉ်ထိန်းရဲ အရာရှိ နှစ်ဦး သေဆုံးသွားခဲ့ကြောင်း၊ ယင်း လက်နက်ကိုင် အမျိုးသား လေးဦးမှာ ရုရှားနှင့် နိုင်ငံတကာမှ အလိုရှိနေသည့် လူဆိုး စာရင်းဝင်များ ဖြစ်ကြောင်း သိရသည်။

(Xinhua)
http://www.xinhuamyanmar.com



ကလေးငယ် ၂၀ ဉီး သေဆုံး
ဆီးရီးယား နိုင်ငံ မြောက်ပိုင်း ခန်း ရှိတ်ခေါင်း မြို့က လေကြောင်း တိုက်ခိုက်မှု အတွင်းမှာ သေဆုံး ခဲ့ကြသူတွေကို ရင်ခွဲ စစ်ဆေး ရာမှာ ဓါတု အဆိပ် လက်နက် ကြောင့် သေဆုံး ခဲ့ရတာ ဖြစ်ကြောင်း တူရကီ က အတည်ပြု ပြောကြားပါတယ်။

ဓါတု လက်နက် တွေကို အသုံးပြု ခဲ့တဲ့ ဆီးရီးယား သမ္မတ ဘာရှာ အာဆတ် ရဲ့ တပ်တွေမှာ အဓိက တာဝန် ရှိကြောင်း တူရကီ တရားရေး ဝန်ကြီး ဘီကာ ဘို့ဒက်ဇ် က ပြောပါတယ်။

ဒါပေမယ့် အခုလို စစ်ဆေး အဖြေ ထုတ် ဖို့ အတွက် ဘယ်လို ဓါတု လက်နက် ကျွမ်းကျင်သူ ကို ဆီးရီးယား ကို စေလွှတ် ခဲ့တာလဲ ဆိုတဲ့ မေးခွန်း ကိုတော့ တူရကီ တရားရေး ဝန်ကြီး က ထုတ်ဖော် ပြောကြားခြင်း မရှိပါဘူး။

တူရကီ ရဲ့ ပြောကြားမှု နဲ့ ပတ်သက်လို့ ရုရှ အစိုးရ ပြောခွင့် ရ ပုဂ္ဂိုလ် ဒီမီထရ ပက်စကော့ က

လေကြောင်း တိုက်ခိုက်မှု နဲ့ ပတ်သက်လို့ ကောက်ချက်ချဖို့ စောလွန်း ပါသေးတယ်။ ဓါတု လက်နက် နဲ့ တိုက်ခိုက် ခဲ့တယ် ဆိုတဲ့ စွပ်စွဲမှု ကိုလည်း သုံးသပ်ဖို့ အချိန်စော လွန်း သေးကြောင်း သူက ပြောကြား ခဲ့တာ ဖြစ်ပါတယ်။

တူရကီ ရဲ့ ပြောကြားချက် နဲ့ ပတ်သက်လို့ ဆီးရီးယား အစိုးရ ကလည်း အပြင်းအထန် ငြင်းဆို ထားပါတယ်။

BBC Burmese
http://www.bbc.com/burmese



 ရထား ဘူတာ က ပေါက်ကွဲမှု အတွင်းမှာ လူ ၁၄ ဦး သေဆုံး ခဲ့ရ
ပြီးခဲ့တဲ့ တနင်္လာနေ့ က ရုရှ နိုင်ငံ စိန့်ပီတာစဘတ် မြို့မှာ ဖြစ်ပွား ခဲ့တဲ့ ဗုံးပေါက်ကွဲမှု မှာ အဓိက လက်သည် တရားခံ အက်ဘာဇွန် လာလီဇော့ဗ် နဲ့ ဆက်စပ်တဲ့ အာရှ အလယ်ပိုင်း ဒေသ က လူ အချို့ ကို ရဲတပ်ဖွဲ့ က ဖမ်းဆီး ခဲ့ပါတယ်။

အဲဒီလူတွေကို ဖမ်းဆီး ခဲ့စဉ် အတွင်း သူတို့ နေထိုင်ရာ တိုက်ခန်း ကနေ လက်ပစ်ဗုံး တစ်လုံး ကိုလည်း ရှာဖွေ တွေ့ ရှိခဲ့ရတယ်လို့ ရဲတွေက ပြောပါတယ်။

အဲဒီလက်ပစ် ဗုံးဟာ ဒုတိယ ကမ္ဘာစစ် လက်ကျန် ဗုံး ကို စနစ်တံ ပြောင်းလဲ တပ်ဆင် ထားပြီး ဘေးကင်း အောင် ဆောင်ရွက် နိုင်ခဲ့တယ်လို့ သိရပါတယ်။

ပြီးခဲ့တဲ့ တနင်္လာနေ့က ဖြစ်ပွား ခဲ့တဲ့ စိန့်ပီတာစဘတ် မြို့က မြေအောက် ရထား ဘူတာ က ပေါက်ကွဲမှု အတွင်းမှာ လူ ၁၄ ဦး သေဆုံး ခဲ့ရပြီး အစွန်းရောက် အကြမ်းဖက် တိုက်ခိုက်မှု ဖြစ်ကြောင်း ရုရှ ဘက်က စွပ်စွဲ ထားပါတယ်။

BBC Burmese
http://www.bbc.com/burmese


ဧပြီ ၆ ရက်၊ ၂၀၁၇ ခုနှစ်။ ကေအိုင်စီ

လက်ရှိ ကျင်းပနေသည့် ၁၆ ကြိမ်မြောက် ကေအဲန်ယူ-ကရင်အမျိုးသားအစည်းအရုံး ကွန်ဂရက်၏ ၁၈ ရက်မြောက်နေ့ ယနေ့ (ဧပြီ ၆ ရက်နေ့)တွင် လာမည့် ၄နှစ် သက်တမ်းအတွက် ဦးဆောင်သွားမည့် ခေါင်းဆောင်သစ်များကို လျှို့ဝှက်မဲစနစ်ဖြင့် စတင်ရွေးကောက်နေပြီဖြစ်သည်။

ကေအဲန်ယူ ခေါင်းဆောင်သစ်များကို ရွေးချယ်တင်မြောက်ရာတွင် မဲပေးခွင့်ရှိသူ ကိုယ်စားလှယ် ၂၁၇ ဦးမှ ရှေးဦးစွာ ဗဟိုကော်မတီဝင်လောင်း ၆၀ ကိုရွေးချယ်ရမည်ဖြစ်သည်။ ထို့နောက် ရွေးချယ်ခံရသူ ကိုယ်စား လှယ်လောင်း ၆၀ ဦးထဲမှ ယခုကွန်ဂရက်ဆုံးဖြတ်ချက်အရ ပြန်လည်တိုးချဲ့ထားသည့် ကော်မတီဝင်ဦးရေ ၅၅ ဦးကို ပြန်လည်ရွေးကောက် ရမည်ဖြစ်သည်။

ရွေးကောက်ပွဲအစီအစဉ်များအရ ရွေးချယ်ခံထားရသည့် ဗဟိုကော်မတီဝင် ၅၅ ဦးထဲမှ ကေအဲန်ယူတွင် သြဇာအရှိဆုံး ကြီး ၅ ကြီးဖြစ်သည့် ဥက္ကဌ၊ ဒုဥက္ကဌ၊ အထွေထွေအတွင်းရေးမှူးချုပ်နှင့် တွဲဖက်အတွင်းရေးမှုး ၁ နှင့်၂ တို့ကို ရွေးကောက်တင်မြှောက်ကြမည်ဖြစ်သည်။

ရွေးကောက်ပွဲအဆင့်တိုင်းတွင် လျှို့ဝှက်မဲပေးစနစ်ဖြင့် ပြုလုပ်သွားမည်ဖြစ်ပြီး ရွေးချယ်ခံရသည့် ကြီး ၅ ကြီးမှ ဗဟိုအလုပ်အမှုဆောင်ကော်မတီဝင် ၁၁ ဦးနှင့်အတူ ဌာနဆိုင်ရာ တာဝန်ခံများကို ပြန်လည်ရွေးချယ်ကြမည် ဖြစ်သည်ဟု သိရသည်။

ကေအဲန်ယူ ရွေးကောက်ပွဲကို ပြည်တွင်း ပြည်ပ ကရင်အမျိုးသားများနှင့် နိုင်ငံရေး စိတ်ဝင်စားသူများက ဥက္ကဌသစ် မည်သူဖြစ်လာမည်ကို စိတ်ဝင်တစားစောင့်ကြည့်နေပြီး
အမျိုးသားရေးနှင့်တိုင်းရင်းသားအရေးအတွက် မှန်မှန်ကန်ကန်ဦးဆောင်မှု ပြုနိုင်သည့် ခေါင်းဆောင်ကို ရွေးချယ်ပေးစေလိုသည်ဟု ပြည်တွင်းပြည်ပ ကရင်အမျိုးသားများက ပြောသည်။

လက်ရှိ ကျင်းပနေသည့် ကေအဲန်ယူ ရွေးကောက်ပွဲကို ရွေးကောက်ပွဲကော်မရှင် ဥက္ကဌအဖြစ် ဖလုံ-စဝေါ်ဒီမို ကရက်တစ်ပါတီ ဒုတိယ ဥက္ကဌ မန်းအောင်ပြည်စိုး၊ အတွင်းရေးမှူး အကျိုးဆောင်အဖြစ် ကရင်သတင်းဌာန (ကေအိုင်စီ) အယ်ဒီတာချုပ် နန်းဖော့ဂေ၊ အဖွဲ့ဝင်များအဖြစ် မန်းကျော်ငြိမ်း၊ ဗိုလ်မှူးစောအောင်စီ၊ စောအယ်ကလူ၊ စောစိန်ဝင်းနှင့် စောကပေါ်မှူးတို့က တာဝန်ယူ ပြုလုပ်ပေးလျှက်ရှိသည်။

 ကေအိုင်စီ
http://kicnews.org



ယာဉ်မောင်းနှင့် ယာဉ်မောင်းအကူ ဖော်ထုတ်လိုက်တဲ့ပြည်မြို့က လူသတ်မှု
ပြည် ဧပြီ (၆)ရက်နေ့

ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် ရန်ကုန်မြို့ သို့ ကားအော်ဒါငှားသူ အမျိုးသမီးတစ်ဦး၏ ပစ္စည်းများမှ မသင်္ကာဖွယ်ဖြစ်ကြောင်း ယာဉ်မောင်းမှကားရပ်၍ လှည့်ကင်းရဲအဖွဲ့အား သတင်းပေး ပို့တိုင်ကြားရာမှ လူသတ်မှု တစ်ခုပေါ်ပေါက်ခဲ့ကြောင်း သိရသည်။

ဖြစ်စဉ်မှ ဧပြီ(၅)ရက်နေ့ ည(၁၁)နာရီ(၃၀)အချိန်ခန့်တွင် ဆည်မြောင်းတည်ဆောက်ရေး(၂)၊ ရွှေတံခါးရပ်ကွက် ပြည်မြို့မှရန်ကုန်မြို့သို့ ယာဉ်မောင်ကိုကျော်စိုးဦးနှင့် ယာဉ်မောင်းအကူ ကိုသန့်ဇင်ထွန်းတို့ကားအော်ဒါလိုက်ခဲ့ကြကြောင်းသိရသည်။

“ကျွန်တော်က ကိုးသောင်းရောက်မှ ကားပေါ်တက်လာတာ ကားပေါ်မှာ ပါလာတဲ့ ကားငှားသူအမျိုးသမီးရဲ့ ပစ္စည်းတွေကို မသင်္ကာဘူးလို့ ကိုကျော်စိုးဦးက ဖုန်းဆက်ပြောလို့ ကျွန်တော်က ကားနောက်ခန်းက လိုက်ခဲ့တာ အမျိုးသမီးကရှေ့ခန်းလာထိုင် အတင်းပြောခဲ့တာ။ ဒါပေမဲ့ကျွ
န်တော်က နောက်ခန်းကထိုင်ပြီး အထုပ်ကြီးကို ကိုင်ကြည့်တော့ သိပ်ပြီးဘဝင်မကျဖြစ်တာနဲ့ ကိုကျော်စိုးဦးကို SMILE MOTEL ရှေ့ရောက်တော့ ကားကိုရပ်ခိုင်းပြီး ကားပေါ်ပါလာတဲ့ ပစ္စည်းတွေက ဘာတွေလဲမေးတော့ သူလဲမသိဘူး သူကားပေါ်မတင်ရဘူးလို့ပြောတယ်။ ဒါနဲ့အစ်မ ကျွန်တော်တို့ကားပေါ်ပါလာတဲ့ ပစ္စည်းတွေကဘာတွေလဲမေးတော့ အဲဒီအမျိုးသမီးက မဖြေဘူး အဲလိုမေးနေတုန်း ကျောက်ရုပ်ဘက်ကနေလှည့်ကင်းရဲကားလာတော့ တားပြီးတိုင်ခဲ့လို့ အခုလိုလူသတ်မှုပေါ်ပေါက်ခဲ့တာ”ဟု ယာဉ်မောင်းအကူ ကိုသန့်ဇင်ထွန်းကပြောသည်။


ထို့နောက် ရဲတပ်ဖွဲ့မှ အဆိုပါကားအား ငှားရမ်းလာသူအား ၄င်းကားပေါ်တွင်ရှိသော ပစ္စည်းများနှင့်မေးမြန်းခဲ့ရာ သေချာပြောပြဖြေကြားခြင်း မရှိသဖြင့် ရဲစခန်းသို့ခေါ်ဆောင်လာကာ ထပ်မံစစ်ဆေးခဲ့ကြောင်းဆိုသည်။

“ကျွန်တော်တို့ လှည့်ကင်းအဖွဲ့က ကျောက်ရုပ်ဘက်ကနေ လှည့်ကင်းလှည့်လာတော့SMILE MOTEL ရှေ့မှာကားအဖြူတစ်စီးက တားတော့ ရပ်ပြီး ဘာကူညီရမလဲမေးတယ်။ ကားဆရာက သူ့ကားပေါ်ပါလာတဲ့ ပစ္စည်းတွေကိုမသင်္ကာလို့ စစ်ဆေးပေးဖို့ပြောလို့စခန်းခေါ်လာပြီး စစ်ဆေးတော့ အမျိုးသမီးအလောင်းကို တိပ်တွေနဲ့ ပတ်ပြီး အိပ်ထဲထည့်လာတာကို စစ်ဆေးတွေ့ရှိရတယ်။  အမျိုးသမီးကတော့ အသက်မရှိတော့ဘူး”ဟု လှည့်ကင်းအဖွဲ့ခေါင်းဆောင် ပြည်မြို့မရဲစခန်းမှ ဒုရဲအုပ်ကပြောသည်။


အဆိုပါကားငှားလာသူ အမျိုးသမီးမှာ ဒေါ်နေဝါစိုး(ခ)ဒေါ်ဖြူခိုင်ဖြစ်ပြီး ပဲခူးမြို့ အမှတ်(၁၅၈)၊ ဗိုလ်မင်းသိမ်း(၂)လမ်း၊ ဟံသာဝတီရပ်ကွက်တွင်နေထိုင်သူဖြစ်ကြောင်းသိရပြီး လွန်ခဲ့သောတစ်နှစ်ခန့်က အိမ်ထောင်ကွဲနေသည့် ခင်ပွန်းဖြစ်သူ ဦးထွန်းမင်းဦး ဦးစီးအရာရှိ၊ ဆည်မြောင်းတည်ဆောက်ရေး(၂)၊ ရွှေတံခါးရပ်ကွက်၊ ပြည်မြို့ရှိ ဌာနပိုင်နေအိမ် ဦးထွန်းမင်းဦး၏ နောက်အိမ်ထောင် မသိင်္ဂီဝင်း၊ ပြည်နည်းပညာတက္ကသိုလ်မှ စက်မှုဘာသာရပ်ပြကျောင်းဆရာမ တစ်ဦးတည်းရှိနေစဉ် ဧပြီ(၅)ရက်နေ့ ည(၁၀)နာရီအချိန်ခန့် သွားရောက် စကားပြောရာမှ ဧည့် ခန်းတွင် လုံးထွေးသတ်ပုတ်ရန် ဖြစ်ကြပြီး အသင့်တွေ့ရှိသော အရိုး(၉)လက်မခန့်ရှိ တစ်မတ်လုံး သံရိုးတပ်တူ ဖြင့် ဦးခေါင်းနောက်စေ့ယာဘက်အား တစ်ချက်ထုခဲ့ကြောင်း ထို့နောက်အလောင်းအား အစိမ်းရောင်တိပ်များဖြင့် ပတ်ကာထုတ်ပိုးပြီး ကားကိုရန်ကုန်သို့ငှားကာပစ္စည်းနှင့် အလောင်းအားတင်၍ ထွက်ခဲ့စဉ်လှည့်ကင်းနှင့်တွေ့ခဲ့ကြောင်း သတင်းရရှိသည်။

ထို့ကြောင့်ဖြစ်စဉ်နှင့် ပတ်သက်၍ ပြည်မြို့မရဲစခန်း ဒုရဲမှူးစခန်းမှူးတင်ကိုမှ တရားလိုပြုလုပ်တိုင်တန်းချက်အရပြည်မြို့မရဲစခန်း(ပ)အမှတ် ၈၃၁/၂၀၁၇ ၊ရာဇသတ်ကြီးပုဒ်မ ၃၀၂/၂၀၁အရအမှုဖွင့်ဆောင်ရွက်ထားရှိကြောင်း သတင်းရရှိသည်။

ပြည့်သဲမောင်(ပြည်)
ပြည်ခရိုင်မှုခင်းနှင့်သတင်းစုံ
https://www.facebook.com/pyaynews/



( ကချင်ပြည်နယ်က မြစ်ဆုံစီမံကိန်း ကို တွေ့ရစဉ် ) Photo: Kyaw Myo Min/RFA
မြစ်ဆုံရေကာတာစီမံကိန်းကို စွန့်လွှတ်ဖို့ တရုတ်အစိုးရက မြန်မာအာဏာပိုင်တွေနဲ့ ဆွေးနွေးနေတယ်လို့ သတင်းရပါတယ်။ မြန်မာအစိုးရထံက စီးပွားရေးနဲ့ မဟာဗျူဟာအရ အရေးပါတဲ့ တခြားအကျိုးခံစားခွင့်တွေ ရရှိမယ်ဆိုရင် မြစ်ဆုံစီမံကိန်းကို တရုတ်အစိုးရအနေနဲ့ ဖျက်သိမ်းလိုကြောင်း သတင်းဇစ်မြစ်နေရာ ၇ခုကနေ ကြားသိရတယ်လို့ မနေ့ကလာတဲ့ ရိုက်တာသတင်းမှာ ဖေါ်ပြထားပါတယ်။

နိုင်ငံတော်သမ္မတ ဦးထင်ကျော် တရုတ်ပြည်ကို ဒီကနေ့ စတင်သွားရောက်မယ့် ခရီးစဉ်အတွင်း ဒီကိစ္စကို ညှိနှိုင်းဆွေးနွေးမယ်လို့လည်း မြန်မာထိပ်တန်းအရာရှိတွေက ပြောပါတယ်။ မြစ်ဆုံစီမံကိန်းကို ဖျက်သိမ်းပြီး တခြားရေကာတာ အသေးစားတွေ ဆောက်လုပ်ခွင့်ပြုဖုိ့၊ မြန်မာပြည်ရဲ့
ပင်လယ်ဆိပ်ကမ်းတစ်ခုကို အထူးအသုံးပြုခွင့်ပေးဖို့ စတဲ့အချက်တွေကို စဉ်းစားနေကြတယ်လို့ ဆိုပါတယ်။

ကန်ဒေါ်လာ သန်းပေါင်း ၃၆ဝဝ ခန့်ကုန်ကျခံပြီးတည်ဆောက်မယ့် အဲဒီ မြစ်ဆုံရေကာတာ ရေအားလျှပ်စစ်စီမံကိန်းကနေ ဓါတ်အားမီဂါဝပ် ၆ဝဝဝ ထုတ်လုပ်ပေးမှာဖြစ်တဲ့အတွက် စီမံကိန်းပျက်သွားမှာကို တရုတ်ပြည်ဘက်က အထူးစိုးရိမ်နေခဲ့ပေမယ့် အခုတော့ နစ်နာမှုတွေကို တခြားနည်းနဲ့ အစားထိုးဖို့ စဉ်းစားနေတာဖြစ်ပါတယ်။

ဒီရေကာတာတည်ဆောက်ရေးမှာ တရုတ်အစိုးရဘက်က ကန်ဒေါ်လာသန်းပေါင်းများစွာ အကုန်အကျခံထားပြီးဖြစ်တဲ့အတွက် သမ္မတ ဦးသိန်းစိန် ၂ဝ၁၁ ခုနှစ်က ရပ်ဆိုင်းခဲ့တဲ့ စီမံကိန်းကို အပြီးဖျက်သိမ်းမယ်ဆိုရင် မြန်မာအစိုးရဘက်က နစ်နာကြေးအများအပြားပေးဖုိ့ တာဝန်ရှိပါတယ်။

လက်ရှိမှာ တရုတ်အစိုးရက ကျောက်ဖြူရေနက်ဆိပ်ကမ်းကို အထူးဦးစားပေးသုံးခွင့်ရရှိဖို့ မြန်မာအစိုးရကို တိုက်တွန်းပြောကြားနေကြောင်းနဲ့ မြန်မာအစိုးရကလည်း နယ်စပ်ဒေသက တိုင်းရင်းသားလက်နက်ကိုင်ပြသနာကို ဖြေရှင်းဖို့အတွက် တရုတ်အစိုးရရဲ့ အကူအညီကို လိုအပ်နေကြောင်း ရိုက်တာသတင်းမှာ ဖေါ်ပြထားပါတယ်။

ဒီအတွင်းမှာပဲ မနေ့ကထုတ်တဲ့ တရုတ်အစိုးရပိုင် Global Times သတင်းစာမှာတော့ မြန်မာအစိုးရဟာ မြစ်ဆုံစီမံကိန်း အငြင်းပွားမှုအတွက် အနောက်နိုင်ငံတွေရဲ့ လေသံကို နားထောင်ပြီး ဒီမိုကရေစီအရေးနဲ့ ဒွန်တွဲစဉ်းစားနေတယ်လို့ ဖေါ်ပြထားပါတယ်။ တရုတ်ပြည်က ငွေကြေးမြှုပ်နှံပြီး မြန်မာစစ်အစိုးရ အတည်ပြုခဲ့တဲ့ မြစ်ဆုံရေကာတာ တည်ဆောက်ရေးကို အပြီးရပ်ဆိုင်းမယ်ဆိုရင် ဒီမိုကရေစီအောင်ပွဲအဖြစ် တချို့ကရှုမြင်နေကြောင်း၊ တကယ်တော့ မြစ်ဆုံစီမံကိန်းကို ဆက်လက် အကောင်အထည် ဖေါ်မယ်ဆိုရင် မြန်မာနိုင်ငံမြောက်ပိုင်း ဖွံ့ဖြိုးတိုးတက်လာမှာဖြစ်ပြီး ဒါဟာ လျှပ်စစ်ဓါတ်အားချို့တဲ့နေတဲ့ မြန်မာပြည်အတွက် တကယ့်အခွင့်အရေးကောင်း တခုဖြစ်ကြောင်း၊ မြန်မာပြည်အတွက် ဒီမိုကရေစီအရေးကြီးတာမှန်ကြောင်း၊ ဒါပေမဲ့ ဒီမိုကရေစီစနစ်ဆိုတာ စီးပွားရေးဖွံ့ဖြိုးအောင် လုပ်ဆောင်ရတာဖြစ်ပြီး တိုးတက်မှုတွေကို ရပ်တန့်ပစ်လိုက်ရတဲ့ စနစ်မဟုတ်ကြောင်းလည်း အဲဒီသတင်းစာမှာ ရေးသားထားပါတယ်။

ဒါ့အပြင် မြန်မာနဲ့ တရုတ်အစိုးရအကြား ဒီကိစ္စကိုအဆင်ပြေအောင် ပိုမိုညှိနှိုင်းဖို့ သင့်ကြောင်း၊ ဥပမာအားဖြင့် မြစ်ဆုံကထွက်တဲ့ လျှပ်စစ်ဓါတ်အားကို ရာခိုင်နှုန်းမည်မျှစီ ခွဲဝေသုံးစွဲကြမလဲဆိုတာ ဆွေးနွေးနိုင်သလို တရုတ်ပြည်က မြန်မာပြည်အတွက် စာသင်ကျောင်းတွေ ကျွမ်းကျင်ပညာသင်တန်းတွေ ဖွင့်လှစ်ပေးနိုင်ကြောင်းနဲ့ မြန်မာအစိုးရကို တိုင်းရင်းသားလက်နက်ကိုင်တွေနဲ့ ငြိမ်းချမ်းရေးအတွက်လည်း တရုတ်ပြည်က ကူညီနိုင်ပါကြောင်း စသဖြင့် ဧပြီလ ၅ ရက်နေ့ထုတ် တရုတ်အစိုးရပိုင် Global Times သတင်းစာက ရေးသားလိုက်ပါတယ်။

RFA Burmese
https://www.facebook.com/rfaburmese/


(၆-၄-၂၀၁၇ ရက်နေ့၊ နေပြည်တော်)

ပြည်ထောင်စုသမ္မတ မြန်မာနိုင်ငံတော်၏ နိုင်ငံတော်သမ္မတဦးထင်ကျော် နှင့် ဇနှီးဒေါ်စုစုလွင်တို့သည် တရုတ်ပြည်သူ့သမ္မတနိုင်ငံ သမ္မတ မစ္စတာရှီကျင့်ဖျင် ၏ ဖိတ်ကြားချက်အရ တရုတ်ပြည်သူ့သမ္မတနိုင်ငံသို့ ချစ်ကြည်ရေးခရီး သွားရောက်ရန်အတွက် နေပြည်တော် အပြည်ပြည်ဆိုင်ရာလေဆိပ်မှ ယနေ့ မြန်မာစံတော်ချိန် ၀၇း၅၀ နာရီတွင် အထူးလေယာဉ်ဖြင့် ထွက်ခွာသွားပါသည်။

နိုင်ငံတော်သမ္မတနှင့် ဇနီးတို့အား နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဒုတိယသမ္မတ (၁) ဦးမြင့်ဆွေ၊ ဒုတိယသမ္မတ (၂) ဦးဟင်နရီဗန်ထီးယူ ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် နှင့် တာဝန်ရှိသူများက လေဆိပ်တွင် ပို့ဆောင်နှုတ်ဆက်ခဲ့ပါသည်။

နိုင်ငံတော်သမ္မတ၏ ချစ်ကြည်ရေးခရီးစဉ်တွင် အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး ဦးကျော်တင့်ဆွေ၊ စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီးဒေါက်တာသန်းမြင့်၊ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဝင်းခိုင် ၊ နိုင်ငံခြားရေးဝန်ကြီးဌာန ဒုတိယ၀န်ကြီး ဦးကျော်တင်နှင့် သက်ဆိုင်ရာတာဝန်ရှိပုဂ္ဂိုလ်များ လိုက်ပါသွားကြောင်းသိရှိရပါသည်။

Ministry of Foreign Affairs Myanmar
https://www.facebook.com/mofamyanmar/



တရုတ်နိုင်ငံခြားရေးဝန်ကြီး ၀မ်ယီကို သမ္မတ ဦးထင်ကျော်နဲ့ နိုင်ငံခြားရေးဝန်ကြီး ဒေါ်အောင်ဆန်းစုကြည်တို့မှ လက်ခံတွေ့ဆုံစဉ်
အငြင်းပွားစရာဖြစ်နေတဲ့ ကချင်ပြည်နယ် မြစ်ဆုံရေကာတာစီမံကိန်း ဆက်ပြီး တည်ဆောက်ဖို့ရှိမရှိဆိုတာကို နှစ်နိုင်ငံ အပြန်အလှန်အကျိုးရှိစမယ့် ပူးပေါင်းဆောင်ရွက်မှုနဲ့ မှန်မှန်ကန်ကန်ဖြေရှင်းမှာဖြစ်တယ်လို့ တရုတ်နိုင်ငံခြားရေးဝန်ကြီးဌာန ပြောခွင့်ရ အမျိုးသမီးက မနေ့က ပြောဆိုလိုက်ပါတယ်။

ဒီကနေ့ ကြာသာပတေးနေ့မှာ စတင်မယ့် သမ္မတဦးထင်ကျော်ရဲ့ တရုတ်နိုင်ငံချစ်ကြည်ရေးခရီးစဉ်မတိုင်ခင်မှာ မြစ်ဆုံဆည်နဲ့ ပတ်သက်လို့ တရုတ်အစိုးရဘက်က တုန့်ပြန်ပြောဆိုလိုက်တာဖြစ်ပါတယ်။

မအင်ကြင်းနိုင်က အပြည့်အစုံကိ ဆက်ပြီး တင်ပြမှာပါ။

တရုတ်သမ္မတ ရှီကျင့်ဖျင်ရဲ့ ဖိတ်ကြားချက်နဲ့ သမ္မတ ဦးထင်ကျော်သွားမယ့် ပထမဆုံးအကြိမ် တရုတ်နိုင်ငံချစ်ကြည်ရေး ခရီးစဉ်အတွင်း မြစ်ဆုံရေကာတာစီမံကိန်းနဲ့ ပတ်သက်လို့ ဆွေးနွေးဖို့ရှိမရှိ စောင့်ကြည့်နေချိန်မှာ အခုလို တရုတ်အစိုးရဘက်က သူတို့ သဘောထားကိုပြောကြားလိုက်တာဖြစ်ပါတယ်။

တရုတ်နိုင်ငံခြားရေးဝန်ကြီးဌာနမှာ ဗုဒ္ဓဟူးနေ့က ပြုလုပ်တဲ့ ပုံမှန်သတင်းစာရှင်းလင်းပွဲအတွင်း သတင်းထောက်တဦးက မြစ်ဆုံဆည်ကိစ္စနဲ့ ပတ်သက်လို့ အခုလို မေးမြန်းခဲ့ပါတယ်။

“မြန်မာနိုင်ငံမှာ မြစ်ဆုံရေကာတာ စီမံကိန်းနဲ့ ပတ်သက်ပြီး ဆက်မလုပ်ဖို တရုတ်အစိုးရက သဘောတူညီခဲ့တယ်လို့ နားလည်ထားတဲ့အတွက် ဒီသတင်းဟာ မှန်ကန်သလား ဆိုတာ အတည်ပြုပေးပါ။ တကယ်လို့ မှန်ခဲ့တယ်ဆိုရင်လည်း ဘာကြောင့်လဲဆိုတာ သိချင်ပါတယ်။”

ဒီမေးခွန်းနဲ့ပတ်သက်ပြီး တရုတ်နိုင်ငံခြားရေးဝန်ကြီးဌာန ပြောခွင့်ရ အမျိုးသမီး Hua Chunying က အခုလို ဖြေဆိုပါတယ်။

“တရုတ်နဲ့ မြန်မာတို့ဟာ ချစ်ခင်ရင်းနှီးတဲ့ အိမ်နီးချင်းနိုင်ငံတွေဖြစ်ပါတယ်။ ဒါကြောင့် နှစ်နိုင်ငံ ဘုံအကျိုးစီးပွားအတွက် နှစ်ဦးနှစ်ဖက်အပြန်အလှန် အကျိုးပြု ပူးပေါင်းဆောင်ရွက်မှုကို ပြုလုပ်သွားမှာဖြစ်ပါတယ်။ မြစ်ဆုံဆည် ရေအားလျှပ်စစ်စီမံကိန်းဟာ စီးပွားရေး ပူးပေါင်းဆောင်ရွက်တဲ့ စီမံကိန်းတရပ်ဖြစ်ပြီး ဒါကို လေ့လာစီစစ်ပြီး သဘောတူညီမှု လုပ်ငန်းအဆင့်ဆင့်အရ ဆောင်ရွက်ခဲ့တာဖြစ်ပါတယ်။ ပူးပေါင်းဆောင်ရွက်မှုနဲ့ ပတ်သက်ပြီး ပြဿနာတွေ၊ အခက်အခဲတွေကို ထိထိရောက်ရောက်ဖြေရှင်းနိုင်ဖို့ အတွက် တရုတ်အစိုးရအနေနဲ့ မြန်မာဘက်နဲ့ အဆက်အသွယ်ရှိသွားမှာဖြစ်ပါတယ်။ ဒါအပြင် တရုတ်-မြန်မာ နှစ်နိုင်ငံ ပြည်သူတွေရဲ့ အကျိုးကို ပိုပြီး သယ်ပိုးဆောင်ရွက်နိုင်ဖို့ ကောင်းမွန်တဲ့ နှစ်နိုင်ငံ ပူးပေါင်းဆောင်ရွက်မှုကို ဆက်ပြီး တိုးတက်ဖို့ ထိန်းသိမ်းသွားမှာဖြစ်ပါတယ်။”

အခုလို မြစ်ဆုံဆည်စီမံကိန်းကို ဆက်ပြီးမလုပ်ဖို့ တရုတ်အစိုးရဘက်က သဘောထားပြောင်းဖို့ ရှိတယ်ဆိုတဲ့ သတင်းအပေါ်မှာ တရုတ်-မြန်မာ အရေးကျွမ်းကျင်သူ ဒေါက်တာလှကျော်ဇော်က အခုလို သုံးသပ်ပါတယ်။

“ဗမာပြည်နဲ့ ပတ်သက်လို့ ကျမကြည့်တာကတော့ တရုတ်က အစောကြီးကတည်းက ပြောတယ်။ မြစ်ဆုံကိစ္စကို နှစ်ဖက်အစိုးရ၊ နှစ်ဖက် ပြည်သူလူထု မထိခိုက်တဲ့အောက်မှာ မြန်မာပြည်သူလူထုအတွက် အကျိုးရှိမယ့် ကိစ္စတွေကို သူတို့ ဆက်လက်လုပ်ဆောင်မှာပါလို့တော့ ပြောထားတယ်။ အဲတော့ မြစ်ဆုံကိစ္စ သတ်သတ်ကြီး ဟုတ်ချင်မှ ဟုတ်မယ်။ မြစ်ဆုံကိစ္စနဲ့ ဆက်နွယ်နေတဲ့ အခြားစီးပွားရေးလုပ်ငန်းတွေကို ထည့်သွင်းစဉ်းစားပေးတာလည်း ဖြစ်ကောင်း ဖြစ်နိုင်တယ်။ နောက်တခုက တရုတ်ရဲ့ ပိုးလမ်းမကြီးကိစ္စက တော်တော်ကို အရှိန်ရနေတာကိုး။ အခြားနိုင်ငံတွေမှာလည်း ဒီလုပ်ငန်းက အရှိန်ရနေတော့ ဒီကိစ္စအတွက်လည်း အခြားစီမံကိန်းတွေ ပိုမိုကောင်းမွန်တဲ့ စီမံကိန်းတွေ တွေ့ရင် သူတို့ ပြောင်းလဲ လုပ်နိုင်ပါတယ်။”

ဗုဒ္ဓဟူးနေ့ထုတ် ရိုက်တာသတင်းမှာတော့ မြန်မာအစိုးရအဆင့်မြင့်အရာရှိတွေအပြင် မြစ်ဆုံရေကာတာစီမံကိန်း သဘောတူညီမှုနဲ့ ပတ်သက်လို့ ရင်းနှီးမှုရှိတဲ့ လူတဦးနဲ့ တရုတ်အစိုးရပိုင် ကုမ္ပဏီနဲ့ နီးစပ်သူတဦးတို့ကို ကိုကားပြီး အမည်မဖေါ်လိုတဲ့ သတင်းရပ်ကွက် (၇)ခု အဆိုအရ တရုတ်အစိုးရအနေနဲ့ မြစ်ဆုံရေကာတာစီမံကိန်းကို ဆက်လက်လုပ်ဆောင်မယ့် ရပ်တည်ချက် ပြောင်းပြီး အခြားစီးပွားရေးလုပ်ငန်းတွေနဲ့ အစားထိုးဖို့ လိုလားတဲ့ အရိပ်လက္ခဏာတွေပြခဲ့တယ်လို့ ဖေါ်ပြထားပါတယ်။

အငြင်းပွားဖွယ်ဖြစ်နေတဲံ ဧရာဝတီမြစ်ပေါ်မှာ တည်ဆောက်မယ့် မြစ်ဆုံဆည်ရေအားလျှပ်စစ်စီမံကိန်းတွေကို လေ့လာသုံးသပ် အကဲဖြတ်စစ်ဆေးဖို့ သမ္မတ ဦးထင်ကျော် ဦးဆောင်ပြီး ဖွဲ့စည်းခဲ့တဲ့ ကော်မရှင်အနေနဲ့လည်း မကြာခင် အစီရင်ခံအပြီးသတ်ထုတ်ပြန်ဖို့ ရှိကြောင်း အမျိုးသားလုံခြုံရေးအကြံပေး ဦးသောင်းထွန်းက ပြောကြားခဲ့ပါတယ်။

ဒါကြောင့်လည်း ဦးထင်ကျော်ရဲ့ ခရီးစဉ်အတွင်း မြစ်ဆုံဆည်စီမံကိန်းကို တရုတ်အစိုးရနဲ့ ဆွေးနွေးဖို့ရှိတယ်လို့ မြန်မာအစိုးရ အဆင့်မြင့်အရာရှိတဦးကို ကိုးကားပြီး ရိုက်တာသတင်းဌာနက ဖေါ်ပြခဲ့ပါတယ်။

သမ္မတ ဦးထင်ကျော်ရဲ့ (၆)ရက်ကြာ တရုတ်ခရီးစဉ်အတွင်း တရုတ်ဘက်က အလေးထားဆွေးနွေးမယ့်အကြောင်းအရာတွေထဲ တောင်တရုတ်ပင်လယ် ကိစ္စအဓိကပါဝင်မှာဖြစ်တယ်လို့လည်း ဒေါက်တာလှကျော်ဇော်က သုံးသပ်ပါတယ်။

“တရုတ်ပြည်က တောင်တရုတ်ပင်လယ်ကိစ္စရှိတယ်လေ။ ဖိလစ်ပိုင်သမ္မတ ဒူတာတေး တက်ကတည်းက တရုတ်နဲ့ အတော်ကို ဆက်သွယ်ရေးကောင်းလားတယ်။ အဲတော့ တရုတ်က ဒီကိစ္စကို ပြတ်သွားအောင်စီစဉ်ချင်ပုံရတယ်။ တောင်တရုတ်ပင်လယ်ကိစ္စမှာ အာဆီယံနိုင်ငံတွေနဲ့ တရုတ်နဲ့ Code of Conducts (လိုက်နာရမယ့် စည်းမျဉ်းစည်းကမ်းများ) ကို မေလမှာ အပြီးသတ်လက်မှတ်ထိုးနိုင်အောင် တရုတ်က ပြင်းပြင်းထန်ထန်ကြိုးစားနေတယ်။ အဲဒီအတွက်လည်း မြန်မာသမ္မတ ဦးထင်ကျော်ကို ဖိတ်ပုံရတယ်။”

သမ္မတ ဦးထင်ကျော်ရဲ့ အခုခရီးစဉ်မှာ နိုင်ငံတော်အတိုင်ပင်ခံရုံး ၀န်ကြီး ဦးကျော်တင့်ဆွေ၊ ကူးသန်းရောင်းဝယ်ရေး ၀န်ကြီး ဦးသန်းမြင့်နဲ့ ဆောက်လုပ်ရေးဝန်ကြီး ဦးဝင်းခိုင် တို့လိုက်ပါသွားခဲ့ပါတယ်။ ခရီးစဉ်အတွင်း ရှီယန်း၊ စီချွမ်နဲ့ ယူနန်ပြည်နယ်အပါအ၀င်၊ ရှန်ဟိုင်းနဲ့ ကွမ်ကျိုးတို့အပြင် မြို့တော် ဘေကျင်းမှာတော့ တရုတ်သမ္မတ ရှီကျင်ဖျင်နဲ့ သမ္မတဦးထင်ကျော်တွေ့ဆုံမှာဖြစ်ပါတယ်။

ဧပြီလ (၁၀) ရက်နေ့မှာ သမ္မတဦးထင်ကျော်နဲ့ တရုတ်နိုင်ငံခြားရေးဝန်ကြီးဌာန အဆင့်မြင့်အရာရှိတို့သဘောတူလက်မှတ်ရေးထိုးပွဲရှိတဲ့အပြင် ပူးတွဲ သတင်းစာရှင်းလင်းပွဲကိုလည်း တရုတ်ပြည်သူ့ခန်းမဆောင်မှာ ကျင်းပဖို့ရှိကြောင်း တရုတ်နိုင်ငံခြားရေးဌာနက ထုတ်ပြန်ထားပါတယ်။

အင်ကြင်းနိုင်  / ဗွီအိုအေ (မြန်မာပိုင်း)
http://burmese.voanews.com