စွန့်ပစ်မြေစာပုံပြိုကျမှုကြောင့် ပျောက်ဆုံးနေသူတွေကို ရှာဖွေနေဆဲဖြစ်

ဖားကန့်မြို့နယ် ဆိပ်မူအုပ်စု ကန်ခမ်စုပေါင်းစွန့်ပစ်မြေစာပုံ ပြိုကျတာကို ၂ဝ၁၈ ခုနှစ် မတ်လ ၁၇ ရက်နေ့က တွေ့ရစဉ်/ Photo: PhyoKyawThu

ကချင်ပြည်နယ် ဖားကန့်မြို့နယ် ဆိပ်မူအုပ်စု ကန်ခမ်စုပေါင်းစွန့်ပစ်မြေစာပုံ မနေ့ညက ပြိုကျတာကြောင့် ရေမဆေးကျောက်ရှာနေသူ ၆ ဦးလောက်နဲ့ ကျောက်စိမ်းတောင် ကုမ္ပဏီရဲ့ မြေစာသယ်ယာဉ် ၂ စီး မြေစာပိပြီး နစ်မြုပ်ပျောက်ဆုံးနေပါတယ်။

ဒီကနေ့ မနက်ပိုင်းအထိ ပျောက်ဆုံးနေသူတွေကို စက်ယန္တရားတွေနဲ့ ရှာဖွေနေဆဲဖြစ်တယ်လို့ မြေစာပုံပြိုကျ တဲ့နေရာကို ကိုယ်တိုင်သွားရောက်ခဲ့တဲ့ ဆွတ်အောင်ရာရွာ အုပ်ချုပ်ရေးမှူး ဦးမြင့်ခိုင်က ပြောပါတယ်။

"အတိအကျတော့ မသိရသေးဘူးခင်ဗျ။ အခုမှ စိစစ်နေတုန်းရှိသေးတယ်။ ကုမ္ပဏီက ကား ၂ စီးကတော့ အဲဒီမြေစာခါးလယ်မှာတော့ အဲဒီလို ပြတ်ကျခဲ့တာ။ ကျနော်သိသလောက်ပေါ့နော်၊ လူ ၆ ယောက်လောက်နဲ့ ယန္တရားကတော့ ကား ၂ စီးပေါ့နော်။ မြေစာပုံမှာပဲ ကယ်ဖို့ရာ ပြုလုပ်နေကြတုန်း ရှိသေးတယ်"

အစိုးရဌာနဆိုင်ရာတွေ၊ လူမှုကူညီရေးအဖွဲ့တွေက ရှာဖွေကူညီရေးတွေ ဆောင်ရွက်နေကြပြီး မြေစာပုံထဲကို လူဦးရေ ဘယ်လောက်ပါသွားတယ်ဆိုတာကို စိစစ်ရှာဖွေနေဆဲဖြစ်တယ်လို့ ဆိုပါတယ်။

မနေ့ည ၁၁ နာရီလောက်ကပြိုကျခဲ့တဲ့ အဲဒီ မြေစာပုံဟာ ၂၀၁၅ နိုဝင်ဘာလအတွင်းက လူ ၁ ရာကျော် မြေစာပိလို့ သေဆုံးခဲ့တဲ့ ကန်ခမ်စုပေါင်းစွန့်ပစ်မြေစာပုံဖြစ်ပါတယ်။

ဖားကန့် ကျောက်စိမ်းတွင်းနယ်မြေမှာ တစ်နိုင်ငံလုံးက လာရောက်ရွှေ့ပြောင်း လုပ်ကိုင်နေကြသူ စုစုပေါင်း ခန့်မှန်း ၂ သိန်းဝန်းကျင်ရှိပါတယ်။

RFA Burmese
https://www.rfa.org/burmese